డిగ్రీ రెండో సంవత్సరం చదువుతున్నాను. పబ్లిక్‌ అడ్మినిస్ట్రేషన్‌ ఎంచుకున్నాను. దీనిపై డిగ్రీ తరువాత అందుబాటులో ఉన్న కోర్సుల వివరాలను తెలపండి. ఉద్యోగావకాశాలేంటి? - రాజేశ్వరి సాగర్‌

డిగ్రీ పూర్తిచేశాక పబ్లిక్‌ అడ్మినిస్ట్రేషన్‌పై మక్కువ ఉంటే ఎంఏ పబ్లిక్‌ అడ్మినిస్ట్రేషన్‌ కోర్సును ఎంచుకోవచ్చు. ప్రజా పరిపాలన విస్తృత జనాభాకు ఉపయోగపడే ప్రభుత్వ విధానాన్ని అమలుచేయడం, రాజకీయ కార్యకలాపాలు నిర్వహించడం, పౌరుల శ్రేయస్సు కోసం ప్రజాకార్యక్రమాలు అభివృద్ధి చేయడం పబ్లిక్‌ అడ్మినిస్ట్రేషన్‌ ముఖ్య లక్ష్యాలు.. సమాజం పట్ల ఆసక్తి, సమస్య పరిష్కరణ, సమాజ బాధ్యత పట్ల ఆసక్తి ఉంటే ఈ కోర్సు చేసినవారు తమ పరిజ్ఞానంతో ప్రభుత్వ గ్రూప్‌-1, గ్రూప్‌-2 ఉద్యోగాలు, పాలసీ రూపకర్తలకు సలహాదార్లుగా ఉన్నతి పొందే అవకాశాలున్నాయి. ప్రెసిడెన్సీ కాలేజ్‌-చెన్నై, నిజాం కాలేజ్‌- హైదరాబాద్‌, లఖ్‌నవూ యూనివర్సిటీ- లఖ్‌నవూ, యూనివర్సిటీ ఆఫ్‌ ముంబయి-ముంబయి.. ఈ కోర్సులో పీజీ చేయడానికి ప్రముఖ విశ్వవిద్యాలయాలు. ప్రైవేటు ఎన్‌జీఓ సంస్థల్లో ఈ కోర్సు చేసినవారికి ఉపాధి అవకాశాలు లభిస్తాయి. డిగ్రీలో ఏ కోర్సు?

ఇంటర్‌ ఒకేషనల్‌ కోర్సు రెండో సంవత్సరం చదువుతున్నాను. డిగ్రీలో ఏ కోర్సు ఎంచుకుంటే మేలు? - సుభాష్‌

ఇంటర్‌లో ఏ ఒకేషనల్‌ కోర్సు చదువుతున్నారో తెలుపలేదు. మీరు అకౌంట్స్‌ అండ్‌ టాక్సేషన్‌ కోర్సు చదువుతున్నట్లయితే డిగ్రీలో బీకాం, బీకాం- టాక్స్‌, బీబీఎం వంటి కోర్సులను ఎంచుకోవచ్చు. వ్యవసాయానికి సంబంధించి (క్రాప్‌ మేనేజ్‌మెంట్‌), బీఏ రూరల్‌ మేనేజ్‌మెంట్‌, బీబీఏ కోర్సులను ఎంచుకోవచ్చు. ఇంజినీరింగ్‌, టెక్నాలజీ కోర్సును చదువుతున్నట్లయితే బీఎస్‌సీ లేదా బీటెక్‌ కోర్సులను ఎంచుకోవచ్చు. మీరు మీ ఇంటర్‌ ఒకేషనల్‌ విద్యకు సంబంధించిన కోర్సునే డిగ్రీలో ఎంచుకోవడం మంచిది.

బొటానికల్‌ సైన్స్‌లో పీజీ చేశాను. యోగా ఉపాధ్యాయుడు కావాలనుంది. సంబంధిత కోర్సులు, అందించే కళాశాలల వివరాలను తెలియజేయండి. - సురేష్‌

మారుతున్న జీవనశైలి, ఆహారపు అలవాట్లు, ఒత్తిడి మనిషి జీవన విధానాన్ని పూర్తిగా మార్చివేశాయి. డబ్బు, ఉద్యోగం పరుగులో ఆరోగ్యం మీద శ్రద్ధ తగ్గింది. యోగా మనిషి శరీరాన్ని, మనసును ఏకం చేసే సాధనం. యోగా సాధన, శిక్షణలో ఉన్నత స్థానాలు చేరుకోవడానికి ఏకాగ్రత, సాధన ఎంతో ఆవశ్యకం. ఈ యోగా శిక్షణలో ఉపాధ్యాయుడిగా మారాలనుకునేవారు మొరార్జీ దేశాయ్‌ నేషనల్‌ ఇన్‌స్టిట్యూట్‌ ఆఫ్‌ యోగా (మినిస్ట్రీ ఆఫ్‌ ఆయుష్‌) వారు అందిస్తున్న వివిధ సర్టిఫికెట్‌ కోర్సులను పూర్తిచేసి అడ్వాన్స్‌డ్‌ యోగా సాధన కోర్సును ఎంచుకోవచ్చు. యోగా టీచర్‌ ట్రైనింగ్‌ కోర్సు, అందిస్తున్న నగరాల్లో రుషికేష్‌, ధర్మశాల ప్రముఖమైనవి. ఈ కోర్సును పూర్తిచేసినవారు సర్టిఫైడ్‌ యోగా టీచర్‌ అవుతారు. ఎస్‌-వ్యాసా యూనివర్సిటీ వారు బీఎస్‌సీ, ఎంఎస్‌సీ యోగా కోర్సులను రెగ్యులర్‌, దూరవిద్య విధానంలో అందిస్తున్నారు.

* బీఎస్‌సీ (మైక్రోబయాలజీ) పూర్తిచేశాను. నాకున్న ప్రభుత్వ ఉద్యోగావకాశాలేవి? ప్రభుత్వ సంస్థలు అందించే కోర్సులేమైనా ఉన్నాయా? - ఎస్‌.కుమారస్వామి

డిగ్రీతో అర్హత ఉన్న సివిల్స్‌, గ్రూప్స్‌, బ్యాంక్‌ వంటి పోటీపరీక్షలకు దరఖాస్తు చేసుకోవచ్చు. మైక్రోబయాలజీ స్పెషలైజేషన్‌లో ఉద్యోగాలకైతే సెంట్రల్‌ రిసెర్చ్‌ ఇన్‌స్టిట్యూట్స్‌, క్లినికల్‌ రిసెర్చ్‌ ఇన్‌స్టిట్యూట్స్‌లో రిసెర్చ్‌ అసిస్టెంట్‌, ఫీల్డ్‌ సర్వే పర్సనల్‌, కెమికల్‌ అసిస్టెంట్‌తోపాటు ఫుడ్‌ ఇన్‌స్పెక్టర్‌, సైంటిఫిక్‌ ఆఫీసర్‌, ఆక్వా రంగంలో క్వాలిటీ అస్యూరెన్స్‌ వంటి వివిధ ప్రభుత్వ, ప్రైవేటు ఉద్యోగాలను సొంతం చేసుకోవచ్చు. ప్రభుత్వ పరిశోధన సంస్థల్లో (పీజీఎంఐఈఆర్‌, సీఆర్‌ఐజేఏఎఫ్‌, ఎన్‌ఐఏబీ, అగ్రికల్చర్‌ రిసెర్చ్‌ ఇన్‌స్టిట్యూట్స్‌) జూనియర్‌ రిసెర్చ్‌ ఫెలో, సీనియర్‌ రిసెర్చ్‌ ఫెలో వంటి అవకాశాలను పొందొచ్చు. కానీ ఇందుకు ఎంఎస్‌సీ మైక్రోబయాలజీ పూర్తిచేసి ఉండాలి. ఈ రంగంలో ముందుకు సాగాలంటే పీజీ చేయడంతోపాటు పరిశోధనపై మక్కువ పెంచుకోవడం ద్వారా మంచి భవిష్యత్తును సాధించుకోవచ్చు.

* బీఏ (హెచ్‌టీపీ) పూర్తిచేశాను. పై చదువులు ఏవి చదివితే మేలు? నాకున్న ఉద్యోగావకాశాలేవి? - కేవీటీ, హైదరాబాద్‌

బీఏ (హిస్టరీ, తెలుగు, పాలిటీ) పూర్తి చేసినవారు పోస్ట్‌ గ్రాడ్యుయేషన్‌ స్థాయిలో తమకు ఆసక్తి ఉన్నటువంటి (పై మూడింటిలో) ఏదో ఒక కోర్సును స్పెషలైజేషన్‌గా ఎంచుకుని తమ పై చదువులు కొనసాగించవచ్చు. లేదా ఎంబీఏ వంటి ప్రొఫెషనల్‌ కోర్సును ఎంచుకుని బిజినెస్‌ రంగంలో ఉద్యోగం లేదా సొంత వ్యాపారాన్ని స్థాపించుకోవచ్చు. సాధారణంగా బీఏ (హెచ్‌టీపీ) చదివినవారు ప్రభుత్వ పరీక్షలైన గ్రూప్‌-1, గ్రూప్‌-2లకు సన్నద్ధం కావడం లేదా యూపీఎస్‌సీ పరీక్షలకు సన్నద్ధమై మంచి ప్రభుత్వ ఉద్యోగాన్ని సాధించవచ్చు. కమ్యూనికేషన్‌ స్కిల్స్‌, ఎంఎస్‌ ఆఫీస్‌ వంటి కంప్యూటర్‌ స్కిల్స్‌ పెంపొందించుకుంటే ప్రైవేటు సంస్థల్లో ఉద్యోగాన్ని పొందవచ్చు. హిస్టరీ పట్ల ఆసక్తి ఉన్నవారు ఎంఏ ఆర్కియాలజీ కోర్సును ఎంచుకుంటే మంచి ఉద్యోగావకాశాలు ఉంటాయి.

* స్టార్టప్‌ స్థాపనలో ఏ కెమిస్ట్రీ కోర్సు ఉపయోగపడుతుంది? ఆర్గానిక్‌, అనలిటికల్‌, ఫిజికల్‌ కెమిస్ట్రీల్లో భవిష్యత్తుకు ఉపయోగపడేదేది? కోర్సులను అందించే విశ్వవిద్యాలయాలూ, ఉద్యోగావకాశాలనూ తెలపండి. ఐఐటీ దిల్లీలో పీహెచ్‌డీ ఉందా? - డి. పౌర్ణమి

అంకుర సంస్థ/ స్టార్టప్‌ను స్థాపించడంలో ఆచరణాత్మకమైన వ్యాపార ఆలోచన చాలా ముఖ్యం. అమెరికన్‌ కెమికల్‌ సొసైటీ ప్రెసిడెంట్‌ జోసఫ్‌ ప్రకారం సమాజం ఎదుర్కొన్న/ ఎదుర్కొంటున్న అతిపెద్ద సమస్యలకు కెమిస్ట్రీ పరిష్కారం చూపగలదు. కాబట్టి ముందుగా మీరు ఏ కెమిస్ట్రీ మంచిదో పక్కనపెట్టి సమస్యను కనుక్కోవడానికి ప్రయత్నించి ఆ తరువాత ఆ మార్గంలో అడుగులు వేయడం మంచిది.
ఆర్గానిక్‌ లేదా అనలిటికల్‌, ఫిజికల్‌ కెమిస్ట్రీ కూడా భవిష్యత్తులో ఉపయోగపడేవే. ఇవి వేటికవే తమదైన ప్రత్యేకతను కలిగివున్నాయి. కాబట్టి మీరు మీకు నచ్చిన స్పెషలైజేషన్‌ను ఎంచుకోండి.
ఐఐటీ-దిల్లీ, బాంబే, బెంగళూరు, యూనివర్సిటీ ఆఫ్‌ హైదరాబాద్‌ లాంటి ప్రతిష్ఠాత్మక విశ్వవిద్యాలయాలు, సంస్థలు ఎంఎస్‌సీ కెమిస్ట్రీ, పీహెచ్‌డీ, ఇంటిగ్రేటెడ్‌ ఎంఎస్‌సీ+పీహెచ్‌డీ కోర్సులను అందిస్తున్నాయి. ఉద్యోగావకాశాల పరంగా ఎంఎస్‌సీ కెమిస్ట్రీ పూర్తిచేసినవారికి రిసెర్చ్‌ సైంటిస్ట్‌, సీఎస్‌ఐఆర్‌ నెట్‌ జేఆర్‌ఎఫ్‌, కెమికల్‌ అనలిస్ట్‌, రిసెర్చ్‌ అనలిస్ట్‌, ఉపాధ్యాయ వృత్తిలో ప్రభుత్వ, ప్రైవేటు ఉద్యోగాలను సాధించుకోవచ్చు.

* ఇంటర్‌ (క్రాప్‌ ప్రొడక్షన్‌ అండ్‌ మేనేజ్‌మెంట్‌ ఇన్‌ అగ్రికల్చర్‌) ఒకేషనల్‌ కోర్సు చేశాను. నాకున్న ఉన్నతవిద్య అవకాశాలను తెలపండి. నాకున్న ప్రభుత్వ, ప్రైవేటు ఉద్యోగావకాశాలేవి? - నక్కల శ్రీనివాస్‌ యాదవ్‌

క్రాప్‌ ప్రొడక్షన్‌ అండ్‌ మేనేజ్‌మెంట్‌లో ఇంటర్‌ పూర్తిచేసినవారికి స్వయం ఉపాధి, వ్యవసాయ, వ్యవసాయాధారిత పరిశ్రమల్లో ఉద్యోగావకాశాలు ఉంటాయి. ఇది స్టాండ్‌ అలోన్‌ కోర్సు కావడం వల్ల వ్యవసాయం ద్వారా వ్యవసాయాధారిత మార్గాల ద్వారా స్వయం ఉపాధి కల్పనకు విద్యార్థులను తయారు చేస్తోంది. ఈ కోర్సు పూర్తిచేసినవారికి విలేజ్‌ లెవల్‌ అసిస్టెంట్‌, ఫీల్డ్ అసిస్టెంట్‌, విత్తన గ్రేడర్‌, విత్తన ప్రొడక్షన్‌ అసిస్టెంట్‌, మెటరలాజికల్‌ అబ్జర్వర్‌, గ్రామీణ బ్యాంకుల్లో అగ్రికల్చర్‌ అసిస్టెంట్‌, సీడ్‌ గ్రోవర్‌ వంటి శాఖల్లో ప్రభుత్వ, ప్రైవేటు ఉద్యోగావకాశాలుంటాయి. ఇంకా పై చదువుల విషయానికొస్తే బీబీఏ, బీబీఎం వంటి డిగ్రీ కోర్సులను చేసి పీజీ స్థాయిలో ఎంబీఏ (అగ్రి బిజినెస్‌) కోర్సును చేసే సౌలభ్యం ఉంది. మనదేశం వ్యవసాయాధారిత దేశం కాబట్టి వ్యవసాయ సంబంధిత మేనేజ్‌మెంట్‌ కోర్సులు చేసినవారికీ మంచి అవకాశాలున్నాయి.

* ఈసీఈ డిప్లొమా చేశాను. నా సబ్‌ బ్రాంచ్‌ ఎలక్ట్రానిక్స్‌ అండ్‌ వీడియో ఇంజినీరింగ్‌. ఉన్నతవిద్య చదవాలనుంది. బీటెక్‌ కాకుండా నాకున్న అవకాశాలేంటి? - విశాల్‌

సాధారణంగా డిప్లొమా పూర్తి చేసినవారు ఉద్యోగం కానీ బీటెక్‌ ద్వారా తమ చదువును కానీ కొనసాగిస్తారు. మీకు బీటెక్‌ కాకుండా బీఎస్‌సీ (కమ్యూనికేషన్‌ అండ్‌ ఎలక్ట్రానిక్స్‌, మేథమేటిక్స్‌ అండ్‌ స్టాటిస్టిక్స్‌, కంప్యూటర్‌ సైన్స్‌ అండ్‌ ఎలక్ట్రానిక్స్‌) చదివే అవకాశం ఉంది. అలాకాకుండా వ్యాపారం, మేనేజ్‌మెంట్‌ పట్ల ఆసిక్తి ఉంటే బీబీఏ, బీకాం, బీబీఎం వంటి డిగ్రీ కోర్సులను ఎంచుకోవచ్చు. ఈ మధ్యకాలంలో కొన్ని కళాశాలలు డిగ్రీ స్థాయిలో డేటా అనలిటిక్స్‌ కోర్సులను అందిస్తున్నాయి. మీ అభిరుచి, ఆసక్తి ఆధారంగా పైన పేర్కొన్న కోర్సులను ఎంచుకోవచ్చు.

* బీఎస్‌సీ (మేథ్స్‌, స్టాటిస్టిక్స్‌, కంప్యూటర్‌ సైన్స్‌) పూర్తిచేశాను. తరువాత ఎంఎస్‌సీ స్టాటిస్టిక్స్‌ చేద్దామనుకుంటున్నా. నాకున్న ప్రభుత్వ, ప్రైవేటు ఉద్యోగావకాశాలూ, ఎంపిక ప్రక్రియనూ తెలపండి. - సందీప్‌, మహబూబ్‌నగర్‌

ప్రస్తుత సాంకేతిక, డేటా విప్లవంతో స్టాటిస్టిక్స్‌లో పీజీ చేసినవారికి స్టాటిస్టీషియన్‌, స్టాటిస్టికల్‌ ఆఫీసర్‌, రిసెర్చ్‌ అసిస్టెంట్‌, యూపీఎస్‌సీ వారు నిర్వహించే ఇండియన్‌ స్టాటిస్టికల్‌ సర్వీస్‌లో ఆఫీసర్‌, డిగ్రీ లెక్చరర్‌, అసిస్టెంట్‌ ప్రొఫెసర్‌ (యూనివర్సిటీల్లో) వంటి ప్రభుత్వ ఉద్యోగావకాశాలు ఉన్నాయి.
ప్రైవేటు రంగంలో డేటా సైంటిస్ట్‌, డేటా అనలిస్ట్‌, రిసెర్చ్‌ అనలిస్ట్‌, లెక్చరర్‌, స్టాటిస్టిక్స్‌, ట్రైనర్‌ వంటి అవకాశాలు ఉన్నాయి. అనలిటిక్స్‌ రంగంలో ఆసక్తి ఉన్నవారు ఆర్‌ ప్రోగ్రామింగ్‌, పైథాన్‌, మెషిన్‌ లెర్నింగ్‌ వంటి అదనపు కోర్సులను నేర్చుకోవడం ద్వారా మంచి ఉద్యోగంతోపాటు మంచి వేతనాన్నీ పొందగలరు.

