close
eenadupratibha.net
about tariff Contact
Skip Navigation Links
Pratibha Engineering

ప్రధాన కథనాలు
సెప్టెంబరు 7న క్లాట్‌

ఈనాడు, హైదరాబాద్‌: న్యాయ విద్య కోర్సుల్లో ప్రవేశానికి నిర్వహించే కామన్‌ లా అడ్మిషన్‌ టెస్టు (క్లాట్‌)ను సెప్టెంబరు 7వ తేదీన నిర్వహించాలని అధికారులు నిర్ణయించారు. కరోనా కారణంగా నాలుగుసార్లు పరీక్షను వాయిదా వేసిన దేశంలోని 22 న్యాయ విశ్వవిద్యాలయాల కన్సార్టియం ఆన్‌లైన్‌ పరీక్ష జరిగే తాజా తేదీని వెల్లడించింది. 7న‌ మధ్యాహ్నం 2 గంటల నుంచి సాయంత్రం 4 గంటల వరకు పరీక్ష జరగనుంది. ఈసారి సుమారు 77 వేల మంది దరఖాస్తు చేయగా, వీరిలో ఇంటర్‌ ఎంపీసీ గ్రూపు విద్యార్థులు కూడా ఉంటారు. జేఈఈ మెయిన్‌ సెప్టెంబరు 1 నుంచి 6వ తేదీ వరకు జరగనుంది. మెయిన్‌ రాసిన ఎంపీసీ విద్యార్థులు మరుసటి రోజే క్లాట్‌ రాయాల్సి ఉంటుంది.

9 నుంచి ఎంసెట్‌
* ఆగస్టు 31న ఈసెట్‌.. సెప్టెంబరు 2న పాలిసెట్‌
* 17 నుంచి ఇంటర్‌కు.. 20 నుంచి బడి పిల్లలకు డిజిటల్‌ పాఠాలు
* 20 నుంచి దోస్త్‌ ద్వారా డిగ్రీ ప్రవేశాలు
* మంత్రి సబితారెడ్డితో అధికారుల సమావేశం
ఈనాడు - హైదరాబాద్‌: పాఠశాలల విద్యార్థులకు డిజిటల్‌ తరగతులు ఎప్పుడు మొదలవుతాయి?...ఆగిపోయిన ఎంసెట్‌, ఇతర ప్రవేశ పరీక్షలు మళ్లీ జరిగేదెన్నడు?...ఇంటర్‌ ప్రవేశాలకు ఎప్పటి నుంచి శ్రీకారం చుడతారు?.. దోస్త్‌ ద్వారా డిగ్రీ కోర్సుల్లో ప్రవేశాలకు ముహూర్తం ఎప్పుడు?...ఇలాంటి ప్రశ్నలకు ప్రభుత్వం సోమవారం స్పష్టత ఇచ్చింది. విద్యాసంస్థలు ఎప్పటి నుంచి తెరుచుకుంటాయన్న దానిపై మాత్రం స్పష్టత ఇవ్వకున్నా డిజిటల్‌ తరగతుల మొదలు, ప్రవేశ పరీక్షల తేదీలు, ప్రవేశాలకు ముహూర్తాలు ఖరారు చేసింది. ఇప్పటివరకు స్తబ్ధంగా ఉన్న విద్యార్థి లోకంలో కదలిక తెచ్చింది. విద్యాశాఖ ప్రత్యేక ప్రధాన కార్యదర్శి చిత్రా రామచంద్రన్‌, ఉన్నత విద్యామండలి ఛైర్మన్‌ పాపిరెడ్డి, సాంకేతిక విద్యాశాఖ కమిషనర్‌ నవీన్‌ మిత్తల్‌, ఇంటర్‌ విద్యాశాఖ కమిషనర్‌ జలీల్‌, పాఠశాల విద్యాశాఖ సంచాలకురాలు శ్రీదేవసేన ఆగ‌స్టు 10న‌ విద్యాశాఖ మంత్రి సబితా ఇంద్రారెడ్డితో సమావేశమయ్యారు.
ఈ సందర్భంగా పలు అంశాలపై చర్చించి కీలక నిర్ణయాలు తీసుకున్నారు. 4 రోజులపాటు ఎంసెట్‌ ఇంజినీరింగ్‌ సెప్టెంబరు 9, 10, 11, 14 తేదీల్లో ఎంసెట్‌ ఇంజినీరింగ్‌ ఆన్‌లైన్‌ పరీక్షలు జరుగుతాయి. అగ్రికల్చర్‌ విభాగం పరీక్షలు ఎప్పుడన్నది ఇంకా ఖరారు చేయలేదు. ఆన్‌లైన్‌ పరీక్షలు కావడం, సెప్టెంబరులోనే నీట్‌ ఉండటం, ఏపీ పరీక్షలు కూడా అదే నెలలో జరుపుతామని అక్కడి ప్రభుత్వం ప్రకటించినందున త్వరలో తేదీలను ఖరారు చేయనున్నారు. ఆగస్టు 31న ఈసెట్‌, సెప్టెంబరు 2వ తేదీన పాలిసెట్‌ జరపాలని నిర్ణయించారు. సెప్టెంబరులోపే దాదాపు అన్ని పరీక్షలు జరిపేలా ప్రయత్నిస్తామని, వీలుకాకుంటే పీఈసెట్‌ (వ్యాయామ విద్య)ను మాత్రం అక్టోబరులో నిర్వహించే అవకాశం ఉందని ఉన్నత విద్యామండలి ఛైర్మన్‌ పాపిరెడ్డి చెప్పారు.
6-10 తరగతులకు 20 నుంచి డిజిటల్‌ పాఠాలు
ప్రభుత్వ పాఠశాలల్లో చదివే 6-10 తరగతుల విద్యార్థులకు ఆగ‌స్టు 20 నుంచి టీశాట్‌ ఛానెళ్లు, దూరదర్శన్‌ యాదగిరి ఛానెల్‌ ద్వారా రికార్డు చేసిన పాఠాల ప్రసారాన్ని (డిజిటల్‌ పాఠాలు) ప్రారంభిస్తారు. 3-5 తరగతులకు సెప్టెంబరు 1 నుంచి డిజిటల్‌ పాఠాలు మొదలవుతాయి. వీరికి రికార్డు చేసిన పాఠాలు కాకుండా ప్రత్యక్ష (లైవ్‌) పాఠాలను బోధిస్తారు. అంటే ఉపాధ్యాయులు టీవీ స్టూడియోలకు వెళ్లి తరగతి గదిలో మాదిరిగా బోధిస్తుంటే దాన్ని ప్రసారం చేస్తారు. 1, 2 తరగతులకు పాఠాలపై ఇంకా నిర్ణయం తీసుకోలేదు. చిన్న పిల్లలైనందున వారికి డిజిటల్‌ పాఠాలు ఉండకపోవచ్చని భావిస్తున్నారు. ఏ తరగతికి ఎన్ని గంటలపాటు తరగతులు ఉంటాయన్నది రెండు రోజుల్లో ఖరారు చేస్తారు. ప్రైవేట్‌ పాఠశాలల్లో జరుగుతున్న ఆన్‌లైన్‌ పాఠాలకు సంబంధించి గరిష్ఠ సమయం, ఇతర నిబంధనలను కూడా త్వరలో జారీ చేయనున్నారు. ఇటీవల కేంద్ర ప్రభుత్వం ఆన్‌లైన్‌ తరగతులపై ఇచ్చిన మార్గదర్శకాలనే అనుసరించనున్నారు. విద్యా సంవత్సరం నష్టపోకుండా...విద్యా నాణ్యత తగ్గకుండా అవసరమైన అన్ని చర్యలను ప్రభుత్వం తీసుకుంటుందని మంత్రి సబితా ఇంద్రారెడ్డి తెలిపారు.
17 నుంచి విధుల్లోకి ఉపాధ్యాయులు...
డిజిటల్‌ తరగతులు మొదలవుతున్నందున ఆగ‌స్టు 17 నుంచి ప్రతిరోజూ సగం మంది ఉపాధ్యాయులు పాఠశాలల విధులకు హాజరుకావాలి. ఒక రోజు సగం మంది మరుసటి రోజు సగం మంది వెళ్లాల్సి ఉంటుంది. వారు విద్యార్థులకు వాట్సప్‌ ద్వారా అసైన్‌మెంట్లు పంపడం, టీసీలు, ఇతర రికార్డులను పూర్తి చేయడం తదితర కార్యక్రమాలను పూర్తి చేయాలి. విద్యార్థుల ఇళ్లలో టీవీలు లేకుంటే పక్కింటికి వెళ్లడం లేదా పాఠశాలలకు వెళ్లి హాజరయ్యేలా ప్రణాళిక రూపొందిస్తున్నారు. సమావేశంలో పాఠశాల విద్యాశాఖ అదనపు సంచాలకులు శ్రీహరి, రమణకుమార్‌ తదితరులు పాల్గొన్నారు.
17 నుంచి ఇంటర్‌ విద్యార్థులకూ డిజిటల్‌ పాఠాలు
రాష్ట్రంలోని 404 ప్రభుత్వ జూనియర్‌ కళాశాలల్లో చదివే ఇంటర్‌ ద్వితీయ సంవత్సరం విద్యార్థులకు ఆగ‌స్టు 17 నుంచి డిజిటల్‌ తరగతులు ప్రారంభించనున్నారు. టీవీలతోపాటు యూట్యూబ్‌ ఛానెల్‌ ద్వారా పాఠాలను ప్రసారం చేస్తారు. ఇంటర్‌ ప్రథమ సంవత్సరంలో ప్రవేశాలను సెప్టెంబరు 1వ తేదీ తర్వాత చేపట్టాలని నిర్ణయించారు. 12న డిగ్రీ కాలపట్టిక విడుదల డిగ్రీ కోర్సుల్లో ప్రవేశానికి ఆగ‌స్టు 20 నుంచి రిజిస్ట్రేషన్‌ ప్రక్రియ మొదలుపెట్టాలని నిర్ణయించారు. ఆగ‌స్టు 12న పూర్తి కాలపట్టికను విడుదల చేస్తారు. ఇప్పటివరకు 30 శాతం యాజమాన్య కోటా, 10 శాతం ఆర్థికంగా బలహీన వర్గాలకు (ఈడబ్ల్యూఎస్‌) కోటాపై ప్రభుత్వం జీఓ జారీ చేయనందున ఈసారి దోస్త్‌లో అవి అమలవుతాయా అన్నది సందిగ్ధంగా ఉంది.
ఆగ‌స్టు 20 నుంచి డిజిట‌ల్ త‌ర‌గ‌తులు
* సెప్టెంబ‌రులో ఎంసెట్ నిర్వ‌హించే యోచ‌న‌
* ప్ర‌వేశ ప‌రీక్ష‌లు, ప‌రీక్ష‌లు, విద్యా సంవ‌త్సరంపై కీల‌క స‌మీక్ష‌
* తెలంగాణ విద్యాశాఖ మంత్రి స‌బితా ఇంద్రారెడ్డి
హైదరాబాద్‌: ఆగ‌స్టు 20 నుంచి ప్రభుత్వ పాఠశాలల విద్యార్థులకు డిజిటల్‌ తరగతులు ప్రారంభమవుతాయని తెలంగాణ విద్యాశాఖ మంత్రి సబితా ఇంద్రా రెడ్డి తెలిపారు. 6 నుంచి 10వ తరగతి విద్యార్థులకు దూరదర్శన్‌, టీశాట్‌ ద్వారా తరగతులు నిర్వహిస్తామన్నారు. ఆగ‌స్టు 10న‌ ఆమె విద్యాశాఖ ఉన్నతాధికారులతో సమావేశమయ్యారు. ప్రవేశ పరీక్షలు, పరీక్షలు, విద్యా సంవత్సరంపై కీలకంగా సమీక్షించారు. అనంతరం ఆమె మాట్లాడుతూ.. సెప్టెంబర్‌ 1 నుంచి 3-5 తరగతుల విద్యార్థులకు డిజిటల్‌ తరగతులు ఉంటాయన్నారు. ఆగ‌స్టు 17 నుంచి ఇంటర్‌ విద్యార్థులకు ఆన్‌లైన్‌ తరగతులు నిర్వహిస్తామన్నారు. సెప్టెంబర్‌ 1 తర్వాత ఇంటర్‌ ప్రవేశాల ప్రక్రియ ఉంటుందని చెప్పారు. ఆగ‌స్టు 31న ఈ సెట్‌, సెప్టెంబర్‌ 2న పాలిసెట్‌ నిర్వహిస్తామని తెలిపారు. అలాగే, సెప్టెంబర్‌ 9, 10, 11, 14న ఎంసెట్‌ నిర్వహించాలని భావిస్తున్నట్టు మంత్రి వెల్లడించారు.
హైకోర్టు అనుమతిస్తే ప్రవేశ పరీక్షలు నిర్వహించేందుకు సిద్ధంగా ఉన్నామని తెలంగాణ ఉన్నత విద్యా మండలి ఛైర్మన్‌ ఆచార్య పాపిరెడ్డి అన్నారు. ఇప్పటికే ఎంసెట్‌ సహా ఇతర కోర్సుల్లో ప్రవేశాలకు ఎంట్రన్స్‌ పరీక్షల నిర్వహణకు ఉన్నత విద్యామండలి షెడ్యూల్‌ ప్రకటించినప్పటికీ కరోనా విజృంభణతో అవన్నీ వాయిదా పడుతూ వస్తున్న విషయం తెలిసిందే. దీంతో ఈ వైరస్‌ వ్యాప్తి ఎప్పుడు తగ్గుముఖం పడుతుందో, పరీక్షలు ఎప్పుడు జరుగుతాయో అనే ఆందోళనతో విద్యార్థులు, తల్లిదండ్రులు ఎదురుచూస్తున్నారు.
పరీక్షలు నిర్వహించాల్సిందే
* తేల్చి చెప్పిన యూజీసీ
* డిగ్రీలను గుర్తించబోమని హెచ్చరిక
దిల్లీ: దేశంలో కరోనా వైరస్‌ వ్యాప్తి ఉధృతంగా ఉన్నప్పటికీ, చివరి సంవత్సరం విద్యార్థులకు పరీక్షల నిర్వహణ తప్పనిసరి అని.. యూనివర్సిటీ గ్రాంట్స్‌ కమిషన్ (యూజీసీ) స్పష్టం చేసింది. అలా కాని పక్షంలో సదరు డిగ్రీలను గుర్తించబోమని కూడా హెచ్చరించింది. వివరాలు ఇలా ఉన్నాయి... డిగ్రీ, పీజీ చివరి సంవత్సర విద్యార్థులకు సెప్టెంబరు 30 లోగా పరీక్షలు నిర్వహించాలని యూజీసీ, విశ్వవిద్యాలయాలకు ఆదేశాలు జారీచేసిన సంగతి తెలిసిందే. కాగా, కొవిడ్‌-19 నేపథ్యంలో చివరి సంవత్సరం పరీక్షలు కూడా రద్దు చేయాలని దిల్లీ, మహారాష్ట్ర విశ్వవిద్యాలయాలు నిర్ణయించుకున్నాయి. ఈ మేరకు సుప్రీం వద్ద అఫిడవిట్‌ను దాఖలు చేశాయి. అంతేకాకుండా, కమిషన్‌ ఆదేశాలను సవాలు చేస్తూ సుప్రీంకోర్టులో పలు కేసులు నమోదయ్యాయి. ఈ అంశంపై విచారణను జస్టిస్‌ అశోక్‌ భూషణ్‌ నేతృత్వంలోని సుప్రీంకోర్టు ధర్మాసనం చేపట్టింది.
ఈ నేపథ్యంలో, పరీక్షలను రద్దు చేయటం విద్యార్థులకు మేలు చేయదని.. యూజీసీ తరపున సొలిసిటర్ జనరల్‌ తుషార్‌ మెహతా సర్వోన్నత న్యాయస్థానానికి ఆగ‌స్టు 10న‌ విన్నవించారు. కాగా, కమిషన్‌ నిర్ణయం రాజ్యాంగం, చట్టానికి అనుగుణంగా లేదని ఆయా విశ్వవిద్యాలయాలు వాదించాయి. ఈ అంశంపై ప్రత్యుత్తరమిచ్చేందుకు కమిషన్‌కు వ్యవధినివ్వాల్సిందిగా తుషార్‌ మెహతా కోర్టును కోరారు. ఇందుకు సమ్మతించిన సర్వోన్నత న్యాయస్థానం, కేసు విచారణను ఆగ‌స్టు 14కు వాయిదా వేసింది.
అవుతారా బ్యాంకు అధికారి?
ప్రభుత్వోద్యోగాల పోటీపరీక్షలు రాసేవారు ఎంతో ఆసక్తిగా ఎదురుచూసే ఐబీపీఎస్‌ పీఓ నోటిఫికేషన్‌ విడుదలైంది. డిగ్రీ అర్హతతో ఈ పోస్టులకు పోటీ పడవచ్చు. ఎస్‌బీఐ మినహా ఇతర ప్రభుత్వ బ్యాంకుల్లో 1417 ప్రొబేషనరీ ఆఫీసర్ల/ మేనేజ్‌మెంట్‌ ట్రెయినీల భర్తీకే ఈ ప్రకటన! వీటికి నిర్వహించే రాతపరీక్షకు ఎలా సంసిద్ధమవ్వాలో నిపుణుల సూచనలు...
ప్రొబేషనరీ ఆఫీసర్‌ అంటే అసిస్టెంట్‌ మేనేజర్‌గా పిలిచే స్కేల్‌-1 అధికారి. అర్హత పరీక్ష ద్వారా ఎంపికైనవారికి రెండేళ్లపాటు శిక్షణ ఇస్తారు. ఈ శిక్షణ సమయంలో వారిని ప్రొబేషనరీ ఆఫీసర్లుగా పిలుస్తారు. విజయవంతంగా శిక్షణ పూర్తిచేసుకున్న అభ్యర్థులను స్కేల్‌-1 అధికారులుగా నియమిస్తారు. పీఓలకు నెలకు దాదాపు 40 వేల వేతనం ఉంటుంది. ఫాస్ట్‌ట్రాక్‌ ప్రమోషన్‌ పద్ధతుల ద్వారా పదోన్నతులూ త్వరగా లభిస్తాయి.
ఐబీపీఎస్‌ ప్రకటనలో కేవలం నాలుగు బ్యాంకుల ఖాళీల వివరాలే ఉన్నాయి. మిగతా బ్యాంకుల్లో ఖాళీల వివరాలను పేర్కొనలేదు. కాబట్టి, నియామక సమయానికి (ఏప్రిల్‌ 1, 2021- మార్చి 31, 2022) ఈ సంఖ్య మరింతగా పెరగనుంది. ఆన్‌లైన్‌లో జరిగే ప్రిలిమినరీ (అర్హత పరీక్ష), మెయిన్‌ పరీక్ష, ఆపై ఇంటర్వ్యూల ద్వారా అభ్యర్థులను ఎంపిక చేస్తారు.
గత ఏడాదితో పోలిస్తే రాతపరీక్ష విధానంలో మార్పేమీ లేదు. ప్రిలిమ్స్, మెయిన్స్‌ పరీక్షల్లో ఉండే మొత్తం సమయాన్ని ప్రతి విభాగానికీ విడివిడిగా కేటాయించారు. ఆ నిర్ణీత సమయంలోనే ఆ విభాగాన్ని పూర్తిచేయాలి. అలాగే ప్రతి విభాగానికీ విడివిడిగా కటాఫ్‌ మార్కులు ఉంటాయి.
ప్రిలిమ్స్‌లో ఏవి ముఖ్యం?
మూడు సబ్జెక్టులు- క్వాంటిటేటివ్‌ ఆప్టిట్యూడ్, రీజనింగ్, ఇంగ్లిష్‌ ఉన్నాయి. గత ఏడాది నిర్వహించిన పరీక్షలో వీటిలో ఏయే అంశాల నుంచి ప్రశ్నలు వచ్చాయో పరిశీలిస్తే వేటిపై దృష్టిపెట్టాలో అర్థమవుతుంది. క్వాంటిటేటివ్‌ ఆప్టిట్యూడ్‌లో నంబర్‌ సిరీస్‌ (5-6 ప్రశ్నలు), క్వాడ్రాటిక్‌ ఈక్వేషన్స్‌ (4-6), సింప్లిఫికేషన్స్‌ (5), డేటా ఇంటర్‌ప్రిటేషన్‌ (12-15), ఇతర అరిథ్‌మెటిక్‌ ప్రశ్నల (10-12)ను ఆశించవచ్చు (వివిధ రోజుల్లో వివిధ షిప్టుల్లో నిర్వహించిన పరీక్షలు, వాటిలో వచ్చిన వచ్చిన కనీస, గరిష్ఠ ప్రశ్నల సంఖ్యను బ్రాకెట్లలో గమనించవచ్చు).
రీజనింగ్‌లో పజిల్స్‌/ సీటింగ్‌ అరేంజ్‌మెంట్‌ (18-19), కోడింగ్‌- డీకోడింగ్‌ (4-5), సిలాజిజమ్‌ (3-5), ఇన్‌ఈక్వాలిటీస్‌ (4-5), బ్లడ్‌ రిలేషన్స్‌ (3), డైరెక్షన్స్‌ (3), ఆర్డర్‌ ర్యాంకింగ్‌ (1-2), లెటర్‌/ నంబర్‌ సిరీస్‌ (2-3) చూసుకోవాలి.
ఇంగ్లిష్‌లో.. రీడింగ్‌ కాంప్రహెన్షన్‌ (7-8), క్లోజ్‌ టెస్ట్‌ (6), ఫిల్‌ ఇన్‌ ద బ్లాంక్స్‌ (3-6), స్పాటింగ్‌ ఎర్రర్స్‌ (5-7), వర్డ్‌ రిప్లేస్‌మెంట్‌ (3-6), ఫ్రేజ్‌ రిప్లేస్‌మెంట్‌ (3), పారా జంబుల్డ్‌ (5), ఇతర మోడల్స్‌ (3-4) అంశాలను చూసుకోవాలి.
మెయిన్స్‌కు ఇవి అదనం
మెయిన్స్‌లో క్వాంటిటేటివ్‌ ఆప్టిట్యూడ్‌లో అదనంగా డేటా సఫిషియన్సీ, క్వాంటిటీ ఆధారిత ప్రశ్నలుంటాయి. అలాగే ప్రశ్నల కఠినత్వంలో తేడా ఉంటుంది. ముఖ్యంగా డేటా ఇంటర్‌ప్రిటేషన్‌ ప్రశ్నలు హెచ్చు స్థాయిలో ఉంటాయి.
రీజనింగ్‌లో లాజికల్‌/ అనలిటికల్‌ రీజనింగ్‌ అంశాలు అదనంగా ఉంటాయి. ఇన్‌పుట్‌-అవుట్‌పుట్, స్టేట్‌మెంట్‌- ఇన్‌ఫరెన్స్‌/ కన్‌క్లూజన్స్‌/ కోర్సెస్‌ ఆఫ్‌ యాక్షన్‌/ అసంప్షన్స్, కాజ్‌-ఎఫెక్ట్, డేటా సఫిషియన్సీలు ఉంటాయి. ఇదే విభాగంలో కంప్యూటర్‌ నాలెడ్జ్‌ ప్రశ్నలూ ఉంటాయి.
ఇంగ్లిష్‌లో అదనంగా కొత్త మోడల్‌ ప్రశ్నలు అడిగే అవకాశం ఉంది. గ్రామర్‌పై పట్టు ఉంటే వీటిని తేలికగా సాధించవచ్చు. అదేవిధంగా డిస్క్రిప్టివ్‌ కూడా ఉంటుంది. లెటర్‌ రైటింగ్, ఎస్సే రైటింగ్‌ ఉంటాయి.
వీటితోపాటు జనరల్‌ అవేర్‌నెస్‌ విభాగం అదనంగా ఉంటుంది. దానిలో బ్యాంకింగ్, ఫైనాన్షియల్‌ అవేర్‌నెస్, స్టాటిక్‌ జీకే, కరెంట్‌ అఫైర్స్‌ నుంచీ ప్రశ్నలు వస్తాయి. ప్రిలిమ్స్, మెయిన్స్‌ల్లో ఉమ్మడిగా ఉన్నవాటికి, అదనపు వాటికి ప్రణాళిక వేసుకుని, సన్నద్ధమవ్వాలి.
* ప్రిలిమ్స్‌లో ప్రశ్నల స్థాయి తేలిక నుంచి మధ్యస్థంగా; మెయిన్స్‌లో మధ్యస్థం నుంచి హెచ్చు స్థాయిలో ఉంటుంది.
* ప్రశ్నలను నిర్ణీత సమయంలోగా సాధించడం చాలా ముఖ్యం. మాదిరి ప్రశ్నపత్రాలు అందుకు సాయం చేస్తాయి.
* వేగం, కచ్చితత్వం, నిలకడతనం ఐబీపీఎస్‌ పరీక్షలో చాలా ముఖ్యం. వీటిని దృష్టిలో ఉంచుకుని సాధన చేయాలి.
చివరి ఏడాది వారికి అవకాశం?
ఏటా నోటిఫికేషన్‌ విడుదలయ్యే సమయానికి చివరి ఏడాది విద్యార్థులకు డిగ్రీ పూర్తి అయ్యి పరీక్ష రాసే వీలుండేది. కొవిడ్‌ ప్రత్యేక పరిస్థితుల రీత్యా వారి పరీక్షలు ఇంకా పూర్తవలేదు. దీంతో ఆగస్టు 26, 2020 నాటికి డిగ్రీ పూర్తిచేసినవారు మాత్రమే దరఖాస్తు చేసే అవకాశం ఉంది. నోటిఫికేషన్‌ ప్రకారం ప్రస్తుతం చివరి ఏడాదిలో ఉన్నవారికి అవకాశం లేదు. ఐబీపీఎస్‌ దీనిపై ఏదైనా నిర్ణయం తీసుకునే అవకాశం ఉండొచ్చు.
కనీసం ఎన్ని మార్కులు?
గతంలో జరిగిన పరీక్షల్లో కటాఫ్‌ మార్కులను గమనిస్తే ప్రస్తుత పరీక్ష కటాఫ్‌ మార్కులపై అంచనా వస్తుంది. జనరల్‌ అభ్యర్థులకు 2019లో 59.75, 2018లో 56.75గా ఉంది. ప్రస్తుతం కటాఫ్‌మార్కులు 59.75 కంటే ఎక్కువగా 61-63 వరకు ఉండే అవకాశముంది. అలాగే మెయిన్స్‌ పరీక్ష కటాఫ్‌ మార్కులు జనరల్‌ అభ్యర్థులకు 225 మార్కులకుగానూ 2018లో 71.5, 2018లో 74.5గా ఉంది. అంటే 2018 కంటే 2019 కటాఫ్‌ మార్కులు తక్కువగా ఉన్నాయి. ఇందుకు పేపర్‌ కఠినత్వం, అభ్యర్థుల సంఖ్య మొదలైనవి కారణమై ఉండొచ్చు. ప్రస్తుత పరీక్షలో 74.5 కంటే ఎక్కువగా 76-77 వరకు ఉండేలా చూసుకుంటే మంచిది.
ఇవి గమనించండి
* పోస్టులు: 1417
* విద్యార్హత (ఆగస్టు 26, 2020 నాటికి): ఏదైనా డిగ్రీ
* వయసు (ఆగస్టు 1, 2020 నాటికి): జనరల్‌ అభ్యర్థులకు 20-30 ఏళ్లు
* దరఖాస్తు చివరితేదీ: ఆగస్టు 26, 2020
* ప్రిలిమ్స్‌: 3, 10, 11 అక్టోబరు, 2020
* మెయిన్స్‌: నవంబరు 28, 2020
* దరఖాస్తు ఫీజు: రూ. 850 (ఎస్‌సీ, ఎస్‌టీ, పీడబ్ల్యూబీడీ వారికి రూ.175
* వెబ్‌సైట్‌: https://www.ibps.in/
తగినంత సమయముంది
ప్రిలిమ్స్‌ పరీక్ష మూడు విభాగాల్లో పరిమిత టాపిక్స్‌ నుంచే ప్రశ్నలు ఉంటాయి. ఈ టాపిక్స్‌ అన్నిటిపై 40-50 రోజుల్లో పట్టు సాధించవచ్చు. అందుచేత మొదటిసారి పరీక్ష రాస్తున్న అభ్యర్థులు కూడా తేలికగానే ఉత్తీర్ణులు అవొచ్చు. తర్వాత మెయిన్స్‌కు కూడా తగినంత సమయం ఉన్నందున దానికీ సిద్ధం కావొచ్చు.
ప్రిలిమ్స్‌ అర్హత పరీక్ష మాత్రమే. మెయిన్స్‌లో, అందులో ఉత్తీర్ణులైనవారికి తర్వాత నిర్వహించే ఇంటర్వ్యూలో వచ్చిన మార్కుల ఆధారంగా తుది ఎంపిక ఉంటుంది. మెయిన్స్‌లోని 225 మార్కులను 80 మార్కులకూ; ఇంటర్వ్యూలోని 100 మార్కులను 20 మార్కులకూ ...ఇలా మొత్తం 100 మార్కులకు కుదించి దాని ప్రకారం వచ్చిన మార్కులను బట్టి విజేతలను ఎంపిక చేస్తారు.
మొదటిసారి పరీక్ష రాస్తున్నవారు ముందుగా పరీక్ష విధానం, సబ్జెక్టులు, సిలబస్‌పై పూర్తి అవగాహన ఏర్పరచుకోవాలి. సబ్జెక్టుల టాపిక్స్‌ అన్నింటికీ సిద్ధమవ్వాలి. వాటిలోని కాన్సెప్టులు నేర్చుకుని వివిధ రకాల ప్రశ్నలు సాధన చేయాలి. ప్రిలిమ్స్‌ పరీక్ష సమయంలోగా వాటిలోని సబ్జెక్టులు, వాటిలోని టాపిక్స్‌ అన్నింటికీ పూర్తిగా సన్నద్ధమవ్వాలి. మెయిన్స్‌లోని టాపిక్స్‌కు సమయం ఉంటే ఇప్పటి నుంచే... లేదంటే ప్రిలిమ్స్‌ తరువాత ప్రిపేర్‌ అవ్వాలి. ప్రతిరోజూ ఆన్‌లైన్‌ పద్ధతిలో మాదిరి పరీక్షలను ప్రిలిమ్స్‌ వరకూ దాని మోడల్‌లో, మెయిన్స్‌కు దాని మోడల్‌లోనూ రాస్తుండాలి.
ప్రశ్నలను నిర్ణీత సమయంలోగా సాధించడం చాలా ముఖ్యం. మాదిరి ప్రశ్నపత్రాలు అందుకు సాయం చేస్తాయి. వేగం, కచ్చితత్వం, నిలకడతనం ఈ పరీక్షలో చాలా ముఖ్యం. వాటిని దృష్టిలో ఉంచుకుని సాధన చేయాలి. ఇందుకు ప్రతిరోజూ ఎన్నిగంటలు అవసరమవుతుందో ఎవరికి వారే అంచనా వేసుకోవాలి. దానికి అనుగుణంగా ప్రణాళిక, అమలు ఉండాలి.
- డా. జి.ఎస్‌. గిరిధర్
960 మంది ఎంఎల్‌హెచ్‌పీల నియామకానికి అనుమతి
* నవంబరు 14లోగా దశల వారీగా విద్యా సంస్థలను తెరవాలి
* తుది నిర్ణయం రాష్ట్రాలదే
* మార్గదర్శకాల జారీకి కేంద్రం కసరత్తు
గుంటూరు వైద్యం, న్యూస్‌టుడే:రాష్ట్ర వ్యాప్తంగా ఆరోగ్య సంరక్షణ కేంద్రాల్లో 960 మంది మిడ్‌ లెవెల్‌ హెల్త్‌ ప్రొవైడర్‌(ఎంఎల్‌హెచ్‌పీ)ల నియామకానికి రాష్ట్ర ప్రజారోగ్య, కుటుంబ సంక్షేమ శాఖ కమిషనర్‌ భాస్కర్‌ అనుమతి మంజూరు చేశారు. జోన్‌-1 విశాఖపట్టణానికి 190, జోన్‌-2 రాజమహేంద్రవరం -267, జోన్‌-3 గుంటూరు- 218, జోన్‌-4 కడప -285 మంది ఎంపిక చేయనున్నారు. అందుబాటులో ఉన్న అభ్యర్థులను ప్రతిభ ఆధారంగా ఎంపిక చేసి ఆగ‌స్టు 11వ తేదీకి తమ కార్యాలయానికి సమర్పించాలని సూచించారు. ఎంపికైన వారికి ఆర్నెలు ఇగ్నో కేంద్రాల్లో శిక్షణ ఇవ్వనున్నారు.
సెప్టెంబరు 1 నుంచి బడులు
* నవంబరు 14లోగా దశల వారీగా విద్యా సంస్థలను తెరవాలి
* తుది నిర్ణయం రాష్ట్రాలదే
* మార్గదర్శకాల జారీకి కేంద్రం కసరత్తు
ఈనాడు, దిల్లీ: కరోనా వైరస్‌ వ్యాప్తి కారణంగా మూతపడిన పాఠశాలలు, ఇతర విద్యా సంస్థలను సెప్టెంబరు 1 నుంచి నవంబరు 14 మధ్య దశల వారీగా పునః ప్రారంభించేలా కేంద్రం కసరత్తు చేస్తోంది. పలు దేశాలు విద్యా సంస్థలను తెరిచిన తీరుపై అధ్యయనం సాగించిన మీదట, ఈ విషయమై మార్గదర్శకాలను రూపొందిస్తోంది. అయితే ఈ విషయంలో స్థానిక పరిస్థితులకు అనుగుణంగా రాష్ట్ర ప్రభుత్వాలే తుది నిర్ణయం తీసుకోవాలని కేంద్రం సూచించనున్నట్టు సంబంధిత అధికారులు తెలిపారు. అన్‌లాక్‌ ప్రక్రియలో భాగంగా కేంద్రం ఈ నెలాఖరు నాటికి విస్తృతస్థాయి ‘స్టాండర్డ్‌ ఆపరేటింగ్‌ ప్రొసీజర్స్‌’ను విడుదల చేయనుంది. విద్యా సంస్థలను తెరిచే విషయమై వీటిలో కూలంకషంగా వివరించనుంది. ‘‘లాక్‌డౌన్‌ ఎత్తివేత క్రమంలో ఆగస్టు 31 తర్వాత అనుసరించాల్సిన విధానాలపై కేంద్రం మార్గదర్శకాలను జారీ చేయనుంది. ముఖ్యంగా విద్యార్థులు ఎప్పుడు, ఏ విధానంలో తరగతులకు హాజరుకావచ్చన్నది రాష్ట్ర ప్రభుత్వాలే నిర్ణయించాలి. ఈ విషయంలో కొవిడ్‌-19 కేసుల తీరును పరిశీలించడంతో పాటు పాఠశాల నిర్వాహకులు, తల్లిదండ్రుల అభిప్రాయాలను పరిగణనలోకి తీసుకోవాల్సి ఉంటుంది. బోధన సిబ్బంది, విద్యార్థుల్లో 33% సామర్థ్యంతో బడులు షిఫ్టుల వారీగా తరగతులు నడపాలని, తరగతి గదుల్లో విద్యార్థులు 2-3 గంటలు మాత్రమే ఉండేలా చూడాలని కేంద్రం సూచనలివ్వనుంది. మొదటి షిఫ్టు ఉదయం 8 నుంచి 11 గంటల వరకూ; రెండో షిఫ్టును 12 నుంచి 3 గంటల వరకూ నిర్వహించాలి. రెండు షిఫ్టుల మధ్యనుండే సమయంలో తరగతి గదులను శానిటైజ్‌ చేయాలి. ప్రస్తుతం మాత్రం 10 నుంచి 12వ తరగతుల విద్యార్థులకే ప్రత్యక్ష తరగతులు నిర్వహించాలి. చిన్నారులకు మాత్రం ఆన్‌లైన్‌ తరగతులనే కొనసాగించాలి. సెక్షన్ల వారీగా విద్యార్థులు నిర్దిష్ట రోజుల్లో నేరుగా బడులకు వెళ్లాల్సి ఉంటుంది’’ అని సంబంధిత అధికారి ఒకరు తెలిపారు.
అక్టోబరు 15 నుంచి కళాశాలలు ప్రారంభం
* నాలుగేళ్ల ఆనర్స్‌ డిగ్రీ
* కోర్సుల ఎంపిక ఐచ్ఛికం
* ఉన్నత విద్యపై సీఎం సమీక్ష
ఈనాడు, అమరావతి: అండర్‌ గ్రాడ్యుయేషన్‌, పోస్టు గ్రాడ్యుయేషన్‌ కళాశాలలను అక్టోబరు 15న తెరవాలని ముఖ్యమంత్రి జగన్‌మోహన్‌రెడ్డి ఆదేశించారు. సెప్టెంబరులో ఉమ్మడి ప్రవేశ పరీక్షల నిర్వహణను పూర్తి చేయాలన్నారు. ఉన్నత విద్యపై ఆగ‌స్టు 6న‌ ఆయన తాడేపల్లిలోని క్యాంపు కార్యాలయంలో అధికారులతో సమీక్షించారు. ఉన్నత విద్యలో మూడేళ్ల సాధారణ డిగ్రీతోపాటు నాలుగేళ్ల ఆనర్స్‌ డిగ్రీలను ప్రవేశపెట్టనున్నట్లు సీఎం వెల్లడించారు. మూడేళ్ల డిగ్రీలో 10 నెలల అప్రెంటిస్‌షిప్‌ ఉంటుందని, నాలుగేళ్ల డిగ్రీలో అప్రెంటిస్‌షిప్‌తోపాటు ఏడాది నైపుణ్యాభివృద్ధి, ఉపాధి అంశాలపై శిక్షణ ఉంటుందని తెలిపారు. ప్రవేశాల సమయంలోనే మూడేళ్ల సాధారణ డిగ్రీ కావాలా? నాలుగేళ్ల ఆనర్స్‌ డిగ్రీ కావాలా? అనే అంశంపై విద్యార్థుల నుంచి ఐచ్ఛికం(ఆప్షన్‌) తీసుకోవాలని సూచించారు.
నాలుగేళ్ల బీటెక్‌లోనూ అప్రెంటిస్‌షిప్‌ తప్పనిసరని, అదనంగా 20 క్రెడిట్స్‌ సాధించేవారికి ఆనర్స్‌ డిగ్రీ ఇస్తారని వెల్లడించారు. ఉన్నత విద్యలో స్థూల ప్రవేశాల నిష్పత్తి 32.4 శాతం నుంచి 90 శాతానికి పెరగాలని, విద్యాదీవెన, వసతి దీవెన పథకాల ద్వారా విద్యార్థుల పైచదువులకు అండగా నిలుస్తున్నామని తెలిపారు.
అరకులో గిరిజన వర్సిటీ: కురుపాంలో గిరిజన ఇంజినీరింగ్‌ కళాశాల పనులు మొదలుపెట్టాలని.. ప్రకాశం, విజయనగరం జిల్లాల్లో విశ్వవిద్యాలయాల ఏర్పాటుకు చర్యలు తీసుకోవాలని ముఖ్యమంత్రి ఆదేశించారు. అరకులో రాష్ట్రస్థాయి గిరిజన విశ్వవిద్యాలయం ఏర్పాటుకు ఆమోదం తెలిపారు. ఏటా నిధుల కేటాయింపుతో వచ్చే 3, 4 ఏళ్లలో నిర్మాణాలు పూర్తి చేయాలన్నారు. తెలుగు, సంస్కృత అకాడమీల ఏర్పాటుకు చర్యలు తీసుకోవాలని సూచించారు. కర్నూలు క్లస్టర్‌ వర్సిటీ, కడపలో ఆర్కిటెక్చర్‌ వర్సిటీ ఏర్పాటుకు చర్యలు తీసుకుంటున్నట్లు అధికారులు సీఎంకు వివరించారు.
ఖాళీల భర్తీ..: వర్సిటీల్లో సుమారు 1,110 ఖాళీలను భర్తీ చేయాలని సీఎం ఆదేశించారు. ప్రభుత్వ కళాశాలలు స్వావలంబన దిశగా సాగాలని నిర్దేశించారు. కళాశాలలు తెరిచాక విద్యా దీవెన, వసతి దీవెన సాయాన్ని అందించేందుకు సన్నద్ధమవాలని ఆర్థిక శాఖ అధికారులను ఆదేశించారు.
బోధన విధానంలో మార్పు రావాలి: బోధన విధానంలో మార్పు రావాలని, సమగ్ర పాఠ్య ప్రణాళికతోనే డిగ్రీలకు విలువ ఉంటుందని ముఖ్యమంత్రి వెల్లడించారు. ప్రభుత్వ కళాశాలలను మెరుగుపర్చాలనే ఆలోచన గతంలో ఎవరికీ రాలేదని, ఇప్పుడు అత్యున్నత ప్రమాణాలను సాధించేందుకు ప్రయత్నిస్తున్నామని తెలిపారు. అక్రమాలకు పాల్పడే కళాశాలలపై కఠిన చర్యలు తీసుకోవాలని ఆదేశించారు. ప్రభుత్వ కళాశాలల్లో ‘నాడు-నేడు’ కార్యక్రమం చేపట్టాలని ఆదేశించారు.
పాత వైద్య కళాశాలల మరమ్మతుకు నాడు-నేడు కింద రూ.6 వేల కోట్లకు పైగా వెచ్చిస్తున్నామని ముఖ్యమంత్రి జగన్‌ వెల్లడించారు.
నాలుగోసారి ‘క్లాట్‌’ వాయిదా
ఈనాడు, హైదరాబాద్‌: న్యాయ విద్య కోర్సుల్లో ప్రవేశానికి నిర్వహించే కామన్‌ లా అడ్మిషన్‌ టెస్టు(క్లాట్‌) నాలుగో సారి వాయిదా పడింది. దేశంలోని 22 న్యాయ విశ్వవిద్యాలయాల కన్సార్షియం గత మే 10వ తేదీన పరీక్ష నిర్వహించాలని నిర్ణయించగా.. కరోనా కారణంగా వాయిదా వేసి మే 24న జరుపుతామని ప్రకటించింది. వైరస్‌ తగ్గకపోవడంతో మళ్లీ జూన్‌ 21కి వాయిదా వేశారు. దాన్ని ఆగ‌స్టు 22న నిర్వహించాల్సి ఉండగా.. కరోనా ఉద్ధృతి కారణంగా మరోసారి వాయిదా వేశారు. కొత్త తేదీని ఇంకా ప్రకటించలేదు. ఈ పరీక్షలో వచ్చే ర్యాంకు ఆధారంగానే హైదరాబాద్‌లోని నల్సార్, విశాఖపట్నంలోని అంబేడ్కర్‌ న్యాయ విశ్వవిద్యాలయంలో యూజీ, పీజీ కోర్సుల్లో ప్రవేశాలు కల్పిస్తారు.
అక్టోబర్‌ 15 నుంచి కళాశాలలు ప్రారంభం
* సెప్టెంబ‌రులో ఉమ్మ‌డి ప్ర‌వేశ ప‌రీక్ష‌లు
* ఉన్నత విద్యపై ఏపీ సీఎం జగన్‌ సమీక్ష
అమరావతి: ఆంధ్రప్రదేశ్‌లో అక్టోబర్‌ 15 నుంచి కళాశాలలు ప్రారంభించాలని సీఎం జగన్ నిర్ణయించారు. ఉన్నత విద్యపై సీఎం జగన్‌ ఉన్నతాధికారులతో సమీక్ష నిర్వహించారు. ఈ సందర్భంగా పలు కీలక నిర్ణయాలు తీసుకున్నారు. సెప్టెంబర్‌లో ఉమ్మడి ప్రవేశ పరీక్షలు నిర్వహించాలని సీఎం ఆదేశించారు. విజయనగరం, ప్రకాశం జిల్లాల్లో విశ్వవిద్యాలయాలు ఏర్పాటు చేయాలని నిర్ణయించారు. అక్రమాలకు పాల్పడే కళాశాలలపై కఠిన చర్యలు తీసుకోవాలని అధికారులను సీఎం జగన్‌ ఆదేశించారు. గ్రాస్‌ ఎన్‌రోల్‌మెంట్‌ను 90శాతానికి తీసుకెళ్లాలని, మూడేళ్ల, నాలుగేళ్ల డిగ్రీ కోర్సుల్లో 10 నెలల అప్రెంటిస్‌షిప్‌ చేసేలా చర్యలు తీసుకోవాలని సూచించారు. ఆపై మరో ఏడాది నైపుణ్యాభివృద్ధి, ఉపాధి కల్పన కోర్సులు బోధన జరగాలన్నారు. విశ్వవిద్యాలయాల్లో అసిస్టెంట్‌ ప్రొఫెసర్ల భర్తీకి సీఎం జగన్‌ అనుమతిచ్చారు.
వీఐటీ ప్రవేశ ఫలితాలు విడుదల
వడపళని, న్యూస్‌టుడే: ‘వేలూరు ఇన్‌స్టిట్యూట్‌ ఆఫ్‌ టెక్నాలజీ’ (వీఐటీ) - 2020 బీటెక్‌ ప్రవేశ ఫలితాలను ఆగ‌స్టు 5న‌ విడుదల చేసింది. దేశ, విదేశాల నుంచి 1,83,059 మంది అభ్యర్థులు దరఖాస్తు చేసుకున్నారు. పీసీఎం/పీసీబీ మార్కులు, జేఈఈ/ఎస్‌ఏటీ మార్కులు, మెరిట్‌తో అభ్యర్థులకు ప్రవేశాలు కల్పిస్తామని కులపతి డాక్టర్‌ జి.విశ్వనాథన్‌ పేరొన్నారు. వీఐటీ వేలూరు, చెన్నై, ఆంధ్రప్రదేశ్‌, భోపాల్‌ ప్రాంగణాలలో 36 కోర్సులు ఉన్నాయని తెలిపారు. తెలంగాణలోని శ్రీచైతన్య జూనియర్‌ కళాశాల విద్యార్థి చాగరి కౌశల్‌ కుమార్‌రెడ్డి మొదటి ర్యాంకు సాధించినట్లు వెల్లడించారు. ఫలితాలను ‌www.vit.ac.in లో చూడవచ్చని, ఆన్‌లైన్‌లో కౌన్సెలింగ్‌కు ఆగ‌స్టు 10 నుంచి పేర్లు నమోదు చేసుకోవాలని సూచించారు.
ఆరో తరగతి ప్రవేశాల గడువు పొడిగింపు
ఈనాడు డిజిటల్, అమరావతి: ఆదర్శ పాఠశాలల్లో 2020-21 విద్యా సంవత్సరానికిగాను ఆరో తరగతి ప్రవేశాల గడువును ఆగస్టు 25 వరకు పొడిగించినట్లు సంయుక్త డైరెక్టర్‌ మధుసూదనరావు తెలిపారు. ఆసక్తి గల విద్యార్థులు ఆన్‌లైన్‌ ద్వారా దరఖాస్తు చేసుకోవాలని సూచించారు.
సివిల్స్‌లో ‘తెలుగు’ బావుటా
* టాపర్‌ హరియాణా అభ్యర్థి
ఈనాడు, దిల్లీ: ప్రతిష్ఠాత్మక సివిల్‌ సర్వీసెస్‌ పరీక్షల తాజా ఫలితాల్లో 829 మంది విజయం సాధించారు. ఆగ‌స్టు 4న‌ యూపీఎస్సీ విడుదల చేసిన 2019 సివిల్‌ సర్వీసెస్‌ ఫలితాల్లో హరియాణాకు చెందిన ప్రదీప్‌ సింగ్‌ మొదటి ర్యాంకు సాధించారు. దిల్లీకి చెందిన జతిన్‌ కిశోర్‌ ద్వితీయ, ఉత్తర్‌ప్రదేశ్‌కు చెందిన ప్రతిభా వర్మ తృతీయ స్ధానాల్లో నిలిచారు. మహిళల్లో ప్రతిభా వర్మ అగ్రస్థానంలో నిలవడం విశేషం. 15 రోజుల్లో అభ్యర్థుల మార్కులను వెబ్‌సైట్‌లో ఉంచనున్నట్లు యూపీఎస్సీ స్పష్టం చేసింది.
కల నిజమైంది: ప్రదీప్‌ సింగ్‌ (మొదటి ర్యాంకు)
నా కల నిజమైనందుకు సంతోషంగా ఉంది. ప్రస్తుతం ఐఆర్‌ఎస్‌ బ్యాచ్‌లో ప్రొబేషన్‌లో ఉన్న నేను, సమాజంలో అణగారిన వర్గాల ప్రజలకు సేవలు అందించేందుకు ఐఏఎస్‌ కావాలని కల గన్నాను. సాధించాను. విద్య, వ్యవసాయ రంగాల అభివృద్ధికి మొదటి ప్రాధాన్యం ఇస్తాను.
రెండో ప్రయత్నంలో రెండో ర్యాంకు: జతిన్‌ కిశోర్‌
ఇండియన్‌ ఎకనామిక్‌ సర్వీస్‌ 2018 బ్యాచ్‌కు చెందిన నేను ప్రస్తుతం గ్రామీణాభివృద్ధి మంత్రిత్వ శాఖలో అసిస్టెంట్‌ డైరెక్టర్‌గా బాధ్యతలు నిర్వర్తిస్తున్నాను. రెండో ప్రయత్నంలో రెండో ర్యాంకు రావడం ఆనందంగా ఉంది. విద్య, పర్యావరణంపై ప్రత్యేక దృష్టి సారిస్తాను.
దేశంలోనే అత్యున్నతంగా భావించే సివిల్‌ సర్వీసెస్‌-2019 ఫలితాల్లో ఈసారి తెలుగు అభ్యర్థులు సత్తా చాటారు. తెలంగాణ, ఏపీల నుంచి సుమారు 50 మంది ఎంపికయ్యారు. తెలంగాణకు చెందిన శిక్షణ ఐపీఎస్‌ పెద్దిటి ధాత్రిరెడ్డి 46వ ర్యాంకుతో తెలుగు రాష్ట్రాల్లో మొదటి స్థానంలో నిలవడం విశేషం. ఆంధ్రప్రదేశ్‌కు చెందిన మల్లవరపు సూర్యతేజ 76వ ర్యాంకుతో తెలుగు రాష్ట్రాల్లో రెండో స్థానాన్ని పొందారు. ఏటా మొదటి 10 లేదా 20 ర్యాంకుల్లోపు తెలుగు అభ్యర్థులు నిలుస్తుండగా ఈసారి వారికి చోటు దక్కలేదు. వంద ర్యాంకుల లోపు నలుగురు, 200 లోపు మొత్తం తొమ్మిది మంది మాత్రమే ర్యాంకులు సాధించారు. ఉమ్మడి ఏపీలో కీలకంగా వ్యవహరించిన మాజీ ఐఏఎస్‌ అధికారి బాలసుబ్రహ్మణ్యం కుమారుడు ప్రత్యూష్‌ ఈసారి 216వ ర్యాంకు సాధించారు. వైరా మాజీ ఎమ్మెల్యే మదన్‌లాల్‌ కుమారుడు మృగేందర్‌లాల్‌ 505, జనగామ జిల్లా నర్మెట్ట మండలం బొమ్మకూర్‌ సర్పంచి కుమారుడు రాకేష్‌నాయక్‌ 694వ ర్యాంకు సాధించారు.
ఐపీఎస్‌కు ఎంపికైనా.. ఐఏఎస్‌పైనే మమకారం
తొలి ప్రయత్నంలో ఐపీఎస్‌కు ఎంపికైనా, ఐఏఎస్‌పై మక్కువతో పట్టుదలగా చదివి 46వ ర్యాంకు సాధించారు శిక్షణ ఐపీఎస్‌ పెద్దిటి ధాత్రిరెడ్డి. ఆమె స్వగ్రామం యాదాద్రి భువనగిరి జిల్లా చౌటుప్పల్‌ మండలం గుండ్లబావి గ్రామం. ఎలాంటి శిక్షణ పొందకుండా 2018 నాటి సివిల్స్‌ పరీక్షలు రాసిన ధాత్రి 233వ ర్యాంకు సాధించి ఐపీఎస్‌కు ఎంపికయ్యారు. హైదరాబాద్‌లోని పోలీసు అకాడమీలో శిక్షణ పొందారు. ఇటీవలే ఖమ్మం జిల్లా శిక్షణ ఐపీఎస్‌ అధికారిగా నియమితులయ్యారు.
అయిదో ప్రయత్నంలో అందిన విజయం
గుంటూరు యువకుడు మల్లవరపు సూర్యతేజకు జాతీయ స్థాయిలో 76వ ర్యాంకు లభించింది. అయిదో ప్రయత్నంలో తన సివిల్స్‌ లక్ష్యాన్ని చేరుకున్నారు. సాంకేతిక పట్టభద్రుడైన సూర్యతేజ సాప్ట్‌వేర్‌ ఉద్యోగం చేశారు. 2018లో రాజీనామా చేసి సివిల్స్‌కు సన్నద్ధమయ్యారు. మొదటి నాలుగుసార్లు రాసినా ప్రిలిమ్స్‌ పూర్తికాలేదని, అయిదోసారి మరింత ప్రణాళికాబద్ధంగా చదవటం వల్ల టాప్‌ ర్యాంకు సాధించగలిగానని సూర్యతేజ చెబుతున్నారు.
గణితంపై పట్టు.. విజయానికి మెట్టు
హైదరాబాద్‌ రామంతాపూర్‌కు చెందిన కట్టా రవితేజ మూడో ప్రయత్నంలో 77వ ర్యాంకు సాధించారు. ఐఐటీ దిల్లీలో మెకానికల్‌ ఇంజినీరింగ్‌ పూర్తి చేసిన ఆయన 2017 నుంచి వరుసగా సివిల్స్‌ పరీక్షలు రాస్తున్నారు. తాజా ఫలితాల్లో 77వ ర్యాంకు సాధించారు. చిన్నప్పటి నుంచీ గణితంపై పట్టుండడంతో ఆప్షనల్‌గా దాన్నే ఎంచుకున్నారు.
మోడలింగ్‌ నుంచి లక్ష్యం వైపు...
కరీంనగర్‌లోని తెలంగాణ 9వ బెటాలియన్‌ కమాండింగ్‌ అధికారి కల్నల్‌ అజయ్‌ కుమార్‌ కుమార్తె ఐశ్వర్య శోరాన్‌ 93వ ర్యాంకు సాధించారు. ఐశ్వర్య దిల్లీలో డిగ్రీ చదివేటప్పుడు అందాల పోటీల్లో పాల్గొని విజయాలు సాధించారు. మోడలింగ్‌ వైపు వెళ్లాలనుకున్న ఆమె సివిల్స్‌ వైపు దృష్టి మరల్చారు. శిక్షణ లేకుండా మొదటి ప్రయత్నంలోనే మంచి ర్యాంకు సాధించారు. తన కుమార్తె ఐఏఎస్‌కు ఎంపికవడంపై కల్నల్‌ అజయ్‌కుమార్‌ ఆనందం వ్యక్తం చేశారు.
మూడుసార్లు విఫలమైనా...
కరీంనగర్‌ జిల్లాకు చెందిన ఎం.వి.సత్యసాయి కార్తీక్‌ నాలుగో ప్రయత్నంలో 103వ ర్యాంకు సాధించారు. గోకరాజు గంగరాజు కళాశాలలో 2014లో ఇంజినీరింగ్‌ పూర్తయ్యాక, సివిల్స్‌ వైపు అడుగులు పడ్డాయి. 2015 నుంచి వరుసగా మూడుసార్లు ప్రయత్నించినా ఫలితం దక్కలేదు. 2019లో చేసిన నాలుగో ప్రయత్నం ఫలించింది.
సత్తా చాటిన సిద్దిపేట యువకుడు
సిద్దిపేట యువకుడు మకరంద్‌ 110వ ర్యాంకు సాధించి జయకేతనం ఎగరేశారు. ఆయన తల్లిదండ్రులు నిర్మల, సురేశ్‌ ప్రభుత్వ ఉపాధ్యాయులు. ఐఐటీ ముంబయి నుంచి ఎలక్ట్రికల్‌ ఇంజినీరింగ్‌లో 2016లో డిగ్రీ పొందిన మకరంద్‌ రెండో ప్రయత్నంలోనే సివిల్స్‌ సాధించారు. ‘నేను ఎదగాలి, నాతో పాటు సమాజం ఎదగాలనేది నా కోరిక. రోజుకు సగటున 12 గంటల పాటు చదివేవాడిని. ఇదే విజయానికి సోపానంగా మారింది’ అని వివరించారు మకరందు.
ద్వితీయ యత్నం సఫలం
జనగామ జిల్లా పాలకుర్తి మండలం వల్మిడి గ్రామానికి చెందిన కేసారపు ప్రేమ్‌సాగర్‌ 170వ ర్యాంకు సాధించారు. ఘట్‌కేసర్‌ శ్రీనిధి ఇంజినీరింగ్‌ కళాశాలలో 2012లో ఇంజినీరింగ్‌ పూర్తి చేసి, కాగ్నిజెంట్‌లో ఉద్యోగంలో చేరారు. 2018లో రాజీనామా చేసి, సివిల్స్‌ సాధన ప్రారంభించారు. తొలి ప్రయత్నంలోనే ప్రిలిమ్స్‌లో అర్హత సాధించినా మెయిన్స్‌ చేజారింది. రెండోసారి చేసిన కృషికి తాజా ఫలితం దక్కింది. ఐఎఫ్‌ఎస్‌ వస్తుందని ఆయన భావిస్తున్నారు.
రైతుబిడ్డ రాహుల్‌ ఘనత
సివిల్స్‌లో 117వ ర్యాంకు సాధించిన తాటిమాకుల రాహుల్‌కుమార్‌ రెడ్డి(29) స్వస్థలం కడప జిల్లా పెండ్లిమర్రి మండలంలోని నందిమండలం గ్రామం. తల్లిదండ్రుల వృత్తి వ్యవసాయం. తిరుపతిలోని శ్రీ వేంకటేశ్వర విశ్వవిద్యాలయంలో బీటెక్‌ పూర్తిచేసిన రాహుల్‌కు చివరిదైన ఆరో ప్రయత్నంలో విజయం దక్కింది.
