• జాతీయ సంస్థల్లో భర్తీ కాని సీట్లు

    * శాశ్వత భవనాలు, మౌలిక వసతులు లేని ఫలితం
    * ఆసక్తి చూపని విద్యార్థులు
    * ఐఐఎం మినహా మిగతా వాటిల్లో మిగులుతున్న సీట్లు

    ఈనాడు, అమరావతి: రాష్ట్రంలోని జాతీయ విద్యా సంస్థల్లో సీట్లు పూర్తి స్థాయిలో నిండని పరిస్థితి నెలకొంది. శాశ్వత భవనాలు, ప్రయోగశాలల కొరత వల్ల వీటిల్లో చేరేందుకు విద్యార్థులు ఆసక్తి చూపడం లేదు. ఐదు విద్యాసంస్థల్లో కర్నూలు ట్రిపుల్‌ఐటీ మినహా మిగతావి తాత్కాలిక భవనాల్లో కొనసాగుతున్నాయి. ప్రైవేటు కళాశాలల భవనాలను అద్దెకు తీసుకుని వీటిని నిర్వహిస్తున్నారు. నిట్‌ తాడేపల్లిగూడెంలో వచ్చే ఏడాది ప్రవేశాలకు భవనాల కొరత ఉంది. నిట్‌, ఐఐటీ, ట్రిపుల్‌ఐటీల్లో 2015-16లో ప్రవేశాలు పొందిన విద్యార్థులు 2019-20లో మొదటి బ్యాచి కింద బయటకు రానున్నారు. మొదటి స్నాతకోత్సవానికి కూడా శాశ్వత భవనాలు అందుబాటులోకి రావడం లేదు.
    మూడేళ్లు గడిచినా..
    జాతీయ విద్యా సంస్థల్లో చదవాలని ప్రతి విద్యార్థి కలలుకంటారు. అంత ప్రాధాన్యమున్న సంస్థల్లో ఇప్పుడు విద్యార్థుల చేరిక తగ్గడం గమనార్హం. ఐఐఎం మినహా మిగతా వాటిల్లో ప్రవేశాలు పూర్తి స్థాయిలో జరగడం లేదు. ఐసర్‌లో గతేడాది మాత్రమే వందశాతం భర్తీ అయ్యాయి. నిట్‌లో పదుల సంఖ్యలో సీట్లు మిగులుతున్నాయి. ఐఐటీ తిరుపతిని కృష్ణతేజ విద్యాసంస్థల విద్యా ప్రాంగణంలో నిర్వహిస్తుండగా, ఐసర్‌ను శ్రీరామ ఇంజినీరింగ్‌ కళాశాలలో కొనసాగిస్తున్నారు. ఐఐఎంను ఆంధ్రా విశ్వవిద్యాలయంలో నిర్వహిస్తున్నారు. నిట్‌ను తాడేపల్లిగూడెం సమీపంలోని పెదతాడేపల్లి వద్దనున్న వాసవి ఇంజినీరింగ్‌ కళాశాలలో నిర్వహిస్తున్నారు. ఐఐటీ, ఐసర్‌, నిట్‌లకు ప్రహరీ నిర్మాణాలు 75శాతం పూర్తయ్యాయి. ఐఐటీ తిరుపతి 2024వరకు డీపీఆర్‌ మొత్తం వ్యయం రూ.3,150కోట్లకుగాను 2017-20వరకు రూ.1074.40కోట్లకు ఆమోదం లభించింది. నిట్‌కు రూ.460.50కోట్లకు డీపీఆర్‌ ఆమోదించారు.
    వచ్చే ఏడాది నిట్‌ పరిస్థితి..
    పెదతాడేపల్లి వద్దనున్న వాసవి ఇంజినీరింగ్‌ కళాశాలలో నిట్‌ను తాత్కాలికంగా ఏర్పాటుచేశారు. ఇక్కడ దాదాపు 32కు పైగా గదులున్నాయి. శాశ్వత భవనాల నిర్మాణానికి రూ.206కోట్లు మంజూరైనా టెండరు దశ దాటలేదు. ప్రస్తుతం నిర్వహిస్తున్న వాసవి కళాశాల యాజమాన్యంతో కుదుర్చుకున్న ఒప్పందం ఈ ఏడాదితో ముగియనుంది. భవనాన్ని ఖాళీ చేయాలని యాజమాన్యం ఒత్తిడి తెస్తోంది. ఒక వేళ నిర్మాణం పూర్తయ్యేవరకు కొనసాగించాల్సి వచ్చినా ఇప్పటివరకు కేటాయించిన భవనాలు తప్ప అదనంగా ఇవ్వలేమని పేర్కొంటోంది. ఈ నేపథ్యంలో వచ్చే ఏడాది ప్రవేశాలు పొందేవారికి ఎక్కడ తరగతులు నిర్వహించాలన్నది ప్రశ్నార్థకమవుతోంది. మెటలర్జీ, కెమికల్‌, బయోటెక్నాలజీ కోర్సులకు సంబంధించి ప్రయోగశాలలు స్థానికంగా లేకపోవడంతో ఈ విద్యార్థులను వరంగల్‌ నిట్‌కు పంపించి ప్రయోగాలు చేయిస్తున్నారు.

    130 ఇంజినీరింగ్‌ కళాశాలలకు షాక్‌

    * లోపాలపై జేఎన్‌టీయూ తాఖీదులు
    * అధ్యాపకుల కొరతే ప్రధాన కారణం
    * బయోమెట్రిక్‌ హాజరూ పరిగణనలోకి
    * ప్రముఖ కళాశాలల్లోనూ సీట్ల కోత!

    ఈనాడు, హైదరాబాద్‌: ఇంజినీరింగ్‌ కళాశాలల్లో గత నెలలో తనిఖీలు నిర్వహించిన జేఎన్‌టీయూ మొత్తం 130 కళాశాలలు నిబంధనలు పాటించడం లేదని తేల్చింది. అధ్యాపకుల బయోమెట్రిక్‌ హాజరునూ పరిగణలోకి తీసుకున్న విశ్వవిద్యాలయం వాటికి వివరణ ఇమ్మంటూ తాఖీదులు జారీ చేసింది. వచ్చే విద్యా సంవత్సరానికి (2018-19) తమ కళాశాలలకు అనుబంధ గుర్తింపు జారీ చేయాలని 195 ఇంజినీరింగ్‌ కళాశాలలు జేఎన్‌టీయూకు గత ఫిబ్రవరిలో దరఖాస్తు చేసుకున్నాయి. వర్సిటీ అనుమతి ఇచ్చిన కళాశాలల్లోనే బీటెక్‌ కోర్సుల్లో ప్రవేశానికి అవకాశం దక్కుతుంది. ఫిబ్రవరి 26 నుంచి మార్చి 24 వరకు ఆచార్యుల బృందాలు వాటిని తనిఖీలు చేశాయి. వారిచ్చిన నివేదికను క్రోడీకరించిన వర్సిటీ అధికారులు ఆయా లోపాలను పేర్కొంటూ 130 కళాశాలలకు తాఖీదులు జారీ చేసి 10 రోజుల్లో వివరణ ఇవ్వాలని పేర్కొన్నారు. ఆలోపు సమాధానాలు రాకుంటే బ్రాంచీల్లో సీట్లకు కోత విధిస్తారు. నోటీసులు అందుకున్న వాటిలో పలు ప్రముఖ కళాశాలలూ ఉండటంతో యాజమాన్యాలు కంగుతిన్నాయి. తమ కళాశాలకు న్యాక్‌ ‘ఏ’ గ్రేడ్‌ హోదా, కోర్సులకు నేషనల్‌ బోర్డు ఆఫ్‌ ఎక్రిడేషన్‌ (ఎన్‌బీఏ) గుర్తింపు ఉన్నా లోపాలు ఉన్నాయంటూ నోటీసులు ఇవ్వడం ఏమిటని వారు ప్రశ్నిస్తున్నారు. తనిఖీల రోజు అధ్యాపకులను చూపాం.. అయినా పదుల సంఖ్యలో కొరత ఉన్నట్లు పేర్కొన్నారని ఓ ప్రముఖ కళాశాల ప్రిన్సిపాల్‌ ఒకరు ఆవేదన వ్యక్తంచేశారు.
    అధ్యాపకులే అసలు సమస్య:
    అధ్యాపకుల కొరత, తగిన విద్యార్హత లేకపోవడం, బయోమెట్రిక్‌ హాజరు సరిగా లేకపోవడమే నోటీసుల జారీకి ప్రధాన కారణమని వర్సిటీ వర్గాలు చెబుతున్నాయి. ప్రయోగశాలల్లో పరికరాల కొతర, ఇతర అసౌకర్యాలను ప్రధానంగా పేర్కొన్నారు. ఈక్రమంలో ప్రముఖ కళాశాలల్లోనూ సీట్ల కోత తప్పదని తెలుస్తోంది. దీనిపై జేఎన్‌టీయూ రిజిస్ట్రార్‌ ఆచార్య యాదయ్యను వివరణ కోరగా  నిజ నిర్ధారణ సంఘాలు (ఎఫ్‌ఎఫ్‌సీ) నివేదికే కాదు.. బయోమెట్రిక్‌ హాజరు, కళాశాలల నిరంతర పనితీరు వంటి పలు అంశాల ఆధారంగా నోటీసులు ఇచ్చామన్నారు. తనిఖీలకు వెళ్లినప్పుడు చూపిన పరికరాలు ఏడాది పొడవునా ఉండాలి కదా అని ప్రశ్నించారు. న్యాక్‌ ‘ఏ’ గ్రేడ్‌ హోదా ఉన్న ఓ కళాశాలలో బీటెక్‌ ప్రథమ సంవత్సరం విద్యార్థుల్లో 40 శాతంమంది వరకు డిటైన్‌ అయ్యారు.. అలాంటి అంశాలను కూడా పరిశీలించామని ఆయన తెలిపారు. తాము జారీ చేసిన మార్గదర్శకాల్లో కూడా ఎఫ్‌ఎఫ్‌సీ నివేదికే తుది నిర్ణయం కాదని సృష్టంచేశామని యాదయ్య పేర్కొన్నారు.

    రాబోయే రోజుల్లో 20 లక్షల ఉద్యోగాలు!