* ఇంటర్‌ (బైపీసీ) రెండో సంవత్సరం చదువుతున్నాను. ఫొటోగ్రఫీ అంటే ఆసక్తి. దీనిలో కెరియర్‌ నిర్మించుకోవాలనుంది. ప్రవేశపరీక్షలు, అందించే కళాశాలలేవి? భవిష్యత్తు ఎలా ఉంటుంది? - దిషిత, విశాఖపట్నం

వెయ్యి పదాలకంటే ఒక చిత్రం ఎక్కువ మాట్లాడుతుంది. ఫొటోగ్రఫీలో ఆసక్తి ఉన్నవారు వైవిధ్యంగా చిత్రాన్ని చూడగల నేర్పు, సృజనాత్మకత, వృత్తిపట్ల అంకిత భావం కలిగివుండాలి. ఫిలిం అండ్‌ టెలివిజన్‌ ఇన్‌స్టిట్యూట్‌ ఆఫ్‌ ఇండియా, పుణె, ఇండియన్‌ ఇన్‌స్టిట్యూట్‌ ఆఫ్‌ డిజిటల్‌ ఆర్ట్‌- కోల్‌కతా, కాలేజ్‌ ఆఫ్‌ ఆర్ట్‌- దిల్లీ, ఉస్మానియా యూనివర్సిటీ- హైదరాబాద్‌ వారు మూడేళ్ల బ్యాచిలర్‌ ఇన్‌ ఫైన్‌ఆర్ట్స్‌ (ఫొటోగ్రఫీ), బ్యాచిలర్‌ (ఫొటోగ్రఫీ) కోర్సులను అందిస్తున్నారు.
తమ సొంత ప్రవేశపరీక్షల ద్వారా ఈ కోర్సుల్లోకి ప్రవేశాన్ని కల్పిస్తున్నారు. 10+2 చదివినవారు అర్హులు. ఫొటోగ్రఫీ చేసినవారికి ఫ్యాషన్‌, టీవీ, సినిమా, ప్రొఫెషనల్‌ ఫొటోగ్రఫీ రంగాల్లో మంచి ఉపాధి, ఉద్యోగావకాశాలు ఉన్నాయి.

* తొమ్మిదో తరగతి చదువుతున్నాను. స్పేస్‌పై ఆసక్తి. ఇస్రోలో చేరాలనుంది. పై చదువుల్లో ఏ గ్రూపులను ఎంచుకోవాలి? వేటిని చదివితే నా లక్ష్యాన్ని చేరుకోగలను? - వంశీతేజ ్‌

స్పేస్‌ సైన్స్‌పై ఆసక్తి, ఇస్రోలో చేరాలనే కోరిక ఉన్న ఔత్సాహికులు/ విద్యార్థులు గణితం, భౌతికశాస్త్రం పట్ల ప్రజ్ఞావంతులై ఉండాలి. అందుకు మీరు ఇంటర్మీడియట్‌లో ఎంపీసీ ఎంచుకోవడం మంచిది. డిగ్రీలో ఎలక్ట్రానిక్స్‌ అండ్‌ కమ్యూనికేషన్‌ ఇంజినీరింగ్‌, బీఎస్‌సీ ఫిజికల్‌ సైన్సెస్‌, జియో ఫిజిక్స్‌ వంటి సబ్జెక్టులను ఎంచుకుని వాటిలోనే పైచదువులు ఎంఎస్‌సీ లేదా ఎంటెక్‌ చేయడం ద్వారా స్పేస్‌ సైన్సెస్‌/ ఇస్రో వంటి సంస్థల్లో టెక్నికల్‌ ఉద్యోగాలను పొందవచ్చు.
ఇస్రోలో నాన్‌ టెక్నికల్‌ ఉద్యోగాలకు ఏదైనా డిగ్రీ చేసినవారు అర్హులు. కాబట్టి మీరు టెక్నికల్‌/ నాన్‌ టెక్నికల్‌ రంగాల్లో వేటిలో ఉద్యోగాలను పొందాలనుకుంటున్నారో నిర్ణయించుకుని ముందుకు అడుగు వేయండి.

* ఏసీసీఏ చదవాలనుకుంటున్నాను. దాని ప్రాముఖ్యాన్ని తెలపండి. ఇది సీఏతో సమానమేనా? మనదేశంలో ఈ కోర్సు చేసినవారికి అవకాశాలెలా ఉన్నాయి? - ఎన్‌.పి. భాస్కర్‌

అసోసియేషన్‌ ఆఫ్‌ చార్టర్డ్‌ సర్టిఫైడ్‌ అకౌంటెన్స్‌ (ఏసీసీఏ) ఒక అంతర్జాతీయ ప్రొఫెషనల్‌ అకౌంటింగ్‌ బాడీ. చార్టర్డ్‌ అకౌంటెన్సీ కోర్సును అకౌంటింగ్‌ రెగ్యులేటరీ సంస్థ అయిన ఇన్‌స్టిట్యూట్‌ ఆఫ్‌ చార్టర్డ్‌ అకౌంటెన్స్‌ ఆఫ్‌ ఇండియా వారు అందించే ఫ్లాగ్‌ షిప్‌ కోర్సు. ఈ రెండు కోర్సులకూ అకౌంటింగ్‌ రంగంలో ప్రత్యేకత, గుర్తింపు ఉన్నాయి. ఏసీసీఏ కోర్సుకు అంతర్జాతీయ గుర్తింపు దాదాపుగా 130 దేశాల్లో ఉంది. అంతర్జాతీయంగా వేరే దేశాల్లో ఉద్యోగం చేయాలనుకునేవారు ఏసీసీఏ కోర్సును ఎంచుకోవచ్చు. బహుళజాతి సంస్థల్లో ఈ కోర్సుకు మంచి గిరాకీ ఉంది.
ఇక సీఏ కోర్సు పూర్తిచేసినవారు మనదేశంలో సొంతంగా ప్రాక్టీసు పెట్టుకోవచ్చు. చార్టర్డ్‌ అకౌంటెంట్‌ సంతకం ఆడిటింగ్‌, టాక్స్‌, రిపోర్టింగ్‌లో చాలా ప్రాముఖ్యమైంది. ఏసీసీఏ పూర్తి చేసినవారికి ఈ సౌలభ్యం లేదు. కానీ ఉపాధి విషయానికి వస్తే రెండు కోర్సుల‌కూ బాగా గిరాకీ ఉంది.చార్ట‌ర్డ్ అకౌంటింగ్ పూర్తిచేసిన‌వారు ఏసీసీఏ కోర్సులో తొమ్మిది పేప‌ర్ల వ‌ర‌కు మిన‌హాయింపు పొంద‌వ‌చ్చు.

* మా అమ్మాయి ప్రస్తుతం ఏడో తరగతి చదువుతోంది. బీయూఎంఎస్‌ చేయించాలని కోరిక. అర్హత వివరాలను తెలియజేయండి. రెగ్యులర్‌ చదువుతోపాటు ఉర్దూనూ దూరవిద్య ద్వారా చేయడం కుదురుతుందా? - ఎస్‌.ఎండీ యూనుస్‌, కర్నూలు

యునానీ చికిత్సకు దాదాపు ఆరు వేల సంవత్సరాల చరిత్ర ఉంది. బ్యాచిలర్స్‌ ఇన్‌ యునానీ మెడికల్‌ సైన్సెస్‌ (బీయూఎంఎస్‌) కోర్సు చదవాలనుకునేవారు ఇంటర్‌ (10+2)లో బైపీసీ చదవాల్సి ఉంటుంది. బీయూఎంఎస్‌ కోర్సు వ్యవధి అయిదేళ్ల ఆరు నెలలు. ఇందులో చివరి ఏడాది ఇంటర్న్‌షిప్‌ ఉంటుంది. ఈ కోర్సును సెంట్రల్‌ కౌన్సిల్‌ ఆఫ్‌ ఇండియన్‌ మెడిసిన్‌ (సీసీఐఎం) వారు రెగ్యులేట్‌ చేస్తారు. కోర్సును పూర్తిచేసిన విద్యార్థిని హకీమ్‌ అని పిలుస్తారు. పదో తరగతి వరకు ఉర్దూను ఒక సబ్జెక్టుగా చదివుండాలి లేదా ఇంటర్‌లో ఉర్దూను ఒక సబ్జెక్టుగా లేదా ఆప్షనల్‌గా చదివినవారు మాత్రమే అర్హులు. ఎందుకంటే ఈ కోర్సును ఉర్దూ మాధ్యమంలోనే అందిస్తారు.
మీ అమ్మాయి విషయంలో మీరు ఉర్దూ ఆప్షనల్‌గా ఉన్న విద్యాలయంలో చదివించడం శ్రేయస్కరం. మెరిట్‌ (10+2) ఆధారంగా సాధారణంగా బీయూఎంఎస్‌ కోర్సులో ప్రవేశ అర్హత లభిస్తుంది. నేషనల్‌ ఇన్‌స్టిట్యూట్‌ ఆఫ్‌ ఓపెన్‌ స్కూలింగ్‌ ద్వారా దూరవిద్య పాఠశాల స్థాయిలో చేయడం కుదురుతుంది. ముఖ్యంగా విద్యార్థి తనకిష్టమైన రంగంలో అడుగుపెట్టి కృషి చేస్తే భవిష్యత్తు ఉజ్వలంగా ఉంటుంది.

* పదో తరగతి చదువుతున్నాను. అగ్రికల్చర్‌పై ఆసక్తి ఉంది. ఇంటర్‌, ఆపై ఏ గ్రూపులు ఎంచుకోవాలి? అందించే కళాశాలలేవి? భవిష్యత్తు ఎలా ఉంటుంది? - ఇ. అంజి నాయక్‌

మనది వ్యవసాయాధారిత దేశం కాబట్టి ఈ రంగంలో అభ్యర్థులకు అపార విద్య, ఉద్యోగ, వ్యాపార అవకాశాలు ఉన్నాయి. ఇంటర్‌ (10+2)లో బైపీసీ చదివినవారు డిగ్రీలో అగ్రికల్చర్‌ రంగాన్ని ఎంచుకోవచ్చు.
మన తెలుగు రాష్ట్రాల్లో ఎంసెట్‌ ద్వారా బీఎస్‌సీ (అగ్రికల్చర్‌)లో ప్రవేశాన్ని కల్పిస్తున్నారు. ఆచార్య ఎన్‌జీ రంగా యూనివర్సిటీ, డాక్టర్‌ వైఎస్‌ఆర్‌ అగ్రికల్చర్‌ యూనివర్సిటీ, కాలేజ్‌ ఆఫ్‌ అగ్రికల్చర్‌ ఇంజినీరింగ్‌, గుంటూరు, అనుబంధ కళాశాలలు ఈ కోర్సును అందిస్తున్నాయి. జాతీయ స్థాయిలో ఇండియన్‌ కౌన్సిల్‌ ఫర్‌ అగ్రికల్చర్‌ రిసెర్చ్‌ (ఐసీఏఆర్‌) వారు నిర్వహించే ప్రవేశపరీక్ష ద్వారా బీటెక్‌ (అగ్రికల్చర్‌ ఇంజినీరింగ్‌)లో ఐసీఏఆర్‌ సంస్థల్లో సీటు సాధించుకోవచ్చు. ప్రభుత్వ, ప్రైవేటు సంస్థల్లో కోర్సు పూర్తి చేసినవారు అగ్రోనమిస్ట్‌, ఫుడ్‌ ఇంజినీర్‌, సాయిల్‌ సైంటిస్ట్‌, ఫార్మ్‌ షాప్‌ మేనేజర్‌ వంటి వివిధ అవకాశాలను అందిపుచ్చుకోవచ్చు.

* బీఎస్‌సీ (ఎంపీసీ) పూర్తిచేశాను. ఎంఎస్‌సీ ఫోరెన్సిక్‌ సైన్స్‌ చేయాలనుంది. నేను అర్హుడినేనా? అందించే కళాశాలల వివరాలను తెలపండి. - చందన్‌ రెడ్డి

నేర పరిశోధనలో విజ్ఞాన సూత్రాలను వర్తింపజేసి, సాధారణ దృష్టిని తప్పించుకునే ఆధారాలను కనుక్కొనే శాస్త్రమే ఫోరెన్సిక్‌ సైన్స్‌. మైక్రో బయాలజీ, బయోకెమిస్ట్రీ, జంతుశాస్త్రం, రసాయన శాస్త్రం, భౌతిక శాస్త్రం, అప్లయిడ్‌ సైన్స్‌ లేదా వృక్ష శాస్త్రంలో డిగ్రీ పూర్తిచేసినవారికి ఎంఎస్‌సీ ఫోరెన్సిక్‌ సైన్స్‌ చదివే అర్హత ఉంటుంది. కాబట్టి ఈ కోర్సు చేయడానికి మీరు అర్హులే. పీజీ స్థాయిలో ఈ కోర్సును అమిటి యూనివర్సిటీ, గల్గోతియా యూనివర్సిటీ, డాక్టర్‌ హరిసింగ్‌ గౌర్‌ యూనివర్సిటీ అందిస్తున్నాయి. పరిశీలన నైపుణ్యాలు, సహజంగా పరిశోధించే స్వభావం, ఆసక్తి ఉన్న అభ్యర్థులు ఈ వృత్తిలో రాణిస్తారు.

* బి.ఫార్మసీ రెండో సంవత్సరం చదువుతున్నాను. ఫార్మాలో పీజీ చేసినా మంచి జీతంతో కూడిన ఉద్యోగాలు దొరకవని విన్నాను. నిజమేనా? బి.ఫార్మసీ తరువాత బ్యాంకు, ఇతర ఉద్యోగాల పోటీపరీక్షలు రాద్దామనుకుంటున్నా. నాకు అర్హత ఉంటుందా? లేదా బి.ఫార్మసీ పూర్తయ్యాక ఏ కోర్సులు ఎంచుకుంటే మేలో సూచించండి. - ఎస్‌. రమేష్‌, రేపల్లె, గుంటూరు

ఫార్మా కళాశాలలు భారీగా పెరగడంతో విద్యార్థుల సంఖ్య బాగా పెరిగింది. దీనివల్ల బి.ఫార్మసీ పూర్తిచేసిన అభ్యర్థులకు అవకాశాలు తగ్గాయన్నమాట కొంతవరకూ వాస్తవమే. కానీ ఫార్మా రంగం అభివృద్ధి, బహుళజాతి సంస్థలు మనదేశానికి రావడం ఫార్మా విద్యార్థులకు శుభపరిణామం. వీటివల్ల రిసెర్చ్‌ ఓరియెంటెడ్‌ ఉద్యోగావకాశాలు మెండుగానే ఉన్నాయి. విద్యార్థి తన డిగ్రీ లేదా పీజీ కోర్సుల్లో పరిశోధనాత్మకంగా విద్యను అభ్యసిస్తే ఉద్యోగాలను మంచి జీతంతో అందిపుచ్చుకోవచ్చు. బి.ఫార్మసీ చదివినవారు కూడా డిగ్రీ అర్హతగా ఉన్న బ్యాంకు, ఇతర ప్రభుత్వ ఉద్యోగాలకు దరఖాస్తు చేసుకోవచ్చు. ఫార్మకోవిజిలెన్స్‌, మెడికల్‌ కోడింగ్‌ వంటి అదనపు కోర్సుల్లో శిక్షణ పొందడం ద్వారా మంచి ఉద్యోగావకాశాలను పొందవచ్చు. ఆసక్తి ఉన్నవారు మెడికల్‌ స్టోర్‌ను స్థాపించుకుని, వ్యాపార రంగంలోకి అడుగు పెట్టవచ్చు. కాబట్టి ఎక్కువగా మధనపడకుండా మీ కోర్సు వర్క్‌పై దృష్టిసారించండి.

* బీఎస్‌సీ (ఎంపీసీ) పూర్తిచేశాను. ఆర్కిటెక్చర్‌పై ఆసక్తి ఉంది. నాకున్న అవకాశాలేంటి? ప్రవేశపరీక్షలు, అందించే కళాశాలలు, ఫీజు వివరాలను తెలియజేయగలరు. - ఎన్‌. సాయితేజ, సిద్ధిపేట

ఆర్కిటెక్చర్‌ చదవాలనుకునేవారు 10+2లో మేథ్స్‌, ఫిజిక్స్‌ అభ్యసించి ఉండాలి. నేషనల్‌ ఆప్టిట్యూడ్‌ టెస్ట్‌ ఇన్‌ ఆర్కిటెక్చర్‌ (ఎన్‌ఏటీఏ) వారు నిర్వహించే ప్రవేశపరీక్ష ద్వారా బి.ఆర్క్‌లో ప్రవేశాన్ని పొందవచ్చు. ఎలాగూ మీరు డిగ్రీ పూర్తిచేశారు కాబట్టి, ఒకసారి ఆలోచించుకుని అడుగు వేయడం శ్రేయస్కరం. బి.ఆర్క్‌ కోర్సుకు అయిదేళ్ల వ్యవధి. నేషనల్‌ ఇన్‌స్టిట్యూట్‌ ఆఫ్‌ డిజైన్‌, స్కూల్‌ ఆఫ్‌ ప్లానింగ్‌ అండ్‌ ఆర్కిటెక్చర్‌, ఐఐటీ రూర్కీ, ఎన్‌ఐటీ తిరుచ్చి వంటి ప్రసిద్ధ విద్యాసంస్థలు ఈ కోర్సును అందిస్తున్నాయి. సంబంధిత విద్యాలయాన్ని బట్టి కోర్సు ఫీజులో మార్పు ఉంటుంది.

* పదో తరగతి చదువుతున్నాను. వీఎఫ్‌ఎక్స్‌, గ్రాఫిక్స్‌, యానిమేషన్‌పై ఆసక్తి. ఇంటర్‌, ఆపై ఏ కోర్సులు ఎంచుకోవడం మేలు? - ఎన్‌. ధృవ సాద్విక్‌

యానిమేషన్‌ రంగంలో చేరాలనుకునేవారికి కంప్యూటర్‌ పరిజ్ఞానం, వైవిధ్యంగా ఆలోచించే ధోరణి, సృజనాత్మకత వంటి ప్రధాన నైపుణ్యాలుండాలి. మల్టీమీడియా రంగం అభివృద్ధి చెందడంతో యానిమేషన్‌, వీఎఫ్‌ఎక్స్‌, గ్రాఫిక్స్‌ నిపుణులకు గిరాకీ ఏర్పడింది. ఈ రంగంలో గేమింగ్‌, డిజైన్‌, వీఎఫ్‌ఎక్స్‌, 3డి యానిమేషన్‌, మిక్సింగ్‌, ఎడిటింగ్‌, డిజైనింగ్‌ విజువల్‌ ఆర్ట్స్‌ వంటి వివిధ విభాగాలు ఉన్నాయి. విద్యార్థి తన ఆసక్తినిబట్టి కోర్సును/ రంగాన్ని ఎంచుకోవాలి.
10+2లో పెయింటింగ్‌ అండ్‌ ఆర్ట్స్‌ను ఒక ఐచ్ఛికంగా ఎంచుకోవడం మంచిది. మాయా అకాడమీ ఆఫ్‌ అడ్వాన్స్‌డ్‌ సినిమాటిక్స్‌ (ఎంఏఏసీ), ఎరెనా అకాడమీ, షాఫ్ట్‌ యానిమేషన్‌ వంటి ప్రైవేటు సంస్థలు ఈ రంగంలో శిక్షణను అందిస్తున్నాయి.