ఐఐటీ నుంచి సివిల్స్‌కు
జాతీయ స్థాయిలో 95వ ర్యాంకు సాధించిన సింగారెడ్డి రుషికేష్‌రెడ్డి (25) కుటుంబం కడపలో నివసిస్తోంది. ఐఐటీ పరీక్షలో జాతీయస్థాయిలో 152వ ర్యాంకు సాధించి దిల్లీ ఐఐటీలో ఎలక్ట్రికల్‌ ఇంజినీరింగ్‌ పూర్తి చేశారు. నాలుగో ప్రయత్నంలో 95వ ర్యాంకు సాధించారు.
సివిల్స్‌ - 2019 ఫలితాలు విడుదల
దిల్లీ: సివిల్‌ సర్వీస్‌ పరీక్ష-2019 ఫలితాలను యూనియన్‌ పబ్లిక్‌ సర్వీస్‌ కమిషన్‌ (యూపీఎస్సీ) ఆగ‌స్టు 4న‌ విడుదల చేసింది. మొత్తం 829 మంది ఉద్యోగాలకు ఎంపికైనట్లు యూపీఎస్సీ వెల్లడించింది. ఈ ఫలితాల్లో ప్రదీప్‌ సింగ్ మొదటి స్థానం సాధించాడు. జతిన్‌ కిషోర్‌, ప్రతిభా వర్మ ద్వితీయ, తృతీయ స్థానాల్లో నిలిచారు.
ఎంపికైన వారిలో 304మంది జనరల్‌ కేటగిరీకి చెందిన వారేనని యూపీఎస్సీ వెల్లడించింది. నూతనంగా ప్రవేశపెట్టిన ఈడబ్ల్యూఎస్ కోటాలో 78 మంది ఉద్యోగాలకు ఎంపికయ్యారు. ఓబీసీ 251, ఎస్సీ 129, ఎస్టీ కేటగిరీలో 67 మంది ఉద్యోగాలు సాధించారు. మొత్తం 927 ఖాళీలకు గానూ పరీక్షలు నిర్వహించారు. మరో 182 మంది ఫలితాలను రిజర్వ్‌లో ఉంచినట్లు యూపీఎస్సీ తెలిపింది. మరో 15 రోజుల్లో మార్కులు జాబితాను తమ వెబ్‌సైట్‌లో అందుబాటులో ఉంచనున్నట్లు యూపీఎస్సీ పేర్కొంది.
తెలుగువారి సత్తా....
సివిల్‌ సర్వీసెస్‌ పరీక్షల్లో తెలుగు రాష్ట్రాలకు చెందిన పలువురు మంచి ర్యాంకులను సాధించి తమ సత్తా చాటారు. పెద్దిటి ధాత్రిరెడ్డి 46వ ర్యాంకు, మల్లవరపు సూర్య తేజకు 76వ ర్యాంకు, కట్టా రవితేజ 77వ ర్యాంకు, ఎంవీ సత్యసాయి కార్తీక్‌ 103, తాటిమాకుల రాహుల్‌ రెడ్డి 117, కె. ప్రేమ్‌ సాగర్‌ 170, శ్రీ చైతన్య కుమార్‌ రెడ్డి 250, చీమల శివగోపాల్ రెడ్డి 263, నారాయణపేటకు చెందిన బి. రాహుల్‌కు 272వ ర్యాంకు, యలవర్తి మోహన్‌ కృష్ణ 283, ఎ. వెంకటేశ్వర్‌ రెడ్డి 314వ ర్యాంకు, ముత్తినేని సాయితేదజ 344, ముక్కెర లక్ష్మీ పావన గాయత్రి 427వ ర్యాంకు, కొల్లాబత్తుల కార్తీక్‌ 428, ఎన్‌ వివేక్‌ రెడ్డి 485, నీతిపూడి రష్మితారావు 534, కోరుకొండ సిద్ధార్థ 566, సమీర్‌ రాజా 603, కొప్పిశెట్టి కిరణ్మయి 633వ ర్యాంక్‌ సాధించారు.
Results
మేటి మేనేజ్‌మెంట్‌కు క్యాట్‌ మార్గం
దేశంలోని ఇండియన్‌ ఇన్‌స్టిట్యూట్‌ ఆఫ్‌ మేనేజ్‌మెంట్‌ (ఐఐఎం)లతోపాటు ఇతర అత్యుత్తమ బిజినెస్‌ స్కూళ్లలో ఎంబీఏ చదవడానికి ఉద్దేశించిన పరీక్షే కామన్‌ అడ్మిషన్‌ టెస్ట్‌ (క్యాట్‌). ఈ ప్రకటన వెలువడింది. నవంబర్‌ 29న పరీక్ష నిర్వహిస్తారు. అంటే సుమారు 4 నెలల వ్యవధి ఉంది. ఈ సమయాన్ని పూర్తిస్థాయిలో సద్వినియోగం చేసుకున్నవారు మేటి సంస్థల్లో ఎంబీఏ సీటు సొంతం చేసుకోవచ్చు. వీటిలో చదువుకున్నవారు కార్పొరేట్‌ కంపెనీల్లో కీలక బాధ్యతలు నిర్వర్తించవచ్చు. గణాంకాల విశ్లేషణ, తార్కిక పరిజ్ఞానం, కమ్యూనికేషన్‌ నైపుణ్యాల్లో అభ్యర్థి స్థాయిని తెలుసుకునేలా పరీక్షలో ప్రశ్నలు వస్తాయి. సన్నద్ధత ప్రణాళికను అందుకు అనుగుణంగా రూపొందించుకోవాలి.
కనీసం 50 శాతం (ఎస్సీ, ఎస్టీ, దివ్యాంగులు 45) మార్కులతో బ్యాచిలర్‌ డిగ్రీ ఉత్తీర్ణులైనవారు క్యాట్‌కు దరఖాస్తు చేసుకోవచ్చు. ప్రస్తుతం ఆఖరి సంవత్సరం కోర్సులు చదువుతున్న విద్యార్థులూ ఈ పరీక్ష రాయటానికి అర్హులే.
క్యాట్‌ సన్నద్ధత ప్రారంభించేముందు అభ్యర్థి తనను తాను సమీక్షించుకోవాలి. ‘ప్రాథమికాంశాలపట్ల పూర్తి స్థాయిలో అవగాహన ఉంది’ అని భావిస్తే సెక్షన్లవారీగా పరీక్షలు రాస్తూ ఎప్పటికప్పుడు స్కోరు మెరుగుపరచుకోవాలి. అయితే ప్రాథమికాంశాల్లో అంత పట్టు లేదని భావిస్తే మాత్రం, అక్కడి నుంచే ప్రిపరేషన్‌ మొదలు పెట్టాలి. ఒకటో సెక్షన్‌లోని రీడింగ్‌ కాంప్రహెన్షన్, మూడో సెక్షన్‌ లోని క్వాంటిటేటివ్‌ ఎబిలిటీతో ప్రారంభించాలి.
రీడింగ్‌ కాంప్రహెన్షన్
ఇందులో పరీక్షించే అంశాలు అభ్యర్థి ఇచ్చిన సమాచారాన్ని వేగంగా అర్థం చేసుకుంటున్నాడా? లేదా? అలాగే, అందులో అంతర్లీనంగా ఉన్న సమాచారాన్ని గుర్తించగలిగాడా? లేదా? అనే కోణంలో ఉంటాయి. కేవలం ఎక్కువ పదాలకు అర్థం తెలుసుకున్నంత మాత్రాన ప్రయోజనం ఉండదు. ప్రతి వాక్యంలో అంతర్లీన సమాచారాన్ని వేగంగా కనిపెట్టగలగాలి. ఇందుకోసం ఆంగ్ల దినపత్రికల్లో వచ్చే సంపాదకీయాలు ఉపయోగపడతాయి. ఇవి తత్వం (ఫిలాసఫీ), శాస్త్ర సాంకేతిక అంశాలు, ఆర్థిక అంశాలకు సంబంధించినవై ఉండాలి.
కొత్త పదాలు వచ్చినప్పుడు సందర్భోచితంగా అక్కడికక్కడే అర్థం తెలుసుకునే నేర్పు అవసరం. ఆ పదానికి సంబంధించిన సామెతలు, నుడికారాలు (ప్రావెర్బ్స్, ఫ్రేజల్‌ వర్బ్స్‌) ఏవైనా ఉన్నాయేమో చూసుకోవాలి. నిత్యం నిర్ణీత పదాలు నేర్చుకోవడమే లక్ష్యంగా ఉండాలి. రీడింగ్‌ కాంప్రహెన్షన్‌ ప్రిపరేషన్‌ సమయంలోనే వాక్య నిర్మాణం, సబ్జెక్టు - ఆబ్జెక్టు అగ్రిమెంట్‌...ఇలాంటివి పరీక్షించుకోవాలి. వ్యాకరణాంశాలపైనా పట్టు పెంచుకోవాలి.
క్వాంటిటేటివ్‌ ఎబిలిటీ
ఇందులో అరిథ్‌మెటిక్‌తోపాటు ఆల్జీబ్రా, నంబర్‌ సిస్టంల నుంచీ ప్రశ్నలు ఉంటాయి. అరిథ్‌మెటిక్‌లో భాగంగా సరాసరి, కాలం- పని, కాలం- దూరం, శాతాలు, లాభనష్టాలు...మొదలైన అంశాల నుంచి ప్రశ్నలు వస్తాయి. ఈ ప్రశ్నలు అభ్యర్థిలో సింప్లిఫికేషన్‌ (సూక్ష్మీకరణ) సామర్థ్యంతోపాటు తార్కిక పరిజ్ఞానం తెలుసుకునేలా అడుగుతారు. పాఠశాలలో చదివిన పుస్తకాల ద్వారా ప్రాథమిక పరిజ్ఞానం పొందవచ్చు. వాటి అనువర్తలనూ ప్రశ్నిస్తారు కాబట్టి ముందుగా గత పరీక్షల్లో వచ్చిన ప్రశ్నలు పరిశీలించడం ద్వారా ప్రశ్నల కోణం అలవడుతుంది. షార్ట్‌కట్స్‌పై ఆధారపడకుండా నేరుగా ప్రశ్నను అర్థం చేసుకుని, జవాబు కనుక్కునే సామర్థ్యాన్ని పెంచుకోవాలి.
సెక్షన్‌- 2లో ఉన్న డేటా ఇంటర్‌ప్రిటేషన్‌కు ప్రాథమిక పరిజ్ఞానం అరిథ్‌మెటిక్‌లో భాగంగానే వచ్చి ఉంటుంది. అక్కడ నేర్చుకున్న సరాసరి, శాతాలు, నిష్పత్తులు ఇక్కడ కూడా ఉపయోగపడతాయి. వాటిని విశ్లేషించగలగాలి. సాధారణంగా దత్తాంశాన్ని గ్రాఫ్‌లు, టేబుల్స్, పైచార్టుల రూపంలో ఇచ్చి, ఆ సమాచారం ఆధారంగా ప్రశ్నలు అడుగుతారు. ఇక్కడ కూడా అభ్యర్థుల తార్కిక పరిజ్ఞానమే కానీ, సూక్ష్మీకరణ పరిజ్ఞానాన్ని పరిశీలించే ఉద్దేశం ఉండదు. దత్తాంశంలో రెండు భిన్న అంశాలు నిష్పత్తి లేదా సరాసరిలో వస్తోన్న మార్పులు ఎలా ఉన్నాయో ప్రశ్నిస్తారు.
లాక్‌డౌన్‌ నేపథ్యంలో ఇంటి వద్దే ఉంటూ సన్నద్ధమవుతోన్న అభ్యర్థులు నిత్యం ఈ సెక్షన్‌కు సంబంధించిన పరీక్షను రాస్తూ ఉండాలి. ఇలా చేస్తే మంచి పట్టు లభిస్తుంది. లాజికల్‌ రీజనింగ్‌లో సీటింగ్‌ అరేంజ్‌మెంట్స్, సిలాజిజం, పజిల్స్, ర్యాంకింగ్‌ తదితర అంశాల నుంచి ప్రశ్నలు వస్తాయి. గత ప్రశ్నపత్రాలు పరిశీలించి, కొత్త ప్రశ్నలు సాధించుకుంటూ వెళ్లడం ద్వారా ఈ సెక్షన్‌లో కూడా మంచి మార్కులు పొందవచ్చు. ఇక్కడ కూడా అభ్యర్థి వేగంగా, తార్కికంగా ఎలా ఆలోచిస్తాడో పరిశీలిస్తారు.
సన్నద్ధతలో తరచూ చేసే తప్పులు
ప్రాథమికాంశాలకు ఎక్కువ సమయం కేటాయిస్తారు. ఇలా చేయడం ఎంతమాత్రం సమంజసం కాదు. కేవలం పది లేదా పన్నెండు రోజుల్లో వీటిని పూర్తిచేయాలి. ఎందుకంటే క్యాట్‌లో ఒక్క లాజికల్‌ రీజనింగ్‌ మినహా మిగతావన్నీ పాఠశాల, గ్రాడ్యుయేషన్‌ స్థాయిలో చదువుకున్నవే.
వెర్బల్‌ ఎబిలిటీలో పదాలు ఎంచుకుని వాటికి నానార్థాలు, వ్యతిరేకార్థాలు నేర్చుకుని అక్కడికే పరిమితం అవుతారు. ఇది సరికాదు సందర్భానుసారం ఒక పదానికి అర్థం ఏ విధంగా మారుతుందో తెలుసుకోవాలి.
రీడింగ్‌ కాంప్రహెన్షన్‌లో కేవలం ఒక అంశానికి సంబంధించిన ప్యాసేజ్‌లే చదువుతూ ఉంటారు. అలా కాకుండా శాస్త్ర, సాంకేతికాంశాలు; తత్వం...ఇలా విభిన్న అంశాలు ఎంచుకోవాలి. ఇంటర్నెట్‌లోని అంతర్జాతీయ స్థాయి జర్నల్స్‌ సహాయాన్నీ తీసుకోవచ్చు.
లాజికల్‌ రీజనింగ్‌లో అధ్యాయాల వారీ ప్రాక్టీస్‌ చేసి నిలిపివేస్తారు. అలా కాకుండా అన్ని అంశాలూ కలగలిపి ఉన్న ప్రశ్నపత్రాలను అధ్యయనం చేయాలి.
క్వాంటిటేటివ్‌లో అభ్యర్థులు షార్ట్‌కట్స్‌ నేర్చుకోవడం కోసం ఎక్కువగా శ్రమపడుతూ ఉంటారు. ఇది సరి కాదు. కాన్సెప్ట్‌ అర్థం అయినప్పుడు ప్రశ్నలకు సమాధానం కనుక్కునేందుకు వీలు ఉంటుంది.
అపోహలూ.. నిజాలూ
కామన్‌ అడ్మిషన్‌ టెస్ట్‌ (క్యాట్‌)పై చాలా అపోహలు వ్యాప్తిలో ఉన్నాయి. అలాంటి కొన్ని అభిప్రాయాలూ.. వాటి వాస్తవాలూ చూద్దాం.
* ఈ పరీక్ష ఇంజినీరింగ్‌ విద్యార్థులకు ఎక్కువ సులభంగా ఉంటుంది.
వాస్తవం కాదు. అభ్యర్థుల తార్కిక, విశ్లేషణాత్మక నైపుణ్యాలను పరీక్షించే ఆప్టిట్యూడ్‌ టెస్ట్‌ ఇది. అందుకని అభ్యర్థికి ఇంజినీరింగ్‌ నేపథ్యముందా? లేదా అనేదానికి ప్రాధాన్యం ఏదీ లేదు.
* క్యాట్‌లో అమ్మాయిలు ఎక్కువ స్కోరు చేయలేరు.
అది నిజం కాదు. చాలా ఐఐఎంల మేనేజ్‌మెంట్‌ కోర్సుల్లో అబ్బాయిల- అమ్మాయిల నిష్పత్తి 1:1 ఉంది.
* ఎక్కువ ప్రశ్నలు రాస్తే ఎక్కువ స్కోరు సాధ్యమవుతుంది.
ప్రశ్నలకు ఎంత కచ్చితంగా జవాబులు రాశామనేది ముఖ్యం. స్కోరు పెంచేది అదే!

వీటిపై దృష్టి సారించాలి
* గ్రామర్, క్వాంటిటేటివ్‌ ఆప్టిట్యూడ్‌లకు సంబంధించి ప్రాథమికాంశాలు బాగా నేర్చుకోవాలి. సబ్జెక్ట్‌ + వర్బ్‌ అగ్రిమెంట్‌ సబ్జెక్టులో వచ్చే సింగులర్స్, ప్లూరల్స్, పదాల వాడకంపై ఎక్కువ ప్రశ్నలు ఉంటాయి.
* ప్రావెర్బ్స్, ఫ్రేజల్‌ వర్బ్స్‌ ..ఇలా ఒక పదాన్ని ఎన్ని రకాలుగా ఉపయోగిస్తారో తెలుసుకోవాలి. రోజూ నిర్ణీత సంఖ్యలో వీటిని తెలుసుకోవడం ద్వారా రీడింగ్‌ కాంప్రహెన్షన్‌లో పరిజ్ఞానం పెరుగుతుంది.
* వీలైనన్ని మాక్‌ పరీక్షలు రాయాలి. అందులో సెక్షన్లవారీ సాధించిన మార్కులను పరిశీలించుకోవాలి. తప్పులు చేస్తోన్న అంశాలపై ప్రత్యేక శ్రద్ధ వహించాలి. ఆ విభాగాల్లో సాధ్యమైనన్ని ప్రశ్నలు సాధించాలి. ఇలా చేయడం వల్ల స్కోరు మెరుగుపరచుకోవడానికి వీలవుతుంది.
ఐసెట్‌ కేంద్రాలను మార్చుకోవడానికి గడువు 6
జులైవాడ, న్యూస్‌టుడే: కాకతీయ విశ్వవిద్యాలయ పర్యవేక్షణలో నిర్వహించనున్న టీఎస్‌ ఐసెట్‌- 2020 పరీక్షకు సంబంధించిన దరఖాస్తుదారులు గతంలో నమోదు చేసుకున్న కేంద్రాలను మార్చుకోవడానికి ఆగ‌స్టు 6వ తేదీ వరకు గడువు పొడిగించినట్లు టీఎస్‌ ఐసెట్‌-2020 కన్వీనర్‌ ఆచార్య కె.రాజిరెడ్డి తెలిపారు. అభ్యర్థులు టీఎస్‌ ఐసెట్‌ 2020 వెబ్‌సైట్‌లో ‘ఎడిట్‌ ద టెస్ట్‌ సెంటర్‌’ ఐచ్ఛికం ద్వారా తమ పరీక్ష కేంద్రాలను మార్చుకోవచ్చని సూచించారు.
సరికొత్త గేట్‌.. పోటీకి దీటుగా!
గేట్‌-2021 ప్రకటన త్వరలో వెలువడబోతోంది. కొత్త పేపర్ల చేర్పు, అర్హతల్లో మార్పులు లాంటి ఆసక్తికరమైన అంశాలతో ఈ పరీక్ష అందరికీ ఆసక్తిని కలిగిస్తోంది. ఇంజినీరింగ్, సైన్స్‌ విద్యార్థులు ప్రముఖ విద్యాసంస్థల్లో ఉన్నతవిద్యను అభ్యసించటానికి ప్రధానంగా ఉద్దేశించిన గ్రాడ్యుయేట్‌ ఆప్టిట్యూడ్‌ టెస్ట్‌ ఇన్‌ ఇంజినీరింగ్‌ (గేట్‌) ఇప్పుడు ఆర్ట్స్, కామర్స్‌ విద్యార్థులనూ తన పరిధిలోకి తెచ్చుకుంది. దరఖాస్తుకు అర్హతలను సవరించింది. ఫలితంగా పోటీ పెరగనున్నది. కొత్తగా చేసిన మార్పులూ, వాటి స్వరూపం తెలుసుకుని, సరికొత్త గేట్‌కు దీటుగా తయారవటం అభ్యర్థుల కర్తవ్యం. ఇందుకు తగిన మానసిక సంసిద్ధతను పెంచుకోవటం అవసరం! గేట్‌- 2021లో ఇంతకుముందు ఉన్న 25 పేపర్లకు అదనంగా మరో 2 పేపర్లను జోడించారు. అంటే మొత్తం 27 పేపర్లలో పరీక్ష నిర్వహించబోతున్నారు. అదనంగా చేర్చిన రెండు పేపర్లు- 1) ఎన్విరాన్‌మెంటల్‌ సైన్స్‌ అండ్‌ ఇంజినీరింగ్‌ 2) హ్యుమానిటీస్‌ అండ్‌ సోషల్‌ సైన్సెస్‌.
36 సంవత్సరాల గేట్‌ చరిత్రలో మొట్టమొదటిసారిగా ఇంజినీరింగ్‌/సైన్స్‌ విభాగాల్లో మాత్రమే పరిమితం కాకుండా హ్యుమానిటీస్, సోషల్‌ సైన్సెస్‌లో కూడా ఈ పరీక్ష జరగబోతోంది. దీంతో ఇప్పటివరకూ ఇంజినీరింగ్, సైన్స్‌ విద్యార్థులకు మాత్రమే అందుబాటులో ఉన్న ఈ గేట్‌ను కొత్తగా ఆర్ట్స్, కామర్స్‌ విద్యార్థులు కూడా రాసే అవకాశం కల్పించారు. అయితే కామర్స్‌/ ఆర్ట్స్‌ విద్యార్థులు ఆర్థికశాస్త్రం, ఆంగ్లం, భాషాశాస్త్రం, తత్వశాస్త్రం, మనోవిజ్ఞాన శాస్త్రం, సామాజిక శాస్త్రాల్లో ఏదో ఒక సబ్జెక్టును ఎంచుకోవాల్సివుంటుంది. అంటే ఈ విభాగంలో పరీక్ష రాయదల్చినవారు హ్యుమానిటీస్‌ అండ్‌ సోషల్‌ సైన్సెస్‌ పేపరును ఎంచుకోవాలి.
వీరు గేట్‌లో మంచి స్కోరు సాధిస్తే ఐఐటీలు మొదలైన ఉన్నత విద్యాసంస్థల్లో ఎకనామిక్స్, సోషల్‌ సైన్స్‌లో పీజీ/పరిశోధన విద్యను అభ్యసించే అవకాశం లభిస్తుంది. మున్ముందు ప్రభుత్వ రంగ సంస్థల్లో కూడా సంబంధిత ఉద్యోగ అవకాశాల ఎంపిక ప్రక్రియలో గేట్‌ స్కోరును పరిగణనలోకి తీసుకునే అవకాశం ఉంది.
మరో ముఖ్యమైన మార్పు- గేట్‌-2021ను రెండు పేపర్లతో పరీక్ష రాసే అవకాశం కల్పించటం. అయితే ఏ రెండు పేపర్లను ఎంచుకోవచ్చు అనేది త్వరలో విడుదలయ్యే గేట్‌ బ్రోషర్లో వెల్లడిస్తారు. రెండు పేపర్లతో గేట్‌ రాయటం ద్వారా ఏ పేపర్లో మంచి స్కోరు సాధిస్తే దానికి సంబంధించిన విభాగాల్లో ఉన్నత విద్య/ ప్రభుత్వరంగంలో ఉపాధి పొందే అవకాశం దొరుకుతుంది.
విద్యార్థులు తప్పకుండా రెండు పేపర్లతో పరీక్ష రాయనవసరం లేదు. ఒక పేపరుతో పరీక్ష రాయాలనుకున్నవారు ఆందోళన చెందనవసరం లేదు. వీరు తమ ఇష్టప్రకారం ఒకటి లేదా రెండు పేపర్లు ఎంచుకోవచ్చు.
విద్యార్హత
గేట్‌-2021 రాయదల్చుకున్నవారి విద్యార్హతలో కూడా మార్పులు జరిగాయి.
* ఇంజినీరింగ్‌/టెక్నాలజీ/ఆర్కిటెక్చర్‌/సైన్స్‌/కామర్స్‌/ఆర్ట్స్‌ విభాగాల్లో మూడు లేదా అంతకంటే ఎక్కువ సంవత్సరాలు చదివినవారు ఈ పరీక్ష రాయటానికి అర్హులు.
అంటే ప్రస్తుతం ఇంజినీరింగ్‌ మూడో సంవత్సరం చదువుతున్న విద్యార్థులు కూడా ఈ పరీక్ష రాయటానికి అర్హులే.
పరీక్ష విధానం
పూర్వపు పరీక్ష పత్రాన్ని పరిశీలిస్తే... గేట్ ప్రశ్నపత్రంలో మొత్తం 100 మార్కులకు 65 ప్రశ్నలుంటాయి. కాలవ్యవధి 3 గంటలు.
ప్రశ్నపత్రం రెండు విభాగాలుగా ఉంటుంది.
విభాగం-1: జనరల్‌ ఆప్టిట్యూడ్‌
విభాగం-2: సంబంధిత ఇంజినీరింగ్‌ సబ్జెక్టులు
జనరల్‌ ఆప్టిట్యూడ్‌
ఇందులో 10 ప్రశ్నలుంటాయి. 1 నుంచి 5 ఒక్కో మార్కు ప్రశ్నలు. 6 నుంచి 10 రెండు మార్కుల ప్రశ్నలు. అంటే మొత్తం 15 మార్కులకు ఈ విభాగంలో ప్రశ్నలు వస్తాయి. 4 నుంచి 5 ప్రశ్నలు ఇంగ్లిష్‌ సంబంధిత (వర్బల్‌ ఎబిలిటీ) ప్రశ్నలుంటాయి. మిగతావి క్వాంటిటేటివ్‌కు సంబంధించినవి ఇవ్వొచ్చు.
ఈ ప్రశ్నలకు సమాధానాలు రాయాలంటే రోజూ వార్తాపత్రికలు చదవటం, ఇతర పోటీ పరీక్షల గత ప్రశ్నపత్రాలను సాధన చేయటం ఉపయోగకరంగా ఉంటుంది.
ఇంజినీరింగ్‌ సబ్జెక్టులు
దీనిలో 55 ప్రశ్నలుంటాయి. 1-25 ప్రశ్నలకు ఒక్కొక్క మార్కు. 26-55 ప్రశ్నలకు రెండేసి మార్కులు.
హ్యుమానిటీస్‌ అండ్‌ సోషల్‌ సైన్సెస్‌ సంగతి?
విభాగం-1: జనరల్‌ ఆప్టిట్యూడ్‌: 15 మార్కులు
విభాగం-2: రీజనింగ్, కాంప్రహెన్షన్‌: 25 మార్కులు
ఎంచుకున్న సబ్జెక్టుకు సంబంధించి 60 మార్కులు.
అభ్యర్థులు తమకు సంబంధించిన సబ్జెక్టును ఎంచుకోవాల్సివుంటుంది. ఆర్థికశాస్త్రం, ఆంగ్లం, భాషాశాస్త్రం, తత్వశాస్త్రం, మనోవిజ్ఞాన శాస్త్రం, సామాజిక శాస్త్రాల్లో ఏదో ఒకటి.
కామర్స్‌/ఆర్ట్స్‌ వారికి హ్యుమానిటీస్‌ అండ్‌ సోషల్‌ సైన్సెస్‌ పేపర్లో మార్కులు కలిపివుండటం వల్ల అందరికీ కలిపి ఒకే ర్యాంకింగ్‌ ఇచ్చే అవకాశం ఉంది.
గేట్‌-2021 కీలక అంశాలు
1. ఆర్ట్స్, కామర్స్‌ విద్యార్థులకూ అవకాశం
2. కొత్తగా ప్రవేశపెట్టిన 2 పేపర్లు.
3. బీటెక్‌ మూడో సంవత్సరం విద్యార్థులూ అర్హులే.
4. సబ్జెక్టు పేపర్లు ఒకటి/ రెండు రాసే అవకాశం
5. ఆరు రోజులపాటు పరీక్షలు (ఫిబ్రవరి 5-7; 12-14)
పోటీ ఎంత?
ఫిబ్రవరిలో జరగబోయే గేట్‌ను ఇంజినీరింగ్‌ చివరి సంవత్సరం విద్యార్థులతో పాటు మూడో సంవత్సరం చదివేవారు కూడా రాస్తున్నారు. ఈ విద్యార్థుల్లో కూడా చాలామంది శ్రద్ధగా పరీక్షకు సిద్ధమవుతారు. అందువల్ల గేట్‌-2021లో పోటీ పెరుగుతుంది.
కానీ ఈ మూడో సంవత్సరం విద్యార్థుల వల్ల ఫైనలియర్‌ విద్యార్థులకు ఉన్నత విద్యావకాశాల్లో గానీ, ప్రభుత్వరంగ సంస్థల్లో ఉద్యోగాల్లో గానీ సంవత్సరం వరకూ పోటీ ఉండే అవకాశం లేదు.
1. ప్రస్తుతం కరోనా మూలంగా ఇంటర్‌నెట్‌ ఆధారిత శిక్షణ మాత్రమే అందుబాటులో ఉంది. ఈ వనరులతోనే పరీక్షలో స్కోరు తెచ్చుకునేలా ప్రణాళిక వేసుకోవాలి.
2. సన్నద్ధతలో భాగంగా ప్రతి సబ్జెక్టూ చదవగానే దానికి సంబంధించిన మాక్‌ టెస్టులూ, గత సంవత్సరాల ప్రశ్నలూ శ్రద్ధగా సాధన చేయాలి.
3. ఉచిత ఎన్‌పీటీఈఎల్‌ తరగతులను ఉపయోగించుకుని గేట్‌కు తయారుకావొచ్చు. www.nptel.ac.in వెబ్‌సైట్‌లో సంబంధిత కోర్సులను పొందవచ్చు.
4. ప్రస్తుత పరిస్థితుల్లో మానసిక ప్రశాంతత, శారీరక ఆరోగ్యం కాపాడుకోవటం ఎంతో ముఖ్యం. ఇది అభ్యర్థులు మర్చిపోకూడదు.
పరీక్ష ఎప్పుడు?
గతంలో ఈ గేట్‌ రెండు విడతలుగా నాలుగు రోజుల పాటు జరిగేది. ప్రస్తుతం కరోనా విపత్తు కారణంగా వ్యక్తిగత దూరం పాటించాల్సిరావటం, మూడో సంవత్సరం విద్యార్థులు కూడా రాయబోతున్నందున.. ఈసారి గేట్‌ను ఆరు రోజులపాటు నిర్వహిస్తున్నారు.
పరీక్ష తేదీలు: ఫిబ్రవరి 5, 6, 7, 12, 13, 14.
ఇంజినీరింగ్‌ విద్యార్థులకు ఎంత మేలు?
* ఇంజినీరింగ్‌ చివరి సంవత్సరం విద్యార్థులు గేట్‌ రాశాక మంచి స్కోరు సాధించలేకపోతే మరో సంవత్సరం వేచివుండాల్సివచ్చేది. కొత్త మార్పు ప్రకారం.. మూడో సంవత్సరంలోనే గేట్‌Â రాసి అందులో మంచి స్కోరు సాధిస్తే ఎలాంటి ఒత్తిడీ లేకుండానే చివరి సంవత్సరం పూర్తిచేసుకుని అత్యున్నతమైన విద్యాసంస్థలో /కోర్సులో చేరవచ్చు.
* ఒకవేళ మంచి స్కోరు రానట్లయితే పరీక్ష రాసేటప్పుడు/ పరీక్ష సన్నద్ధతలో చేసిన పొరపాట్లను గుర్తించి సరిచేసుకుంటే... ఏడాది కాలం వృథా చేసుకోకుండానే అంటే కోర్సు చివరి ఏడాదిలోనే గేట్‌ రాసుకోవచ్చు.
* గేట్‌కు సన్నద్ధమవటం ప్రాంగణ నియామకాల్లో జరిగే రాతపరీక్షకూ ఉపయోగకరమే.
* ఇంజినీరింగ్‌ మూడో సంవత్సరం గేట్‌ రాసి మంచి స్కోరు సాధిస్తే ప్రాంగణ నియామకాల్లోనూ ప్రాధాన్యం లభిస్తుంది.
- ప్రొ. వై.వి. గోపాలకృష్ణమూర్తి
స్టేట్‌ బ్యాంకులో కొలువులు!
* 3850 సర్కిల్‌ బేస్డ్‌ ఆఫీసర్ల నియామకానికి ప్రకటన
స్టేట్‌ బ్యాంక్‌ ఆఫ్‌ ఇండియా (ఎస్‌బీఐ) నుంచి తొలిసారిగా సర్కిల్‌ బేస్డ్‌ ఆఫీసర్స్‌ (సీబీఓ) పోస్టుల నియామకానికి ప్రకటన వెలువడింది. దేశవ్యాప్తంగా 9 సర్కిళ్లలో 3850 ఖాళీలు ఉన్నాయి. వీటిలో హైదరాబాద్‌ సర్కిల్‌లో 550 ఖాళీలను భర్తీ చేస్తారు. అభ్యర్థులు తమకు నచ్చిన సర్కిల్‌లో పోస్టుల కోసం పోటీపడవచ్చు. బ్యాంకుల్లో ఆఫీసర్‌ హోదాలో కనీసం రెండేళ్ల అనుభవం ఉన్నవారు ఈ పోస్టులకు దరఖాస్తు చేసుకోవచ్చు.
బ్యాంకు కార్యకలాపాలపై అనుభవం ఉన్న అభ్యర్థులను నియమిస్తే ఎటువంటి కాలయాపన, శిక్షణ అవసరం లేకుండా అభ్యర్థులు తమ విధులను నిర్వర్తించే సామర్థ్యం ఉంటుంది. అందుకే భారతీయ స్టేట్‌ బ్యాంకు ఈ విధమైన ఎంపికలు చేపడుతోందని భావించవచ్చు. ప్రభుత్వ బ్యాంకుల్లో ఉద్యోగం కోసం ప్రయత్నించి, ప్రైవేటు బ్యాంకుల్లో అవకాశం వచ్చినందున చేరిపోయిన అభ్యర్థులకూ; గ్రామీణ బ్యాంకుల్లో పనిచేస్తున్న అభ్యర్థులకూ దేశంలో ప్రథమ స్థానంలో ఉన్న స్టేట్‌ బ్యాంకు ఆఫ్‌ ఇండియాలో స్కేల్‌ -1 ఆఫీసర్‌గా ఉద్యోగం పొందే అవకాశం ఈ నోటిఫికేషన్‌ కలిగిస్తుంది.
సాధారణంగా బ్యాంకు ఆఫీసర్‌ ప్రతి మూడేళ్లకూ ఏ సర్కిల్‌లోని బ్రాంచికైనా బదిలీ అవుతారు. అయితే సర్కిల్‌ బేస్డ్‌ ఆఫీసర్లు (సీబీఓ) తాము ఎంచుకున్న సర్కిల్‌లోనే పన్నెండేళ్ల వరకు పనిచేసే అవకాశం ఉంది. ఇలా ఎంపికైనవారికి పదోన్నతులు కూడా ప్రొబేషనరీ ఆఫీసర్లగా నియమితులైనవారి మాదిరిగానే ఉంటాయి. ఇలా ఎన్నో అనుకూలతలు ఉన్న ఈ పోస్టులకు అర్హత ఉన్న అభ్యర్థులందరూ తగిన విధంగా సన్నద్ధమైతే విజయం సాధించవచ్చు.
* అభ్యర్థులు ఏదో ఒక సర్కిల్‌కే దరఖాస్తు చేసుకోవాలి. ఎంపికైనవారు సంబంధిత సర్కిల్‌ లోనే విధులు నిర్వహించాల్సి ఉంటుంది.
* స్కేల్‌ 4 ఆఫీసర్‌ స్థాయికి చేరుకునే వరకు లేదా 12 ఏళ్ల వరకు (వీటిలో ఆలస్యమైనదాన్ని పరిగణనలోకి తీసుకుంటారు) అదే సర్కిల్‌లో సేవలు అందించాలి.
ఇవీ ప్రత్యేకతలు
* విధుల్లో చేరినవారికి రూ.23,700 మూల వేతనం చెల్లిస్తారు. అన్ని అలవెన్సులూ కలుపుకుని రూ.40 వేలకు పైగా వేతనం అందుకోవచ్చు.
* ప్రొబేషన్‌ వ్యవధి 6 నెలలు. ఈ వ్యవధిలో సంతృప్తికరంగా విధులు నిర్వర్తించినవారిని స్కేల్‌ -1 ఆఫీసర్‌గా విధుల్లోకి తీసుకుంటారు. అప్పటి దాకా వీరిని సర్కిల్‌ బేస్డ్‌ ఆఫీసర్స్‌ (సీబీఓ)గా వ్యవహరిస్తారు.
ఎవరు దరఖాస్తు చేయొచ్చు?
ఏదైనా గ్రాడ్యుయేషన్‌ పూర్తిచేసి రెండేళ్లు షెడ్యూల్డ్‌ కమర్షియల్‌ బ్యాంకు లేదా గ్రామీణ బ్యాంకు (రీజనల్‌ రూరల్‌ బ్యాంకు)ల్లో ఆఫీసర్‌ స్థాయిలో పనిచేసి ఉండాలి. ఆగస్టు 1, 2020 నాటికి రెండేళ్ల అనుభవం పూర్తి కావాలి.
ఆగస్టు 1, 2020 నాటికి వయసు 30 ఏళ్లకు మించరాదు. ఎస్సీ, ఎస్టీలకు అయిదేళ్లు; ఓబీసీలకు మూడేళ్లు గరిష్ఠ వయసులో సడలింపు వర్తిస్తుంది.
ఇలా ఎంపిక చేస్తారు
వచ్చిన దరఖాస్తులను పరిశీలించి షార్ట్‌లిస్ట్‌ చేస్తారు. వీరికి ఇంటర్వ్యూ నిర్వహించి ఎంపిక చేస్తారు. స్టేట్‌ బ్యాంకు ఏర్పాటు చేసిన షార్ట్‌లిస్ట్‌ కమిటీ తగిన విధివిధానాలతో పోస్టుల సంఖ్యకు అనుగుణంగా అభ్యర్థులను ఎంపిక చేస్తుంది. వీరికి ఇంటర్వ్యూ నిర్వహిస్తారు. ఇందులో అభ్యర్థులు చూపిన ప్రతిభ ఆధారంగా తుది నియామకాలు చేపడతారు. అయితే అభ్యర్థుల ఎంపిక కోసం రాత పరీక్షనూ నిర్వహించడానికి అవకాశాలు ఉన్నాయి. ఒకవేళ రాత పరీక్ష నిర్వహిస్తే సాధారణంగా ప్రొబేషనరీ ఆఫీసర్ల నియామకానికి నిర్వహించే పరీక్ష మాదిరిగానే ఇదీ ఉండడానికి అవకాశాలు ఉన్నాయి. అందువల్ల అభ్యర్థులు తదనుగుణంగా దానికి సిద్ధం కావాలి.
రాతపరీక్ష ఎలా ఉండొచ్చు?
ఎస్‌బీఐ కానీ, ఐబీపీఎస్‌ కానీ సాధారణంగా ప్రొబేషనరీ అధికారుల నియామకానికి రెండు అంచెల (ప్రిలిమ్స్, మెయిన్స్‌) రాతపరీక్షను నిర్వహిస్తుంటాయి. పరీక్షను రెండు దశల్లో నిర్వహించినా వాటిలోని సబ్జెక్టులు మాత్రం ఒకేవిధంగా ఉంటాయి. ఒకవేళ ఎస్‌బీఐ సర్కిల్‌ బేస్డ్‌ ఆఫీసర్ల నియామకానికి రాతపరీక్ష నిర్వహిస్తే... అది ఒకే పరీక్షగా మెయిన్స్‌ పరీక్ష తరహాలో ఉండే అవకాశం ఉంటుంది. అందుకని ఆ పరీక్ష విధానానికి అనుగుణంగా సిద్ధమైతే మంచిది.
పీఓ మెయిన్‌ పరీక్షలో క్వాంటిటేటివ్‌ ఆప్టిట్యూడ్, రీజనింగ్, ఇంగ్లిష్, జనరల్‌ అవేర్‌నెస్, కంప్యూటర్‌ నాలెడ్జి సబ్జెక్టులు ఉంటాయి. ఎస్‌బీఐ గతంలో నిర్వహించిన పీఓ పరీక్ష ప్రశ్నపత్రాలను పరిశీలిస్తే ఏయే టాపిక్స్‌ నుంచి ఏ స్థాయిలో ప్రశ్నలు వస్తున్నాయో అర్థమవుతుంది. అభ్యర్థులు ఆ స్థాయిలో సిద్ధమైతే సరిపోతుంది.
- డా. జి.ఎస్‌. గిరిధర్‌
నోటిఫికేషన్‌ వివరాలు
పోస్టు: సర్కిల్‌ బేస్డ్‌ ఆఫీసర్లు
మొత్తం ఖాళీలు: 3850. వీటిలో 550 హైదరాబాద్‌ సర్కిల్‌లో ఉన్నాయి.
విద్యార్హత: ఏదైనా గ్రాడ్యుయేషన్‌ ఉత్తీర్ణత
అనుభవం: ఆగస్టు 1, 2020 నాటికి షెడ్యూల్డ్‌ కమర్షియల్‌ బ్యాంకు లేదా గ్రామీణ బ్యాంకులో ఆఫీసర్‌ స్థాయిలో కనీసం రెండేళ్లు సర్వీస్‌ పూర్తిచేసుకోవాలి.
వయసు: ఆగస్టు 1, 2020 నాటికి గరిష్ఠంగా 30 ఏళ్లకు మించరాదు. ఎస్సీ, ఎస్టీ, ఓబీసీలకు సడలింపు వర్తిస్తుంది.
దరఖాస్తు ఫీజు: జనరల్, ఓబీసీలకు రూ.750. ఇతర వర్గాలవారు ఫీజు చెల్లించనవసరం లేదు
చివరి తేదీ: ఆగస్టు 16
ఎంపిక ప్రక్రియ: షార్ట్‌లిస్టు, ఇంటర్వ్యూ ద్వారా. అవసరమైతే రాత పరీక్ష నిర్వహిస్తారు
వెబ్‌సైట్‌:
https://bank.sbi/web/careers ,
https://www.sbi.co.in/web/careers
నవంబరు 29న క్యాట్
ఈనాడు, హైదరాబాద్: ప్రతిష్ఠాత్మక ఇండియన్ ఇన్‌స్టిట్యూట్ ఆఫ్ మేనేజ్‌మెంట్ (ఐఐఎం)ల్లో మేనేజ్‌మెంట్ కోర్సుల్లో ప్రవేశానికి ఉమ్మడి ప్రవేశ పరీక్ష (క్యాట్-2020)ను నవంబరు 29న నిర్వహించనున్నారు. ఈసారి ఆన్‌లైన్ పరీక్షల నిర్వహణ బాధ్యత ఐఐఎం ఇండోర్‌కు దక్కింది. ఆ సంస్థ జులై 30న ప్రవేశాల ప్రకటన విడుదల చేసింది. ఏపీలోని విశాఖపట్నంలో ఉన్న ఐఐఎం సహా దేశవ్యాప్తంగా ఉన్న 20 ఐఐఎంల్లో 4 వేలకుపైగా సీట్లున్నాయి. క్యాట్ స్కోర్ ఆధారంగా వందలాది బి-స్కూళ్లు ప్రవేశాలు కల్పిస్తాయి. హైదరాబాద్ కేంద్రీయ విశ్వవిద్యాలయంలో ఎంబీఏ సీట్లను ఈ స్కోర్ ఆధారంగానే భర్తీ చేస్తారు.
* నవంబరు 29న పరీక్ష నిర్వహిస్తారు. ఆగస్టు 5వ తేదీ నుంచి సెప్టెంబరు 16 వరకు రిజిస్ట్రేషన్ చేసుకోవచ్చు. మొత్తం 156 నగరాలు, పట్టణాల్లో పరీక్షా కేంద్రాలు ఏర్పాటు చేస్తారు. 2021 జనవరి రెండో వారంలో ఫలితాలు వెల్లడిస్తారు.
* పరీక్ష రాసేందుకు ఆరు నగరాలను ఎంచుకోవచ్చు. అందులో ఒకచోట రాసేందుకు అనుమతిస్తారు.
5వ తరగతి వరకు అమ్మభాషే
* విద్యావిధానంలో భారీమార్పులు
* ఉన్నతవిద్యా కోర్సుల్లోనూ అలాంటి అవకాశం
* 12వ తరగతి వరకూ విద్యా హక్కు
* కొత్త విద్యావిధానానికి కేంద్ర కేబినెట్‌ ఆమోదం
ఈనాడు, దిల్లీ: దేశంలో 34 ఏళ్ల తర్వాత విద్యారంగంలో కీలక మార్పులు అమల్లోకి రాబోతున్నాయి. డాక్టర్‌ కస్తూరి రంగన్‌ కమిటీ రూపొందించిన జాతీయ నూతన విద్యా విధానానికి జులై 29న‌ కేంద్ర మంత్రివర్గం ఆమోదముద్ర వేసింది. ప్రధాని నరేంద్ర మోదీ అధ్యక్షతన జరిగిన సమావేశంలో తీసుకున్న నిర్ణయం ప్రకారం... ప్రాథమిక, ఉన్నత విద్య పరంగా మొత్తం 27 అంశాల్లో మార్పులు చేయనున్నారు. కొత్త విధానంలో విద్యను సరళతరంగా మార్చారు. విద్యార్థులు తమకు ఇష్టమైన కోర్సులను చదువుకొనే వెసులుబాటు కల్పించారు. ప్రస్తుతం భారంగా మారిన పాఠ్యాంశాలను తగ్గించి, విద్యార్థులు తమలో అంతర్గతంగా దాగిన నైపుణ్యాలను మెరుగుపరుచుకొనేందుకు అవసరమైన సమయాన్ని కేటాయించుకొనే అవకాశం ఇవ్వబోతున్నారు. పాఠశాల విద్య పూర్తిచేసుకొని బయటికెళ్లేనాటికి కనీసం ఒక వృత్తి విద్యా నైపుణ్యమైనా విద్యార్థి సాధించేలా మార్పులు చేస్తున్నారు. అయిదో తరగతి వరకు ప్రాథమిక విద్యను మాతృభాషలోనే కొనసాగించాలని నిబంధన విధించారు. వీలైతే 8వ తరగతి వరకు కానీ, అంతకు మించిన తరగతుల వరకు కానీ మాతృభాషలోనే విద్యాబోధన చేయడం ఉత్తమమని ఈ కొత్త విధానంలో రాష్ట్రాలకు నిర్దేశించారు. ఇకమీదట మానవ వనరుల అభివృద్ధి శాఖ పేరును విద్యాశాఖగా మార్చడానికి మంత్రివర్గం ఆమోదముద్ర వేసింది.
సకల విద్యా ప్రాప్తిరస్తు
నూతన విద్యా విధానంలో విద్యార్థుల సమగ్ర వికాసానికే పెద్దపీట వేశారు. అదే సమయంలో భారమూ తగ్గించే ప్రయత్నం చేశారు. మన విద్యా ప్రమాణాలు అంతర్జాతీయస్థాయిని అందుకునేలా మార్పులకు శ్రీకారం చుట్టారు. జాతీయ విద్యా విధానాన్ని తొలుత 1968లో, తర్వాత 1986లో రూపొందించారు. దానికి 1992లో పరిమితంగా సవరణలు చేశారు. ఒక రకంగా చెప్పాలంటే 1986 విధానమే 34 ఏళ్లుగా కొనసాగుతూ వచ్చింది. దాని స్థానంలో కొత్త విధానం రూపొందించడానికి మోదీ ప్రభుత్వం 2016 మే 27న టీఎస్‌ఆర్‌ సుబ్రహ్మణ్యం కమిటీ, 2019 మే 31న కె.కస్తూరిరంగన్‌ కమిటీని ఏర్పాటు చేసింది. కస్తూరిరంగన్‌ కమిటీ నివేదికను ఇప్పుడు ఆమోదించింది.
కొత్తగా 3 కోట్ల సీట్లు
2035 నాటికి ‘స్థూల నమోదు నిష్పత్తి’ (గ్రాస్‌ ఎన్‌రోల్‌మెంట్‌ రేషియో)ని ఇప్పుడున్న 26.3% నుంచి 50%కి తీసుకెళ్లాలని లక్ష్యంగా పెట్టుకున్నారు. దీనివల్ల ఉన్నత విద్యా సంస్థల్లో కొత్తగా 3 కోట్ల సీట్లు వస్తాయి.
* అన్ని కోర్సుల్లో హోలిస్టిక్‌, మల్టీ డిసిప్లినరీ విద్యా విధానాన్ని తీసుకొస్తారు. సబ్జెక్టులను సరళంగా మార్చనున్నారు.
* యూజీ కోర్సుల్లో బహుళ ప్రవేశాలు, నిష్క్రమణ (మల్టిపుల్‌ ఎంట్రీ/ఎగ్జిట్‌) విధానాన్ని ప్రవేశపెట్టనున్నారు. ఇప్పుడున్న విధానంలో 4 ఏళ్ల డిగ్రీ విద్యార్థి ఆరు సెమిస్టర్ల తర్వాత చదువుకోలేని పరిస్థితి వస్తే పూర్తిగా మానేయాల్సి ఉంటుంది. కొత్త విధానంలో ఒక ఏడాది తర్వాత విద్యార్థి మానేస్తే సర్టిఫికెట్‌ ఇస్తారు. రెండేళ్ల తర్వాత మానేస్తే డిప్లొమా, 3-4 ఏళ్ల తర్వాత డిగ్రీ అందిస్తారు.
* ఉద్యోగాలకు వెళ్లాలనుకున్న వారికి మూడేళ్ల డిగ్రీ, పరిశోధన రంగం వైపు వెళ్లాలనుకున్నవారికి నాలుగేళ్ల డిగ్రీ ప్రోగ్రాం అమలు చేయనున్నారు. నాలుగేళ్ల డిగ్రీ చేసిన వారికి ఓ ఏడాది పీజీ కోర్సు ఉంటుంది. దాని తర్వాత ఎంఫిల్‌ చేయాల్సిన అవసరం లేకుండానే పీహెచ్‌డీకి వెళ్లొచ్చు. మాస్టర్స్‌తో కలిపి అయిదేళ్ల ఇంటిగ్రేటెడ్‌ బ్యాచిలర్‌ డిగ్రీ అమలు చేస్తారు. ఎంఫిల్‌ను తొలగిస్తారు.
నిధుల పెంపుతో చేయూత
సాధ్యమైనంత త్వరగా జీడీపీలో 6% నిధులు విద్యారంగానికి కేటాయిస్తారు. ప్రస్తుతం - కేంద్ర రాష్ట్ర ప్రభుత్వాలు కలిపి 4.4% నిధులు ఇస్తున్నాయి.
* అమెరికాలో నేషనల్‌ సైన్స్‌ ఫౌండేషన్‌ ఉన్నట్లుగా దేశంలో నేషనల్‌ రీసెర్చి ఫౌండేషన్‌ ఏర్పాటు చేస్తారు. శాస్త్ర, సామాజిక శాస్త్రాల విభాగాల్లో చేపట్టే భారీ పరిశోధన కార్యక్రమాలకు దీని ద్వారా ఆర్థిక చేయూత అందిస్తారు. పరిశోధన, నవ్యావిష్కరణలు, పేటెంటింగ్‌లో ఈ ఫౌండేషన్‌ ద్వారా సాయం చేస్తారు.
* విద్యా రంగాన్ని అంతర్జాతీయీకరణ చేస్తారు. విదేశీ విద్యాసంస్థలు ఇక్కడ ప్రాంగణాలు ఏర్పాటు చేసుకోవచ్చు. విదేశీ విద్యార్థులు భారత్‌కు వచ్చి చదువుకొనేలా ప్రోత్సహిస్తారు.
తెలుగులోనూ ఇ-కంటెంట్‌
* ఇప్పటి వరకు ఇంగ్లిష్‌, హిందీలకే పరిమితమైన ఈ-కంటెంట్‌ను తెలుగుతోపాటు 8 భారతీయ భాషల్లో అభివృద్ధి చేసి అమల్లోకి తెస్తారు.
* అన్ని ఉన్నత విద్యాసంస్థల్లో వర్చువల్‌ ల్యాబ్స్‌ ఏర్పాటు చేస్తారు.
* విద్యా రంగంలో సాంకేతిక వ్యవస్థను విస్తృతంగా ఉపయోగించడానికి ప్రైవేటు, ప్రభుత్వ, సాంకేతిక రంగాన్ని ఒకే వేదిక మీదికి తెస్తూ ‘నేషనల్‌ ఎడ్యుకేషనల్‌ టెక్నాలజీ ఫోరం’ ఏర్పాటు చేస్తారు.
పాఠశాల విద్యా విధానంలో...
పూర్వ ప్రాథమిక విద్యను (ప్రీ ప్రైమరీ) సార్వత్రీకరిస్తారు. దీనికి సంబంధించిన పాఠ్యాంశాలను ఎన్‌సీఈఆర్‌టీ అభివృద్ధి చేస్తుంది. 3 నుంచి 6 ఏళ్ల లోపు పిల్లలకు ఆటలు, కార్యకలాపాల ఆధారమైన సరళ పాఠ్యాంశాలను అమల్లోకి తెస్తారు.
* 1 నుంచి 3 తరగతులు చదివే 6-9 ఏళ్ల విద్యార్థులు ప్రాథమికమైన అక్షరాలు, అంకెలు సరిగా గుర్తుపట్టి చదివేలా, లెక్కలు చేసేలా తీర్చిదిద్దేందుకు ఒక నేషనల్‌ మిషన్‌ ఏర్పాటు చేస్తారు. ప్రాథమిక దశలో విద్యార్థులు నిర్దేశిత పాఠ్యాంశాలను సరిగా నేర్చుకొనేలా తీర్చిదిద్దడమే ఈ మిషన్‌ ప్రధాన ఉద్దేశం.
* బాలికల విద్యాభివృద్ధి కోసం ప్రత్యేక నిధి ఏర్పాటు చేస్తారు. కస్తూర్బా గాంధీ బాలికా విద్యాలయాలను ఇప్పుడున్న 8, 10 తరగతుల నుంచి 12వ తరగతి వరకు పెంచుతారు.
* ఇప్పటివరకు బోర్డు పరీక్షలకు ఉన్న ప్రాధాన్యాన్ని తగ్గించనున్నారు. ఏటా ఒకసారి కాకుండా రెండుసార్లు పరీక్షలు నిర్వహిస్తారు. ప్రతి సబ్జెక్ట్‌లో విద్యార్థులకు రెండు స్థాయిలు ఉంటాయి. బట్టీ పట్టే సామర్థ్యాన్ని కాకుండా వారిలోని తెలివితేటలను పరీక్షించేలా వీటిని తీర్చిదిద్దుతారు. రోజువారీ జీవితంలో ఎదురయ్యే సమస్యలను ఎదుర్కోవడంలో విద్యార్థుల సామర్థ్యాన్ని పరీక్షించేలా వాటిని నిర్వహిస్తారు.
పురోగతి నివేదికలూ మారిపోతాయి
విద్యార్థుల పురోగతి నివేదిక (ప్రోగ్రెస్‌ రిపోర్ట్‌)లో మార్పులు తెస్తారు. ఇప్పటివరకు విద్యార్థి మార్కులతోపాటు, వారి ప్రవర్తన గురించి టీచర్లు రాసే అభిప్రాయాలు మాత్రమే అందులో ఉంటున్నాయి. ఇకమీదట విద్యార్థి స్వీయ అభిప్రాయంతోపాటు, వారి సహాధ్యాయి, టీచర్ల అభిప్రాయాలు కూడా రాయాల్సి ఉంటుంది. ఏటా విద్యార్థులు నేర్చుకోవాల్సిన జీవన నైపుణ్యాల (లైఫ్‌స్కిల్స్‌) గురించి తల్లిదండ్రులతో మాట్లాడి నివేదిక రూపొందిస్తారు. 12వ తరగతి ముగించుకొని బయటికెళ్లే సమయానికి వారు ఏయే నైపుణ్యాలు నేర్చుకున్నారన్నది దానిలో నిక్షిప్తం చేస్తారు.
ఏ భాషనూ బలవంతంగా రుద్దవద్దు
త్రిభాషా సూత్రంతో సహా అన్ని స్థాయి తరగతుల్లో సంస్కృతం ఉండేలా చూడాలని, దాన్ని ఎంచుకొనే స్వేచ్ఛను విద్యార్థులకే వదిలిపెట్టాలని కొత్త విధానం స్పష్టం చేసింది. ఇతర భారతీయ ప్రాచీన భాషలను ఎంచుకొనే అవకాశాన్ని కూడా విద్యార్థులకు కల్పించాలని పేర్కొంది. విద్యార్థులపై ఏ భాషనూ బలవంతంగా రుద్దొద్దని స్పష్టం చేసింది. భారతీయ భాషలను విద్యార్థులు చాలా ఆనందంగా నేర్చుకొనే వాతావరణాన్ని కల్పించాలని పేర్కొంది. పలు విదేశీ భాషలు నేర్చుకోవడానికీ వీలు కల్పించాలని సిఫార్సు చేసింది. దేశవ్యాప్తంగా ఇండియన్‌ సైన్‌ లాగ్వేంజ్‌ను ప్రామాణీకరించాలని పేర్కొంది. బధిర పిల్లల కోసం జాతీయ, రాష్ట్రస్థాయిల్లో పాఠ్యాంశాలు అభివృద్ధి చేయాలంది. భారతీయ భాషల సంరక్షణతోపాటు, వాటి వినియోగాన్ని పెంచి, వాటికి గతిశీలతను తీసుకురావాల్సిన అవసరం ఉన్నట్లు నూతన విద్యా విధానం పేర్కొంది.

10+2+3 బదులు 5+3+3+4
పాఠ్యక్రమాల నిర్మాణాన్ని పూర్తిగా మారుస్తున్నారు. ప్రస్తుతం 10+2+3 విధానం ఉంది. పదోతరగతి వరకు విద్యార్థులకు దశలవారీ పాఠ్యాంశాలు ఉంటాయి. ప్లస్‌టూకి వెళ్లినవారికి ప్రత్యేక సబ్జెక్ట్‌లు వస్తాయి. ఇప్పుడు ఆ విధానాన్ని మార్చి 5+3+3+4 ఏళ్ల పాఠ్యక్రమ విధానాన్ని తీసుకొస్తున్నారు. ఇందులో 3 నుంచి 6 ఏళ్లవరకు పిల్లలకు ప్లేస్కూల్‌ ఉంటుంది. వారికి ఎనిమిదేళ్లు వచ్చేంతవరకూ ఆటలు, ఇతర కార్యకలాపాలు, అనుభవ పూర్వకంగా నేర్చుకోవడం వంటివి ఉంటాయి. 3 నుంచి 8 ఏళ్ల లోపు వారు ఫౌండేషన్‌ స్టేజిలో, 8 నుంచి 11 ఏళ్ల మధ్య వారు ప్రిపరేటరీ స్కూలింగ్‌లో, 11-14 ఏళ్ల వారు మిడిల్‌ స్కూల్‌లో, 14-18 ఏళ్లవారు సెకెండరీ స్థాయిలో ఉంటారు. 6 నుంచి 8 తరగతుల్లో ప్రత్యేక పాఠ్యాంశాలు ప్రవేశపెడతారు. 9 నుంచి 12వ తరగతి వరకు విద్యార్థులు ఏ కూర్పులోనైనా సబెక్టులు తీసుకోవచ్చు. అంటే ఫిజిక్స్‌తో పాటు ఫ్యాషన్‌ డిజైనింగ్‌ కానీ, ఆహార తయారీ కోర్సులు కానీ, ఇతర వృత్తివిద్యా కోర్సులు కానీ ఎంచుకోవచ్చు. విద్యాహక్కును 1 నుంచి 8వ తరగతి వరకే పరిమితం చేయకుండా ప్రీ స్కూల్‌ నుంచి 12వ తరగతి వరకు విస్తరింపజేస్తారు.