    * భాగస్వామ్య ఒప్పందాలతో వచ్చే కొలువులివి
    * ముఖ్యమంత్రి చంద్రబాబు వెల్లడి
    * విశాఖలో ఒకేరోజు నాలుగు ఐటీ సంస్థలు ప్రారంభం

    ఈనాడు, విశాఖపట్నం: రాబోయే రోజుల్లో రాష్ట్రంలో 20 లక్షల ఉద్యోగాలు వస్తాయని ముఖ్యమంత్రి చంద్రబాబు పేర్కొన్నారు. ఆ మేరకు భాగస్వామ్య ఒప్పందాల్లో కుదిరిన రూ.17 లక్షల కోట్ల విలువైన ఎంఓయూల్లో... రూ.10 లక్షల కోట్ల ఎంఓయూలు సాకారమయ్యేలా కృషి చేస్తున్నామన్నారు. పెట్టుబడి పెట్టేవారికి సహకరిస్తే ఉద్యోగాలు, ఉపాధి లభిస్తాయని, సంపద పెరుగుతుందని పేర్కొన్నారు. అభివృద్ధి నిరోధించే వాళ్లకు సహకరిస్తే ఉన్న ఉద్యోగాలు పోతాయని పేర్కొన్నారు. మార్చి 29న‌ విశాఖలోని మధురవాడ ఐ.టి.హిల్‌-2పై కాండ్యుయంట్‌, తురాయా, ప్రొసీడ్‌ ఐ.టి. సంస్థలను ఆయన ప్రారంభించారు. అలాగే ఫ్రాంక్లిన్‌ టెంపుల్‌టన్‌ ఇన్వెస్టిమెంట్స్‌, ఇన్నోవా సొల్యూషన్స్‌ సంయుక్తంగా ఏర్పాటు చేస్తున్న క్యాంపస్‌కు శిలాఫలకాన్ని సీతమ్మధారలో ఆవిష్కరించారు. అనంతరం ఆయా సంస్థల ఉద్యోగులు, ఐ.టి.నిపుణులతో ఏర్పాటు చేసిన సమావేశంలో మాట్లాడారు.
    ఇక్కడ ఒకేరోజు నాలుగు సంస్థలను ప్రారంభిస్తుండడం ఎంతో గర్వంగా ఉందని తెలిపారు. 2019లో లక్ష ఐటీ ఉద్యోగాలు, ఎలక్ట్రానిక్స్‌, హార్డ్‌వేర్‌లో మరో లక్ష చొప్పున ఉద్యోగాలు కల్పించాలని ఆ శాఖ అధికారులను కోరుతున్నానన్నారు. రూ.649కోట్ల పెట్టుబడితో వచ్చిన కాండ్యుయంట్‌ సంస్థ ఐదువేల ఉద్యోగాలు ఇస్తామని హామీ ఇచ్చిందని, అక్కడితో ఆగిపోకుండా మరిన్ని వేల ఉద్యోగాలు ఇవ్వాలని సూచించారు. 20 సంవత్సరాలకు పైగా దేశంలో ఐ.టి.ని ప్రోత్సహించిన ముఖ్యమంత్రిని తానేనని అంటూ... ఐ.టి.రంగంపై మాట్లాడడానికి తనకే పేటెంట్‌ ఉందని చమత్కరించారు.
    గతంలో మైక్రోసాఫ్ట్‌, ఫ్రాంక్లిన్‌ టెంపుల్‌టన్‌లాంటి కంపెనీలు హైదరాబాద్‌ రావడం వల్ల దాని ముఖచిత్రమే మారిపోయిందని, ఇప్పుడు విశాఖ ఆ స్థాయికి వెళ్లే అవకాశం ఫ్రాంక్లిన్‌ టెంపుల్‌టన్‌ ద్వారా వచ్చిందని ముఖ్యమంత్రి చంద్రబాబు అన్నారు. ఈ సంస్థ శిలాఫలకం ఆవిష్కరణ సందర్భంగా చంద్రబాబు మాట్లాడుతూ.. రూ. 450 కోట్ల వ్యయంతో ఫ్రాంక్లిన్‌ టెంపుల్‌టన్‌ ఇక్కడ తన విభాగాన్ని ఏర్పాటు చేస్తోందని, దీనిద్వారా 2500 మందికి అత్యున్నత ఉద్యోగాలు వస్తున్నాయన్నారు. ఈ సంస్థ దృష్టి కేవలం మొదటిశ్రేణి నగరాలమీదే ఉంటుందని, తొలిసారి రెండోశ్రేణి నగరమైన విశాఖకు వచ్చారని సీఎం చెప్పారు.

    ఐఐటీ-జేఈఈ, నీట్‌పై అవగాహన సదస్సులు

    ఉండ్రాజవరం, న్యూస్‌టుడే: ఐఐటీ-జేఈఈ, నీట్‌పై విద్యార్థులకు అవగాహన కల్పించడానికి అనుభవజ్ఞులైన అధ్యాపక బృందంతో అవగాహన సదస్సులు ఏర్పాటు చేసినట్లు శశి విద్యాసంస్థల ఛైర్మన్‌ బూరుగుపల్లి వేణుగోపాలకృష్ణ మార్చి 26న‌ తెలిపారు. మార్చి 29న 7, 8, 9, 10, 10+1 తరగతుల విద్యార్థుల కోసం విశాఖపట్నం సంగివలసలోని తమ క్యాంపస్‌లో సదస్సులను నిర్వహిస్తున్నామని తెలిపారు. ఏప్రిల్‌ 1న 10+1 విద్యార్థులకు వేలివెన్నులోని తమ క్యాంపస్‌లో సదస్సు ఉంటుందని పేర్కొన్నారు. సదస్సులను విద్యార్థులు, తల్లిదండ్రులు సద్వినియోగం చేసుకోవాలని కోరారు. సదస్సులకు వచ్చే వారికి ఐఐటీ, నీట్‌పై ఉన్న సందేహాలను నివృత్తి చేస్తామని, భోజన సౌకర్యం కూడా కల్పిస్తున్నామని వేలివెన్ను క్యాంపస్‌ మేనేజ్‌మెంట్‌ బూరుగుపల్లి రవికుమార్‌, విశాఖపట్నం క్యాంపస్‌ మేనేజ్‌మెంట్‌ మేకా నరేంద్రకృష్ణలు తెలిపారు. మరిన్ని వివరాల కోసం వేలివెన్ను క్యాంపస్‌- 08819-242222, విశాఖపట్నం క్యాంపస్‌- 97059 25599 నెంబర్లలో సంప్రదించవచ్చని పేర్కొన్నారు.

    ఇంజినీరింగ్‌ విద్యార్థులకు ‘ఆన్‌లైన్‌ అవగాహన’

    * దిల్లీ ఐఐటీ డైరెక్టర్‌ డాక్టర్‌ రాంగోపాల్‌రావు
    కొల్లాపూరు, న్యూస్‌టుడే : ఇంజినీరింగ్‌ విద్యార్థులకు సబ్జెక్టులపై నిపుణులైన ఆచార్యులతో ఆన్‌లైన్‌ ద్వారా అవగాహన కల్పిస్తున్నట్లు దిల్లీ ఐఐటీ డైరెక్టర్‌ డాక్టర్‌ వలిపె రాంగోపాల్‌రావు వెల్లడించారు. దీనికోసం ఐఐటీ పీఎల్‌ ప్రాజెక్టును ఏర్పాటు చేశామన్నారు. ఆయన స్వగ్రామం నాగర్‌కర్నూలు జిల్లా కొల్లాపూర్‌కు వచ్చిన సందర్భంగా మార్చి 26న‌ విలేకరులతో మాట్లాడారు. ఇంజినీరింగ్‌ విద్యార్థులకు పాఠ్యాంశాలపై అవగాహనకోసం గణితం, భౌతిక, రసాయన శాస్త్రాలు, ఆంగ్లంలో నిష్ణాతులైన ఆచార్యులతో ప్రత్యేకంగా 8 గంటల ఎపిసోడ్‌ తయారు చేసి ఆన్‌లైన్‌లో, యూట్యూబ్‌లో ఉంచుతున్నామని చెప్పారు. గ్రామీణ ఇంజినీరింగ్‌ విద్యార్థులు దీన్ని ఉచితంగా డౌన్‌లోడ్‌ చేసుకొని అవగాహన కల్పించుకోవచ్చని తెలిపారు. దిల్లీ ఐఐటీకి కేంద్ర ప్రభుత్వం రూ.వెయ్యి కోట్ల భారీ బడ్జెట్‌ కేటాయించిందన్నారు. ఈ ఏడాది ఉన్నతవిద్య కోసం రూ.వంద కోట్లతో ‘ఉన్నత్‌ భారత్‌ అభియాన్‌’ పథకం చేపట్టినట్లు పేర్కొన్నారు. ఈ పథకం అమలుకు జాతీయ స్థాయిలో 800 కంపెనీలను గుర్తించామని చెప్పారు. ఈ పథకాలు దిల్లీ ఐఐటీ పర్యవేక్షణలో అమలవుతాయన్నారు. నానో టెక్నాలజీలో ఈసారి నానోమిషన్‌ అమలు చేస్తున్నామని చెప్పారు. ప్రస్తుతం కొత్త పరిశోధనలకు దిల్లీ ఐఐటీ పెద్దపీట వేస్తుందన్నారు. నూతన ఆలోచనలతో వచ్చేవారిని ప్రోత్సాహిస్తామన్నారు.

    ‘ట్రిపుల్‌ఐటీ’ స్థల ఎంపికపై వెలువడని నిర్ణయం

    ఈనాడు, అమరావతి: రాష్ట్ర ప్రభుత్వం ప్రకాశం జిల్లాకు కేటాయించిన ట్రిపుల్‌ఐటీ ఏర్పాటుకు సంబంధించి స్థల సేకరణపై మంత్రి గంటా శ్రీనివాసరావు మార్చి 23న‌ సచివాలయంలో సమీక్షించారు. అధికారులతోపాటు మంత్రి శిద్ధా రాఘవరావు, ఎమ్మెల్యేలు కదిరిబాబురావు, పోతుల రామారావు హాజరయ్యారు. ట్రిపుల్‌ఐటీని ఎక్కడ ఏర్పాటు చేయాలనే అంశంపై అభిప్రాయాలను మంత్రి శ్రీనివాసరావు తెలుసుకున్నారు. ప్రజాప్రతినిదులు ఎవరికి వారు తమ ప్రాంతంలో పెట్టాలని కోరడంతో స్థలం విషయంలో ఎలాంటి నిర్ణయం తీసుకోలేదు. ఈ విషయాన్ని ముఖ్యమంత్రి చంద్రబాబు దృష్టికి తీసుకువెళ్లాలని నిర్ణయించారు. స్థలాలను పరిశీలించి, నివేదిక ఇవ్వాలని అధికారులను మంత్రి ఆదేశించారు.