* నేవీ, ఏర్‌ఫోర్స్‌, ఆర్మీల్లో ఉన్నత క్యాడర్‌లో చేరాలంటే ఎలా ముందడుగు వేయాలి? ఎన్‌డీఏ, డిఫెన్స్‌ పరీక్షల గురించి తెలుపగలరు. - స్వరూప్‌, మిర్యాలగూడ

సాధారణంగా ఒక వ్యక్తి ఉన్నత క్యాడర్‌ (నేవీ/ ఏర్‌ఫోర్స్‌/ ఆర్మీ)లో చేరాలంటే అకంఠిత దీక్ష, శ్రమ, గురి కలిసి ఉండాలి. ఆర్మీలో ముఖ్యంగా మూడు రకాల ఆఫీసర్‌ ర్యాంకులు ఉంటాయి. నాన్‌ కమిషన్‌ ఆఫీసర్‌ (సిపాయి నుంచి హవిల్దార్‌)లో నాలుగు స్థాయులు ఉంటాయి. తరువాతది జూనియర్‌ కమిషన్‌ ఆఫీసర్‌ ర్యాంకులు (నాయిబ్‌ సుబేదార్‌, సుబేదార్‌, సుబేదార్‌ మేజర్‌). ఇక మూడోది, ఉన్నతమైనది కమీషన్డ్‌ ఆఫీసర్‌ ర్యాంకులు (లెఫ్టినెంట్‌, కెప్టెన్‌, మేజర్‌, లెఫ్టినెంట్‌ కల్నల్‌, కల్నల్‌, బ్రిగేడియర్‌, మేజర్‌ జనరల్‌, లెఫ్టినెంట్‌ జనరల్‌, జనరల్‌, ఫీల్డ్‌ మార్షల్‌). వీటిలో అన్నింటి కంటే ఉన్నతమైన క్యాడర్‌/ ర్యాంకు ఫీల్డ్‌ మార్షల్‌. ఇప్పటివరకూ ఈ ర్యాంకును ఇద్దరు మాత్రమే అందుకున్నారు. ప్రమోషన్‌ ద్వారా పై ర్యాంకులను చేరుకోవచ్చు.
ఎన్‌డీఏ (నేషనల్‌ డిఫెన్స్‌ అకాడమీ) వారు నిర్వహించే పరీక్ష ద్వారా అభ్యర్థులు నేవీ, ఏర్‌ఫోర్స్‌, ఆర్మీల్లోకి ప్రవేశాన్ని పొందవచ్చు. ఈ పరీక్షలకు ప్రధాన (నేవీ, ఏర్‌) అర్హత 10+2లో మేథమెటిక్స్‌, ఫిజిక్స్‌ సబ్జెక్టుల్లో ఉత్తీర్ణులై ఉండాలి. ఆర్మీలో ప్రవేశానికి 10+2లో ఏ సబ్జెక్టు చదివినవారైనా అర్హులే. ప్రవేశపరీక్ష ఉత్తీర్ణులైన వారికి ఫిజికల్‌ ఫిట్‌నెస్‌ పరీక్షను నిర్వహించి ఫిట్‌ అని తేలాక సర్వీస్‌ సెలక్షన్‌ బోర్డువారు ఇంటెలిజెన్స్‌ పర్సనాలిటీ టెస్ట్‌ ఆధారంగా 10+2 కేడెట్‌ ఎంట్రీని ఆర్మీ/ నేవీ/ ఏర్‌ఫోర్స్‌లో కల్పిస్తారు.

* ప్రభుత్వ కళాశాలలో ప్రిన్సిపల్‌ అవ్వాలని నాకు ఆసక్తి. దీనికి ఏం చదవాలి? - మనీష, తిరువూరు

ఉపాధ్యాయ వృత్తిమీద మీకున్న మక్కువకు అభినందనలు. సాధారణంగా ఈ వృత్తిలో ప్రిన్సిపల్‌ (ప్రభుత్వ కళాశాలకు) అభ్యర్థులు సంబంధిత సబ్జెక్టులో డిగ్రీ, పీజీ పూర్తిచేసి ఉండాలి. డిగ్రీ కళాశాలలో అసిస్టెంట్‌ ప్రొఫెసర్‌గా చేరాలంటే సంబంధిత పీజీ సబ్జెక్టులో యూజీసీ/ సీఎస్‌ఐఆర్‌ వారు నిర్వహించే నెట్‌ (నేషనల్‌ ఎలిజిబిలిటీ టెస్ట్‌) ఉత్తీర్ణులు కావాల్సి ఉంటుంది. ఇంటర్‌ కళాశాలలో చేరడానికి నెట్‌ రాయాల్సిన అవసరం లేదు. సాధారణంగా ఈ వృత్తిలో కళాశాల ప్రిన్సిపల్‌ కావడానికి ముఖ్య నియమం సీనియారిటీ అని చెప్పుకోవాలి. పీహెచ్‌డీ పట్టా పొందినవారికి త్వరగా ఇతరులతో పోలిస్తే ప్రిన్సిపల్‌ అయ్యే శాతం ఎక్కువ. ప్రమోషన్‌ ద్వారా వివిధ హోదాలను దాటుకుంటూ ప్రిన్సిపల్‌ హోదాను సాధించుకోవచ్చు.

* యానిమేషన్‌ రంగంలో చేరాలంటే ఏ అర్హతలుండాలి? అందులో ఏ కోర్సులుంటాయి? ఉపాధి అవకాశాలు బాగుంటాయా? ప్రముఖ ప్రభుత్వ, ప్రైవేటు సంస్థల వివరాలను తెలపండి. - మధు, నూజివీడు

యానిమేషన్‌ రంగంలో చేరాలనుకునేవారికి కనీస కంప్యూటర్‌ అవగాహన, వైవిధ్యంగా ఆలోచించే ధోరణి, సృజనాత్మకత వంటి ప్రధాన నైపుణ్యాలుండాలి. మల్టీమీడియా రంగం అభివృద్ధి చెందడంతో యానిమేషన్‌ నిపుణులకు డిమాండ్‌ ఏర్పడింది. ఈ రంగంలో గేమింగ్‌ డిజైన్‌, వీఎఫ్‌ఎక్స్‌, 3డీ యానిమేషన్‌, మిక్సింగ్‌, గ్రాఫిక్‌ డిజైనింగ్‌, విజువల్‌ ఆర్ట్స్‌ వంటి వివిధ విభాగాలుంటాయి. అభ్యర్థులు ఆసక్తిని బట్టి కోర్సునూ, రంగాన్నీ ఎంచుకోవచ్చు. ఈ కోర్సులో చేరాలంటే 10+2 పూర్తిచేసి ఉండాలి.
ప్రభుత్వ సంస్థలు ఈ కోర్సును అందించడం లేదు. మాయ అకాడమీ ఆఫ్‌ అడ్వాన్స్‌డ్‌ సినిమాటిక్స్‌ (ఎంఏఏసీ), ఎరీనా అకాడమీ, షాప్ట్‌ యానిమేషన్‌ సంస్థలు ప్రైవేటు రంగంలో ట్రెయినింగ్‌, ప్లేస్‌మెంట్లను అందిస్తున్నాయి. ఉపాధిపరంగా గ్రాఫిక్‌ డిజైనర్‌, వీఎఫ్‌ఎక్స్‌ స్పెషలిస్ట్‌, గేమింగ్‌ గ్రాఫిక్స్‌ ఇంజినీర్‌, యానిమేషన్‌ ఎక్స్‌పర్ట్‌ వంటి అవకాశాలుంటాయి.

* ఎథికల్‌ హ్యాకర్‌ అవ్వాలంటే కనీస విద్యార్హత ఏమిటి? దీనిలో ఏయే కోర్సులు, ఎక్కడ అందుబాటులో ఉంటాయి? - మృణాళిని, ముసునూరు

హానికర హ్యాకర్లు చేయదలచుకునే దుశ్చర్యలను ముందుగానే పసిగట్టి కంప్యూటర్‌, సమాచార వ్యవస్థల బలహీనతలు, దుర్భలాలను గుర్తించే చర్యను చట్టపరంగా సాగించడమే ఎథికల్‌ హ్యాకింగ్‌. ఈ కోర్సును చేయాలనుకునేవారికి కంప్యూటర్స్‌లో గ్రాడ్యుయేషన్‌ పూర్తి చేసుండటం లాభిస్తుంది. మన తెలుగు రాష్ట్రాల్లో వివిధ ప్రైవేటు కోచింగ్‌ సంస్థలు ఎథికల్‌ హ్యాకింగ్‌లో శిక్షణనిస్తున్నాయి. ముఖ్యంగా ఈసీ కౌన్సిల్‌వారు అందిస్తున్న సర్టిఫైడ్‌ ఎథికల్‌ హ్యాకింగ్‌ (సీఈహెచ్‌;వీ9) కోర్సు ప్రముఖమైంది. ఈ పరీక్షలో 125 ఆబ్జెక్టివ్‌ ప్రశ్నలు ఉంటాయి. నాలుగు గంటల వ్యవధిలో పరీక్షను పూర్తిచేయాల్సి ఉంటుంది. మరిన్ని వివరాలకు www.eccouncil.org ను సందర్శించవచ్చు. ప్రభుత్వ సంస్థలు ఈ కోర్సును అందించడం లేదు.

* బీఆర్క్‌ కోర్సులో చేరితే అవకాశాలెలా ఉంటాయి? - శ్రీరామ్‌, సింగరాయకొండ

బీఆర్క్‌ చదివినవారు వివిధ నిర్మాణాల ప్లానింగ్‌, డిజైనింగ్‌, నిర్మాణం, సూపర్‌విజన్‌ బాధ్యతలను నిర్వర్తించాల్సి ఉంటుంది. అభివృద్ధి చెందుతున్న దేశాల్లో వీళ్ల అవసరం ఎంతగానో ఉంది. ప్రధానంగా స్పెషల్‌ డిజైనింగ్‌, ఆస్థటిక్స్‌, సేఫ్టీ మేనేజ్‌మెంట్‌, వివిధ స్ట్రక్చర్‌ నిర్మాణాల్లో వీరిది ప్రధాన పాత్ర. వీరు ప్రభుత్వ, ప్రైవేటు సంస్థల్లో ఆర్కిటెక్చరల్‌ ఇంజినీర్‌, డిజైనర్‌, సూపర్‌వైజర్‌, సైట్‌ ఇంజినీర్‌గా చేయవచ్చు లేదా సొంతంగా ప్రాక్టీసును కూడా పెట్టుకోవచ్చు. మనదేశంలో నాటా (నేషనల్‌ ఆప్టిట్యూడ్‌ టెస్ట్‌ ఇన్‌ ఆర్కిటెక్చర్‌) పరీక్ష ద్వారా ప్రధాన విద్యాసంస్థల్లో బీఆర్క్‌లో ప్రవేశాన్ని పొందవచ్చు.

పైలట్‌ అవ్వాలని నాకు అభిలాష. దీనికి కావాల్సిన విద్యార్హతలూ, ఫిట్‌నెస్‌ ప్రమాణాలు, శిక్షణ సంస్థలు, వాటి సుమారు ఫీజు వివరాలను తెలపగలరు. - శ్రీకృష్ణ, వరంగల్‌

పైలట్‌ అవ్వాలనుకునేవారు 10+2ను మేథమెటిక్స్‌, ఫిజిక్స్‌లతో పూర్తిచేసినవారు అర్హులు. మనదేశంలో డైరెక్టరేట్‌ ఆఫ్‌ సివిల్‌ ఏవియేషన్‌ (డీజీసీఏ)వారు పైలట్‌ లైసెన్స్‌ను జారీ చేస్తారు. డీజీసీఏ వారి అనుబంధ, గుర్తింపు పొందిన ఫ్లయింగ్‌ స్కూల్‌ నుంచి శిక్షణ పొందినవారికి పైలట్‌ లైసెన్స్‌ను మంజూరు చేస్తారు.
పైలట్‌ అవ్వాలంటే ఫిట్‌నెస్‌పరంగా క్లాస్‌-2 మెడికల్‌ పరీక్షను ఎదుర్కోవాల్సి ఉంటుంది. ఈ పరీక్షలో అభ్యర్థి ఫిట్‌గా ఉన్నట్లు తేలిన తరువాతే ఫ్లయింగ్‌ స్కూల్‌కు దరఖాస్తు చేసుకోవాల్సి ఉంటుంది. పైలట్‌ ట్రైనింగ్‌ ఖర్చుతో కూడుకున్నది. ఫ్లయింగ్‌ స్కూల్‌నుబట్టి ఈ కోర్సుకు సుమారుగా రూ.14 లక్షల నుంచి రూ.16 లక్షల వరకూ ఖర్చు కావచ్చు.
ఇందిరాగాంధీ ఫ్లయింగ్‌ స్కూల్‌ మనదేశంలో ప్రఖ్యాత పైలట్‌ ట్రైనింగ్‌ సంస్థ. తెలుగు రాష్ట్రాల్లో తెలంగాణ స్టేట్‌ ఏవియేషన్‌ అకాడమీ, ఫ్లయింగ్‌ ఏవియేషన్‌ అకాడమీ, వింగ్‌ ఏవియేషన్‌ మొదలైన సంస్థలు డీజీసీఏ అనుమతితో పైలట్‌ శిక్షణను అందిస్తున్నాయి.

* డిగ్రీ పూర్తిచేశాను. వార్తా విలేఖరి (న్యూస్‌ రిపోర్టర్‌) కావాలనుంది. ఈ కోర్సును అందించే సంస్థలు, అర్హతల వివరాలను తెలియజేయండి. దూరవిద్య ద్వారా చేయడం సాధ్యమేనా? - ఎల్‌. జీవన్‌, హన్మకొండ

న్యూస్‌ రిపోర్టర్‌గా స్థిరపడాలనుకునేవారు జర్నలిజం, మాస్‌ కమ్యూనికేషన్‌లో కోర్సు చేస్తే మేలు. విలేఖరి కావాలనుకునేవారు సామాజిక సమస్యలపట్ల అవగాహన, వర్తమాన వ్యవహారాలను తెలుసుకోవడంపట్ల ఆసక్తి, భావాన్ని నేర్పుతో ప్రేక్షకులకు అర్థమయ్యే రీతిలో అందించే నైపుణ్యం ఉండాలి. భాష, పదాలపై పట్టు పెంచుకోవాలి.
రిపోర్టింగ్‌ వివిధ విభాగాలైన క్రైమ్‌, ఇన్వెస్టిగేటివ్‌ రిసెర్చ్‌, బిజినెస్‌, అంతర్జాతీయ, ప్రాంతీయ, క్రీడా వంటి విభాగాల్లో చేయవచ్చు. దూరవిద్యలో ఇగ్నో ‘మాస్టర్స్‌ ఇన్‌ జర్నలిజం అండ్‌ మాస్‌ కమ్యూనికేషన్‌’, ఆచార్య నాగార్జున యూనివర్సిటీ ‘ఎంఏ- జర్నలిజం అండ్‌ మాస్‌ కమ్యూనికేషన్‌’ కోర్సులను అందిస్తున్నాయి. వీటిని చదవడానికి డిగ్రీ పూర్తిచేసినవారు అర్హులు.

మా అమ్మాయి ఇంటర్‌ (ఎంపీసీ) చదువుతోంది. తనకు ఫోరెన్సిక్‌ సైన్స్‌లో కానీ, ఆంగ్లంలో కానీ పై చదువులు చదవాలనుంది. ఏది మేలు? అందించే సంస్థల వివరాలను తెలపండి.? - శ్రీనివాసరావు

నేర పరిశోధన పట్ల ఆసక్తి, ప్రతి విషయాన్ని నిశితంగా పరిశీలించే, వివిధ కోణాల్లో సమస్యలను సాధించే నేర్పు ఉంటే ఫోరెన్సిక్‌ సైన్స్‌ కోర్సును ఎంచుకోవచ్చు. డిగ్రీ స్థాయిలో బీఎస్‌సీ ఫోరెన్సిక్‌ సైన్స్‌ కోర్సును అమిటీ యూనివర్సిటీ, గల్గోతియా యూనివర్సిటీ, డాక్టర్‌ హరిసింగ్‌ గౌర్‌ యూనివర్సిటీ, తెలుగు రాష్ట్రాల్లో.. రాజా బహదూర్‌ వెంకట్‌ రామ్‌రెడ్డి ఉమెన్స్‌ కళాశాల అందిస్తున్నాయి.
ఆంగ్లంలో పై చదువులకు.. భాషపై ఆసక్తి ఉంటే సరిపోతుంది. ఆంగ్లంలో డిగ్రీ చేయాలనుకుంటే బీఏ (లిటరేచర్‌), లింగ్విస్టిక్స్‌, కంపారిటివ్‌ లిటరేచర్‌, ట్రాన్స్‌లేషన్‌ స్టడీస్‌ ఇన్‌ ఇంగ్లిష్‌ కోర్సులను ఎంచుకోవచ్చు. మనదేశంలో ఇఫ్లూ (ఇంగ్లిష్‌ అండ్‌ ఫారెన్‌ లాంగ్వేజెస్‌ యూనివర్సిటీ), యూనివర్సిటీ ఆఫ్‌ హైదరాబాద్‌, సెయింట్‌ స్టీఫెన్స్‌ కాలేజ్‌, దిల్లీ వంటి ప్రముఖ సంస్థలు అందిస్తున్నాయి. ప్రతీ కోర్సుకూ తనదైన ప్రత్యేకత ఉంటుంది. దానికి తగ్గ అవకాశాలూ తప్పనిసరిగా ఉంటాయి. మీ అమ్మాయికి దేనిపై ఎక్కువ ఆసక్తి ఉంటే దాన్ని ఎంచుకోమనండి.

ఆర్కిటెక్చర్‌లో డిగ్రీ చేశాను. దూరవిద్య ద్వారా సంబంధిత కోర్సులో పీజీ చేద్దామనుకుంటున్నా. అందించే సంస్థల వివరాలను తెలపండి. - కె.వి. నాయుడు, శ్రీకాకుళం

ప్రొఫెషనల్‌ కోర్సులైన ఆర్కిటెక్చర్‌, ఇంజినీరింగ్‌, ఇతర వృత్తివిద్యా కోర్సులను రెగ్యులర్‌ విధానంలో అభ్యసించడమే శ్రేయస్కరం. మనదేశంలో ఆర్కిటెక్చర్‌ కోర్సులను దూరవిద్య ద్వారా ఏ విశ్వవిద్యాలయాలూ అందించడం లేదు.
జవహర్‌లాల్‌ నెహ్రూ ఆర్కిటెక్చర్‌ అండ్‌ ఫైన్‌ఆర్ట్స్‌ యూనివర్సిటీ (బైరిసర్చ్‌) (జేఎన్‌ఏఎఫ్‌ఏయూ) వారు పార్ట్‌టైం విధానంలో ఎంఆర్క్‌ కోర్సును అందిస్తున్నారు. బి.ఆర్క్‌ పూర్తిచేసినవారు అర్హులు. పీజీఈసెట్‌ ద్వారా అర్హత కల్పిస్తారు. మరిన్ని వివరాలకు jnafau.ac.in వెబ్‌సైట్‌ను సందర్శించవచ్చు. వివిధ ఆస్ట్రేలియన్‌, అమెరికా విశ్వవిద్యాలయాలు ఆన్‌లైన్‌ దూరవిద్యా విధానంలో ఈ కోర్సును అందిస్తున్నాయి. కానీ కోర్సును ఎంచుకునే ముందు దాని వాలిడిటీ, గుర్తింపులను తెలుసుకుని నిర్ణయం తీసుకోండి.

డిగ్రీ చదివాను కానీ కొన్ని సబ్జెక్టులు మిగిలిపోయాయి. ఇప్పుడు బీకాం పరీక్షలను సింగిల్‌ సిట్టింగ్‌లో రాద్దామనుకుంటున్నాను. కుదురుతుందా? ఇలా చేస్తే ప్రభుత్వ ఉద్యోగాలకు నాకు అర్హత ఉంటుందా?