డిజిటల్‌ లాకర్లలో పాత క్రెడిట్లు
ఒకటి రెండు సంవత్సరాలు చదివిన తర్వాత విద్యార్థులు ఏదైనా కారణాలతో చదువు మానేసినా, మళ్లీ తనకు వీలైన సమయంలో దానికి కొనసాగించుకునే వెసులుబాటు కల్పిస్తారు. అప్పటివరకు ఆ విద్యార్థి చదివిన ఒకటి, రెండు సంవత్సరాలకు సంబంధించిన క్రెడిట్స్‌.. డిజిటల్‌ లాకర్స్‌లో భద్రంగా ఉంటాయి. విద్యార్థి మళ్లీ తొలి సంవత్సరం నుంచి చదవాల్సిన అవసరం లేదు. అప్పటివరకు తన డిజిటల్‌ లాకర్‌లో ఉన్న క్రెడిట్స్‌ను ఉపయోగించుకొని మిగిలిన సంవత్సరాలు పూర్తిచేయొచ్చు.
ప్రాథమిక స్థాయి నుంచే సైన్స్‌పై ఆసక్తి
సైన్స్‌, లెక్కలపై విద్యార్థుల్లో ఆసక్తి పెంచేందుకు ప్రాథమిక స్థాయి నుంచే వారిని ప్రోత్సహిస్తారు. 6వ తరగతి నుంచి విద్యార్థులకు కోడింగ్‌ నేర్పిస్తారు. ప్రస్తుతం విద్యార్థులు సంగీతం, కళలు, ఆటలు, ఇతర ఆసక్తికర అంశాలకు సమయం కేటాయించలేకపోతున్నారు. దీనివల్ల సైన్స్‌పై ఆసక్తి, సమస్యలను పరిష్కరించే తత్వం, సంక్లిష్టమైన ఆలోచనా విధానం వారిలో తగ్గిపోతోంది. దీని దృష్ట్యా- ఇప్పుడున్న పాఠ్యాంశాలను అత్యవసర అంశాల వరకే పరిమితం చేసి మిగతా వాటిని తగ్గిస్తారు. వృత్తి విద్యా కోర్సులను 6వ తరగతినుంచే ప్రారంభిస్తారు. ఇందులో ఇంటర్న్‌షిప్‌ సైతం ఉంటుంది.
యూజీసీ, ఏఐసీటీఈ ఉండవు
ప్రస్తుతం విద్యావ్యవస్థ నియంత్రణ కోసం యూజీసీ, ఏఐసీటీఈ, జాతీయ ఉపాధ్యాయ విద్యా మండలి వంటి వ్యవస్థలున్నాయి. వీటన్నింటినీ విలీనం చేసి మొత్తం ఉన్నత విద్యా వ్యవస్థ నియంత్రణకు ఒకే వ్యవస్థను ఏర్పాటు చేస్తారు.
* అన్ని ప్రభుత్వ, ప్రైవేటు విద్యాసంస్థలకు ఒకే నిబంధనలు అమలుచేస్తారు.
ఈ సంస్కరణల కోసం విద్యారంగం చాలాకాలంగా ఎదురుచూస్తోంది. రాబోయే రోజుల్లో లక్షల మంది జీవితాలను ఈ విధానం మార్చబోతోంది. విద్యతో మన దేశం మరింతగా కాంతులీనాలి, సుసంపన్నత సాధించాలి.
-ప్రధాని నరేంద్రమోదీ
సరికొత్త సంస్కరణలు
ఇప్పటిలాగా... గణితం ఎంచుకున్నవారు చరిత్రపై ఆసక్తి ఉంటే వదలిపెట్టుకోవాల్సిన అవసరం లేదు. అలాగే... డిగ్రీలో ఓసారి చేరి, ఇష్టం లేకున్నా మూడేళ్ళు తప్పనిసరిగా అదే చదవాల్సిన అవసరమూ లేదు. తమకు ఇష్టం వచ్చిన కాంబినేషన్లలో సబ్జెక్ట్‌లు తీసుకోవచ్చు.... ఇష్టం వచ్చినప్పుడు ఆ కోర్సు నుంచి వైదొలగవచ్చు. అప్పటి వరకు గుర్తింపు ఇస్తారు. మళ్లీ కుదిరినప్పుడు కొనసాగించవచ్చు. పరిశోధన చేయాలనుకుంటే నాలుగో ఏడాది వరకు ఉండి చేయొచ్చు కూడా! అలా విద్యార్థికి వెసులుబాటు ఉండేలా సబ్జెక్ట్‌ల ఎంపికలో, కోర్సు గడువులో (3-4 ఏళ్ళు) మార్పులు తెచ్చారు. ఇంజినీరింగ్‌ వాళ్ళు ఆర్ట్స్‌ చదివేలా... ఆర్ట్స్‌ ఎంచుకున్నవాళ్ళు సైన్సూ చదివేలా ఏర్పాటు చేస్తారు.
* తొలి సంవత్సరం: సర్టిఫికెట్‌
* రెండో ఏడాది: అడ్వాన్స్‌ డిప్లమో
* మూడో ఏడాది: బ్యాచిలర్‌ డిగ్రీ
* నాలుగో ఏడాది: పరిశోధనతో కూడిన బ్యాచిలర్‌ డిగ్రీ ఇస్తారు.
టీచర్‌ కావాలంటే ఇక....
ఉపాధ్యాయ సామర్థ్యాలపై కొత్త విధానంలో ప్రత్యేక దృష్టిసారించారు. ఉపాధ్యాయుల నియామకాలను ఇకమీదట పారదర్శక-పటిష్ఠ పద్ధతిలో చేపడతారు.
* బోధన పట్ల నిబద్ధత, తపన ఉన్నవారు
* అకడమిక్‌గా, బోధనాపరంగా, పరిశోధనపరంగా, ప్రజాసేవ పట్ల అంకితభావాలను కూడా పరీక్షించి తీసుకుంటారు.
* వారి సామర్థ్యాల్ని మదించిన తర్వాతే... పదోన్నతులుంటాయి.
* ఇందుకోసం జాతీయస్థాయిలో ప్రమాణాలను రూపొందిస్తారు.
ఎంబీబీఎస్‌, ఇంజినీరింగ్‌ మాతృభాషలో?
భారతీయ భాషలకు, మాతృభాషలకు కొత్త విద్యావిధానం పెద్దపీట వేస్తోంది. కేవలం ప్రాథమిక స్థాయిలోనే కాకుండా ఉన్నత విద్యలో కూడా మాతృభాష, భారతీయ భాషలను ప్రోత్సహించాలని నిర్ణయించింది. ఇందుకోసం ఇండియన్‌ ఇనిస్టిట్యూట్‌ ఆఫ్‌ ట్రాన్స్‌లేషన్‌, ఇంటర్‌ప్రెటేషన్‌ (ఐఐటీఐ), పాళి, పెర్షియన్‌, పాకృతం, సంస్కృతాలకు సంబంధించి జాతీయ సంస్థలను ఏర్పాటు చేసి... అన్ని ఉన్నతవిద్యా సంస్థల్లో వీటి విభాగాలుండేలా చూస్తారు. ఉన్నత విద్యలోని అనేక కోర్సులను మాతృభాషల్లో, స్థానిక భాషల్లో నిర్వహించేందుకు ప్రోత్సహిస్తారు.
ఏ భాషనూ రుద్ద కూడదు...
స్కూల్‌ నుంచి మొదలెడితే... ఉన్నత విద్య వరకు ప్రతిదశలోనూ సంస్కృతం ఒక ఆప్షనల్‌ సబ్జెక్ట్‌గా అందుబాటులో ఉంటుంది. మిగిలిన భాషలు కూడా తీసుకోవచ్చు. ఏ భాషనూ విద్యార్థిపై బలవంతంగా రుద్దరు. సెకండరీ స్థాయిలో విదేశీవిద్యల్ని కూడా పరిచయం చేస్తారు.
3, 5, 8లోనే పరీక్షలు
3, 5, 8 తరగతుల్లోనే స్కూల్‌ పరీక్షలుంటాయి. అవి కూడా నిర్దేశిత బోర్డు ద్వారా నిర్వహిస్తారు. 10, 12 తరగతులకు యధావిధంగానే పరీక్షలుంటాయిగాని... వాటి తీరు మారుతుంది. విద్యార్థుల జ్ఞాపకశక్తిని మాత్రమే కాకుండా... వారి జ్ఞానాన్ని, విశ్లేషణలను ఇతరత్రా నైపుణ్యాలను పరీక్షిస్తారు. ఇందుకోసం పరాఖ్‌ (విద్యార్థుల సామర్థ్యాలను పరీక్షించి, విశ్లేషించే సంస్థ)ను ఏర్పాటు చేస్తున్నారు. ఆరో తరగతి తర్వాతి నుంచే వృత్తివిద్యలను అందరికీ పరిచయం చేస్తారు. అంటే 12వ తరగతి పూర్తయ్యేసరికి ప్రతి ఒక్కరికీ ఏదైనా ఓ వృత్తివిద్యలో ప్రవేశం ఉంటుంది.
ఎంబీబీఎస్‌ చేస్తూ కోడింగూ...
ఇప్పటిదాకా వృత్తివిద్యా కోర్సులది పూర్తిగా ప్రత్యేక దారి. సాంకేతిక విద్య, లా, వ్యవసాయ విద్య, వైద్యం, ఆరోగ్యం... ఇలా వేటికవే విడివిడిగా సాగుతున్నాయి. వీటన్నింటినీ ఉన్నతవిద్యలో భాగం చేసి... మల్టీడిసిప్లినరీగా వెసులుబాటు కల్పిస్తారు. అంటే... ఎంబీబీఎస్‌ చేస్తూనే కావాలంటే కోడింగ్‌ కూడా నేర్చుకోవచ్చు.
అమలుపైనే సందేహం
నూతన విద్యా విధానంలో ఆశయాలు, ఉద్దేశాలు బాగున్నాయి. కాకపోతే వాటిని సాధించేందుకు కార్యాచరణ ఏమిటన్నది ప్రస్తావించలేదు. లక్ష్యం నెరవేరాలంటే బడ్జెట్‌ కూడా అవసరమే. దిల్లీ రాష్ట్ర ప్రభుత్వం 26 శాతం నిధులు కేటాయించడం వల్లే ఇప్పుడు అక్కడ పాఠశాలల్లో సీట్ల కోసం డిమాండ్‌ పెరిగింది. అంత బడ్జెట్‌ను కేంద్రం, రాష్ట్రాలు కేటాయించగలవా? అన్నది ప్రశ్నార్థకం. ఉన్నత విద్యను కూడా మాతృభాష లేదా స్థానిక భాషలో బోధించడం మాత్రం మంచిది కాదు.
-ఆచార్య ఎస్‌.సత్యనారాయణ, విశ్రాంత ఆచార్యులు, ఓయూ
నిధులు భారీగా అవసరం
నూతన విద్యా విధానంలో చాలా మంచి అంశాలున్నాయి. అది అమలైతే విద్యావ్యవస్థలో పలు మార్పులు రావడం ఖాయం. లక్ష్యాలు చేరుకోవాలన్నా...విజయవంతం కావాలన్నా భారీగా నిధులు అవసరం. కాకపోతే విద్య ఉమ్మడి జాబితాలో ఉన్నందున అమలులో రాష్ట్ర ప్రభుత్వాల పాత్ర కూడా కీలకం. ప్రైవేటు విద్యాసంస్థల యాజమాన్యాలు లాభాలు గడించకుండా ప్రభుత్వాలు నియంత్రించడం ఆచరణలో సాధ్యమేనా అన్నది వేచిచూడాలి.
-నాగప్రసాద్‌ తుమ్మల,పాలకమండలి సభ్యుడు, ఫిక్కీ అరైజ్‌
ఏకపక్ష నిర్ణయం
కేంద్ర మంత్రివర్గం నూతన విద్యా విధానాన్ని ఏకపక్షంగా ఆమోదించడం సరికాదు. ఆరెస్సెస్‌ ఎజెండాను అమలు చేయడంలో భాగంగానే మోదీ సర్కారు విధ్వంసకర నిర్ణయానికి ఒడిగట్టింది. అఖిల భారత స్థాయిలో ఉపాధ్యాయులు, అధ్యాపకులు కలిసి మూణ్నెళ్లు అధ్యయనం చేసి ప్రత్యామ్నాయ విద్యా ప్రణాళికను కేంద్రానికి అందిస్తే.. దాన్ని కనీసం పరిగణనలోకి తీసుకోకపోవడం దారుణం.
- నారాయణ, సీపీఐ
శుభసూచకం
కేంద్ర ప్రభుత్వం ఆవిష్కరించిన నూతన విద్యావిధానాన్ని స్వాగతిస్తున్నా. ఇది శుభసూచకం, రాష్ట్రాలతో కలిసి దీనిని అమలు చేయాలనుకోవడం అభినందనీయం. దేశంలో 50 ఏళ్ల తర్వాత మార్పు వైపు దృష్టి సారించడం ఆశాజనక పరిణామం.
- వినోద్‌కుమార్‌, తెలంగాణ ప్రణాళిక సంఘం ఉపాధ్యక్షుడు
నిధుల కేటాయింపులోస్పష్టత ఉండాలి
నూతన విద్యారంగ సిఫారసుల్లో విద్యారంగానికి కేటాయించే నిధులపై స్పష్టత ఉండాలి. రానున్న పదేళ్లలో 20% పెంపును తప్పనిసరి చేయాలి.
- కత్తి నరసింహారెడ్డి, ఎమ్మెల్సీ ఏపీ
నూతన విధానం భేష్‌
నూతన విద్యావిధానం బాగుంది. పాశ్చాత్య వ్యవస్థలు, పద్ధతులను కాదని.. మన అవసరాలకు తగ్గట్లు విద్యావిధానాన్ని తీర్చిదిద్దాలని నిర్ణయించడం హర్షణీయం. స్థానికతకే పట్టం కట్టాలన్న ప్రధాని మోదీ ఆలోచనలకు అనుగుణంగా కొత్త విధానం ఉంది. నాణ్యమైన విద్యను ప్రతి ఒక్కరికి అందించాలన్న ఆలోచన, ప్రపంచీకరణ అవసరాలకు తగ్గట్లు నైపుణ్యాలు నేర్పాలన్న లక్ష్యం సాకారమవ్వాలి.
- ఆచార్య ముర్రు ముత్యాలునాయుడు, మాజీ ఉపకులపతి,ఆదికవి నన్నయ్య విశ్వవిద్యాలయం
మాతృభాషనుకాపాడుతుంది
మాతృభాషల్ని కాపాడాలని భారత రాజ్యాంగం చెప్పింది. ఇప్పుడు కేంద్రం తీసుకున్న నిర్ణయం మాతృ భాషలు మృత భాషలుగా మారకుండా కాపాడుతుంది. ఒకటో తరగతి నుంచి ఆంగ్ల మాధ్యమాన్ని ప్రవేశపెట్టాలన్న ఏపీ ప్రభుత్వ నిర్ణయాన్ని కొట్టేస్తూ హైకోర్టు ఇచ్చిన తీర్పు చరిత్రాత్మకం. అది అందరికీ అర్ధమయ్యేలా తెలుగులోకి అనువదించి పుస్తకరూపంలో తీసుకొస్తున్నాం.
- మండలి బుద్ధప్రసాద్‌, అధికారభాషా సంఘం పూర్వ ఛైర్మన్‌.
ఇంటర్‌ పునఃమూల్యాంకనం ఫలితాల వెల్లడి
ఈనాడు, హైదరాబాద్‌: ఇంటర్‌మీడియట్‌ పునఃమూల్యాంకనం, పునఃలెక్కింపు ఫలితాలు జులై 28న‌ వెల్లడయ్యాయి. మొత్తం 37,387 మంది విద్యార్థులు 72,496 జవాబు పత్రాల్లో పునఃమూల్యాంకనం, పునఃలెక్కింపు కోసం దరఖాస్తు చేసుకున్నారు. వాటిల్లో 71,298 జవాబుపత్రాల మూల్యాంకనం పూర్తయ్యిందని, మిగిలిన 1198కి సంబంధించి జులై 31వ తేదీ నాటికి పూర్తవుతాయని ఇంటర్‌ బోర్డు కార్యదర్శి సయ్యద్‌ ఉమర్‌ జలీల్‌ తెలిపారు. సవరించిన మార్కులు, స్కాన్‌ చేసిన జవాబు పత్రాలను జులై 29 నుంచి టీఎస్‌బీఐఈ వెబ్‌సైట్‌ ద్వారా డౌన్‌లోడ్‌ చేసుకోవచ్చు. సవరించిన ఆన్‌లైన్‌ మెమోలను మాత్రం ఆగస్టు 1వ తేదీ నుంచి డౌన్‌లోడ్‌ చేసుకునేలా అందుబాటులో ఉంచనున్నారు.
ఆన్‌లైన్‌ బాటలో పోటీ!
* ఎంపిక‌, స‌ద్వినియోగాల‌కు మెల‌కువ‌లు
ఎంపిక, సద్వినియోగాలకు మెలకువలు సాంకేతిక అభివృద్ధితో కొన్నేళ్లుగా పెరుగుతూ వచ్చిన ఆన్‌లైన్‌ తరగతులు ఇటీవలి లాక్‌డౌన్‌ పరిణామాలతో అమాంతం వేగం పుంజుకున్నాయి. ఈ నేపథ్యంలో యూపీఎస్‌సీ, రాష్ట్ర సర్వీస్‌ కమిషన్లు, స్టాఫ్‌ సెలక్షన్‌ కమిషన్, ఆర్‌ఆర్‌బీ, బ్యాంకింగ్‌ లాంటి పోటీ పరీక్షలకు ఆన్‌లైన్‌ శిక్షణలు విస్తృతంగా అందుబాటులోకి వచ్చాయి. వీటిలో కొన్ని ఉచితం. ఫీజు చెల్లింపులతో లభించేవి ఎక్కువ. ఆన్‌లైన్‌ విద్యా వనరుల ప్రామాణికత, వాటి సద్వినియోగం విషయంలో అభ్యర్థులు ఏయే అంశాలు గమనించాలి? ఎలా ముందుకు సాగాలి?
సాంస్కృతిక ప్రాధాన్యం: చరిత్ర లాంటి సబ్జెక్టుల్లో రాజకీయ, సాంస్కృతిక, ఆర్థిక, పరిపాలన విభాగాలుంటాయి. ఆన్‌లైన్‌ వనరుల్లో సిలబస్‌లో ఎగ్జామినర్‌ నిర్దేశించిన విభాగాలున్నాయో లేదో చూసుకోవాలి. ఇటీవలికాలంలో రాజకీయ, పరిపాలన అంశాల కంటే సాంస్కృతిక విషయాలకు అధిక ప్రాధాన్యం ఇస్తున్నారు. ఆ ధోరణిలో ఆన్‌లైన్‌ తరగతులున్నాయా లేదా పరిశీలించాలి.
కంటెంట్‌పై ఏ జాగ్రత్తలు?
అన్నిటికీ ప్రాతినిథ్యం: పోటీ పరీక్షల్లో ఏదో ఒక విషయాన్ని కాకుండా విభిన్న అంశాలను లోతుగా పరిశీలించాల్సివుంటుంది. మరి ఆన్‌లైన్‌ కోచింగ్‌లో అన్ని విషయాలకూ ప్రాధాన్యం ఇస్తున్నారా లేదా అనేది మొదట గమనించాలి. పట్టు ఉన్న ఒకటి రెండు అంశాలను బాగా ఎత్తిచూపుతూ మిగతావి పట్టించుకోని పరిస్థితి ఉంటే నష్టదాయకం. అందుకని అన్ని అంశాలకూ ప్రాతినిధ్యం ఉన్నదీ లేనిదీ రూఢి చేసుకోవటం అవసరం.
లక్షల మందితో పోటీ పడి, ఉద్యోగ నియామకం పొందాలంటే.. కృషి మాత్రమే కాకుండా ప్రతి అంశంలోనూ అప్రమత్తత, శ్రద్ధ అవసరం. ముఖ్యంగా పోటీ పరీక్షలకు ఆన్‌లైన్లో లభించే శిక్షణ, స్టడీ మెటీరియల్‌ల నాణ్యతను బేరీజు వేసుకోవటం చాలా ముఖ్యం. కరోనా వల్ల కలిసొచ్చిన కాలాన్ని వినియోగించుకోవాలనే ఉద్దేశంతో పరిజ్ఞానమూ, అనుభవమూ లేకుండా ఏవో కొద్ది వీడియోలు తయారుచేసో, ప్రచారపు జోరు పెంచో అభ్యర్థులను ఆకర్షించాలనుకునే సంస్థల విషయంలో జాగ్రత్త అవసరం. కొన్ని సంస్థలు సోషల్‌ మీడియాలో వివిధ సమూహాలు ఏర్పాటుచేసి వాటి ద్వారా గ్రామీణ ప్రాంత అభ్యర్థులను ఆకట్టుకునే ప్రయత్నం చేస్తున్నాయి.
నాణ్యత లేని శిక్షణల వల్ల పరీక్షార్థులకు డబ్బే కాకుండా విలువైన సమయమూ వృథా అవుతుంది. అందుకే ఆన్‌లైన్‌ శిక్షణను ఉపయోగించుకోదల్చినవారు కొన్ని ముఖ్యమైన అంశాలను గమనించాలి.
పరీక్షకు తగ్గట్టు: కంటెంట్‌ వివరణలో అనుసరించిన ధోరణి పరీక్ష తీరుకు అనుకూలంగా ఉందా లేదా అనేది పరిశీలించుకోవాలి. గ్రూప్‌-1, సివిల్స్‌ మెయిన్స్‌లకూ, ఇతర ఆబ్జెక్టివ్‌ పరీక్షలకూ బోధన విధానంలో స్పష్టమైన తేడా ఉండాలి. డిస్క్రిప్టివ్‌ ప్రశ్నలకు సమాధానాలు రాసేటప్పుడు తక్కువ సమయంలో ఎక్కువ సమయాన్ని అందించేలా బోధన ఉండాలి. అలాంటి జాగ్రత్తలు తీసుకునే ఆన్‌లైన్‌ శిక్షణల వల్లనే ప్రయోజనం ఉంటుంది.
బిట్ల బోధన: ఆబ్జెక్టివ్‌ పరీక్షల కోసం చాలామంది బిట్లుబిట్లుగా ఆన్‌లైన్‌లో బోధిస్తున్నారు. ఇది సరైన పద్ధతి కాదు. ఒక విషయాన్ని పూర్తిగా వివరించాక బిట్ల రూపంలో ప్రశ్నిస్తే అభ్యర్థులకు ఎక్కువ మేలు జరుగుతుంది. అలాంటి ధోరణిలో రూపొందించిన ఆన్‌లైన్‌ శిక్షణలపై మొగ్గు చూపవచ్చు.
శాస్త్ర సాంకేతికం: జనరల్‌ సైన్స్‌లో ఉన్న భౌతిక, రసాయన, జీవశాస్త్రాలూ, శాస్త్ర సాంకేతిక అంశాలను ఆన్‌లైన్‌లో ఏ విధంగా అందిస్తున్నారనేది కూడా అభ్యర్థుల భవితను నిర్ణయిస్తుంది. ఆర్ట్స్‌ సబ్జెక్టులవారికి ఈ విషయాలు మింగుడుపడవు. అందువల్ల ఉపన్యాస ధోరణితో కొనసాగే వీడియోల వల్ల పెద్ద ప్రయోజనం ఉండదు. అనుభవం గడించిన సంస్థలు యానిమేటెడ్‌ వీడియోలు, ఇమేజ్‌ను వివరించే వీడియోలను సిద్ధం చేస్తుంటాయి. కొన్ని సహజ అంశాలను వాస్తవ సమయంలో చిత్రీకరించి కూడా అభ్యర్థులకు అందుబాటులోకి తెస్తున్నారు. ఇలాంటి వాటి వల్ల తక్షణం అభ్యర్థికి విషయావగాహన కలుగుతుంది. శాస్త్ర సాంకేతిక విషయాల బోధనలో తాజా అంశాల జోడింపు అనేది ఓ ప్రాధాన్య అంశమని గుర్తించాలి.
విభిన్న కోణాలు: అరిథ్‌మెటిక్, రీజనింగ్, డేటా ఇంటర్‌ప్రెటేషన్‌ లాంటి సబ్జెక్టులకు ఎస్‌ఎస్‌సీ, ఆర్‌ఆర్‌బీ, బ్యాంకింగ్‌ మొదలైన పరీక్షల్లో చాలా ప్రాముఖ్యం ఉంటుంది. 50 నుంచి 75 శాతం సిలబస్‌ అంశాలుగా కూడా ఉంటాయి. ఇతర నియామకాల్లోనూ కనీసం 10-20 ప్రశ్నలు ఈ విభాగంలో ఉంటాయి. ఆన్‌లైన్‌ శిక్షణ సంస్థలు ఈ విభాగాల్లోని అంశాలపై విభిన్న కోణాల్లో ప్రశ్నలూ, షార్ట్‌కట్‌ పద్ధతులు సరిగా అందించాయా, సరైన పద్ధతుల్లో వివరణ ఉందా అనేది నిర్థరించుకోవాలి. సాధన కోసం వీలైనన్ని నమూనాలు వివరించటమూ ముఖ్యమే. అన్నిటికీ మించి తాజా ధోరణులకు అనుకూలంగా ప్రశ్నలు, కంటెంట్, ప్రాక్టీస్‌ బిట్లు వీడియోల రూపంలో ఇచ్చారో లేదో సరిచూసుకోవాలి.
ఆర్థిక వ్యవస్థ: సర్వీస్‌ కమిషన్‌ పరీక్షల్లో కీలక అంశమైన ఆర్థిక వ్యవస్థ వీడియోలూ/లైవ్‌ తరగతులూ ఎలా రూపొందించారనేది ముఖ్యం. ఆర్థిక వ్యవస్థ మౌలికాంశాలను బాగా కవర్‌ చేశారా? గత రెండు మూడు సంవత్సరాల బడ్జెట్లు, సర్వేలపై వీడియోలూ, లైవ్‌ తరగతులూ ఉన్నాయా? గమనించుకోవాలి. ఎందుకంటే... అత్యధిక ఆన్‌లైన్‌ శిక్షణ సంస్థలు ఈ ఏడాది బడ్జెట్, ఆర్థిక సర్వేల గురించి వివరిస్తున్నాయి గానీ గత ఏడాదీ, అంతకుముందు సంవత్సరంలో ఈ అంశాలపై దృష్టిపెట్టడం లేదు. పోటీ పరీక్షల్లో చాలా సందర్భాల్లో గత సంవత్సరపు అంశాలపైనా ప్రశ్నలు అడిగారని మర్చిపోకూడదు.
ఆంగ్ల బోధన తీరు: కొన్ని నియామక సంస్థల పోటీపరీక్షల్లో ఇంగ్లిష్‌కు ప్రాధాన్యం ఉంటుంది. పోటీ పరీక్షల్లో స్పోకెన్‌ ఇంగ్లిష్‌ ధోరణి కంటే వ్యాకరణ ఆధారిత ఆంగ్లానికే ప్రాధాన్యం ఎక్కువ. ఇలాంటి పరిస్థితిలో ఆన్‌లైన్‌ సంస్థల ఆంగ్ల బోధనలో స్పోకెన్‌ ఇంగ్లిష్‌ ధోరణి ఉందా, పోటీ పరీక్షల ధోరణి ఉందా చూసుకోవాలి. ఆన్‌లైన్‌ బోధనకు ప్రధాన వనరుగా ఉన్న యూట్యూబ్‌ చానళ్లలో స్పోకెన్‌ ఇంగ్లిష్‌కు అధిక ప్రాధాన్యం ఇచ్చే వీడియోలే ఎక్కువ. పోటీ పరీక్షల అవసరాన్ని వీరు సరిగా గుర్తించలేదని గ్రహించాలి.
సందేహ నివృత్తి: ఆన్‌లైన్‌ అభ్యాసంలో తరచూ ఎదురయ్యే సమస్య- అభ్యర్థులు తమ సందేహాలను ఎలా తీర్చుకోవాలనేది. కొన్ని సంస్థలు వారాంతంలో, అధ్యాయం పూర్తయిన తర్వాత లైవ్‌ తరగతుల ద్వారా సందేహాలు తీరుస్తున్నాయి. కొన్ని సంస్థలు ఈ-మెయిల్‌ ద్వారా అనుమానాలను నివృత్తి చేస్తున్నాయి. ఇలాంటి ఏర్పాట్లు ఉండటం చాలా ప్రయోజనకరం.
మెటీరియల్‌ను రూపొందించుకోవాలంటే..
పీడీఎఫ్‌ రూపంలో మెటీరియల్‌ కొంతవరకూ లభిస్తున్నా ఆ విధానంలో అభ్యర్థి అవసరాలు పూర్తిగా తీరవు. పైగా కొన్ని అవరోధాలూ ఏర్పడుతున్నాయి. పీడీఎఫ్‌లో అండర్‌లైన్‌ చేసుకోవటం, అదనపు నోట్సు రాసుకోవడం సులువుగా ఉండదు. పైగా ప్రతిసారీ ఈ ఫార్మాట్లో చదవాలంటే మొబైల్‌/టాబ్లెట్‌/లాప్‌టాప్‌లను వినియోగించాల్సివుంటుంది. ఈ ప్రక్రియ అభ్యర్థి కంటికి శ్రమ కలిగిస్తుంది. ఏకాగ్రత ఏర్పరుచుకోవడంలోనూ ఇబ్బంది ఏర్పరుస్తుంది.
రెగ్యులర్‌ తరగతి గదిలో అధ్యాపకుడు పాఠం బోధించేటపుడు అభ్యర్థులు రన్నింగ్‌ నోట్సు రాసుకోవడం ఎప్పటినుంచో వస్తున్నదే. అదే పద్ధతిలో ఆన్‌లైన్‌ వీడియోలూ, లైవ్‌ క్లాస్‌రూములో రన్నింగ్‌ నోట్సు రాసుకుని, సొంత నోట్సు తయారుచేసుకోవడం మేలైన నిర్ణయమవుతుంది. లేకుంటే మార్కెట్లో లభిస్తున్న ప్రామాణిక పుస్తకాన్ని తీసుకుని, లైవ్‌ క్లాసుల ద్వారా అదనంగా లభిస్తున్న సమాచారాన్ని జోడించుకోవచ్చు. పోటీ పరీక్షల్లో ఎప్పుడూ ఒకే మెటీరియల్‌పై ఆధారపడకూడదు. ఈ వాస్తవాన్ని దృష్టిలో పెట్టుకుని ఒకటికి మించిన వనరుల నుంచి సొంత నోట్సు చేసుకుంటే మెరుగైన ప్రయోజనం సిద్ధిస్తుంది. స్వయంగా నోట్సు రాసుకోవటం వల్ల విషయం బాగా జ్ఞాపకం ఉంటుంది. ఏకాగ్రతకు వీలు కలుగుతుంది. ఆన్‌లైన్‌ శిక్షణ సంస్థలు ఇచ్చే పీడీఎఫ్‌లు ఒక్కసారి చదువుకోవడానికి ఉపయోగపడతాయి గానీ దీర్ఘకాలిక సన్నద్ధతకు పెద్దగా ఉపకరించవు.
ఏ తరహా శిక్షణ మేలైనది?
పోటీ పరీక్షల్లో ఎప్పుడూ ఒకే మెటీరియల్‌పై ఆధారపడకూడదు. ఈ వాస్తవాన్ని దృష్టిలో పెట్టుకుని ఒకటికి మించిన వనరుల నుంచి సొంత నోట్సు చేసుకుంటే మెరుగైన ప్రయోజనం సిద్ధిస్తుంది. స్వయంగా నోట్సు రాసుకోవటం వల్ల విషయం బాగా జ్ఞాపకం ఉంటుంది.
* రికార్డు చేసిన వీడియోలను కొన్ని సంస్థలు మొబైల్‌ యాప్‌ ద్వారా అందిస్తున్నాయి. గృహిణులూ, ఉద్యోగులూ, ఇతర విద్యార్జనలో ఉన్నవారికి ఇది మేలైన విధానం. వారికి సమయం చిక్కినప్పుడల్లా వీడియోలు చూస్తూ విషయాన్ని నేర్చుకునే అవకాశం ఉంటుంది. ఎక్కడ వీలైతే అక్కడ అభ్యసించే వీలూ ఉంటుంది. ఈ విధానంలో ఇంటర్నెట్‌ అనుసంధానం అవసరం. యాప్‌ ద్వారా లభించే పాఠాలను సాధారణంగా నిల్వ చేసుకోవటం సాధ్యపడదు. అందువల్ల డేటా వ్యయం పెరుగుతుంది.
* కొన్ని సంస్థలు జూమ్‌ లాంటి యాప్‌ల ద్వారా తరగతులను స్ట్రీమింగ్‌ చేస్తున్నాయి. వీటివల్ల తక్షణ సమాచారం లభిస్తుంది కానీ వీలు చిక్కినప్పుడల్లా చదువుకోలేము. పైగా నిర్దేశించిన సమయంలో అభ్యర్థులు మిగతా పనులు వదులుకుని తరగతులు వినాల్సివుంటుంది. గృహిణులకూ, చిన్న ఉద్యోగాలు చేసుకునేవారికీ ఈ పద్ధతి అంత ప్రయోజనకారి కాదు.
* కొన్ని సంస్థలు పై రెండు రకాలూ వినియోగిస్తున్నాయి. కానీ వీటికి ఖర్చు ఎక్కువగా ఉంటుంది.
* వీడియోలను డౌన్‌లోడ్‌ చేసుకుని అవకాశం చిక్కినప్పుడల్లా చదువుకునే ఏర్పాటును కొన్ని సంస్థలు చేస్తున్నాయి. ఈ విధానంలో చిక్కల్లా...మొబైల్‌ /టాబ్లెట్‌/ లాప్‌టాప్‌లో కావల్సినంత స్టోరేజి ఉండకపోవటం.
* పెన్‌డ్రైవ్‌ లాంటి పద్ధతులు కొన్ని ఉన్నప్పటికీ వాటిలో అప్‌డేట్‌ సౌకర్యం ఉండక అభ్యర్థికి తాజా అంశాలతో కూడిన విషయ అవగాహన సాధ్యం కావటం లేదు.
అభ్యర్థులు ఈ అంశాలను పరిగణనలోకి తీసుకోవాలి.
- కొడాలి భవానీ శంకర్‌
బీఏ విద్యార్థీ గేట్‌ రాయొచ్చు
* బీటెక్‌ మూడో ఏడాది చదువుతున్నవారికీ అవకాశం
* ఒక్కో విద్యార్థి రెండు సబ్జెక్టుల్లో పరీక్షలు రాసేందుకు వెసులుబాటు
* గేట్‌ 2021లో పలు మార్పులు
ఈనాడు, హైదరాబాద్‌: ఐఐటీల్లో పీజీ, పీహెచ్‌డీ కోర్సుల్లో ప్రవేశానికి...కేంద్ర ప్రభుత్వరంగ సంస్థ(పీఎస్‌యూ)ల్లో ఉద్యోగాల కోసం నిర్వహిస్తున్న గ్రాడ్యుయేట్‌ ఆప్టిట్యూడ్‌ టెస్టు ఇన్‌ ఇంజినీరింగ్‌(గేట్‌) రాసేందుకు విద్యార్హతల్లో పలు మార్పులు చేశారు. గేట్‌-2021కి ఈ సారి బీఏ విద్యార్థులూ హాజరుకావొచ్చు. అందులో ర్యాంకు సాధించి ఐఐటీల్లో ఎంఏ కోర్సులు అభ్యసించవచ్చు. పీఎస్‌యూలు నిర్వహించే ఉద్యోగ ముఖాముఖీలను సైతం ఎదుర్కోవచ్చు. ఈ దఫా గేట్‌-2021 నిర్వహణ బాధ్యత తీసుకున్న ఐఐటీ బొంబాయి కరోనా పరిస్థితుల నేపథ్యంలో పలు మార్పులు చేసింది. ఇప్పటివరకు బీటెక్‌ నాలుగో సంవత్సరం చదువుతున్న వారే పరీక్ష రాయాల్సి వచ్చేది. దాన్ని సడలించి మూడో ఏడాది విద్యార్థులకు రాసే అవకాశం కల్పించారు.
ముఖ్యమైన మరికొన్ని మార్పులివీ..
* ఇప్పటివరకు 25 సబ్జెక్టుల్లో పరీక్షలు నిర్వహించేవారు. ఈ సారి కొత్తగా ఎన్విరాన్‌మెంటల్‌ సైన్స్‌ అండ్‌ ఇంజినీరింగ్‌, హ్యుమానిటీస్‌ అండ్‌ సోషల్‌ సైస్సెస్‌ పేపర్లను ప్రవేశపెడుతున్నారు. అంటే బీఎస్సీతోపాటు బీఏ విద్యార్థులు కూడా గేట్‌కు పోటీపడొచ్చు.
* గేట్‌ 2020 వరకు ఒక విద్యార్థి ఒక్క సబ్జెక్టులోనే పరీక్ష రాయాలి. ఇప్పుడు రెండు సబ్జెక్టులూ రాయవచ్చు. ఏ రెండు సబ్జెక్టులు రాయవచ్చనే విషయాన్ని త్వరలో వెల్లడిస్తారు.
* గతంలో రెండు విడతలుగా నాలుగు రోజులపాటు ఆన్‌లైన్‌ పరీక్షలు జరిపేవారు. ప్రస్తుతం కరోనా కారణంగా కొలువులు తగ్గుతాయని ఎక్కువ మంది ఉన్నత విద్య వైపు చూస్తారని భావిస్తున్నారు. దానికితోడు బీటెక్‌ మూడో ఏడాది విద్యార్థులకు కూడా అవకాశం ఇస్తుండటంతో భారీ సంఖ్యలో దరఖాస్తులు వస్తాయని భావించి ఈ సారి ఆరు రోజుల పాటు పరీక్షలు నిర్వహిస్తారు.

బీటెక్‌ విద్యార్థులకు అధిక ప్రయోజనం
ఎవరికి అవకాశం కల్పించినా గేట్‌ రాసే వారిలో 99 శాతం మంది బీటెక్‌ విద్యార్థులే ఉంటారు. ఈ దఫా బీటెక్‌ మూడో ఏడాది విద్యార్థులూ హాజరయ్యేందుకు అవకాశం ఇస్తున్నందున వారికి బాగా ప్రయోజనం కలగనుంది. ఇప్పటివరకు చివరి ఏడాది విద్యార్థులు గేట్‌ రాసిన తర్వాత మంచి పర్సంటైల్‌ రాకుంటే మళ్లీ ఏడాది వరకు ఎదురుచూడాల్సి వచ్చేది. తాజా మార్పు వల్ల మూడో ఏడాదిలోనే మంచి స్కోర్‌ సాధిస్తే ఆత్మవిశ్వాసం పెరుగుతుంది. ఆ స్కోర్‌కు మూడేళ్లపాటు విలువ ఉంటుంది కాబట్టి దాంతో ఐఐటీల్లో చేరొచ్చు. లేకుంటే తమ సత్తా తెలుసుకొని చివరి ఏడాదిలో ఇంకా బాగా సన్నద్ధం కావొచ్చు.
- బండారి సందీప్‌, డీజీఎం, టైమ్స్‌ ఇన్‌స్టిట్యూట్‌.
తక్షణ ఉపాధికి పారిశ్రామిక శిక్షణ
కుదిరితే ఉద్యోగం లేదంటే స్వయం ఉపాధిని కోరుకునేవాళ్లు పారిశ్రామిక శిక్షణ సంస్థ (ఐటీఐ)లు అందించే కోర్సుల దిశగా అడుగులు వేయవచ్చు. ఆసక్తి మేరకు ఎంచుకోవడానికి 130కి పైగా ట్రేడ్‌లు అందుబాటులో ఉన్నాయి. వీటిని పూర్తిచేసుకున్నవారికి కేంద్ర, రాష్ట్ర స్థాయుల్లో ఎన్నో ఉద్యోగాలు లభిస్తున్నాయి. ప్రైవేటు రంగంలో పలు అవకాశాలు సొంతం చేసుకోవచ్చు. విదేశాల్లోనూ కాలుమోపొచ్చు. సొంతంగానూ మెరిసిపోవచ్చు. ఉన్నత విద్య దిశగానూ అడుగులు వేయొచ్చు. మేక్‌ ఇన్‌ ఇండియా నినాదం, స్కిల్‌ డెవలప్‌మెంట్‌ కౌన్సిల్‌ ఏర్పాటుతో ఐటీఐ కోర్సుల్లో చేరిన విద్యార్థులు చక్కని అవకాశాలు సొంతం చేసుకుంటున్నారు. ఆ వివరాలు చూద్దాం.
కేంద్రంలోని డైరక్టరేట్‌ జనరల్‌ ఆఫ్‌ ఎంప్లాయిమెంట్‌ అండ్‌ ట్రైనింగ్‌ మినిస్ట్రీ ఆఫ్‌ స్కిల్‌ డెవలప్‌మెంట్‌ అండ్‌ అంతర్‌ప్రెన్యూర్‌షిప్‌ ఆధ్వర్యంలో ఐటీఐలు నడుపుతున్నారు. వీటిలో పదోతరగతి అర్హతతో ఏడాది, రెండేళ్ల వ్యవధితో పలు ఇంజినీరింగ్, నాన్‌ ఇంజినీరింగ్‌ ట్రేడుల్లో కోర్సులు అందిస్తున్నారు. ఐటీఐల్లో దేశవ్యాప్తంగా 130కి పైగా స్పెషలైజేషన్లు లభిస్తున్నాయి. రెండు తెలుగు రాష్ట్రాల్లోనూ 50 వరకు స్పెషలైజేషన్లు అందుబాటులో ఉన్నాయి. ఆంధ్రప్రదేశ్‌లో సుమారు 500, తెలంగాణలో ఇంచుమించు 300 ఐటీఐలు ఉన్నాయి. వీటిలో చేరడానికి ఎలాంటి పరీక్షా రాయనవసరం లేదు. పదిలో సాధించిన గ్రేడ్‌ పాయింట్లతో తీసుకుంటారు. విజయవంతంగా కోర్సు పూర్తిచేసుకున్నవారు ఉద్యోగం, స్వయం ఉపాధి, ఉన్నత చదువుల దిశగా అడుగులు వేయవచ్చు. చిన్న వయసులోనే చక్కని కెరీర్‌ జీవితానికి బాటలు వేసుకోవచ్చు.
ఇవీ ట్రేడులు...
రెండేళ్ల వ్యవధితో: అటెండెంట్‌ ఆపరేటర్‌ (కెమికల్‌ ప్లాంట్‌), డ్రాఫ్ట్స్‌మెన్‌ (సివిల్‌/ మెకానికల్‌), ఎల్రక్టీషియన్, ఎల్రక్టానిక్స్‌ మెకానిక్, ఫిట్టర్, ఇన్ఫర్మేషన్‌ కమ్యూనికేషన్‌ టెక్నాలజీ సిస్టమ్‌ మెయింటెనన్స్, ఇû్రÂస్టుమెంట్‌ మెకానిక్, ఇన్‌స్ట్రుమెంట్‌ మెకానిక్‌ (కెమికల్‌ ప్లాంట్‌), మేషినిస్ట్, మేషినిస్ట్‌ (గ్రైండర్‌), మెరైన్‌ ఫిట్టర్, మెకానిక్‌ (మోటార్‌ వెహికల్‌/ రెఫ్రిజరేషన్‌ అండ్‌ ఎయిర్‌ కండీషనింగ్‌), మెకానిక్‌ మెషీన్‌ టూల్‌ మెయింటెనన్స్, పెయింటర్‌ జనరల్, టర్నర్, వెసెల్‌ నేవిగేటర్, వైర్‌మెన్‌.
ఏడాది వ్యవధితో: కార్పెంటర్, కంప్యూటర్‌ ఆపరేటర్‌ అండ్‌ ప్రొగ్రామింగ్‌ అసిస్టెంట్, డ్రెస్‌ మేకింగ్, ఫౌండ్రీమెన్, మాసన్‌ (బిల్డింగ్‌ కన్‌స్ట్రక్టర్‌), ప్లాస్టిక్‌ ప్రాసెసింగ్‌ ఆపరేటర్, ప్లంబర్, వెల్డర్, సెక్రటేరియల్‌ ప్రాక్టీస్‌ (ఇంగ్లిష్‌), సూయింగ్‌ టెక్నాలజీ, షీట్‌ మెటల్‌ వర్కర్, స్టెనోగ్రాఫర్‌ అండ్‌ సెక్రటేరియల్‌ అసిస్టెంట్‌ (ఇంగ్లిష్‌), మెకానిక్‌ (డీజిల్‌/ఆటో బాడీ పెయింటింగ్‌/ ఆటో బాడీ రిపేర్‌)
అప్రెంటీస్‌...
ఉద్యోగ నియామకాల్లో అప్రెంటీస్‌ ఉన్నవారికి ప్రాధాన్యం లభిస్తోంది. భారతీయ రైల్వే వేల సంఖ్యలో అప్రెంటీస్‌లను తీసుకుంటోంది. మహారత్న, నవరత్న, మినీరత్న కంపెనీలు సైతం అప్రెంటీస్‌ అవకాశాలు పెంచాయి. ఈ విధానంలో చేరినవారికి ప్రతినెలా కొంత మొత్తంలో స్టైపెండ్‌ అందుతోంది. అంతేకాకుండా నియామకాల్లో కొన్ని పోస్టులను అప్రెంటీస్‌ పూర్తిచేసుకున్నవారికి కేటాయిస్తున్నారు. కొన్ని సంస్థల్లో ఉద్యోగం పొందడానికి అప్రెంటీస్‌ పూర్తిచేసుకోవడం తప్పనిసరి. ప్రభుత్వం 2015లో ప్రారంభించిన స్కిల్‌ ఇండియా కార్యక్రమం ఐటీఐ చదివినవారు మేటి అవకాశాలు సొంతం చేసుకోవడానికి దోహదపడుతోంది. మినిస్ట్రీ ఆఫ్‌ స్కిల్‌ డెవలప్‌మెంట్‌ అండ్‌ అంతర్‌ప్రెన్యూర్‌షిప్‌ ద్వారా స్కిల్స్‌ మెరుగుపరుచుకోవడం, అప్రెంటీస్‌ చేసుకునే అవకాశం ఉంది. పలు ప్రభుత్వ, ప్రైవేటు సంస్థలు అప్రెంటీస్‌ అవకాశం కల్పిస్తున్నాయి. ఆసక్తి ఉన్నవారు కోర్సు పూర్తయిన తర్వాత https://apprenticeshipindia.org/ లో వివరాలు నమోదు చేసుకోవచ్చు.
అవకాశాలిలా
ఐటీఐ పూర్తిచేసుకున్నవారికి ఎక్కువ అవకాశాలు రైల్వేలు, కేంద్ర స్థాయి సంస్థలు, పబ్లిక్‌ సెక్టార్‌ కంపెనీలు, పరిశ్రమలు, ఉత్పాదక, తయారీ సంస్థల్లో ఉంటాయి. అన్ని రకాల కంపెనీల్లోనూ వీరి సేవలు తప్పనిసరి. సాంకేతిక (టెక్నికల్‌) పోస్టుల్లో సింహభాగం సంబంధిత ట్రేడుల్లో ఐటీఐ చదువుకున్నవారితోనే భర్తీ చేస్తున్నారు. ఆర్మీ, ఆర్మ్‌డ్‌ ఫోర్సుల్లోనూ ఉద్యోగాలు లభిస్తున్నాయి.
రైల్వేల్లో: వేల సంఖ్యలో ఉండే అసిస్టెంట్‌ లోకో పైలట్, టెక్నీషియన్‌ పోస్టులకు సంబంధిత ట్రేడుల్లో ఐటీఐ పూర్తిచేసుకున్నవారు అర్హులు. ఎల్రక్టీషియన్‌/ మెకానిక్‌/ ఫిట్టర్‌/ టర్నర్‌/ వైర్‌మెన్‌...తదితర విభాగాలవారు అసిస్టెంట్‌ లోకో పైలట్‌ పోస్టులకు పోటీ పడవచ్చు. సంబంధిత లేదా అనుబంధ విభాగాల్లో ఐటీఐ ఉంటే టెక్నీషియన్‌ ఉద్యోగాలకు దరఖాస్తు చేసుకోవచ్చు. ఇలా ఎంపికైనవారు రైల్వే వర్కుషాపులు, లోకో షెడ్, రైల్వే క్యాబిన్లలో విధులు నిర్వర్తిస్తారు.
రాష్ట్ర స్థాయిలో: సర్వేయర్, జూనియర్‌ లైన్‌మెన్‌ పోస్టులకు వీరు పోటీపడవచ్చు. ఎల్రక్టికల్‌ లేదా వైర్‌మెన్‌ ట్రేడుల్లో ఐటీఐ పూర్తిచేసుకున్నవారు జూనియర్‌ లైన్‌మెన్‌ పోస్టులకు దరఖాస్తు చేసుకోవచ్చు. తెలంగాణ/ఆంధ్రప్రదేశ్‌లోని విద్యుత్తు పంపిణీ, నిర్వహణ కేంద్రాలు రెండు / మూడేళ్లకు ఒకసారి ప్రకటనలు విడుదలచేస్తున్నాయి. సర్వేయింగ్‌ ఒక సబ్జెక్టుగా డ్రాఫ్ట్స్‌మెన్‌ (సివిల్‌) ట్రేడ్‌ రెండేళ్ల కోర్సు పూర్తిచేసుకున్నవారు డెప్యూటీ సర్వేయర్‌ పోస్టులకు సిద్ధం కావచ్చు.
ఆర్మీలో: సోల్జర్‌ ట్రేడ్స్‌మెన్‌ విభాగానికి ఐటీఐ ఉత్తీర్ణత తప్పనిసరి. ఈ ప్రకటనలు ఏటా వెలువడుతున్నాయి. బోర్డర్‌ సెక్యూరిటీ ఫోర్స్‌ (బీఎస్‌ఎఫ్‌), సశస్త్ర సీమబల్‌ (ఎస్‌ఎస్‌బీ), ఇండో టిబెటన్‌ బోర్డర్‌ పోలీస్‌ ఫోర్స్‌ (ఐటీబీపీ), సెంట్రల్‌ రిజర్వ్‌ పోలీస్‌ ఫోర్స్‌ (సీఆర్‌పీఎఫ్‌), సెంట్రల్‌ ఇంè్ర[స్టియల్‌ సెక్యూరిటీ ఫోర్స్‌ (సీఐఎస్‌ఎఫ్‌)...తదితర సెంట్రల్‌ ఆర్మ్‌డ్‌ విభాగాల్లో ఐటీఐ చదివినవారికి అవకాశాలు లభిస్తున్నాయి.
స్టీల్‌ప్లాంట్లు, నేవల్‌ డాక్‌ యార్డులు, నౌకాయాన సంస్థలు, పోర్టులు, షిప్పులు, ప్రజా రవాణా సంస్థలు, యంత్రాలతో నడిచే అన్ని రకాల పరిశ్రమల్లోనూ ఐటీఐ చదివినవారికి ఉద్యోగాలున్నాయి. మహారత్న, నవరత్న, మినీరత్న, పబ్లిక్‌ సెక్టార్‌ కంపెనీల్లో ఎక్కువ ఉద్యోగాలు ఉంటాయి. పాతకాలంనాటి ప్రభుత్వ ఐటీఐల్లో క్యాంపస్‌ నియామకాలు సైతం నిర్వహిస్తున్నారు. నిర్మాణ రంగ సంస్థలు, ఉత్పత్తి, తయారీ పరిశ్రమలు వీరిని నియమించుకుంటున్నాయి. సుశిక్షితులైన ప్లంబర్, కార్పెంటర్, ఎల్రక్టీషియన్, ఏసీ, రెఫ్రిజిరేటర్‌ మెకానిక్‌లకు నగరాలు, పట్ణణాలతోపాటు పల్లెల్లోనూ డిమాండ్‌ పెరుగుతోంది. అందువల్ల స్వయం ఉపాధికి ఢోకా లేదు. సొంతంగా మెకానిక్‌ షెడ్‌ పెట్టుకుని భవిష్యత్తులో మరికొంతమందికి దారి చూపవచ్చు.
విదేశాల్లోనూ...
ఫిట్టర్‌ ట్రేడ్‌ పూర్తిచేసుకున్నవారికి చమురు ఉత్పత్తిచేస్తోన్న దేశాల్లో ఎక్కువ అవకాశాలు లభిస్తున్నాయి. తెలుగు రాష్ట్రాల్లో తెలంగాణ ఓవర్‌సీస్‌ మ్యాన్‌ పవర్‌ కంపెనీ లిమిటెడ్‌ (టామ్‌కామ్‌), ఓవర్‌సీస్‌ మ్యాన్‌ పవర్‌ కంపెనీ ఆంధ్రప్రదేశ్‌ లిమిటెడ్‌ (ఓమ్‌క్యాప్‌) విదేశీ ఉద్యోగాలకు దారి చూపుతున్నాయి. ఇవి శిక్షణ అందించి, సర్టిఫికెట్లు ప్రధానం చేస్తున్నాయి. వీటిని పొందినవారు కేంద్రంలోని మినిస్ట్రీ ఆఫ్‌ ఎక్స్‌టర్నల్‌ అఫైర్స్‌ ద్వారా విదేశీ ఉద్యోగాలకు ప్రయత్నించవచ్చు.
ఉన్నత చదువులు...
ఐటీఐ అనంతరం ఉన్నత చదువులు దిశగా అడుగులేయాలనుకున్నవారు డిప్లొమా కోర్సుల్లో చేరడానికి ప్రాధాన్యం ఇవ్వవచ్చు. కొన్ని బ్రాంచీల్లో లేటరల్‌ ఎంట్రీతో నేరుగా ద్వితీయ సంవత్సరం కోర్సుల్లో చేరిపోవచ్చు. డిప్లొమా పూర్తిచేసుకుని, ఆసక్తి ఉంటే ఈసెట్‌ ద్వారా నేరుగా రెండో సంవత్సరం బీటెక్‌ కోర్సుల్లో ప్రవేశం పొందవచ్చు. నాన్‌ ఇంజినీరింగ్‌ బ్రాంచీల్లో ఐటీఐ ట్రేడ్‌లు పూర్తిచేసుకున్నవారు డిగ్రీ (బీఏ) ఆ తర్వాత పీజీ (ఎంఏ) కోర్సులు చదువుకోవచ్చు.
ఇన్‌స్ట్రక్టర్‌గానూ...
ఐటీఐల్లో కోర్సు విజయవంతంగా పూర్తిచేసుకున్నవారు నేషనల్‌ స్కిల్‌ ట్రైనింగ్‌ ఇన్‌స్టిట్యూట్‌ (ఎన్‌ఎస్‌టీఐ)ల్లో శిక్షణ పొందవచ్చు. విద్యానగర్‌ (హైదరాబాద్‌)లో ఎల్రక్టీషియన్, వైర్‌మెన్, ఫిట్టర్, టర్నర్, మ్యాషినిస్ట్, ఎల్రక్టానిక్‌ మెకానిక్, మోటార్‌ వెహికల్‌ మెకానిక్, వెల్డర్‌ ట్రేడుల్లో ఏడాది వ్యవధితో ఇన్‌స్ట్రక్టర్‌‌ కోర్సు అందిస్తున్నారు. ఆయా ట్రేడుల్లో మరింత ప్రావీణ్యం పొందాలనుకునేవారికోసం షార్ట్‌ టర్మ్‌ విధానంలో అడ్వాన్స్‌డ్‌ వొకేషనల్‌ ట్రైనింగ్‌ కోర్సులూ ఉన్నాయి.
కన్వీనర్‌ కోటాలో మిగిలిన పీజీ వైద్య సీట్ల భర్తీకి నోటిఫికేషన్‌
ఎంజీఎం ఆసుపత్రి న్యూస్‌టుడే: ప్రభుత్వ, ప్రైవేటు మెడికల్‌ కాలేజీల్లో కన్వీనర్‌ కోటాలో మిగిలిన పీజీ వైద్య విద్య సీట్ల భర్తీకి కాళోజీ ఆరోగ్య విశ్వవిద్యాలయం జులై 25న నోటిఫికేషన్‌ విడుదల చేసింది. ఖాళీల వివరాలను వెబ్‌సైట్‌లో పొందుపరిచామని, జులై 25న ఉదయం 7 నుంచి 26 వ తేదీ మధ్యాహ్నం 1 గంట వరకు కళాశాలల వారీగా వెబ్‌ ఆప్షన్లు నమోదు చేసుకోవాలని యూనివర్సిటీ అధికారులు సూచించారు. తగ్గించిన నీట్‌ అర్హత కటాఫ్‌ స్కోర్‌ ఆధారంగా దరఖాస్తు చేసుకున్న అభ్యర్థులతో కూడిన రివైజ్డ్‌ తుది జాబితాను యూనివర్సిటీ విడుదల చేసింది. పూర్తి వివరాలకు www.knruhs.telangana.gov.in వెబ్‌సైట్‌లో సంప్రదించాలని అధికారులు తెలిపారు.