    ఉద్యోగ నైపుణ్యం..ఇంజినీరింగ్‌లోనే అధికం

    * 52 శాతంతో ప్రథమ స్థానం
    * ఫార్మసీలోనూ పెరుగుతున్న నైపుణ్యాలు
    * ఎంబీఏలో మాత్రం గతేడు కంటే 3 శాతం తగ్గుదల
    * భారత నైపుణ్య నివేదిక-2018లో వెల్లడి

    ఈనాడు-హైదరాబాద్‌: ఇతర కోర్సుల అభ్యర్థుల కంటే ఇంజినీరింగ్‌ పూర్తి చేసిన వారిలోనే ఉద్యోగ నైపుణ్యం అధికం. ఇంజినీరింగ్‌ విద్యార్థుల్లో 52 శాతం మందికి ఉద్యోగాలకు కావాల్సిన నైపుణ్యాలు ఉన్నాయి. భారత నైపుణ్య నివేదిక-2018 (ఐఎస్‌ఆర్‌) తేల్చిచెప్పిన వాస్తవమిది. ఒక వైపు ఇంజినీరింగ్‌ విద్యలో నాణ్యత కొరవడుతుందని, ఉద్యోగానికి కావాల్సిన అర్హతలు 30 శాతం బీటెక్‌ అభ్యర్థుల్లో మాత్రమే ఉంటున్నాయని నాస్కామ్‌ తదితర పలు సంస్థలు చెబుతుండగా.. ఐఎస్‌ఆర్‌ 2018 నివేదిక మాత్రం నైపుణ్యంలో వారే ముందంజలో ఉన్నారని చెబుతుండటం గమనార్హం. అఖిల భారత సాంకేతిక విద్యామండలి, భారత పరిశ్రమల సమాఖ్య, పీపుల్స్‌ స్ట్రాంగ్‌, వీబాక్స్‌, యూఎన్‌డీపీ, భారత విశ్వవిద్యాలయాల సంఘం(ఏఐయూ), పియర్‌సన్‌ సంస్థలు సంయుక్తంగా భారత నైపుణ్య నివేదిక-2018ను రూపొందించాయి. ఇందులో భాగంగా వీబాక్స్‌ ఉద్యోగ నైపుణ్య పరీక్ష(వెస్టు) పేరిట దేశవ్యాప్తంగా వివిధ రకాల కోర్సులను అభ్యర్థిస్తున్న 5.10 లక్షల మంది విద్యార్థులకు ఆన్‌లైన్‌ పరీక్ష నిర్వహించారు. అందులో 29 రాష్ట్రాల్లోని 5,200 విద్యా సంస్థలకు చెందిన విద్యార్థులున్నాయి. 13 రంగాలకు చెందిన 130 పరిశ్రమలు పాల్గొన్న ఇండియా హైరింగ్‌ ఇంటెంట్‌ సర్వే అంశాలనూ పరిగణనలోకి తీసుకున్నారు. దీని ఆధారంగా రూపొందించిన నివేదికను తాజాగా కేంద్రం విడుదల చేసింది. ఆ ప్రకారం 52 శాతం మంది ఇంజినీరింగ్‌ విద్యార్థులకు ఉద్యోగాలు పొందేందుకు అవసరమైన నైపుణ్యాలు ఉన్నట్లు తేలింది. ఇది మిగిలిన కోర్సులు పూర్తి చేసిన వారి కంటే అధికం. ఫార్మసీ విద్యార్థుల్లోనూ నైపుణ్యం పెరుగుతోంది. ఎంబీఏలో మాత్రం 2017 కంటే 3 శాతం తగ్గినట్లు తెలిపింది. మొత్తంమీద గత ఐదేళ్లలో ఉద్యోగ నైపుణ్యం 34 శాతం నుంచి 45 శాతానికి పెరిగినట్టు తేల్చింది.
    దిల్లీకి మొదటి స్థానం
    ఈ నివేదిక ప్రకారం గతేడు కంటే అన్ని రాష్ట్రాల ఇంజినీరింగ్‌ విద్యార్థుల్లో నైపుణ్యం పెరగగా.. అందులో దిల్లీ మొదటి స్థానంలో నిలిచింది. ఉద్యోగాలకు అవసరమైన నైపుణ్యాలు పెరగడానికి కారణం గత కొద్ది సంవత్సరాలుగా ఏఐసీటీఈ తీసుకుంటున్న చర్యలేనని కేంద్ర మానవ వనరుల శాఖ వెల్లడించింది. పాఠ్య ప్రణాళికలో మార్పులు చేయడం, ఇంటర్న్‌షిప్‌లు తప్పనిసరి చేయడం, అధ్యాపకులకు శిక్షణ, పరిశ్రమలకు తగినట్లు శిక్షణ ఇవ్వడం తదితర కారణాలు ఉన్నాయని పేర్కొంది.

    హ్యాకథాన్లలో పాల్గొనే వారికి ఉద్యోగావకాశాలు

    ఈనాడు, విశాఖపట్నం: హ్యాకథాన్‌ పోటీల్లో పాల్గొంటూ ఐటీ పరిజ్ఞానంతో వివిధ సమస్యల పరిష్కార మార్గాలను ఆవిష్కరిస్తున్న యువతను ప్రోత్సహించేందుకు రాష్ట్రప్రభుత్వం ప్రత్యేక చర్యలు చేపట్టింది. ఇప్పటికే వివిధ రంగాలపై ‘హ్యాకథాన్‌’లు నిర్వహిస్తోంది. ఇప్పటి వరకు రాష్ట్రప్రభుత్వం ఇన్నోవేషన్‌ సొసైటీ ఆధ్వర్యంలో వ్యవసాయరంగ పరిజ్ఞానాలపై అగ్రి హ్యాకథాన్‌, ఎపీటా (ఆంధ్రప్రదేశ్‌ ఐ.టి. అకాడమీ) ఆధ్వర్యంలో బ్లాక్‌చైన్‌ టెక్నాలజీలపై హ్యాకథాన్‌, ఎలక్ట్రానిక్‌ పరిజ్ఞానాలపై ఎలక్ట్రోథాన్‌లు నిర్వహించింది. వివిధ ఇంజినీరింగ్‌ కళాశాలల విద్యార్థులు బృందాలుగా పాల్గొని వినూత్నమైన ఐ.టి. ఉత్పత్తులను వీటిల్లో ఆవిష్కరించారు. విజేతలకు ప్రభుత్వం బహుమతులు అందించింది. అంకుర సంస్థ (స్టార్టప్‌ కంపెనీ) ఏర్పాటు చేయడానికి ముందుకొచ్చినవారికి ప్రోత్సాహం అందిస్తోంది. ప్రత్యేక కేంద్రాల్లో కొంత ప్రాంగణాన్ని కేటాయించి అందులో వారి కార్యకలాపాల్ని నిర్వహించుకునేలా చర్యలు చేపడుతోంది. హ్యాకథాన్లలో పాల్గొనే వారు ఉద్యోగాలు చేయదలచుకుంటే వివిధ ఐ.టి. సంస్థల్లో అవకాశం దక్కేలా తాజాగా ప్రత్యేక చర్యలకు శ్రీకారం చుట్టింది. ఇందుకోసం ఉద్యోగమేళాలను నిర్వహించాలని నిర్ణయించింది.
    మొదటి ప్రయోగం విజయవంతం
    బ్లాక్‌చైన్‌ హ్యాకథాన్లో పాల్గొన్న విద్యార్థుల కోసం రుషికొండ గాయత్రి పరిషత్‌లో నిర్వహించిన జాబ్‌మేళాకు 980మంది విద్యార్థులు హాజరయ్యారు. ముంబయి, బెంగళూరు, హైదరాబాద్‌కు చెందిన ఏడు ఐ.టి. సంస్థలు 69మందిని ఎంపిక చేసుకున్నాయి.

    ఏరోస్పేస్‌లో విజయవాడ విద్యార్థికి మొదటిర్యాంకు

    ఈనాడు, అమరావతి: గేట్‌-2018 ఫలితాల్లో ఏరోస్పేస్‌ ఇంజినీరింగ్‌ విభాగంలో కృష్ణా జిల్లా హనుమాన్‌జంక్షన్‌ మండలం తిప్పనగుంటకు చెందిన పునుకొలు భువన్‌చంద్రకు మొదటి ర్యాంకు లభించింది. గేట్‌లో 100 మార్కులకుగాను 86.67 మార్కులు అతడు సాధించాడు. భువన్‌చంద్ర ఐఐటీ మద్రాస్‌లో బీటెక్‌ పూర్తి చేశాడు. గత ఏడాది తొలిసారిగా గేట్‌ రాయగా 324 ర్యాంకు వచ్చింది. రెండో పర్యాయమైన ప్రస్తుతం జాతీయస్థాయిలో మొదటి ర్యాంకు సాధించాడు. ఇస్రో, డీఆర్‌డీవోలలో పని చేసి, దేశానికి సేవచేయాలనే ఉద్దేశంతో ఏరోస్పేస్‌ బ్రాంచి ఎంచుకున్నానని భువన్‌చంద్ర వెల్లడించాడు. నిరుడు జులై నుంచి జనవరి వరకు రోజు ఉదయం 9 గంటల నుంచి రాత్రి 11 గంటల వరకు కష్టపడి చదివానని, కోచింగ్‌ కేంద్రంలోని అధ్యాపకుల సూచనలతో తనకు ఈ ర్యాంకు వచ్చిందన్నాడు. ఇండియన్‌ ఇన్‌స్టిట్యూట్‌ ఆఫ్‌ సైన్సు(ఐఐఎస్‌సీ), బెంగళూరులో ఎంటెక్‌ చదవాలని అనుకుంటున్నట్లు వెల్లడించాడు. భువన్‌చంద్ర తల్లిదండ్రులు సుబ్బారావు, రోజారాణిలు. తిప్పనగుంటకు చెందిన వీరి కుటుంబం ప్రస్తుతం విజయవాడలో స్థిరపడింది.
    ప్రభుత్వ రంగ సంస్థలోకి వెళతా: సౌరవ్‌ కుమార్‌ సింగ్‌, ‘గేట్’ అఖిల భారత మొదటి ర్యాంకు, మెటలర్జీ విభాగం
    ఈనాడు, వరంగల్‌: మొదటి ర్యాంకు సాధించడం చాలా సంతోషంగా ఉంది. ప్రభుత్వ రంగ సంస్థలో ఉద్యోగం పొందాలనేది నా లక్ష్యం. ఎన్‌ఐటీ వరంగల్‌లో బీటెక్‌ ఎంఎంఈ ఆఖరి సంవత్సరం చదువుతుండగానే.. గేట్లో మంచి ర్యాంకు సాధించడానికి పుస్తకాలు బాగా చదివా. ప్రత్యేకించి శిక్షణ తీసుకోలేదు. స్వయంగా నేనే సిద్ధమయ్యా. గతంలో మెరుగైన ర్యాంకులు సాధించిన వారి గురించి అంతర్జాలంలో శోధించా. అనుకున్నట్లుగానే నా లక్ష్యాన్ని చేరుకున్నా. మాది బిహార్‌. నాన్న వ్యాపారి. అమ్మ ఉపాధ్యాయురాలు. అక్క ఇప్పటికే టీసీఎస్‌లో ఉద్యోగం చేస్తోంది. చెల్లి సివిల్స్‌కు సిద్ధమవుతోంది.