డిగ్రీలో మిగిలిన సబ్జెక్టులను పూర్తి చేయడానికి.. మీరు డిగ్రీ చదివిన కళాశాల లేదా అనుబంధ విశ్వవిద్యాలయాన్ని సంప్రదించి, పరీక్షలు రాయడానికి దరఖాస్తు చేసుకోండి. ఇలా రాసి మీ డిగ్రీని పూర్తి చేయవచ్చు. ఈ విధంగా పూర్తి చేస్తే ప్రభుత్వ ఉద్యోగానికి అర్హత లభించకపోవడం అంటూ ఉండదు. అలా కాకుండా మొత్తం బీకాం పరీక్షలను వేరే యూనివర్సిటీ ద్వారా వన్‌ సిట్టింగ్‌లో చేయాలనుకుంటేనే ఇబ్బందులు ఎదురవుతాయి. కాబట్టి, మీరు మిగిలిపోయిన మీ సబ్జెక్టులను చదివిన విద్యాలయం/ విశ్వవిద్యాలయం నుంచి రాసి, ఉత్తీర్ణులవ్వండి. తద్వారానే ప్రభుత్వ ఉద్యోగాలకు దరఖాస్తు చేసుకునే అర్హత సాధిస్తారు.

నాకు పోలీసు అవ్వాలని కోరిక. ఇటీవల జరిగిన రైల్వే ఉద్యోగానికి నిర్వహించిన మెడికల్‌ టెస్టులో నాకు కలర్‌ బ్లైండ్‌నెస్‌ ఉందని తెలిసింది. దాంతో ఉద్యోగం కోల్పోయాను. రాష్ట్ర ప్రభుత్వం నిర్వహించే పోలీసు ఉద్యోగాలకైనా నాకు అర్హత ఉంటుందా? అసలు నేను ఏయే ఉద్యోగాలకు అర్హుడినో తెలపగలరు?

మీ విద్యార్హతలను తెలుపలేదు. పోలీసు కానిస్టేబుల్‌ ఉద్యోగానికి కనీస అర్హత 10+2. ఎస్‌.ఐ., ఎ.ఎస్‌.ఐ. ఉద్యోగాలకు గ్రాడ్యుయేషన్‌ను కనీస అర్హతగా పరిగణిస్తారు. కలర్‌ బ్లైండ్‌నెస్‌ ఉన్న అభ్యర్థులను రాష్ట్ర ప్రభుత్వ పోలీసు ఉద్యోగాలకు అనర్హులుగా పరిగణిస్తారు. మీకు ఇతర ప్రభుత్వ శాఖల్లో ఆఫీసులో పనిచేసే ఉద్యోగాలకు అర్హత ఉంటుంది. మీకు అర్హత ఉంటే.. గ్రూప్‌ - 1, 2, 3, 4 ఉద్యోగాలకు దరఖాస్తు చేసుకోవచ్చు. ఫేస్‌బుక్‌ వ్యవస్థాపకుడు మార్క్‌ జుకర్‌బర్గ్‌ కలర్‌ బ్లైండ్‌నెస్‌ ఉన్నా విజయాన్ని చేరుకున్నాడు. కాబట్టి ఆత్మవిశ్వాసంతో ఉద్యోగ ప్రయత్నాన్ని మొదలుపెట్టండి. అందుకు తగ్గ సన్నద్ధతను ప్రారంభించండి. తప్పకుండా ప్రభుత్వ ఉద్యోగాన్ని సాధిస్తారు.

ఎంపీసీ రెండో సంవత్సరం చదువుతున్నాను. ఇంటర్‌ తర్వాత డిగ్రీ, ఇంజినీరింగ్‌ కాకుండా కొత్త కోర్సులను చదవాలనుకుంటున్నాను. నాకు అందుబాటులో ఉన్న అవకాశాలను తెలపండి. ?

విద్యార్థులందరూ ఇంజినీరింగ్‌, మెడిసిన్‌లవైపు పరుగులెడుతున్న ఈ తరుణంలో కొత్త కోర్సులను ఎంచుకోవాలనుకున్న మీ అభిరుచికి అభినందనలు. ప్రతీ కోర్సూ తనదైన ప్రత్యేకతలతో చదివినవారికి అవకాశాలను కల్పిస్తుంది. ముందుగా మీ అభిరుచికి తగ్గ, ఆసక్తి ఉన్న రంగాన్ని ఎంచుకోండి. మీకు వంటలపట్ల ఆసక్తి ఉంటే 10+2 తర్వాత కలినరీ మేనేజ్‌మెంట్‌ కోర్సులనూ, టూరిజం, కొత్త ప్రదేశాలపట్ల ఆసక్తి ఉంటే బీఎస్‌సీ టూరిజం అండ్‌ హాస్పిటాలిటీ మేనేజ్‌మెంట్‌నూ చదవొచ్చు. కళలపై ఆసక్తి ఉంటే బ్యాచిలర్స్‌ ఇన్‌ ఫైన్‌ ఆర్ట్స్‌లో, విద్యారంగం, బోధనపట్ల ఆసక్తి ఉంటే డిప్లొమా ఇన్‌ ఎడ్యుకేషన్‌లో చేరవచ్చు. నిశితంగా పరిశీలించే తత్వం, సమయస్ఫూర్తి మీ సొంతమై, నేర సంఘటనలపై అధ్యయనం చేయాలనుకుంటే ఫోరెన్సిక్‌ సైన్స్‌ కోర్సు ఎంచుకోవచ్చు. ఏ రంగంలో అయినా రాణించాలంటే ముఖ్యంగా దాని పట్ల ఆసక్తి, ఇష్టం పెంచుకుని కృషి చేయడం తప్పనిసరి. అప్పుడే విజయం సాధించగలరు.

బీఎస్‌సీ పూర్తిచేసి ప్రైవేటు ఉద్యోగం చేస్తున్నాను. నాకు ప్రొఫెషనల్‌ చెఫ్‌ కావాలనుంది. చదవాల్సిన కోర్సులు, అందించే సంస్థల వివరాలను తెలుపగలరు.

చెఫ్‌కి కావాల్సిన ముఖ్యమైన అర్హత- కుకింగ్‌ పట్ల ఆసక్తి, నమ్మకం, నిర్వహణా నైపుణ్యాలు. వీటితోపాటు కిచెన్‌లో పనిచేసిన అనుభవమూ ఉండాలి. డిగ్రీ మాత్రమే ముఖ్యం అనుకుంటే అపోహే. దీనికి సంబంధించి కోర్సులు చేయాలనుకుంటే.. కలినరీ ఆర్ట్స్‌లో డిప్లొమా, సర్టిఫికెట్‌ కోర్సులను చేయొచ్చు.
ఇన్‌స్టిట్యూట్‌ ఆఫ్‌ హోటల్‌ మేనేజ్‌మెంట్‌ అండ్‌ క్యాటరింగ్‌ టెక్నాలజీ (ఎన్‌సీహెచ్‌ఎంసీటీజేఈఈ) 10+2 అర్హతతో ఉమ్మడి రాతపరీక్షను నిర్వహిస్తోంది. దీని ద్వారా దేశంలోని 21 కేంద్ర ప్రభుత్వ హోటల్‌ మేనేజ్‌మెంట్‌ సంస్థలతోపాటు రాష్ట్ర ప్రభుత్వ, వాటి అనుబంధ ప్రయివేటు సంస్థల్లో బీఎస్‌సీ- హాస్పిటాలిటీ అండ్‌ హోటల్‌ అడ్మినిస్ట్రేషన్‌ కోర్సులో ప్రవేశం కల్పిస్తారు.
మీరు డిగ్రీ పూర్తి చేశారు కాబట్టి ఏదైనా గుర్తింపు పొందిన కళాశాల నుంచి కలినరీ క్రాఫ్టింగ్‌, కలినరీ ఆర్ట్స్‌లో సర్టిఫికేట్‌ లేదా డిప్లొమా కోర్సులు చేయడం ద్వారా సమయాన్ని ఆదా చేసుకోవచ్చు. చెఫ్‌ కావడానికి ముఖ్యంగా కిచెన్‌లో పనిచేసిన అనుభవం బాగా తోడ్పతుంది. కొత్తదనం, ఆసక్తీ ముఖ్యమే.

దూరవిద్య విధానంలో డిగ్రీ 44% మార్కులతో 2010లో పూర్తి చేశాను. నా మార్కుల శాతాన్ని ఓడీఈ (ఆన్‌ డిమాండ్‌ ఎగ్జామినేషన్‌) ద్వారా పెంచుకోవాలనుకుంటున్నాను. కుదురుతుందా? దీనికి సంబంధించిన వివరాలు తెలియజేయగలరు.

ఓడీఈ (ఆన్‌ డిమాండ్‌ ఎగ్జామినేషన్‌) ముఖ్య ఉద్దేశం- కోర్సు వ్యవధిని పూర్తిచేసుకుని కూడా టర్మ్‌ ఎండ్‌ ఎగ్జామినేషన్‌ కోసం వేచిచూస్తూ, వీలును బట్టి పరీక్షలను రాయాలనుకునే వారికి వీలును కల్పించడం. పరీక్ష ఫెయిల్‌ అయినవారు సమయం వృథా కాకుండా తిరిగి త్వరగా పరీక్ష రాసి ఉత్తీర్ణులు కావాలనుకునేవారికి వీలు కల్పించే ప్రయత్నమిది. ఒకసారి కోర్సులో ఉత్తీర్ణత పొంది, సంవత్సరాలు గడిచిన తర్వాత మార్కులు పెంచుకునే మార్గం మాత్రం కాదు.
మార్కులను పెంచుకోవడానికి విద్యార్థులకు విశ్వవిద్యాలయాలు ఇంప్రూవ్‌మెంట్‌ పరీక్షల ద్వారా అవకాశం కల్పిస్తాయి. వీటిని రాసి మార్కులు పెంచుకోవాలనుకుంటే సంబంధిత విశ్వవిద్యాలయాల నిబంధనల ప్రకారం విద్యార్థులు దరఖాస్తు చేసుకోవాలి. ఈ అవకాశం డిగ్రీ పాసైన మూడేళ్లలోపు మాత్రమే (విశ్వవిద్యాలయాన్ని బట్టి) ఉంటుంది. మరిన్ని వివరాలకు ఒకసారి మీరు డిగ్రీ (దూరవిద్య) చదివిన విశ్వవిద్యాలయాన్ని సంప్రదించండి.

ఇంటర్‌ (బైపీసీ) పూర్తిచేశాను. బీఎస్‌సీ - ఎంఎల్‌టీ చేయాలనుంది. కోర్సు, అందించే సంస్థల వివరాలను తెలియజేయండి.

బీఎస్‌సీ- మెడికల్‌ ల్యాబ్‌ టెక్నాలజీ కోర్సు చేయదలచిన విద్యార్థులు ఇంటర్‌ బైపీసీ లేదా ఒకేషనల్‌ కోర్స్‌ ఇన్‌ మెడికల్‌ ల్యాబ్‌ టెక్నాలజీ పూర్తిచేసి ఉండాలి. ఆంధ్రప్రదేశ్‌లో ఎన్‌.టి.ఆర్‌. హెల్త్‌ యూనివర్సిటీ, తెలంగాణలో కాళొజీ నారాయణరావు యూనివర్సిటీ ఆఫ్‌ హెల్త్‌ సైన్సెస్‌, వాటి అనుబంధ కళాశాలల్లో ఈ కోర్సును అభ్యసించడానికి అవకాశం కల్పిస్తున్నాయి. ఆగస్టు, సెప్టెంబరు నెలల్లో ప్రకటన విడుదల చేస్తాయి. రంగరాయ మెడికల్‌ కాలేజ్‌ ఆశ్రమ్‌ కాలేజ్‌, ఏలూరు; గుంటూరు మెడికల్‌ కళాశాల, గుంటూరు; షాదన్‌ కళాశాల, హైదరాబాద్‌; ఇన్‌స్టిట్యూట్‌ ఆఫ్‌ ప్రివెంటివ్‌ మెడిసిన్‌ వంటివి ఈ కోర్సును అందిస్తున్న ముఖ్యమైన విద్యాసంస్థలు.

డిగ్రీ మొదటి సంవత్సరం చదువుతున్నాను. కొందరి స్ఫూర్తితో సీబీఐ ఆఫీసర్‌ కావాలనుకుంటున్నాను. అందుకు నేనేం చేయాల్సి ఉంటుంది?

సీబీఐ అధికారి కావాలనుకునేవారు నిశితంగా విషయాన్ని శోధించడం, విశ్లేషణ నైపుణ్యాలు, సమస్య పరిశోధన, పరిష్కారం, బృందంతో పనిచేయగల నైపుణ్యాలు, నిజాయతీ, సమయస్ఫూర్తి, దూరదృష్టి వంటి లక్షణాలను అలవరచుకోవాలి. డిగ్రీ చదివినవారు సీబీఐ ఉద్యోగాలకు అర్హులు. ఏటా కేంద్ర ప్రభుత్వం ఈ కొలువులకు నోటిఫికేషన్‌ విడుదల చేస్తుంది. రాతపరీక్ష, ఇంటర్వ్యూ ద్వారా ఉద్యోగాన్ని కల్పిస్తారు. కాబట్టి ఇప్పటినుంచే అరిథ్‌మెటిక్‌, రీజనింగ్‌, ఇంగ్లిష్‌ సబ్జెక్టులపై దృష్టిసారించండి. వార్తాపత్రికలు, టీవీ వార్తలను ఎప్పటికప్పుడు అనుసరిస్తూ ఉండండి. జాతీయ, అంతర్జాతీయ పరిస్థితులపైనా అవగాహనను పెంచుకోండి.

సాఫ్ట్‌వేర్‌ ఇంజినీరుగా పనిచేస్తున్నాను. నాకు వ్యవసాయ రంగంపై ఆసక్తి. దూరవిద్య ద్వారా కోర్సు అందించే సంస్థల వివరాలను తెలపండి?

వ్యవసాయంపై మీకున్న ఆసక్తికి అభినందనలు. మీరు గ్రాడ్యుయేషన్‌లో ఏం చదివారో తెలియజేయలేదు. మీరు మెకానికల్‌ ఇంజినీరింగ్‌ చదివివుంటే ఎంటెక్‌లో అగ్రికల్చరల్‌ ఇంజినీరింగ్‌ చదివి, వ్యవసాయంలో ఉపయోగపడే పరికరాల తయారీలో పాల్గొనవచ్చు. లేదా.. సాఫ్ట్‌వేర్‌ రంగంలో ఉన్నారు కాబట్టి ఏదైనా యాప్‌ లాంటి టూల్‌ను తయారుచేసి వ్యవసాయ రంగానికి తోడ్పడే ప్రయత్నం చేయండి. ప్రత్యక్షంగానే కాదు పరోక్షంగానూ చేయూతను ఇచ్చినవారవుతారు. ఇక కోర్సుల విషయానికొస్తే.. వెల్లింగ్‌కర్‌ ఇన్‌స్టిట్యూట్‌ ఆఫ్‌ మేనేజ్‌మెంట్‌ దూరవిద్యలో పోస్ట్‌ గ్రాడ్యుయేషన్‌ డిప్లొమా ఇన్‌ రూరల్‌ అండ్‌ అగ్రిబిజినెస్‌, ఇగ్నో పోస్ట్‌ గ్రాడ్యుయేట్‌ సర్టిఫికెట్‌ ఇన్‌ అగ్రికల్చర్‌ పాలసీ కోర్సులను అందిస్తున్నాయి. మీకు అర్హత ఉన్నదాన్ని బట్టి కోర్సును ఎంచుకోండి.

ఎల్‌ఎల్‌బీ చివరి సంవత్సరం చదువుతున్నాను. ఫోరెన్సిక్‌ లాపై ఆసక్తి ఉంది. అందించే కళాశాలలు, అర్హత వివరాలను తెలియజేయండి.

ఫోరెన్సిక్‌ విజ్ఞానశాస్త్ర సాయంతో నేర ఘటనలపై దర్యాప్తు చేయడానికీ, న్యాయస్థానంలో నేరస్థుల ప్రాసిక్యూషన్‌లో సాక్ష్యాలను సేకరించడానికీ ఉపయోగపడే న్యాయశాస్త్ర అధ్యయనమిది. మనదేశంలో నేషనల్‌ ఇన్‌స్టిట్యూట్‌ ఆఫ్‌ క్రిమినాలజీ అండ్‌ ఫోరెన్సిక్‌ సైన్సెస్‌ వారు గ్రాడ్యుయేషన్‌ పూర్తిచేసినవారికి ఎంఏ (క్రిమినాలజీ) కోర్సును అందిస్తున్నారు. ఐఎఫ్‌ఎస్‌ ఎడ్యుకేషన్‌వారు ఫోరెన్సిక్‌ సైన్స్‌ అండ్‌ క్రిమినాలజీలో డిప్లొమా, సర్టిఫికెట్‌ కోర్సులనూ, పంజాబ్‌ యూనివర్సిటీ వారు డిప్లొమా ఇన్‌ ఫోరెన్సిక్‌ సైన్స్‌ అండ్‌ క్రిమినాలజీ కోర్సులనూ అందిస్తున్నారు. ప్రస్తుతం మనదేశంలో కేవలం ఫోరెన్సిక్‌ లాపైనే కోర్సులు అందించే సంస్థలు తక్కువనే చెప్పాలి. విదేశాల్లో ఈ కోర్సుకు మంచి స్పందన ఉంది. మనదేశంలోని కొన్ని సంస్థలూ ఇప్పుడిప్పుడే ఈ కోర్సుపై దృష్టిపెడుతున్నాయి. త్వరలో అందుబాటులోకి రావొచ్చు.

డిగ్రీ పూర్తిచేశాను. ప్రస్తుతం దూరవిద్య ద్వారా ఎంఏ (తెలుగు) చేస్తున్నాను. దీంతోపాటు బ్యాచిలర్‌ ఇన్‌ లైబ్రరీ సైన్స్‌ను కూడా ఒకేసారి దూరవిద్యలో చేద్దామనుకుంటున్నాను. కుదురుతుందా?

ఒకేసారి రెండు డిగ్రీ కోర్సులను లేదా పీజీ కోర్సులను, ఒక డిగ్రీ, ఒక పీజీ కోర్సును విద్యార్థులు అభ్యసించినట్లయితే ఏదేని ఒక కోర్సు మాత్రమే పరిగణనలోకి వస్తుంది. మీరు దరఖాస్తు చేసుకున్న ఉద్యోగానికి తగినదాన్ని చూపించుకోవాల్సి ఉంటుంది. కాబట్టి సంబంధిత ఉద్యోగ ప్రకటననుబట్టి మీ విద్యార్హతను వాడుకోవాలి. అంతేతప్ప రెండు కోర్సులనూ ఒకే ఏడాది పూర్తిచేసినట్లు చూపిస్తే కొన్నిసార్లు చిక్కులు ఏర్పడే అవకాశముంది. కొన్ని సంస్థలు ఒక దూరవిద్య కోర్సు, ఒక రెగ్యులర్‌ కోర్సుకు వెసులుబాటు కల్పిస్తాయి. దూరవిద్య కోర్సును అభ్యసించేముందు సంబంధిత విశ్వవిద్యాలయానికి డిస్టెన్స్‌ ఎడ్యుకేషన్‌ కౌన్సిల్‌ వారి అనుమతి ఉందో లేదో తెలుసుకోవాలి. అనుమతి ఉన్న విశ్వవిద్యాలయం నుంచే కోర్సును అభ్యసించాలి.