ఐఐటీల బాటలోనే ఎన్‌ఐటీలు
* ఇంటర్‌లో 75 శాతం మార్కుల నిబంధనకు మినహాయింపు
ఈనాడు, హైదరాబాద్‌: ఐఐటీల్లో ప్రవేశానికి ఇంటర్‌ లేదా 12వ తరగతిలో 75 శాతం మార్కులు ఉండాలన్న నిబంధనను జాయింట్‌ అడ్మిషన్‌ బోర్డు(జాబ్‌) ఎత్తివేసిన కొద్ది రోజులకే ఎన్‌ఐటీలూ ఆ నిబంధనను మినహాయించాయి. ఈ మేరకు సెంట్రల్‌ సీట్‌ అలొకేషన్‌ బోర్డు(సీశాబ్‌) జులై 23న‌ నిర్ణయం తీసుకుంది. ఈ మినహాయింపు ఎన్‌ఐటీలతోపాటు ట్రిపుల్‌ఐటీలు, కేంద్ర ఆర్థిక సహకారంతో నడిచే సాంకేతిక విద్యాసంస్థలు(సీఎఫ్‌టీఐ)లకూ వర్తిస్తుంది. కరోనా నేపథ్యంలో ఈ ఏడాది నిబంధనను మినహాయించినట్లు కేంద్ర మానవ వనరుల శాఖ మంత్రి రమేష్‌ పొఖ్రియాల్‌ వెల్లడించారు. తెలుగు రాష్ట్రాల్లో మాత్రం ఈ నిర్ణయం వల్ల ఎలాంటి ప్రభావం ఉండదని నిపుణులు చెబుతున్నారు. సెప్టెంబరులో జేఈఈ మెయిన్‌, అడ్వాన్స్‌డ్‌ పరీక్షలను నిర్వహించాలని కేంద్రం ఇప్పటికే నిర్ణయించిన సంగతి తెలిసిందే.
బంగారు భవిష్యత్తుకు...భౌతిక బాట
బంగారు భవిష్యత్తుకు బాటలు వేసే కోర్సుల్లో భౌతికశాస్త్రం ఒకటి. భూగోళం నుంచి అంతరిక్షం దాకా అన్నీ భౌతికశాస్త్రంలో భాగమే. అందువల్లే విశ్వ విజ్ఞానానికి వారధిగా ఫిజిక్స్‌ నిలుస్తోంది. ఈ రంగంలో పరిశోధనలే మానవాళి ప్రగతికి కీలకం కావడంతో అవి నిరంతరం జరుగుతూనే ఉన్నాయి. ఇందుకోసం ప్రత్యేక సంస్థలూ వెలిశాయి. ఈ సబ్జెక్టుపై ఆసక్తి ఉన్నవారు ఐఐటీలు, కేంద్రీయ విశ్వవిద్యాలయాలు, రాష్ట్రస్థాయి సంస్థల్లో చదువుకోవచ్చు. అనంతరం పరిశోధన, బోధన రంగాల్లో ఉద్యోగాలు సొంతం చేసుకోవచ్చు. వివిధ స్థాయుల్లో అందుబాటులో ఉన్న ఫిజిక్స్‌ కోర్సులు, సంస్థలు, అవకాశాల వివరాలు చూద్దాం...
భౌతికశాస్త్రంపై ఆసక్తి ఉన్నవారు ఇంటర్‌లో ఒక సబ్జెక్టుగా దీన్ని ఎంచుకోవాలి. ఈ విభాగంలో భవిష్యత్తును కోరుకున్నవారు మ్యాథ్స్, ఫిజిక్స్‌ కలిపి చదువుకోవాలి. ఇంటర్మీడియట్‌ పూర్తిచేసుకున్న తర్వాత బీటెక్‌ ఇంజినీరింగ్‌ ఫిజిక్స్, ఇంటిగ్రేటెడ్‌ ఎమ్మెస్సీ ఫిజిక్స్, బీఎస్‌-ఫిజికల్‌ సైన్సెస్, బీఎస్సీ-ఫిజిక్స్‌ వీటిలో ఏదైనా కోర్సును ఎంచుకోవచ్చు. బీఎస్సీ ఫిజిక్స్‌ చదువుకున్నవారు ఆసక్తి ఉంటే ఇంటిగ్రేటెడ్‌ ఎమ్మెస్సీ-ఫిజిక్స్‌ లేదా ఎమ్మెస్సీ కోర్సుల్లో చేరవచ్చు. భౌతికశాస్త్రంలో పీజీ స్థాయిలో పలు స్పెషలైజేషన్లు అందుబాటులో ఉన్నాయి. వివిధ స్థాయుల్లో కోర్సుల్లో ప్రవేశానికి పలు రకాల పరీక్షలు నిర్వహిస్తున్నారు. ఇంటర్‌ విద్యార్థులైతే ఐఐటీ-జేఈఈ, డిగ్రీ చదువుతున్నవాళ్లైతే జామ్, పీజీ విద్యార్థులైతే జెస్ట్‌..ఇలా అర్హతల వారీ పరీక్షలు రాసుకోవచ్చు. ఐఐటీ జేఈఈ ద్వారా పలు ఐఐటీల్లో బీటెక్‌ ఫిజికల్‌ సైన్సెస్, ఐదేళ్ల ఇంటిగ్రేటెడ్‌ ఎమ్మెస్సీ ఫిజిక్స్‌ కోర్సుల్లో చేరొచ్చు. అలాగే జామ్‌తో ఐఐఎస్సీ, ఐఐటీలు అందిస్తోన్న ఎమ్మెస్సీ ఫిజిక్స్, ఇంటిగ్రేటెడ్‌ పీహెచ్‌డీ ఫిజిక్స్‌ కోర్సుల్లో ప్రవేశం లభిస్తుంది. జెస్ట్‌ ద్వారా పరిశోధనా సంస్థలు, ప్రత్యేక విద్యాలయాల్లో ఇంటిగ్రేటెడ్‌ పీహెచ్‌డీ, పీహెచ్‌డీ కోర్సుల్లో చేరిపోవచ్చు.
ఐఐటీ జేఈఈతో...
ఐఐటీ-మద్రాస్, ఖరగ్‌పూర్, కాన్పూర్, రూర్కీ; నిట్‌- ఆగర్తలా, పట్నా, రూర్కెలా, సూరత్‌ల్లో అయిదేళ్ల ఇంటిగ్రేటెడ్‌ ఎమ్మెస్సీ ఫిజిక్స్‌ కోర్సులో చేరవచ్చు. అలాగే పలు ఐఐటీలు అందించే బీటెక్‌ ఇంజినీరింగ్‌ ఫిజిక్స్‌ కోర్సులోనూ ప్రవేశం పొందవచ్చు. ఐఐఎస్‌ఈఆర్‌ల్లో బీఎస్‌-ఎంఎస్‌ (ఫిజిక్స్‌) కోర్సులోకి జేఈఈతో చేరవచ్చు.
నెస్ట్‌...
డిపార్ట్‌మెంట్‌ ఆఫ్‌ అటామిక్‌ ఎనర్జీ (డీఏఈ) ఆధ్వర్యంలో నేషనల్‌ ఇన్‌స్టిట్యూట్‌ ఆఫ్‌ సైన్స్‌ ఎడ్యుకేషన్‌ అండ్‌ రీసెర్చ్‌ (నైసర్‌), భువనేశ్వర్, యూనివర్సిటీ ఆఫ్‌ ముంబై ఐదేళ్ల ఇంటిగ్రేటెడ్‌ ఎమ్మెస్సీ ఫిజికల్‌ సైన్స్‌ కోర్సు అందిస్తున్నాయి. ఈ సంస్థల్లో చేరినవారికి అయిదేళ్ల పాటు ఫెలోషిప్‌ అందుతుంది. ప్రవేశానికి నేషనల్‌ ఎంట్రన్స్‌ స్క్రీనింగ్‌ టెస్ట్‌ (నెస్ట్‌) రాయాలి. ఇంటర్‌లో ఫిజిక్స్‌ చదివినవారు ఈ పరీక్ష రాసుకోవచ్చు.
జెస్ట్‌...
ఫిజిక్స్‌లో ఇంటిగ్రేటెడ్‌ పీహెచ్‌డీ, పీహెచ్‌డీ కోర్సుల్లో ప్రవేశానికి జాయింట్‌ ఎంట్రన్స్‌ స్క్రీనింగ్‌ టెస్ట్‌ (జెస్ట్‌) నిర్వహిస్తున్నారు. ఈ పరీక్ష ద్వారా దేశంలో పరిశోధన రంగంలో ప్రసిద్ధి చెందిన సంస్థల్లో ప్రవేశం లభిస్తుంది. వీటిలో చాలా సంస్థలు డిపార్ట్‌మెంట్‌ ఆఫ్‌ అటామిక్‌ ఎనర్జీ (డీఏఈ)కి అనుబంధంగా ఉన్నవే. టాటా ఇన్‌స్టిట్యూట్‌ ఆఫ్‌ ఫండమెంటల్‌ రిసెర్చ్, ముంబయి; ద ఇన్‌స్టిట్యూట్‌ ఆఫ్‌ ఫిజిక్స్, భువనేశ్వర్‌; న్యూక్లియర్‌ సైన్స్‌ సెంటర్, న్యూదిల్లీ; ఇండియన్‌ ఇన్‌స్టిట్యూట్‌ ఆఫ్‌ ఆస్ట్రో ఫిజిక్స్, బెంగళూరు; హరీష్‌ చంద్ర రిసెర్చ్‌ ల్యాబొరేటరీ, అలహాబాద్‌; ఫిజికల్‌ రిసెర్చ్‌ ల్యాబొరేటరీ, అహ్మదాబాద్‌ ఎస్‌ఎన్‌బోస్‌ నేషనల్‌ సెంటర్‌ ఫర్‌ బేసిక్‌ సైన్సెస్‌ కోల్‌కతా, జవహర్‌లాల్‌ నెహ్రూ సెంటర్‌ ఫర్‌ అడ్వాన్స్‌డ్‌ స్టడీస్‌ బెంగళూరు, ఐఐఎస్సీ, ఐఐఎస్‌ఈఆర్‌లు, ఐఐఎస్టీ, ఐఎంఎస్‌...ఇలా పలు సంస్థల్లో జెస్ట్‌ స్కోరుతో ప్రవేశం కల్పిస్తారు. బీఎస్సీ ఫిజిక్స్‌ కోర్సులు చదువుకున్నవారు ఈ పరీక్ష రాసుకోవచ్చు. ఈ విధానంలో ఎంపికైనవారు పరిశోధనల దిశగా అడుగులేయవచ్చు. ప్రతి నెలా స్టయిపెండ్‌ సైతం అందుకోవచ్చు.
జామ్‌తో...
బీఎస్సీ ఫిజిక్స్‌ చదువుకున్నవారు జాయింట్‌ అడ్మిషన్‌ టెస్ట్‌ ఫర్‌ ఎమ్మెస్సీ (జామ్‌) రాసుకోవచ్చు. ఈ పరీక్షతో ఐఐఎస్సీ-బెంగళూరులో ఇంటిగ్రేటెడ్‌ పీహెచ్‌డీ; ఐఐటీ-భువనేశ్వర్‌: ఎమ్మెస్సీ పీహెచ్‌డీ; ఐఐటీ-బాంబే, దిల్లీ, ధన్‌బాద్, గాంధీనగర్, గువాహటి, హైదరాబాద్, ఇండోర్, జోధ్‌పూర్, కాన్పూర్, ఖరగ్‌పూర్, మద్రాస్, పట్నా, రూర్కీ, రోపర్, వారణాశి, భిలాయ్, పలక్కాడ్‌ల్లో: ఎమ్మెస్సీ ఫిజిక్స్‌ కోర్సుల్లో ప్రవేశం లభిస్తుంది. జామ్‌ స్కోర్‌తో వివిధ ఎన్‌ఐటీలు అందించే ఎమ్మెస్సీ ఫిజిక్స్‌ కోర్సులో చేరవచ్చు. ఐఐఎస్‌ఈఆర్‌లు ఇంటిగ్రేటెడ్‌ ఎమ్మెస్సీ పీహెచ్‌డీ కోర్సుల్లోకి జామ్‌ స్కోర్‌తో చేర్చుకుంటున్నాయి.
మరికొన్ని సంస్థలు...
* ఇండియన్‌ ఇన్‌స్టిట్యూట్‌ ఆఫ్‌ సైన్స్, బెంగళూరు ఫిజిక్స్‌లో నాలుగేళ్ల బీఎస్‌ కోర్సు
* బిర్లా ఇన్‌స్టిట్యూట్‌ ఆఫ్‌ టెక్నాలజీ అండ్‌ సైన్స్‌ ఇంటిగ్రేటెడ్‌ ఎమ్మెస్సీ (ఆనర్స్‌) ఫిజిక్స్‌
* యూనివర్సిటీ ఆఫ్‌ హైదరాబాద్‌ ఐదేళ్ల ఇంటిగ్రేటెడ్‌ ఎమ్మెస్సీ ఫిజికల్‌ సైన్స్, రెండేళ్ల ఎమ్మెస్సీ ఫిజిక్స్‌
* పాండిచ్చేరి సెంట్రల్‌ యూనివర్సిటీ: ఇంటిగ్రేటెడ్‌ ఎమ్మెస్సీ ఫిజిక్స్, ఎమ్మెస్సీ ఫిజిక్స్‌
* ఆంధ్రా యూనివర్సిటీ: ఎమ్మెస్సీ- ఫిజిక్స్, స్పేస్‌ ఫిజిక్స్, న్యూక్లియర్‌ ఫిజిక్స్, మెటీరియాలజీ, ఫిజికల్‌ ఓషనోగ్రఫీ, జియోఫిజిక్స్‌ (టెక్‌), మెరైన్‌ జియోఫిజిక్స్‌
* ఉస్మానియా యూనివర్సిటీ, హైదరాబాద్‌ ఎమ్మెస్సీ- ఫిజిక్స్, ఆస్ట్రానమీ, ఆస్ట్రోఫిజిక్స్, జియోఫిజిక్స్‌
* తెలుగు రాష్ట్రాల్లో దాదాపు అన్ని విశ్వవిద్యాలయాలూ ఎమ్మెస్సీ ఫిజిక్స్‌ కోర్సులు అందిస్తున్నాయి. పీజీ సెట్లద్వారా వీటిలో ప్రవేశం లభిస్తుంది.
కెరీర్‌...
ఫిజిక్స్‌లో పీజీ కోర్సులు పూర్తిచేసుకున్నవారికి ప్రభుత్వ, ప్రైవేటు జూనియర్, డిగ్రీ, ఇంజినీరింగ్‌ కళాశాలల్లో బోధకులగా అవకాశాలు లభిస్తాయి. ఎంసెట్, జేఈఈ, నీట్‌ ఫిజిక్స్‌ శిక్షకులకు ఎంతో డిమాండ్‌ ఉంది. దేశంలో ఉన్న పరిశోధన కేంద్రాల్లో సైంటిస్ట్‌గానూ సేవలు అందించవచ్చు. ఇస్రో, ఐఐఎస్టీ, డీఆర్‌డీవో, టీఐఎఫ్‌ఆర్, డీఎస్‌టీ, సీఎస్‌ఐఆర్‌...తదితర మేటి సంస్థల్లో ఉన్నత అవకాశాలు సొంతం చేసుకోవచ్చు. పీజీ పూర్తిచేసినవారు నెట్‌ జేఆర్‌ఎఫ్‌లో అర్హత సాధించి పేరున్న సంస్థల్లో పీహెచ్‌డీ కోసం ప్రయత్నించవచ్చు. ఈ సమయంలో మొదటి రెండేళ్లు నెలకు రూ.31,000 చొప్పున తర్వాత రెండేళ్లు నెలకు రూ.35,000 స్టైపెండ్‌ అందుకోవచ్చు. విస్తృత అవకాశాలు సొంతం చేసుకోవడానికి నెట్‌ స్కోర్‌ ఉపయోగపడుతుంది. బీఎస్సీ అనంతరం బీఎడ్‌తో ప్రైవేటు పాఠశాలల్లో సేవలు అందించవచ్చు. స్కూల్‌ అసిస్టెంట్‌ పోస్టులకు పోటీ పడవచ్చు. ఫిజిక్స్‌ గ్రాడ్యుయేట్లు హోమ్‌ ట్యూషన్లు, ఆన్‌లైన్‌ క్లాసులతోనూ అవసరాలకు సరిపడా ఆదాయాన్ని పొందవచ్చు.
సెప్టెంబరు 28కి నైపర్‌ జేఈఈ వాయిదా
* ఫుట్‌వేర్‌ కోర్సుల హామీ

ఈనాడు, హైదరాబాద్‌: దేశ వ్యాప్తంగా హైదరాబాద్‌ సహా ఏడు చోట్ల ఉన్న జాతీయ ఫార్మా విద్య, పరిశోధన సంస్థ(నైపర్‌)లో ప్రవేశానికి జులై 25న నిర్వహించాల్సిన నైపర్‌ జేఈఈ వాయిదా పడింది. ఆ పరీక్షను సెప్టెంబరు 28వ తేదీ జరపాలని నిర్ణయించినట్టు నైపర్‌ వర్గాలు వెల్లడించాయి. ఫార్మసీ విద్యలో పీజీ కోర్సులను నైపర్లు అందిస్తున్నాయి.
మన్నికైన ఉద్యోగానికి...
* ఫుట్‌వేర్‌ కోర్సుల హామీ

అడుగులో అడుగై.. అండగా ఉంటూ.. మనుషులను ముందుకు తీసుకెళ్తున్నాయి పాదరక్షలు. ఇవి సౌకర్యంతోపాటు హుందాతనాన్నీ పెంపొందిస్తున్నాయి. వీటి ఆకర్షణీయమైన రూపం వెనుక ఎందరో నిపుణుల సృజన ఇమిడి ఉంది. పాదరక్షల తయారీలో మెలకువలు నేర్పడానికి ప్రత్యేక సంస్థల్లో కొన్ని కోర్సులు ఉన్నాయి. అలాంటి వాటిలో ఫుట్‌వేర్‌ డిజైన్‌ అండ్‌ డెవలప్‌మెంట్‌ ఇన్‌స్టిట్యూట్‌ (ఎఫ్‌డీడీఐ) అందించే డిగ్రీలు ముఖ్యమైనవి. పాదరక్షల తయారీ శిక్షణలో మేటి సంస్థ ఇదే. దీనికి హైదరాబాద్‌తో సహా దేశవ్యాప్తంగా 12 చోట్ల క్యాంపస్‌లు ఉన్నాయి. ఇక్కడ పలు యూజీ, పీజీ కోర్సులు అందిస్తున్నారు. వీటిలో ప్రవేశాలకు జనవరిలో ప్రకటన వెలువడింది. అయితే కరోనా నేపథ్యంలో జులై 26న జరగాల్సిన ప్రవేశ పరీక్ష రద్దయింది. ఇంటర్మీడియట్‌/ డిప్లొమా, డిగ్రీ మార్కులతో సీట్లు కేటాయిస్తారు. దరఖాస్తులకు గడువు తేదీ పొడిగించారు. ఆ వివరాలు చూద్దాం...
పాదరక్షల తయారీలో యువతకు శిక్షణ ఇచ్చి, వాటిని రూపొందిస్తోన్న సంస్థలకు నాణ్యమైన మానవ వనరులను అందించే లక్ష్యంతో కేంద్ర వాణిజ్య, పరిశ్రమల మంత్రిత్వ శాఖ ఆధ్వర్యంలో ఫుట్‌వేర్‌ డిజైన్‌ అండ్‌ డెవలప్‌మెంట్‌ ఇన్‌స్టిట్యూట్‌ (ఎఫ్‌డీడీఐ)ను 1986లో ఏర్పాటు చేశారు. ఈ సంస్థకు దేశవ్యాప్తంగా 12 కేంద్రాలు (హైదరాబాద్, నోయిడా, రోహ్‌తక్, కోల్‌కతా, ఫుర్సత్‌గంజ్, చెన్నై, జోధ్పూర్, చిండ్వారా, పట్నా, చండీగఢ్, గుణ, అంక్లేశ్వర్‌) ఉన్నాయి. వీటిలో పాదరక్షలు, లెదర్‌ ఉత్పత్తుల తయారీ, వాటి విక్రయాలకు సంబంధించి బ్యాచిలర్, మాస్టర్‌ డిగ్రీలను అందిస్తున్నారు. అన్ని సంస్థల్లోనూ కలిపి యూజీ, పీజీల్లో 2970 సీట్లు ఉన్నాయి. మరో 288 ఎన్‌ఆర్‌ఐ, ఇండస్ట్రీ స్పాన్సర్డ్‌ సీట్లు లభిస్తున్నాయి. ప్రతి సంవత్సరం ఆల్‌ ఇండియా స్కిల్‌ టెస్టు (ఏఐఎస్‌టీ)తో కోర్సులోకి తీసుకునేవారు. అయితే కరోనా నేపథ్యంలో జులై 26న జరగాల్సిన ఈ పరీక్ష రద్దయింది.
ఎంపిక ఇలా...
యూజీ (బీ డిజైన్, బీబీఏ) కోర్సులకు ఇంటర్మీడియట్‌ లేదా డిప్లొమాలో సాధించిన మార్కుల మెరిట్‌ ప్రకారం సీట్లు కేటాయిస్తారు. పీజీ (ఎం డిజైన్, ఎంబీఏ) కోర్సులకు డిగ్రీలో సాధించిన మార్కుల ప్రకారం కోర్సుల్లోకి తీసుకుంటారు. ఇందుకోసం సంబంధిత కోర్సుల్లో సాధించిన మార్కుల వివరాలు అప్‌లోడ్‌ చేయాలి. ఒకవేళ చివరి సంవత్సరం కోర్సు లేదా సెమిస్టర్‌ ఫలితాలు వెల్లడి కానట్లయితే ముందు సెమిస్టర్‌ లేదా ముందు సంవత్సరం వరకు సాధించిన మార్కుల వివరాలు పొందుపరచాలి. ఇప్పటికే దరఖాస్తు చేసుకున్నవారు మార్కుల వివరాలు ఆన్‌లైన్‌లో నమోదు చేసుకోవాలి.
ఏం నేర్పుతారంటే...
ఫుట్‌వేర్‌ కోర్సుల్లో చేరినవారికి వివిధ పదార్థాలు, ఉత్పత్తులు ఉపయోగించి పాదరక్షలు, లెదర్‌ యాక్సెసరీలు ఎలా తయారు చేయాలో నేర్పిస్తారు. యంత్రాల సాయంతో వాటిని డిజైన్‌ చేయిస్తారు. వినియోగదారుల అవసరాలపై అవగాహన కల్పించి అందుకు అనుగుణంగా ఉత్పత్తులు సృష్టించడంపై దృష్టి సారిస్తారు. వీటితోపాటు రిటైల్‌ మేనేజ్‌మెంట్, కన్జూమర్‌ బిహేవియర్, రిటైల్‌ కమ్యూనికేషన్, కస్టమర్‌ రిలేషన్‌షిప్‌ మేనేజ్‌మెంట్, రిటైల్‌ ఆపరేషన్, మార్కెటింగ్, బ్రాండ్‌ మేనేజ్‌మెంట్, సేల్స్‌ మేనేజ్‌మెంట్, బేసిక్‌ కంప్యూటర్‌ నాలెడ్జ్‌...తదితర అంశాల్లో అవగాహన కల్పిస్తారు.
ఉద్యోగాలిక్కడ
ఫుట్‌వేర్‌ డిజైన్‌ కోర్సులు పూర్తిచేసినవారికి ఎక్కవగా పాదరక్షలు, దుస్తులు, లెదర్‌ ఉత్పత్తులు తయారు చేసే సంస్థల్లో అవకాశాలు లభిస్తాయి. పాదరక్షలు విక్రయించే రిటైల్‌ చెయిన్లలో కొలువులూ దక్కుతాయి. బీబీఏ, ఎంబీఏ కోర్సు చదివినవారికి ఏరియా మేనేజర్, ఫ్లోర్‌ మేనేజర్, స్టోర్‌ మేనేజర్, మేనేజ్‌మెంట్‌ ట్రెయినీ మొదలైన హోదాలతో పాదరక్షలు, లెదర్‌ యాక్సెసరీస్‌ విక్రయించే సంస్థలు, రిటైల్‌ చెయిన్లలో ఉద్యోగాలు ఉంటాయి. ఎక్కువ అవకాశాలు కార్పొరేట్‌ రిటైల్‌ దుకాణాల్లో లభిస్తాయి. అడిడాస్, యాక్షన్, బాటా, ప్యూమా, ఫ్యూచర్‌ గ్రూప్, గ్లోబస్, ఖాదిమ్స్, లైఫ్‌స్టైల్, ల్యాండ్‌మార్క్, మ్యాక్స్, రీబక్, లిబర్టీ, రిలయన్స్‌ రీటైల్, వెస్ట్‌సైడ్, ఉడ్‌ల్యాండ్, వీకేసీ, షాపర్స్‌ స్టాప్, ప్యాంటలూన్స్‌ ... మొదలైన సంస్థలు క్యాంపస్‌ నియామకాల ద్వారా ఎఫ్‌డీడీఐ విద్యార్థులకు అవకాశాలు కల్పిస్తున్నాయి. ఈ సంస్థల్లో ఫ్యాషన్‌ డిజైన్‌ కోర్సులు చదివినవారు కాస్ట్యూమ్‌ డిజైనర్, ఫ్యాషన్‌ కన్సల్టెంట్, పర్సనల్‌ స్టైలిస్ట్, ఫ్యాషన్‌ మర్చండైజర్, ఫ్రీలాన్స్‌ డిజైనర్‌..తదితర హోదాలతో రాణించవచ్చు. వీరికి కార్పొరేట్‌ దుస్తుల తయారీ కంపెనీల్లో అవకాశాలు లభిస్తాయి.
ఆన్‌లైన్‌ దరఖాస్తులకు చివరి తేదీ: జులై 25
వెబ్‌సైట్‌: www.fddiindia.com
యూజీ కోర్సులు, సీట్లు
బ్యాచిలర్‌ ఆఫ్‌ డిజైన్‌లో: ఫుట్‌వేర్‌ డిజైన్‌ అండ్‌ ప్రొడక్షన్‌-905, లెదర్‌ గూడ్స్‌ అండ్‌ యాక్సెసరీస్‌ డిజైన్‌-385, ఫ్యాషన్‌ డిజైన్‌-930 సీట్లు ఉన్నాయి.
బీబీఏ: రిటైల్‌ అండ్‌ ఫ్యాషన్‌ మర్చెండైజ్‌-300 సీట్లు ఉన్నాయి.
అర్హత: పై కోర్సుల్లో ప్రవేశానికి ఇంటర్మీడియట్‌ లేదా మూడేళ్ల డిప్లొమా ఉత్తీర్ణులు దరఖాస్తు చేసుకోవచ్చు. వయసు జులై 1, 2020 నాటికి 25 ఏళ్లలోపు ఉండాలి.
పీజీ కోర్సులు
మాస్టర్‌ ఆఫ్‌ డిజైన్‌: ఫుట్‌వేర్‌ డిజైన్‌ అండ్‌ ప్రొడక్షన్‌ 150 సీట్లు ఉన్నాయి.
అర్హత: ఫుట్‌వేర్‌ / లెదర్‌ గూడ్స్‌ అండ్‌ యాక్సెసరీస్‌ డిజైన్‌ / డిజైన్‌ / ఇంజినీరింగ్‌ / ప్రొడక్షన్‌/ టెక్నాలజీల్లో బ్యాచిలర్‌ డిగ్రీ కోర్సులు పూర్తిచేసుకున్నవారు అర్హులు.
ఎంబీఏ: రిటైల్‌ అండ్‌ ఫ్యాషన్‌ మర్చెండైజ్‌లో 300 సీట్లు ఉన్నాయి.
అర్హత: ఏదైనా డిగ్రీ ఉత్తీర్ణత. పీజీలకు వయసు నిబంధన లేదు.
ఇంటి నుంచే ప్రవేశ పరీక్ష
* వినూత్న అవకాశం కల్పించిన ఆర్కిటెక్చర్‌ కౌన్సిల్‌
ఈనాడు, హైదరాబాద్‌: ప్రవేశ పరీక్షల చరిత్రలో సరికొత్త అధ్యాయానికి తెరతీసింది ఆర్కిటెక్చర్‌ కౌన్సిల్‌(సీఓఏ). బ్యాచిలర్‌ ఆఫ్‌ ఆర్కిటెక్చర్‌(బీఆర్క్‌) కోర్సుల్లో ప్రవేశానికి జాతీయస్థాయిలో నిర్వహించే ‘నేషనల్‌ ఆప్టిట్యూడ్‌ టెస్ట్‌ ఇన్‌ ఆర్కిటెక్చర్‌’(నాటా)ను అభ్యర్థులు తమ ఇళ్ల నుంచే రాసుకునే అవకాశం కల్పించింది. కరోనా నేపథ్యంలో ఈ నిర్ణయం తీసుకుంది. ఇంటి నుంచి పరీక్ష రాయాలనుకునే వారికి పర్సనల్‌ కంప్యూటర్‌ లేక ల్యాప్‌టాప్‌తోపాటు వెబ్‌కెమెరా, అంతర్జాలం సౌకర్యాలు ఉండాలని పేర్కొంది. అవి లేకుంటే పరీక్షా కేంద్రానికి వచ్చి రాయవచ్చని, ఎక్కడి నుంచి పరీక్ష రాస్తారో ఎంచుకునేందుకు త్వరలో అవకాశం ఇస్తామని కౌన్సిల్‌ జులై 19న‌ తెలిపింది. ఇంటి నుంచి పరీక్ష రాసే వారిని వెబ్‌కెమెరా ద్వారా సాంకేతిక నిపుణులు పర్యవేక్షిస్తారని తెలంగాణ రాష్ట్ర నాటా కన్వీనర్‌, జేఎన్‌ఏఎఫ్‌ఏయూ ఆచార్యుడు ఎస్‌.కుమార్‌ తెలిపారు. జేఈఈ మెయిన్‌ తరహాలో గత ఏడాది నుంచి నాటా పరీక్షను రెండుసార్లు నిర్వహిస్తున్నారు. ఏప్రిల్‌ 19న జరగాల్సిన నాటా-1ను ఆగస్టు 1న, అదే నెల 29న నాటా-2 నిర్వహిస్తామని మే నెలలో కౌన్సిల్‌ ప్రకటించింది. తాజాగా నాటా-1ను ఆగస్టు 29కి మార్చింది. నాటా-2 తేదీని తర్వాత ప్రకటిస్తామని పేర్కొంది.
* ఈ పరీక్షలో బహుళ ఐచ్ఛిక ప్రశ్నలతోపాటు డ్రాయింగ్‌ ఉండేది. అభ్యర్థులు డ్రాయింగ్‌ గీసి అప్‌లోడ్‌ చేసేవారు. ఈసారి ఇంటి నుంచి పరీక్ష రాస్తే అప్‌లోడ్‌ చేసేందుకు ఇబ్బంది ఉంటుందని భావించిన అధికారులు డ్రాయింగ్‌ను తీసేశారు. దీనికి బదులు కలర్‌ థియరీ, 2డీ లేదా 3డీ సిద్ధాంతాలు వంటి వాటిపై మల్టిపుల్‌ ఛాయిస్‌ ప్రశ్నలు ఇచ్చేలా సిలబస్‌ మార్చారు. డ్రాయింగ్‌పై పట్టున్న వారు ఈ మార్పుతో కొంత నష్టపోయే అవకాశం ఉందని నిపుణులు అభిప్రాయపడుతున్నారు.
సెప్టెంబర్‌లోపు పరీక్షలు పూర్తి చేయండి
* ఫైనల్‌ సెమిస్టర్‌పై యూజీసీ నిర్దేశం
ఈనాడు, దిల్లీ: విశ్వవిద్యాలయాల్లో చదువుతున్న చివరి సంవత్సరం విద్యార్థులకు ఫైనల్‌ సెమిస్టర్‌ పరీక్షలను సెప్టెంబర్‌ నెలాఖరులోగా పూర్తి చేయాలని విశ్వవిద్యాలయాల నిధుల సంఘం (యూజీసీ) కార్యదర్శి జులై 18న‌ ఒక ప్రకటనలో పేర్కొన్నారు. వీటిని ఆఫ్‌లైన్‌ (పెన్‌, పేపర్‌) పద్ధతిలోకానీ, ఆన్‌లైన్‌+ఆఫ్‌లైన్‌ కలగలిసిన మిశ్రమ విధానంలోకానీ నిర్వహించవచ్చని తెలిపారు. కొవిడ్‌-19ను పురస్కరించుకొని ఇచ్చిన మార్గదర్శకాల ప్రకారమే ఈ పరీక్షలు నిర్వహించాలని సూచించారు. ఒకవేళ విద్యార్థులు హాజరుకాలేకపోతే సమయం అనుకూలించినప్పుడు వారికి ప్రత్యేక పరీక్షలు నిర్వహించాలని నిర్దేశించారు. పరీక్షలు రాయలేని విద్యార్థులకు ఎలాంటి అసౌకర్యంకానీ, ఇబ్బందులుకానీ కల్పించరాదని సూచించారు. కేంద్ర మానవ వనరుల అభివృద్ధిశాఖ సూచనల మేరకు పరీక్షల నిర్వహణకు అనుసరించాల్సిన ప్రామాణిక నిర్వహణ విధానాన్ని (స్టాండర్డ్‌ ఆపరేటింగ్‌ ప్రొసీజర్స్‌) జులై 8న జారీ చేసినట్లు గుర్తుచేశారు. పరీక్షల నిర్వహణపై దేశంలోని 945 విశ్వవిద్యాలయాల అభిప్రాయం కోరగా ఇప్పటివరకు 755 స్పందించాయని పేర్కొన్నారు. ఇప్పటికే 194 విశ్వవిద్యాలయాలు ఆన్‌లైన్‌, ఆఫ్‌లైన్‌ పద్ధతిలో పరీక్షలు పూర్తిచేసినట్లు తెలిపారు.
సుప్రీంకోర్టును ఆశ్రయించిన యువసేన
ముంబయి: కరోనా దృష్ట్యా చివరి సంవత్సరం పరీక్షలను రద్దు చేయాలని కోరుతూ శివసేన అనుబంధ విభాగమైన యువసేన సుప్రీంకోర్టును ఆశ్రయించింది. పరీక్షల నిర్వహణ బాధ్యతను ఆయా రాష్ట్ర ప్రభుత్వాలకే విడిచిపెట్టాలని కోరుతూ వ్యాజ్యం దాఖలు చేశామని యువసేన కార్యదర్శి వరుణ్‌ సర్దేశాయి తెలిపారు.
జూనియర్‌, డిగ్రీ కళాశాలల్లో మధ్యాహ్న భోజనం
* ఈ విద్యాసంవత్సరం నుంచి అమలు చేయాలని సీఎం నిర్ణయం
* జడ్చర్ల డిగ్రీ కళాశాల స్ఫూర్తితో అన్ని చోట్లా గార్డెన్లు
ఈనాడు, హైదరాబాద్‌: రాష్ట్రంలోని అన్ని ప్రభుత్వ జూనియర్‌, డిగ్రీ కళాశాలల్లో విద్యార్థులకు ఈ విద్యాసంవత్సరం నుంచి మధ్యాహ్న భోజనం పెట్టాలని నిర్ణయించినట్లు ముఖ్యమంత్రి కేసీఆర్‌ ప్రకటించారు. ప్రభుత్వ కళాశాలల్లో డ్రాపౌట్లను నివారిస్తూ విద్యార్థులకు పౌష్టికాహారం అందించాలనే లక్ష్యంతో ఈ నిర్ణయం తీసుకున్నట్లు వెల్లడించారు. మహబూబ్‌నగర్‌ జిల్లా జడ్చర్లలో డిగ్రీ కళాశాల అధ్యాపకుడు సదాశివయ్య బొటానికల్‌ గార్డెన్‌ అభివృద్ధి చేస్తున్నారని, ప్రభుత్వ బాలుర జూనియర్‌ కళాశాలలో అధ్యాపకుడు రఘురామ్‌, బాలికల జూనియర్‌ కళాశాలలో తాను(డా.సి.లక్ష్మారెడ్డి) తమ సొంత ఖర్చులతో విద్యార్థులకు మధ్యాహ్న భోజనం పెడుతున్నట్లు అక్కడి ఎమ్మెల్యే సి.లక్ష్మారెడ్డి సీఎం దృష్టికి తీసుకెళ్లారు. దీంతో ముఖ్యమంత్రి కేసీఆర్ జులై 17న‌ వారిని ప్రగతిభవన్‌కు రప్పించి అభినందించారు. ఈ సందర్భంగా సీఎం మాట్లాడుతూ జడ్చర్ల అధ్యాపకుడు రఘురామ్‌ సొంత ఖర్చులతో విద్యార్థులకు మధ్యాహ్న భోజనం అందించడం అభినందనీయమని కొనియాడారు. జడ్చర్ల ప్రభుత్వ డిగ్రీ కళాశాలను స్ఫూర్తిగా తీసుకొని రాష్ట్రంలోని అన్ని ప్రభుత్వ డిగ్రీ కళాశాలల్లో వివిధ రకాల మొక్కలతో గార్డెన్లను అభివృద్ధి చేయాలని అధికారులను ఆదేశించారు. జడ్చర్లలోని బొటానికల్‌ గార్డెన్‌ అభివృద్ధికి రూ.50 లక్షలు, అధ్యాపకుడు రఘురామ్‌ విజ్ఞప్తి మేరకు జడ్చర్ల ప్రభుత్వ బాలుర జూనియర్‌ కళాశాలకు నూతన భవనాన్ని సీఎం మంజూరు చేశారు. కార్యక్రమంలో వ్యవసాయ శాఖ మంత్రి నిరంజన్‌రెడ్డి, ఎమ్మెల్యే లక్ష్మారెడ్డి, సీఎస్‌ సోమేశ్‌కుమార్‌, విద్యాశాఖ ప్రత్యేక ప్రధాన కార్యదర్శి చిత్రా రామచంద్రన్‌ తదితరులు పాల్గొన్నారు.
3 లక్షల మంది విద్యార్థులకు ప్రయోజనం: రాష్ట్రంలోని ప్రభుత్వ జూనియర్‌, డిగ్రీ కళాశాలల్లో మధ్యాహ్న భోజన పథకాన్ని అమలుచేయడం వల్ల మొత్తం 3.02 లక్షల మంది విద్యార్థులకు ప్రయోజనం చేకూరనుంది. ప్రస్తుతం 404 ప్రభుత్వ జూనియర్‌ కళాశాలల్లో 1.87 లక్షల మంది, 125 ప్రభుత్వ డిగ్రీ కళాశాలల్లో 1.15 లక్షల మంది విద్యార్థులు చదువుతున్నారు. వాస్తవానికి 2018-19 విద్యాసంవత్సరం నుంచే జూనియర్‌, డిగ్రీ కళాశాలలతోపాటు బీఈడీ, డీఈడీ, పాలిటెక్నిక్‌ కళాశాలల్లో ఈ పథకాన్ని అక్షయ పాత్ర ఫౌండేషన్‌ ద్వారా అమలుచేయాలని భావించారు. తర్వాత అమలు నిలిచిపోయింది. మళ్లీ రెండేళ్ల తర్వాత ప్రభుత్వ జూనియర్‌, డిగ్రీ కళాశాలల్లో ఈ పథకం అమలుకానుంది. అయితే ఈసారి కళాశాలలు ఎప్పుడు తెరుచుకుంటాయో చెప్పలేని పరిస్థితి నెలకొంది.
సర్కారీ విద్యకు సత్తువ
* చివరి సెమిస్టర్‌ పరీక్షలు నిర్వహిస్తాం
* పాఠశాలల పునఃప్రారంభంపై త్వరలోనే తుది నిర్ణయం
* సీఎం కేసీఆర్‌ వెల్లడి
ఈనాడు, హైదరాబాద్‌: విద్యా వ్యవస్థను పూర్తిస్థాయిలో ప్రక్షాళన చేస్తామని ముఖ్యమంత్రి కె.చంద్రశేఖర్‌రావు ప్రకటించారు. అవసరమైన దీర్ఘకాలిక వ్యూహం రూపొందించి అమలు చేస్తామని చెప్పారు. పరీక్షల నిర్వహణ, సిలబస్‌ తదితర అంశాలపై యూజీసీ, ఏఐసీటీఈ, ఎన్‌సీఈఆర్‌టీ మార్గదర్శకాలను పాటించాలని నిర్ణయించినట్లు తెలిపారు.
డిగ్రీ, పీజీ, ఇంజినీరింగ్‌ చివరి సెమిస్టర్‌ పరీక్షలు నిర్వహిస్తామన్నారు. కరోనా నేపథ్యంలో విద్యావ్యవస్థకు సంబంధించిన అంశాలు, రాష్ట్రంలో ప్రభుత్వ విద్యా సంస్థల బలోపేతంపై సీఎం గురువారం ప్రగతి భవన్‌లో విస్తృతస్థాయి సమావేశం నిర్వహించారు. విద్యాశాఖ మంత్రి సబితా ఇంద్రారెడ్డి, ప్రభుత్వ ప్రధాన కార్యదర్శి సోమేశ్‌కుమార్‌, విద్యాశాఖ ప్రత్యేక ప్రధాన కార్యదర్శి చిత్రా రామచంద్రన్‌, ఉన్నత విద్యామండలి ఛైర్మన్‌ తుమ్మల పాపిరెడ్డి, కళాశాల విద్యాశాఖ కమిషనర్‌ నవీన్‌ మిత్తల్‌, ఇంటర్‌బోర్డు కార్యదర్శి సయ్యద్‌ ఉమర్‌ జలీల్‌, పాఠశాల విద్యాశాఖ నూతన సంచాలకురాలు శ్రీదేవసేన, విద్యామండలి ఉపాధ్యక్షులు ఆచార్య లింబాద్రి, వెంకటరమణ, పాఠశాల విద్యాశాఖ సీనియర్‌ అధికారులు శ్రీహరి, శేషుకుమారి తదితరులు పాల్గొన్నారు.
నిపుణుల అభిప్రాయాలు తీసుకోండి
ప్రభుత్వ విద్యాసంస్థల పనితీరును గణనీయంగా మెరుగుపరిచి.. అత్యుత్తమ బోధన జరిగేలా చేస్తేనే విద్య పేరు మీద జరుగుతున్న దోపిడీని అరికట్టడం సాధ్యమవుతుందని సీఎం అభిప్రాయపడ్డారు. ప్రభుత్వ పాఠశాలలు, ఇంటర్‌, డిగ్రీ కళాశాలలు, ఇతర ప్రభుత్వ విద్యాసంస్థలు ప్రస్తుతం ఎలా ఉన్నాయి? వాటిని గొప్పగా తీర్చిదిద్దేందుకు ఎలాంటి చర్యలు తీసుకోవాలి? విద్యా ప్రమాణాలు పెంచేందుకు ఏం చేయాలి? అనే విషయాలపై త్వరలోనే ఓ కార్యశాల నిర్వహించి విద్యారంగ నిపుణులు, అనుభవజ్ఞుల అభిప్రాయాలు తీసుకోవాలని అధికారులను సీఎం ఆదేశించారు. కేసీఆర్‌ కిట్ల పథకం అమలు చేయడంతోపాటు ప్రభుత్వ వైద్యశాలల్లో సదుపాయాలు పెంచడం పేదలకు ఉపయోగపడిందని, ప్రజలకు నమ్మకం ఏర్పడి ఓపీ పెరిగిందని, వైద్య రంగంలో దోపిడీ ఆగిపోయిందని చెప్పారు. అలానే ప్రభుత్వ విద్యాసంస్థలను బలోపేతం చేస్తే ప్రజలకు మేలు జరుగుతుందని, దోపిడీ ఆగిపోతుందని పేర్కొన్నారు.
అనాథ ఆడపిల్లల బాధ్యత ప్రభుత్వానిదే
అనాథ ఆడపిల్లలు పదో తరగతి వరకు కస్తూర్బా గాంధీ బాలికా విద్యాలయాల్లో చదువుతున్నారు.. తర్వాత వారి చదువుకు కావాల్సిన ఏర్పాట్లు చేసే విషయంలో ప్రభుత్వమే బాధ్యత తీసుకుంటుందని సీఎం చెప్పారు. దీనిపై త్వరలోనే విధాన నిర్ణయం ప్రకటిస్తామన్నారు.
సీఎం తీసుకున్న నిర్ణయాలివి..
* విద్యా వ్యవస్థను కాపాడే ఉద్దేశంతో యూజీసీ, ఏఐసీటీఈ సూచించిన మేరకు రాష్ట్రంలో డిగ్రీ, పీజీ, ఇంజినీరింగ్‌ చివరి సెమిస్టర్‌ పరీక్షలు నిర్వహించాలి. మిగతా వారిని ప్రస్తుతానికి ఎలాంటి పరీక్షలు లేకుండా పై తరగతులకు ప్రమోట్‌ చేయాలి.
* విద్యార్థులు విలువైన విద్యా సంవత్సరం కోల్పోకుండా ఉమ్మడి ప్రవేశ పరీక్షల(సెట్స్‌) కాలపట్టికను ప్రభుత్వం రూపొందిస్తుంది.
* రాష్ట్రంలో పాఠశాలలను ఎప్పటి నుంచి పునఃప్రారంభించాలి? విద్యా బోధన ఎలా జరగాలి? అనే విషయాలపై కేంద్రప్రభుత్వ మార్గదర్శకాలను, ఇ తర రాష్ట్రాలు అనుసరిస్తున్న పద్ధతిని పరిశీలించి రాష్ట్రంలో ఏం చేయాలనే విషయంపై ప్రభుత్వం త్వరలోనే తుది నిర్ణయం తీసుకుంటుంది.
* ఏఐసీటీఈ సూచించినట్లుగా పాత విద్యార్థులకు ఆగస్టు 17వ తేదీ నుంచి ఇంజినీరింగ్‌ విద్యా సంవత్సరం ప్రారంభించాలి.
పరీక్షల నిర్వహణకే వర్సిటీల మొగ్గు
* ఇప్పటికే 182 విశ్వవిద్యాలయాల్లో పూర్తి: యూజీసీ
ఈనాడు, దిల్లీ: దేశవ్యాప్తంగా 454 విశ్వవిద్యాలయాలు పరీక్షల నిర్వహణకు మొగ్గుచూపుతున్నట్లు విశ్వవిద్యాలయాల నిధుల సంఘం (యూజీసీ) పేర్కొంది. కొవిడ్‌-19 నేపథ్యంలో పరీక్షల నిర్వహణపై జులై 6వ తేదీన యూజీసీ జారీచేసిన సవరించిన మార్గదర్శకాలపై 640 విశ్వవిద్యాలయాలు స్పందించినట్లు తెలిపింది. అందులో 120 డీమ్డ్‌ , 229 ప్రైవేటు, 40 సెంట్రల్, 251 స్టేట్‌ వర్సిటీలు తమ అభిప్రాయాలు పంపినట్లు పేర్కొంది. వాటిలో 182 విశ్వవిద్యాలయాలు ఇప్పటికే ఆన్‌లైన్, ఆఫ్‌లైన్‌ ద్వారా పరీక్షలు పూర్తిచేసినట్లు వెల్లడించింది. మరో 234 ఆన్‌లైన్‌/ఆఫ్‌లైన్‌/మిశ్రమ పద్ధతిలో ఆగస్టు, సెప్టెంబర్‌ నెలల్లో పరీక్షల నిర్వహణకు సంసిద్ధమైనట్లు పేర్కొంది. మరో 38 విశ్వవిద్యాలయాలు చట్టబద్ధమైన పాలకమండళ్ల ఆదేశాల ప్రకారం పరీక్షలు నిర్వహించడానికి ప్రణాళికలు తయారుచేసుకుంటున్నట్లు వెల్లడించింది. 2019-20లో ఏర్పాటైన 27 ప్రైవేటు వర్సిటీల్లో చేరిన విద్యార్థులకు ఇంకా తుది సెమిస్టర్‌ రాసే అర్హత రాలేదని, అందువల్ల అవి తాజా మార్గదర్శకాల పరిధిలోకి రావని యూజీసీ స్పష్టంచేసింది. మిగిలిన విశ్వవిద్యాలయాలు మాత్రం ఈ అంశంపై నిర్ణయం తీసుకోవాల్సి ఉన్నట్లు తెలిపింది.
ఇంటర్‌లో 40 శాతం బ‌హుళైచ్ఛిక ప్ర‌శ్న‌లు
* ఏటా మూడు ‘ఆన్‌లైన్‌’ పరీక్షలు!
* మార్పులకు బోర్డు ప్రతిపాదన
ఈనాడు, హైదరాబాద్‌: ఇంటర్‌మీడియట్‌ పరీక్షల్లో కీలక మార్పులు చేసేందుకు ఇంటర్‌బోర్డు సన్నద్ధమైంది. ప్రశ్నపత్రాల రూపకల్పన, మార్కుల కేటాయింపు తదితర అంశాల్లో పలు సంస్కరణలు ప్రతిపాదిస్తూ ప్రభుత్వానికి నివేదిక పంపింది. ఆమోదం లభిస్తే కొత్త విద్యా సంవత్సరం నుంచి వాటిని అమలు చేయాలని భావిస్తోంది. పరీక్షల్లో కేవలం వ్యాసరూప ప్రశ్నలే కాకుండా 40 శాతం మార్కులకు బహుళ ఐచ్ఛిక ప్రశ్నలు (ఎంసీక్యూ) ఉండాలని అధికారులు ప్రతిపాదించారు. ఏడాదిలో ఇలాంటివి మూడు పరీక్షలు నిర్వహించి వాటిల్లో అధిక మార్కులు వచ్చిన రెండిటి సగటు తీసుకుని తుది మార్కులు ఇవ్వాలని పేర్కొన్నారు. ఈ పరీక్షలను ఆన్‌లైన్‌లో నిర్వహించాలని సూచించారు. ప్రస్తుతం పలు ప్రవేశ పరీక్షలను టీసీఎస్‌ అయాన్‌ తదితర సంస్థలే జరుపుతున్నాయి.
ఈ పరీక్షల నిర్వహణను కూడా అలాంటి సంస్థలకు అప్పగించవచ్చని తెలిపారు. అలానే ఇంటర్నల్స్‌కు 20 శాతం మార్కులు ప్రతిపాదించారు. ప్రాజెక్టులు, అసైన్‌మెంట్లు వంటి వాటికి ఈ మార్కులు ఇవ్వాలని నిర్ణయించారు. తుది పరీక్షలు 40 శాతం మార్కులకు ఉంటాయి.
లక్ష్యం బాగున్నా.. సమస్యలూ ఉన్నాయి..
* ‘‘సంస్కరణల లక్ష్యం బట్టీ విధానానికి చరమగీతం పాడటమే. వార్షిక పరీక్షలే కాకుండా నిరంతర మూల్యాంకనం ఉంటే ఎప్పటికప్పుడు విద్యార్థులు తమ పరిస్థితిని అంచనా వేసుకుంటారు. ప్రతి ప్రశ్నకు నాలుగు ఆప్షన్లు ఉండే ఎంసీక్యూ పరీక్షలు రాయడం ద్వారా రాష్ట్ర, జాతీయస్థాయి ప్రవేశ పరీక్షలకూ ఉపయోగంగా ఉంటుంది. సబ్జెక్టు పరిజ్ఞానం, అవగాహన, అప్లికేషన్‌ తరహాలో ఈ ప్రశ్నలు ఉంటాయి. దీంతో అన్ని అధ్యాయాలను విద్యార్థులు సంపూర్ణంగా చదువుతారు. లోతుగా అర్థం చేసుకున్న వారే కచ్చితమైన జవాబులు గుర్తించగలుగుతారు’’ అని అధికారులు విశ్లేషిస్తున్నారు.
* ఆన్‌లైన్‌ పరీక్షల నిర్వహణ కొంత భారమే అయినా.. ‘‘చివరి పరీక్షలు 40 శాతం మార్కులకే కాబట్టి.. వాటి జవాబుపత్రాల పుటల సంఖ్య సగానికిపైగా తగ్గిపోతుంది. మూల్యాంకనం త్వరగా పూర్తవుతుంది. ఆన్‌లైన్‌ మూల్యాంకనానికి వెళితే అధ్యాపకుల రాకపోకలు తగ్గిపోతాయి. మొదట్లో కొంత భారమైనా క్రమేణా వ్యయం తగ్గుతుంది’’ అని వివరిస్తున్నారు.
* ఇప్పటికే ఎంపీసీ, బైపీసీ గ్రూపులకు సంబంధించి ప్రాక్టికల్‌ మార్కుల్లో ప్రైవేట్‌, కార్పొరేట్‌ కళాశాలలు అవకతవకలకు పాల్పడుతున్నాయన్న ఆరోపణలు ఉన్నాయి. ఇలాంటి పరిస్థితిలో మరో 20 శాతం అంతర్గత పరీక్షల మార్కులు అంటే వారిది ఇష్టారాజ్యమైపోతుందన్న ఆందోళన వ్యక్తమవుతోంది.
కాబ్సే మార్గదర్శకాల మేరకు
దశాబ్దాలుగా ఇంటర్‌ ప్రశ్నపత్రాలు, పరీక్షల్లో మార్పులు లేవు. ఫలితంగా నాలుగైదు సంవత్సరాల ప్రశ్నపత్రాల్లోని ప్రశ్నలను చదువుకుంటే చాలు 70 శాతానికిపైగా మార్కులు తెచ్చుకోవచ్చని నిపుణుల నుంచి తరచూ విమర్శలు వ్యక్తమవుతున్నాయి. పదో తరగతిలో నిరంతర సమగ్ర మూల్యాంకనం(సీసీఈ) విధానం అమలు చేస్తూ.. ఇంటర్‌కు వచ్చేసరికి పాఠ్య పుస్తకాల్లోని ప్రశ్నలను అచ్చుగుద్దినట్లుగా పరీక్షల్లో ఇవ్వడం ఏంటన్న ప్రశ్నలు విద్యావేత్తల్లో వ్యక్తమవుతున్నాయి. ఈ క్రమంలో పరీక్షల విధానంలో చేయాల్సిన మార్పులపై కౌన్సిల్‌ ఆఫ్‌ బోర్డ్స్‌ ఆఫ్‌ స్కూల్‌ ఎడ్యుకేషన్‌(కాబ్సే) ఇటీవల అన్ని రాష్ట్రాలకు మార్గదర్శకాలు పంపింది. వాటిని పరిశీలించిన ఇంటర్‌బోర్డు ఈ సంస్కరణలు ప్రతిపాదించింది. ఈ ఏడాది పరీక్షల విధానంలో కొన్ని మార్పులు చేస్తామని ఇంటర్‌బోర్డు కార్యదర్శి సయ్యద్‌ ఉమర్‌ జలీల్‌ తెలిపారు.
గురుకులాల్లో పొరుగుసేవల ఉద్యోగాలు
* జులై 30తో ముగియనున్న దరఖాస్తు గడువు
ఈనాడు, హైదరాబాద్‌: గిరిజన గురుకులాల్లో పొరుగుసేవల ద్వారా బోధనేతర సిబ్బంది పోస్టుల భర్తీకి గిరిజన గురుకుల సొసైటీ ప్రకటన జారీ చేసింది. గిరిజన గురుకులాల్లో చదివిన విద్యార్థులకు ఆయా పోస్టుల్లో ప్రాధాన్యం ఇస్తామని పేర్కొంది. అర్హులైన అభ్యర్థులు జులై 30లోగా గిరిజన గురుకుల సొసైటీ వెబ్‌సైట్‌ ద్వారా ఆన్‌లైన్లో దరఖాస్తు చేసుకోవాలని సూచించింది. జూనియర్‌ అసిస్టెంట్, డేటా ఎంట్రీ ఆపరేటర్, నాలుగోతరగతి పోస్టులు 58 వరకు ఉన్నాయని వెల్లడించింది. దరఖాస్తు సమయంలో ఫీజు కింద రూ.50 చెల్లించాలని, మార్కుల వెయిటేజీ ప్రకారం పోస్టులు భర్తీ చేయనున్నట్లు తెలిపింది. పోస్టుల భర్తీలో సొసైటీ కార్యదర్శిదే అంతిమ నిర్ణయమని పేర్కొంది.
వెబ్ సైట్ : www.tgtwgurukulam.telangana.gov.in
నీట్‌ అర్హత కటాఫ్‌ మార్కు తగ్గింపు
ఈనాడు, హైదరాబాద్‌: పీజీ వైద్యవిద్యలో ప్రవేశాలకు నీట్‌ పరీక్షలో అర్హత కటాఫ్‌ మార్కులను తగ్గిస్తూ కేంద్ర ప్రభుత్వం నిర్ణయం తీసుకుంది. ఇప్పటికే రాష్ట్రంలో కన్వీనర్‌ కోటాలో పీజీ వైద్యవిద్యలో మూడు విడతల ప్రవేశ ప్రక్రియ పూర్తయింది. ఈ సమయంలో అర్హత కటాఫ్‌ మార్కులను తగ్గించడం వల్ల మిగిలిన సీట్లలో మరింత ఎక్కువమంది ప్రవేశాలకు అర్హత సాధిస్తారు. జనరల్‌ కేటగిరీలో అంతకు ముందు 50 పర్సంటైల్‌ ఉండగా.. దాన్ని 30 పర్సంటైల్‌కు, ఎస్సీ, ఎస్టీ, ఓబీసీ కేటగిరీలో 40 నుంచి 20కి, దివ్యాంగుల కేటగిరీలో 45 నుంచి 25 పర్సంటైల్‌కు తగ్గిస్తూ తాజాగా ఉత్తర్వులు విడుదల చేశారు.
పది పరీక్షలు రద్దు
* అధికారిక ఉత్త‌ర్వులు జారీ చేసిన ఏపీ ప్ర‌భుత్వం
అమరావతి: కరోనా విజృంభన నేపథ్యంలో రాష్ట్రంలో పదో తరగతి పరీక్షలను రద్దు చేస్తూ ఏపీ ప్రభుత్వం అధికారిక ఉత్తర్వులు జారీ చేసింది. మార్చి 2020 పరీక్షలకు నమోదు చేసుకున్న పదో తరగతి విద్యార్ధులందరినీ పాస్ చేస్తున్నట్టు పేర్కొంది. ఎస్ఎస్‌సీ, ఓఎస్ఎస్‌సీ, ఒకేషనల్ పరీక్షలన్నీ రద్దు చేస్తున్నట్లు స్పష్టం చేసింది. ఈ మేరకు పాఠశాల విద్యాశాఖ ముఖ్యకార్యదర్శి బి.రాజశేఖర్ ఉత్తర్వులు జారీ చేశారు. పదో తరగతి పరీక్షలు రాసేందుకు సిద్ధమైన హాల్ టికెట్లు పొందిన విద్యార్థులందరికీ ఎలాంటి గ్రేడ్ పాయింట్లూ ఇవ్వకుండానే ఉత్తీర్ణుల్ని చేసినట్లు ప్రకటించారు.