    ‘గేట్‌’లో తెలుగు విద్యార్థుల హవా

    ఈనాడు, హైదరాబాద్‌: జాతీయస్థాయిలో నిర్వహించిన గ్రాడ్యుయేట్‌ ఆప్టిట్యూడ్‌ టెస్ట్‌ ఇన్‌ ఇంజినీరింగ్‌ (గేట్‌)లో తెలుగు విద్యార్థులు ఉత్తమ ర్యాంకులను సొంతం చేసుకున్నారు. కొన్ని బ్రాంచీల్లో 10 లోపు ర్యాంకులను దక్కించుకొని సత్తా చాటారు. ఎయిరోస్పేస్‌లో ఆంధ్రప్రదేశ్‌లోని కృష్ణా జిల్లా హనుమాన్‌ జంక్షన్‌ మండలం తిప్పనగుంటకు చెందిన భువనచంద్ర మొదటి ర్యాంకు సాధించాడు. తెలుగు రాష్ట్రాలకు చెంది ఎన్‌ఐటీ వరంగల్‌లో చదువుతున్న పలువురికి 100లోపు ర్యాంకులు దక్కాయి. వందలోపు ర్యాంకుల్లో తెలుగు రాష్ట్రాల వారు పదుల సంఖ్యలో ఉంటారని అంచనా. ఎన్‌ఐటీ వరంగల్‌లో విద్యనభ్యసిస్తున్న బిహార్‌కు చెందిన సౌరవ్‌ కుమార్‌ సింగ్‌ మెటలర్జికల్‌ ఇంజినీరింగ్‌లో ప్రథమ ర్యాంకు దక్కించుకున్నారు. ఇక దేశవ్యాప్తంగా ఉన్న ఐఐటీలు, ఎన్‌ఐటీల్లో చదివే తెలుగు విద్యార్థుల ర్యాంకులను కూడా పరిగణనలోకి తీసుకుంటే మరిన్ని ర్యాంకులు ఉండొచ్చని నిపుణులు భావిస్తున్నారు. ఇంజినీరింగ్‌ విద్యార్థులు ప్రతిష్ఠాత్మక విద్యాసంస్థల్లో ఎంటెక్‌, పీహెచ్‌డీ కోర్సుల్లో ప్రవేశించేందుకు ఐఐటీలు సంయుక్తంగా ఏటా గేట్‌ను నిర్వహిస్తున్నాయి. దీంట్లో సాధించిన స్కోర్‌ ఆధారంగా కేంద్ర ప్రభుత్వ రంగ సంస్థ(పీఎస్‌యూ)లు ఓఎన్‌జీసీ, గెయిల్‌ తదితర దాదాపు 20 సంస్థలు నేరుగా మౌఖిక పరీక్షలకు ఆహ్వానించి ఉద్యోగాలకు ఎంపిక చేసుకుంటున్నాయి. ఈసారి ఫిబ్రవరి 3, 4, 10, 11 తేదీల్లో ఆన్‌లైన్‌ విధానంలో పరీక్షలను నిర్వహించగా, మార్చి 16న‌ మధ్యాహ్నం ర్యాంకులను వెల్లడించారు. నిర్దేశించిన ప్రణాళికకంటే ఒకరోజు ముందుగానే ర్యాంకులను ప్రకటించడం గమనార్హం. దేశవ్యాప్తంగా సుమారు 8 లక్షల మంది రాసి ఉంటారని అంచనా. ఈసారి పరీక్షను ఐఐటీ గువాహటి నిర్వహించింది. పరీక్ష రాసినవారిలో మెకానికల్‌, ఈసీఈ, సివిల్‌, ఈఈఈ బ్రాంచీల నుంచే 80 శాతం మంది ఉన్నారు. దీంట్లో అర్హత సాధిస్తే ఆ స్కోర్‌కు మూడేళ్ల వరకు గుర్తింపు ఉంటుంది. ఐఐటీలు, ఎన్‌ఐటీల్లో వందల సంఖ్యలో తెలుగు విద్యార్థులు ప్రవేశాలు పొందుతున్నారు. గేట్‌ ర్యాంకుల ఆధారంగా తెలంగాణలో ఏటా 1,500 మంది, ఏపీలో సుమారు వెయ్యి మంది ఆయా ప్రభుత్వ, ప్రైవేట్‌ కళాశాలల్లో ఎంటెక్‌లో చేరుతున్నట్లు గణాంకాలు చెబుతున్నాయి. తెలుగు రాష్ట్రాల నుంచి ఈసారి సుమారు 1.50 లక్షల మంది పరీక్ష రాసి ఉంటారని అంచనా. సగటున 15-16 శాతం మందే ఈ పరీక్షలో అర్హత సాధిస్తున్నారు.
    హైదరాబాద్‌ కేంద్రంగా..
    సివిల్‌ సర్వీసెస్‌ మాదిరిగానే గేట్‌ శిక్షణకు కూడా హైదరాబాద్‌ హబ్‌గా మారుతోంది. ఉత్తర భారత్‌కు చెందిన వందలాది మంది నగరానికి వచ్చి శిక్షణ పొంది మంచి ర్యాంకులు పొందుతున్నారు. యూపీ, మధ్యప్రదేశ్‌, ప‌శ్చిమ్ బంగా తదితర రాష్ట్రాలకు చెందిన పలువురు 2, 3, 4, 8 ర్యాంకులను సాధించారని ఏస్‌ ఇంజినీరింగ్‌ అకాడమీ ఛైర్మన్‌ వైవీ గోపాలకృష్ణమూర్తి తెలిపారు. ఈ పరీక్ష రాస్తున్న వారిలో 30 శాతం గత ఏడాది లేదా అంతకు ముందు సంవత్సరం బీటెక్‌ పూర్తిచేసి ఉంటారని చెబుతున్నారు. మిగిలిన వారు ప్రస్తుతం బీటెక్‌ చివరి సంవత్సరం చదువుతున్న వారు. ఐఐటీ, ఎన్‌ఐటీల్లో బీటెక్‌ చదివేందుకు సీట్లు దక్కని వారు ప్రైవేటు ఇంజినీరింగ్‌ కళాశాలల్లో బీటెక్‌ పూర్తి చేసి గేట్‌ ర్యాంకులతో ఎంటెక్‌ను ఐఐటీ, ఎన్‌ఐటీ లాంటి సంస్థల్లో పూర్తి చేస్తున్నారు.

    ప్రభుత్వ విద్యాసంస్థల్లో ఇంక్యుబేటర్లు అవసరం

    * హెచ్‌సీయూలో ఏర్పాటైనది భారత్‌లోనే అతిపెద్దది
    * ఇండియన్‌ ఇనిస్టిట్యూట్‌ ఆఫ్‌ సైన్స్‌ మాజీ సంచాలకులు ఆచార్య పద్మనాభన్‌

    గచ్చిబౌలి, న్యూస్‌టుడే: అంకుర సంస్థలను ప్రోత్సహించేందుకు అన్ని ప్రభుత్వ ఉన్నత విద్యాసంస్థల్లో ఇంక్యుబేటర్లు ఏర్పాటుచేయాల్సిన అవసరముందని ఇండియన్‌ ఇనిస్టిట్యూట్‌ ఆఫ్‌ సైన్స్‌ మాజీ సంచాలకులు ఆచార్య జి.పద్మనాభన్‌ పేర్కొన్నారు. ఫిబ్రవ‌రి 28న‌ హైదరాబాద్‌ సెంట్రల్‌యూనివర్సిటీ జీవశాస్త్ర విభాగంలో ‘బయోనెస్ట్‌’ పేరిట ఏర్పాటుచేసిన నూతన ఇంక్యుబేటర్‌ కేంద్రాన్ని ఆయన ప్రారంభించారు. ఈ సందర్భంగా మాట్లాడుతూ.. భారత్‌లో అతిపెద్ద ఇంక్యుబేటర్లు ఐదు ఉన్నాయని, వాటన్నింటి కంటే హెచ్‌సీయూలో ఏర్పాటైన ఈ కేంద్రం చాలా పెద్దదిగా ఉందన్నారు. ప్రస్తుతం ప్రభుత్వ విద్యాసంస్థల్లో వెయ్యి ప్రయోగశాలలు ఉన్నాయని, వాటిల్లో ఇంక్యుబేషన్‌ సౌకర్యాలు అందుబాటులోకి తీసుకురావాలని చెప్పారు. మహిళా పరిశోధకులు అంకుర సంస్థల ఏర్పాటుకు కృషిచేసి ఔత్సాహిక పారిశ్రామిక వేత్తలుగా ఎదగాలన్నారు. హెచ్‌సీయూ వీసీ ప్రొఫెసర్‌ అప్పారావు మాట్లాడుతూ బయోటెక్నాలజీ ఇండస్ట్రీ రీసెర్చ్‌ అసిస్టెంట్స్‌ కౌన్సిల్‌ సహకారంతో ఇంక్యుబేషన్‌ కేంద్రాన్ని ఏర్పాటుచేశామన్నారు. వృక్షశాస్త్రం విభాగం ప్రొఫెసర్‌ రెడ్డన్న మాట్లాడుతూ 20వేల చదరపు అడుగుల విస్తీర్ణంలో ఏర్పాటుచేసిన బయోనెస్ట్‌లో 30 అంకుర సంస్థల నిర్వహణ సామర్థ్యం ఉందన్నారు. విభాగంలో 350మంది పరిశోధన విద్యార్థులు, అధ్యాపకులు ఉన్నారని, అంతా కలిసి అంకుర సంస్థలకు అవసరమైన సహాయం అందిస్తామన్నారు. కార్యక్రమంలో న్యూయార్క్‌లోని మౌంట్‌ సినాయ్‌ స్కూల్‌ ఆఫ్‌ మెడిసిన్‌ ప్రొఫెసర్‌ ఈ.ప్రేమకుమార్‌రెడ్డి, హెచ్‌సీయూ ప్రొఫెసర్‌ బి.సెంథిల్‌కుమారన్‌ తదితరులు పాల్గొన్నారు.

    ఇంజినీరింగ్‌ సీట్ల భర్తీపై దృష్టి

    * ఒక పక్క మిగులుతున్న సీట్లు.. మరో పక్క ఏఐసీటీఈ నిబంధనలు
    * మధ్యవర్తులతో ప్రయత్నాలు చేస్తున్న కొన్ని కళాశాలల యాజమాన్యాలు