టెక్నికల్‌ కోర్సులను దూరవిద్య ద్వారా చదివితే చెల్లవని సుప్రీంకోర్టు ఇటీవల తీర్పు ఇచ్చింది కదా! మా అమ్మ ఎంఎస్‌సీ కెమిస్ట్రీని 2005లో దూరవిద్య ద్వారా పూర్తిచేసింది. అది చెల్లుతుందా? ఇది ప్రభుత్వ సంస్థల్లో పదోన్నతులపై ప్రభావం చూపించే అవకాశముందా?

సంబంధిత విశ్వవిద్యాలయానికి దూరవిద్య ద్వారా కోర్సులను అందించడానికి యూజీసీ డిస్టెన్స్‌ ఎడ్యుకేషన్‌ కౌన్సిల్‌ (డీఈసీ) వారి అనుమతి ఉందో లేదో తెలుసుకోవాలి. అనుమతి లేని విశ్వవిద్యాలయాల్లో కోర్సులను చేయడం వల్ల ఇబ్బందులు తప్పవు. దీనివల్ల ప్రభుత్వ సంస్థల్లో పదోన్నతులపై ప్రభావం ఉండే అవకాశముంది. కాబట్టి, మీ అమ్మగారు ఎంఎస్‌సీ చేసిన విశ్వవిద్యాలయానికి డీఈసీ అనుమతి ఉందో లేదో తెలుసుకోండి. అనుమతి ఉన్నట్లయితే ఇబ్బంది ఉండదు. ఇక సుప్రీంకోర్టు విషయానికొస్తే.. టెక్నికల్‌ కోర్సులు అయినటువంటి ఇంజినీరింగ్‌ టెక్నాలజీ, ఆర్కిటెక్చర్‌, టౌన్‌ ప్లానింగ్‌, మేనేజ్‌మెంట్‌, ఫార్మసీ, అప్లయిడ్‌ ఆర్ట్స్‌ అండ్‌ క్రాఫ్ట్స్‌ తదితర కోర్సులు అందించడానికి విశ్వవిద్యాలయాలు ఏఐసీటీఈ (ఆల్‌ ఇండియా కౌన్సిల్‌ ఫర్‌ టెక్నికల్‌ ఎడ్యుకేషన్‌) అనుమతి పొందాల్సి ఉంటుంది. అనుమతి పొందని వాటినుంచి పట్టా పొందితే దానికి విలువ ఉండదు. ఏఐసీటీఈ అనుమతిని సాధారణంగా రెగ్యులర్‌ విధానంలో కోర్సులను అందించే సంస్థలకు మాత్రమే ఇస్తారు. ఇటీవల సుప్రీంకోర్టు అనుమతి లేని మూడు విశ్వవిద్యాలయాలు అందించిన టెక్నికల్‌ కోర్సులను రద్దు చేసింది.

డిగ్రీ (బీజెడ్‌సీ) పూర్తిచేశాను. అగ్రికల్చర్‌పై ఆసక్తి ఉంది. నాకున్న విద్యావకాశాలను తెలియజేయండి. ఈ రంగంలో భవిష్యత్తు ఎలా ఉంటుంది?

వ్యవసాయంపై మీకున్న ఇష్టానికి అభినందనలు. ప్రతి రంగం ఉన్నతవిద్య, ఉపాధి అవకాశాల కల్పనలో తమదైన ప్రత్యేకతను కలిగివుంటుంది. కాబట్టి మీరు ఎంచుకున్న రంగంలో పట్టుదలతో శ్రమిస్తే భవిష్యత్తు బాగుంటుంది. బీజెడ్‌సీలో గ్రాడ్యుయేషన్‌ పూర్తిచేసినవారికి ఉన్నతవిద్య పరంగా మంచి అవకాశాలున్నాయి. వీరు ఎంఎస్‌సీలో అందుబాటులో ఉన్న బయోకెమిస్ట్రీ, జెనెటిక్స్‌, జువాలజీ, కెమిస్ట్రీ, బయాలజీ మొదలైన ఐచ్ఛికాలను అభిరుచి మేరకు ఎంచుకోవచ్చు. మీకు అగ్రికల్చర్‌పై ఆసక్తి ఉందన్నారు కాబట్టి.. ప్లాంట్‌ సైన్స్‌, ప్లాంట్‌ బయోటెక్నాలజీ, ప్లాంట్‌ పాథాలజీ, ఫారెస్ట్‌ బయోటెక్నాలజీ, ట్రాపికల్‌ ఫారెస్ట్రీ, సాయిల్‌ సైన్స్‌, మైక్రోబియల్‌ ప్లాంట్‌ బయాలజీ వంటి కోర్సులను అభ్యసించే అవకాశం ఉంది. సాధారణంగా ఈ రంగంలో పరిశోధనపరంగా మంచి అవకాశాలు అందుబాటులో ఉన్నాయి. అగ్రి బిజినెస్‌ ఆఫ్‌ అగ్రికల్చర్‌ ఎక్స్‌టెన్షన్‌ మేనేజ్‌మెంట్‌, ఐఐఎం అహ్మదాబాద్‌, నేషనల్‌ అకాడమీ ఆఫ్‌ అగ్రికల్చరల్‌ రిసెర్చ్‌ మేనేజ్‌మెంట్‌ (ఎన్‌ఏఏఆర్‌ఎం) వారు అందిస్తున్న పీజీ డిప్లొమా ఇన్‌ మేనేజ్‌మెంట్‌ (అగ్రికల్చర్‌) కోర్సును అభ్యసించి మంచి భవిష్యత్తును సొంతం చేసుకోవచ్చు.

బీఎస్‌సీ (కంప్యూటర్స్‌) రెండో సంవత్సరం చదువుతున్నాను. నాకు పైలట్‌ కావాలనుంది. ఏ కోర్సులను ఎంచుకోవాలి?

పైలట్‌ కావాలనుకునేవారు 10+2లో మేథమెటిక్స్‌, ఫిజిక్స్‌లను చదవాల్సి ఉంటుంది. మన దేశంలో డైరెక్టరేట్‌ జనరల్‌ ఆఫ్‌ సివిల్‌ ఏవియేషన్‌ (డీజీసీఏ) వారు పైలట్‌ లైసెన్స్‌ను జారీ చేస్తారు. వారి అనుబంధ ట్రైనింగ్‌ ఇన్‌స్టిట్యూట్స్‌ ద్వారా శిక్షణ పొందినవారికి పరీక్ష నిర్వహించి పైలట్‌ లైసెన్స్‌ అందిస్తారు. ఫ్లయింగ్‌ స్కూల్‌కు దరఖాస్తు చేసుకునే ముందు క్లాస్‌-2 మెడికల్‌ పరీక్ష చేయించుకోవాలి. మెడికల్‌ పరీక్షలో ఆరోగ్యంగా ఉన్నారని తేలిన తరువాతే ఫ్లయింగ్‌ స్కూల్‌కి దరఖాస్తు చేసుకోవాల్సి ఉంటుంది. పైలట్‌ శిక్షణ ఖర్చుతో కూడుకున్నది. దీన్ని దృష్టిలో ఉంచుకుని దరఖాస్తు చేసుకోండి. మన తెలుగు రాష్ట్రాల్లో తెలంగాణ స్టేట్‌ ఏవియేషన్‌ అకాడమీ, ఫ్లయిటెక్‌ ఏవియేషన్‌ అకాడమీ, వింగ్స్‌ ఏవియేషన్‌ ప్రైవేట్‌ లిమిటెడ్‌ వారు డీజీసీఏ అనుమతితో శిక్షణ అందిస్తున్నారు.

మా అమ్మాయి ఎం.ఫార్మసీ చదువుతోంది. ప్రభుత్వ లేదా ప్రైవేటు కళాశాలలో లెక్చరర్‌గా చేయాలనుకుంటోంది. ఎం.ఫార్మసీ తరువాత ఏం చదివితే/ చేస్తే తన కలను సాకారం చేసుకోగలదు?

ఉపాధ్యాయ వృత్తిలో అడుగుపెట్టాలన్న మీ అమ్మాయి ఆలోచన ప్రశంసనీయం. యూజీసీ వారి నిబంధన ప్రకారం అసిస్టెంట్‌ ప్రొఫెసర్‌ కావాలనుకునేవారు సీఎస్‌ఐఆర్‌ నెట్‌ ఉత్తీర్ణులు కావాలి. ఎం.ఫార్మసీ అభ్యర్థులు లైఫ్‌ సైన్సెస్‌ విభాగంలో నెట్‌కు సిద్ధం కావాల్సి ఉంటుంది. నెట్‌ను అసిస్టెంట్‌ ప్రొఫెసర్‌ కావడానికి కనీసార్హతగా పరిగణిస్తారు. పీజీ తరువాత పీహెచ్‌డీ చేస్తే ఉపాధ్యాయ వృత్తిలో ప్రవేశానికి మరింత దోహదపడుతుంది. సంబంధిత విశ్వవిద్యాలయం వారు నిర్వహించే ప్రవేశపరీక్ష- జీప్యాట్‌ ద్వారా లేదా నెట్‌లో ఉత్తీర్ణత సాధించడం ద్వారా ఆయా విశ్వవిద్యాలయాల నిబంధనల ప్రకారం పీహెచ్‌డీలో ప్రవేశాన్ని పొందొచ్చు.

బీఎల్‌ఐఎస్‌సీ, ఎంఎల్‌ఐఎస్‌సీ కోర్సులను నేరుగా, దూరవిద్య ద్వారా అందించే విశ్వవిద్యాలయాలేవి?

ఏదైనా డిగ్రీ చేసినవారు ఏడాది కాలవ్యవధి గల బ్యాచిలర్‌ ఇన్‌ లైబ్రరీ అండ్‌ ఇన్ఫర్మేషన్‌ సైన్స్‌ (బీఎల్‌ఐఎస్‌సీ) చదవడానికి అర్హులు. మాస్టర్స్‌ ఇన్‌ లైబ్రరీ అండ్‌ ఇన్ఫర్మేషన్‌ సైన్స్‌ (ఎంఎల్‌ఐఎస్‌సీ) కోర్సు అభ్యసించాలనుకునేవారు డిగ్రీతోపాటు బీఎల్‌ఐఎస్‌సీ కోర్సునూ పూర్తిచేసుండాలి. రెగ్యులర్‌ విధానంలో మనాయిర్‌ కాలేజ్‌ ఆఫ్‌ లైబ్రరీ సైన్స్‌- వరంగల్‌, డిపార్ట్‌మెంట్‌ ఆఫ్‌ లైబ్రరీ సైన్స్‌, ఉస్మానియా యూనివర్సిటీ వారు ఈ కోర్సులను ప్రవేశపరీక్ష ద్వారా అందిస్తున్నాయి. దూరవిద్య విధానంలో ఆచార్య నాగార్జున, ఇగ్నో, ఎస్‌వీ యూనివర్సిటీలు ఈ కోర్సులను అందిస్తున్నాయి.

బీఎస్‌సీ (నర్సింగ్‌) నాలుగేళ్ల కోర్సు చేశాను. కానీ నాకు ఎంబీబీఎస్‌ చేయాలని ఉంది. వీలుంటుందా?

ఎంబీబీఎస్‌ చేయదలచుకున్నవారు సీబీఎస్‌సీ వారు నిర్వహించే నీట్‌ను రాయవలసి ఉంటుంది. నీట్‌ జాతీయ స్థాయిలో ఎంబీబీఎస్‌లో చేరడానికి నిర్వహించే ప్రవేశపరీక్ష. కనిష్ఠ వయఃపరిమితి 17 ఏళ్లు కాగా సుప్రీంకోర్టు ఉత్తర్వుల ప్రకారం గరిష్ఠ వయఃపరిమితి లేదు. 10+2లో ఫిజిక్స్‌, కెమిస్ట్రీ, బయాలజీల్లో 50% మార్కులతో ఉత్తీర్ణులైనవారు ఈ పరీక్షను రాయవచ్చు. దీనిలో వచ్చిన ర్యాంకును బట్టి దేశవ్యాప్తంగా ఉన్న కళాశాలల్లో సీటును పొందవచ్చు. మీరు 10+2లో బైపీసీ చదివుంటే మీకు అర్హత ఉన్నట్లే.

ఆండ్రాయిడ్‌, ఐఓఎస్‌లపై ఆసక్తి. వీటిని నేర్చుకోవడం వల్ల లాభముంటుందా? ఉద్యోగావకాశాలెలా ఉంటాయి?

మొబైల్‌ రంగంలో నిత్యం చోటుచేసుకునే మార్పులు మనం సంభాషించుకునే తీరు, వ్యాపారం చేసుకునే వేదిక, సమాచారాన్ని ఉపయోగించుకునే విధానాలను నిర్ణయిస్తున్నాయి. రోజువారీ దైనందిన జీవితాన్ని మొబైల్‌ లేదా స్మార్ట్‌ఫోన్‌ లేకుండా వూహించుకోలేని పరిస్థితి ఏర్పడింది. ముఖ్యంగా స్మార్ట్‌ డివైజెస్‌, ఆండ్రాయిడ్‌ లేదా ఐఓఎస్‌లపైనే ఆధారపడి ఉంటున్నాయి. కాబట్టి ఈ ప్లాట్‌ఫాంలు మొబైల్‌ డెవలపర్‌కు గిరాకీని తెచ్చిపెడుతూ వేగంగా అభివృద్ధి చెందుతున్న ఐటీ వృత్తి మార్గాల్లో మొదటి వరుసలో నిలుస్తున్నాయి. ఈ ఆండ్రాయిడ్‌, ఐఓఎస్‌ ఆధారిత, అభివృద్ధి వేదికల్లో నైపుణ్యం సాధించడం ద్వారా మంచి ప్రొఫెషనల్‌ డెవలపర్‌గా ఎదిగే అవకాశాన్ని పొందవచ్చు.

బీబీఎం చదువుతున్నాను. మాస్టర్‌ ఆఫ్‌ ఇంటర్నేషనల్‌ బిజినెస్‌ను విదేశాల్లో చేయాలనుంది. దీనికి సంబంధించిన వివరాలు, ఉద్యోగావకాశాలను తెలపండి.

అంతర్జాతీయ వర్తకం ప్రపంచీకరణ నేపథ్యంలో ఇంటర్నేషనల్‌ బిజినెస్‌లో మాస్టర్స్‌ చేసిన అభ్యర్థులకు అవకాశాలు మెరుగ్గా ఉన్నాయి. అంతర్జాతీయ మార్కెట్లపట్ల విస్తృత అవగాహన, క్రాస్‌ బోర్డర్‌ నెగోషియేషన్స్‌, స్ట్రాటజీ, బహుళజాతి సంస్థల వ్యూహాత్మక ప్రణాళిక, చట్టపరమైన అంశాల పరిరక్షణ, అంతర్జాతీయ పర్యావరణంలో పనిచేయగలిగే మేనేజీరియల్‌ నైపుణ్యాలను అభ్యర్థుల్లో పెంపొదిస్తుంది. విదేశాల్లో విద్యను అభ్యసించాలనుకుంటే జీఆర్‌ఈ లేదా జీమ్యాట్‌తోపాటు అభ్యర్థి ఆంగ్లభాషా నైపుణ్యాన్ని పరీక్షించే టోఫెల్‌/ ఐఈఎల్‌టీఎస్‌/ పీటీఈ పరీక్షలో ఉత్తీర్ణత సాధించాల్సి ఉంటుంది. విదేశీ విశ్వవిద్యాలయాలు సాధారణంగా ఫాల్‌ (సెప్టెంబరు), స్ప్రింగ్‌ (జనవరి)ల్లో ప్రవేశాలను కల్పిస్తాయి. కొన్ని సంస్థలు సమ్మర్‌ (మే)లోనూ ప్రవేశాలను కల్పిస్తాయి. సంబంధిత విశ్వవిద్యాలయాన్నిబట్టి దరఖాస్తు గడువులు వేరుగా ఉంటాయి. ఇంటర్నేషనల్‌ బిజినెస్‌లో మాస్టర్స్‌ చేసినవారికి మేనేజ్‌మెంట్‌ కన్సల్టెంట్‌, అనలిస్ట్‌, ఇంపోర్ట్‌-ఎక్స్‌పోర్ట్‌ కంప్లయిన్స్‌ స్పెషలిస్ట్‌, ఎకనమిస్ట్‌, ఇంటర్నేషనల్‌ అకౌంటెంట్‌, మార్కెటింగ్‌, స్ట్రాటజీ రంగాల్లో ఉన్నత ఉద్యోగావకాశాలను పొందవచ్చు.

బీటెక్‌ తర్వాత బ్యాంకింగ్‌లో డిప్లొమా చేశాను. ప్రస్తుతం ఒక ప్రైవేటు సంస్థలో ఉద్యోగం చేస్తున్నాను. బ్యాంకింగ్‌లో పీహెచ్‌డీ చేయాలనుంది. నాకు అర్హత ఉందా? అందించే సంస్థల వివరాలను తెలియజేయండి.

సాధారణంగా బ్యాంకింగ్‌లో పీహెచ్‌డీ చేయదలచుకున్నవారు ఎంబీఏ (ఫైనాన్స్‌) లేదా ఎంకాం ఉత్తీర్ణులై ఉండాలి. పీహెచ్‌డీ ప్రవేశం పొందాలంటే సంబంధిత విశ్వవిద్యాలయాలు నిర్వహించే ప్రవేశపరీక్షలో ఉత్తీర్ణత సాధించాల్సి ఉంటుంది. మౌఖిక పరీక్షలోనూ విజయం సాధించాలి. పీహెచ్‌డీలో ఫెలోషిప్‌ పొందాలనుకునేవారు యూజీసీ నిర్వహించే నెట్‌-జేఆర్‌ఎఫ్‌ పరీక్ష ఉత్తీర్ణత చెందాలి. బ్యాంకింగ్‌లో పీహెచ్‌డీని విశ్వవిద్యాలయాలు సాధారణంగా ఫైనాన్స్‌ అధ్యాపకుల పర్యవేక్షణలో అందిస్తాయి. కొన్ని ఐఐఎంలు బీటెక్‌ చేసినవారికి కూడా ఫెలో ప్రోగ్రామ్‌ ఇన్‌ మేనేజ్‌మెంట్‌ (ఎఫ్‌పీఎం)లో క్యాట్‌ స్కోరు, ఇంటర్వ్యూ ఆధారంగా అడ్మిషన్‌ కల్పిస్తున్నాయి. ఎఫ్‌పీఎం కోర్సును పీహెచ్‌డీ తత్సమాన అర్హతగా పరిగణిస్తారు.

బీఎస్‌సీ (బీజెడ్‌సీ) రెండో సంవత్సరం చదువుతున్నాను. ఆ తర్వాత మెడిసినల్‌ బోటనీ (ఆయుష్‌/ ఆయుర్వేదిక్‌) చేయాలనుంది. అందించే కళాశాలల వివరాలను తెలియజేయండి.