సెప్టెంబరులో ఎంసెట్‌
* ఇతర ఉమ్మడి ప్రవేశ పరీక్షలూ వాయిదా
* యూజీసీ నిబంధనల మేరకు డిగ్రీ, పీజీ చివరి సెమిస్టర్‌ పరీక్షలు
ఈనాడు, అమరావతి: కరోనా వైరస్‌ వ్యాప్తి పెరుగుతున్నందున ఎంసెట్‌ సహా ఉమ్మడి ప్రవేశ పరీక్షలన్నింటినీ వాయిదా వేస్తున్నట్లు విద్యాశాఖ మంత్రి ఆదిమూలపు సురేష్‌ ప్రకటించారు. ఎంసెట్‌ను.. జేఈఈ మెయిన్‌, నీట్‌ పరీక్షల అనంతరం సెప్టెంబరు మూడో వారంలో నిర్వహిస్తామని వెల్లడించారు. మిగతా వాటినీ అదే నెలలో నిర్వహిస్తామని, త్వరలో పరీక్షల షెడ్యూల్‌ విడుదల చేస్తామని తెలిపారు. ఉన్నత విద్యామండలి కార్యాలయంలో ఛైర్మన్‌ హేమచంద్రారెడ్డి, కళాశాల విద్య ప్రత్యేక కమిషనర్‌ ఎం.ఎం.నాయక్‌తో కలిసి ఆయన మీడియాతో మాట్లాడుతూ.. ఉమ్మడి ప్రవేశ పరీక్షల నిర్వహణపై సీఎం జగన్‌ సమీక్షించారని, ప్రస్తుత పరిస్థితుల్లో వాయిదా వేయాల్సిందిగా సూచించారని తెలిపారు. పరీక్షలను నిర్వహించే వరకూ విద్యార్థులకు మరిన్ని మాక్‌టెస్టులు నిర్వహిస్తామని తెలిపారు.
చివరి సెమిస్టర్‌ పరీక్షలు మినహా
అండర్‌ గ్రాడ్యుయేషన్‌ (యూజీ), పోస్టు గ్రాడ్యుయేషన్‌ (పీజీ) చివరి సెమిస్టర్‌ మినహా మిగతా పరీక్షలు వాయిదా వేస్తున్నట్లు మంత్రి తెలిపారు. విద్యార్థులందర్నీ పై తరగతులకు పంపిస్తామని, కరోనా వైరస్‌ ఉద్ధృతి తగ్గిన తర్వాత పరీక్షలు నిర్వహిస్తామని వెల్లడించారు. విశ్వవిద్యాలయాల నిధుల సంఘం (యూజీసీ) సూచనల మేరకు చివరి సెమిస్టర్‌ పరీక్షలను సెప్టెంబరు 30 లోపు విశ్వవిద్యాలయాలు నిర్వహిస్తాయన్నారు. ఆగస్టు 3 నుంచి విద్యా కేలండర్‌ ప్రారంభమవుతుందని, అప్పటి పరిస్థితులను బట్టి నిర్ణయం తీసుకుంటామని చెప్పారు. విద్యా కేలండర్‌ ఆరంభం కాకముందే ప్రైవేటు పాఠశాలలు ఆన్‌లైన్‌ తరగతులను ఎలా ప్రారంభిస్తాయని ప్రశ్నించారు.
వాయిదాకు ఆదేశించండి: హైకోర్టులో వ్యాజ్యం
కరోనా వ్యాప్తి, లాక్‌డౌన్‌ సమయంలో వివిధ పరీక్షల నిర్వహణకు జరుగుతున్న ప్రయత్నాలను సవాలు చేస్తూ జులై 13న హైకోర్టులో ప్రజాహిత వ్యాజ్యం దాఖలైంది. పరిస్థితులు సాధారణ స్థితికి వచ్చేదాకా పరీక్షల్ని వాయిదా వేసేలా అధికారుల్ని ఆదేశించాలని కోరుతూ ఎన్‌ఎస్‌యూఐ రాష్ట్ర కార్యదర్శి రుచికా గోయల్‌ వ్యాజ్యాన్ని దాఖలు చేశారు.
ఏపీలో ప్రవేశ పరీక్షలు వాయిదా
* విద్యా శాఖమంత్రి ఆదిమూలపు సురేశ్
అమరావతి: ఆంధ్రప్రదేశ్‌లో ప్రవేశ పరీక్ష(సెట్)లను వాయిదా వేస్తున్నట్లు విద్యా శాఖమంత్రి ఆదిమూలపు సురేశ్ ప్రకటించారు. ఎంసెట్‌ సహా ఎనిమిది సెట్లను వాయిదా వేయాలని ఏపీ సీఎం వైఎస్‌ జగన్‌ ఆదేశించారని మంత్రి తెలిపారు. సెప్టెంబరు మూడో వారానికి ఈ ఎనిమిది సెట్లను వాయిదా వేస్తున్నట్లు మంత్రి వెల్లడించారు. ‘‘కామన్‌ ఎంట్రన్స్‌ టెస్టుల ఆన్‌లైన్‌ షెడ్యూల్‌ను ఇప్పటికే విడుదల చేశాం. ఆన్‌లైన్‌ పరీక్షల నిర్వహణలో తీసుకోవాల్సిన చర్యలపై సీఎం సమీక్షించారు. పరీక్షల నిర్వహణకు సంబంధించి అన్ని అంశాలను సీఎంకు వివరించాం. కొత్త సెట్ల తేదీలను త్వరలోనే ప్రకటిస్తాం’’ అని మంత్రి సురేశ్ తెలిపారు.
జులై 13న‌ ఎంసెట్‌ నిర్వహణపై తుది నిర్ణయం
ఈనాడు, అమరావతి: ఏపీ ఎంసెట్‌తో సహా అన్ని ఉమ్మడి ప్రవేశ పరీక్షలను నిర్వహించడంపై జులై 13న‌ స్పష్టత వచ్చే అవకాశముంది. కన్వీనర్లతో జులై 11న‌ మంత్రి సురేష్‌, ఉన్నత విద్యా శాఖ ప్రత్యేక ప్రధాన కార్యదర్శి సతీష్‌చంద్ర, ఉన్నత విద్యా మండలి ఛైర్మన్‌ హేమచంద్రారెడ్డి ఆన్‌లైన్‌ సమీక్ష నిర్వహించారు. పరీక్షల నిర్వహణకు ఏర్పాట్లు చేసుకోవాలని కన్వీనర్లకు ఈ సందర్భంగా మంత్రి సూచించారు. కరోనా లక్షణాలు ఉన్నట్లు విద్యార్థులు సమాచారమిస్తే వారికి ప్రత్యేక గదులను ఏర్పాటు చేయాలని, లక్షణాలున్న వారికి మరోమారు పరీక్ష నిర్వహించడంపైనా సమీక్షలో చర్చకు వచ్చినట్లు తెలిసింది.
నేడు సీబీఎస్‌ఈ 12వ తరగతి ఫలితాలు
దిల్లీ: సీబీఎస్‌ఈకి చెందిన 12వ తరగతి పరీక్ష ఫలితాలను జులై 11న సాయంత్రం 4 గంటలకు విడుదల చేయనున్నట్లు కేంద్ర మానవ వనరుల అభివృద్ధి మంత్రిత్వ శాఖ (హెచ్‌ఆర్డీ) శుక్రవారం తెలిపింది. పదో తరగతి ఫలితాలను జులై 13న సాయంత్రం 4 గంటలకు విడుదల చేయనున్నారు. పరీక్షల ఫలితాలు cbseresults.nic.in, results.nic.in, cbse.nic.in వెబ్‌సైట్లలో అందుబాటులో ఉంటాయని హెచ్‌ఆర్డీ ఒక ప్రకటనలో పేర్కొంది.
ద్వితీయ ఇంటర్‌లో తప్పిన వారంతా ఉత్తీర్ణులే
* అడ్వాన్స్‌డ్‌ సప్లిమెంటరీ రద్దు
* 1.47 లక్షల మందికి ఊరట
* విద్యాశాఖ మంత్రి సబితారెడ్డి
ఈనాడు - దిల్లీ: కరోనా నేపథ్యంలో సాంకేతిక కళాశాలల్లో ప్రవేశాల ప్రక్రియను ఏఐసీటీఈ పొడిగించింది. ఈ మేరకు సవరించిన విద్యా (అకడమిక్‌) క్యాలెండర్‌ను జులై 8న విడుదల చేసింది. దీని ప్రకారం ఇంజనీరింగ్‌తోపాటు, ఇతర సాంకేతిక కోర్సుల్లో చేరే విద్యార్థులకు అక్టోబర్‌ 15 నుంచి తరగతులు ప్రారంభం కానున్నాయి. ఏఐసీటీఈ ఆమోదంతో నడిచే వివిధ కోర్సుల్లో ప్రవేశాలకు తొలి రౌండ్‌ కౌన్సిలింగ్‌ అక్టోబర్‌ 5 నాటికి, రెండోరౌండ్‌ కౌన్సిలింగ్‌ను అక్టోబర్‌ 15 లోపు పూర్తి చేయాల్సి ఉంటుంది. ఖాళీగా ఉన్న సీట్లను భర్తీ చేయడానికి అక్టోబర్‌ 20 వరకు గడువు ఉంటుంది. కొత్తగా చేరిన విద్యార్థులతోపాటు, రెండో సంవత్సరంలో ‘లేటరల్‌ ఎంట్రీ’ అయిన వారికి అక్టోబర్‌ 15 నుంచి తరగతులు ప్రారంభమవుతాయి. ఇప్పటికే వివిధ సాంకేతిక కోర్సుల్లో ఉన్న విద్యార్థులకు ఆగస్టు 17 నుంచి తరగతులు ప్రారంభించాలని ఏఐసీటీఈ స్పష్టం చేసింది. కొత్త క్యాలెండర్‌ ప్రకారం యూనివర్సిటీలు, బోర్డులకు గుర్తింపు మంజూరు చేసేందుకు ఉన్న గడువును ఆగస్టు 15 వరకు పొడిగించింది.
ఇప్పటికే పీజీడీఎం, పీజీసీఎం చదువుతున్న విద్యార్థులకు జులై 15 నుంచి తరగతులు ప్రారంభించాలని తెలిపింది. పీజీడీఎం, పీజీసీఎం సీట్లు రద్దు చేసుకొని పూర్తి మొత్తం రీఫండ్‌ పొందడానికి ఆగస్టు 10 వరకు గడువు విధించింది. ఈ కోర్సుల ప్రవేశాల ప్రక్రియను ఆగస్టు 17 కల్లా పూర్తి చేయాలని నిర్దేశించింది. యూజీసీ నిబంధనలను అనుసరించి తరగతులను ఆఫ్‌లైన్‌, ఆన్‌లైన్‌తోపాటు, ఆ రెండింటి మిశ్రమ పద్ధతిలో నిర్వహించాలని సూచించింది. ఏఐసీటీఈ క్యాలెండర్‌ ప్రకారం ఇప్పటికే ఎవరైనా తరగతులు ప్రారంభించి ఉంటే వాటిని వాయిదా వేసుకోవాలని పేర్కొంది. లేదంటే గ్రాడ్యుయేషన్‌, డిప్లొమా కోర్సుల చివరి సంవత్సరం పరీక్షలకు హాజరయ్యే వారికోసం ప్రత్యేక తరగతులు నిర్వహించుకోవచ్చని స్పష్టం చేసింది. ఈ సవరించిన క్యాలెండర్‌ 2020-21 విద్యా సంవత్సరానికి మాత్రమే వర్తిస్తుందని స్పష్టం చేసింది.
అక్టోబర్‌ 15 నుంచి సాంకేతిక కళాశాలల్లో తరగతులు
* ప్రవేశాలకు చివరి తేదీ అక్టోబర్‌ 20
* సవరించిన విద్యా క్యాలెండర్‌ను జారీ చేసిన ఏఐసీటీఈ
ఈనాడు - దిల్లీ: కరోనా నేపథ్యంలో సాంకేతిక కళాశాలల్లో ప్రవేశాల ప్రక్రియను ఏఐసీటీఈ పొడిగించింది. ఈ మేరకు సవరించిన విద్యా (అకడమిక్‌) క్యాలెండర్‌ను జులై 8న విడుదల చేసింది. దీని ప్రకారం ఇంజనీరింగ్‌తోపాటు, ఇతర సాంకేతిక కోర్సుల్లో చేరే విద్యార్థులకు అక్టోబర్‌ 15 నుంచి తరగతులు ప్రారంభం కానున్నాయి. ఏఐసీటీఈ ఆమోదంతో నడిచే వివిధ కోర్సుల్లో ప్రవేశాలకు తొలి రౌండ్‌ కౌన్సిలింగ్‌ అక్టోబర్‌ 5 నాటికి, రెండోరౌండ్‌ కౌన్సిలింగ్‌ను అక్టోబర్‌ 15 లోపు పూర్తి చేయాల్సి ఉంటుంది. ఖాళీగా ఉన్న సీట్లను భర్తీ చేయడానికి అక్టోబర్‌ 20 వరకు గడువు ఉంటుంది. కొత్తగా చేరిన విద్యార్థులతోపాటు, రెండో సంవత్సరంలో ‘లేటరల్‌ ఎంట్రీ’ అయిన వారికి అక్టోబర్‌ 15 నుంచి తరగతులు ప్రారంభమవుతాయి. ఇప్పటికే వివిధ సాంకేతిక కోర్సుల్లో ఉన్న విద్యార్థులకు ఆగస్టు 17 నుంచి తరగతులు ప్రారంభించాలని ఏఐసీటీఈ స్పష్టం చేసింది. కొత్త క్యాలెండర్‌ ప్రకారం యూనివర్సిటీలు, బోర్డులకు గుర్తింపు మంజూరు చేసేందుకు ఉన్న గడువును ఆగస్టు 15 వరకు పొడిగించింది.
ఇప్పటికే పీజీడీఎం, పీజీసీఎం చదువుతున్న విద్యార్థులకు జులై 15 నుంచి తరగతులు ప్రారంభించాలని తెలిపింది. పీజీడీఎం, పీజీసీఎం సీట్లు రద్దు చేసుకొని పూర్తి మొత్తం రీఫండ్‌ పొందడానికి ఆగస్టు 10 వరకు గడువు విధించింది. ఈ కోర్సుల ప్రవేశాల ప్రక్రియను ఆగస్టు 17 కల్లా పూర్తి చేయాలని నిర్దేశించింది. యూజీసీ నిబంధనలను అనుసరించి తరగతులను ఆఫ్‌లైన్‌, ఆన్‌లైన్‌తోపాటు, ఆ రెండింటి మిశ్రమ పద్ధతిలో నిర్వహించాలని సూచించింది. ఏఐసీటీఈ క్యాలెండర్‌ ప్రకారం ఇప్పటికే ఎవరైనా తరగతులు ప్రారంభించి ఉంటే వాటిని వాయిదా వేసుకోవాలని పేర్కొంది. లేదంటే గ్రాడ్యుయేషన్‌, డిప్లొమా కోర్సుల చివరి సంవత్సరం పరీక్షలకు హాజరయ్యే వారికోసం ప్రత్యేక తరగతులు నిర్వహించుకోవచ్చని స్పష్టం చేసింది. ఈ సవరించిన క్యాలెండర్‌ 2020-21 విద్యా సంవత్సరానికి మాత్రమే వర్తిస్తుందని స్పష్టం చేసింది.
చివరి సెమిస్టర్‌ పరీక్షలు ఆగస్టులో!
* యూజీసీ మార్గదర్శకాల ప్రకారం తప్పదంటున్న అధికారులు
* 9న‌ హైకోర్టుకు చెప్పనున్న ప్రభుత్వం
ఈనాడు, హైదరాబాద్‌: రాష్ట్రంలో డిగ్రీ, బీటెక్‌, బీఫార్మసీ, ఎంబీఏ, ఎంసీఏ తదితర కోర్సుల చివరి సెమిస్టర్‌ పరీక్షలు ఆగస్టులో నిర్వహించనున్నారు. ఈ మేరకు తెలంగాణ రాష్ట్ర ఉన్నత విద్యామండలి కసరత్తు చేస్తోంది. పరీక్షలు నిర్వహించరాదని దాఖలైన పిల్‌పై జులై 9న హైకోర్టులో విచారణ సందర్భంగా పరీక్షలు నిర్వహిస్తామని ప్రభుత్వం స్పష్టం చేయనుంది. తాజాగా యూజీసీ సైతం చివరి సెమిస్టర్‌ విద్యార్థులకు పరీక్షలు నిర్వహించాలని చెప్పినందున అవసరమైన జాగ్రత్తలు తీసుకొని వాటిని నిర్వహిస్తామని చెప్పనుంది. ఉన్నత విద్యామండలి ఛైర్మన్‌ పాపిరెడ్డి జులై 7న‌ విద్యాశాఖ మంత్రి సబితా ఇంద్రారెడ్డితో చర్చించారు పరీక్షలు నిర్వహించాలంటే విద్యార్థులకు కనీసం రెండు మూడు వారాల ముందు సమాచారం ఇవ్వాల్సి ఉంటుంది. ఈ క్రమంలో ఆగస్టులో పరీక్షలు జరపాలని నిర్ణయించారు. బీటెక్‌ విద్యార్థులకు మూడు సబ్జెక్టులే ఉన్నందున సాధ్యమైనంత త్వరగా పూర్తి చేయాలని భావిస్తున్నారు.
ప్రాంగణ నియామకాలకు ఎంపికైన వారిలో ఆందోళన
పరీక్షలు నిర్వహిస్తే తాము కొలువుల్లో చేరడానికి ఆలస్యమవుతుందని ప్రాంగణ నియామకాల్లో ఎంపికైన విద్యార్థులు ఆందోళన చెందుతున్నారు. ఇప్పటికే కంపెనీలు ఫోన్లు చేసి ఎప్పుడు చేరతారని అడుగుతున్నట్లు వారు చెబుతున్నారు. ఇప్పుడు చెన్నై, బెంగళూరు, పుణె తదితర నగరాల్లో కొలువుల్లో చేరినా మళ్లీ పరీక్షల కోసం రావాల్సి ఉంటుందని అంటున్నారు. ఐఐటీలు, ఎన్‌ఐటీలు పరీక్షలను రద్దు చేసినప్పుడు ఇక్కడ ఎందుకు చేయరని కొందరు ప్రశ్నిస్తున్నారు.
ఐఐటీలు, ఎన్‌ఐటీల్లో పరీక్షలు రద్దు
పలు ఐఐటీలు, ఎన్‌ఐటీలు చివరి సెమిస్టర్‌ పరీక్షలు రద్దు చేసి అంతర్గత మార్కులు, గత సెమిస్టర్‌ మార్కుల ఆధారంగా గ్రేడ్లు ఇచ్చి విద్యార్థులను ఉత్తీర్ణులను చేశాయి. మద్రాస్‌, దిల్లీ, ఖరగ్‌పూర్‌, కాన్పూర్‌, రూర్కీ తదితర ఐఐటీలు, వరంగల్‌, రూర్కెలా, కురుక్షేత్ర తదితర ఎన్‌ఐటీలు పరీక్షలను రద్దు చేశాయి. ‘‘50 శాతం మార్కులు గత సెమిస్టర్‌కు, మరో 50 శాతం మార్కులు అసైన్‌మెంట్లకు కేటాయించి ఫలితాలు కూడా ఇచ్చాం’’ అని ఎన్‌ఐటీ వరంగల్‌ డైరెక్టర్‌ రమణారావు చెప్పారు.
9-12 తరగతుల సిలబస్‌ తగ్గించిన సీబీఎస్‌ఈ
ముంబయి: విద్యార్థుల పాఠ్య ప్రణాళికా భారాన్ని తగ్గిస్తూ కేంద్ర ప్రభుత్వం కీలక నిర్ణయం తీసుకుంది. 2020-21 విద్యా సంవత్సరానికి గాను 9-12 తరగతుల పాఠ్యప్రణాళికను హేతుబద్ధీకరించామని సీబీఎస్‌ఈ తెలిపింది. దాదాపు 30శాతం వరకు సిలబస్‌ తగ్గించామని కేంద్ర మానవ వనరుల మంత్రిత్వ శాఖా మంత్రి రమేశ్‌ పోఖ్రియాల్‌ వెల్లడించారు.
కొవిడ్‌-19 కారణంగా దేశవ్యాప్తంగా లాక్‌డౌన్‌ అమలు చేసిన సంగతి తెలిసిందే. ప్రస్తుతం అన్‌లాక్‌-2 నడుస్తున్నప్పటికీ కరోనా వైరస్‌ కేసుల సంఖ్య మరింతగా పెరుగుతోంది. రోజుకు 20వేల కేసులు నమోదు అవుతున్నాయి. వైరస్‌ వ్యాప్తి ఎక్కువగా ఉండటంతో విద్యా సంస్థలు తెరిచేందుకు పరిస్థితులు అనువుగా లేవు. అసలు విద్యా సంవత్సరం ఎప్పుడు మొదలవుతుందన్న అంశంపై స్పష్టత లేదు.
‘ప్రపంచం, దేశవ్యాప్తంగా ఏర్పడిన అసాధారణ పరిస్థితుల దృష్ట్యా పాఠ్య ప్రణాళికను సవరించాలని సీబీఎస్‌ఈ సూచించింది. 9-12 తరుగతుల సిలబస్‌ను తగ్గించాలని కోరింది. నిర్ణయం తీసుకొనేందుకు కొన్ని రోజుల క్రితం విద్యారంగ నిపుణుల సలహాలను కోరాం. 1500 వరకు సూచనలు వచ్చినందుకు సంతోషంగా అనిపించింది. వారందరికీ ధన్యవాదాలు. విద్యార్జన ప్రక్రియకు ఉన్న ప్రాధాన్యతను పరిగణనలోకి తీసుకొని కీలక విషయాలను అలాగే ఉంచుతూ 30% వరకు పాఠ్యప్రణాళికను హేతుబద్ధీకరించాం’ అని పోఖ్రియాల్‌ తెలిపారు.
చివరి సెమిస్టర్‌ విద్యార్థులకు పరీక్షలు తప్పనిసరి
* సెప్టెంబరులోపు నిర్వహించాలి
* యూజీసీ కమిటీ సవరణ మార్గదర్శకాల జారీ
ఈనాడు, దిల్లీ, హైదరాబాద్‌: వివిధ కోర్సుల్లో చివరి సంవత్సరం చదువుతున్న విద్యార్థులకు ఆఖరి సెమిస్టర్‌ పరీక్షలను సెప్టెంబరులోపు జరపాలని కేంద్ర మానవ వనరుల అభివృద్ధి మంత్రిత్వ శాఖ ఆదేశించింది. గతంలో ఆ పరీక్షలను జులైలో నిర్వహించాలని సూచించిన యూనివర్సిటీ గ్రాంట్స్‌ కమిషన్‌ (యూజీసీ).. తాజాగా వాటిని సెప్టెంబరులో జరపాలని చేసిన సూచనలతో ఈ నిర్ణయం తీసుకుంది. తుది పరీక్షలు నిర్వహించడం తప్పనిసరి అని యూజీసీ పేర్కొంది. దీంతో ఆఖరి సెమిస్టర్‌ పరీక్షల నిర్వహణ విషయంలో కొనసాగుతున్న ప్రతిష్టంభనకు తెరపడింది. కరోనాపై తాజా పరిస్థితులను పరిగణనలోకి తీసుకొని పరీక్షల నిర్వహణకు సంబంధించి మార్గదర్శకాల్లో సవరణలు చేయాలని ఇటీవలే కేంద్ర మానవ వనరుల శాఖ మంత్రి రమేష్‌ పొఖ్రియాల్‌ యూజీసీకి సూచించిన సంగతి తెలిసిందే.
ఈ నేపథ్యంలో.. జులై 6న‌ ప్రత్యేకంగా భేటీ అయిన కమిషన్‌ సవరించిన మార్గదర్శకాలను విడుదల చేసింది. దీని ప్రకారం రాష్ట్రాలు ఇక తప్పనిసరిగా పరీక్షలు నిర్వహించాల్సి ఉంటుంది.
ముఖ్యాంశాలు
* చివరి సెమిస్టర్‌ విద్యార్థులకు సెప్టెంబరు పూర్తయ్యేలోపు విశ్వవిద్యాలయాలు పరీక్షలు నిర్వహించాలి. ఆఫ్‌లైన్‌, ఆన్‌లైన్‌ పద్ధతుల్లో లేదా రెండింటి కలయికగా పరీక్షలు జరుపుకోవచ్చు. బ్యాక్‌లాగ్‌ సబ్జెక్టులు ఉంటే పరీక్షలు నిర్వహించాలి. వాటిని కూడా పైవిధానంలో జరపాలి.
* ఒకవేళ సెప్టెంబరులో పరీక్షలకు, ఏదైనా ఒక సబ్జెక్టు పరీక్షకు హాజరుకాలేని విద్యార్థులకు మరోసారి ప్రత్యేకంగా పరీక్షలు నిర్వహించాలి. ఇది 2019-20 విద్యార్థులకు ఈ ఒక్కసారి మాత్రమే అవకాశం ఇవ్వాలి.
* మిగిలిన సెమిస్టర్ల వారికి గత ఏప్రిల్‌లో సూచించినట్లుగా అంతర్గత పరీక్షలు, గత సెమిస్టర్‌ పరీక్షల మార్కులను పరిగణనలోకి తీసుకొని గ్రేడ్లు ఇచ్చుకోవచ్చు.
సీఏ పరీక్షలు వాయిదా
ఈనాడు, హైదరాబాద్‌: ఇన్‌స్టిట్యూట్‌ ఆఫ్‌ ఛార్టెర్డ్‌ అకౌంటెంట్స్‌ ఆఫ్‌ ఇండియా (ఐసీఏఐ) సీఏ పరీక్షలను మరోసారి వాయిదా వేసింది. కరోనా తీవ్రత నేపథ్యంలో వాటిని నవంబరులో నిర్వహిస్తామని తెలిపింది. ప్రస్తుత విద్యాసంవత్సరంలో మే, నవంబరు నెలల్లో రెండుసార్లు పరీక్షలు జరగాల్సి ఉంది, మే నెలలో జరగాల్సిన పరీక్షలను కరోనా కారణంగా జులై 29 నుంచి నిర్వహిస్తామని గతంలో ప్రకటించారు. జులై పరీక్షలకు హాజరు కాలేమని భావించే విద్యార్థులు వచ్చే నవంబరులో జరిగే రాసుకునేలా వెసులుబాటు కల్పిస్తూ జూన్‌ 17న ఐసీఏఐ వెల్లడించింది. ఐసీఏఐ తాజా నిర్ణయంతో మే విడత పరీక్షలు రద్దయినట్టయింది.
నీట్, జేఈఈ పరీక్షలు వాయిదా
* కొత్త తేదీల‌ను ప్ర‌క‌టించిన మాన‌వ‌వ‌న‌రుల మంత్రిత్వ శాఖ‌
* సెప్టెంబ‌రు 13న నీట్‌, 27న జేఈఈ అడ్వాన్స్‌డ్ ప‌రీక్ష‌లు
దిల్లీ: కరోనా మహమ్మారి విజృంభిస్తున్న నేపథ్యంలో నీట్‌, జేఈఈ పరీక్షలు వాయిదా పడ్డాయి. ఈ మేరకు కేంద్ర మానవవనరుల అభివృద్ధి మంత్రిత్వశాఖ కొత్త తేదీలను ప్రకటించింది. సెప్టెంబర్‌ 1 - 6 తేదీల్లో జేఈఈ మెయిన్స్‌ పరీక్షలు, సెప్టెంబర్‌ 27న జేఈఈ అడ్వాన్స్‌డ్‌ పరీక్షలు నిర్వహించనున్నట్టు ఆ శాఖ మంత్రి రమేశ్ పోఖ్రియాల్‌ వెల్లడించారు. అలాగే, సెప్టెంబర్‌ 13న నీట్‌ పరీక్ష నిర్వహించనున్నట్టు ఆయన ట్విటర్‌లో తెలిపారు. విద్యార్థుల సంక్షేమం దృష్ట్యా ఈ నిర్ణయం తీసుకున్నట్టు మంత్రి పేర్కొన్నారు.
సెప్టెంబరు 15 నుంచి ఇంజినీరింగ్‌ విద్యాసంవత్సరం
* కాలపట్టికను ప్రకటించిన ఏఐసీటీఈ
ఈనాడు, హైదరాబాద్‌: ఇంజినీరింగ్‌ కోర్సు నూతన విద్యాసంవత్సరాన్ని మరో 15 రోజులు ఆలస్యంగా ప్రారంభించాలని అఖిల భారత సాంకేతిక విద్యామండలి(ఏఐసీటీఈ) నిర్ణయించింది. ఈ విద్యాసంవత్సరం బీటెక్‌ మొదటి సంవత్సరం తరగతులను సెప్టెంబరు 1వ తేదీ నుంచి ప్రారంభించాలని గత నెలలో ఏఐసీటీఈ ప్రకటించిన సంగతి తెలిసిందే. వాస్తవానికి ప్రతి ఏటా ఆగస్టు 1 నుంచి తరగతులు మొదలుకావాలి. తాజా కరోనా పరిస్థితులను సమీక్షించిన ఏఐసీటీఈ.. ఈ సారి విద్యాసంవత్సరాన్ని సెప్టెంబరు 15వ తేదీ నుంచి ప్రారంభించేలా కాలపట్టికను విడుదల చేసింది. అదేవిధంగా జులై 15వ తేదీలోపు విశ్వవిద్యాలయాలు కళాశాలలకు అనుబంధ గుర్తింపు ఇవ్వాలని, మొదటి విడత బీటెక్‌ సీట్ల కేటాయింపును ఆగస్టు 30లోగా, రెండో విడత కౌన్సెలింగును సెప్టెంబరు 10వ తేదీలోపు పూర్తి చేయాలని నిర్ణయించింది. పాత (రెండు, మూడు, నాలుగు సంవత్సరాల) విద్యార్థులకు ఆగస్టు 16 నుంచి తరగతులను మొదలుపెట్టాలని సూచించింది.
దోస్త్‌ రిజిస్ట్రేషన్ ప్ర‌క్రియ వాయిదా
* కన్వీనర్‌ ఆచార్య లింబాద్రి
ఈనాడు, హైదరాబాద్‌: రాష్ట్రంలో డిగ్రీ కోర్సుల్లో ప్రవేశానికి నిర్వహించే డిగ్రీ ఆన్‌లైన్‌ సర్వీసెస్‌-తెలంగాణ(దోస్త్‌) రిజిస్ట్రేషన్‌ ప్రక్రియను 15 రోజులు వాయిదా వేశారు. ఈ ప్రక్రియ జులై 1 నుంచి ప్రారంభం కావాల్సి ఉంది. ఆయా ప్రవేశ పరీక్షలను ప్రభుత్వం వాయిదా వేసిన నేపథ్యంలో విద్యార్థులు గందరగోళానికి గురవుతారన్న ఉద్దేశంతో అధికారులు డిగ్రీ ప్రవేశాలను వాయిదా వేశారు. త్వరలో కొత్త తేదీలను ప్రకటిస్తామని దోస్త్‌ కన్వీనర్‌ ఆచార్య లింబాద్రి చెప్పారు.
ఎంసెట్‌ సహా ప్రవేశ పరీక్షలన్నీ వాయిదా
* హైకోర్టుకు రాష్ట్ర ప్రభుత్వం హామీ
* యూజీ, పీజీ పరీక్షలపై వివరణ ఇవ్వాలంటూ ఆదేశం
ఈనాడు, హైదరాబాద్‌: కరోనా ఉద్ధృతి నేపథ్యంలో ఎంసెట్‌ సహా తెలంగాణలో జరిగే అన్ని ప్రవేశ పరీక్షల(సెట్ల)ను వాయిదా వేయనున్నట్లు రాష్ట్ర ప్రభుత్వం జూన్ 30న‌ హామీ ఇచ్చింది. జులై 1 నుంచి నిర్వహించాల్సిన పాలిసెట్‌, ఈసెట్‌, ఎడ్‌సెట్‌, లాసెట్‌, ఐసెట్‌, ఎంసెట్‌, పీఈడీ సెట్‌లను వాయిదా వేస్తున్నామని, షెడ్యూలును జులై 1న ప్రకటిస్తామని అడ్వొకేట్‌ జనరల్‌ బి.ఎస్‌.ప్రసాద్‌ హైకోర్టుకు తెలిపారు. టైప్‌రైటింగ్‌, షార్ట్‌హ్యాండ్‌, ఇతర డిప్లమో కోర్సుల పరీక్షలనూ వాయిదా వేస్తున్నట్లు చెప్పారు. ఈ నేపథ్యంలో యూజీ, పీజీ కోర్సుల పరీక్షలకు సంబంధించి ఏం నిర్ణయం తీసుకున్నారో చెప్పాలంటూ ఉన్నత విద్యాశాఖ, ఉస్మానియా యూనివర్సిటీలను ఆదేశిస్తూ విచారణను హైకోర్టు జులై 9కి వాయిదా వేసింది.
జులై 1 నుంచి సెట్లతో పాటు 4, 11, 12 తేదీల్లో టైప్‌రైటింగ్‌, అండర్‌ గ్రాడ్యుయేట్‌, పీజీ కోర్సుల పరీక్షలు నిర్వహించడాన్ని సవాలుచేస్తూ హైదరాబాద్‌కు చెందిన బి.వి.నర్సింగ్‌రావు హైకోర్టులో వ్యాజ్యం దాఖలు చేశారు. దీనిపై ప్రధాన న్యాయమూర్తి జస్టిస్‌ ఆర్‌.ఎస్‌.చౌహాన్‌, జస్టిస్‌ బి.విజయ్‌సేన్‌రెడ్డిలతో కూడిన ధర్మాసనం విచారణ చేపట్టింది. పిటిషనర్‌ తరఫు న్యాయవాది సి.దామోదర్‌రెడ్డి వాదనలు వినిపిస్తూ కరోనా సమయంలో పరీక్షలు రద్దుచేసి ప్రమోట్‌ చేయాలని కోరారు. ధర్మాసనం స్పందిస్తూ మళ్లీ లాక్‌డౌన్‌ పెట్టాలని ప్రభుత్వం యోచిస్తోందన్న విషయాన్ని పత్రికల్లో చూశామని, ఒకవేళ అలాంటి నిర్ణయం తీసుకుని 75 శాతం ప్రాంతంలో అమలుచేస్తే పరీక్షలు ఎలా సాధ్యమవుతాయని అడ్వొకేట్‌ జనరల్‌ను ప్రశ్నించింది. రెండు విడతల్లో పరీక్షలు సాధ్యం కాదంటూ పదో తరగతి పరీక్షలను రద్దుచేశారని, అలాగే దీనిపై ఏదైనా నిర్ణయం తీసుకుంటారా అని ప్రశ్నించింది. ఏజీ సమాధానమిస్తూ లాక్‌డౌన్‌పై ఒకటి రెండు రోజుల్లో మంత్రిమండలి నిర్ణయం తీసుకుంటుందని చెప్పారు. ప్రవేశ పరీక్షల నిర్వహణపై ప్రభుత్వం నిర్ణయం తీసుకోనుందని, మధ్యాహ్నానికి వాయిదా వేయాలని కోరారు. జేఎన్‌టీయూ తరఫు న్యాయవాది వాదనలు వినిపిస్తూ యూజీ, పీజీ పరీక్షలకు సంబంధించి ప్రతిపాదనను ఉన్నత విద్యామండలికి పంపామన్నారు. దానిపై నిర్ణయం తీసుకోవాల్సి ఉందన్నారు. యూజీలో 7 సెమిస్టర్‌ల మార్కులు, 8వ సెమిస్టర్‌ను కలిపి సగటు మార్కులు లెక్కించి గ్రేడ్‌లు కేటాయిస్తామని ప్రతిపాదించామని, విద్యార్థులు అంగీకరించకుంటే రాతపరీక్ష నిర్వహిస్తామని చెప్పామన్నారు. డిగ్రీ పరీక్షలపై ప్రభుత్వం, ఉస్మానియా యూనివర్సిటీ నిర్ణయం తీసుకోవాల్సింది ఉందని ఉన్నత విద్యాశాఖ తరఫు న్యాయవాది చెప్పారు. డిగ్రీలో మొదటి, రెండో సంవత్సరాల విద్యార్థులను ప్రమోట్‌ చేయాలని నిర్ణయం తీసుకుందని, చివరి సంవత్సరానికి ఇంకా నిర్ణయం తీసుకోవాల్సి ఉందన్నారు. అనంతరం మధ్యాహ్నం అన్ని ప్రవేశ పరీక్షలను వాయిదా వేస్తూ ప్రభుత్వం నిర్ణయం తీసుకున్నట్లు కోర్టు దృష్టికి తెచ్చిన ఏజీ..ఆ వివరాలను అందజేశారు.
పల్లె బ్యాంకుల కొలువు పిలుపు
ఇప్పట్లో ప్రకటనలు వస్తాయో రావో అని నిరాశతో ఎదురు చూస్తున్న బ్యాంకు పరీక్షల అభ్యర్థులకు ఐబీపీఎస్ వరాన్ని ప్రకటించింది. 9638 ఖాళీలతో నోటిఫికేషన్ విడుదల చేసింది. చక్కటి పల్లె వాతావరణంలో ఆనందంగా ఉద్యోగం చేసుకోడానికి అవకాశం కల్పించింది. దేశవాప్తంగా 43 గ్రామీణ బ్యాంకుల్లో ఆఫీసర్లు, ఆఫీస్ అసిస్టెంట్ల నియామకాలకు ప్రక్రియ ప్రారంభమైంది. తెలుగు రాష్ట్రాల్లో 5 ఆర్ ఆర్ బీల్లో 836 పోస్టులు (ఏపీ 366, తెలంగాణ 470) ఉన్నాయి.
బ్యాంకు ఉద్యోగాలకు ఎప్పటికీ తరగని క్రేజు ఉంది. సమాజంలో మంచి గౌరవాన్ని అందించడంతోపాటు చక్కటి జీతాలు, రకరకాల సౌకర్యాలు ఉండటమే ఆ ఆకర్షణకు కారణం. గ్రామీణ ప్రాంతాల్లో బ్యాంకింగ్ సేవలను విస్తరించాలనే లక్ష్యంతో రీజినల్ రూరల్ బ్యాంకులను ఏర్పాటు చేశారు. సొంత ఊళ్లకు దగ్గరగా పనిచేయాలనుకు వారికి అనుకూలమైన ఉద్యోగాలు ఇవి.
అర్హతలు ఏమిటి?
ఆఫీస్ అసిస్టెంట్ ; ఏదైనా డిగ్రీ కనీస అర్హత. ఏ ప్రాంతానికి దరఖాస్తు చేసే అక్కడి స్థానిక భాష పై పట్టు ఉండాలి.
ఆఫీసర్ స్కేల్ - 1 ; గుర్తింపు పొందిన యూనివర్సిటీ నుంచి ఏదైనా డిగ్రీ. అగ్రికల్చర్, హార్టీ కల్చర్, ఫారెస్ట్రీ తదితర విభాగాల్లో డిగ్రీ చేసిన వారికి ప్రాధాన్యం. స్థానిక భాష తెలిసి ఉండాలి.
స్కేల్‌1 ఆఫీసర్‌(అసిస్టెంట్‌మేనేజర్‌)గా చేరిన అభ్యర్థి మేనేజర్‌, సీనియర్‌మేనేజర్‌, చీఫ్‌మేనేజర్‌/రీజనల్‌మేనేజర్‌, జనరల్‌మేనేజర్‌స్థాయి వరకు ఆపై ఛైర్మన్‌/మేనేజింగ్‌డైరెక్టర్‌స్థాయి వరకు చేరుకోవచ్చు. అసిస్టెంట్‌గా జాయిన్‌అయిన అభ్యర్థులు చీఫ్‌మేనేజర్‌, జనరల్‌మేనేజర్‌స్థాయిల వరకు చేరుకోవచ్చు.
స్కేల్ -2, 3 ఆఫీసర్ ఉద్యోగాకు డిగ్రీతోపాటు కొన్ని అదనపు అర్హతలు, అనుభవం అవసరం.
ఎంపిక ఎలా?
రాత పరీక్షలో వచ్చిన మార్కుల ఆధారంగా ఆఫీస్ అసిస్టెంట్ (మల్టీపర్పస్) ఉద్యోగాలను సొంతం చేసుకోవచ్చు. స్కేల్ - 1 ఆఫీసర్లకు రెండు దశల్లో రాత పరీక్ష, ఇంటర్వ్యూ ఉంటాయి. స్కేల్ -2, 3 ఆఫీసర్లకు ఒక రాత పరీక్ష, ఇంటర్వ్యూ నిర్వహిస్తారు. వాటిలో సాధించిన మెరిట్ ఆధారంగా ఎంపికలు జరుగుతాయి.
ప్రిపరేషన్ విధానం
పరీక్షల తేదీలను ఇంత వరకు ప్రకటించలేదు. త్వరలో వెల్లడించే అవకాశం ఉంది. గత అనుభవాల దృష్ట్యా కనీసం రెండు నెలల సమయం ప్రిలిమ్స్ కు ఉంటుంది. ఆఫీస్ అసిస్టెంట్, స్కేల్ -1 ఆఫీసర్ల పరీక్షల్లో రెండు సబ్జెక్టులు మాత్రమే ఉన్నాయి. మొదటిసారి పరీక్షలు రాసే అభ్యర్థులకు కూడా ఈ సమయం సరిపోతుంది. ఇందులో రీజనింగ్, న్యూమరికల్ ఎబిలిటీ విభాగాల నుంచి 80 ప్రశ్నలు వస్తాయి. 45 నిమిషాల సమయం ఇస్తారు. అంటే సరాసరిన అర నిమిషం మాత్రమే ఉంటుంది. మంచి మార్కులు సాధించాలంటే విస్తృతమైన సాధన చేయాలి.
ప్రశ్నల సరళి
సాధారణంగా పరీక్షలో వచ్చే ప్రశ్నల సరళిని గమనిస్తే ప్రిపరేషన్ విధానాన్ని తేలిగ్గా రూపొందించుకోవచ్చు.
రీజనింగ్‌: స్కేల్‌I ఆఫీసర్‌ ప్రిలిమ్స్‌పరీక్షలో సీటింగ్‌ఎరేంజ్‌మెంట్‌/ పజిల్‌టెస్ట్‌నుంచి దాదాపు 18 ప్రశ్నలు, స్టేట్‌మెంట్‌కంక్లూజన్‌10 ప్రశ్నలు, కోడింగ్‌డీకోడింగ్‌5, డేటా సఫిషియన్సీ- 5 , డైరెక్షన్స్‌2 ప్రశ్నలు వస్తున్నాయి. టికి అదనంగా కాజ్‌ఎఫెక్ట్, స్టేట్‌మెంట్‌ఇన్‌ఫరెన్స్, ఆర్గ్యుమెంట్, కోర్సెస్‌ఆఫ్‌యాక్షన్, ఇన్‌పుట్, అవుట్‌పుట్, బ్లడ్‌రిలేషన్స్‌ల నుంచి ప్రశ్నలను గమనించవచ్చు. ఇంచుమించు ఇవే టాపిక్స్‌పై ఆఫీస్‌అసిస్టెంట్ల పరీక్షలోనూ ప్రశ్నలున్నాయి. ప్రిలిమ్స్, మెయిన్స్‌పరీక్షలు రెండింటిలో 15-20 ప్రశ్నలు సీటింగ్‌ఎరేంజ్‌మెంట్‌/ పజిల్‌టెస్ట్‌ల నుంచి ఉంటున్నాయి. ఇతర టాపిక్స్‌సంబంధించి బాగా ప్రిపేర్ కావాలి.
క్వాంటిటేటివ్‌ఆప్టిట్యూడ్‌/ న్యూమరికల్‌ఎబిలిటీ: ఈ విభాగం నుంచి అన్ని పరీక్షలలోనూ ప్రశ్నల సంఖ్యలో తప్ప ప్రశ్నలు వచ్చే టాపిక్స్‌లో పెద్దగా మార్పు ఉండటం లేదు. సింప్లిఫికేషన్స్‌(అసిస్టెంట్స్‌పరీక్షలో దాదాపు 15 ప్రశ్నలు దీని నుంచి ఉంటాయి) నంబర్‌సిరీస్‌(5), క్వాడ్రాటిక్‌ఈక్వేషన్స్‌(5), డేటా సఫిషియన్సీ (5), డేటా ఇంటర్‌ప్రిటేషన్‌(10-15), అరిథ్‌మెటిక్‌ప్రశ్నలు (10) తప్పనిసరి. ఇవి బాగా సాధించగలగాలి. సమయం తక్కువ ఉంటుంది కాబట్టి వీటిని వేగంగా సాధించేలా షార్ట్‌కట్‌పద్ధతులు, సింప్లిఫికేషన్స్‌వేగంగా చేయడానికి స్పీడ్‌మేథ్స్‌/ వేదగణితం పద్ధతులు బాగా ఉపయోగపడతాయి. వీటికి చాలా ఎక్కువ సాధన అవసరం.
ఇంగ్లిష్‌: స్కేల్‌I ఆఫీసర్‌మెయిన్స్‌పరీక్షలో రీడింగ్‌కాంప్రహెన్షన్‌(10 ప్రశ్నలు), క్ల్లోజ్‌టెస్ట్‌(10), ఫైండింగ్‌గ్రమాటికల్లీ కరెక్ట్‌స్టేట్‌మెంట్‌(5), కరెక్షన్‌ఆఫ్‌సెంటెన్సెస్‌(5), ఫిల్లిన్‌ది బ్లాంక్స్‌(5), రీ-అరేంజ్‌మెంట్‌ఆఫ్‌సెంటెన్సెస్‌(5) ప్రశ్నలు సాధారణంగా ఇస్తున్నారు. దాదాపు ఇదే విధంగా ఆఫీస్‌అసిస్టెంట్‌పరీక్షలోని ప్రశ్నలు ఉంటున్నాయి. ఈ విషయాన్ని గమనించి సిద్ధమవ్వాలి.
జనరల్‌అవేర్‌నెస్‌: ఈ విభాగంలోని బ్యాంకింగ్‌అవేర్‌నెస్, ఆర్థికాంశాలకు ప్రాధాన్యమిస్తూ కరెంట్‌అఫైర్స్‌నుంచి ఎక్కువ సంఖ్యలో ప్రశ్నలు వస్తాయి. వీటన్నింటినీ అధ్యయనం చేయాలి. ముఖ్యాంశాలన్నీ నోట్‌చేసుకోవాలి. వీటితో పాటుగా జాతీయ, అంతర్జాతీయ, ఆర్థిక సంస్థలు, కేంద్ర ప్రభుత్వ పథకాలు, భారతీయ ఆర్థిక వ్యవస్థ, బ్యాంకింగ్‌వ్యవస్థ, స్టాక్‌మార్కెట్, జాతీయ/ అంతర్జాతీయ దినోత్సవాలు, పుస్తకాలు-రచయితలు, అవార్డులు చూసుకోవాలి.
కంప్యూటర్‌నాలెడ్జ్జ్‌: బ్యాంక్‌ఉద్యోగులకు కంప్యూటర్‌పరిజ్ఞానం తప్పనిసరి. దానిని తెలుసుకునేలా ప్రశ్నలుంటాయి ఎవల్యూషన్‌ఆఫ్‌కంప్యూటర్స్, హార్డ్‌వేర్, ఎం.ఎస్‌. ఆఫీస్‌వర్డ్, ఎక్సెల్, లితివి, జూతివి, వైరస్, యాంటీవైరస్, డేటాబేస్‌మేనేజ్‌మెంట్, కంప్యూటర్‌రంగంలో వర్తమానాంశాలపై ప్రశ్నలు వస్తాయి.
రుణాత్మక మార్కులు ఉన్నాయి. తప్పుగా గుర్తించిన ప్రతి ప్రశకు నాలుగో వంతు మార్కు కోత విధిస్తారు. దరఖాస్తులకు చివరి తేదీ జులై, 21, 2020.
వెబ్ సైట్ : https://www.ibps.in/
తెలంగాణలో ప్రవేశ పరీక్షలు వాయిదా
హైదరాబాద్‌ : తెలంగాణలో ప్రవేశ పరీక్షల నిర్వహణపై ప్రభుత్వం కీలక నిర్ణయం తీసుకుంది. కరోనా విజృంభిస్తున్న నేపథ్యంలో ప్రవేశ పరీక్షలన్నింటినీ వాయిదా వేస్తున్నట్లు ప్రభుత్వం హైకోర్టుకు తెలిపింది. దీంతో జులై 1 నుంచి జరగాల్సిన ప్రవేశ పరీక్షలు వాయిదా పడ్డాయి. ఎంసెట్‌, పాలిసెట్‌, ఐసెట్‌, ఈసెట్‌, పీజీ ఈసెట్‌, లాసెట్‌, పీజీ ఎల్‌ సెట్‌, ఎడ్‌సెట్‌, పీఈ సెట్‌ వాయిదా పడ్డాయి.
ప్రవేశ పరీక్షలను వాయిదా వేస్తున్నట్లు ప్రభుత్వం కోర్టుకు వెల్లడించింది. పరీక్షల తేదీలను తర్వాత వెల్లడిస్తామని తెలిపింది. జులై 4, 11, 12న జరగాల్సిన టైప్‌ రైటింట్‌ పరీక్షలను వాయిదా వేస్తున్నట్లు పేర్కొంది. మరోవైపు ఇంజినీరింగ్‌ చివరి సెమిస్టర్‌ పరీక్షలు నిర్వహించే ఆలోచన లేదని జేఎన్టీయూహెచ్‌ కోర్టుకు వెల్లడించింది. చివరి 2 సెమిస్టర్ల మార్కుల సరాసరితో గ్రేడింగ్‌ ఇవ్వాలని సిఫారసు చేశామని తెలిపింది. ఉన్నత విద్యామండలి తుది నిర్ణయం తీసుకోవాల్సి ఉందని పేర్కొంది. దీంతో యూజీ, పీజీ పరీక్షలపై జులై 9లోగా స్పష్టత ఇవ్వాలని రాష్ట్ర ఉన్నత విద్యామండలి, జేఎన్టీయూహెచ్‌ను కోర్టు ఆదేశించింది.
అంబేడ్కర్‌ వర్సిటీలో ప్రవేశాలు
జూబ్లీహిల్స్‌, న్యూస్‌టుడే: డాక్టర్‌ బీఆర్‌ అంబేడ్కర్‌ సార్వత్రిక విశ్వవిద్యాలయంలో.. 2020-21 విద్యాసంవత్సరానికి డిగ్రీ, పీజీ, డిప్లొమాతోపాటు సర్టిఫికెట్‌ కోర్సుల్లో అడ్మిషన్లు ప్రారంభించినట్లు అధికారులు ఓ ప్రకటనలో పేర్కొన్నారు. డిగ్రీలో బీఏ, బీకాం, బీఎస్సీ, పీజీలో ఎంఏ, ఎంకాం, ఎంఎస్సీ, ఎంబీఏ, బీఎస్‌ఐఎస్‌సీ, ఎంఎల్‌ఐఎస్‌సీ, పీజీ డిప్లొమా, సర్టిఫికెట్‌ కోర్సులకు సంబంధించి విద్యార్హతలు, పరీక్ష ఫీజు వివరాలను ‌www.braouonline.in, www.braou.ac.in లో ఉంచినట్లు తెలిపారు. గతేడాది ప్రవేశాలు పొందిన విద్యార్థులు.. రెండో సంవత్సర ఫీజులను జులై 31లోపు ఆన్‌లైన్‌లో చెల్లించాలన్నారు.
సీబీఎస్‌ఈ సిలబస్‌ తగ్గుతుంది
* 30 శాతం పాఠ్యాంశాల తగ్గింపు
* కొద్ది రోజుల్లో అధికారికంగా వెల్లడి
ఈనాడు, హైదరాబాద్‌: కరోనా పరిస్థితుల నేపథ్యంలో కొత్త విద్యా సంవత్సరంలో 30 శాతం సిలబస్‌ను తగ్గించాలని కేంద్రీయ మాధ్యమిక విద్యామండలి(సీబీఎస్‌ఈ) ప్రాథమికంగా నిర్ణయించింది. ఇంకా పలు సంస్కరణలు చేయనుంది. వీటిపై జులై 15వ తేదీ నాటికి అధికారికంగా ఉత్తర్వులు ఇవ్వనుంది. తాజాగా నిర్వహించిన ఓ వెబినార్‌లో సీబీఎస్‌ఈ కార్యదర్శి అనురాగ్‌ త్రిపాఠి పాల్గొని త్వరలో చేయనున్న మార్పులను వివరించారు.
ముఖ్యమైన మార్పులు
* 30 శాతం సిలబస్‌ను తగ్గిస్తారు. తగ్గింపు అంటే అధ్యాయాలను పూర్తిగా తొలగించరు. కొన్ని అంశాలను తొలగిస్తారు. అంటే పాఠ్య ప్రణాళికను హేతుబద్ధీకరిస్తారు. జులై 15వ తేదీ నాటికి పూర్తవుతుంది. జీవన నైపుణ్యాలను పాఠ్య ప్రణాళికలో చేరుస్తారు.
* బోర్డు పరీక్షల విధానాన్ని మారుస్తారు. ప్రయోగ పరీక్షల వెయిటేజీలో మార్పు ఉండదు. సమ్మేటివ్‌ పరీక్షలపై త్వరలో సూచనలు పంపిస్తారు.
* ఆన్‌లైన్‌, తరగతి గది బోధన కలిపి ఉంటుంది. ఆన్‌లైన్‌ తరగతులకు సంబంధించి మార్గదర్శకాలను జారీ చేస్తారు.
* ప్రాక్టికల్స్‌ను ఇంటి వద్ద చేసేలా మార్పు చేస్తారు. అందుకు పాఠశాలల యాజమాన్యాలు డిజిటల్‌ ల్యాబ్స్‌ను ఏర్పాటు చేసుకోవాల్సి ఉంటుంది.
పరీక్షలపై తేల్చేది ఎప్పుడు?
* లక్షలాది ఇంటర్‌, డిగ్రీ, ఇంజినీరింగ్‌ విద్యార్థుల ఎదురుచూపులు
* చదవాలో వద్దో తెలియక సతమతం
ఈనాడు, హైదరాబాద్‌: లక్షల మంది విద్యార్థులు ఇప్పుడు ప్రశ్నపత్రం ఎలా ఉంటుందని ఆలోచించడం లేదు. అసలు పరీక్షలు జరుగుతాయా? అయితే ఎప్పుడు? రద్దు చేస్తారా? అధికారికంగా ప్రకటించేది ఎప్పుడు?..ఈ ప్రశ్నలకు సమాధానాలు తెలియక సతమతమవుతున్నారు.
చివరి సెమిస్టర్‌పై తేల్చేదెన్నడు?
డిగ్రీ, బీటెక్‌తో పాటు పీజీ కోర్సుల చివరి సంవత్సర చివరి సెమిస్టర్‌ పరీక్షలు జరుపుతామని, మిగిలిన సెమిస్టర్ల విద్యార్థులను ప్రస్తుతానికి పై సెమిస్టర్‌కు పంపి తర్వాత పరీక్షలు జరుపుతామని ఉన్నత విద్యామండలి, విశ్వవిద్యాలయాలు చెబుతూ వస్తున్నాయి.ఈ క్రమంలో జేఎన్‌టీయూహెచ్‌ ఈనెల 20 నుంచి పరీక్షలు జరిపేందుకు కాలపట్టికనూ విడుదల చేసింది. మిగిలిన వర్సిటీలు విద్యార్థుల నుంచి పరీక్షల రుసుములు వసూలు చేశాయి. కరోనా తీవ్రత దృష్ట్యా పదో తరగతి పరీక్షలను ప్రభుత్వం రద్దుచేసింది. మరి ఉన్నత విద్యలో పరీక్షలపై ఏం చేయాలన్న దానిపై విద్యాశాఖ మంత్రి సబితా ఇంద్రారెడ్డి, ప్రభుత్వ ప్రధాన కార్యదర్శి సోమేశ్‌కుమార్‌ సమక్షంలో జూన్ 18న ఉన్నత స్థాయి సమావేశం నిర్వహించారు. ఇప్పటి పరిస్థితుల్లో పరీక్షలను నిర్వహించడం కష్టమని, వాటిని రద్దుచేసి అంతర్గత మార్కులు లేదా అంతకుముందు సెమిస్టర్‌ మార్కుల ఆధారంగా ఫలితాలు ప్రకటించాలని ప్రాథమికంగా నిర్ణయానికి వచ్చారు. తమ అభిప్రాయాలతో నివేదికను ముఖ్యమంత్రికి పంపి తుది నిర్ణయం తీసుకోవాలని భావించారు. ఇప్పటికి 10 రోజులు గడుస్తున్నా ఏదీ తేల్చి చెప్పలేదు.
* జూన్ 18న ఇంటర్‌ ఫలితాలను వెల్లడించిన ప్రభుత్వం 10 రోజులు గడిచినా ఇప్పటి వరకు అడ్వాన్స్‌డ్‌ సప్లిమెంటరీ పరీక్షల కాలపట్టిక ప్రకటించలేదు. దాన్ని సైతం రద్దుచేయాలని ఆలోచిస్తున్నట్లు సమాచారం.
ముఖ్యమంత్రి వద్దకు దస్త్రం
ప్రభుత్వ ప్రధాన కార్యదర్శి నుంచి మూడు రోజుల క్రితం నివేదికతో కూడిన దస్త్రం ముఖ్యమంత్రి కార్యాలయానికి వెళ్లినట్లు తెలిసింది. దానిపై ఆయన ఎప్పుడు నిర్ణయం తీసుకుంటారోనని అధికారులు ఎదురుచూస్తున్నారు. విద్యార్థులు మాత్రం ఏదొకటి తేల్చిచెప్పాలని కోరుతున్నారు.
ఎజులై 15కల్లా సీబీఎస్‌ఈ ఫలితాలు
* కొన్ని సబ్జెక్టులు రాయనివారికి సగటు ఆధారంగా మార్కులు
దిల్లీ: సీబీఎస్‌ఈ 10, 12 తరగతి విద్యార్థుల ఫలితాలను జులై 15కల్లా విడుదల చేస్తామని బోర్డు పరీక్షల కంట్రోలర్‌ సన్యమ్‌ భరధ్వాజ్‌ తెలిపారు. కరోనా సంక్షోభం కారణంగా మిగిలిన పరీక్షలను రద్దు చేసేందుకు సుప్రీంకోర్టు అనుమతించిన తర్వాత సీబీఎస్‌ఈ బోర్డు కొన్ని మార్గదర్శకాలను విడుదల చేసింది. అవేంటంటే..