    ఈనాడు - అమరావతి : ఇంజినీరింగ్‌ విద్యను అభ్యసించేందుకు ఏ కళాశాలలో....ఏ విశ్వవిద్యాలయంలో చేరాలి? సీటు వస్తుందా? రాదా? ఎటువంటి జాగ్రత్తలను తీసుకోవాలని పలువురు విద్యార్థులు, వారి తల్లిదండ్రులు సమాలోచన చేస్తుండగా.. సీట్లను ఏ విధంగా భర్తీ చేయాలన్న దానిపై కొన్ని కళాశాలల యాజమాన్యాలు తర్జనభర్జన పడుతున్నాయి. ఇప్పటికే స్వయంప్రతిపత్తి హోదా కలిగిన విశ్వవిద్యాలయాలు (డీమ్డ్‌) నుంచి ఇంజినీరింగ్‌ విద్యలో ప్రవేశాలకు నోటిఫికేషన్లు వెలువడ్డాయి. దాంతో ఏపీ ఎంసెట్‌ నోటిఫికేషన్‌-2018 అనుసరించి దరఖాస్తుల ప్రక్రియ బుధవారం నుంచి మొదలైంది. గతేడాది చాలా వరకు సీట్లు మిగిలిపోగా.. ఇప్పుడు డీమ్డ్‌, ప్రైవేటు కళాశాలల నుంచి కూడా పోటీ ఏర్పడింది. పలు ప్రైవేట్‌ కళాశాలల యాజమాన్యాలు సీట్ల భర్తీకి మధ్యవర్తుల ద్వారా ప్రయత్నాలు చేస్తున్నాయి. ఈ సారి సీట్ల భర్తీ తీరు ఏవిధంగా ఉంటుందన్నది చర్చనీయాంశంగా మారింది. గత ఏడాది రాష్ట్రవ్యాప్తంగా ఐదు కళాశాలల్లో ఒక్కరూ చేరలేదు. 273 ప్రైవేటు కళాశాలల్లో 386 బ్రాంచిల్లో 30శాతం సీట్లు భర్తీ కాలేదు. మూడేళ్లు వరుసగా ఇలా 30శాతం సీట్లు భర్తీకాని కళాశాలలపై చర్యలు తీసుకుంటామని ఏఐసీటీఈ గతంలోనే ప్రకటించింది. దీన్ని అమలు చేస్తే రాష్ట్రంలో చాలా కళాశాలలు మూతపడే అవకాశం ఉంది. ఇటీవల ఏఐసీటీఈ బోధనా ప్రణాళికలోనూ మార్పులు చేర్పులు చేసింది. దీని ప్రకారం సంబంధిత పరిశ్రమలో విద్యార్థులు తప్పనిసరిగా రెండు నుంచి మూడు నెలలపాటు ఇంటర్న్‌షిప్‌ చేయాలి. ఇందుకోసం పరిశ్రమలతో ఒప్పందాలు చేసుకోవాల్సి ఉంటుంది. మరో పక్క ఇంజినీరింగ్‌ చేసిన వారిలో చాలామంది విద్యార్థులకు తగిన నైపుణ్యం లేకపోడంతో ఉపాధి లభించడం లేదు. ఉత్తమ అధ్యాపకులు ఉన్న కళాశాలల్లో చేరేందుకు విద్యార్థులు ఆసక్తి చూపుతున్నారు. పూర్తి స్థాయిలో సీట్లు భర్తీకాని కళాశాలల పరిస్థితి సందిగ్ధంగా మారనుంది. గతేడాది ఇంజినీరింగ్‌లో కన్వీనర్‌ కోటా కింద ఉన్న మొత్తం 98,251 సీట్లలో 28,395 సీట్లు మిగిలాయి. మంచి ర్యాంకులు వచ్చిన వారు డీమ్డ్‌ వర్సిటీ, జేఈఈ, ఐఐటీవైపే మొగ్గుచూపుతున్నారే తప్ప ఎంసెట్‌కు ప్రాధాన్యం ఇవ్వడం లేదు. 1-100 ర్యాంకులు సాధించిన వారిలో ఇద్దరు, 101-200ర్యాంకులు వచ్చిన వారు 10మంది మాత్రమే కౌన్సెలింగ్‌కు హాజరయ్యారు. 1,45,433 మంది అర్హత సాధిస్తే కేవలం 77,143మంది మాత్రమే పరిశీలనకు హాజరయ్యారు. ఈ ఏడాది ఇంటర్‌ రెండో ఏడాది పరీక్షలు 5,16,993 మంది రాస్తున్నారు. వీరిలో ఉత్తీర్ణత 77శాతంగా లెక్కించినా 3.98లక్షల మంది విద్యార్థులు బయటకు వచ్చే అవకాశం ఉంది. ఈ పరిస్థితుల్లో ఏఐసీటీఈ మార్పు చేసిన నిబంధనలను కఠినంగా అమలు చేస్తే చాలా కళాశాలలు ప్రవేశాలు లేని బ్రాంచిలను స్వచ్ఛందంగా వదులుకునే అవకాశం ఉంది.

    డేటా విశ్లేషణలో అపార ఉద్యోగ అవకాశాలు

    * బెల్లాదాటి కంపెనీ వైస్‌ ప్రెసిడెంట్‌ ఫిలిప్‌ లియాంగ్‌
    గుంటూరు, న్యూస్‌టుడే: రాబోయే ఇరవై సంవత్సరాల్లో డేటా విశ్లేషణ (ఎనలటిక్స్‌)లో అపార ఉద్యోగ అవకాశాలు ఉంటాయని సింగపూర్‌లోని ప్రముఖ సాఫ్ట్‌వేర్‌ సంస్థ బెల్లాదాటి కంపెనీ వైస్‌ ప్రెసిడెంట్‌ ఫిలిప్‌ లియాంగ్‌ అన్నారు. ఆ దిశగా విద్యార్థులు దృష్టి సారిస్తే ప్రపంచంలో ఎక్కడైనా పనిచేయవచ్చన్నారు. గుంటూరు జిల్లా తుళ్లూరు మండలం ఐనవోలులోని విట్‌-ఏపీ క్యాంపస్‌లో విద్యార్థులకు డేటా ఎనలటిక్స్‌పై ఫిబ్రవ‌రి 27న‌ అవగాహన సదస్సు నిర్వహించారు. ఐవోటీ, డేటా ఎనలటిక్స్‌ లాంటి కొత్త పరిజ్ఞానాన్ని ఉపయోగించుకుని వ్యవసాయం, పర్యాటకం, ఆరోగ్య రంగాల్లో అద్భుతాలు సృష్టించవచ్చని లియాంగ్‌ పేర్కొన్నారు. మెషిన్‌ లెర్నింగ్‌, డేటా సైన్స్‌ లాంటి ఆధునిక కోర్సులకు ఎన్నో అవకాశాలున్నాయన్నారు.

    8 లక్షల మంది ఇంజినీర్లు.. ఉద్యోగాలు లక్ష!

    * ఎప్పటికప్పుడు పరిజ్ఞానం పెంచుకుంటేనే మనుగడ
    * ‘ఈనాడు’తో ఐటీ నిపుణుడు కశ్యప్‌ కొంపెల్ల

    ఈనాడు - హైదరాబాద్‌: ‘ఐటీ రంగం క్లిష్ట పరిస్థితుల్లో ఉంది. దేశంలో ప్రస్తుతం ఎనిమిది లక్షల మంది ఐటీ, కంప్యూటర్‌ సైన్స్‌ పట్టభద్రులుంటే కేవలం లక్ష మేరకే ఉద్యోగాలున్నాయి. ప్రస్తుతం ఉన్న పట్టభద్రులు కృత్రిమ మేధస్సు, ఆటోమేషన్‌, రోబోటిక్స్‌ పరిజ్ఞానంతో ఇమడలేని పరిస్థితి ఉంది. వారు ఎప్పటికప్పుడు పరిజ్ఞానం పెంచుకుంటేనే ఈ రంగంలో కొనసాగే అవకాశం ఉంటుంది’ అని బెంగళూరుకి చెందిన ఐటీ నిపుణుడు, ఆర్‌పీఏ2ఏఐ సంస్థ ముఖ్య కార్యనిర్వహణాధికారి కశ్యప్‌ కొంపెల్ల పేర్కొన్నారు. దాదాపు 30 సంవత్సరాలుగా ఆయన ఐటీ రంగంలో ఉన్నారు. భీమవరానికి చెందిన ఆయన బిట్స్‌ పిలానీలో, హైదరాబాద్‌లో బిజినెస్‌ స్కూలులో విద్యనభ్యసించారు. అమెరికాలో 20 ఏళ్లపాటు పరిశ్రమను నడిపారు. దశాబ్దం నుంచి బెంగళూరులో పరిశ్రమను నిర్వహిస్తున్నారు. ఐటీ పరిశ్రమల్లోని పరిణామాలపై పలు పుస్తకాలు రాశారు. హెచ్‌ఐసీసీలో జరుగుతున్న ప్రపంచ ఐటీ కాంగ్రెస్‌ సదస్సుకు హాజరైన సందర్భంగా ప్రస్తుత ఐటీ రంగం స్థితిగతులు, సమస్యలు, పరిష్కార మార్గాల గురించి ‘ఈనాడు’తో ప్రత్యేకంగా మాట్లాడారు.
    ఇబ్బందికరం..
    దేశంలో ఐటీ, సాఫ్ట్‌వేర్‌ విద్యార్థులు, పట్టభద్రుల పరిస్థితి దయనీయంగానే ఉంది. ఒక ఐటీ పట్టభద్రునికంటే మా కారు డ్రైవర్‌ జీతం ఎక్కువగా ఉంది. నూతన పరిజ్ఞానం కారణంగా ఉద్యోగాలు పోతున్నాయి. కొత్తవి రావడం గగనంగా మారింది. ఐటీ రంగం ఇప్పటికే మూడు సంక్షోభాలను ఎదుర్కొంది. వాటన్నింటికంటే ప్రస్తుత ప్రభావం తీవ్రంగా ఉంది. మొదట్లో ఐటీకి ఆదరణ ఉన్నప్పుడు ప్రమాణాలను చూడకుండా ఉద్యోగాలు ఇచ్చారు. కంప్యూటర్స్‌, ఐటీ, ఎంబీఏ, ఎంసీఏ.. ఎలా ఉంటే అలాగే వారిని కొనసాగించారు. ఇప్పుడు పరిస్థితులు వేరు. ఎప్పటికప్పుడు ప్రమాణాలు పెరుగుతున్నాయి. కొత్త విజ్ఞానం వస్తోంది. ప్రస్తుత విధానంలో ఐటీ రంగంలో ఉద్యోగాలు పొందడం అత్యంత కష్టసాధ్యంగా మారింది. అమెరికా, యూరప్‌, తదితర దేశాల్లో స్థానిక ఉపాధి కోసం డిమాండ్‌ ఏర్పడింది. తమ దేశంలో కంపెనీలు పెట్టి అక్కడి వారికి ఉద్యోగాలు ఇవ్వాలని ఆయా దేశాలు కోరుతున్నాయి. దేశంలోని ఐటీ రంగంలోని నిరుద్యోగుల్లో ఎక్కువమంది తెలంగాణ, ఆంధ్రప్రదేశ్‌లతో పాటు తమిళనాడు, కర్ణాటకకు చెందిన వారుంటున్నారు.
    అంతా స్వయంకృతం..
    ప్రస్తుతం తయారీ రంగానికి భారీగా డిమాండ్‌ ఉంది. దీనిపై చైనా గుత్తాధిపత్యం సాధించింది. ఐటీ రంగంపై అతిగా ఆధారపడకుండా చైనా తయారీ రంగానికి ప్రాధాన్యం ఇచ్చింది. ఆ రంగంలో నిలదొక్కుకుంది. మన దేశంలో, తెలుగు రాష్ట్రాల్లో ఐటీని అతిగా విశ్వసించారు. అది ఏ స్థాయికి చేరిందంటే ఇతర సివిల్‌, మెకానికల్‌, ఎలక్ట్రానిక్స్‌, ఎలక్ట్రికల్స్‌, కెమికల్‌ ఇంజినీరింగు కోర్సుల్లోని వారు సైతం సాఫ్ట్‌వేర్‌ వైపు వచ్చారు. వాస్తవానికి ఆయా కోర్సుల్లోనే కొనసాగి ఉద్యోగ ప్రయత్నాలు చేస్తే నిలదొక్కుకునే వారు. ఇప్పటికీ అదే ధోరణి కొనసాగుతోంది. ఐటీ అంటే తేలికగా ఉద్యోగాలు వస్తాయి, కష్టపడకుండా పని చేయొచ్చనే భావన ఏర్పడింది. ఇకనైనా విద్యార్థులు, వారి తల్లిదండ్రులు ఈ భావన నుంచి బయటపడాలి. వారు ఎంచుకున్న కోర్సుల్లోనే రాణించేందుకు కృషి చేయాలి.
    సంక్షోభ నివారణ..
    ఐటీ రంగంలో మొదట్లో ఒకసారి ఉద్యోగంలో చేరితే ఆ జ్ఞానంతోనే కొనసాగవచ్చనుకున్నారు. ఇప్పుడు అలా కాదు. ఐటీ రంగంలో చేరినా నిత్య విద్యార్థిగా శ్రమించాలి. సరికొత్త పరిజ్ఞానాలను తెలుసుకుంటూ ముందుకు సాగాలి. విద్యాసంస్థలు సైతం విద్యార్థులకు వాస్తవాలపై అవగాహన పెంచాలి. నైపుణ్యం పెంపొందించాలి. సాఫ్ట్‌స్కిల్స్‌, ఐటీ రంగంలో వస్తున్న కొత్త మార్పులు, వ్యాపార సూత్రాలను తెలియజెప్పాలి. ఇప్పుడు కేంద్ర, రాష్ట్ర ప్రభుత్వాలు పెద్ద ఎత్తున ఉద్యోగ ప్రటకనలు చేస్తున్నాయి. ప్రభుత్వ ఉద్యోగాలను సాధించేందుకు కృషి చేయాలి. సొంతంగా పరిశ్రమలు స్థాపించాలి.