మొక్కల ద్వారా మానవ ఆరోగ్యానికి కలిగే ఉపయోగాలు ఎన్నో. మొక్కల పెంపకం, సంరక్షణ, గుర్తింపు, నాణ్యత నియంత్రణ, కొత్త మొక్కల ఉత్పత్తి, వాటి వైద్య సామర్థ్యం, మేధోసంపత్తుపై దృష్టిసారించే విజ్ఞానశాస్త్రమే మెడిసినల్‌ బోటనీ.
సాధారణంగా పీజీ ఆయుష్‌ కోర్సులు చేయడానికి బీఏఎంఎస్‌, బీహెచ్‌ఎంఎస్‌ చేసినవారు అర్హులు. కాబట్టి మీరు ప్రత్యామ్నాయంగా ఎంఎస్‌సీ మెడిసినల్‌ ప్లాంట్స్‌ కోర్సును ఎంచుకోవచ్చు. బుందేల్‌ఖండ్‌ విశ్వవిద్యాలయం వారు అందిస్తున్న ఎంఎస్‌సీ (ఆయుర్వేద ఆల్టర్నేట్‌ మెడిసిన్‌) కోర్సును అయినా ఎంచుకోవచ్చు. యూనివర్సిటీ ఆఫ్‌ హైదరాబాద్‌ వారు అందించే పోస్ట్‌ గ్రాడ్యుయేట్‌ డిప్లొమా ఇన్‌ మెడిసినల్‌ బోటనీ కోర్సును కూడా అభ్యసించవచ్చు.

 

ఎంఏ, బీఈడీ (సోషల్‌) చేసి, స్కూలు అసిస్టెంట్‌గా (10 సం.) చేస్తున్నాను. ఇప్పుడు ఎంఈడీ చేయాలనుకుంటున్నా. దూరవిద్య ద్వారా చేసే అవకాశం ఉందా? అందించే విశ్వవిద్యాలయాల వివరాలను తెలపండి.

అవకాశం ఉంది. ఎంఈడీ కోర్సును దూరవిద్యలో చేయదలచినవారు సంబంధిత కోర్సును అందిస్తున్న విశ్వవిద్యాలయానికి కోర్స్‌ డిస్టెన్స్‌ ఎడ్యుకేషన్‌ కౌన్సిల్‌ (డీఈసీ), నేషనల్‌ కౌన్సిల్‌ ఫర్‌ టీచర్స్‌ ఎడ్యుకేషన్‌ (ఎన్‌సీటీఈ) వారి అనుమతి ఉందో లేదో తెలుసుకోవాలి. అనుమతి ఉందని నిర్ధారించుకున్న తరువాతే కోర్సులో చేరాలి. ఈడీ అభ్యసించాలనుకునేవారు బీఈడీని 55% మార్కులతో పూర్తిచేసి ఉండాలి. గుర్తింపు పొందిన పాఠశాల లేదా ఎడ్యుకేషన్‌ రిసర్చ్‌ ఇన్‌స్టిట్యూషన్‌ నుంచి రెండేళ్ల బోధనానుభవాన్ని కలిగివుండాలి. ప్రభుత్వ నిబంధనల ప్రకారం మార్కుల విషయంలో బీసీ, ఎస్‌సీ, ఎస్‌టీ అభ్యర్థులకు సడలింపు ఉంటుంది. ఇగ్నో (IGNOU), బీఆర్‌ అంబేడ్కర్‌ ఓపెన్‌ యూనివర్సిటీ వారు దూరవిద్యలో ఎంఈడీ కోర్సును అందిస్తున్నారు. ప్రవేశపరీక్ష ద్వారా ప్రవేశం కల్పిస్తారు. ఏటా మే/ జూన్‌ నెలల్లో ప్రకటన వెలువడుతుంది.

బీఎస్‌సీ (బీజెడ్‌సీ) ఈ ఏడాదే పూర్తైంది. ప్లాంట్స్‌ అండ్‌ ఫారెస్ట్రీలో ఆసక్తి ఉంది. దీనికి సంబంధించిన ప్రభుత్వ, ప్రైవేటు ఉద్యోగావకాశాల వివరాలను తెలపండి.

అడవుల నిర్వహణ, సంరక్షణ, మొక్కల పెంపకం, సహజ వనరుల రక్షణ, పర్యావరణ పునరుద్ధరణ, ప్రభుత్వ, ప్రైవేటు అటవీ ప్రాంతాల ప్రణాళిక- వాటి అభివృద్ధి కార్యకలాపాలను చూసుకునే విభాగమే ప్లాంట్స్‌ అండ్‌ ఫారెస్ట్రీ. ప్రభుత్వ రంగంలో యూపీఎస్‌సీ నిర్వహించే ఐఎఫ్‌ఎస్‌ (ఇండియన్‌ ఫారెస్ట్‌ సర్వీస్‌) రాసి, సివిల్‌ సర్వీసెస్‌లో ఉద్యోగాన్ని పొందవచ్చు. రాష్ట్ర ప్రభుత్వ స్థాయిలో ఫారెస్ట్‌ రేంజ్‌ ఆఫీసర్‌, నర్సరీలు, ఫారెస్ట్‌ సెక్షన్‌ ఆఫీసర్‌ ఉద్యోగ ప్రకటనల ద్వారా ప్రభుత్వ ఉద్యోగాన్ని సంపాదించుకోవచ్చు. ప్రైవేటు రంగంలో.. ప్లాంటేషన్‌ ఫీల్డ్‌ మేనేజర్‌, నర్సరీ అడ్మినిస్ట్రేటర్‌, ప్రైవేట్‌ ఫారెస్ట్‌ ప్లానింగ్‌ మేనేజర్‌, కన్జర్వేషన్‌ మేనేజర్‌ వంటి ఉద్యోగాలు లభిస్తాయి.

డిగ్రీ (బీఎస్‌సీ) రెండో సంవత్సరం చదువుతున్నాను. ఇంటర్‌వరకూ తెలుగు మాధ్యమంలో పూర్తిచేసి, డిగ్రీ నుంచి ఆంగ్లంలో చదువుతున్నాను. సివిల్స్‌కు సన్నద్ధమవ్వాలనుకుంటున్నా. ఏ మాధ్యమాన్ని ఎంచుకుంటే మేలు?

సివిల్స్‌కు సన్నద్ధమయ్యేవారికి విషయపరిజ్ఞానం, సమస్యను లోతుగా విశ్లేషించే నేర్పు, భావవ్యక్తీకరణ నైపుణ్యాలు ఉండాలి. తెలుగు మాధ్యమంలో డిగ్రీ వరకూ అభ్యసించి ఇంగ్లిష్‌లో, డిగ్రీ వరకూ ఆంగ్లంలో చదివి, తెలుగులో.. సివిల్స్‌ రాసి విజయం సాధించినవారూ ఉన్నారు. ఇటీవల రోణంకి గోపాలకృష్ణ తెలుగు మాధ్యమంలో సివిల్స్‌ రాసి, ర్యాంకు సాధించిన సంగతి తెలిసిందే. కాబట్టి మీరు ఏ మాధ్యమంలో భావవ్యక్తీకరణ బాగా చేయగలరో దాన్నే ఎంచుకోండి. ఇంకా డిగ్రీలోనే ఉన్నారు కాబట్టి, ఇప్పటి నుంచే సివిల్స్‌ ప్రాథమిక సన్నద్ధతను మొదలుపెట్టండి.

మా అమ్మాయి బీఫార్మసీ మూడో సంవత్సరం చదువుతోంది. తనకు క్లినికల్‌ సైకాలజీలో మాస్టర్స్‌ చేయాలనుంది. ఇందుకు సాధారణంగా డిగ్రీలో సైకాలజీ చదివివుండాలని విన్నాను. తనకేమో ఈ కోర్సులోనే ఆసక్తి ఉంది. వేరే ప్రత్యామ్నాయాలేమైనా ఉన్నాయా? ఉంటే ప్రవేశపరీక్ష, అందించే కళాశాలలు, విశ్వవిద్యాలయాల వివరాలను తెలియజేయండి.

మానసిక అనారోగ్య స్వభావం, కారణాలు, చికిత్సల అధ్యయనంపై దృష్టి కేంద్రీకరించే మనస్తత్వశాస్త్రమే క్లినికల్‌ సైకాలజీ. మీరు విన్నట్టుగా క్లినికల్‌ సైకాలజీలో మాస్టర్స్‌ చేయాలంటే డిగ్రీలో సైకాలజీ ఒక ఐచ్ఛికం లేదా సబ్జెక్టుగా చదవాల్సి ఉంటుంది. కానీ దీనికి సంబంధించి ప్రత్యామ్నాయాలూ ఉన్నాయి. మీ అమ్మాయికి ఆసక్తి ఉంటే.. ఇదే సబ్జెక్టులో ఎంఎస్‌సీ లేదా ఎంఏ చేయొచ్చు. అమిటీ విశ్వవిద్యాలయం, రిహాబిలిటేషన్‌ కౌన్సిల్‌ ఆఫ్‌ ఇండియా, ఆంధ్రా యూనివర్సిటీలు ఎంఏ/ ఎంఎస్‌సీ (సైకాలజీ) చేసినవారికి ఎంఫిల్‌ (క్లినికల్‌ సైకాలజీ) చేసే అవకాశాన్ని కల్పిస్తున్నాయి.

డెంటల్‌ సర్జన్‌గా చేస్తున్నాను. డిస్కవరీ, నేషనల్‌ జాగ్రఫీ సంస్థల్లో పనిచేయాలని ఆసక్తి. కుదురుతుందా? వాటి అర్హత వివరాలను తెలియజేయండి.

డిస్కవరీ, నేషనల్‌ జాగ్రఫీ సంస్థల్లో వివిధ విభాగాలు ఉంటాయి. మీకు ఆసక్తి ఉన్న విభాగం ఏమిటో తెలియజేయలేదు. ముందుగా మీకు ఆసక్తి ఉన్న విభాగాన్ని ఎంచుకోండి. ఇలాంటి సంస్థలు కొన్నిసార్లు ఫ్రీలాన్సర్‌ ఉద్యోగాలను అందిస్తుంటాయి. ఒకసారి సంస్థ వెబ్‌సైట్‌లో కెరియర్‌ పేజీని సందర్శించండి. దీనివల్ల సంబంధిత శాఖలపై మీకు అవగాహన ఏర్పడుతుంది.

ఫోరెన్సిక్‌ సైన్స్‌లో పీజీ చేయాలనుంది. అందుకు డిగ్రీ స్థాయిలో ఏ సబ్జెక్టులను ఎంచుకోవాల్సి ఉంటుంది? వాటిని అందించే సంస్థల వివరాలను తెలియజేయండి?

నేర పరిశోధనలో విజ్ఞాన సూత్రాలను వర్తింపచేసి సాధారణ దృష్టిని తప్పించుకునే ఆధారాలను కనుక్కునే శాస్త్రమే ఫోరెన్సిక్‌ సైన్స్‌. మైక్రోబయాలజీ, బయోకెమిస్ట్రీ, జంతుశాస్త్రం, రసాయన శాస్త్రం, భౌతిక శాస్త్రం, అప్లయిడ్‌ సైన్స్‌ లేదా వృక్షశాస్త్రంలో డిగ్రీ పూర్తిచేసిన అభ్యర్థులకు ఎంఎస్‌సీ ఫోరెన్సిక్‌ సైన్స్‌ చదివే అర్హత ఉంటుంది. డిగ్రీ స్థాయిలో బీఎస్‌సీ ఫోరెన్సిక్‌ కోర్సును అమిటీ, గల్గోతియా, డా.హరిసింగ్‌ గౌర్‌ విశ్వవిద్యాలయాలు, హైదరాబాద్‌లోని రాజా బహదూర్‌ వెంకటరామిరెడ్డి మహిళా కళాశాల అందిస్తున్నాయి. ఆసక్తీ, పరిశీలన నైపుణ్యాలూ, పరిశోధించే సహజ స్వభావం ఉన్న అభ్యర్థులు ఈ వృత్తిలో రాణిస్తారు.

బీఎస్‌సీ, ఎంఎస్‌సీ స్టాటిస్టిక్స్‌ పూర్తిచేసినవారు సాప్ట్‌వేర్‌ రంగంలో ప్రవేశించాలనుకుంటే ఏయే కోర్సులను చదవాల్సి ఉంటుంది?

ఐటీ డేటా సంబంధిత ఉద్యోగాల్లో నిపుణులకు ఈ మధ్యకాలంలో భారీగా గిరాకీ ఏర్పడింది. డేటా సైంటిస్ట్‌, డేటా అనలిస్ట్‌, బిగ్‌ డేటా ఇంజినీర్‌, బిజినెస్‌ అనలిస్ట్‌, గణాంక శాస్త్రవేత్తల వంటి ఉద్యోగ అభ్యర్థుల కోసం కంపెనీలు వెతుకుతుంటాయి. మంచి హోదా, జీతభత్యాలను అందిస్తున్నాయి. ఆర్‌-ప్రోగ్రామింగ్‌ లాంగ్వేజ్‌, పైథాన్‌, హడూప్‌, డాటా మైనింగ్‌ కోర్సుల్లో పట్టు సాధిస్తే సాప్ట్‌వేర్‌, డేటా రంగాల్లో ఉన్నత శిఖరాలను చేరుకోవచ్చు.

ఫార్మా-డి మూడో సంవత్సరం చదువుతున్నాను. దీని తర్వాత ఏయే కోర్సులను ఎంచుకుంటే నా కెరియర్‌కు అనుకూలం? నాకున్న ప్రభుత్వ, ప్రైవేటు ఉద్యోగావకాశాలను తెలియజేయండి.

ఔషధాల ప్రభావాల సేకరణ, గుర్తింపు అంచనా, పర్యవేక్షణ, నివారణలకు సంబంధించిన ఔషధ శాస్త్రమే ఫార్మా-డి. ఆరు సంవత్సరాల ఫార్మా-డిని పూర్తిచేసిన అభ్యర్థులు రెండేళ్ల పోస్ట్‌ బ్యాకులెరేట్‌ పూర్తిచేసి పీహెచ్‌డీ పట్టా అందుకోవచ్చు. ప్రస్తుతం ఫార్మసీ కౌన్సిల్‌ ఆఫ్‌ ఇండియా (పీసీఐ) ఈ కోర్సును గుర్తించింది. కాబట్టి త్వరలో ప్రభుత్వ కొలువులకూ ఆస్కారం ఉంటుంది. ఫార్మా-డి పూర్తిచేసినవారు ఔషధ, హాస్పిటల్‌, బయోటెక్నాలజీ సంస్థల్లో మెడికల్‌ రైటర్స్‌, క్లినికల్‌ రిసర్చర్స్‌, సబ్జెక్టు మ్యాటర్‌ ఎక్స్‌పర్ట్స్‌ నియంత్రణ పత్రాల డెవలప్‌మెంట్‌, కమ్యూనిటీ ప్రాక్టీషనర్‌, డ్రగ్‌ ఎక్స్‌పర్ట్‌, అకడమిక్స్‌ రంగాల్లో ఉద్యోగాన్ని సంపాదించుకోవచ్చు.

ఎంకాం, ఎల్‌ఎల్‌బీ చదివాను. ఇంటర్నేషనల్‌ లా చదవాలని ఉంది. దానికి సంబంధించిన వివరాలతోపాటు దూరవిద్య ద్వారా అందించే సంస్థల వివరాలనూ తెలియజేయండి.

ప్రస్తుత ప్రపంచీకరణ నేపథ్యంలో ఇంటర్నేషనల్‌ లా చదివేవారికి గిరాకీ ఏర్పడింది. ఇండియన్‌ సొసైటీ ఆఫ్‌ ఇంటర్నేషనల్‌ లా (ఐఎస్‌ఐఎల్‌) వారు డిప్లొమా, పీజీ డిప్లొమా ఇన్‌ ఇంటర్నేషనల్‌ ట్రేడ్‌ అండ్‌ బిజినెస్‌ లా, ఇంటర్నేషనల్‌ రెఫ్యూజీ లా, లా ఆఫ్‌ ఇంటర్నేషనల్‌ ఇన్‌స్టిట్యూషన్స్‌ వంటివాటిలో కోర్సులను అందిస్తున్నారు. దూరవిద్య ద్వారా సింబయాసిస్‌ లా స్కూల్‌, ఐఐఈఎం (కేరళ) వారు ఆరు నెలల నుంచి సంవత్సరం వ్యవధి గల వివిధ డిప్లొమా, సర్టిఫికెట్‌ కోర్సులను ఇంటర్నేషనల్‌ లాలో అందిస్తున్నారు. డిగ్రీ ఉత్తీర్ణులైనవారు ఈ కోర్సులకు అర్హులు.

2009లో పదో తరగతి పూర్తయింది. అననుకూల పరిస్థితుల కారణంగా చదువు మధ్యలోనే ఆగిపోయింది. చిన్న చిన్న కంప్యూటర్‌ కోర్సులను చేశాను. కానీ, ఎక్కడా ఉద్యోగం రాలేదు. కనీస అర్హత లేదు అంటున్నారు. నా విద్యార్హతను ఎలా పెంచుకోవచ్చు? భవిష్యత్తుకు ఉపయోగపడే మార్గాన్ని సూచించండి.

ఉన్నత విద్య ప్రతి ఒక్కరికీ చేరువ కావడం, విద్యావంతులు ఎక్కువ కావడంతో ప్రతి చిన్న ఉద్యోగానికీ డిగ్రీ కనీసార్హతగా అడుగుతున్నారు. మీరు మీ విద్యార్హతను దూరవిద్య ద్వారా పెంచుకోవచ్చు. దూరవిద్య ద్వారా బీఏ లేదా బీకాం వంటి డిగ్రీ కోర్సును పూర్తిచేయడం ద్వారా అర్హతను పెంచుకుని ఉద్యోగాన్ని సంపాదించవచ్చు. దీంతోపాటు టాలీ, ఎంఎస్‌ ఆఫీస్‌ వంటి కంప్యూటర్‌ కోర్సులను చేస్తే ఉపయోగం ఉంటుంది.

బీకాం చదువుతున్నాను. నాకు డ్రాయింగ్‌ అంటే ఆసక్తి. వాటికి సంబంధించిన కోర్సుల వివరాలను తెలపండి. ప్రభుత్వ రంగంలో డ్రాయింగ్‌కు సంబంధించిన ఉద్యోగావకాశాలు ఏవైనా ఉంటాయా?

డ్రాయింగ్‌ రంగంలో స్థిరపడాలనుకునేవారు డిగ్రీ స్థాయిలో బ్యాచిలర్‌ ఇన్‌ ఫైన్‌ ఆర్ట్స్‌ (బీఎఫ్‌ఏ) ను ఎంచుకోవాల్సి ఉంటుంది. డ్రాయింగ్‌లో డిగ్రీ లేదా పీజీ చేసినవారు ప్రభుత్వ, ప్రైవేటు పాఠశాలల్లో డ్రాయింగ్‌ టీచర్‌గా ఉద్యోగం పొందవచ్చు. ఫ్రీలాన్సర్‌ డ్రాయింగ్‌ ఆర్టిస్ట్‌గా మీడియా, యానిమేషన్‌ రంగాల్లోని కొన్ని శాఖల్లో ఉద్యోగం సంపాదించుకోవచ్చు.

డిప్లొమా (ఈసీఈ) 2014లో పూర్తిచేశాను. ప్రభుత్వ రంగంలో ఉద్యోగం సంపాదించాలని ఉంది. నాకున్న అవకాశాలను తెలియజేయండి.