* అన్ని పరీక్షలు రాసిన 10, 12 తరగతి విద్యార్థుల ఫలితాలను యథావిధిగా ప్రకటిస్తారు.
* - మూడు లేదా అంతకంటే ఎక్కువ సబ్జెక్టులు రాసిన విద్యార్థులకు మాత్రం.. అత్యుత్తమ మార్కులు సాధించిన మూడు సబ్జెక్టుల సగటు ఆధారంగా ప్రతిభను మదింపు చేస్తారు.
* 3 సబ్జెక్టులకు మాత్రమే హాజరైన విద్యార్థులకు.. 2 సబ్జెక్టులలో సాధించిన అత్యుత్తమ మార్కుల సగటు, అంతర్గత, ప్రాక్టికల్‌ పరీక్షల్లో ప్రతిభ ఆధారంగా తుది మార్కులు కేటాయిస్తారు.
* 12వ తరగతి విద్యార్థులకు సీబీఎస్‌ఈ బోర్డు ఇంకో అవకాశాన్ని ఇచ్చింది. మదింపు ఆధారంగా వచ్చిన మార్కులపై అసంతృప్తిగా ఉంటే.. ఆ విద్యార్థులకు మళ్లీ పరీక్షలు నిర్వహించనుంది. పదో తరగతి విద్యార్థులకు మాత్రం ఇంప్రూవ్‌మెంట్‌ పరీక్షలు రాసే అవకాశం లేదని బోర్డు స్పష్టం చేసింది. ఫలితాలు జులై 15కల్లా విడుదలయ్యే అవకాశాలున్నాయని సన్యమ్‌ తెలిపారు.
సీబీఎస్‌ఈ, ఐసీఎస్‌ఈ పరీక్షల రద్దుకు సుప్రీంకోర్టు అనుమతి
సీబీఎస్‌ఈ, ఐసీఎస్‌ఈ 10, 12 తరగతి పరీక్షలను రద్దు చేయడానికి జూన్ 26న సుప్రీం కోర్టు అనుమతించింది. కరోనా కారణంగా మిగిలిన పరీక్షలు నిర్వహించలేమన్న సీబీఎస్‌ఈ బోర్డు వినతిని పరిగణనలోకి తీసుకున్న కోర్టు.. పరీక్షలు రద్దు చేయొచ్చంటూ ఆదేశాలు జారీ చేసింది. రాసిన సబ్జెక్టులలో మార్కుల ఆధారంగా విద్యార్థి ప్రతిభను మదింపు చేస్తామని కేంద్రం, సీబీఎస్‌ఈ బోర్డు తరఫున వాదించిన సొలిసిటర్‌ జనరల్‌ తుషార్‌ మెహతా కోర్టుకు తెలిపారు. ఐసీఎస్‌ఈ బోర్డు కూడా దాదాపు ఇదే వాదనను వినిపించింది. అయితే తాము మార్కుల మదింపునకు భిన్నమైన ఫార్ములాను అనుసరిస్తామని, అవసరమైతే పదో తరగతి విద్యార్థులకు మళ్లీ పరీక్షలు నిర్వహించే అవకాశాన్ని పరిశీలిస్తామని కోర్టుకు తెలిపింది.
ఎంసెట్‌ కేంద్రాల మార్పునకు అవకాశం
ఈనాడు, హైదరాబాద్‌: తెలంగాణ పరిధిలో టీఎస్‌ఎంసెట్‌ పరీక్ష కేంద్రాలను మార్చుకునేందుకు ప్రభుత్వం అవకాశం కల్పించింది. విద్యార్థులు eamcet.tsche.ac.in వెబ్‌సైట్‌లోకి వెళ్లి పరీక్ష కేంద్రం మార్చుకోవచ్చని, జూన్ 26 (శుక్రవారం) వరకే అవకాశం ఉంటుందని కన్వీనర్‌ ఎ.గోవర్ధన్‌ తెలిపారు. తొలివిడతలో తెలంగాణ నుంచి ఏపీకి పరీక్ష కేంద్రాలను మార్చుకునేందుకు అవకాశం ఇవ్వగా.. తాజాగా తెలంగాణ పరిధిలో మార్చుకోడానికి అవకాశం కల్పించినట్లు చెప్పారు. టీఎస్‌ఎంసెట్‌ జులై 6 నుంచి 9 తేదీల మధ్య జరగనుంది. ఈ అవకాశాన్ని తెలంగాణ ప్రాంత విద్యార్థులు సద్వినియోగం చేసుకోవాలని కన్వీనర్‌ సూచించారు.
సెంట్రల్‌ టెట్‌ వాయిదా
సీబీఎస్‌ఈ ఆధ్వర్యంలో జులై 5వ తేదీన జరగాల్సిన కేంద్రీయ ఉపాధ్యాయ అర్హత పరీక్ష(సీటెట్‌) వాయిదా పడింది. కరోనా పరిస్థితులను సమీక్షించి కొత్త తేదీని తర్వాత వెల్లడిస్తామని సీబీఎస్‌ఈ పేర్కొంది.
సీబీఎస్‌ఈ పరీక్షలు రద్దు
* సుప్రీంకు తెలిపిన కేంద్ర ప్రభుత్వం
న్యూదిల్లీ: దేశంలో కరోనా మహమ్మారి విజృంభిస్తున్న నేపథ్యంలో సెంట్రల్ బోర్డ్‌ ఆఫ్‌ సెకండరీ ఎడ్యుకేషన్ (సీబీఎస్‌ఈ) పరీక్షలను రద్దు చేస్తున్నట్లు కేంద్ర మానవవనరుల శాఖ సుప్రీంకోర్టుకు తెలిపింది. సీబీఎస్‌ఈ పరీక్షల నిర్వహణపై జూన్ 25న సుప్రీంకోర్టులో విచారణ జరిగింది. ఈ క్ర‌మంలో జులై 1 నుంచి 15 మధ్య జరగాల్సిన సీబీఎస్ఈ 12వ తరగతి, 10వ తరగతి పరీక్షలను రద్దు చేస్తున్నట్లు ప్రకటించింది. వీటితో పాటు ఐసీఎస్‌ఈ పరీక్షలు కూడా రద్దు చేస్తున్నట్లు బోర్డు తెలిపింది. సొలిసిటర్ జనరల్ తుషార్ మెహతా అన్ని వివరాలను సుప్రీంకోర్టుకు వివరించారు. దిల్లీ, మహారాష్ట్ర, తమిళనాడు సహా వివిధ రాష్ట్రాలు పరీక్షలు నిర్వహించలేమని చెప్పాయని... పరిస్థితులు అనుకూలంగా ఉన్నప్పుడే పరీక్షలు నిర్వహించాలని నిర్ణయించామన్నాయని తుషార్‌ మెహతా తెలిపారు.
* 12వ తరగతి విద్యార్థులకు రెండు ఆప్షన్లు ఇచ్చారు. పరీక్షకు హాజరవ్వాలా? లేక ఇంటర్నల్ మార్కుల ద్వారా సర్టిఫికెట్ తీసుకోవాలో అనే నిర్ణయాధికారాన్ని విద్యార్థులకు ఇచ్చినట్లు సీబీఎస్‌ఈ కోర్టుకు వివరించింది. ఆ ఫలితాలను జులై 15న వెల్లడిస్తామని తుషార్‌ మెహతా పేర్కొన్నారు. ఇక సీబీఎస్ఈ పరీక్షలు, ప్రవేశ పరీక్షలకు సంబంధించి తీసుకున్న నిర్ణయాన్ని.. రేపటిలోగా నోటిఫికేషన్‌గా విడుదల చేస్తామని న్యాయస్థానానికి కేంద్రం తెలిపింది. పరీక్షల నిర్వహణపై పూర్తి సమాచారంతో అఫిడవిట్ దాఖలు చేయాలని ప్రభుత్వాన్ని ఆదేశిస్తూ సుప్రీంకోర్టు విచారణను రేపటికి వాయిదా వేసింది.
పరీక్ష లేకుండా ఎస్‌బీఐలో ఉద్యోగం
ఈనాడు, ముంబయి: భారతీయ స్టేట్‌బ్యాంకు (ఎస్‌బీఐ) 444 స్పెషలిస్టు ఆఫీసర్ల భర్తీకి నోటిఫికేషన్‌ జారీ చేసింది. ఆసక్తి గల అభ్యర్థులు జులై 13లోగా దరఖాస్తు చేయాలని ప్రకటించింది. తమ వెబ్‌సైట్‌లో లాగిన్‌ అయి దరఖాస్తులు చేయొచ్చని సూచించింది. దరఖాస్తు చేసే అభ్యర్థులు రెజ్యుమ్‌, గుర్తింపు, వయసు ధ్రువీకరణ పత్రాలు, విద్యార్హత, అనుభవానికి సంబంధించిన పత్రాలను అప్‌లోడ్‌ చేయాల్సి ఉంటుంది. ఉద్యోగార్థులు ఎలాంటి పరీక్ష రాయనవసరం లేదు. ఎస్‌బీఐ కమిటీ అభ్యర్థులను షార్ట్‌లిస్ట్‌ చేసి 100 మార్కులకు ముఖాముఖి నిర్వహిస్తుంది. అందులో అర్హత మార్కులను బ్యాంకు నిర్ణయిస్తుంది. ఏ ఇద్దరికైనా కటాఫ్‌ మార్కులు సమానంగా వస్తే వయసు ఆధారంగా ఎంపిక ఉంటుంది.
డిగ్రీ, పీజీ, బీటెక్‌ చివరి సెమిస్టర్‌ పరీక్షలు రద్దు!
* మిగతా వారికి పరీక్షలు లేకుండానే పై తరగతులకు
* వర్సిటీ పాలకమండళ్ల సమావేశంలో నిర్ణయం
ఈనాడు, అమరావతి: డిగ్రీ, పీజీ, బీటెక్‌, వృత్తి విద్య, అన్ని కోర్సుల చివరి సెమిస్టర్‌ పరీక్షలను రద్దు చేయాలని విశ్వవిద్యాలయాల ఉపకులపతుల సమావేశంలో అభిప్రాయం వ్యక్తమైంది. ప్రస్తుతం కరోనా కేసులు పెరుగుతున్న నేపథ్యంలో పరీక్షలు నిర్వహించడం కష్టమని పలువురు వెల్లడించారు. ఉపకులపతుల సమావేశంలో వ్యక్తమైన అభిప్రాయాలను సీఎం జగన్‌కు వివరించి, అధికారికంగా నిర్ణయం వెల్లడించనున్నారు. డిగ్రీ మొదటి, రెండు, బీటెక్‌ మూడేళ్లు, పీజీ మొదటి ఏడాది విద్యార్థులకు ప్రస్తుతం ఎలాంటి పరీక్షలు నిర్వహించకుండా పై తరగతులకు పంపిస్తారు. కరోనా అదుపులోకి వచ్చిన తర్వాత వీరికి పరీక్షలు నిర్వహించాలని నిర్ణయించారు. పరీక్షల నిర్వహణ, అకడమిక్‌ క్యాలెండర్‌పై వర్సిటీల వీసీలతో జూన్ 23న‌ మంత్రి ఆదిమూలపు సురేష్‌, ఉన్నత విద్యాశాఖ ప్రత్యేక ప్రధాన కార్యదర్శి సతీష్‌చంద్ర, కళాశాల విద్య ప్రత్యేక కమిషనర్‌ నాయక్‌, ఉన్నత విద్యామండలి ఛైర్మన్‌ హేమచంద్రారెడ్డి వీడియో కాన్ఫరెన్సు నిర్వహించారు. పరీక్షలను రద్దు చేస్తే కళాశాలలు, విశ్వవిద్యాలయాల్లో నిర్వహించిన సెమిస్టర్‌, మిడ్‌, ఇతర అంతర్గత మార్కులు, సబ్జెక్టుల వారీగా మౌఖిక పరీక్షలు(వైవా), ఏదైనా చిన్న పరీక్ష నిర్వహించడం ఆధారంగా చివరి సెమిస్టర్‌ విద్యార్థులకు మార్కులు కేటాయించాలని నిర్ణయించారు.
* చివరి సెమిస్టర్‌ విద్యార్థులకు గత సంవత్సరాల్లో ఫెయిల్‌ అయిన సబ్జెక్టులు ఉంటే వాటికి అంతర్గత మార్కులు, మౌఖిక పరీక్షల ఆధారంగా క్రెడిట్లు కేటాయిస్తారు.
* అకడమిక్‌ సంవత్సరం ఆగస్టులో ప్రారంభం కానుంది. ఆన్‌లైన్‌ తరగతులు నిర్వహిస్తారు.
* వర్సిటీలు కొన్ని సబ్జెక్టులకు పరీక్షలు నిర్వహించాయి. మిగతా సబ్జెక్టులకు పరీక్షలు నిర్వహించకుండా అంతర్గత మూల్యాంకనం ద్వారా క్రెడిట్లు కేటాయిస్తారు.
నవంబరు 2 నుంచి గ్రూపు-1 పరీక్షలు
ఈనాడు, అమరావతి: వాయిదాపడిన గ్రూపు-1, గెజిటెడ్‌, నాన్‌-గెజిటెడ్‌ ఉద్యోగ నియామక ప్రధాన పరీక్షల తేదీలను ఆంధ్రప్రదేశ్‌ పబ్లిక్‌ సర్వీస్‌ కమిషన్‌ ప్రకటించింది. గ్రూపు-1 ప్రధాన పరీక్షలు నవంబరు 2 నుంచి 13వ తేదీ వరకు నిర్వహిస్తామని తెలిపింది. నవంబరు 2, 3 తేదీల్లో తెలుగు, ఆంగ్ల పేపర్లు, 5న పేపరు-1, 7న పేపరు-2, 9న పేపరు-3, 11న పేపరు-4, 13న పేపరు-5 జరుగుతుందని తెలిపింది. డిగ్రీ కళాశాలల అధ్యాపకుల నియామక పరీక్షలు సెప్టెంబరు 15, 16 తేదీల్లో జరుగుతాయి. గెజిటెడ్‌ పోస్టులకు సెప్టెంబరు 21 నుంచి 23 మధ్య, నాన్‌ గెజిటెడ్‌ కేటగిరికి 25 నుంచి 27వ తేదీ మధ్య పరీక్షలు జరుపుతామని ఏపీపీఎస్సీ కార్యదర్శి ఆంజనేయులు ఓ ప్రకటనలో తెలిపారు.
తెలంగాణ డిగ్రీ అడ్మిషన్ల కోసం ‘దోస్త్’ విడుదల
తెలంగాణలోని ఆరు యూనివర్సటీల పరిధిలో డిగ్రీ కళాశాలల్లో ప్రవేశానికి ‘దోస్త్’ (డి్గ్రీ ఆన్ లైన్ సర్వీసెస్ - తెలంగాణ) ప్రకటన విడుదలైంది. ఈ మేరకు తెలంగాణ హయ్యర్ ఎడ్యుకేషన్ కౌన్సిల్ వైస్ ఛైర్మన్, దోస్త్ కన్వీనర్ వివరాలను వెల్లడించారు. ఉస్మానియా, కాకతీయ, తెలంగాణ, పాలమూరు, మహాత్మాగాంధీ, శాతవాహన యూనివర్సిటీల్లో డిగ్రీ చేరాలనుకునే అభ్యర్థులకు దోస్త్ సింగిల్ విండోలాంటిది. జులై 1 నుంచి 14 వరకు మొదటి విడత రిజిస్ట్రేషన్లు నిర్వహిస్తారు. ఈ దరఖాస్తుదారులు జులై 6 నుంచి 15 వరకు వెబ్ ఆప్షన్లను నమోదు చేసుకోవచ్చు. జులై 22న మొదటి విడత సీట్లను కేటాయిస్తారు. జులై 23 నుంచి 27 వరకు అభ్యర్థులు రిపోర్టింగ్ చేయాలి. జులై 23 నుంచి 29 వరకు రెండో విడత రిజిస్ట్రేషన్లు జరుగుతాయి. జులై 23 నుంచి 30 వరకు వెబ్ ఆప్షన్లను నమోదు చేసుకోవచ్చు. ఆగస్టు 7న రెండో విడత సీట్లను కేటాయిస్తారు. ఆగస్టు 8 నుంచి 13 వరకు మూడో దశ రిజిస్ట్రేషన్లు జరుగుతాయి. ఆగస్టు 8 నుంచి 14 వరకు మూడో విడత విద్యార్థులు వెబ్ లో ఆప్షన్లను నమోదు చేసుకోవచ్చు. మూడో దశ సీట్ల కేటాయింపు ఆగస్టు 13న నిర్వహిస్తారు. సెప్టెంబరు 1 నుంచి డిగ్రీ కళాశాలల్లో తరగతులు ప్రారంభమవుతాయి.
Website
NOTIFICATION
పని దినాలు.. సిలబస్‌ తగ్గింపు
* రద్దీ పాఠశాలల్లో షిఫ్టు పద్ధతిలో బోధన
* విద్యార్థుల ఇంటి వద్దకే పుస్తకాలు
* బడుల ప్రారంభంపై అజీమ్‌ ప్రేమ్‌జీ ఫౌండేషన్‌ మార్గదర్శకాలు
కరోనా విపత్తు నేపథ్యంలో కొత్త విద్యాసంవత్సరంలో పాఠశాలలు పనిదినాలు తగ్గనుండటంతో ఆ మేరకు పాఠ్య ప్రణాళికలోనూ మార్పులు చేయాలని అజీమ్‌ ప్రేమ్‌జీ ఫౌండేషన్‌ పేర్కొంది. విద్యార్థుల ఇంటి వద్దకే అవసరమైన పాఠ్య పుస్తకాలు, నోటు పుస్తకాలు, పాఠ్యాంశాల మెటీరియల్‌ అందించాలని సూచించింది. పరిశుభ్రత, పారిశుద్ధ్యానికి బడ్జెట్‌లో అదనంగా కేటాయించి ఖర్చు చేయాలంది. గతంలో నేర్చుకున్న విషయాలను పరిగణనలోకి తీసుకుంటూ రాబోయే ఏడాదికి సిద్ధమయ్యేలా పాఠ్యాంశాలు గుర్తించి మెటీరియల్‌ సిద్ధం చేయాలని సూచించింది. ‘కరోనా సమయంలో పాఠశాలలు- కీలకమైన అంశాల్లో ఏం చేయాలి’ పేరిట అజీమ్‌ ప్రేమ్‌జీ ఫౌండేషన్‌ మార్గదర్శకాలు విడుదల చేసింది.
విద్యార్థుల సంఖ్య ఎక్కువైతే...
ముఖాముఖి ద్వారానే విద్యార్థులు ఎక్కువగా పాఠ్యాంశాలు నేర్చుకునేందుకు అవకాశం ఉంటుంది. ప్రస్తుతం టెక్నాలజీనే బోధనకు ప్రత్యామ్నాయం. కరోనా బారిన పడిన కుటుంబాల్లోని పిల్లలందరికీ పాఠశాలల్లో స్థానం కల్పించాలి. ఉమ్మడి పాఠ్యప్రణాళిక సిద్ధం చేయాలి. విద్యార్థుల సంఖ్య ఆధారంగా రద్దీ, తక్కువ రద్దీ కేటగిరీలుగా పాఠశాలల్ని విభజించాలి. రెడ్‌, ఆరెంజ్‌, గ్రీన్‌ జోన్లలో ఉన్నప్పటికీ రద్దీ ఎక్కువగా ఉంటే విద్యార్థులకు రోజు విడిచి రోజు లేదా షిఫ్టుల పద్ధతిలో తరగతులు నిర్వహించాలి. ప్రతి వారం నిర్దేశించిన రోజున చెప్పిన తరగతుల విద్యార్థులు మాత్రమే హాజరుకావాలి. తరగతులకు హాజరయ్యే విద్యార్థులకు భోజనం ఇవ్వడంతో పాటు పాఠశాలకు రాని వారికి రేషన్‌ సరకులు, ఆహార ప్యాకెట్లు అందించాలి.
తరగతుల నిర్వహణ నమూనా..
* సిలబస్‌ తగ్గింపులో తప్పనిసరి బోధించాల్సిన అంశాలను గుర్తించి, మిగతా విషయాలను సాధారణంగా చదువుకునే అవకాశమివ్వాలి.
* ఎప్పటికప్పుడు విద్యార్థుల ప్రగతిని మదింపు చేయాలి. వార్షిక పరీక్షలు నిర్వహించే పరిస్థితి లేకుంటే ఈ మదింపుతో గ్రేడ్‌లు కేటాయించే వీలుంది.
* 1-3 తరగతులకు వారానికి 5 గంటలు బోధన ఉండాలి. భాషలు, గణితంపై దృష్టి పెట్టాలి. * 4-5 తరగతులకు వారానికి 6 గంటల బోధన సమయాన్ని కేటాయించాలి. భాషలు, గణితం, పర్యావరణంపై పాఠాలు ఉండాలి.
* 6-8 తరగతులకు వారానికి 10 గంటల బోధన జరగాలి. భాషలు, గణితం, సైన్స్‌, సోషల్‌ స్టడీస్‌పై దృష్టిపెట్టాలి.
* 9-10 తరగతుల విద్యార్థులకు ప్రతి సబ్జెక్టుకు వారానికి 3 గంటల చొప్పున బోధన సమయం కేటాయించాలి. పాఠశాలతో పాటు ఇంట్లోనూ స్వీయ శిక్షణ కలిపి ఈ బోధన గంటలు నిర్ణయించారు.
ప్రభుత్వ యంత్రాంగం చేయాలిలా..
* జిల్లా విద్యాధికారులు స్థానిక పరిస్థితుల నిబంధనలు, నియమాలు జారీ చేయాలి.
* పాఠశాల విద్యార్థులు, టీచర్లు, సిబ్బందికి సబ్బు, నీళ్లు, మాస్కులు అందుబాటులో ఉండాలి.
* ఎస్‌సీఈఆర్‌టీ పాఠ్యాంశాల రూపకల్పనతో పాటు పది పరీక్షలకు బదులుగా ప్రత్యామ్నాయ ప్రణాళికలు రూపొందించాలి.
* పాఠశాల విద్యాశాఖ రెడ్‌, ఆరెంజ్‌, గ్రీన్‌ జోన్లతో పాటు పట్టణ, గ్రామీణ ప్రాంతాల ఆధారంగా పాఠశాలల నిర్వహణకు మార్గదర్శకాలు సిద్ధం చేయాలి.
ఈ-బోధనలో ఆటంకాలు
* స్మార్ట్‌ఫోన్‌తో పుస్తకాలు చదవడం, పెద్ద జవాబులు రాయడం ఇబ్బంది.
* గ్రామీణ ప్రాంతాల్లోని 10 శాతం కుటుంబాలకే స్మార్ట్‌ఫోన్లు ఉన్నాయి.
* తల్లిదండ్రులు ఫోన్లు తీసుకుపోవడంతో పిల్లలకు అందుబాటులో ఉండవు.
* ప్రస్తుతం 42 శాతం పట్టణ, 15 శాతం గ్రామీణ ప్రజలకు ఇంటర్నెట్‌ అందుబాటులో ఉంది.
* విద్యుత్తు సరఫరాలో అంతరాయంతో ఇబ్బంది.
జూన్ 18న తెలంగాణ ఇంట‌ర్ ఫ‌లితాలు
హైదరాబాద్‌: తెలంగాణలో ఇంటర్మీడియట్‌ ఫలితాలు జూన్ 18న‌ విడుదల కానున్నాయి. ఇంటర్‌ పరీక్ష ఫలితాల ప్రక్రియను ఇప్పటికే ఇంటర్ బోర్డు పూర్తి చేసింది. పరీక్షా ఫలితాలపై ప్రభుత్వానికి నివేదిక కూడా సమర్పించింది. ఇంటర్‌, మొదటి, రెండో సంవత్సరం ఫలితాలు జూన్ 18 (గురువారం) సాయంత్రం 4గంటలకు మంత్రి సబితా ఇంద్రారెడ్డి విడుదల చేయనున్నారు.
665 సివిల్‌ అసిస్టెంట్‌ సర్జన్ల పోస్టుల భర్తీకి నోటిఫికేషన్‌
ఈనాడు, అమరావతి: ప్రజారోగ్య శాఖ పరిధిలోని ప్రాథమిక ఆరోగ్య కేంద్రాల్లో 665 సివిల్‌ అసిస్టెంట్‌ సర్జన్ల పోస్టుల భర్తీకి జూన్‌ 16న నోటిఫికేషన్‌ వెలువడింది. ఎంబీబీఎస్‌ అర్హతతో ఈ పోస్టులను భర్తీ చేస్తున్నట్లు ప్రజారోగ్య శాఖ సంచాలకురాలు డాక్టర్‌ అరుణ తెలిపారు. దరఖాస్తుల స్వీకరణ జూన్‌ 19 నుంచి మొదలై జులై 18వ తేదీ వరకు జరుగుతుంది. వివరాలు వెబ్‌సైట్‌లో ఉన్నాయి.
వైద్య ఉద్యోగాల భర్తీలో వయో పరిమితి పెంపు
వైద్య ఆరోగ్య శాఖ ఉద్యోగాల భర్తీలో జనరల్‌ కేటగిరి అభ్యర్థులకు వయో పరిమితిని 34 నుంచి 42 సంవత్సరాలకు పెంచారు. ఈ మేరకు ఆ శాఖ ప్రత్యేక ప్రధాన కార్యదర్శి జవహర్‌రెడ్డి జూన్‌ 16న ఉత్తర్వులు జారీచేశారు.
* ప్రజారోగ్య శాఖ, వైద్య విధాన పరిషత్తు పరిధిలోని ఆస్పత్రుల్లో 1,021 ఉద్యోగాలను పొరుగుసేవల కింద భర్తీ చేస్తారు. బోధనాసుపత్రుల్లో 442 సహాయ ఆచార్యుల పోస్టుల భర్తీకి నోటిఫికేషన్‌ జారీ అయిందని వైద్యవిద్య సంచాలకులు డాక్టర్‌ వెంకటేశ్‌ తెలిపారు.
సీఏ పరీక్షలు జులైలో వద్దనుకుంటే.. నవంబరులోనూ రాయొచ్చు
* ఐసీఏఐ కీలక నిర్ణయం
ఈనాడు, హైదరాబాద్: కరోనా కేసులు పెరుగుతున్న నేపథ్యంలో ఇన్‌స్టిట్యూట్‌ ఆఫ్‌ ఛార్టర్డ్‌ అకౌంటెంట్స్‌ ఆఫ్‌ ఇండియా(ఐసీఏఐ).. సీఏ పరీక్షలకు సంబంధించి విద్యార్థులకు ఊరటనిస్తూ కీలక నిర్ణయం తీసుకుంది. గత మే నెలలో జరగాల్సిన సీఏ పరీక్షలను ఇప్పటికే రెండు సార్లు వాయిదా వేసిన ఐసీఏఐ వాటిని తిరిగి జులై 29వ తేదీ నుంచి నిర్వహించాలని నిర్ణయించిన సంగతి తెలిసిందే. జులైలో పరీక్షలకు హాజరుకాలేమని భావించే విద్యార్థులు వచ్చే నవంబరులో పరీక్షలు రాసుకునేలా వెసులుబాటు కల్పించింది. ఆ పరీక్షలకు విద్యార్థుల నుంచి పరీక్ష ఫీజు వసూలు చేయరు. దరఖాస్తు ఫీజు మాత్రం చెల్లించాల్సి ఉంటుంది. జులైలో నిర్వహించే పరీక్షలకు హాజరయ్యే విద్యార్థులు పరీక్షా కేంద్రాన్ని మార్చుకునే అవకాశాన్నీ ఐసీఏఐ కల్పించింది. అలాంటి విద్యార్థులు వెబ్‌సైట్‌ ద్వారా జూన్‌ 17వ తేదీ నుంచి 20వ తేదీలోపు తమ పరీక్ష కేంద్రాన్ని మార్చుకోవచ్చు. పరీక్షను నవంబరులో రాయాలనుకున్న విద్యార్థులు వెబ్‌సైట్‌లో ఆప్షన్‌ను ఎంపిక చేసుకోవాలి. నవంబరులో రాయాలని ఒకసారి ఆప్షన్‌ను ఎంపిక చేసుకుంటే..మళ్లీ మార్చుకోవడం కుదరదు. ఈ ఏడాది పరీక్షలను రద్దు చేయాలని కొంత మంది నుంచి వస్తున్న డిమాండ్‌ను సంస్థ తోసిపుచ్చింది. ఎట్టి పరిస్థితుల్లోనూ పరీక్షలు నిర్వహిస్తామని స్పష్టం చేసింది.
టిమ్స్‌లో 499 పోస్టుల భర్తీ
* నియామక ప్రకటన విడుదల
* 16 నుంచి ఆన్‌లైన్‌లో దరఖాస్తుల స్వీకరణ
ఈనాడు, హైదరాబాద్‌: తెలంగాణ ఇన్‌స్టిట్యూట్‌ ఆఫ్‌ మెడికల్‌ సైన్సెస్‌ అండ్‌ రీసెర్చి సెంటర్‌ (టిమ్స్‌)లో సేవలందించడానికి 499 పోస్టుల భర్తీకి వైద్య ఆరోగ్యశాఖ జూన్ 15న‌ నియామక ప్రకటన విడుదల చేసింది. వైద్య ఆరోగ్య సేవల నియామక బోర్డు (ఎంహెచ్‌ఎస్‌ఆర్‌బీ) ఆధ్వర్యంలో ఈ నియామకాలు చేపడతారు. ఒప్పంద ప్రాతిపదికన ఏడాది పాటు పనిచేయడానికి నియామకాలు చేపట్టనున్నట్లు ప్రకటనలో పేర్కొన్నారు. ఎంహెచ్‌ఎస్‌ఆర్‌బీ అధికారిక వెబ్‌సైట్‌లో జూన్‌ 16 నుంచి దరఖాస్తు పత్రాలు అందుబాటులో ఉంటాయని, అభ్యర్థులు ఆన్‌లైన్‌లో తమ దరఖాస్తులను జూన్‌ 19న సాయంత్రం 5 గంటల్లోపు సమర్పించాలని పేర్కొన్నారు.
టిమ్స్‌లో భర్తీ చేసే ఉద్యోగాలు
16 లేదా 17న ఇంటర్‌ ఫలితాలు
ఈనాడు, హైదరాబాద్‌: ఇంటర్‌మీడియట్‌ ఫలితాలు జూన్‌ 16 లేదా 17వ తేదీన విడుదల చేసేందుకు ఇంటర్‌బోర్డు సమాయత్తమైంది. ఇంటర్‌ ప్రథమ, ద్వితీయ ఫలితాల ప్రక్రియను పూర్తి చేసిన బోర్డు అధికారులు జూన్‌ 15 న విద్యాశాఖ మంత్రి సబితా ఇంద్రారెడ్డి ఆమోదం తీసుకోనున్నారు. మంత్రి ఆమోదం పొందిన తర్వాత 16న లేదా 17వ తేదీలో ఫలితాలను విడుదల చేయనున్నట్లు అధికార వర్గాల ద్వారా తెలిసింది. రెండు సంవత్సరాల ఫలితాలను ఒకేసారి విడుదల చేస్తారు. ఈ సారి దాదాపు 9.50 లక్షల మంది విద్యార్థులు పరీక్షలకు హాజరయ్యారు.
‘పది’ పరీక్షకు ఐసొలేషన్‌ గదులు
ఈనాడు, అమరావతి: పదో తరగతి పరీక్షలకు హాజరయ్యే విద్యార్థుల్లో దగ్గు, జలుబు, జ్వరం ఉన్నవారికి ప్రత్యేక ఐసొలేషన్‌ గదులను ఏర్పాటు చేయాలని ప్రభుత్వ పరీక్షల విభాగం సూచించింది. ప్రతి పరీక్ష కేంద్రంలో ఒక గదిని ఇందుకు ప్రత్యేకంగా ఏర్పాటు చేయనున్నారు. కరోనా వైరస్‌ వ్యాప్తి నేపథ్యంలో పదోతరగతి పరీక్షల సమయంలో తీసుకోవాల్సిన జాగ్రత్తలపై జిల్లా విద్యాధికారులకు ఆదేశాలు జారీ చేసింది.
పాటించాల్సిన జాగ్రత్తలివి:
* విద్యార్థులు, తల్లిదండ్రులు గుంపులుగా గుమిగూడకూడదు.
* విద్యార్థులు, సిబ్బందికి థర్మల్‌ స్క్రీనింగ్‌
* జిగ్‌జాగ్‌ నమూనాలో కూర్చునేలా ఏర్పాట్లు.
* ఇద్దరి మధ్య దూరం ఐదు అడుగులు ఉండాలి.
* గదులను పూర్తిగా శానిటైజ్‌ చేయాలి.
* శానిటైజర్లు, మాస్కులు తప్పనిసరి.
* ఇన్విజిలేటర్‌ దగ్గు, జలుబుతో బాధపడుతుంటే అతన్ని వెంటనే విధుల నుంచి రిలీవ్‌ చేయాలి.
* రెడ్‌, కట్టడి జోన్లలో ఉండే విద్యార్థులకు రవాణా సదుపాయం కల్పించాలి.
* ఆర్టీసీ సమన్వయంతో బస్సులు, బస్టాండ్‌ల్లో సహాయ కేంద్రాలను ఏర్పాటు చేయాలి.
డిగ్రీ సబ్జెక్టులు మీ ఇష్టం
* కొత్త విద్యాసంవత్సరం నుంచి బకెట్‌ విధానం అమలు
* సివిల్స్‌, గ్రూపు పోటీ పరీక్షల సన్నద్ధతకు ఉపయోగం
ఈనాడు, హైదరాబాద్‌: డిగ్రీలో చేరితే కళాశాలలు చెప్పిన లేదా అక్కడున్న మూడు సబ్జెక్టులను ఇష్టమున్నా లేకున్నా చదువుకోవాల్సిన అవసరం ఇక ఉండదు. నూతన విద్యా సంవత్సరం (2020-21) నుంచి విద్యార్థులు తమకు ఇష్టమైన కాంబినేషన్లను ఎంచుకోవచ్చు. ఇది బీఏ, బీకాం విద్యార్థులకు, సివిల్స్‌, గ్రూప్స్‌ లాంటి పోటీ పరీక్షలకు బాగా ఉపయోగపడుతుందని విద్యాశాఖ భావిస్తోంది. విద్యార్థి చేరిన కళాశాలలో తనకు ఆసక్తి ఉన్న సబ్జెక్టు లేకుంటే ఆన్‌లైన్‌లో దాన్ని చదువుకోవచ్చు. బకెట్‌ విధానంగా దీన్ని పిలుస్తారు. అంటే ఒక్కో బకెట్‌లో కొన్ని సబ్జెక్టులు ఉంటాయి. ఒక్కో దాంట్లోంచి విద్యార్థి ఒక దాన్ని ఎంపిక చేసుకోవచ్చు. దీన్ని గత విద్యా సంవత్సరమే ప్రయోగాత్మకంగా ప్రభుత్వ డిగ్రీ కళాశాలల్లో అమలుచేయగా ఈసారి అన్ని ప్రైవేట్‌ కళాశాలల్లోనూ అమలు చేయాలని రాష్ట్ర ఉన్నత విద్యామండలి, ఆరు సంప్రదాయ విశ్వవిద్యాలయాలు నిర్ణయించాయి. దీని వల్ల ఛాయిస్‌ బేస్‌డ్‌ క్రెడిట్‌ సిస్టమ్‌ (సీబీసీఎస్‌) స్ఫూర్తిని నిజంగా అమలు చేసినట్లవుతుందని అధికారులు భావిస్తున్నారు.
కొత్త విధానం ఇదీ.. ప్రయోజనాలు ఇవీ..
* బీఎస్‌సీలో ఫిజికల్‌, లైఫ్‌ సైన్స్‌గా విభజిస్తారు. ఫిజికల్‌ సైన్స్‌ తీసుకునేవారు గణితం, లైఫ్‌ సైన్స్‌ వారు రసాయనశాస్త్రం తప్పకుండా చదవాలి. మిగిలిన రెండు సబ్జెక్టులు విద్యార్థి ఇష్టం. అంటే అక్కడ నాలుగు రకాల గ్రూపులుంటే మూడు ఎంచుకోవాలి. ఇష్టమైనది లేకుంటే ఆన్‌లైన్‌కు వెళ్లొచ్చు.
* బీఏ చదవాలనుకున్న విద్యార్థికి ఒక కళాశాలలో సీటు వచ్చింది. అతనికి ఆసక్తి ఉన్న జాగ్రఫీ అక్కడ లేకుంటే ఉన్న మూడు సబ్జెక్టులను చదవాల్సి వచ్చేది. ఇప్పుడు కొత్త విధానంలో అక్కడ లేని సబ్జెక్టులను ఆన్‌లైన్‌లో చదువుకోవచ్చు. దాంతో వారు తర్వాత వివిధ ఉద్యోగ పరీక్షలకు పోటీపడటానికి సులభమవుతుంది.
* కళాశాల విద్యాశాఖ సోషియాలజీ, జాగ్రఫీ, పబ్లిక్‌ అడ్మినిస్ట్రేషన్‌, సైకాలజీ, జర్నలిజం అండ్‌ మాస్‌ కమ్యూనికేషన్‌ సబ్జెక్టులను ఆన్‌లైన్‌లో అందుబాటులోకి తీసుకురానుంది. గత ఏడాదే హైదరాబాద్‌ సిటీ కళాశాలలో వర్చువల్‌ తరగతుల బోధనకు స్టూడియో నిర్మించారు. అక్కడ అధ్యాపకులు బోధిస్తుంటే ఆయా కళాశాలల్లోని విద్యార్థులు వర్చువల్‌ తరగతి గది నుంచి వినొచ్చు.
* ఆర్ట్స్‌ కోర్సుల్లో 20 శాతం క్రెడిట్లను ‘స్వయం’ పోర్టల్‌ ద్వారా ఆన్‌లైన్‌ కోర్సులను పూర్తి చేసేలా అవకాశం ఇస్తారు. వారే పరీక్షలు నిర్వహించి సర్టిఫికెట్‌ ఇస్తారు. ఆ క్రెడిట్లను డిగ్రీలోకి బదిలీ చేస్తారు.
* డిగ్రీ ఆన్‌లైన్‌ సర్వీసెస్‌-తెలంగాణ (దోస్త్‌) ద్వారా ప్రవేశాలు పొందే సమయంలోనే ఆన్‌లైన్‌ సబ్జెక్టులను కూడా ఎంచుకునే అవకాశం ఇస్తారు. ఇంటర్‌ ఫలితాలు ప్రకటించగానే దోస్త్‌ ద్వారా డిగ్రీ కోర్సుల్లో ప్రవేశానికి నోటిఫికేషన్‌ జారీ చేస్తారు.
ఏపీ ఇంట‌ర్ ఫ‌లితాలు విడుద‌ల‌
* మొద‌టి స్థానంలో కృష్ణా జిల్లా
* ద్వితీయ, తృతీయ స్థానాల్లో ప‌శ్చిమ గోదావ‌రి, విశాఖ‌
* రాష్ట్ర విద్యాశాఖ మంత్రి ఆదిమూల‌పు సురేశ్‌
అమ‌రావ‌తి: ఏపీ ఇంట‌ర్మీడియ‌ట్ ప‌రీక్షా ఫ‌లితాలు విడుద‌ల‌య్యాయి. విజయవాడలోని గేట్‌వే హోటల్‌లో విద్యాశాఖ మంత్రి ఆదిమూలపు సురేశ్‌, ఆ శాఖ ముఖ్య కార్యదర్శి బి. రాజశేఖర్‌ ఫలితాలను విడుదల చేశారు. క‌రోనా వైర‌స్ కార‌ణంగా ఇంట‌ర్ ప్ర‌థ‌మ‌, ద్వితీయ సంవ‌త్స‌రాల‌ ఫలితాల‌ను ఈసారి ఒకే ద‌ఫా ఆన్‌లైన్‌లో విడుద‌ల చేశారు. విద్యార్థులు హాల్‌ టికెట్‌ నంబరు, పుట్టిన తేదీని నమోదు చేసి ఫలితాలు చూసుకోవచ్న‌న్నారు.
ఇంటర్మీడియట్‌ మొదటి సంవత్సరం పరీక్షలు 5.07 లక్షల మంది విద్యార్థులు రాయగా.. 59 శాతం విద్యార్థులు ఉత్తీర్ణత సాధించారన్నారు. ఇంటర్‌ ద్వితీయ సంవత్సరంలో 63 శాతం మంది విద్యార్థులు ఉత్తీర్ణత సాధించినట్లు వివరించారు. ఇంటర్‌ ఫలితాల్లో బాలురు కంటే బాలికల ఉత్తీర్ణత శాతం ఎక్కువగా ఉందని పేర్కొన్నారు. ఇంటర్ ఫలితాల్లో మొదటి స్థానంలో కృష్ణా జిల్లా ఉండగా.. పశ్చిమ గోదావరి, విశాఖ ద్వితీయ, తృతీయ స్థానాల్లో నిలిచాయన్నారు. మార్కుల మెమోలు వెబ్‌సైట్‌లో పెట్టినట్లు మంత్రి చెప్పారు.
12న ఇంటర్‌ ఫలితాలు
* ప్రథమ, ద్వితీయ రెండూ ఒకేసారి
* సాయంత్రం 4గంటలకు విడుదల
ఈనాడు, అమరావతి: రాష్ట్రంలో ఇంటర్‌ ఫలితాలను జూన్ 12 సాయంత్రం 4గంటలకు విజయవాడలో మంత్రి ఆదిమూలపు సురేష్‌ విడుదల చేయనున్నారు. ప్రథమ, ద్వితీయ సంవత్సరాల ఫలితాలను ఒకేసారి ప్రకటిస్తారు. హాల్‌ టికెట్‌ నంబరు, విద్యార్థుల పుట్టిన తేదీ నమోదు చేసి ఫలితాలు చూసుకోవాలి. కరోనా కారణంగా ఈసారి ఫలితాలను ఆన్‌లైన్‌లోనే విడుదల చేస్తున్నారు. ఫలితాలను https://bie.ap.gov.in, www.eenadu.net, www.eenadupratibha.net వెబ్‌సైట్‌లలో చూడొచ్చు.
ఎంసెట్‌ దరఖాస్తులు 2,19,410
జూన్ 11నుంచి సవరణలకు అవకాశం
జూన్‌ 22 నుంచి హాల్‌టికెట్లు
ఈనాడు, హైదరాబాద్‌: ఎంసెట్‌ ఇంజినీరింగ్‌, అగ్రికల్చర్‌కు మొత్తం 2,19,410 దరఖాస్తులు అందాయి. గత ఏడాది కంటే ఈసారి రెండు వేలకుపైగా దరఖాస్తులు పెరిగాయి. ఇంజినీరింగ్‌కు 750 తగ్గగా.. అగ్రికల్చర్‌కు 2,961 దరఖాస్తులు పెరిగాయి. దరఖాస్తు గడువు జూన్ 10తో ముగిసింది. రూ. 10,000 ఆలస్య రుసుంతో జూన్‌ 30 వరకు దరఖాస్తుకు అవకాశం ఉంది. విద్యార్థులు దరఖాస్తుల్లో పొందుపరిచిన వివరాల్లో ఏవైనా తప్పులుంటే జూన్‌ 11 నుంచి 16 వరకు సవరించుకోవచ్చు. జూన్‌ 22 నుంచి జులై 3 వరకు వెబ్‌సైట్‌ నుంచి హాల్‌టికెట్లను డౌన్‌లోడ్‌ చేసుకోవచ్చు. జులై 6 నుంచి ఎంసెట్‌ ఆన్‌లైన్‌ పరీక్షలు మొదలవుతాయి.
ఇంజినీరింగ్‌కు 5 విడతల్లో పరీక్షలు
ఎంసెట్‌ ఇంజినీరింగ్‌ను జులై 6, 7 తేదీల్లో ఉదయం, మధ్యాహ్నం, 8వ తేదీన ఉదయం పరీక్ష నిర్వహిస్తారు. అగ్రికల్చర్‌ పరీక్షను జులై 8వ తేదీ మధ్యాహ్నం, 9వ తేదీన ఉదయం, మధ్యాహ్నం జరపాలని ఎంసెట్‌ అధికారులు నిర్ణయించారు.
సీబీఎస్‌ఈ విద్యార్థులకు జులై 8న
సీబీఎస్‌ఈ 12వ తరగతి విద్యార్థులకు మిగిలిపోయిన పరీక్షలను సీబీఎస్‌ఈ నిర్వహిస్తోంది. వారికి జులై 7వ తేదీన పరీక్ష ఉంది. అదేరోజు ఎంసెట్‌ ఉన్నందున వారికి ఇబ్బంది లేకుండా 8వ తేదీన రాసేలా అవకాశం ఇస్తామని ఎంసెట్‌ కన్వీనర్‌ ఆచార్య గోవర్ధన్‌ తెలిపారు. మొత్తం 1800 మంది సీబీఎస్‌ఈ విద్యార్థులు ఎంసెట్‌కు దరఖాస్తు చేశారు.
‘పది’ విద్యార్థులకు గ్రేడ్లపై జీవో
ఈనాడు, హైదరాబాద్‌: పదో తరగతి విద్యార్థులకు పరీక్షలు లేకుండా అంతర్గత మార్కుల ఆధారంగా గ్రేడ్లు ఇచ్చేందుకు జీఓ జారీ అయింది. కరోనా పరిస్థితుల కారణంగా 2019-20 విద్యా సంవత్సరం పదో తరగతి పరీక్షలు రద్దు చేసి, అందరినీ ఉత్తీర్ణులుగా ప్రకటించిన విషయం తెలిసిందే. పది విద్యార్థులు నాలుగు ఫార్మేటివ్‌ అసెస్‌మెంట్‌(ఎఫ్‌ఏ)లలో చూపిన ప్రతిభ ఆధారంగా గ్రేడ్లు ఇవ్వనున్నారు. ఎఫ్‌ఏలలో 20కి వచ్చిన మార్కులను 100కి లెక్కించి గ్రేడ్లు ఇస్తారు. గ్రేడ్‌ పాయింట్లను 2014 మే 14న జారీ చేసిన జీఓ 17 ప్రకారం కేటాయిస్తారు. విద్యాశాఖ ప్రత్యేక ప్రధాన కార్యదర్శి చిత్రారామచంద్రన్ జూన్ 10న‌ ఈ ఉత్తర్వులు జారీచేశారు. ప్రభుత్వ, జిల్లా పరిషత్తు, ఎయిడెడ్, ప్రైవేట్‌ అన్‌ఎయిడెడ్, ఇతర యాజమాన్యాలలో ఎస్‌ఎస్‌సీ, ఓరియంటల్, ఒకేషనల్‌ కోర్సులు చదివే విద్యార్థులందరికీ ఈ విధానం అమలవుతుంది. ఈ ఒక్క ఏడాదికి మాత్రమే ఈ జీవో వర్తిస్తుంది. ప్రభుత్వ పరీక్షల విభాగం సంచాలకులు తదుపరి చర్యలు తీసుకుంటారని జీఓలో పేర్కొన్నారు.
ఏపీలో ‘పది’ పరీక్షలు యథాతథం
* విద్యాశాఖ మంత్రి ఆదిమూలపు సురేష్‌
ఒంగోలు: రాష్ట్రంలో పదో తరగతి పరీక్షలు ముందుగా ప్రకటించిన షెడ్యూల్‌ ప్రకారమే జరుగుతాయని ఏపీ విద్యాశాఖ మంత్రి ఆదిమూలపు సురేష్‌ స్పష్టంచేశారు. జులై 10 నుంచి యథావిధిగా నిర్వహించనున్నట్టు తెలిపారు. విద్యార్థులు, ఉపాధ్యాయుల ఆరోగ్య విషయంలో తగిన జాగ్రత్తలు తీసుకుంటామని చెప్పారు. మార్చి నెలాఖరులో జరగాల్సిన పదో తరగతి పరీక్షలు కరోనా కారణంగా వాయిదా పడిన విషయం తెలిసిందే. రాష్ట్రంలో రోజురోజుకీ వైరస్‌ వ్యాప్తి పెరిగిపోతుండటంతో పరీక్షలు ఎప్పుడు జరుగుతాయోనని విద్యార్థులు, తల్లిదండ్రుల్లో ఆందోళన నెలకొంది. మరోవైపు, ఇప్పటికే తెలంగాణ, తమిళనాడు రాష్ట్రాలు పది పరీక్షలను రద్దు చేయడంతో ఏపీలోనూ పదో తరగతి పరీక్షలు రద్దు చేయాలంటూ విద్యార్థి, ఉపాధ్యాయ సంఘాల నుంచి డిమాండ్లు వస్తున్నాయి. ఈ నేపథ్యంలో పది పరీక్షలపై మంత్రి స్పందించారు.
10 గ్రేడ్లపై కసరత్తు
ఈనాడు, హైదరాబాద్‌: పదో తరగతి విద్యార్థులకు అంతర్గత మార్కుల ఆధారంగా గ్రేడ్లు ఇవ్వాలని రాష్ట్ర ప్రభుత్వం నిర్ణయించిన నేపథ్యంలో నిబంధనావళిపై ప్రభుత్వ పరీక్షల విభాగం అధికారులు జూన్ 9న‌ సమావేశమై కసరత్తు చేశారు. నిబంధనలను పేర్కొంటూ ప్రభుత్వం జీవో ఇస్తేనే ఎస్‌ఎస్‌సీ బోర్డు అధికారులు విద్యార్థులకు మార్కుల మెమో జారీ చేయాల్సి ఉంటుంది. సీసీఈ విధానంలో భాగంగా అంతర్గత పరీక్షలకు 20 మార్కులు, గ్రేడ్ల విధానం, ప్రైవేట్‌ విద్యార్థుల(గతంలో తప్పినవారు)కు వారి చదివిన సంవత్సరంలో పొందిన ఫార్మేటివ్‌ అసెస్‌మెంట్‌(ఎఫ్‌ఏ) మార్కుల ప్రకారం గ్రేడింగ్‌ తదితర అంశాలపై పరీక్షల విభాగం అధికారులు ముసాయిదా రూపొందించినట్లు సమాచారం. ఈవిషయమై వీరు అడ్వొకేట్‌ జనరల్‌(ఏజీ)ని కలిసినట్లు తెలిసింది. ముసాయిదా విద్యాశాఖ మంత్రి సబిత ఆమోదం పొందాక.. జీఓ జారీ అవుతుంది. వెంటనే గతంలోనే అప్‌లోడ్‌ చేసిన అంతర్గత మార్కులను 100కి లెక్కించి.. గ్రేడ్లు కేటాయించి విద్యార్థులకు మార్కుల మెమోలను వెబ్‌సైట్లో ఉంచుతారు. అందుకు 10 రోజులు పడుతుందని అధికారులు చెబుతున్నారు. ప్రధానోపాధ్యాయులు అంతర్గత మార్కులను ఎస్‌ఎస్‌సీ బోర్డు పోర్టల్‌కు అప్‌లోడ్‌ చేసేముందు ఏ సబ్జెక్టులో 20కి ఎన్ని వచ్చాయో చూపి వారి సంతకాలు తీసుకుంటారు. మిగిలిన 80 మార్కులకు పరీక్షలు రాయాల్సి ఉన్నందున అంతర్గత మార్కులు చాలామంది గుర్తు పెట్టుకోరు. ఈసారి పరిస్థితి మారడంతో జీపీఏ ఎంత వస్తుందో విద్యార్థులు హెడ్మాస్టర్లకు ఫోన్లు చేస్తున్నారు.
విద్యాసంవత్సరంపై కేంద్రం కీలక నిర్ణయం
* సిలబస్‌, పనిగంటలు మార్పున‌కు యోచన
* సూచనలు పంపాలని కోరిన కేంద్ర మంత్రి రమేశ్‌ పోక్రియాల్ నిశాంక్
దిల్లీ: రాబోయే విద్యాసంవత్సరానికి పాఠ్యాంశాల కుదింపు, తరగతుల నిర్వహణ సమయాన్ని తగ్గించే అంశాన్ని పరిశీలిస్తున్నట్లు కేంద్ర మానవవనరుల అభివృద్ధి శాఖ మంత్రి రమేశ్‌ పోక్రియాల్ నిశాంక్ తెలిపారు. ఈ మేరకు ‘సిలబస్‌ ఫర్‌ స్టూడెంట్స్ 2020’ హ్యాష్‌ట్యాగ్ పేరుతో ట్విటర్‌, ఫేస్‌బుక్‌ ద్వారా ఉపాధ్యాయులు, విద్యావేత్తలు, పాఠశాల నిర్వాహకులు వారి ఆలోచనలు, సూచనలు తనతో పంచుకోవాలని మంత్రి కోరారు. వాటిని తుది నిర్ణయంలో పరిగణలోకి తీసుకుంటామని పేర్కొన్నారు. ‘‘ ప్రస్తుత పరిస్థితులను దృష్టిలో ఉంచుకొని తల్లిదండ్రులు, ఉపాధ్యాయుల నుంచి వచ్చిన అభ్యర్ధనల మేరకు రాబోయే విద్యాసంవత్సరానికి బోధనాంశాల కుదింపు, తరగతుల నిర్వహణ సమయం తగ్గించేందుకు ఉన్న అవకాశాలపై దృష్టి సారించాం’’ అని మంత్రి ట్విటర్‌లో పేర్కొన్నారు.
ఆగస్టు 15 తర్వాత పాఠశాలలు పునఃప్రారంభం కావచ్చని మంత్రి రమేశ్‌ పోక్రియాల్ నిశాంక్ జూన్ 8న‌ సూచనప్రాయంగా తెలిపారు. ఈ నేపథ్యంలో జూన్ 9న‌ అన్ని రాష్ట్రాలకు చెందిన విద్యాశాఖ కార్యదర్శులతో కేంద్ర మాన వనరుల మంత్రిత్వ శాఖ కార్యదర్శి అనితా కార్వాల్ (పాఠశాల విద్య) సమావేశం నిర్వహించారు. ఈ సందర్భంగా విద్యార్ధుల ఆరోగ్యం, భద్రత, పాఠశాలల్లో తీసుకోవాల్సిన జాగ్రత్తలు, డిజిటల్‌ తరగతుల నిర్వహణ వంటి అంశాలపై చర్చించినట్లు సమాచారం. కరోనా మహమ్మారిపై పోరులో భాగంగా మార్చి 16 నుంచి కేంద్ర ప్రభుత్వం పాఠశాలలు, యూనివర్శిటీలు మూసివేయాలని నిర్ణయించింది. దీంతో రాష్ట్ర ప్రభుత్వాలు ఎలాంటి పరీక్షలు నిర్వహించకుండానే విద్యార్ధులను తర్వాతి తరగతులకు ప్రమోట్ చేశాయి. ఇప్పటికే పలు విద్యాసంస్థలు కొత్త విద్యాసంవత్సరాన్ని కొనసాగిస్తూ ఆన్‌లైన్‌ తరగతులు ప్రారంభించాయి.
పరీక్షలు లేకుండానే ‘పది’ పాస్‌
* కరోనా వ్యాప్తి వల్ల నిర్వహణ సాధ్యం కాదు
* అంతర్గత మార్కుల ఆధారంగా గ్రేడ్లు
* భవిష్యత్తు పరిస్థితులను బట్టి డిగ్రీ, పీజీ పరీక్షల నిర్వహణ
* ఉన్నత స్థాయి సమీక్ష సమావేశంలో ముఖ్యమంత్రి కేసీఆర్‌ నిర్ణయం
ఈనాడు, హైదరాబాద్: పదో తరగతి విద్యార్థులను పరీక్షలు లేకుండానే పైతరగతికి పంపాలని ముఖ్యమంత్రి కె.చంద్రశేఖర్‌రావు నిర్ణయించారు. కరోనా వైరస్‌ వ్యాప్తి చెందుతున్న ప్రస్తుత తరుణంలో పరీక్షలు నిర్వహించడం సాధ్యం కాదని ఆయన తేల్చిచెప్పారు. అందుకే అంతర్గత మార్కుల ఆధారంగా వారికి గ్రేడ్లు కేటాయించి పదో తరగతి పట్టా అందజేయాలన్నారు. హైకోర్టు ఆదేశాల నేపథ్యంలో పదో తరగతి పరీక్షలను వాయిదా వేస్తున్నట్లు ప్రభుత్వం జూన్ 6న‌ ప్రకటించింది. ఈక్రమంలో పరీక్షలపై తదుపరి నిర్ణయం తీసుకోవడానికి ఏం చేయాలన్న దానిపై సీఎం కేసీఆర్ జూన్ 8న‌ ప్రగతిభవన్‌లో ఉన్నతస్థాయి సమీక్ష నిర్వహించారు. పదో తరగతి పరీక్షల విషయంలో దేశవ్యాప్తంగా వివిధ రాష్ట్రాలు అనుసరించిన విధానాలపై సుదీర్ఘంగా చర్చించారు. అనంతరం రాష్ట్రంలో అనుసరించాల్సిన పద్ధతిని ఖరారు చేశారు. గతంలో పాఠశాలల్లో నిర్వహించిన ఫార్మేటివ్‌ అసెస్‌మెంట్‌(ఎఫ్‌ఏలు)ల్లో వచ్చిన మార్కుల ఆధారంగా వచ్చే గ్రేడులను పరిగణనలోకి తీసుకొని పైతరగతికి పంపాలని ముఖ్యమంత్రి నిర్ణయించారు.
ఆ పరీక్షలపై పరిస్థితుల బట్టి నిర్ణయం..
రాష్ట్రవ్యాప్తంగా ఆయా విశ్వవిద్యాలయాల పరిధిలో డిగ్రీ, పీజీ పరీక్షలు కూడా ఇప్పటివరకు పూర్తికాలేదు. వాటి నిర్వహణకు సంబంధించి భవిష్యత్తు పరిస్థితులను బట్టి ప్రభుత్వం నిర్ణయం తీసుకోనుంది. సమావేశంలో విద్యాశాఖ మంత్రి సబితా ఇంద్రారెడ్డి, ప్రభుత్వ ప్రధాన కార్యదర్శి సోమేశ్‌కుమార్, విద్యాశాఖ ప్రత్యేక ప్రధాన కార్యదర్శి చిత్రా రామచంద్రన్, సీఎంఓ ముఖ్య కార్యదర్శి ఎస్‌.నర్సింగరావు, ప్రభుత్వ పరీక్షల విభాగం సంచాలకుడు సత్యనారాయణరెడ్డి, సీఎంఓ ప్రత్యేక కార్యదర్శి రాజశేఖర్, ఓఎస్‌డీ దేశపతి శ్రీనివాస్, కార్యదర్శి భూపాల్‌రెడ్డి తదితరులు పాల్గొన్నారు.