    కొత్త కొలువులొస్తాయి

    * కృత్రిమ మేధపై అపోహలు వద్దు
    * ప్రపంచ ఐటీ సదస్సులో నిపుణుల వెల్లడి

    ఈనాడు, హైదరాబాద్‌: కృత్రిమ మేధస్సుతో ఉద్యోగాలు తగ్గిపోతాయన్న అపోహలు ఉన్నాయని, అయితే ఈ కొత్త సాంకేతికతతో నూతన తరహా ఉద్యోగాలు వస్తాయని కృత్రిమ మేధస్సు (ఏఐ) పరిజ్ఞాన నిపుణులు వెల్లడించారు. ఏఐ, మిషన్‌ లెర్నింగ్‌, క్లౌడ్‌ కంప్యూటింగ్‌ లాంటి సాంకేతిక పరిజ్ఞానంతో కచ్చితమైన సమాచారం తెలుసుకుని వెంటనే నిర్ణయాలు తీసుకోవచ్చని తెలిపారు. ప్రపంచ ఐటీ కాంగ్రెస్‌ సదస్సులో కృత్రిమ మేధస్సు, ఉద్భవిస్తున్న పరిజ్ఞానాలపై విస్తృత చర్చ జరిగింది. ప్లీనరీ సమావేశాల్లో కర్సెరా సహవ్యవస్థాపకులు, ఏఐ టెక్నాలజీ అంతర్జాతీయ నిపుణుడు డాక్టర్‌ ఆండ్రూఇంగ్‌, కార్నెల్‌ విశ్వవిద్యాలయ డీన్‌ సౌమిత్ర దత్తా, ఆర్థికవేత్త కెన్నెత్‌ కుకైర్‌తో పాటు ఇతర సాఫ్ట్‌వేర్‌ కంపెనీల ప్రతినిధులు మాట్లాడారు. కృత్రిమ మేధస్సు టెక్నాలజీతో సాఫ్ట్‌వేర్‌ ఆధారిత రంగం ఉత్పత్తుల నాణ్యతలో వచ్చే మార్పులపై ఆండ్రూఇంగ్‌ ‘బ్లాక్‌బోర్డు’పై ప్రత్యేకంగా వివరించారు. ‘‘ఏఐ, కొత్త పరిజ్ఞానాల నేపథ్యంలో ప్రభుత్వాలు విద్య, ఆర్యోగ రంగాలపై పెట్టుబడులు అధికం చేయాలి. ఏఐ పరంగా భారత్‌కు మంచి అవకాశాలున్నాయి. భారతీయ విద్యా, ఆరోగ్య రంగంలో ఎన్నో మార్పులు వస్తాయి. విద్యాలయాలు వీటిని బోధించేందుకు అవసరమైన ఏర్పాట్లు చేసుకోవాలి. కంప్యూటర్‌ మిషన్లు ఎన్ని వచ్చినా మనిషి మేధస్సు, ఆలోచన గొప్పది. గతంలో ఒక ప్రాంతం నుంచి మరొక ప్రాంతానికి వెళ్లేటప్పుడు పటాలు వాడేవారు. ఇప్పుడు గూగుల్‌మ్యాప్‌ వాడుతున్నారు. అలాగే ఉత్తరాల స్థానంలో ఈ-మెయిల్‌ వచ్చింది. అప్పట్లో ఇది కృత్రిమ మేధస్సే. అదే తరహా ఇప్పుడు జరుగుతోంది. దీనిపై అపోహలు వద్దు. ఏఐ తనకిచ్చిన సమాచారాన్ని విశ్లేషించి రుణానికి అర్హులా? కాదా? స్పష్టం చేస్తుంది. ఒక ఆడియో క్లిప్‌లో మాటలను అక్షరాల రూపంలోకి మార్చుతుంది. ప్రస్తుత సాఫ్ట్‌వేర్‌తో ఈ పనులు చేస్తున్నా, ఏఐతో కచ్చితమైన పనితీరుతో నాణ్యమైన ఉత్పత్తి వస్తుంది. మన దగ్గర విస్తృతమైన సమాచారాన్ని కొత్త నెట్‌వర్క్‌ల సహాయంతో క్లిష్టమైన సమస్యను కచ్చితమైన సమాచారంతో పరిష్కరించవచ్చు. ఆర్థికరంగం, విద్య, ఆరోగ్య, పారిశ్రామిక రంగాల్లో కీలక మార్పులు వస్తాయి. ఏఐపై చాలా దేశాల్లో సరైన అవగాహన లేదు. పరిశ్రమలు ఇప్పటికే ఏఐ బృందాలను ఏర్పాటు చేస్తున్నాయి’’ అని తెలిపారు. ఏఐ, మిషన్‌ లెర్నింగ్‌ ప్రభావాన్ని ఆర్థికవేత్త కెన్నెత్‌ కుకైర్‌ వివరించారు.
    కొత్త ఉద్యోగ సృష్టి జరుగుతుంది: సౌమిత్రదత్తా
    ‘‘ఏఐ పరిజ్ఞానం విషయంలో ప్రభుత్వాలు చాలా తీవ్రంగా తీసుకున్నాయి. నూతన టెక్నాలజీ ఉద్యోగాలు, ఉపాధిని నాశనం చేయదు. ఉద్యోగాల తీరు మారుతుంది. కొత్త ఉద్యోగాలు సృష్టి జరుగుతుంది. ఉద్యోగాల కల్పన అనేది ప్రభుత్వాలకు, పరిశ్రమలకు కీలకం. గతంలో టెక్నాలజీ వచ్చినప్పుడు ఉద్యోగాలు పోతాయన్నారు. కానీ కొత్త ఉద్యోగాల సృష్టి జరిగింది. భారత్‌లో గత 140 ఏళ్లలో పోయిన ఉద్యోగాల కన్నా ఎక్కువగా కొత్త ఉద్యోగాలు వచ్చాయి. ఐటీలో కొత్తగా 20-35 శాతం, ఇతర రంగాల్లో 15-20 శాతం కొత్త ఉద్యోగాలు వస్తాయని నివేదికలు చెబుతున్నాయి. ఏఐ టెక్నాలజీతో వ్యక్తులు నిత్యం కొత్త సమాచారం, సాంకేతిక పరిజ్ఞానాన్ని తెలుసుకోవచ్చు. ఓ వ్యక్తి ఉద్యోగంలో చేరినప్పటికీ.. పదవీ విరమణ చేసే నాటికి అతను చేసే పనిలోనూ మార్పు ఉంటుంది. భవిష్యత్తులో కొత్త ఉద్యోగాలు వస్తాయని ఆశించాలి.’’ అని పేర్కొన్నారు.

    40 లక్షల మందికి శిక్షణ

    * భవిష్యతరం సాంకేతికతల్లో ఇస్తాం: నాస్‌కామ్‌
    * నైపుణ్యాల పెంపునకు ‘ఫ్యూచర్‌స్కిల్స్‌’
    * ప్రారంభించిన ప్రధాన మంత్రి మోదీ
    * 2025 నాటికి దేశీయ ఐటీ రంగం 350 బిలియన్‌ డాలర్లకు