3 సంవత్సరాల డిప్లొమా (ఈసీఈ) లేదా పాలిటెక్నిక్‌ చేసిన అభ్యర్థులకు వివిధ ప్రభుత్వరంగ సంస్థలు ఎంప్లాయిమెంట్‌ న్యూస్‌, తమ వెబ్‌సైట్లలోని కెరియర్‌ పేజీల్లో ప్రకటనలు వెలువరుస్తాయి. జూనియర్‌ ఇంజినీర్లు, టెక్నీషియన్లు, ఫోర్‌మెన్‌ (ఎలక్ట్రికల్‌) ట్రెయినీలు, ప్రాజెక్ట్‌ అసిస్టెంట్‌, టెక్నికల్‌ అసిస్టెంట్‌ వంటి ఉద్యోగావకాశాలుంటాయి. ముఖ్యంగా గెయిల్‌, ఓఎన్‌జీసీ, కోల్‌ ఇండియా, ఆర్డినెన్స్‌ ఫ్యాక్టరీ, యూపీఎస్‌సీ, ఏపీపీఎస్‌సీ వంటి సంస్థలు వివిధ ఉద్యోగ ప్రకటనలను జారీ చేస్తుంటాయి. ఈ ఉద్యోగాలకు మీరు ప్రయత్నించవచ్చు.

డిగ్రీ మధ్యలోనే ఆపేశాను. విభిన్నమైన కెరియర్‌ను ఎంచుకోవాలని ఉంది. సినిమాలపై ఆసక్తి ఉంది. మంచి రచయిత కావాలనుకుంటున్నాను. ఏం చేయాలి?

విభిన్న కెరియర్‌ను ఎంచుకోవాలన్న మీ ఆసక్తి అభినందనీయం. సినిమా రంగంలో రాణించాలనుకునేవారు స్వతహాగా తమదైన ప్రతిభను ఏర్పరచుకోవాలి. దీనికి తోడుగా మీరు నిర్ణయించుకున్న రంగంలో కోర్సులను అందిస్తున్న మంచి శిక్షణ సంస్థల్లో తర్ఫీదును పొందాలి. ఫిల్మ్‌ అండ్‌ టెలివిజన్‌ ఇన్‌స్టిట్యూట్‌ ఆఫ్‌ ఇండియా (ఎఫ్‌టీఐఐ) పుణె, అన్నపూర్ణ ఇంటర్నేషనల్‌ స్కూల్‌ ఆఫ్‌ ఫిల్మ్‌ ప్లస్‌ మీడియా, రామోజీ అకాడమీ ఆఫ్‌ ఫిల్మ్‌ అండ్‌ టెలివిజన్‌, నేషనల్‌ స్కూల్‌ ఆఫ్‌ డ్రామా వంటి ప్రముఖ సంస్థలు నటన, స్క్రిప్ట్‌ రైటింగ్‌, ఫిల్మ్‌ మేకింగ్‌, మల్టీ మీడియా వంటి విభాగాల్లో శిక్షణను ఇస్తున్నాయి. సినిమా పరిశ్రమలో ప్రతీ రంగం తమదైన ప్రత్యేకతను కలిగి ఉంది. కాబట్టి మీరు ఎంచుకున్న రంగం మీద ఆసక్తి కలిగి ఉండి కృషి చేయండి. తప్పకుండా విజయం సాధిస్తారు.

ఇంటర్‌ 5 సంవత్సరాల క్రితం పూర్తిచేశాను. రష్యాలో ఏడాదిపాటు ఎంబీబీఎస్‌ చేశాను. కొన్ని కుటుంబ కారణాల వల్ల కొనసాగించలేకపోయాను. ఇప్పుడు మనదేశంలో ఎంబీబీఎస్‌ చేయవచ్చా? ప్రవేశపరీక్ష రాయడానికి నాకు అర్హత ఉందా?

గతంలో చెప్పినట్టుగా ఎంబీబీఎస్‌ అభ్యసించదలచుకున్నవారు 10+2లో ఫిజిక్స్‌, కెమిస్ట్రీ, బయాలజీ సబ్జెక్టులను 50% మార్కులతో పూర్తిచేసి ఉండాలి. సీబీఎస్‌సీ వారు నిర్వహించే నీట్‌ ఆధారంగా ఎంబీబీఎస్‌లో ప్రవేశం పొందవచ్చు. పరీక్ష రాయడానికి కనిష్ఠ వయసు 17 సంవత్సరాలు. మీరు 10+2 విధానంలో బైపీసీ చదివుంటే ఎంబీబీఎస్‌ చేయడానికి అర్హులే.

ఇంటర్‌ ఫెయిల్‌ అయ్యాను. తరువాత డిగ్రీ దూరవిద్య ద్వారా పూర్తిచేశాను. గ్రూప్‌-4 వంటి ఉద్యోగాలకు అర్హత ఇంటర్‌గా ఉంటుంది. అలాంటివాటికి నాకు అర్హత ఉంటుందా? లేకపోతే ఏం చేయాలి?

ఇంటర్‌ అర్హతగా ఉన్న ఉద్యోగాలకు మీరు దరఖాస్తు చేసుకోవడం కుదరదు. డిగ్రీ అర్హతతో ఉన్న గ్రూప్‌-2, గ్రూప్‌-1 ఉద్యోగాలు, ఇతర పబ్లిక్‌ సర్వీస్‌ కమిషన్‌ ఉద్యోగాలకు అర్హత ఉంటుంది. ఒకసారి బోర్డ్‌ ఆఫ్‌ ఇంటర్మీడియట్‌ వారిని సంప్రదించి ఫెయిల్‌ అయిన లేదా మధ్యలో ఆపేసిన ఇంటర్‌ను ఇప్పుడు కొనసాగించడం/ పరీక్ష రాయడం కుదురుతుందో లేదో అనే సమాచారాన్ని సేకరించుకోవాలి. దానినిబట్టి ఇంటర్‌ పూర్తి చేయడమో, ప్రత్యామ్నాయాన్ని ఎంచుకోవడమో చేయడం ద్వారా ఉద్యోగాలకు దరఖాస్తు చేసుకోవచ్చు.

మా అమ్మాయి బైపీసీ రెండో సంవత్సరం చదువుతోంది. నీట్‌ రాయాలనుకుంటోంది. కనీస వయఃపరిమితి ఎంత? వైద్యవృత్తిలో చేరాలంటే నీట్‌ కాకుండా వేరే ప్రత్యామ్నాయాలున్నాయా? వివరాలను తెలియజేయండి. ఒకవేళ వయసు తక్కువగా ఉంటే అనుమతి పత్రాన్ని ఎలా పొందాలి?

జాతీయస్థాయిలో ఎంబీబీఎస్‌లో చేరడానికి నిర్వహించే పరీక్షే నీట్‌. దీన్ని రాయడానికి కనిష్ఠ వయఃపరిమితి పదిహేడు సంవత్సరాలు కాగా, సుప్రీంకోర్టు ఉత్తర్వుల ప్రకారం గరిష్ఠ వయః పరిమితి లేదు. ఇదేకాకుండా భారత్‌లో వైద్యవృత్తిలో చేరడానికి ఎయిమ్స్‌ ద్వారా దేశంలోని ప్రతిష్ఠాత్మకమైన ఏడు ఎయిమ్స్‌ కళాశాలల్లో ఎంబీబీఎస్‌ సీటును పొందవచ్చు. జిప్‌మర్‌ ద్వారా కూడా ఎంబీబీఎస్‌లో ప్రవేశం పొందవచ్చు. మీ అమ్మాయికి తగినంత వయసు లేకపోతే సంబంధిత వైద్యాధికారి (ప్రభుత్వ), జిల్లా మెజిస్ట్రేట్‌, కలెక్టర్‌లలో ఎవరో ఒకరి నుంచి అనుమతి పత్రం పొందవచ్చు.

డిగ్రీ (బీకాం) మూడో సంవత్సరం (2013) పూర్తిచేయలేదు. 1, 2 సంవత్సరాల్లోనూ సబ్జెక్టులు మిగిలివున్నాయి. ఇప్పుడు మళ్లీ డిగ్రీ కొనసాగించాలనుకుంటున్నాను. రెగ్యులర్‌ దూరవిద్యల్లో ఏది మేలు? తెలియజేయగలరు.

ఏ కోర్సు అయినా రెగ్యులర్‌ విధానంలో చదవడం వల్ల విషయ పరిజ్ఞానాన్నీ, భావ వ్యక్తీకరణనీ పెంచుకోవచ్చు. దీని ద్వారా మంచి ఉద్యోగావకాశాన్ని పొందవచ్చు. ఏవైనా కారణాల వల్ల రెగ్యులర్‌ విద్యను అభ్యసించడం కుదరకపోతే దూరవిద్యను ఆశ్రయించవచ్చు. సాధ్యమైతే రెగ్యులర్‌ విధానంలోనే డిగ్రీని పూర్తిచేయండి. అలా కుదరకపోతే డిగ్రీ చదివిన విశ్వవిద్యాలయంలోనే దాన్ని దూరవిద్యలోకి మార్చుకుని గ్రాడ్యుయేషన్‌ పట్టాను పొందండి. ఏ విధానంలో విద్యను అభ్యసించినా లోతైన అధ్యయనంతోపాటు విషయ పరిజ్ఞానం పెంచుకునే ప్రయత్నం చేయండి.

బీఎస్‌సీ (నర్సింగ్‌) నాలుగేళ్ల కోర్సు చేశాను. కానీ నాకు ఎంబీబీఎస్‌ చేయాలని ఉంది. వీలుంటుందా?

ఎంబీబీఎస్‌ చేయదలచుకున్నవారు సీబీఎస్‌సీ వారు నిర్వహించే నీట్‌ను రాయవలసి ఉంటుంది. నీట్‌ జాతీయ స్థాయిలో ఎంబీబీఎస్‌లో చేరడానికి నిర్వహించే ప్రవేశపరీక్ష. కనిష్ఠ వయఃపరిమితి 17 ఏళ్లు కాగా సుప్రీంకోర్టు ఉత్తర్వుల ప్రకారం గరిష్ఠ వయఃపరిమితి లేదు. 10+2లో ఫిజిక్స్‌, కెమిస్ట్రీ, బయాలజీల్లో 50% మార్కులతో ఉత్తీర్ణులైనవారు ఈ పరీక్షను రాయవచ్చు. దీనిలో వచ్చిన ర్యాంకును బట్టి దేశవ్యాప్తంగా ఉన్న కళాశాలల్లో సీటును పొందవచ్చు. మీరు 10+2లో బైపీసీ చదివుంటే మీకు అర్హత ఉన్నట్లే.

డిగ్రీ (బీఎస్‌సీ) రెండో సంవత్సరంతో ఆపేశాను. దూరవిద్య ద్వారా కొనసాగించాలనుకుంటున్నాను. నేను సివిల్స్‌ రాయడానికి అర్హుడినేనా?

ఏదైనా డిగ్రీ పూర్తిచేసిన అభ్యర్థులు జాతీయస్థాయిలో నిర్వహించే సివిల్స్‌ రాయడానికి అర్హులు. మీరు డిగ్రీ పూర్తిచేస్తే ఈ పరీక్షను రాయడానికి అర్హులే. సన్నద్ధతను గురించి తెలుసుకోవాలనుకుంటే www.eenadupratibha.net వెబ్‌సైట్‌ను సందర్శించవచ్చు. మీరు ముందుగా డిగ్రీని దూరవిద్య విధానంలోకి మార్పించుకుని రెండో సంవత్సరం నుంచి కొనసాగించవచ్చు. రెగ్యులర్‌ విధానం నుంచి దూరవిద్యకు డిగ్రీని మార్చుకుని కొనసాగించే వెసులుబాటు ఆచార్య నాగార్జున విశ్వవిద్యాలయం (ANU), గుంటూరు; ఆంధ్రవిశ్వవిద్యాలయం , విశాఖపట్నం వంటివి కల్పిస్తున్నాయి. తగిన విచారణ చేసుకుని చదువును కొనసాగించండి.

ఎస్‌ఎస్‌సీ తర్వాత ఐటీఐ చేశాను. ప్రస్తుతం టెలికాం సంస్థలో ఉద్యోగం చేస్తున్నాను. డిప్లొమా చేయాలనుంది. పదోన్నతులకు ఏ డిప్లొమా సహకరిస్తుందో వివరించండి.

మీరు ఐటీఐ ఏ విభాగంలో పూర్తిచేశారో తెలుపలేదు. టెలికాం రంగంలో ఏ విభాగంలో పనిచేస్తున్నారో కూడా తెలుపలేదు. టెలికాంలో ఎలక్ట్రికల్‌, ఎలక్ట్రానిక్స్‌, కమ్యూనికేషన్‌, సిగ్నల్‌ వ్యవస్థ, టవర్స్‌ వంటి వివిధ విభాగాలున్నాయి. మీరు చేస్తున్న విభాగాన్ని బట్టి డిప్లొమా ఎంచుకోవాల్సి ఉంటుంది. ఐటీఐ పూర్తిచేసినవారు లేటరల్‌ ఎంట్రీ ద్వారా పాలిటెక్నిక్‌ కోర్సును నేరుగా రెగ్యులర్‌ విధానంలో చేరవచ్చు. టెలికాం రంగంలో ఉన్నారు కాబట్టి, ఈసీఈ స్పెషలైజేషన్‌ను ఎంచుకోవడం ఉపయోగకరం. దూరవిద్యలో పాలిటెక్నిక్‌ డిప్లొమా చేయడం వీలు కాదు. మీరు డిగ్రీ పూర్తి చేసినట్లయితే ఆ తర్వాత దూరవిద్యలో పోస్టు గ్రాడ్యుయేట్‌ డిప్లొమా ఇన్‌ టెలికాం మేనేజ్‌మెంట్‌ కోర్సును ఎంచుకోవచ్చు.

డిగ్రీ (బీజెడ్‌సీ) మూడో సంవత్సరం చదువుతున్నాను. సైకాలజీలో పీజీ చేయాలనుంది. నాకు అర్హత ఉందా? వాటికి ఉండే ప్రవేశపరీక్షలు, ఏయే అంశాల్లో వాటికి సన్నద్ధమవాల్సి ఉంటుంది?

సైకాలజీలో పీజీ చేయాలనుకునేవారు డిగ్రీ సైకాలజీ చదివివుండాలి. కానీ కొన్ని విశ్వవిద్యాలయాలు ఏదైనా డిగ్రీ చదివినవారికి కూడా అవకాశాన్ని కల్పిస్తున్నాయి. నాగార్జున విశ్వవిద్యాలయం, శ్రీ వెంకటేశ్వర విశ్వవిద్యాలయం, యూనివర్సిటీ ఆఫ్‌ హైదరాబాద్‌ తమ సొంత ప్రవేశపరీక్ష ద్వారా ప్రవేశాలను కల్పిస్తున్నాయి. సైకాలజీ అంటే మానసిక ప్రవర్తన, మనస్తత్వ శాస్త్ర అధ్యయనం, విశ్లేషణాత్మక ఆలోచన, సహనం వంటి అంశాల్లో అవగాహన పెంపొందించుకోవడం ద్వారా మంచి ఫలితాలను పొందవచ్చు.

విదేశీ కళాశాలలతో సంబంధమున్న వాటిల్లో సైబర్‌లా లేదా హ్యూమానిటీస్‌ చదవాలనుంది. అటువంటి కళాశాలలు, వాటి అడ్మిషన్‌ల వివరాలను తెలియజేయండి.

మీరు మీ విద్యార్హతలను తెలియజేయలేదు. సాధారణంగా సైబర్‌లా కోర్సును ఐటీ సంస్థల్లో పని చేసేవారు, ప్రాక్టీసింగ్‌ న్యాయవాదులు తమ అర్హతను పెంపొందించుకోవడానికి అభ్యసిస్తారు. నల్సార్‌ యూనివర్సిటీ, నేషనల్‌ లా యూనివర్సిటీ, సింబయాసిస్‌ లా స్కూల్‌ వంటివి తమ విద్యార్థులకు అనుబంధ విదేశీ కళాశాలల్లో ఒక సెమిస్టర్‌ లేదా ఒక సంవత్సరంపాటు ఒక ఐచ్ఛికంగా సైబర్‌లా కోర్సును అభ్యసించే వెసులుబాటు కల్పిస్తున్నాయి. ఈ విద్యాలయాల్లో క్యాట్‌ ద్వారా ప్రవేశం పొందవచ్చు. హ్యూమానిటీస్‌ విషయంలో కేంద్రీయ విశ్వవిద్యాలయాలు ఎరాస్మస్‌ ప్రోగ్రాం ద్వారా విదేశంలో కొంతకాలం విద్యనభ్యసించే ఏర్పాటును కల్పిస్తున్నాయి. ప్రైవేటు విశ్వవిద్యాలయాలైన ఎస్‌ఆర్‌ఎం, గీతం వర్సిటీ, క్రయిస్ట్‌ విశ్వవిద్యాలయాలు తమ విద్యార్థులకు విదేశీ కళాశాలల్లో ఒక సెమిస్టర్‌ విద్యను పూర్తిచేసే అవకాశాన్ని కల్పిస్తున్నాయి. సంబంధిత వర్సిటీలు తమ సొంత ప్రవేశపరీక్ష ద్వారా హ్యూమానిటీస్‌ కోర్సులో ప్రవేశాన్ని కల్పిస్తున్నాయి.

బీఎస్‌సీ (ఎంపీసీఎస్‌) 2017లో పూర్తైంది. ఎంఎస్‌సీ (ఫిజిక్స్‌) చేయాలనుంది. విశ్వవిద్యాలయాన్ని ఎలా ఎంచుకోవాలి? పరిశోధనలోనూ ఆసక్తి ఉంది. అందుకు నేను ఏయే అంశాలపై దృష్టిసారించాలి?

ఎంఎస్‌సీ అభ్యసించాలనుకునే విద్యార్థులు ఐఐటీవారు నిర్వహించే జామ్‌ (JAM)పరీక్ష లేదా వివిధ ఎన్‌ఐటీలు నిర్వహించే ఎంఎస్‌సీ ప్రవేశపరీక్షలో మంచి ర్యాంకు సాధించాల్సి ఉంటుంది. బోధన, పరిశోధనలపరంగా అత్యున్నత ప్రమాణాలున్న, పీజీలోనే పరిశోధనలను ప్రోత్సహించే విశ్వవిద్యాలయాల్లో పీజీ చేయడం వల్ల పరిశోధన పట్ల ఆసక్తి పెంచుకోవచ్చు. లోతుగా అధ్యయనం చేయడం, విషయ పరిజ్ఞానాన్ని పెంచుకోవడంతోపాటు సీఎస్‌ఐఆర్‌ నెట్‌- జేఆర్‌ఎఫ్‌ పరీక్షకు సిద్ధం కావడం ద్వారా పీహెచ్‌డీ ప్రవేశాన్ని పొందవచ్చు.

ఇంటర్‌ రెండో సంవత్సరం (1998) పూర్తి చేయలేదు. దూరవిద్య ద్వారా బీఏ (2015) పూర్తిచేశాను. ఇప్పటివరకూ ఇంటర్‌కు సంబంధించిన ధ్రువపత్రాలేమీ తీసుకోలేదు. ఫర్వాలేదా? ఇప్పుడు ఇంటర్‌ వన్‌ సిట్టింగ్‌లో రాయాలనుకుంటున్నాను. మంచిదేనా? నాకున్న ఉద్యోగావకాశాల వివరాలను తెలపండి.