‘పది’ పరీక్షలపై సీఎం ఉన్నతస్థాయి సమావేశం జూన్ 8న‌
హైదరాబాద్‌: తెలంగాణలో పదో తరగతి పరీక్షల నిర్వహణపై ఉత్కంఠ కొన‌సాగుతూనే ఉంది. జూన్ 6న జీహెచ్ఎంసీ మినహా రాష్ట్రంలోని ఇతర జిల్లాల్లో పరీక్షలు నిర్వహించుకోవచ్చని హైకోర్టు తీర్పు ఇచ్చిన విషయం తెలిసిందే. అదే సమయంలో పరీక్షలు నిర్వహిస్తున్న ప్రాంతాల్లో కొత్త కరోనా కేసులు నమోదైతే పరీక్షా కేంద్రాలను మార్చాలని కూడా ఉన్నత న్యాయస్థానం ప్రభుత్వాన్ని ఆదేశించింది. అనంతరం హైకోర్టు తీర్పుపై రాష్ట్ర విద్యాశాఖ సుదీర్ఘంగా చర్చించింది. జీహెచ్‌ఎంసీ మినహా పరీక్షలు నిర్వహిస్తే సాంకేతిక ఇబ్బందులు ఎదుర‌వుతాయ‌ని, పరీక్షలను వాయిదా వేయాలని విద్యాశాఖ ప్రభుత్వానికి సూచించింది. ఈ మేరకు పదో తరగతి పరీక్షలను వాయిదా వేస్తూ ప్రభుత్వం ఉత్తర్వులు జారీ చేసింది.
పరీక్షల నిర్వహణపై జూన్ 8న‌ రాష్ట్ర ముఖ్యమంత్రి కేసీఆర్‌ ఉన్నత స్థాయి సమావేశం నిర్వహించనున్నారు. మళ్లీ పరీక్షలు నిర్వహించాలా, లేదా అంతర్గత పరీక్షల్లో వచ్చిన మార్కుల ఆధారంగా గ్రేడ్లు ఇవ్వాలా అనేదానిపై రేపటి సమావేశంలో నిర్ణయం తీసుకోనున్నారు. కరోనా ఉద్ధృతిలో మరోసారి పరీక్షలు నిర్వహించాలంటే సమస్యలు ఉత్పన్నమయ్యే అవకాశాలు ఉండగా.. పరీక్షల రద్దుకే ప్రభుత్వం మొగ్గు చూపేలా అవకాశాలు కనిపిస్తున్నాయి.
పది పరీక్షలు వాయిదా
* రద్దుకే అవకాశాలు ఎక్కువ!
* త్వరలో ప్రభుత్వ నిర్ణయం
ఈనాడు, హైదరాబాద్‌: రాష్ట్రంలో జూన్ 8 నుంచి జరగాల్సిన పదో తరగతి పరీక్షలను ప్రభుత్వం వాయిదా వేసింది. ఈ మేరకు జూన్ 6‌ రాత్రి కీలక నిర్ణయం తీసుకుంది. జీహెచ్‌ఎంసీ పరిధిలో తప్ప మిగిలిన ప్రాంతాల్లో పరీక్షలు నిర్వహించవచ్చని హైకోర్టు జూన్ 6న‌ స్పష్టం చేసింది. అలా చేస్తే సమస్యలు రావొచ్చని భావించిన ప్రభుత్వం రాష్ట్రవ్యాప్తంగా పరీక్షలను వాయిదా వేస్తున్నట్లు ప్రకటించింది. మళ్లీ పరీక్షలను నిర్వహించాలా? లేక అంతర్గత పరీక్షల్లో వచ్చిన మార్కుల ఆధారంగా విద్యార్థులకు గ్రేడ్లు ఇవ్వాలా అన్నది ముఖ్యమంత్రి వద్ద జూన్ 7 లేదా 8న జరిగే ఉన్నత స్థాయి సమావేశంలో చర్చించి నిర్ణయానికి రానున్నారు. అయితే పరీక్షల రద్దుకే మొగ్గు చూపే అవకాశం ఉందని తెలుస్తోంది. విద్యాశాఖ అధికారులు సైతం ఇదే అభిప్రాయాన్ని వ్యక్తం చేసినట్లు సమాచారం. పరీక్షలను రద్దు చేసి అంతర్గత మార్కులు ఆధారంగా గ్రేడ్లు ఇవ్వాలని భావిస్తున్నట్లు తెలుస్తోంది.
ముఖ్యమంత్రితో చర్చించిన సీఎస్‌
* హైకోర్టు ఆదేశాలు వెలువడిన అనంతరం ప్రభుత్వ ప్రధాన కార్యదర్శి సోమేశ్‌కుమార్‌ ముఖ్యమంత్రి కేసీఆర్‌తో మాట్లాడి పరిస్థితిని వివరించినట్లు తెలిసింది. అంతకుముందు ఆయన ప్రభుత్వ పరీక్షల విభాగం సంచాలకుడు సత్యనారాయణరెడ్డితో మాట్లాడినట్లు సమాచారం. ఈక్రమంలో రాష్ట్ర ఉన్నత న్యాయస్థానం తీర్పును అనుసరించి పరీక్షలను వాయిదా వేస్తున్నట్లు విద్యాశాఖ మంత్రి సబితా ఇంద్రారెడ్డి ప్రకటించారు. పదో తరగతి పరీక్షల విషయంలో అనుసరించాల్సిన వ్యూహం గురించి ముఖ్యమంత్రి వద్ద సమావేశం నిర్వహించి తదుపరి నిర్ణయాన్ని ప్రకటిస్తామని తెలిపారు.
వాయిదాకు కారణాలు ఇవీ...
* టెన్త్‌ పరీక్షలను ఒక్కో ప్రాంతంలో ఒక్కోసారి నిర్వహిస్తే ఉపయోగం లేదు. అందరికీ పరీక్షలు పూర్తయితేనే ఇంటర్‌, బాసర ఆర్‌జీయూకేటీ, పాలిటెక్నిక్‌ తదితర ప్రవేశాలకు వీలవుతుంది.
* జీహెచ్‌ఎంసీ పరిధిలోని విద్యార్థులకు ఇప్పుడు పరీక్షలు నిర్వహించకుండా సప్లిమెంటరీ పరీక్షలకు హాజరవమంటే... వారికి ఒక్కసారే అవకాశం ఇచ్చినట్లవుతుంది. ఎందుకంటే మిగిలిన ప్రాంతాల్లో పరీక్షలు రాసే వాళ్లు పరీక్ష ఫెయిలయితే సప్లిమెంటరీ పరీక్షలు రాసేందుకు వీలవుతుంది. ఇలా కొందరికి రెండు సార్లు, మరికొందరికి ఒకసారే పరీక్ష రాసే అవకాశం ఇస్తే న్యాయపరమైన సమస్యలు వస్తాయి. ఒకవేళ జీహెచ్‌ఎంసీ పరిధిలోని వారికి మరోసారి పరీక్ష నిర్వహించాలంటే బాగా ఆలస్యమవుతుంది. మళ్లీ జవాబుపత్రాల మూల్యాంకనం, ఫలితాల విడుదల తదితర వాటి వల్ల విద్యా సంవత్సరం ఆగమాగమవుతుంది.
* కొందరికి పరీక్షలు నిర్వహించి... మరికొందరికి తర్వాత అంటే విద్యార్థుల్లోనూ మానసిక ఆందోళనలు తలెత్తే అవకాశం ఉంది. పరీక్షలు రాయలేని వారు ఒత్తిడికి గురవుతారు. పరీక్షలు రాసిన వారు కెరీర్‌లో ముందుకు వెళతారని, ముందుగా ఇంటర్‌లో ప్రవేశాలు పొందుతారని భావించే అవకాశం ఉంది. వీటన్నిటిని పరిగణనలోకి తీసుకొని రాష్ట్రం మొత్తం పరీక్షలను వాయిదా వేస్తున్నట్లు ప్రభుత్వం ప్రకటించింది.
పరీక్షల్లేకుండా గ్రేడ్లు ఇవ్వాలంటే...
* టెన్త్‌ పరీక్షలు నిర్వహించకుండా అంతర్గత మార్కులు ఆధారంగా విద్యార్థులకు గ్రేడ్లు ఇవ్వడం ఇప్పుడున్న పరిస్థితుల్లో ఉత్తమ మార్గంగా కనిపిస్తోందని విద్యాశాఖ అధికారులు పేర్కొంటున్నారు. అలాగే పంజాబ్‌ రాష్ట్రంలో పదో తరగతి పరీక్షలను రద్దు చేసినందున అక్కడ గ్రేడ్లు ఎలా ఇస్తున్నారో తెలుసుకోవాల్సి ఉందని చెబుతున్నారు.
అంతర్గత మార్కుల విధానంలో..
* విద్యార్థులకు ఫార్మేటివ్‌ అసెస్‌మెంట్‌ పేరిట ఏడాదిలో నాలుగు పరీక్షలు (ఎఫ్‌ఏ-1, 2, 3, 4) నిర్వహిస్తారు. ఒక్కో పరీక్షను 20 మార్కులకు పెట్టినా మొత్తాన్ని 5 మార్కులకు కుదిస్తారు. ఇంకా ప్రాజెక్టు వర్క్‌కు 5, అసైన్‌మెంట్‌కు 5, రాతపనికి 5 మార్కులు ఉంటాయి. మొత్తం 20కి ఎన్ని అంతర్గత మార్కులు వచ్చాయో లెక్కిస్తారు. అలా ఒక్కో సబ్జెక్టులో అంతర్గత మార్కులు 20 ఉంటే మిగిలిన 80 మార్కులకు వార్షిక పరీక్షలు నిర్వహిస్తారు. ఇది ఏటా సాధారణంగా జరిగే ప్రక్రియ. ఇప్పుడు ఒక్కో సబ్జక్టులో 20గా ఉన్న అంతర్గత మార్కుల్నే 100కి పెంచి గ్రేడ్లు ఇవ్వాలనేది ఒక యోచన.
మరో పద్ధతిలో అయితే...
* సమ్మెటివ్‌ అసెస్‌మెంట్‌-1(ఎస్‌ఏ-1)లో వచ్చిన మార్కులు ఆధారంగా చేసుకొని గ్రేడ్లు ఇవ్వొచ్చని కొందరు సూచిస్తున్నారు. వాటిని ఆయా పాఠశాలల నుంచి 15 రోజుల్లో తెప్పించుకొని ఫలితాలు ఇవ్వొచ్చని పేర్కొంటున్నారు. ఇది తలనొప్పి కావొచ్చని... ఎస్‌ఏ-1లో 50 శాతానికి మించి మార్కులు రావనే భిన్నమైన వాదనా వినవస్తోంది. ప్రీ ఫైనల్‌నూ పరిగణనలోకి తీసుకోవచ్చని కొందరు సూచిస్తున్నారు. అయితే ఆ పరీక్షలకు గైర్హాజరయ్యేవారి శాతం కూడా ఎక్కువగానే ఉంటుందనే అభిప్రాయాలున్నాయి. ఎక్కువమంది విద్యానిపుణులు అంతర్గత మార్కుల విధానమే మేలంటున్నారు.
రెండు జిల్లాల్లో ‘పది’ పరీక్షలు వాయిదా
* జీహెచ్ఎంసీ, రంగారెడ్డిల్లో నిలిపివేయాలి: హైకోర్టు
* మిగ‌తా జిల్లాల్లో య‌థావిధిగా నిర్వ‌హ‌ణ‌
హైదరాబాద్: కరోనా వ్యాప్తి కట్టడిలో భాగంగా వాయిదా పడిన పదో తరగతి పరీక్షల నిర్వహణపై నెలకొన్న ఉత్కంఠ వీడింది. జీహెచ్‌ఎంసీ మినహా రాష్ట్రంలోని మిగతా జిల్లాల్లో పరీక్షలను నిర్వహించుకోవచ్చని ప్రభుత్వానికి హైకోర్టు స్పష్టం చేసింది. జీహెచ్ఎంసీ పరిధిలో పదో తరగతి పరీక్షలు వాయిదా వేయాలని ఆదేశించింది. అయితే జీహెచ్ఎంసీ పరిధిలోని విద్యార్థులను సప్లిమెంటరీ పరీక్షలు రాసేందుకు అనుమతించాలని ఆదేశాలు జారీ చేసింది. సప్లిమెంటరీ ఉత్తీర్ణులను కూడా రెగ్యులర్‌గా గుర్తించాలని ప్రభుత్వానికి ఆదేశించింది.
స్థానికంగా కరోనా కేసులున్నప్పటికీ పరీక్షలు నిర్వహించేందుకుగానూ జీహెచ్ఎంసీ, రంగారెడ్డి జిల్లాల్లో జాగ్రత్తలు తీసుకున్న‌ట్లు రాష్ట్ర ప్రభుత్వం న్యాయస్థానాన్ని కోరింది. ‘ప్రస్తుత పరిస్థితుల దృష్ట్యా కరోనాతో ఎవరైనా విద్యార్థి మరణిస్తే ఎవరు బాధ్యత వహిస్తారు? పరీక్షా కేంద్రాలున్న ప్రాంతాలు కంటైన్‌మెంట్‌ జోన్లుగా మారితే ఏం చేస్తారు’ అని హైకోర్టు ప్రభుత్వాన్ని ప్రశ్నించింది. ఈ మేరకు జీహెచ్‌ఎంసీ మినహా అన్ని జిల్లాల్లో పరీక్షల నిర్వహణకు అనుమతిస్తూ ఆదేశాలు జారీ చేసింది.
జూన్ 6వ తేదినా ఉదయం పదో తరగతి పరీక్షలపై విచారించిన హైకోర్టు పరీక్షలు లేకుండా గ్రేడింగ్‌ ఇవ్వడానికి ఇబ్బంది ఏంటని ప్రభుత్వాన్ని ప్రశ్నించింది. రాష్ట్రంలో వేర్వేరుగా పరీక్షలు నిర్వహించడం కష్టమని, ప్రశ్నా పత్రాలు మళ్లీ తయారు చేయడం ఇబ్బందని అడ్వొకేట్‌ జనరల్‌ ప్రసాద్‌ కోర్టుకు తెలిపారు.
అక్టోబ‌రు 4న సివిల్స్ ప్రిలిమ్స్ ప‌రీక్ష‌
* పరీక్షల షెడ్యూల్‌ను ఖ‌రారు చేసిన యూపీఎస్సీ
దిల్లీ: యూపీఎస్సీ 2020 సంవత్సరానికి నిర్వహించాల్సిన పరీక్షల షెడ్యూల్‌ను జూన్ 5న‌ విడుదల చేసింది. ఈ మేరకు అక్టోబరు 4, 2020న యూపీఎస్సీ సివిల్స్‌ ప్రిలిమినరీ పరీక్ష, జనవరి 8, 2021 తేదీన మెయిన్స్‌ పరీక్షలను నిర్వహించనున్నట్లు ప్రకటించింది. షెడ్యూల్ ప్రకారం ప్రిలిమినరీ పరీక్షను మే 31న నిర్వహించాల్సి ఉండగా కరోనా మహమ్మారి కారణంగా వాయిదా వేశారు. అలాగే 2019 సంవత్సరానికి సంబంధించి నిర్వహించాల్సిన పర్సనాలిటీ టెస్టులు జులై 20, 2020 నుంచి ప్రాంరంభమవుతాయని.. ఎంపికైన అభ్యర్థులకు వ్యక్తిగతంగా సమాచారం అందిచనున్నట్లు యూపీఎస్సీ తెలిపింది. ప్రతి ఏడాది సుమారు ఏడు లక్షల మంది అభ్యర్థులు ప్రిలిమినరీ పరీక్షలకు హాజరవుతుంటారు. అయితే ఈ ఏడాది దాదాపు 10 లక్షల మంది ఈ పరీక్ష రాసేందుకు దరఖాస్తు చేసుకున్నట్లు సమాచారం.
UPSC - REVISED EXAMINATIONS SCHEDULE
20 నిమిషాల్లోపే జవాబు రాసే ప్రశ్నలు
* బీటెక్‌/బీఫార్మసీ పరీక్షలపై జేఎన్‌టీయూ మార్గదర్శకాలు
ఈనాడు, హైదరాబాద్‌: బీటెక్‌ పరీక్షల సమయాన్ని రెండు గంటలకే కుదించిన జేఎన్‌టీయూ.. మరో కీలక మార్పు చేసింది. ఒక్కొక్క ప్రశ్నకు 20 నిమిషాల్లోపే సమాధానం రాసేందుకు వీలుగా ప్రశ్నపత్రం ఉంటుందని స్పష్టం చేసింది. ప్రశ్నల్లో ఐచ్ఛికాలు (ఛాయిస్‌) ఎక్కువగా ఇవ్వనుంది. ఈ నెల 20 నుంచి బీటెక్‌/బీఫార్మసీ చివరి ఏడాది సెమిస్టర్‌ పరీక్షలను నిర్వహించేందుకు జేఎన్‌టీయూ సిద్ధమవుతోంది. పరీక్షల విభాగం సంచాలకులు ప్రొ.వి.కామాక్షి ప్రసాద్ జూన్ 5న మార్గదర్శకాలు విడుదల చేశారు.
ప్రతిపాదిత పరీక్షల షెడ్యూలు ఇలా..
* జూన్‌ 20 నుంచి - బీటెక్‌/బీఫార్మసీ 4-2 సెమిస్టర్‌, ఎంబీఏ/ఎంసీఏ 2-2 సెమిస్టర్‌ రెగ్యులర్‌ పరీక్షలు
* జులై 16 నుంచి - బీటెక్‌/బీఫార్మసీ 1-2, 2-2, 3-2 సెమిస్టర్‌, ఫార్మా-డి 2, 3, 4, 5 సెమిస్టర్‌ పరీక్షలు, ఫార్మా-డి (పీబీ) రెండో ఏడాది పరీక్షలు
* ఆగస్టు 8 నుంచి - బీటెక్‌/బీఫార్మసీ 1-1, 2-1, 3-1, 4-1 సప్లిమెంటరీ, ఎంబీఏ/ఎంసీఏ 1-2 (రెగ్యులర్‌), 1-1, 2-1, 3-1 (ఎంసీఏ) సప్లిమెంటరీ, ఫార్మా-డి మొదటి ఏడాది (రెగ్యులర్‌, సప్లిమెంటరీ)
పరీక్షలలో మార్పులు ఇలా..
* సెమిస్టర్‌ ప్రశ్నపత్రంలో మొత్తం మార్కులపరంగా ఎలాంటి మార్పులు ఉండవు.
* విద్యార్థులకు హాజరు లెక్కింపు రెండు రకాలుగా ఉంటుంది. లాక్‌డౌన్‌ సమయంలో పూర్తి హాజరు ఇవ్వడం, అంతకుముందు జరిగిన తరగతులకు సంబంధించి విద్యార్థులు కళాశాలకు వచ్చిన దాని ప్రకారం హాజరు ఉంటుంది. ఈ రెండింటిని లెక్కించాక డిటెయిన్డ్‌ అయిన విద్యార్థుల వివరాలను కళాశాల ప్రిన్సిపాళ్లకు వర్సిటీ పంపిస్తుంది. ఎవరైనా విద్యార్థులకు అభ్యంతరాలుంటే ప్రిన్సిపాళ్ల ద్వారా దరఖాస్తు చేసుకోవచ్చు.
* 2020-21 విద్యాసంవత్సరానికి క్రెడిట్‌ ఆధారిత డిటెన్షన్‌ ఉండదు. ఈ నిబంధన రెగ్యులర్‌ విద్యార్థులతో పాటు గత విద్యా సంవత్సరంలో డిటెయిన్డ్‌ అయిన విద్యార్థులకూ వర్తిస్తుంది.
* సొంత కళాశాలలోనే పరీక్ష కేంద్రం ఉంటుంది. మూసివేతకు దరఖాస్తు చేసుకున్న కళాశాలలు, ఎక్కువమంది విద్యార్థులు లేనిచోట మాత్రం సమీపంలోని కళాశాలలో సర్దుబాటు చేస్తారు.
* ఒకవేళ ఏవైనా కారణాలతో బీటెక్‌/బీఫార్మసీ ఫైనల్‌ సెమిస్టర్‌ రెగ్యులర్‌ పరీక్షలకు హాజరు కాలేకపోతే.. 45 రోజుల తర్వాత నిర్వహించే అడ్వాన్స్‌డ్‌ సప్లిమెంటరీ రాసే వీలుంటుంది.
* ఎవరైనా విద్యార్థి అనారోగ్యానికి గురైతే ఐసోలేషన్‌ ప్రాంతంలో ఉంచి తగిన చికిత్స అందించాలి.
* విద్యార్థులు బెంచీకి ఒకరు చొప్పున జిగ్‌జాగ్‌ తరహాలో కూర్చోవాలి. రెగ్యులర్‌ పరీక్షలకు హాజరయ్యే విద్యార్థులు రోజూ ఒకేచోట కూర్చునేలా ఏర్పాట్లుండాలి.
* జులై 1 నుంచి 15 వరకు కాంటాక్టు తరగతులు నిర్వహించాలి.
ఉద్యోగ పరీక్షల తేదీలు 25లోగా ప్రకటన
* సివిల్స్‌ ప్రిలిమ్స్‌ తర్వాతే గ్రూపు-1 ప్రధాన పరీక్షలు
* ఏపీపీఎస్సీ కార్యదర్శి సీతారామాంజనేయులు వెల్లడి
ఈనాడు, అమరావతి: వాయిదాపడిన ఉద్యోగ నియామక రాతపరీక్షల నిర్వహణ తేదీలను జూన్‌ 20 నుంచి 25వ తేదీలోగా ప్రకటిస్తామని ఆంధ్రప్రదేశ్‌ పబ్లిక్‌ సర్వీస్‌ కమిషన్‌ ప్రకటించింది. జూన్ 3న‌ కమిషన్‌ సమావేశం అనంతరం కార్యదర్శి సీతారామాంజనేయులు విలేకర్లతో మాట్లాడారు. గ్రూపు-1 ప్రధాన పరీక్షలను సివిల్స్‌ ప్రిలిమ్స్‌ జరిగిన తర్వాతే నిర్వహిస్తామన్నారు. అభ్యర్థులకు ట్యాబ్‌ ద్వారా ప్రశ్నపత్రాలు అందజేస్తామన్నారు. వ్యాసరూప ప్రశ్నలు ఉంటాయని చెప్పారు. జవాబుపత్రాల మూల్యాంకనాన్ని డిజిటల్‌ విధానంలో జరపాలని ఆలోచిస్తున్నామన్నారు. కొవిడ్‌-19 కారణంగా ఉద్యోగ ఖాళీల వివరాలు రాష్ట్ర ప్రభుత్వం నుంచి ఇంకా కమిషన్‌కు అందలేదన్నారు. ప్రభుత్వం ఖాళీల వివరాలు పంపిస్తే ప్రకటనల జారీకి సిద్ధంగా ఉన్నామని చెప్పారు.
జూన్‌ 15లోగా ఇంటర్‌ ఫలితాలు
* హైకోర్టుకు తెలిపిన ప్రభుత్వం
ఈనాడు, హైదరాబాద్‌: ఇంటర్‌మీడియట్‌ పరీక్ష ఫలితాలను జూన్‌ 15లోగా విడుదల చేయనున్నట్లు రాష్ట్ర ప్రభుత్వం జూన్ 2న‌ హైకోర్టుకు నివేదించింది. లాక్‌డౌన్‌ కాలంలోనే ఇంటర్‌ పరీక్షల మూల్యాంకనం జరపాలన్న ప్రభుత్వ నిర్ణయాన్ని సవాలు చేస్తూ సామాజిక కార్యకర్త కటికాల ఓంప్రకాశ్‌ ప్రజాప్రయోజన వ్యాజ్యం దాఖలు చేశారు. లాక్‌డౌన్‌ ఎత్తివేశాక మూల్యాంకనం నిర్వహించేలా ఆదేశించాలని, ఈ విధులకు హాజరయ్యే అధ్యాపకులకు కరోనా పరీక్షలు చేసి అనుమతించాలని, గదులను శానిటైజ్‌ చేసేలా ఆదేశాలివ్వాలని కోరారు. దీనిపై జూన్ 2న‌ ప్రధాన న్యాయమూర్తి జస్టిస్‌ ఆర్‌.ఎస్‌.చౌహాన్, జస్టిస్‌ బి.విజయ్‌సేన్‌రెడ్డిలతో కూడిన ధర్మాసనం విచారణ చేపట్టింది. ఈ సందర్భంగా ఏజీ బి.ఎస్‌.ప్రసాద్‌ వాదనలు వినిపిస్తూ.. ఇప్పటికే పేపర్ల మూల్యాంకనం పూర్తయిందని, ఫలితాలను వెల్లడించాల్సి ఉందన్నారు. జూన్‌ 15లోగా ఫలితాలను విడుదల చేయడానికి ఏర్పాట్లు జరుగుతున్నాయని చెప్పడంతో ధర్మాసనం విచారణను జూన్‌ 16వ తేదీకి వాయిదా వేసింది.
ఆగస్టు నుంచి స్టాఫ్‌ సెలక్షన్‌ కమిషన్‌ పరీక్షలు
* ఏడు ఉద్యోగ పరీక్షలకు కొత్త తేదీలను ప్రకటించిన కమిషన్‌
ఈనాడు, హైదరాబాద్‌: కరోనా నేపథ్యంలో జాతీయస్థాయిలో వాయిదాపడిన స్టాఫ్‌ సెలక్షన్‌ కమిషన్‌(ఎస్‌ఎస్‌సీ) నిర్వహించే ఉద్యోగ పరీక్షలకు కొత్త తేదీలను కమిషన్ జూన్ 1న‌ ప్రకటించింది. దేశవ్యాప్తంగా ఈ పరీక్షలకు లక్షలాదిమంది నిరుద్యోగ అభ్యర్థులు హాజరవుతారు. కమిషన్‌ 2018-19లో నిర్వహించిన ఏడు పరీక్షలకు దాదాపు 1.29 కోట్ల మంది దరఖాస్తు చేయడం విశేషం. తెలుగు రాష్ట్రాల నుంచి కూడా భారీ సంఖ్యలోనే పోటీపడతారు.
ఇదీ కాలపట్టిక..
ఇంటర్‌లో కీలక మార్పులు
* వచ్చే ఏడాది నుంచి సీబీఎస్‌ఈ తరహాలో పరీక్షలు
* జూనియర్‌ కళాశాలల వేళల్లోనూ మార్పు
ఈనాడు, అమరావతి: వచ్చే విద్యా సంవత్సరం నుంచి ఇంటర్‌ విద్యలో కీలక మార్పులు రాబోతున్నాయి. ఇందులో అనేక సంస్కరణలను ఇంటర్‌ విద్యామండలి తీసుకొస్తోంది. వచ్చే ఏడాది ప్రశ్నపత్రాల విధానాన్ని మార్చి.. సీబీఎస్‌ఈ తరహాలో తీసుకురావాలని భావిస్తోంది. ప్రశ్నల సంఖ్యను పెంచి, మార్కులను తగ్గిస్తారు. పుస్తకంలోని అన్ని అధ్యాయాల నుంచి ప్రశ్నలు వస్తాయి. విద్యార్థులు అన్ని అంశాలూ నేర్చుకోవడం వల్ల ఎంసెట్‌, జేఈఈ, నీట్‌లకు కోచింగ్‌ తీసుకోవాల్సిన అవసరం ఉండదు. జాతీయ విద్య పరిశోధన, శిక్షణ సంస్థ (ఎన్‌సీఈఆర్టీ) ప్రమాణాల మేరకు పుస్తకాన్ని రూపొందించడంతో పోటీ పరీక్షల్లో వీటినుంచే ప్రశ్నలు వస్తాయి.
ఆన్‌లైన్‌ ప్రవేశాలు
* ఇంటర్‌ ప్రవేశాలు ఆన్‌లైన్‌లో ఉంటాయి. సీట్ల కేటాయింపులో రిజర్వేషన్‌ అమలవుతుంది. ధ్రువపత్రాలను ఆన్‌లైన్‌లోనే పరిశీలిస్తారు.
* కళాశాలల పనివేళలు మార్చారు. ఉదయం 8.30 నుంచి సాయంత్రం 3.30 వరకు తరగతులు, మరో గంటపాటు క్రీడలు, ఇతర కార్యక్రమాల నిర్వహణ.
* వారంలో ఒకటి, రెండు రోజులు చర్చా వేదికలు, సెమినార్లు.
* గతంలో కళాశాలల్లో ఒక్కో సెక్షన్‌కు 82 సీట్లుండగా.. ఇప్పుడు 40కి పరిమితం చేశారు. ఒక్కో కళాశాలకు అన్ని గ్రూపులూ కలిపి గరిష్ఠంగా 9 సెక్షన్లకే అనుమతిస్తారు.
* ఎంసెట్‌, జేఈఈ, నీట్‌, ఇతరత్రా శిక్షణలకు కళాశాలలు ప్రత్యేక అనుమతి తీసుకోవాలి. ఈ శిక్షణ రుసుములను పాఠశాల విద్య నియంత్రణ, పర్యవేక్షణ కమిషన్‌ నిర్ణయిస్తుంది.
* తనిఖీలు నిర్వహించి లెక్చరర్ల తరగతి బోధన, వారి నోట్స్‌, విద్యార్థుల సామర్థ్యాన్ని పరిశీలిస్తారు. ఈ తనిఖీల నివేదికల వివరాలను వెబ్‌సైట్‌లో తల్లిదండ్రులకు అందుబాటులో ఉంచుతారు.
* ప్రభుత్వ జూనియర్‌ కళాశాలల్లో 20 మంది విద్యార్థుల కంటే తక్కువగా ఉన్న గ్రూపులను మూసేస్తారు. ఇక్కడ పనిచేసే లెక్చరర్లను విద్యార్థులు ఎక్కువగా ఉన్న కళాశాలలకు మారుస్తారు. జిల్లాకో ఒక కళాశాలను అత్యున్నత విద్యాసంస్థగా మారుస్తారు.
* ప్రైవేటు, కార్పొరేట్‌ కళాశాలలకు వచ్చే విద్యా సంవత్సర రుసుములను పాఠశాల విద్య నియంత్రణ, పర్యవేక్షణ కమిషన్‌ నిర్ణయించనుంది. ఈ రుసుములను ఆన్‌లైన్‌లో విద్యార్థులకు అందుబాటులో ఉంచుతారు.
ఆన్‌లైన్‌ పాఠాలు
విద్యార్థుల కోసం ఆన్‌లైన్‌ పాఠాలను అందుబాటులోకి తీసుకొస్తున్నారు. కరోనా కారణంగా విద్యా సంవత్సరం ఆలస్యంగా ప్రారంభమైనా ఇబ్బంది లేకుండా ఉండేందుకు వీడియా పాఠాలను రూపొందిస్తున్నారు. వీటిని వెబ్‌సైట్‌లో ఉంచుతారు.
తెలంగాణలో జూన్‌ 3న ఇంటర్‌ పరీక్షలు
హైదరాబాద్‌: కరోనా వ్యాప్తి నేపథ్యంలో వాయిదా పడిన ఇంటర్ పరీక్షలను నిర్వహించేందుకు రాష్ట్ర ఇంటర్‌ బోర్డు ఏర్పాట్లు చేసింది. ఈ మేరకు జూన్‌ 3వ తేదీన ఇంటర్‌ ద్వితీయ సంవత్సరం జాగ్రఫీ, మోడ్రన్‌ లాంగ్వేజెస్‌ పరీక్షలు నిర్వహించనున్నట్లు ఇంటర్‌ బోర్డు కార్యదర్శి జలీల్‌ వెల్లడించారు. ఇంటర్‌ బోర్డు వెబ్‌సైట్‌ నుంచి హాల్‌టికెట్లు డౌన్‌లోడ్‌ చేసుకోవచ్చని తెలిపారు. కరోనా పరిస్థితుల నేపథ్యంలో పరీక్షలకు హాజరుకాలేకపోతే మరోసారి పరీక్ష రాసే అవకాశం ఉంటుందన్నారు. జులై 3వ వారంలో జరిగే అడ్వాన్స్‌డ్‌ సప్లిమెంటరీ పరీక్ష రాసేందుకు అవకాశం కల్పించినట్లు చెప్పారు. అడ్వాన్స్‌డ్‌ సప్లిమెంటరీలో ఉత్తీర్ణులైనా.. రెగ్యులర్‌గానే పరిగణిస్తామని బోర్డు కార్యదర్శి జలీల్‌ స్పష్టం చేశారు.
దరఖాస్తు గడువు పొడిగింపు
ఈనాడు, హైదరాబాద్‌: తెలంగాణ‌లోని మహాత్మా జ్యోతిబాఫులే బీసీ గురుకుల జూనియర్‌ కళాశాలలు, మహిళా డిగ్రీ కళాశాలలో ప్రవేశానికి దరఖాస్తు గడువును జులై 12 వరకు పొడిగించినట్లు సొసైటీ కార్యదర్శి మల్లయ్య బట్టు తెలిపారు. సంబంధిత కళాశాలల్లో ప్రవేశానికి బీసీ, ఎస్సీ, ఎస్టీ, ఈబీసీ విద్యార్థినీ, విద్యార్థులు అర్హులని పేర్కొన్నారు.
20 నుంచి డిగ్రీ, పీజీ చివరి సెమిస్టర్‌ పరీక్షలు
* కళాశాలలు తెరిచాక మిగిలిన వారికి నిర్వహణ
* మార్గదర్శకాలు విడుదల చేసిన ఉన్నత విద్యామండలి
ఈనాడు, హైదరాబాద్‌: రాష్ట్రవ్యాప్తంగా ఆరు సంప్రదాయ విశ్వవిద్యాలయాల పరిధిలో డిగ్రీ, పీజీ పరీక్షల నిర్వహణపై తెలంగాణ రాష్ట్ర ఉన్నత విద్యామండలి మే 29న‌ మార్గదర్శకాలు విడుదల చేసింది. కరోనా నేపథ్యంలో అధికారులు ప్రస్తుతానికి కేవలం డిగ్రీ, పీజీ చివరి సెమిస్టర్‌ పరీక్షలు మాత్రమే నిర్వహించాలని నిర్ణయించారు. విశ్వవిద్యాలయాలు, కళాశాలల ప్రతినిధులతో చర్చించిన ఉన్నత విద్యామండలి అధికారులు తాజా మార్గదర్శకాలను రూపొందించారు. స్థానిక పరిస్థితులను బట్టి వాటిల్లో వర్సిటీలు మార్పులు చేసుకోవచ్చని, విద్యార్థుల ఆరోగ్యం, భద్రతను దృష్టిలో పెట్టుకోవాలని ఛైర్మన్‌ తుమ్మల పాపిరెడ్డి వర్సిటీలకు సూచించారు. ఈ మార్గదర్శకాలు 2019-20 విద్యా సంవత్సరానికి మాత్రమేనని స్పష్టం చేశారు.
ముఖ్యాంశాలు...
* జూన్‌ 20వ తేదీ నుంచి డిగ్రీ మూడో సంవత్సరం, పీజీ రెండో ఏడాది చివరి సెమిస్టర్‌ పరీక్షలు ప్రారంభించుకోవచ్చు. బ్యాక్‌లాక్‌ పరీక్షలను కూడా వాటితో పాటు జరుపుకోవచ్చు. మిగిలిన సెమిస్టర్ల వారికి కళాశాలలు ప్రారంభమైన తర్వాత లేదా నవంబరు/డిసెంబరులో నిర్వహించుకోవచ్చు.
* చివరి సెమిస్టర్‌ కాకుండా మిగిలిన సెమిస్టర్లలోని విద్యార్థులను క్రెడిట్లు, బ్యాక్‌లాక్‌లతో సంబంధం లేకుండా పైతరగతికి పంపిస్తారు.
* పరీక్ష సమయాన్ని 3 నుంచి 2 గంటలకు కుదించారు. మొత్తం సిలబస్‌ను పరిగణనలోకి అందుకు అనుగుణంగా ప్రశ్నపత్రం విధానాన్ని మార్చుకోవాలి. అందుకు ఎక్కువ ఛాయిస్‌ ఇవ్వాలి. దానిపై విశ్వవిద్యాలయాలు నిర్ణయం తీసుకోవచ్చు.
* ప్రతిరోజూ రెండు విడతలుగా పరీక్షలు జరపాలి. ఉదయం బీకాం ఎగ్జామ్‌ పెడితే మధ్యాహ్నం బీఏ/బీఎస్‌సీ నిర్వహించాలి. ప్రయోగ పరీక్షల నిర్వహణ ఆయా కళాశాలలకు వదిలిపెట్టాలి.
* ప్రాజెక్టు వైవా, సెమినార్లను ఆన్‌లైన్‌లో నిర్వహించుకోవచ్చు. పీహెచ్‌డీ సెమినార్లు/వైవాలను కూడా యూజీసీ మార్గదర్శకాల ప్రకారం ఆన్‌లైన్‌లో జరుపుకోవచ్చు.
పీజీ వైద్య సీట్ల దరఖాస్తులకు గడువు పెంపు
ఈనాడు, హైదరాబాద్‌: వచ్చే వైద్యవిద్య సంవత్సరం (2021-22)లో ఎండీ/ఎంఎస్‌ డిగ్రీ, డిప్లొమా కోర్సుల్లో కొత్త, అదనపు పీజీ వైద్య విద్య సీట్ల కోసం దరఖాస్తు చేసుకోవడానికి గడువు పెంచుతూ భారతీయ వైద్య మండలి (ఎంసీఐ) నిర్ణయం తీసుకుంది. కొవిడ్‌-19 నేపథ్యంలో దరఖాస్తుల దాఖలులో ఇబ్బందులు కలిగాయనే ఉద్దేశంతో ఈ నిర్ణయం తీసుకుంది. దరఖాస్తులకు గడువు మే 31తో ముగియనుండగా.. దీన్ని జులై 31 వరకు ఎంసీఐ పొడిగించింది. అర్హత కలిగిన ప్రభుత్వ, ప్రైవేటు వైద్యకళాశాలలు గడువులోగా దరఖాస్తు చేసుకోవాలని సూచించింది.
టీఎస్‌ఆర్‌జేసీ దరఖాస్తు గడువు పొడి‌గింపు
హైదరాబాద్‌: తెలంగాణ రాష్ట్ర రెసిడెన్షియల్‌ జూనియర్‌ కళాశాలల్లో ప్రవేశాలకు నిర్వహించే టీఎస్‌ఆర్‌జేసీ పరీక్ష దరఖాస్తు గడువును పొడిగించారు. ఈ విషయాన్ని టీఎస్‌ఆర్‌జేసీ కన్వీనర్‌ వెల్లడించారు. జులై 10వరకు విద్యార్థులు దరఖాస్తు చేసుకోవచ్చని సూచించారు. మరోవైపు గురుకులాల్లో ఇంటర్‌ ప్రవేశాల కోసం నిర్వహించే ప్రవేశ పరీక్ష తేదీని త్వరలోనే ప్రకటిస్తామని కన్వీనర్ పేర్కొన్నారు.
3 నుంచి పీజీ వైద్య విద్య అఖిల భారత కోటా రెండో విడత ప్రవేశాలు
ఈనాడు, హైదరాబాద్‌: అఖిల భారత కోటాలో పీజీ వైద్య విద్యలో రెండో విడత ప్రవేశాలకు సంబంధించిన ప్రకటన మే 27న‌ వెలువడింది. తొలి విడతలో సీట్లు పొంది, కేటాయించిన కళాశాలల్లో చేరని అభ్యర్థులు ఆ సీటును వదులుకునే గడువును జూన్‌ 1వ తేదీ సాయంత్రం 5 గంటల వరకూ పెంచుతున్నట్లు మెడికల్‌ కౌన్సెలింగ్‌ కమిటీ (ఎంసీసీ) తెలిపింది. అలాంటి వాళ్లు సీటును వదులుకుంటున్నట్లుగా సంబంధిత కళాశాలకు ఇ-మెయిల్‌ ద్వారా గానీ, స్వయంగా వెళ్లి గానీ సమాచారాన్ని ఇవ్వవచ్చని సూచించింది. మిగిలిన సీట్లతో రెండో విడత ప్రవేశాలను నిర్వహిస్తామని తెలిపింది.
షెడ్యూల్
* జూన్‌ 3 నుంచి 9వ తేదీ ఉదయం 10 గంటల వరకూ అర్హులైన అభ్యర్థులు తమ సమాచారాన్ని ఆన్‌లైన్‌లో నమోదు చేసుకోవాలి.
* 4 నుంచి 9వ తేదీ రాత్రి 11.55 గంటల వరకూ ఆన్‌లైన్‌లో పీజీ కోర్సులను ప్రాధాన్యక్రమంలో ఎంచుకోవాల్సి ఉంటుంది.
* 10, 11 తేదీల్లో సీట్ల కేటాయింపు ప్రక్రియ కొనసాగుతుంది.
* 12న ఫలితాలను వెల్లడిస్తారు.
* సీట్లు పొందిన అభ్యర్థులు జూన్‌ 12-18 తేదీల మధ్య కేటాయించిన కళాశాలల్లో చేరాల్సి ఉంటుంది.
* గడువు తేదీ లోపు కళాశాలల్లో చేరని పక్షంలో ఆయా సీట్లను మిగులుగా చూపుతారు.
* రెండో విడత ప్రవేశాల అనంతరం మిగిలిన సీట్లను అఖిల భారత కోటా 50 శాతం సీట్ల ప్రాతిపదికన ఆయా రాష్ట్రాలకు తిరిగి అందజేస్తారు.
* అఖిల భారత కోటా రెండో విడత ప్రవేశాలు జూన్‌ 18 వరకూ కొనసాగనున్న నేపథ్యంలో రాష్ట్ర కోటాలో రెండో విడత ప్రవేశాలు జూన్‌ మూడోవారం తర్వాత నిర్వహించే అవకాశాలున్నట్లు కాళోజీ వర్సిటీ వర్గాలు తెలిపాయి.
మరింత సులువైన ‘దోస్త్‌’
* ఆధార్‌ అనుసంధానం లేని ఫోన్ల నుంచీ డిగ్రీ దరఖాస్తులు
* సామాజిక మాధ్యమాలతో విద్యార్థులకు చేరువ
ఈనాడు, హైదరాబాద్‌: ప్రస్తుత పరిస్థితుల్లో డిగ్రీ కోర్సుల ప్రవేశ రిజిస్ట్రేషన్‌ చేసుకోవడానికి విద్యార్థులు ఇబ్బంది పడకుండా ‘దోస్త్‌’ ప్రక్రియను మరింత సరళతరం చేస్తున్నారు. ఈసారి ఆధార్‌ అనుసంధానం లేని ఫోన్ల నుంచి కూడా డిగ్రీ ఆన్‌లైన్‌ సర్వీసెస్‌-తెలంగాణ (దోస్త్‌)కు దరఖాస్తు చేసుకోవచ్చు. ఏటా దోస్త్‌ ద్వారా సుమారు 1.90 లక్షల మంది డిగ్రీ ప్రథమ సంవత్సరంలో ప్రవేశాలు పొందుతున్నారు. అందుకు రాష్ట్రవ్యాప్తంగా సహాయ కేంద్రాలు, మీ సేవా కేంద్రాలతో పాటు ఆధార్‌ అనుసంధానం ఉన్న స్మార్ట్‌ ఫోన్‌ నుంచి దరఖాస్తు చేసుకోవచ్చు. కరోనా నేపథ్యంలో ఈసారి బయోమెట్రిక్‌ హాజరు లేకుండా, ఆధార్‌ అనుసంధానం లేని ఫోన్ల నుంచి కూడా రిజిస్ట్రేషన్‌కు అవకాశం ఇస్తామని దోస్త్‌ కన్వీనర్‌ ఆచార్య లింబాద్రి తెలిపారు. ఇంటర్‌ ఫలితాలు వెలువడిన వెంటనే దోస్త్‌ నోటిఫికేషన్‌ జారీ చేయనున్నారు. ఇంటర్‌ మార్కుల మెమోపై దోస్త్‌ సమాచారం ముద్రిస్తున్నారు. విద్యార్థులకు ఎప్పటికప్పుడు ఆయా అంశాలపై స్పష్టత ఇచ్చేందుకు ఈసారి సామాజిక మాధ్యమాలను గరిష్ఠంగా వినియోగించుకోనున్నారు. వాట్సాప్, ఫేస్‌బుక్, ట్విటర్‌ ద్వారా సమాచారం ఇస్తారు. విద్యార్థుల నుంచి సూచనలు స్వీకరిస్తారు.
* దోస్త్‌ వాట్సాప్‌ బిజినెస్‌ నెంబరు: 7901002200
* ఫేస్‌బుక్‌ పేజీ: facebook.com/dost.telangana
* ట్విటర్‌ ఖాతా: twitter.com/dost_ telangana
తెలంగాణలో ప్ర‌వేశ ప‌రీక్ష‌ల‌‌ దరఖాస్తు గడువు పెంపు
హైదరాబాద్: తెలంగాణలో నిర్వహించాల్సిన ప్రవేశ పరీక్షల దరఖాస్తు స్వీకరణ గడువును పొడిగించినట్లు రాష్ట్ర ఉన్నత విద్యామండలి వెల్లడించింది. ఎంసెట్‌, ఐసెట్‌, ఈసెట్‌, ఎడ్‌ సెట్‌, పీజీఈసెట్‌, పీఈసెట్‌, లాసెట్‌, పీజీఎల్‌ సెట్‌ ప్రవేశ పరీక్షలకు జూన్‌ 10 వరకు ఎలాంటి ఆలస్య రుసుం లేకుండా దరఖాస్తు చేసుకోవచ్చని ఉన్నత విద్యా మండలి సూచించింది. ఎంసెట్‌, ఐసెట్‌, ఈసెట్‌, ఎడ్‌ సెట్‌, పీజీఈసెట్‌, పీఈసెట్‌, లాసెట్‌, పీజీఎల్‌ సెట్‌ తదితర ప్రవేశ పరీక్షల దరఖాస్తు గడువును పెంచుతూ రాష్ట్ర ఉన్నత విద్యామండలి ఉత్తర్వులు జారీ చేసింది.
దేశంలో వర్చువల్‌ వర్సిటీ!
* ప్రవేశం నుంచి పరీక్షల వరకూ అంతా ఆన్‌లైన్‌లోనే
* యూజీసీ కసరత్తు
ఈనాడు, హైదరాబాద్‌: దేశంలో వర్చువల్‌ విశ్వవిద్యాలయం ఏర్పాటు దిశగా ప్రయత్నాలు జరుగుతున్నాయి. ప్రస్తుతం కరోనా వైరస్‌ పరిణామాల నేపథ్యంలో ఆన్‌లైన్‌ విద్యకు, తరగతులకు ప్రాధాన్యం పెరుగుతోంది. ఈ క్రమంలో పూర్తిగా ఆన్‌లైన్‌ విద్యని అందించే వర్చువల్‌ విశ్వవిద్యాలయం ఏర్పాటు దిశగా యూజీసీ అడుగులేస్తోంది. అన్నీ కుదిరితే 2021-22 నుంచి ఈ వర్సిటీ అందుబాటులోకి వచ్చే వీలుంది. కన్సార్షియం ఫర్‌ ఎడ్యుకేషనల్‌ కమ్యూనికేషన్స్‌ (సీఈసీ) డైరెక్టర్‌ జేబీ నడ్డా అధ్యక్షతన ఆన్‌లైన్‌ విద్యపై ఏర్పాటైన యూజీసీ కమిటీ గతేడాదే వర్చువల్‌ విశ్వవిద్యాలయం ఆవశ్యకతను సూచించింది. అప్పట్లో దీనిపై అంతగా దృష్టిసారించని యూజీసీ.. ప్రస్తుత పరిస్థితుల నేపథ్యంలో ఈ వర్సిటీ ఏర్పాటుపై చర్చలు జరుపుతున్నట్లు తెలిసింది.
ఏం చేస్తారు?
దూరవిద్య విధానంలో స్టడీ మెటీరియల్‌ ఇవ్వడం, కొన్ని తరగతులకు హాజరవ్వడం, కేంద్రాలకు వెళ్లి పరీక్షలు రాయడం వంటివి ఉంటాయి. వర్చువల్‌ విశ్వవిద్యాలయం నిర్వహించే కోర్సుల్లో ప్రవేశాలు మొదలుకుని బోధన, పరీక్షల వరకు అన్నీ ఆన్‌లైన్‌లోనే ఉంటాయి. దేశంలో ఏ మూలన ఉన్నా, ఎప్పుడైనా ఆన్‌లైన్‌లో కోర్సులు పూర్తి చేసుకునే వెసులుబాటు ఉంటుంది. విద్యార్థులు ఏ దశలోనూ వర్సిటీకి రావాల్సిన అవసరం ఉండదు.
విధానపరమైన నిర్ణయం తీసుకోవాలి
దేశంలో వర్చువల్‌ యూనివర్సిటీ ఏర్పాటు అవసరమని ప్రతిపాదించాం. ప్రస్తుత పరిణామాల నేపథ్యంలో ఆన్‌లైన్‌ విద్యకు ప్రాధాన్యం పెరగనుంది. ఇందుకు వర్చువల్‌ యూనివర్సిటీ ఎంతో ఉపయోగపడుతుంది. దూరవిద్యను ఆన్‌లైన్‌లో చేయాలనుకునే విద్యార్థులకు ఉపయుక్తంగా ఉంటుంది. విశ్వవిద్యాలయం ఏర్పాటుపై యూజీసీ విధానపరమైన నిర్ణయం తీసుకోవాల్సి ఉంది.
-జగత్‌భూషణ్‌ నడ్డా, సీఈసీ సంచాలకులు
జేఈఈ మెయిన్‌పరీక్షా సమయాల్లో మార్పు
* ఉదయం విడత పరీక్ష ముగిశాక 3 గంటల వ్యవధి
ఈనాడు, హైదరాబాద్‌: దేశవ్యాప్తంగా జులై 18 నుంచి నిర్వహించనున్న జేఈఈ మెయిన్‌ఆన్‌లైన్‌పరీక్షల సమయాల్లో జాతీయ పరీక్షల మండలి (ఎన్‌టీఏ) మార్పులు చేసింది. గతంలో ఉదయం పరీక్ష 9.30 గంటల నుంచి 12.30 గంటల వరకు, మధ్యాహ్నం విడత పరీక్ష 2.30 నుంచి 5.30 గంటల వరకు జరిగేది. తాజాగా ఉదయం పరీక్ష 9 నుంచి 12 గంటల వరకు, మధ్యాహ్నం పరీక్ష 3 గంటల నుంచి 6 గంటల వరకు నిర్వహించాలని ఎన్‌టీఏ నిర్ణయించింది. ఉదయం పరీక్ష అరగంట ముందుగా మొదలవుతుంది. ఉదయం పరీక్షకు హాజరైన విద్యార్థులు వినియోగించిన కంప్యూటర్‌మౌస్‌లను శానిటైజ్‌చేయాల్సి ఉండటంతో రెండు పరీక్షల మధ్య వ్యవధి 3 గంటలు ఉండేలా మార్పు చేశారు. జేఈఈ మెయిన్‌పరీక్ష దరఖాస్తులకు గడువు మే 24తో ముగిసింది. మొత్తం 9 లక్షల మంది హాజరు కానున్నారు. తెలుగు రాష్ట్రాల నుంచి దాదాపు 1.40 లక్షల మంది పరీక్ష రాస్తారు. పరీక్ష జరిగే తేదీకి 15 రోజుల ముందు హాల్‌టికెట్లను వెబ్‌సైట్లో ఉంచుతామని ఎన్‌టీఏ తెలిపింది. పరీక్షా కేంద్రం ఎక్కడన్నది కూడా అప్పుడే తెలుస్తుంది.
పరీక్ష రాయాలంటే గ్లౌజులు, మాస్కులు తప్పనిసరి
* రాష్ట్ర ఉన్నత విద్యామండలి నిర్ణయం
ఈనాడు, హైదరాబాద్‌: ఇకపై ముఖానికి మాస్కు..చేతులకు గ్లౌజులు ధరించి వస్తేనే పరీక్షా కేంద్రంలోకి అనుమతిస్తారు. ఈ మేరకు తెలంగాణ రాష్ట్ర ఉన్నత విద్యామండలి నిర్ణయం తీసుకుంది. జాతీయస్థాయిలో పలు ప్రవేశ పరీక్షల నిర్వహణకు తీసుకోవాల్సిన ముందుజాగ్రత్తలపై ఎయిమ్స్‌ నిపుణులు ఇప్పటికే మార్గదర్శకాలు విడుదల చేశారు. జాతీయ, రాష్ట్రస్థాయిలో ఆన్‌లైన్‌ పరీక్షలు నిర్వహించే టీసీఎస్‌ అయాన్‌ సంస్థ ప్రతినిధులతో పాటు విద్యాశాఖ మంత్రి సబితా ఇంద్రారెడ్డితో సంబంధిత మార్గదర్శకాలపై ఉన్నత విద్యామండలి ఛైర్మన్‌ తుమ్మల పాపిరెడ్డి చర్చించారు. మాస్కుతోపాటు చేతులకు రబ్బర్‌ గ్లౌజులు ధరించి రావడం తప్పనిసరి అని ఛైర్మన్‌ పాపిరెడ్డి చెప్పారు. వాటిని విద్యార్థులే తెచ్చుకోవాలని తెలిపారు. దాంతోపాటు చిన్న శానిటైజర్‌ బాటిల్‌, తాగునీటి సీసాను సైతం ఎంసెట్‌తో పాటు ఇతర అన్ని ఆన్‌లైన్‌ పరీక్షలకు అనుమతిస్తామన్నారు.
ఆగస్టు 1, 29 తేదీల్లో నాటా పరీక్షలు
* ప్రకటించిన ఆర్కిటెక్చర్‌ మండలి
ఈనాడు, హైదరాబాద్‌: లాక్‌డౌన్‌ కారణంగా వాయిదా పడిన నేషనల్‌ ఆప్టిట్యూడ్‌ టెస్టు ఇన్‌ ఆర్కిటెక్చర్‌(నాటా) పరీక్షలకు ఆర్కిటెక్చర్‌ కౌన్సిల్‌ కొత్త తేదీలను ప్రకటించింది. ఏప్రిల్‌ 19, మే 31న నాటా పరీక్షలు జరగాల్సి ఉండగా అవి వాయిదాపడ్డాయి. తాజాగా నాటా-1ను ఆగస్టు 1వ తేదీన, నాటా-2ను అదే నెల 29వ తేదీన నిర్వహించనున్నారు. త్వరలో నాటా పోర్టల్‌నూ పునఃప్రారంభించ‌నున్నారు. విద్యార్థులు దరఖాస్తు చేసుకోవడంతోపాటు ఇప్పటికే దరఖాస్తు చేసిన వారు ఆయా వివరాలను మార్చుకునేందుకు అవకాశం కల్పిస్తారు. దేశవ్యాప్తంగా బీఆర్క్‌ కోర్సుల్లో ప్రవేశానికి ఈ పరీక్షలను నిర్వహిస్తారు. విద్యార్థులు రెండు సార్లూ పరీక్షలు రాయవచ్చు. ఏ పరీక్షలో ఎక్కువ మార్కులు వస్తే దాన్ని పరిగణనలోకి తీసుకొని ర్యాంకు కేటాయిస్తారు.
జులై 6 నుంచి ఎంసెట్‌
* పీజీఈసెట్‌తో ప్రవేశ పరీక్షలు ప్రారంభం
* జులై 1న పాలిసెట్‌
ఈనాడు, హైదరాబాద్‌: తెలంగాణ ఎంసెట్‌(ఇంజినీరింగ్‌, అగ్రికల్చర్‌) జులై 6 నుంచి 9వ తేదీ వరకు జరగనుంది. జేఈఈ మెయిన్‌, నీట్‌తో పాటు ఆంధ్రప్రదేశ్‌ ప్రవేశ పరీక్షల తేదీలను పరిగణనలోకి తీసుకొని ఈ తేదీలను ప్రభుత్వం ఖరారు చేసింది. తెలంగాణ రాష్ట్ర ఉన్నత విద్యామండలి ఆధ్వర్యంలో నిర్వహించే ఆయా ప్రవేశ పరీక్షలను జులై 1 నుంచి 15 వరకు నిర్వహించనున్నారు. పరీక్షల తేదీలపై మే 23న‌ ఉన్నత విద్యామండలి ఛైర్మన్‌ తుమ్మల పాపిరెడ్డి, ఉపాధ్యక్షులు ఆర్‌.లింబాద్రి, వి.వెంకటరమణ, సాంకేతిక విద్యాశాఖ కమిషనర్‌ నవీన్‌ మిత్తల్‌తో విద్యాశాఖ మంత్రి సబితా ఇంద్రారెడ్డి తన కార్యాలయంలో సమీక్షించారు. అనంతరం తేదీలను వెల్లడించారు. కొవిడ్‌-19 మార్గదర్శకాలకు, యూజీసీ సూచనలకు అనుగుణంగా ప్రవేశ పరీక్షలను నిర్వహించాలని ప్రభుత్వం నిర్ణయించిందని మంత్రి తెలిపారు.