    ఈనాడు - హైదరాబాద్‌ : కొత్త డిజిటల్‌ సాంకేతిక పరిజ్ఞానాలకు అనుగుణంగా దేశీయ సాఫ్ట్‌వేర్‌ పరిశ్రమను వృద్ధి పథంలో నడిపించడానికి, ప్రపంచ వ్యాప్తంగా భారత ఐటీ నిపుణులకు ఉద్యోగావకాశాలు కల్పించడానికి నేషనల్‌ అసోసియేషన్‌ ఆఫ్‌ సాఫ్ట్‌వేర్‌ అండ్‌ సర్వీసెస్‌ కంపెనీస్‌ (నాస్‌కామ్‌) కీలక నిర్ణయం తీసుకుంది. ప్రపంచ వ్యాప్తంగా కంపెనీల అవసరాలు, ఆయా సంస్థల నిర్వాహకుల అభిప్రాయాల మేరకు 8 భవిష్యతరం సాంకేతిక పరిజ్ఞానాలను (ఐఓటీ, ఏఐ, వర్చ్యువల్‌ రియాలిటీ, 3డీ తదితరాలు) నాస్‌కామ్‌ గుర్తించింది. ఈ రంగాల్లో 55 రకాల ఉద్యోగ బాధ్యతలు (రోల్స్‌), 100 రకాల నైపుణ్యాలను గుర్తించినట్లు నాస్‌కామ్‌ జాతీయ అధ్యక్షుడు ఆర్‌. చంద్రశేఖర్‌ తెలిపారు. ఈ సాంకేతిక పరిజ్ఞానాల్లో ఇప్పటికే పరిశ్రమలో పని చేస్తున్న ఉద్యోగులు, ఐటీ రంగంలో ఉద్యోగాలు పొందగోరే ఔత్సాహికుల నైపుణాలు పెంచడానికి ‘ఫ్యూచర్‌స్కిల్స్‌’ పేరుతో క్లౌడ్‌ ఆధారిత ప్రత్యేక ప్లాట్‌ఫామ్‌కు నాస్‌కామ్‌ శ్రీకారం చుట్టింది. మొత్తం 40 లక్షల మందికి శిక్షణ ఇవ్వాలన్నది ప్రతిపాదన. హైదరాబాద్‌లో ప్రపంచ ఐటీ కాంగ్రెస్‌ (డబ్ల్యూసీఐటీ), నాస్‌కామ్‌ ఇండియా లీడర్‌షిప్‌ ఫోరమ్‌లను ప్రారంభించిన సందర్భంగా ప్రధాన మంత్రి నరేంద్ర మోదీ దీనికి శ్రీకారం చుట్టారు. ఇంతటి బృహత్తర కార్యక్రమాన్ని నాస్‌కామ్‌ చేపట్టడం ఇదే మొదలు. ప్రపంచంలోని ఏ ఐటీ పరిశ్రమ సంఘం, నైపుణ్యాలను అభివృద్ధి చేయడానికి ఇటువంటి కార్యక్రమాన్ని ప్రారంభించలేదని చంద్రశేఖర్‌ అన్నారు. నాస్‌కామ్‌ సభ్య కంపెనీలు పరస్పర సహకారంతో శిక్షణ కార్యక్రమాన్ని చేపట్టాయి. ‘ఫ్యూచర్‌స్కిల్స్‌’లో క్లౌడ్‌ సాంకేతిక పరిజ్ఞానంతో ఆన్‌లైన్‌ ద్వారా ఐటీ నిపుణుల శక్తి సామర్థ్యాలను అంచనా వేయడం, శిక్షణ ఇవ్వడం, ధ్రువీకరణ పత్రాలు జారీ వంటివి చేస్తారు. ఎడ్‌కాస్ట్‌ దీన్ని పర్యవేక్షిస్తుంది. నైపుణ్యాలను పెంచడానికి అన్ని విధాలుగా ప్రభుత్వం నుంచి మద్దతు పొందడానికి కేంద్ర ఎలక్ట్రానిక్స్‌, ఇన్ఫర్మేషన్‌ టెక్నాలజీ మంత్రిత్వ శాఖతో నాస్‌కామ్‌ అవగాహనా ఒప్పందం కుదుర్చుకుంది. నిధులందించడంతో పాటు, ఇతర అన్ని రకాల మద్దతును కల్పించే అంశాన్ని ప్రభుత్వం పరిశీలిస్తుందని ఎలక్ట్రానిక్స్‌, ఐటీ మంత్రి రవిశంకర్‌ ప్రసాద్‌ వెల్లడించారు.
    20 లక్షల ఉద్యోగాలు
    బోస్టన్‌ కన్సల్టింగ్‌ గ్రూప్‌తో కలిసి అధ్యయనం చేసిన నాస్‌కామ్‌ వచ్చే పదేళ్లలో ఈ 8 సాంకేతిక పరిజ్ఞానాలు వ్యక్తులు, కంపెనీలు, ప్రభుత్వాలపై ప్రభావం చూపుతాయని గుర్తించింది. ‘ప్రస్తుతం పరిశ్రమలో 40 లక్షల మంది పని చేస్తున్నారు. ఇందులో 20 లక్షల మంది కొత్త సాంకేతిక పరిజ్ఞానాల్లో నైపుణ్యాలు సంపాదించాల్సి ఉంది. మరో 20 లక్షల మందికి కొత్త సాంకేతిక పరిజ్ఞానాలు ఉద్యోగావకాశాలు కల్పించనున్నాయి. వీరందరికీ వచ్చే కొద్ది సంత్సరాల్లో శిక్షణ ఇవ్వడానికి కొత్త ప్లాట్‌ఫామ్‌ దోహదం చేస్తుందని’ చంద్రశేఖర్‌ అన్నారు. ఈ కార్యక్రమం పరిశ్రమను, భవిష్యత్తుకు అనుగుణంగా సిద్ధం చేస్తుంది. ప్రస్తుతం భారత ఐటీ పరిశ్రమ విలువ 150 బిలియన్‌ డాలర్లు (దాదాపు రూ.9,75,000 కోట్లు) ఉందని 2025 నాటికి దీన్ని 350 బిలియన్‌ డాలర్ల (రూ.22,75,000 కోట్లు) స్థాయికి పెంచాలని లక్ష్యంగా పెట్టుకున్నామని చంద్రశేఖర్‌ వివరించారు. ఈ లక్ష్యాన్ని చేరడానికి కొత్త సాంకేతిక పరిజ్ఞానాల్లో నైపుణ్యాలు అవసమన్నారు. ప్రపంచ వ్యాప్తంగా భారతీయులు ఐటీ ఉద్యోగాలు పొందే లక్ష్యంతో దీన్ని ప్రారంభించినట్లు చెప్పారు. దాదాపు 80 దేశాలకు భారత్‌ పరిశ్రమ ఐటీ సేవలను అందిస్తోంది.

    విదేశీ చదువుకు దూరంగా యువత!

    * ట్రాన్‌స్క్రిప్టులకు దరఖాస్తు చేసిన వారి సంఖ్య సగం తగ్గుదల
    * 2015 డిసెంబరు నాటి చేదు ఘటనల నుంచే ప్రభావం మొదలు
    * ట్రంపు ప్రభావమూ కొంతవరకు ఉందంటున్న నిపుణులు

    ఈనాడు - హైదరాబాద్‌ : అమెరికాలాంటి దేశాల్లో విదేశీ చదువుపై వెళ్లే తెలంగాణ రాష్ట్రానికి చెందిన విద్యార్థుల సంఖ్య తగ్గిపోతోందా? కారణాలు ఏమైనా రెండేళ్లుగా విదేశీ విద్యకు యువత దూరంగా ఉంటుందా? జేఎన్‌టీయూ నుంచి ట్రాన్‌స్క్రిప్టులు పొందిన వారి సంఖ్య సగానికిపైగా తగ్గడాన్ని బట్టి అదే నిజమని స్పష్టమవుతోంది. విదేశీ విశ్వవిద్యాలయాలకు దరఖాస్తు చేసుకోవాలంటే ట్రాన్‌స్క్రిప్టులు తప్పనిసరి. వాటికి దరఖాస్తు చేసే వారి సంఖ్య తగ్గిపోవడాన్ని బట్టి విదేశాల్లో చదవాలన్న ఆసక్తి తాత్కాలికంగానైనా సన్నగిల్లిందని ఆచార్యులు విశ్లేషిస్తున్నారు.
    విదేశాల్లో చదవాలనుకున్న విద్యార్థులు అధిక శాతం మంది కనీసం 5-10 విశ్వవిద్యాలయాలకు దరఖాస్తు చేస్తుంటారు. దరఖాస్తు సమయంలో తమ విద్యార్హతలకు సంబంధించిన ధ్రువపత్రాలను కూడా ఆయా విశ్వవిద్యాలయాలకు పంపిస్తారు. వారి వద్ద విద్యార్హతకు సంబంధించి అసలు ధ్రువపత్రం (ఒరిజనల్‌ డిగ్రీ-ఓడీ) పట్టా ఒక్కటే ఉంటుంది. దాన్ని వర్సిటీలకు పంపించలేరు. అలాగని ఫొటోస్టాట్‌ కాపీలను పెడితే విదేశీ వర్సిటీ అధికారులు అనుమతించరు. ఈ క్రమంలోనే ట్రాన్‌స్క్రిప్టులను పంపిస్తారు. విశ్వవిద్యాలయం అధికారికంగా ఆమోదించిన మార్కుల ధ్రువపత్రాన్నే ట్రాన్‌స్క్రిప్టుగా పిలుస్తారు. ప్రస్తుతం అమెరికా, కెనడా, ఆస్ట్రేలియా లాంటి దేశాలకే ఉన్నత విద్య కోసం వెళ్తున్నారు. అందులోనూ 80 శాతానికిపైగా బీటెక్‌ పూర్తి చేసిన వారే ఉంటున్నారు. తెలంగాణ రాష్ట్రంలోని 212 ఇంజినీరింగ్‌ కళాశాలల్లో 195 వరకు జేఎన్‌టీయూ పరిధిలోనివే. వాటిల్లో బీటెక్‌ ఉత్తీర్ణులైన వారు జేఎన్‌టీయూ నుంచే ధ్రువపత్రాలు పొందాలి. అమెరికా అధ్యక్షుడిగా డోనాల్డ్‌ ట్రంపు ఎన్నిక కావడం..ఆయన ఎన్నికల ప్రచారంలో స్థానికులకే ఉద్యోగాలని ప్రచారం చేయడం తదితర పరిస్థితుల నేపథ్యంలో జేఎన్‌టీయూ నుంచి ట్రాన్‌స్క్రిప్టుల కోసం దరఖాస్తు చేసిన విద్యార్థుల సంఖ్యను ‘ఈనాడు’ పరిశీలించింది.
    రెండేళ్లలో ఎంత మార్పు!
    మూడేళ్ల క్రితం..2015లో దాదాపు 60 వేల మంది విద్యార్థులు ధ్రువపత్రాల కోసం జేఎన్‌టీయూహెచ్‌కు దరఖాస్తు చేసుకోగా.. 2017లో అది 24,588కి పడిపోయింది. 60 శాతం తగ్గిపోయింది. అయితే జేఎన్‌టీయూహెచ్‌ పరిధిలో 25 స్వయంప్రతిపత్తి ఇంజినీరింగ్‌ కళాశాలలున్నాయి. వాటిల్లో ఎక్కువగా 2012లో స్వయంప్రతిపత్తి పొందాయి. ఆనాడు బీటెక్‌ ప్రథమ సంవత్సరంలో చేరిన వారు 2016లో ధ్రువపత్రాలను అదే కళాశాల నుంచి పొందుతారు. వాటిల్లో సుమారు 15 వేలమంది విద్యార్థులుంటారు. కనీసం సగంమంది ఆ కళాశాలల నుంచి దరఖాస్తు చేసుకొని వెళ్లారనుకున్నా.. 2015, 2016కు ఇంకా దాదాపు 20 వేల వ్యత్యాసం ఉందని జేఎన్‌టీయూ పరీక్షల విభాగం సంచాలకుడు ఆచార్య కామాక్షిప్రసాద్‌ చెప్పారు.
    ట్రంప్‌ రాకముందే ప్రభావం..
    * అమెరికాలో అధ్యక్ష ఎన్నికలు జరిగింది 2016 నవంబరు 8న. అధ్యక్షుడు ట్రంపు ఎన్నిక ప్రభావం అనుకున్నా అది 2017లో ఉండాలి. వాస్తవానికి 2016లో భారీగానే ట్రాన్‌స్క్రిప్టుల దరఖాస్తులు తగ్గాయి.
    * మరి 2015తో పోల్చుకుంటే 2016లో 46 శాతం దరఖాస్తులు తగ్గాయి. స్వయంప్రతిపత్తి కళాశాలల్లోని వారిని పరిగణలోకి తీసుకున్నా మొత్తం సుమారు 40 వేలు అవుతాయి. అయినా ఇంకా 19 వేలకుపైగా తగ్గినట్లే.
    * 2015 డిసెంబరులో తెలుగు రాష్ట్రాలకు చెందిన పదుల మంది విద్యార్థులను అమెరికా అధికారులు విమానాశ్రయం నుంచే వెనక్కి పంపించారు. చదువుకోవడానికి రావడం లేదని, నకిలీ బ్యాంకు డిపాజిట్లు చూపుతున్నారని తదితర కారణాలు చూపారు. ఆ సమయంలో అమెరికా వెళితే నష్టపోతామన్న ఆలోచనతో 2016లో దరఖాస్తు చేసే వారు భారీగా తగ్గిపోయి ఉంటారని కొందరు నిపుణులు అభిప్రాయపడుతున్నారు.
    * హెచ్‌1బీ వీసాలను పెంచే ఆలోచన చేస్తుండటం, దేశాల వారీగా గ్రీన్‌కార్డుల జారీ విధానాన్ని రద్దు చేయనుండటం భారతీయులకు ప్రయోజనం కలిగించనుంది, అందువల్ల మళ్లీ విదేశీ విద్యకు వెళ్లే వారు పెరిగే అవకాశం లేకపోలేదని ఓయూ ఆర్థికశాస్త్రం ఆచార్యుడు వేణుగోపాలరావు అభిప్రాయపడ్డారు.