బోర్డ్‌ ఆఫ్‌ ఇంటర్మీడియట్‌ వారిని సంప్రదించి మీరు పూర్తిచేయని రెండో సంవత్సరం ప్రస్తుతం కొనసాగించడం సాధ్యపడుతుందేమో తెలుసుకోండి. అలా కుదరకపోతే అప్పుడు ఓపెన్‌ స్కూలింగ్‌ ద్వారా ఇంటర్‌ను పూర్తి చేయవచ్చు. అప్పుడు మీరు ఇంటర్‌, బీఏ అర్హత ఉన్న స్టాఫ్‌ సెలక్షన్‌ కమిషన్‌, పబ్లిక్‌ సర్వీస్‌ కమిషన్‌, బ్యాంకు ఉద్యోగాలకు నోటిఫికేషన్‌ వెలువడినప్పుడు దరఖాస్తు చేసుకోవచ్చు. సాధారణంగా ఇంటర్‌ వన్‌ సిట్టింగ్‌లో కాకుండా రెండు సంవత్సరాల ఇంటర్‌ విద్యను రెగ్యులర్‌ విధానంలో అభ్యసించడం మంచిది.

బీటెక్‌ పూర్తిచేశాను. మా పెదనాన్న సెంట్రల్‌ జైలు సూపరింటెండెంట్‌గా చేస్తున్నారు. ఆయన త్వరలో పదవీ విరమణ పొందనున్నారు. వారసత్వంగా ఆయన ఉద్యోగం నాకు వచ్చే అవకాశం ఉందా?

వారసత్వ ఉద్యోగాలపట్ల సంస్థలు తమకంటూ ప్రత్యేక నియమ నిబంధనలు ఏర్పరచుకుంటాయి. సాధారణంగా వారికి పుట్టిన పిల్లలకు మాత్రమే వారసత్వ ఉద్యోగావకాశాలుంటాయి. కాబట్టి, సంబంధిత సంస్థ (జైలు) అధికారులతో సంప్రదించడం ద్వారా మీకు అర్హత ఉందో లేదో తెలుసుకోండి.

పదో తరగతి తర్వాత దూరవిద్యలో బీఏ చేశాను. ఆ తర్వాత ఎంఏ (పాలిటిక్స్‌) చేసి, బీఈడీ (సోషల్‌-ఇంగ్లిష్‌) 2014లో పూర్తిచేశాను (2017లో ఏపీ ఓపెన్‌ స్కూల్‌ ద్వారా ఇంటర్‌ వన్‌ సిట్టింగ్‌లో పూర్తైంది). డీఎస్‌సీ రాశాను కానీ, ఉద్యోగం రాలేదు. నాకున్న వేరే ప్రభుత్వ ఉద్యోగావకాశాలేవి? ఇంకా వేరే ఏ కోర్సులైనా చేస్తే మేలా?

పీజీ అర్హతతో ఉన్న ఉద్యోగావకాశాలకు మీరు అర్హులు. రాష్ట్ర, కేంద్ర పబ్లిక్‌ సర్వీస్‌ కమిషన్ల ద్వారా వెలువడే ఉద్యోగ ప్రకటనలకు దరఖాస్తు చేసుకుని, పోటీ పడేందుకు మీకు అర్హత ఉంది. ఎంఏ (పాలిటిక్స్‌) తో జూనియర్‌ లెక్చరర్‌గా ప్రయత్నించవచ్చు. ఏపీసెట్‌ లేదా యూజీసీ నెట్‌ పరీక్షల్లో ఉత్తీర్ణత సాధిస్తే డిగ్రీ లెక్చరర్‌, అసిస్టెంట్‌ ప్రొఫెసర్‌ ఉద్యోగాలకు దరఖాస్తు చేసుకోవచ్చు. కాబట్టి, ఈ ఉద్యోగ పరీక్షలకు సంసిద్ధమైతే తప్పకుండా విజయం సాధిస్తారు.

డిగ్రీ (బీఏ కంప్యూటర్స్‌) పూర్తిచేశాను. సైబర్‌ లా చేయాలనుంది. సైబర్‌ లా, సైబర్‌ సెక్యూరిటీల మధ్య తేడా ఏంటి? సైబర్‌ లాను అందించే విశ్వవిద్యాలయాల వివరాలను తెలియజేయండి. ఉద్యోగావకాశాలు ఎలా ఉంటాయి?

ఇంటర్నెట్‌ ఆధారిత సేవలు, ఇంటర్నెట్‌ వాడకం, సైబర్‌ నేరాలు, వాటి చట్టపరమైన సమస్యల పరిష్కారం కోసం దేశంలో ఇన్ఫర్మేషన్‌ టెక్నాలజీ చట్టం- 2000ను రూపొందించారు. దీనినే సైబర్‌ చట్టం/ సైబర్‌ లా అంటారు. కంప్యూటర్లు, నెట్‌వర్క్‌, డేటా అనధికార వాడకం, హ్యాకింగ్‌ల నుంచి పరిరక్షించే సాంకేతిక పరిజ్ఞానాన్నే సైబర్‌ సెక్యూరిటీ అంటారు.
యూనివర్సిటీ ఆఫ్‌ హైదరాబాద్‌ వారు సంవత్సరం వ్యవధి గల పీజీ డిప్లొమా ఇన్‌ సైబర్‌లాస్‌ అండ్‌ ఇంటలెక్చువల్‌ ప్రాపర్టీ రైట్స్‌ కోర్సును దూరవిద్య విధానంలో అందిస్తున్నారు. ఉస్మానియా యూనివర్సిటీ పోస్ట్‌ గ్రాడ్యుయేట్‌ డిప్లొమా ఇన్‌ సైబర్‌ లా కోర్సును అందిస్తోంది. డిగ్రీ పూర్తిచేసిన అభ్యర్థులు ఈ కోర్సులకు అర్హులు. పెరిగిన ఇంటర్నెట్‌ వినియోగం దృష్ట్యా ఉద్యోగావకాశాలు మెండుగా ఉన్నాయి. లా ఫర్మ్స్‌, కార్పొరేట్‌, ఇన్‌కం టాక్స్‌ సంస్థల్లో ఉద్యోగావకాశాలు ఉంటాయి.

ఇంటర్‌ (సీఈసీ) పూర్తిచేశాను. ఏర్‌పోర్ట్‌ గ్రౌండ్‌ హ్యాండ్లింగ్‌ లేదా ఏర్‌ టికెటింగ్‌ చేయాలనుంది. వీటిలో ఏది మేలు? ఉద్యోగావకాశాలు ఎలా ఉంటాయి? ఈ కోర్సులను అందించే కళాశాలల వివరాలను తెలపండి.

ఏర్‌పోర్ట్‌ గ్రౌండ్‌ హాండ్లింగ్‌, ఏర్‌ టికెటింగ్‌లకు తమదైన ప్రత్యేకతలు ఉన్నాయి. రెండు కోర్సులూ విమానయాన సేవలను అందిస్తున్నాయి. కాబట్టి, రెండింటిలో మీ ఆసక్తిమేరకు ఎంచుకోండి. ఏర్‌పోర్ట్‌ గ్రౌండ్‌ హాండ్లింగ్‌ కోర్సు ముఖ్యంగా విమానాశ్రయ అంతర్జాతీయ స్థాయి పర్యావరణాల్లో పనిచేయడానికి, ప్రపంచ నలుమూలలా ఉండే ప్రజలను కలుసుకుని, సాయం చేయడానికి ఇష్టపడే అభ్యర్థుల కోసం రూపొందించారు.
ఏర్‌ టికెటింగ్‌ ప్రధానంగా విమానాల బుకింగ్‌, టికెట్‌ రిజర్వేషన్‌, ప్రయాణ ప్రణాళికను రూపొందించడం, ప్రయాణికులకు అవసరమైన ఏర్పాట్లను చేయడం లాంటి నైపుణ్యాలను అలవరచుకోవడం వంటివాటితో కూడి ఉంటుంది. ఐఏటీఏ (ఇంటర్నేషనల్‌ ఏర్‌ ట్రాన్స్‌పోర్ట్‌ అసోసియేషన్‌) జీఎంఆర్‌ వారు నాలుగు నెలల వ్యవధిగల సర్టిఫికెట్‌ ఇన్‌ ఏర్‌పోర్ట్‌ ఆపరేషన్స్‌, గ్రౌండ్‌ హాండ్లింగ్‌ డిప్లొమా ఇన్‌ ఏర్‌ టికెటింగ్‌ కోర్సులను అందిస్తున్నారు.

బయాలజీలో దూరవిద్య ద్వారా డిగ్రీ (మూడో సంవత్సరం) చదువుతున్నాను. ఎంఎస్‌సీ జియాలజీ రెగ్యులర్‌ విధానంలో చేయాలనుంది. దీంతోపాటు జియోలాజికల్‌ సర్వే ఆఫ్‌ ఇండియా నిర్వహించే పరీక్షలకూ సిద్ధమవాలనుకుంటున్నాను. వీటికి సంబంధించి ఏవైనా శిక్షణ సంస్థలున్నాయా? ఉద్యోగాన్ని అందించే ఇతర పరీక్షల వివరాలూ తెలపండి.

డిగ్రీ దూరవిద్యలో అభ్యసించినవారు రెగ్యులర్‌గా పీజీ చదవడానికి ఎలాంటి అవరోధం లేదు. కానీ, ఎంఎస్‌సీ (జియాలజీ) చేయాలనుకునే వారు బీఎస్‌సీ (జియాలజీ) పూర్తిచేసి ఉండాలి. కొన్ని విశ్వవిద్యాలయాలు బీఎస్‌సీలో జియాలజీని ఒక సబ్జెక్టుగా మూడు సంవత్సరాలు చదివినవారికీ అవకాశం కల్పిస్తున్నాయి. యూనివర్సిటీ ఆఫ్‌ పుణె, దిల్లీ యూనివర్సిటీ, మణిపాల్‌ ఇన్‌స్టిట్యూట్‌ ఆఫ్‌ టెక్నాలజీ ఇలా అందిస్తున్న వాటిలో ఉన్నాయి. దిల్లీ, హైదరాబాద్‌, ముంబయి నగరాల్లోని కొన్ని ప్రైవేటు సంస్థలు జియోలాజికల్‌ సర్వే ఆఫ్‌ ఇండియా నిర్వహించే పరీక్షలకు సంబంధించిన శిక్షణను అందిస్తున్నాయి. డిగ్రీ పూర్తిచేశారు కాబట్టి పబ్లిక్‌ సర్వీస్‌ నియామక పరీక్షలు, స్టాఫ్‌ సెలక్షన్‌ కమిషన్‌, యూపీఎస్‌సీ నిర్వహించే పరీక్షలు, బ్యాంకు పరీక్షలకూ దరఖాస్తు చేసుకోవచ్చు. జియాలజీ పీజీ ఉత్తీర్ణులైనవారు ప్రభుత్వ, ప్రైవేటు సంస్థల్లో జియో ఫిజిసిస్ట్‌, జియాలజిస్ట్‌, రిసెర్చ్‌ అసోసియేట్‌, మేనేజర్‌- మైనింగ్‌ లాంటి ఉద్యోగాలకు దరఖాస్తు చేసుకోవచ్చు.

డిప్లొమా (ఈఈఈ) 80%తో పూర్తిచేశాను. ఆర్థిక అననుకూల పరిస్థితుల కారణంగా బీటెక్‌ చేయలేకపోతున్నాను. వన్‌ సిట్టింగ్‌లో బీటెక్‌ పరీక్షలు రాస్తే, నాకు బీటెక్‌ అర్హత ఉన్నట్లేనా? బీటెక్‌ అర్హతగా ఉన్న ఉద్యోగాలకు నేను దరఖాస్తు చేసుకోవచ్చా?

వన్‌ సిట్టింగ్‌లో డిగ్రీ లేదా బీటెక్‌ చేయడం అసలు అందుబాటులో లేదు. ఏదైనా ఇన్‌స్టిట్యూట్‌ లేదా కళాశాల ఇలా అందించినా దానివల్ల విద్య, ఉద్యోగపరంగా మీకు ఎలాంటి ప్రయోజనం ఉండదు. బీటెక్‌ అర్హత సాధించాలంటే మీరు రెగ్యులర్‌ విధానంలోనే చదవాల్సి ఉంటుంది. అలాకాని పక్షంలో దూరవిద్యలో ఇన్‌స్టిట్యూషన్స్‌ ఆఫ్‌ ఇంజినీర్స్‌ (ఐఈ) వారు అందిస్తున్న ఏఎంఐఈ కోర్సును ఎంచుకోవచ్చు. బీటెక్‌కు సమాన అర్హతగా ఈ కోర్సును పరిగణిస్తారు. అప్పుడు బీటెక్‌ అర్హతగా ఉన్న ఉద్యోగాలకూ మీరు దరఖాస్తు చేసుకోవచ్చు.

ఇంటర్‌ పూర్తి చేశాక గ్రూప్‌ 4 రాసి, ఆర్‌ అండ్‌ బీలో జూనియర్‌ అసిస్టెంటుగా పని చేస్తున్నా. దూరవిద్య ద్వారా బీటెక్‌ సివిల్‌ ఇంజినీరింగ్‌ చేయాలని ఉంది. ఏ విశ్వవిద్యాలయాలయినా ఈ అవకాశం కల్పిస్తున్నాయా?

ఉద్యోగం చేస్తూ మీ విద్యార్హతను పెంచుకోవాలనే ఆలోచనకు అభినందనలు. బీఈ లేదా బి.టెక్‌ లాంటి ప్రొఫెష్నల్‌ కోర్సులను రెగ్యులర్‌గా అభ్యసించడం అనేది శ్రేయస్కరం. మీ విషయంలో రెగ్యులర్‌ విద్య అభ్యసించడం కుదరదు కాబట్టి మీరు ఇన్‌స్టిట్యూషన్‌ ఆఫ్‌ ఇంజినీర్‌ వారు అందిస్తున్నటువంటి ఎ.ఎం.ఐ.ఇ. లేదా ఐ.ఇ.టి.ఇ. వారి ఎ.ఎం.ఐ.ఇ.టి.ఇ కోర్సులను ఎంచుకోవచ్చు. 10+2 లేదా, డిప్లొమా చేసినవారు ఈ కోర్సు చేయడానికి అర్హులు.
ఇన్‌స్టిట్యూషన్‌ ఆఫ్‌ ఇంజినీర్స్‌ వారు ఎ.ఎం.ఐ.ఇ కోర్సును పదకొండు స్పెషలైజేషన్స్‌లో అందిస్తున్నారు. మీరు కోరుకున్నటువంటి సివిల్‌ ఇంజినీరింగ్‌ కూడా ఈ స్పెషలైజేషన్‌లో ఉంది. సెక్షన్‌ ఎ. సెక్షన్‌ బి కింద ఈ కోర్సును రూపొందించారు. మొత్తం 19 సబ్జెక్టులు, ల్యాబ్‌ పరీక్షలో ఉత్తీర్ణులు కావాలి.
ఉత్తీర్ణత సాధించిన వారు అసోసియేట్‌ మెంబర్‌ ఇన్‌ ఇన్‌స్టిట్యూషన్‌ ఆఫ్‌ ఇంజినీర్స్‌గా నమోదవుతారు. ఆరు సంవత్సరాల వ్యవధిలో ఈ కోర్సును పూర్తి చేయాలి. ఏటా జూన్‌, డిసెంబరు నెలల్లో పరీక్షలు జరుగుతాయి. సంవత్సరం పొడుగునా అడ్మిషన్‌ కోసం దరఖాస్తు చేసుకోవచ్చు. మరిన్ని వివరాలకు www.ieindia.org ని సందర్శించండి. ఐ.ఇ.టి.ఇ ఇన్‌స్టిట్యూషన్‌ ఆఫ్‌ ఎలక్ట్రానిక్స్‌ అండ్‌ టెలికమ్యూనికేషన్‌ ఇంజినీర్స్‌ వారు ఎ.ఎం.ఐ.ఇ.టి.ఇ కోర్సును అందిస్తున్నారు. జూన్‌ నెలలో పరీక్ష కొరకు ఫిబ్రవరి లోగా, డిసెంబర్‌ నెల పరీక్ష కొరకు ఆగస్టు లోగా దరఖాస్తు చేసుకోవాలి. అయిదు సంవత్సరాల వ్యవధిలో కోర్సును పూర్తి చేయాలి.
పైన పేర్కొన్న రెండు కోర్సులు రెగ్యులర్‌ మోడ్‌లో బి.టెక్‌తో తత్సమాన అర్హతగా పరిగణిస్తారు. ప్రభుత్వ, ప్రైవేటు రంగాల్లో ఉద్యోగావకాశాలకు అర్హత కల్పిస్తాయి. ఉన్నత చదువులు అభ్యసించడానికి కూడా తోడ్పడతాయి.

హాస్పిటాలిటీ/ హోటల్‌ మేనేజ్‌మెంట్‌లో ఎంబీఏ చేయాలని ఉంది. దూరవిద్య/ కరస్పాండెన్స్‌లో ఈ కోర్సును అందించే విశ్వవిద్యాలయాలేవి?

పర్యటక రంగ అభివృద్ధి ప్రపంచవ్యాప్తంగా మంచి ఉద్యోగావకాశాలను కల్పిస్తోంది. హాస్పిటాలిటీ/ హోటల్‌ మేనేజ్‌మెంట్‌ ఎంబీఏ చేయాలనుకునే అభ్యర్థులు ఏదేని డిగ్రీలో ఉత్తీర్ణులై ఉండాలి. ఈ కోర్సును దూరవిద్య ద్వారా కాకుండా రెగ్యులర్‌ విధానంలో అభ్యసించడం మంచిది. ఫలితంగా వృత్తిపరమైన నైపుణ్యాలు, సాఫ్ట్‌స్కిల్స్‌ను అభివృద్ధి చేసుకోవడం ద్వారా మంచి ఉద్యోగావకాశాలను అందిపుచ్చుకోవచ్చు.
ఏదైనా దూరవిద్య కోర్సును అభ్యసిం ముందు ఆ కోర్సును అందించే విశ్వవిద్యాలయం, సంబంధిత కోర్సుకు డిఫెన్స్‌ ఎడ్యుకేషన్‌ కౌన్సిల్‌ (డీఈసీ), యూజీసీ అనుమతి ఉందో లేదో తెలసుకోవాలి. అనుమతి ఉన్న విశ్వవిద్యాలయ కోర్సును మాత్రమే ఎంచుకోవాలి. ఇందిరాగాంధీ ఓపెన్‌ యూనివర్సిటీ (ఇగ్నో) వారు ఫెడరేషన్‌ ఆఫ్‌ హోటల్స్‌ అండ్‌ రెస్టారెంట్స్‌ ఆఫ్‌ ఇండియా (ఎఫ్‌హెచ్‌ఆర్‌ఏఐ) వారి సౌజన్యంతో ఎంబీఏ హెచ్‌ఎం కోర్సును దూరవిద్య విధానంలో అందిస్తున్నారు.
సింబయాసిస్‌, సిక్కిం మణిపాల్‌ యూనివర్సిటీల వారు పోస్ట్‌ గ్రాడ్యుయేట్‌ డిప్లొమా ఇన్‌ హోటల్‌ మేనేజ్‌మెంట్‌, హాస్పిటాలిటీ మేనేజ్‌మెంట్‌ కోర్సులను అందిస్తున్నారు.