    ఐఈఎస్‌ ప్రిలిమినరీ పరీక్ష ఫలితాలు విడుదల

    దిల్లీ: జ‌న‌వ‌రి 7న నిర్వహించిన 'ఇండియన్‌ ఇంజినీరింగ్‌ సర్వీసెస్‌ (ఐఈఎస్‌)' ప్రిలిమినరీ పరీక్ష ఫలితాలను యూనియన్‌ పబ్లిక్‌ సర్వీస్‌ కమిషన్‌ ఫిబ్రవరి 17న విడుదల చేసింది. వెబ్‌సైట్లో ఫలితాలను ఉంచింది. ఈ పరీక్షలో అర్హత సాధించిన వారికి జులై 1న మెయిన్స్‌ పరీక్షను నిర్వహిస్తారు.
    వెబ్‌సైట్: http://www.upsc.gov.in/

    ఇంజినీరింగ్‌ అధ్యాపకులకూ ఉపాధ్యాయ శిక్షణ

    * 2018 నుంచి చేరే వారికి అమలు చేయనున్న ఏఐసీటీఈ
    * ఆరు నెలల శిక్షణ పొందడం తప్పనిసరి
    * ప్రస్తుతం పని చేస్తున్న వారు పదోన్నతి పొందాలన్నా అవసరమే

    ఈనాడు, హైదరాబాద్‌: ఎంటెక్‌ పూర్తి చేసి ఇంజినీరింగ్‌ కళాశాలలో అధ్యాపకులుగా స్థిరపడాలనుకుంటే ఉపాధ్యాయ శిక్షణ పొందటం తప్పనిసరి కానుంది. వచ్చే విద్యా సంవత్సరం (2018-19) నుంచి అధ్యాపకులుగా పనిచేసే వారు ఎవరైనా ఆరు నెలల శిక్షణ పూర్తి చేయాల్సిందే. ఈ మేరకు అఖిల భారత సాంకేతిక విద్యా మండలి(ఏఐసీటీఈ) నిబంధన విధించనుంది. ఇంజినీరింగ్‌ విద్యలో బోధన ప్రమాణాలు పెంచడమే లక్ష్యంగా ఈ నిర్ణయం తీసుకున్నట్లు చెబుతున్నారు. నర్సరీ నుంచి ఏ తరగతి విద్యార్థికి బోధన చేయాలన్నా ఉపాధ్యాయ విద్యలో శిక్షణ పొంది ఉండటం తప్పనిసరి. సర్కారు విద్యాసంస్థల్లోనే కాదు.. చివరికి ప్రైవేట్‌ పాఠశాలల్లో బోధించాలన్నా డీఎడ్‌ లేదా బీఈడీ కోర్సు పూర్తి చేయాలి. ఉపాధ్యాయ అర్హత పరీక్ష(టెట్‌) కూడా ఉత్తీర్ణులై ఉండాలన్న ఉత్తర్వులు ఉన్నాయి. ఇంజినీరింగ్‌ విద్యలో మాత్రం ఎంటెక్‌ పూర్తయితే చాలు కళాశాలలో అధ్యాపకుడిగా చేరి పాఠాలు చెప్పొచ్చు. దీనివల్ల ప్రమాణాల మేరకు బోధన అందటం లేదని ఏఐసీటీఈ భావిస్తోంది. బీటెక్‌ డిగ్రీతో బయటికి వచ్చే వారిలో 50 శాతం మంది ఉద్యోగాలకు పనికిరావడం లేదని వివిధ అధ్యయనాలు వెల్లడిస్తున్నాయి. ఈ క్రమంలో ఉద్యోగ నైపుణ్యాలు పెంచేందుకు ఇప్పటికే పలు నిర్ణయాలు తీసుకున్న ఏఐసీటీఈ అధ్యాపకులూ తప్పనిసరిగా ఉపాధ్యాయ శిక్షణ పొంది ఉండాలన్న నిబంధనను తెరపైకి తెచ్చింది. ఇంజినీరింగ్‌ కళాశాలల్లో 2018 నుంచి అధ్యాపకులుగా చేరేవాళ్లు తప్పనిసరిగా 6 నెలల ఉపాధ్యాయ శిక్షణ పొందాలి. ఏఐసీటీఈ ప్రవేశపెట్టనున్న కోర్సును పూర్తి చేసిన వారే అధ్యాపకులుగా పని చేసేందుకు అర్హులవుతారు. ఇప్పటికే పనిచేస్తున్న వారు పదోన్నతి పొందాలన్నా శిక్షణ కోర్సు పూర్తి చేయడం తప్పనిసరి. దీనిద్వారా వచ్చే మూడేళ్లలో దేశవ్యాప్తంగా 5 లక్షల మందిని శిక్షణ పొందిన అధ్యాపకులుగా తీర్చిదిద్దాలన్నది లక్ష్యం. 2017-18 విద్యా సంవత్సరంలో తెలంగాణ ఇంజినీరింగ్‌ కళాశాలల్లో(బీటెక్‌) 47,245 మంది, ఏపీలో 48,013 మంది అధ్యాపకులుగా పని చేస్తున్నట్లు ఏఐసీటీఈ గణాంకాలు చెబుతున్నాయి. మరోవైపు ఈ శిక్షణతోపాటు బోధన తీరులోనూ మార్పులు తీసుకురావాలని ఏఐసీటీఈ భావిస్తోంది. 10 నిమిషాలు మాత్రమే పాఠం చెప్పడం, మిగతా సమయంలో దానిపై చర్చించడం, పాఠ్యాంశానికి సంబంధించిన వీడియోలు వీక్షించడం వంటి వాటిని అమలు చేసే దిశగా యోచిస్తున్నట్లు ఏఐసీటీఈ చెబుతోంది.

    అమరావతి ప్రాంతంలో మరో 12 ఐటీ కంపెనీలు

    * సుమారు 1300 ఉద్యోగాల కల్పన
    * జనవరి 17న ప్రారంభం
    * రావడానికి సిద్ధంగా మరో 20 సంస్థలు

    ఈనాడు అమరావతి: ఏపీలో మరో 12 చిన్న, మధ్య తరహా ఐటీ కంపెనీలు ఏర్పాటవుతున్నాయి. జనవరి 17న వీటిని ఐటీ శాఖ మంత్రి లోకేష్‌ ప్రారంభిస్తున్నారు. ఇవన్నీ రాజధాని ప్రాంతంలోనే వస్తున్నాయి. మంగళగిరి సమీపంలోని ఏపీ ఎన్‌ఆర్‌టీ టెక్‌పార్కులో 9 కంపెనీలు, మంగళగిరిలోని పైకేర్‌ ఐటీ పార్కులో మరో మూడు కంపెనీలు ఏర్పాటవుతున్నాయి. ఇవన్నీ ఏపీ ఎన్‌ఆర్‌టీ సంస్థ చొరవతో వస్తున్న కంపెనీలు. వీటిలో 90 శాతం అమెరికా కంపెనీలు, బ్రిటన్‌కు చెందినవి ఒకటి రెండు, మన దేశంలో వేరే ప్రాంతంలో కార్యకలాపాలు నిర్వహిస్తున్న కంపెనీ ఒకటి ఉన్నాయని ఏపీఎన్‌ఆర్‌టీ సొసైటీ అధ్యక్షుడు రవి వేమూరి ‘ఈనాడు’కి తెలిపారు. ఈ కంపెనీలు రావడంతో తక్షణం 5-6 వందల మందికి ఉద్యోగాలు లభిస్తాయని, ఈ కంపెనీలు పూర్తి స్థాయిలో పనిచేయడం మొదలు పెట్టాక సుమారు 1300 మందికి ఉపాధి లభిస్తుందని ఆయన పేర్కొన్నారు. ఈ 12 కంపెనీలతో కలిపి ఇంత వరకు ఏపీ ఎన్‌ఆర్‌టీ ద్వారా రాష్ట్రానికి వచ్చిన కంపెనీల సంఖ్య 53కి చేరినట్టు ఆయన తెలిపారు. వీటిలో ఎక్కువ కంపెనీలు విశాఖ, విజయవాడ, మంగళగిరి ప్రాంతాల్లో ఏర్పాటైనట్టు ఆయన వెల్లడించారు. మరో 20 వరకు కంపెనీలు ఇక్కడికి రావడానికి సిద్ధంగా ఉన్నట్టు తెలిపారు.

    మాకొద్దీ ఇంజినీరింగ్

    * దారుణంగా పడిపోయిన సీట్ల భర్తీ
    * తెలంగాణలో 42% కళాశాలల్లో చేరింది 6 శాతమే
    * ఏపీలోని మూడోవంతు విద్యా సంస్థల్లో చేరికలు 11 శాతమే
    * దేశవ్యాప్తంగా ఇదే పరిస్థితి

    ఈనాడు, దిల్లీ: దేశవ్యాప్తంగా ఇంజినీరింగ్ కళాశాలల్లో సీట్ల భర్తీ దారుణంగా పడిపోతూ వస్తోంది. 2016-17 విద్యా సంవత్సరానికి దేశవ్యాప్తంగా మూడోవంతు విద్యా సంస్థల్లో సగటున 13% సీట్లు మాత్రమే భర్తీ అయినట్లు మానవ వనరుల అభివృద్ధి శాఖ సోమవారం వెల్లడించింది. తెలంగాణలో పరిస్థితి మరింత దారుణంగా ఉంది. ఇక్కడ 266 కళాశాలల్లో 41,628 సీట్లు ఉండగా..112లో కేవలం 6 శాతం(2,874) మంది మాత్రమే చేరినట్టు పేర్కొంది. ఆంధ్రప్రదేశ్లోని 325 విద్యా సంస్థల్లో 47,640 సీట్లకుగానూ 109లో కేవలం 5,687 సీట్లు (11.98%)మాత్రమే భర్తీ అయినట్లు తెలిపింది.
    దక్షిణాదిలో అథమం: కేంద్రం వెల్లడించిన గణాంకాల మేరకు దక్షిణాది రాష్ట్రాల్లో ఏపీ, తెలంగాణ, తమిళనాడు రాష్ట్రాల్లో అత్యధిక సీట్లు మిగిలిపోతున్నాయి. ఈ మూడు రాష్ట్రాల్లోని 398 ఇంజినీరింగ్ కళాశాలల్లో 1.66 లక్షల సీట్లకు గానూ.. కేవలం 20 వేలు(12%) మాత్రమే భర్తీ కావడం పరిస్థితికి అద్దం పడుతోంది. కర్ణాటక, కేరళల్లో పరిస్థితి కొంత మెరుగ్గా ఉంది. కర్ణాటకలోని 198 కళాశాలలకు గానూ కేవలం 18లో మాత్రమే 80 శాతం సీట్లు, కేరళలో 176కి గానూ 34లో 84% సీట్లు భర్తీ కాలేదు. అత్యధిక సీట్లు మిగిలిపోయిన కళాశాలల సంఖ్యలో(177) తమిళనాడు దేశంలోనే తొలిస్థానంలో నిలిచింది. ఆ తర్వాతి స్థానంలో ఉత్తరప్రదేశ్ (169), మహారాష్ట్ర (139) ఉన్నాయి. దేశవ్యాప్తంగా ఉన్న 3,325 కళాశాలలకు గానూ 1267లో 86% సీట్లు మిగిలిపోవడం గమనార్హం.