గతంలో ఎంసెట్‌ మొత్తం అయిదు రోజులు జరిగేది. అందులో ఇంజినీరింగ్‌కు మూడు, అగ్రికల్చర్‌కు రెండు రోజులు కేటాయించేవారు. ఈసారి రెండింటికీ కలిపి నాలుగు రోజులే ఇచ్చారు. రోజుకు రెండు విడతల చొప్పున నాలుగు రోజుల్లో మొత్తం ఎనిమిది విడతల్లో పరీక్షలు జరుగుతాయి. ప్రస్తుతం మొదటి అయిదు విడతలు ఇంజినీరింగ్‌కు, తర్వాత మూడు విడతలు అగ్రికల్చర్‌కు పరీక్షలు జరపాలన్నది ఆలోచన. ఒకవేళ ఇంజినీరింగ్‌కు దరఖాస్తులు పెరిగితే అప్పుడు మొదటి మూడు రోజులు(6 విడతలు) దానికి కేటాయిస్తారు. తర్వాత అంటే 9వ తేదీతో పాటు 10న ఒక విడత అగ్రికల్చర్‌ పరీక్ష జరుపుతామని చెబుతున్నారు. జులై 10న లాసెట్‌ ఉన్నా దానికి హాజరయ్యేది తక్కువ మంది. అప్పుడు ఆరోజు విడత ఎంసెట్‌ అగ్రికల్చర్‌ పరీక్షలు జరపాలని భావిస్తున్నామని ఉన్నత విద్యామండలి ఛైర్మన్‌ పాపిరెడ్డి తెలిపారు. ఒక విడతకు సుమారు 26 వేల మంది వరకు ఆన్‌లైన్‌ పరీక్షలు రాయడానికి వీలవుతుంది. ఇప్పటివరకు మొదట ఈసెట్‌ను, తర్వాత ఎంసెట్‌ను, చివరగా పీజీఈసెట్‌ను జరిపేవారు. ఈసారి ఆ వరుస మారి తొలుత పీజీఈసెట్‌ నిర్వహించనున్నారు. ఇక పీఈసెట్‌ (వ్యాయామ విద్య కోర్సులు)కు దరఖాస్తు చేసుకున్న విద్యార్థులకు క్రీడా పోటీలు నిర్వహించి ప్రతిభను నిర్ణయిస్తారు. దాంతో జులై 16 తర్వాత తేదీలను ఖరారు చేయనున్నారు.
పది పరీక్షలకు, పాలిసెట్‌కు మధ్య ఒక్క రోజే వ్యవధి
పాలిసెట్‌ను జులై 1న జరపాలని ప్రభుత్వం నిర్ణయించింది. తొలుత ఏప్రిల్‌ 17వ తేదీన నిర్వహించాల్సి ఉండగా లాక్‌డౌన్‌తో వాయిదా పడింది. పదో తరగతి పరీక్షలు జూన్‌ 8 నుంచి ప్రారంభమై 29వ తేదీతో ముగుస్తాయి. అంటే పాలిసెట్‌కు ఒక్క రోజు మాత్రమే వ్యవధి ఉంటుంది.
నేడు ఎంసెట్‌ తేదీల వెల్లడి
ఈనాడు, హైదరాబాద్‌: ఎంసెట్‌, ఈసెట్‌ నిర్వహించే తేదీలను రాష్ట్ర విద్యాశాఖ మే 23 న ప్రకటించనుంది. ఎంసెట్‌ను జులై 7-10 తేదీల మధ్య జరపవచ్చని తెలిసింది. ఆన్‌లైన్‌ పరీక్షలు కావడంతో ఆయా తేదీలపై ఇటీవల తెలంగాణ ఉన్నత విద్యామండలి ఛైర్మన్‌ తుమ్మల పాపిరెడ్డి టీసీఎస్‌ అయాన్‌ ప్రతినిధులతో చర్చించి రూపొందించిన కాలపట్టికను విద్యాశాఖ మంత్రి సబితా ఇంద్రారెడ్డికి అందజేశారు. మంత్రి ఆమోదం అనంతరం తేదీలను ఉన్నత విద్యామండలి ప్రకటించనుంది.
ఆదివారం నాడూ ‘పది’ పరీక్ష
* జూన్‌ 8 నుంచి జులై 5 వరకు కొనసాగింపు
* ప్రధాన పరీక్షలు జూన్‌ 29తో పూర్తి
* కాలపట్టికను విడుదల చేసిన విద్యా మంత్రి

ఈనాడు, హైదరాబాద్‌: పదో తరగతి పరీక్షల కాలపట్టికను విద్యాశాఖ మే 22న‌ ఖరారు చేసింది. జూన్‌ 8 నుంచి జులై 5 వరకు జరిగే పరీక్షల టైంటేబుల్‌ వివరాలను విద్యామంత్రి సబితా ఇంద్రారెడ్డి విడుదల చేశారు. హైకోర్టు సూచనల మేరకు ఒక్కో పరీక్షకు మధ్య రెండు రోజుల వ్యవధి ఇచ్చారు. గతానికి భిన్నంగా ఈసారి ఆదివారమూ పరీక్ష నిర్వహిస్తున్నారు. ప్రధాన సబ్జెక్టు గణితం పేపర్‌-1తో పాటు ఓరియంటల్‌ పేపర్‌-2, ఒకేషనల్‌ కోర్సు థియరీ పరీక్ష ఆదివారమే జరగనుంది. కాలపట్టికపై విద్యాశాఖ ప్రత్యేక కార్యదర్శి చిత్రా రామచంద్రన్, ప్రభుత్వ పరీక్షల విభాగం సంచాలకుడు సత్యనారాయణరెడ్డితో మే 22న‌ చర్చించి, ఆమోదించిన మంత్రి సబిత అనంతరం దాన్ని విడుదల చేశారు. కరోనా కారణంగా ఇప్పటికే పరీక్షల నిర్వహణ రెండు నెలలకు పైగా ఆలస్యం కావడంతో ఆదివారమూ పరీక్ష జరపాలని నిర్ణయించారు.
పరీక్షా కేంద్రాల మార్పును తెలియజేస్తాం: మంత్రి సబిత
రాష్ట్ర ప్రభుత్వం హైకోర్టుకు హామీ ఇచ్చినట్లుగా విద్యార్థులు కరోనా బారిన పడకుండా జాగ్రత్తలన్నీ తీసుకుంటామని మంత్రి సబిత తెలిపారు. ‘‘భౌతిక దూరం పాటించాల్సి ఉన్నందున పరీక్షా కేంద్రాల సంఖ్యను పెంచాం. ప్రస్తుతం ఉన్న 2,530 కేంద్రాలకు అదనంగా మరో 2,005 ఏర్పాటు చేస్తున్నాం’’ అని వివరించారు. గతంలో కేటాయించిన పరీక్షా కేంద్రాల భవనాలతో పాటు వాటికి అర కిలోమీటరు దూరంలోపే నూతన కేంద్రాలను ఏర్పాటు చేశామని పేర్కొన్నారు. పరీక్షా కేంద్రాల మార్పును సంబంధిత ప్రధానోపాధ్యాయులు, చీఫ్‌ సూపరింటెండెంట్‌ ద్వారా విద్యార్థులకు తెలియజేస్తామని చెప్పారు. పరీక్షా కేంద్రంలోకి గంట ముందే అనుమతిస్తామన్నారు.
ప్రత్యేకంగా హెల్ప్‌లైన్‌
పరీక్షా కేంద్రాలకు విద్యార్థులు సకాలంలో చేరుకునేందుకు వీలుగా ఆర్టీసీ ప్రత్యేక బస్సులను నడుపుతుందని మంత్రి తెలిపారు. పరీక్షలకు సంబంధించి ఏమైనా సలహాలు, సూచనలు కావాలనుకునే విద్యార్థుల తల్లిదండ్రుల కోసం హెల్ప్‌లైన్‌ ఏర్పాటుచేస్తున్నామని తెలిపారు. పరీక్షకు హాజరయ్యే విద్యార్థులు ఎవరైనా దగ్గు, జలుబు, జ్వరంతో బాధపడుతుంటే ప్రత్యేక గదుల్లో ఉంచి పరీక్ష రాయిస్తామని చెప్పారు.

పీజీ వైద్య విద్య ఫీజుల తగ్గింపు?
* ఒకే తరహా విధానానికి స్వస్తి!
ఈనాడు, అమరావతి, ఎన్టీఆర్‌ విశ్వవిద్యాలయం, న్యూస్‌టుడే: పీజీ వైద్య విద్య ఫీజులను 15% నుంచి 20% వరకు తగ్గించే అవకాశాలు కనిపిస్తున్నాయి. ప్రస్తుతమున్న అన్ని కళాశాలల్లో ఒకే ఫీజు విధానానికి స్వస్తి పలుకనున్నారు. కళాశాలల వారీగా ఫీజుల ఖరారు జరగబోతుంది. వైద్య విద్య ప్రమాణాలు, ప్రత్యేక గుర్తింపులు, యాజమాన్యాలు సమర్పించిన ఆదాయ, వ్యయ, వివరాలను పరిగణనలోకి తీసుకుని ఏపీ ఉన్నత విద్య, నియంత్రణ పర్యవేక్షణ కమిషన్‌ కొత్త ఫీజుల ఖరారుపై కసరత్తు పూర్తిచేసింది. ఒకటి రెండు రోజుల్లో దీనిపై అధికారిక ఉత్తర్వులు వెలువడనున్నాయి.
* 2017-18 విద్యా సంవత్సరంలో ప్రైవేట్‌ కళాశాలల్లో ఒకే తరహా ఫీజుల విధానాన్ని అమల్లోకి తెచ్చారు. వీటికి మూడేళ్ల కాలపరిమితి ముగిసినందున కొత్త ఫీజులను ఖరారు కోసం యాజమాన్యాల నుంచి కమిషన్‌ వార్షిక ఆదాయ వ్యయ వివరాలను కోరింది. దీని ప్రకారం 14 ప్రైవేట్‌, 11 దంత వైద్య కళాశాలల యాజమాన్యాలు వివరాలు సమర్పించాయి. కళాశాలల యాజమాన్యాలతో మే 22, 23 తేదీల‌లో విడివిడిగా సమావేశమై వారి అభిప్రాయాలను సేకరించింది. ప్రస్తుత ఫీజుల్లో కనీసం 20%, ఆపైన తగ్గే అవకాశాలు ఉన్నట్లు జరిగిన చర్చల సారాంశాన్ని బట్టి తెలియవచ్చింది. ఈ తగ్గింపు కన్వీనర్‌ కోటాలోనే కాకుండా యాజమాన్య కోటాలోనూ ఉండబోతుంది. ఓ కళాశాలలో యాజమాన్య కోటా ‘బి’ కేటగిరి సీటు భర్తీ ఫీజును రూ.19 లక్షలకు ఖరారు చేసినట్లు తెలుస్తోంది. ప్రస్తుతం దీన్ని రూ.24 లక్షల వరకు వసూలుచేస్తున్నారు. కన్వీనర్‌ కోటాలో 50%, యాజమాన్య కోటాలో 3 కేటగిరీల (25%, 15%, 10%) ద్వారా సీట్ల భర్తీకి అవకాశాన్ని కల్పించాలని యాజమాన్యాలు ప్రభుత్వాన్ని కోరినట్లు తెలిసింది.
5న సివిల్స్‌ ప్రాథమిక పరీక్ష తేదీ ఖరారు
ఈనాడు, హైదరాబాద్‌: సివిల్‌ సర్వీసెస్‌ ప్రాథమిక పరీక్ష తేదీని జూన్‌ 5న ఖరారు చేస్తామని యూపీఎస్సీ వెల్లడించింది. వాస్తవానికి మే 31వ తేదీన ప్రిలిమినరీ పరీక్ష జరగాల్సి ఉంది. కరోనా నేపథ్యంలో వాయిదా వేస్తున్నట్లు మే 4న ప్రకటించింది. లాక్‌డౌన్‌ నేపథ్యంలో 20వ తేదీన సమీక్షించి కొత్త తేదీని ఖరారు చేస్తామని అదే రోజు తెలిపింది. ఈ క్రమంలో మే 20న సమావేశమైన యూపీఎస్సీ అధికారులు.. కేంద్ర ప్రభుత్వం లాక్‌డౌన్‌ను పొడిగించినందున జూన్‌ 5వ తేదీన సమీక్షించి పరీక్ష జరిగే కొత్త తేదీని ప్రకటిస్తామని తెలిపింది.
ఇంటి నుంచే బీటెక్‌ పరీక్ష
* నిట్‌ తాడేపల్లిగూడెం, ఐఐటీ తిరుపతి ఏర్పాట్లు
* కరోనా కారణంగా చివరి ఏడాది విద్యార్థులకు అవకాశం
ఈనాడు, అమరావతి: కరోనాతో విద్యా సంవత్సరం నష్టపోకుండా ఉండేందుకు నిట్, ఐఐటీలు బీటెక్‌ చివరి సంవత్సరం విద్యార్థులకు ఆన్‌లైన్‌ పరీక్షలు నిర్వహిస్తున్నాయి. లాక్‌డౌన్‌తో ఇళ్ల వద్దనున్న విద్యార్థులు అక్కడి నుంచే పరీక్షలు రాసేందుకు ఏర్పాట్లు చేస్తున్నాయి. పరీక్షల నిర్వహణలో జాప్యం జరిగితే ప్రాంగణ నియామకాల్లో ఉద్యోగాలు పొందినవారు.. ఉన్నత విద్యకు వెళ్లాల్సినవారికి ఇబ్బందులు ఎదురవుతాయి. ఈ నేపథ్యంలో ఆన్‌లైన్‌ పరీక్షలకు ఐఐటీ తిరుపతి, తాడేపల్లిగూడెం నిట్‌ ప్రత్యేకంగా సాఫ్ట్‌వేర్‌ను రూపొందించాయి.
నిట్‌లో 25% మార్కులకే..
తాడేపల్లిగూడెం నిట్‌లో చివరి సంవత్సరం విద్యార్థులకు జూన్‌ 1 నుంచి ఆన్‌లైన్‌ పరీక్షలు నిర్వహించనుంది. విద్యా సంస్థలో నిర్వహించిన మిడ్, మైనర్‌ పరీక్షలకు 75% వెయిటేజ్‌ ఇస్తారు. మిగతా 25% మార్కులకు మాత్రమే ఇప్పుడు పరీక్ష నిర్వహిస్తారు. బహుళైచ్ఛిక ప్రశ్నలు ఇస్తారు. ఇవి జంబ్లింగ్‌ విధానంలో ఉంటాయి. ప్రత్యేక సాఫ్ట్‌వేర్‌తో విద్యార్థి తన ల్యాప్‌టాప్, కంప్యూటర్, మొబైల్‌ఫోన్‌లో కెమెరా ఆన్‌ చేస్తేనే ప్రశ్నపత్రం డౌన్‌లోడ్‌ అవుతుంది. ఈ కెమెరా విద్యార్థిని పరిశీలిస్తూ ఉంటుందని అకడమిక్‌ డీన్‌ బీఆర్‌కే శాస్త్రి తెలిపారు. రెండు, మూడో సంవత్సరం విద్యార్థులకు మాత్రం ఆఫ్‌లైన్‌లోనే పరీక్షలు నిర్వహిస్తామన్నారు. ఐఐటీ తిరుపతిలో ప్రశ్నలు, జవాబుల రూపంలోనే పరీక్షలు నిర్వహిస్తున్నారు. ఇవి జూన్‌ మొదటి వారంలో ప్రారంభం కానున్నాయి. కరోనా కారణంగా విద్యార్థులు ఒకచోటకు వచ్చి పరీక్షలు రాసే అవకాశం లేకపోవడంతో ఆన్‌లైన్‌ పరీక్షలు నిర్వహిస్తున్నట్లు ఐఐటీ తిరుపతి సంచాలకులు సత్యనారాయణ వెల్లడించారు.
* చివరి ఏడాది సెమిస్టర్‌ పరీక్షలకు విద్యార్థులకు ఉత్తీర్ణత, అనుత్తీర్ణత అని మాత్రమే ఇస్తారు. గ్రేడ్లు ఇవ్వరు. విద్యార్థులు జవాబులను కంప్యూటర్‌పై టైప్‌ చేయాల్సి వస్తున్నందున సమయం కొంచెం ఎక్కువ ఇవ్వనున్నారు. విద్యార్థుల కదలికలను కంప్యూటర్‌లోని కెమెరా ద్వారా పరిశీలిస్తారు.
జూన్‌ 8 నుంచి పది పరీక్షలు!
* హైకోర్టు తీర్పు నేపథ్యంలో విద్యాశాఖ కసరత్తు
ఈనాడు, హైదరాబాద్‌: పదో తరగతి పరీక్షల నిర్వహణకు హైకోర్టు పచ్చజెండా ఊపడంతో జూన్‌ 8వ తేదీ నుంచి పరీక్షలను ప్రారంభించేందుకు విద్యాశాఖ కసరత్తు చేస్తోంది. ప్రభుత్వ ఆమోదంతో పరీక్షల ప్రణాళికను ఒకట్రెండు రోజుల్లో ప్రకటించనుంది. విద్యాశాఖ ప్రత్యేక ప్రధాన కార్యదర్శి చిత్రా రామచంద్రన్‌తో ప్రభుత్వ పరీక్షల విభాగం సంచాలకుడు మే 19న సమావేశమై ఈ విషయమై చర్చించారు.
ఇప్పటికే ఆలస్యమైనందున జూన్‌ 8వ తేదీ నుంచి పరీక్షలు ప్రారంభమయ్యేలా షెడ్యూలు ఖరారు చేయాలని ప్రత్యేక ప్రధాన కార్యదర్శి సూచించినట్లు సమాచారం. జూన్‌ 3న కరోనా పరిస్థితిపై సమీక్షించుకోవాలని, 4వ తేదీన విచారణ జరుపుతామని హైకోర్టు చెప్పిన నేపథ్యంలో ఒకవేళ అప్పటికి తగ్గకుంటే ప్రత్యామ్నాయం ఏమిటనే చర్చా వీరి మధ్య జరిగినట్టు తెలిసింది. అప్పటి పరిస్థితిని బట్టి నిర్ణయాలు తీసుకోవాలని వారు అభిప్రాయానికి వచ్చినట్టు సమాచారం.
8 పరీక్షలు..25 రోజులు
ఒక్కో పరీక్ష మధ్య రెండు రోజుల వ్యవధి ఇవ్వాలని హైకోర్టు ఆదేశించింది. ఆ ప్రకారం జూన్‌ 8వ తేదీ పరీక్షలు మొదలైతే సెలవులతో కలిపి ఎనిమిది ప్రధాన పరీక్షలు పూర్తి కావడానికి 25 రోజులు పడుతుందని అంచనా. అంటే జులై 2వ తేదీకి పూర్తవుతాయి. ఒకేషనల్‌ పరీక్షలు జులై 6, 9, 13 తేదీల్లో జరుగుతాయి. ‘‘గతంలో మాదిరిగా కాకుండా పరీక్షలు జరుగుతుండగానే పూర్తయిన సబ్జెక్టుల మూల్యాంకనం మొదలుపెట్టే అవకాశాలను పరిశీలిస్తున్నాం. మూల్యాంకనం వెంటనే మొదలైతే 12 రోజుల్లో పూర్తవుతుంది. జులై 25వ తేదీ నాటికి ఫలితాలు ఇచ్చే అవకాశం ఉంటుంది’’ అని పరీక్షల విభాగం ఉన్నతాధికారి తెలిపారు. భౌతిక దూరం పాటిస్తున్న నేపథ్యంలో ప్రస్తుతం ఉన్న పరీక్ష కేంద్రాలకు సమీపంలో కొత్తవి ఏర్పాటు చేస్తున్నారు. పాత హాల్‌టికెట్లతోనే పరీక్షలు జరుపుతామని అధికారులు ఇప్పటికే స్పష్టంచేసినందున కొత్త పరీక్షా కేంద్రాల్లో రాసేవారికి మార్గదర్శనం చేసేందుకు సిబ్బందిని నియమించే అవకాశం ఉంది. పాత కేంద్రం నుంచి కొత్త కేంద్రం వద్దకు రవాణా సౌకర్యం కల్పించడంపైనా ఆలోచన చేస్తున్నారు.
షరతులతో హైకోర్టు అనుమతి
రాష్ట్ర వ్యాప్తంగా ఎదురుచూస్తున్న పదో తరగతి పరీక్షలను షరతులతో నిర్వహించుకునేందుకు హైకోర్టు మే 19న ప్రభుత్వానికి అనుమతి మంజూరు చేసింది. జూన్‌ 3న కరోనా వ్యాప్తిపై సమీక్షించాలని, తీవ్రత ఎక్కువగా ఉంటే పరీక్షలను వాయిదా వేసుకోవచ్చని, లేదంటే జూన్‌ 8వ తేదీ నుంచి పరీక్షల నిర్వహణపై ముందుకెళ్లవచ్చని పేర్కొంది. పరీక్షల నిర్వహణకు తీసుకున్న చర్యలను వివరిస్తూ ప్రభుత్వం దాఖలు చేసిన కౌంటరును పరిశీలించి మధ్యంతర ఉత్తర్వులను రద్దుచేస్తూ ఉత్తర్వులు జారీ చేసింది. విచారణను జూన్‌ 4వ తేదీకి వాయిదా వేసింది. కరోనా నేపథ్యంలో పరీక్షలు నిర్వహించడాన్ని సవాలు చేస్తూ ఎం.బాలకృష్ణ ప్రజాప్రయోజన వ్యాజ్యం దాఖలు చేయగా, విచారించిన ధర్మాసనం పరీక్షలను వాయిదా వేయాలంటూ గతంలో మధ్యంతర ఉత్తర్వులను జారీ చేసిన విషయం విదితమే. ఈ పిటిషన్‌పై ప్రధాన న్యాయమూర్తి జస్టిస్‌ ఆర్‌.ఎస్‌.చౌహాన్‌, జస్టిస్‌ బి.విజయ్‌సేన్‌రెడ్డిలతో కూడిన ధర్మాసనం విచారణ చేపట్టింది. పిటిషనర్‌ తరఫు న్యాయవాది పవన్‌కుమార్‌ వాదనలు వినిపిస్తూ కేంద్ర, రాష్ట్ర ప్రభుత్వాలు మే నెల 31వరకు లాక్‌డౌన్‌ ప్రకటించాయని, అయినా రాష్ట్ర ప్రభుత్వం ఈ నెలలోనే పరీక్షలు నిర్వహించేందుకు ముందుకెళుతోందని ధర్మాసనం దృష్టికి తెచ్చారు. ధర్మాసనం జోక్యం చేసుకుంటూ ‘‘రాష్ట్రాన్ని దాదాపుగా గ్రీన్‌జోన్‌గా ముఖ్యమంత్రి ప్రకటించారు. ఆటోలు, ట్యాక్సీలు తిరుగుతున్నాయి. కరోనా వ్యాప్తి నివారణకు ప్రభుత్వం అన్ని చర్యలూ తీసుకుంటోంది. ఈ దశలో పిల్లల భవిష్యత్తును ఎంచుకోవడానికి అవసరమైన ఈ పరీక్షలకు అవాంతరం కలిగించే ఉద్దేశం మాకు లేదు’’ అని ధర్మాసనం పేర్కొంది.
హైకోర్టు చెప్పిన షరతులివే
* పరీక్ష కేంద్రం, నిర్వహణ నిర్ణయాలపై అన్ని మాధ్యమాల్లో విస్తృతంగాప్రచారం చేయాలి.
* పరీక్షకు.. పరీక్షకు మధ్య రెండు రోజుల గడువు ఉండాలి.
* పరీక్షకు ముందు తరువాత శానిటైజేషన్‌ చేసి కేంద్రాలను శుభ్రం చేయాలి.
* అవసరమైనన్ని థర్మల్‌ స్క్రీనింగ్‌ కిట్లు, తగినంత మంది వైద్య సిబ్బందిని అందుబాటులో ఉంచాలి.
* విద్యార్థులు, వారి తల్లిదండ్రుల కోసం హెల్ప్‌లైన్‌ ఏర్పాటు చేయాలి.
* ఇరుకైన గదుల్లో కాకుండా, పెద్ద ఆవరణలున్న కేంద్రాల్లో పరీక్షలు నిర్వహించాలి.
* కంటెయిన్‌మెంట్‌, రెడ్‌జోన్‌లో ఉన్న విద్యార్థులను సురక్షితంగా పరీక్ష కేంద్రాలకు తరలించే ఏర్పాట్లుండాలి.
జేఈఈ (మెయిన్‌) దరఖాస్తు గడువు పొడిగింపు
* పరీక్ష కేంద్రాల ఎంపిక, పొరపాట్ల సవరణకు అవకాశం
ఈనాడు, దిల్లీ: జేఈఈ (మెయిన్‌)-2020 ఆన్‌లైన్‌ దరఖాస్తు గడువును మే 24 వరకు పొడిగించినట్లు నేషనల్‌ టెస్టింగ్‌ ఏజెన్సీ (ఎన్టీఏ) డైరెక్టర్‌ జనరల్‌ డాక్టర్‌ వినీత్‌ జోషి తెలిపారు. గతంలో సమర్పించిన దరఖాస్తుల్లో పొరపాట్ల సవరణ, ఎంపిక చేసుకున్న పరీక్ష కేంద్రాల్లో మార్పులు చేసుకునేందుకు మే 25 నుంచి 31 వరకు అవకాశం ఇచ్చినట్లు ఆయన పేర్కొన్నారు. విదేశాల్లోని కళాశాలల్లో చేరాల్సిన విద్యార్థులు కొవిడ్‌ నేపథ్యంలో స్వదేశంలోనే విద్యాభ్యాసం కొనసాగించాలని భావించి వినతి చేయడం, గతంలో దరఖాస్తు సమర్పణలో ఇబ్బందులు ఎదుర్కొన్న వారి విజ్ఞప్తుల మేరకు ఆఖరి అవకాశంగా గడువు పొడిగించినట్లు వివరించారు. సాధ్యమైనంత మేరకు విద్యార్థులు కోరిన పరీక్ష కేంద్రాలు కేటాయించేందుకు ప్రయత్నిస్తామని తెలిపారు. దరఖాస్తుల సమర్పణ, పొరపాట్ల సవరణ, పరీక్ష కేంద్రాల ఎంపిక మార్పులు 31వ తేదీ సాయంత్రం అయిదు గంటల వరకు చేసుకోవచ్చని, ఆన్‌లైన్‌ రుసుము 11.50 గంటలకు వరకు చెల్లించాలని పేర్కొన్నారు. మరోసారి దరఖాస్తుల సమర్పణ, సవరణలకు అవకాశం లేనందున విద్యార్థులు జాగ్రత్తగా వ్యవహరించాలని ఆయన సూచించారు. మరిన్ని వివరాలకు jeemain.nta.nic.in సంప్రదించాలన్నారు.
జూన్‌ మొదటి వారం తర్వాత టెన్త్ ప‌రీక్ష‌లు
* స్ప‌ష్టం చేసిన హైకోర్టు
హైదరాబాద్‌: తెలంగాణలో పదోతరగతి పరీక్షల నిర్వహణపై మే 19 హైకోర్టులో విచారణ జరిగింది. ఇరు వైపులా వాదనలు విన్న ఉన్నత న్యాయస్థానం జూన్‌మొదటి వారం తర్వాత పరీక్షలు నిర్వహించుకోవచ్చని స్పష్టం చేసింది. కరోనా పరిస్థితులపై జూన్‌3న సమీక్షించాలని న్యాయస్థానం సూచించింది. పరీక్షలు నిర్వహిస్తే కరోనా నివారణ జాగ్రత్తలు పాటించాలని, ప్రతి ప‌రీక్ష‌కు రెండు రోజుల వ్య‌వ‌ధి ఉండాలని, భౌతిక దూరం సాధ్యంకాని ప‌రీక్షా కేంద్రాల‌ను మార్చాల‌ని ఆదేశించింది. లాక్‌డౌన్ స‌మ‌యంలో ప‌రీక్ష‌లు నిర్వ‌హించ‌వ‌ద్ద‌ని సూచించింది. పరిస్థితి తీవ్రంగా ఉంటే పరీక్షలు నిర్వ‌హించ‌రాద‌ని ఆదేశించింది.
జులైలో సీబీఎస్‌ఈ 12వ తరగతి పరీక్షలు
ఈనాడు, దిల్లీ: కరోనా వల్ల దేశవ్యాప్తంగా మధ్యలో ఆగిపోయిన సీబీఎస్‌ఈ 12వ తరగతి పరీక్షలను జులై 1 నుంచి 13వ తేదీ వరకు నిర్వహించనున్నట్లు కేంద్ర మానవ వనరుల అభివృద్ధి శాఖ మంత్రి రమేష్‌ పోఖ్రియాల్‌ వెల్లడించారు. ఇందుకు సంబంధించిన షెడ్యూల్‌ని ఆయన మే 18న‌ ప్రకటించారు. అన్ని పరీక్షలూ ఉదయం 10.30 నుంచి మధ్యాహ్నం 1.30 గంటల వరకు జరుగుతాయని తెలిపారు. ఈశాన్య దిల్లీలో అల్లర్ల కారణంగా ఆగిపోయిన పదో తరగతి పరీక్షలు కూడా ఇదే తేదీల్లో జరుగుతాయని వెల్లడించారు.
12వ తరగతి షెడ్యూల్
జులై 1: హోంసైన్స్‌
జులై 2: హిందీ ఎలెక్టివ్‌, హిందీ కోర్‌
జులై 7: ఇన్ఫర్మాటిక్స్‌ ప్రాక్టికల్స్‌ (న్యూ, ఓల్డ్‌), కంప్యూటర్‌సైన్స్‌ (న్యూ, ఓల్డ్‌), ఇన్ఫర్మేషన్‌ టెక్నాలజీ
జులై 9: బిజినెస్‌ స్టడీస్‌
జులై 10: బయోటెక్నాలజీ
జులై 11: జాగ్రఫీ
జులై 13: సోషియాలజీ
ప్రభుత్వ పాఠశాలల్లో పూర్వ ప్రాథమిక విద్య
* సమగ్ర శిక్ష అభియాన్‌ కింద 3,400 పాఠశాలల్లో ఏర్పాటు
ఈనాడు, అమరావతి: ప్రాథమిక పాఠశాలల్లో వచ్చే విద్యా సంవత్సరం నుంచి పూర్వ ప్రాథమిక విద్య(ప్రీ స్కూల్స్‌)ను ప్రారంభించాలని పాఠశాల విద్యాశాఖ భావిస్తోంది. ఇందులో భాగంగా సమగ్ర శిక్ష అభియాన్‌ కింద 3,400 పాఠశాలల్లో ఏర్పాటుకు ప్రతిపాదనలు సిద్ధం చేసింది. పూర్వ ప్రాథమిక విద్యకు అవసరమయ్యే పాఠ్యాంశాల రూపకల్పనపైనా కసరత్తు చేస్తున్నారు. నాలుగున్నరేళ్లు, ఐదేళ్ల పిల్లలకు మొదట పూర్వ ప్రాథమిక విద్యలో ప్రవేశాలు కల్పిస్తారు. ఇక్కడ ఏడాదిపాటు పఠన, లేఖన నైపుణ్యాలు, గణిత సామర్థ్యాలు వంటివి నేర్పిస్తారు. అనంతరం ఒకటో తరగతిలో చేర్పిస్తారు. ప్రభుత్వ పాఠశాలల్లో ప్రవేశాలు పెరిగేందుకు, విద్యార్థులు చదువులో రాణించేందుకు ఈ విధానం ఉపయోగపడుతుందని అధికారులు పేర్కొంటున్నారు. పూర్వప్రాథమిక ఉపాధ్యాయులను ఒప్పంద ప్రతిపాదికన తీసుకుంటారు. మొదట గిరిజన, వెనుకబడిన ప్రాంతాలకు ప్రాధాన్యం ఇవ్వనున్నారు. రాష్ట్ర ప్రభుత్వం అనుమతిస్తే మొత్తం అన్ని బడుల్లోనూ ఏర్పాటు చేసేందుకు ప్రతిపాదనలు సిద్ధం చేస్తున్నారు.
భారతీయ భాషల్లోకి ‘స్వయం’ ఇంజినీరింగ్‌ కోర్సులు
* తెలుగు సహా ఎనిమిది భాషల్లోకి అనువాదం
ఈనాడు, హైదరాబాద్‌: కేంద్ర ప్రభుత్వం స్వయం పోర్టల్‌ ద్వారా ఆంగ్లంలో అందిస్తున్న వందలాది ఇంజినీరింగ్‌ కోర్సులు ఇక భారతీయ భాషల్లోనూ అందుబాటులోకి రానున్నాయి. వాటిని తెలుగు సహా మొత్తం ఎనిమిది భాషల్లోకి అనువదించాలని అఖిల భారత సాంకేతిక విద్యామండలి (ఏఐసీటీఈ) నిర్ణయించింది. దీనిపై అధ్యాపకులు, నిపుణుల నుంచి దరఖాస్తులను ఆహ్వానించింది. ఇంజినీరింగ్, సైన్స్, ఫార్మసీ తదితర కోర్సులను దేశంలోని ఐఐటీలు, కేంద్రీయ విశ్వవిద్యాలయాలు, ఐఐఎస్‌సీ తదితర ప్రతిష్ఠాత్మక సంస్థలు రూపొందించి స్వయం పోర్టల్‌లో ఉంచుతాయి. వాటిలో చేరి ఉత్తీర్ణులైన వారికి ధ్రువపత్రం కూడా అందజేస్తారు. ప్రస్తుతం మార్కెట్లో డిమాండ్‌ ఉన్న కోర్సులను ఎక్కువగా అందుబాటులో ఉంచుతున్నాయి. వాటిల్లో చేరేవారి సంఖ్య గణనీయంగా పెరుగుతోంది. ప్రస్తుతం ప్రపంచవ్యాప్తంగా 1.56 కోట్ల మందికిపైగా వివిధ కోర్సుల్లో పేర్లు నమోదు చేసుకున్నారు. అవన్నీ ఆంగ్లంలో ఉండటం వల్ల గ్రామీణ ప్రాంతాలకు చెంది.. ప్రాంతీయ భాషల్లో చదివిన వారికి ఉపయోగపడటం లేదు. ఆంగ్ల భాషపై కనీస నైపుణ్యం లేకపోవడంతో బీటెక్‌ మొదటి సంవత్సరంలో తప్పే వారి శాతం ఎక్కువగా ఉందని గ్రహించిన ఏఐసీటీఈ.. తాజాగా స్వయం పోర్టల్‌లోని కోర్సులను ప్రాంతీయ భాషల్లోకి అనువదించాలని నిర్ణయించింది. ఇప్పటివరకు 2,867 రకాల కోర్సులను అందిస్తున్నారు. అవన్నీ అండర్ గ్రాడ్యుయేట్, పోస్టు గ్రాడ్యుయేట్‌ స్థాయి కోర్సులు.
కోర్సులు అనువదించే 8 భారతీయ భాషలు: హిందీ, తెలుగు, తమిళం, కన్నడం, బెంగాళీ, గుజరాతీ, మలయాళం, మరాఠీ
మరిన్ని వర్సిటీల్లో దూరవిద్య!
* కరోనా కారణంగా నిబంధనల సడలింపు
ఈనాడు, హైదరాబాద్‌: కరోనా నేపథ్యంలో ఉన్నత విద్యకు విద్యార్థులు దూరం కాకుండా మరిన్ని విశ్వవిద్యాలయాల్లో దూరవిద్య ప్రవేశపెట్టేందుకు అనుమతి ఇవ్వాలని యూజీసీ భావిస్తోంది. జాతీయ అంచనా, గుర్తింపు మండలి(న్యాక్‌) నిబంధనల ప్రకారం 4 పాయింట్లకు కనీసం 3.26 స్కోర్‌ సాధిస్తేనే దూరవిద్య కోర్సులు అందించాలని గత ఏడాది యూజీసీ నిర్ణయించింది. ఆ ప్రకారమే అనుమతులు ఇస్తోంది. ఫలితంగా అనేక రాష్ట్ర వర్సిటీలు దూరవిద్య కోర్సులను అందించే అవకాశం లేకుండాపోయింది. కొవిడ్‌ కారణంగా కొంత సడలింపులు ఇవ్వాలని, న్యాక్‌ ‘ఎ’ గ్రేడ్‌(3, ఆపైన పాయింట్లు) ఉన్న వాటికి అనుమతి ఇవ్వాలన్న దానిపై యూజీసీలో తాజాగా చర్చ జరిగినట్లు సమాచారం.
కొలువు చూపే కొత్త డిగ్రీ
* విద్యార్థులకు అప్రెంటిస్‌షిప్‌, ఉద్యోగ శిక్షణ
* పాఠ్యాంశాలు ఖరారు చేసిన ఉన్నత విద్యామండలి
ఈనాడు - అమరావతి: కొత్త విద్యా సంవత్సరం(2020-21) నుంచి డిగ్రీ విద్యలో అనేక మార్పులు రాబోతున్నాయి. ఈ మూడేళ్ల కోర్సులో విద్యార్థుల నైపుణ్యాల పెంపే లక్ష్యంగా ఉన్నత విద్యామండలి అప్రెంటిస్‌షిప్‌ విధానం, ఉద్యోగ నైపుణ్య శిక్షణ వంటివి చేర్చింది. ఆ మేరకు మార్చిన కొత్త పాఠ్యాంశాలు జూన్‌ నాటికి అందుబాటులోకి రానున్నాయి.
కొత్తగా ఇలా..
అప్రెంటిస్‌షిప్‌లో నైపుణ్యాభివృద్ధి, జీవన నైపుణ్యాల సబ్జెక్టులు ఉంటాయి. వీటిల్లో ప్రతి సెమిస్టర్‌కు ఒక్కో సబ్జెక్టును ఎంపిక చేసుకోవాలి. మొదటి, రెండో ఏడాదిలో రెండేసి నెలలను ‘అప్రెంటిస్‌షిప్‌’గా పిలుస్తారు. ఇందుకు సెలవుల్లో సమయం ఇస్తారు. చివరి ఏడాది ఆరు నెలల శిక్షణను ‘ఉద్యోగ నైపుణ్య శిక్షణ’గా పిలవనున్నారు.
నైపుణ్యాభివృద్ధి సబ్జెక్టులు
* బీఏ: డేటా ఎనలిటిక్స్‌, పబ్లిక్‌ స్పీచ్‌, బడ్జెట్‌ తయారీ, కార్యాలయ ప్రాసెస్‌, పర్యాటక గైడెన్స్‌, సర్వే, రిపోర్టింగ్‌, క్రియేటివ్‌ రైటింగ్‌, జర్నలిజం.
* బీకాం: పర్యాటకం, చిల్లర వర్తకం, జీఎస్టీ, వాణిజ్య విశ్లేషణ.
* బీఎస్సీ: వైద్య ప్రయోగశాల సాంకేతికత, ఆక్వా, మత్స్య, బయోలజీ ప్రయోగశాల సాంకేతికత, ఫుడ్‌ అడల్‌ట్రేషన్‌.
జీవన నైపుణ్య సబ్జెక్టులు:
* మానవ విలువలు, వృత్తి నైతికత
* కంప్యూటర్‌ అప్లికేషన్స్‌
* స్టాటిస్టిక్స్‌
* ఇండియన్‌ కల్చర్‌, సైన్సు
* ఇన్ఫర్మేషన్‌, కమ్యూనికేషన్‌ టెక్నాలజీ
* ఎంటర్‌ప్రెన్యూర్‌ డెవలప్‌మెంట్‌
* ఎనటికల్‌ నైపుణ్యం
* పర్సనాలిటీ ఎన్‌హాన్స్‌, లీడర్‌షిప్‌ ‌
* హెల్త్‌ ‌
* పర్యావరణ విద్య.
* కొత్త పాఠ్యాంశాలపై అధ్యాపకులకు నైపుణ్యాభివృద్ధి సంస్థ సాయంతో శిక్షణ ఇవ్వనున్నారు.
ప్రవేశ పరీక్షల దరఖాస్తు గడువు 31 వరకు పొడిగింపు
* వెల్లడించిన తెలంగాణ ఉన్నత విద్యామండలి
ఈనాడు, హైదరాబాద్‌: తెలంగాణ రాష్ట్రంలో నిర్వహించే ఎంసెట్, ఐసెట్, ఎడ్‌సెట్, పీజీఈసెట్‌ తదితర అన్ని ప్రవేశపరీక్షలకు దరఖాస్తు గడువును మే 31 వరకు పొడిగించినట్లు విద్యామండలి ఛైర్మన్‌ తుమ్మల పాపిరెడ్డి తెలిపారు. ఇంతకు ముందు ఇచ్చిన గడువు మే 15తో ముగియడం, రాష్ట్ర ప్రభుత్వం మే 29 వరకు లాక్‌డౌన్‌ విధించడంతో దరఖాస్తు గడువును పొడిగించారు. ఎంసెట్‌కు మే 15 వరకు మొత్తం 2,08,434 దరఖాస్తులు అందాయి. అందులో ఇంజినీరింగ్‌ విభాగానికి 1,34,636, అగ్రికల్చర్‌కి 73,798 మంది దరఖాస్తు చేశారు.
పదో తరగతి పరీక్షలు జులై 10 నుంచి
* ప్రశ్నపత్రాలు 11 నుంచి 6 కు కుదింపు
* ఒక్కో పేపరుకు వంద మార్కులు
ఈనాడు, అమరావతి: పదోతరగతి పరీక్షలను జులై 10 నుంచి నిర్వహించనున్నట్లు విద్యాశాఖ మంత్రి ఆదిమూలపు సురేష్‌ ప్రకటించారు. ప్రశ్నపత్రాల విషయంలో కీలక మార్పు చేశారు. వాటి సంఖ్యను 11 నుంచి 6కు కుదించారు. ప్రస్తుతం హిందీ మినహా ప్రతి సబ్జెక్టుకు 50మార్కుల చొప్పున రెండు పేపర్లు ఉండగా.. ఒక్కో సబ్జెక్టుకు ఒక పేపరు చొప్పున 100మార్కులకు పరీక్ష నిర్వహించనున్నారు. కరోనా వైరస్‌ వ్యాప్తి నేపథ్యంలో ఈ నిర్ణయం తీసుకున్నట్లు మంత్రి వెల్లడించారు. పరీక్షలకు ఎలాంటి విరామం లేకుండా రోజువారీగా నిర్వహించనున్నారు. ప్రధాన పరీక్షలన్నీ ఉదయం 9.30 గంటల నుంచి మధ్యాహ్నం 12.45 గంటల వరకు జరుగుతాయి. కాంపోజిట్‌ కోర్సు మొదటి భాష పేపర్‌-1ను 70మార్కులకు ఉదయం 9.30 గంటల నుంచి మధ్యాహ్నం 12.45 గంటల వరకు, పేపర్‌- 2ను 30 మార్కులకు 9.30 గంటల నుంచి 11.15గంటల వరకు నిర్వహించనున్నారు. వోఎస్‌ఎస్‌సీ ప్రధాన భాష(సంస్కృతం, అరబిక్‌, పార్శి)-1, 2 పేపర్లు వంద మార్కుల చొప్పున నిర్వహించనున్నారు. వొకేషనల్‌ కోర్సు థియరీ పరీక్ష ఒకటి 30, మరొకటి 40మార్కులకు ఉంటుంది. ఇవి 9.30 నుంచి 11.30గంటల వరకు నిర్వహిస్తారు. రాష్ట్ర వ్యాప్తంగా 6,30,804 మంది విద్యార్థులు పరీక్షలు రాయనున్నారు.
తెరవనున్న వసతిగృహాలు..
వేరే జిల్లాలకు చెందిన చాలా మంది విద్యార్థులు వసతిగృహాల్లో ఉండి విశాఖపట్నం, విజయవాడ, గుంటూరు వంటి నగరాల్లో పదో తరగతి చదివారు. లాక్‌డౌన్‌ కారణంగా వసతిగృహాలు మూతపడటంతో వారంతా సొంత గ్రామాలకు వెళ్లిపోయారు. పదో తరగతి పరీక్షలు రాసేందుకు వీరు రావాల్సి ఉంటుంది. ఇందుకోసం వాటిని తెరవనున్నారు. బీసీ, గిరిజన, సాంఘిక సంక్షేమ వసతి గృహాల్లో ఉండి చదువుకున్న వారు పెద్ద సంఖ్యలోనే ఉన్నారు.
ఉచిత రవాణా సదుపాయం..
విద్యార్థులకు ఉచిత రవాణా సదుపాయం కల్పించనున్నారు. హాల్‌టికెట్‌ చూపించి బస్సుల్లో ప్రయాణించేలా ఏర్పాట్లు చేస్తున్నారు. విద్యార్థుల కోసం బస్సులు నడపాలని ప్రజా రవాణా విభాగాన్ని కోరనున్నారు.
మారనున్న హాల్‌టికెట్లు..
కరోనా కారణంగా విద్యార్థుల మధ్య 4 అడుగుల చొప్పున దూరం ఉండేలా చర్యలు తీసుకుంటారు. ఒక్కో గదిలో 10-12 మంది మాత్రమే కూర్చునేలా ఏర్పాటు చేయనున్నారు. దీనివల్ల పరీక్ష కేంద్రాల సంఖ్య పెరగనుంది. దీంతో ప్రస్తుతం జారీ చేసిన హాల్‌టికెట్లు మారనున్నాయి.
ప్రస్తుతం 50 మార్కులే వందకు..
ప్రస్తుతమున్న 50 మార్కుల ప్రశ్నపత్రాన్నే వంద మార్కులకు ఇస్తారు. ప్రశ్నల సంఖ్యను అలాగే ఉంచి మార్కులను రెట్టింపు చేస్తారు. ప్రశ్నలను రెండు పేపర్ల నుంచి సమానంగా ఇస్తారు. కొత్త ప్రశ్నపత్రాలను రూపొందించి ముద్రించనున్నారు.
16 నుంచి వెబ్‌సైట్‌లో మాదిరి ప్రశ్నాపత్రాలు
పదో తరగతి మాదిరి ప్రశ్నాపత్రాలు మే 16 నుంచి ప్రభుత్వ పరీక్షల విభాగం వెబ్‌సైట్‌లో అందుబాటులో ఉంచనున్నట్లు పరీక్షల విభాగం సంచాలకులు సుబ్బారెడ్డి తెలిపారు. పరీక్షల నిర్వహణకు కొత్తగా కేంద్రాలను గుర్తించి, మే 18 లోపు పంపించాలని జిల్లా విద్యాశాఖ అధికారులకు ఆదేశాలు జారీ చేశారు.
వైద్యకళాశాలల్లో చేరికకు.. మే 20 తుది గడువు
ఈనాడు, హైదరాబాద్‌: రాష్ట్రంలోని ప్రభుత్వ, ప్రైవేటు వైద్యకళాశాలల్లోని పీజీ వైద్యవిద్య కన్వీనర్‌ కోటాలో తొలివిడత ప్రవేశాల్లోభాగంగా సీట్లు పొందిన అభ్యర్థులు మే 20 లోపు చేరాల్సి ఉంటుంది. ఇప్పటికే అర్హులైన అభ్యర్థుల జాబితాతో కాళోజీ ఆరోగ్యవర్శిటీ నిబంధనల మేరకు పీజీ ఎండీ, ఎంఎస్‌ కోర్సుల్లో సీట్ల కేటాయింపులు జరిపింది. సంబంధిత అభ్యర్థులు గడువు తేదీ సాయంత్రం నాలుగు గంటల్లోపు ఒరిజనల్‌ ధ్రువపత్రాలతో కేటాయించిన కళాశాలల్లో సంప్రదించాల్సి ఉంటుంది. పీజీ దంత వైద్య కోర్సుల్లో సీట్లు పొందిన అభ్యర్థులు మాత్రం ఈనెల 18 లోపు కళాశాలల్లో చేరాలని ఆరోగ్య వర్సిటీ గడువు విధించింది. జాతీయ స్థాయిలో అఖిల భారత కోటా పీజీ వైద్యవిద్య రెండో విడత కౌన్సెలింగ్‌ పూర్తయిన అనంతరమే.. రాష్ట్రంలోనూ కన్వీనర్‌ కోటాలో రెండోవిడత ప్రవేశ ప్రక్రియను నిర్వహించనున్నట్లు కాళోజీ ఆరోగ్య విశ్వవిద్యాలయం ఉపకులపతి డాక్టర్‌ కరుణాకరరెడ్డి తెలిపారు.
వాయిదా ప‌డిన ఇంట‌ర్ ప‌రీక్ష‌లు జూన్ 3న‌
హైదరాబాద్: కరోనా వైరస్‌ వ్యాప్తి నియంత్రణలో భాగంగా లాక్‌డౌన్‌ అమల్లోకి రావడంతో రాష్ట్రంలో వాయిదా పడిన ఇంటర్‌ పరీక్షలను నిర్వహించేందుకు తెలంగాణ ఇంటర్మీడియట్‌ బోర్డు సిద్ధమయ్యింది. వాయిదా పడిన పరీక్షల తేదీలను ప్రకటించింది. జూన్‌ 3న ఇంటర్‌ రెండో సంవత్సరం జాగ్రఫీ, మోడరన్‌ లాంగ్వేజ్‌ పరీక్షలు జరుగుతాయని ఇంటర్‌ బోర్డు కార్యదర్శి జలీల్ ఓ ప్రకటనలో తెలిపారు. పాత హాల్‌టికెట్ల నంబర్లతో గతంలో కేటాయించిన కేంద్రాల్లోనే పరీక్షలు జరుగుతాయని తెలిపారు. 3వ తేదీ ఉదయం 9 గంటల నుంచి 12 గంటల వరకు ఈ పరీక్షలు నిర్వహిస్తామని పేర్కొన్నారు. వాస్తవంగా మార్చి 23న జరగాల్సి ఉండగా.. కరోనా కారణంగా ఈ రెండు పరీక్షలు వాయిదా పడ్డాయి.
హెచ్‌సీయూ విద్యా సంవత్సరంలో కీలక మార్పులు
* ప్రవేశ పరీక్షలు ఆగస్టు మొదటి వారానికి వాయిదా
* పీజీ చివరి సెమిస్టర్‌‌ విద్యార్థులకు నేరుగా గ్రేడ్ల కేటాయింపు
ఈనాడు, హైదరాబాద్‌: వచ్చే విద్యా సంవత్సరంలో కీలక మార్పులు చేస్తూ హైదరాబాద్‌ కేంద్రీయ విశ్వవిద్యాలయం నిర్ణయం తీసుకుంది. 2020-21 విద్యా సంవత్సరంలో మార్పులు చేస్తున్నట్లు వర్సిటీ ఉపకులపతి ప్రొ.పొదిలె అప్పారావు ప్రకటించారు. ఈ నేపథ్యంలో జూన్‌ మొదటి వారంలో జరగాల్సిన హెచ్‌సీయూ జాతీయ ప్రవేశ పరీక్షలను వాయిదా వేశారు. ఆగస్టు మొదటి వారంలో నిర్వహిస్తారు. పీజీ మొదటి సంవత్సరం తరగతులు సెప్టెంబరు 1 నుంచి ప్రారంభిస్తారు. ప్రవేశ పరీక్షల ఫీజుగడువును మే 22 వరకు పొడిగించారు.
* పీజీ చివరి సెమిస్టర్‌ విద్యార్థులకు పరీక్షలు ఉండవు. వారికి పరీక్షలు నిర్వహించకుండా నేరుగా గ్రేడ్లు ప్రకటిస్తారు. ప్రస్తుత విద్యా సంవత్సరంలో ఇంటర్నల్‌ పరీక్షలు, ఇతరత్రా ప్రాజెక్టుల విషయంలో ప్రతిభ ఆధారంగా జూన్‌ 16న ఆయా విభాగాల ఆచార్యులు వీటిని ప్రకటిస్తారు. గ్రేడ్లతో విద్యార్థులు సంతృప్తి చెందకపోతే జులై 4 నుంచి పరీక్షలు రాయవచ్చు.
* మిగిలిన సెమిస్టర్లకు సంబంధించి పీజీ విద్యార్థులకు జులై 12 నుంచి తరగతులు ప్రారంభమవుతాయి. ఆగస్టు 3 నుంచి పరీక్షలు ఉంటాయి. డిటెన్షన్‌ లేకుండా విద్యార్థులు తర్వాత సెమిస్టర్‌కు వెళ్లే వీలు కల్పించారు.
బీటెక్‌లో 10నెలలు ఇంటర్న్‌షిప్‌
* ఉన్నత విద్యామండలి కసరత్తు
ఈనాడు, అమరావతి: బీటెక్‌ పాఠ్యాంశాల్లో మార్పులు రాబోతున్నాయి. కొత్తగా కొన్ని నైపుణ్య సబ్జెక్టులను ప్రవేశపెట్టడంతోపాటు ఇంటర్న్‌షిప్‌ కాలాన్ని పెంచనున్నారు. బీటెక్‌లో నైపుణ్యాల పెంపునకు తీసుకోవాల్సిన చర్యలపై అధ్యయనం చేసేందుకు ఉన్నత విద్యామండలి ప్రత్యేకంగా కమిటీ ఏర్పాటు చేసింది. మొదటి రెండేళ్లల్లో ప్రస్తుతం ఉన్న సబ్జెక్టులకు అదనంగా కొత్తవి తీసుకురానున్నారు. కమ్యూనికేషన్, సాఫ్ట్‌ స్కిల్స్, మౌఖిక పరీక్షల సన్నద్ధత వంటివి నేర్పించనున్నారు. మూడు, నాలుగు ఏడాదిలో విద్యార్థుల కోర్సులకు అనుగుణంగా అందించనున్నారు. ప్రస్తుతం చివరి సెమిస్టర్‌ ఆరు నెలలు ఇంటర్న్‌షిప్‌ ఉండగా.. దీన్ని 10 నెలలకు పెంచనున్నారు. మొదటి రెండేళ్లు వేసవి సెలవుల్లో రెండేసి నెలలు చొప్పున ఇంటర్న్‌షిప్‌ను తీసుకురానున్నారు.
డిగ్రీ ప్రవేశాలకు దోస్త్‌ యాప్‌
* సహాయ, మీ సేవా కేంద్రాలకు రాకుండానే దరఖాస్తు
* ఇంటర్‌ ఒకేషనల్‌ విద్యార్థులకూ నేరుగా ప్రవేశం
* కొత్తగా 4 కోర్సులు అందుబాటులోకి..
ఈనాడు, హైదరాబాద్‌: లాక్‌డౌన్‌ నేపథ్యంలో డిగ్రీ కోర్సుల్లో చేరేందుకు సహాయ కేంద్రాలు, మీ సేవా కేంద్రాల వద్దకు విద్యార్థులు రాకుండానే ప్రవేశాల ప్రక్రియను మరింత సరళతరం చేసేందుకు తెలంగాణ రాష్ట్ర ఉన్నత విద్యామండలి ఈ సారి దోస్త్‌ (డిగ్రీ ఆన్‌లైన్‌ సర్వీసెస్‌-తెలంగాణ) యాప్‌ను ప్రవేశపెట్టనుంది. దాని రూపకల్పన బాధ్యతను సెంటర్‌ ఫర్‌ గుడ్‌ గవర్నెన్స్‌ (సీజీజీ)కి అప్పగించింది. దీని సాయంతో విద్యార్థులు సులభంగా దరఖాస్తు చేసుకోవచ్చు. ఏటా డిగ్రీ కోర్సుల్లో 2.20 లక్షల మంది చేరుతున్నారు. అందులో 1.80 లక్షల మంది దోస్త్‌ ద్వారా ప్రభుత్వ, ప్రైవేటు కళాశాలల్లో ప్రవేశాలు పొందుతున్నారు. వారిలో సుమారు 80 వేల మంది స్మార్ట్‌ఫోన్ల ద్వారా దరఖాస్తు చేస్తున్నారు. మిగిలినవారు మీ సేవా కేంద్రాలు, ప్రభుత్వ కళాశాలల్లోని సహాయ కేంద్రాల ద్వారా దరఖాస్తులు అందజేస్తున్నారు. కరోనా వ్యాప్తి నేపథ్యంలో ఈ దఫా ప్రత్యేకంగా యాప్‌ను అందుబాటులోకి తీసుకురావాలని నిర్ణయించినట్లు దోస్త్‌ కన్వీనర్‌ ఆచార్య లింబాద్రి చెప్పారు. ఈ నెలాఖరు వరకు దానిపై పూర్తి స్పష్టత వస్తుందన్నారు.
ఒకేషనల్‌ విద్యార్థులకు ఊరట
ఇంటర్మీడియట్‌లో కొన్ని స్పెషలైజేషన్లలో ఒకేషనల్‌ కోర్సులు చేస్తున్న వారికి తర్వాత డిగ్రీస్థాయి కోర్సులు చేయడానికి వీల్లేని పరిస్థితి. కొన్నింటిలో చేరాలన్నా మళ్లీ బ్రిడ్జి కోర్సును రాసి ఉత్తీర్ణత సాధించాల్సి వస్తోంది. ఈ సమస్య పరిష్కరించడానికి ఈసారి బ్రిడ్జి కోర్సు అవసరం లేకుండా నేరుగా డిగ్రీలో చేరే అవకాశం ఇవ్వాలని నిర్ణయించారు. ఇంటర్‌ ఒకేషనల్‌ కోర్సులైన ఫిషరీస్‌, డెయిరీ టెక్నాలజీ, ఫారెస్ట్రీ లాంటివి పూర్తిచేసినవారికి డిగ్రీస్థాయిలో బీఎస్సీ ఫిషరీస్‌, డెయిరీ టెక్నాలజీ, ఫారెస్ట్రీ, ఆఫీస్‌ మేనేజ్‌మెంట్‌లను ప్రవేశపెట్టాలని కళాశాల విద్యాశాఖ నిర్ణయించింది. దీనిపై ఇప్పటికే ఒక కమిటీని నియమించింది. ఆయా కోర్సులకు సిలబస్‌ తయారు చేశామని, దాన్ని వర్సిటీలకు పంపిస్తామని కళాశాల విద్యాశాఖ వర్గాలు తెలిపాయి.
అగ్రికల్చర్‌ డిప్లొమా ప్రవేశానికీ పాలిసెట్‌
* ఈసారి పది మార్కులు, గ్రేడ్లు ప్రామాణికం కాదు
* పాలిసెట్‌ ర్యాంకులే ఆధారం
ఈనాడు, హైదరాబాద్: డిమాండ్‌ బాగా ఉన్న జయశంకర్‌ వ్యవసాయ విశ్వవిద్యాలయ పరిధిలోని రెండేళ్ల అగ్రికల్చర్‌ డిప్లొమా, మూడేళ్ల అగ్రికల్చర్‌ డిప్లొమా ఇంజినీరింగ్‌ కోర్సులకు పదో తరగతి మార్కులు/గ్రేడ్లు కాకుండా ఇక నుంచి పాలిసెట్‌ ర్యాంకే ప్రామాణికం. వచ్చే విద్యా సంవత్సరానికి(2020-21)ఈ కోర్సుల్లో ప్రవేశం పొందాలంటే రాష్ట్ర విద్యాసాంకేతిక, శిక్షణ మండలి(ఎస్‌బీటెట్‌) ఆధ్వర్యంలో నిర్వహించే పాలిటెక్నిక్‌ ఉమ్మడి ప్రవేశ పరీక్ష(పాలిసెట్‌) రాయాల్సిందే. కొన్ని బోర్డులు మార్కులు, మరికొన్ని గ్రేడ్లు ఇస్తుండటంతో మెరిట్‌ చూడటం సమస్యగా మారుతోందని వర్సిటీ అధికారి ఒకరు తెలిపారు. పాలిసెట్‌కు దరఖాస్తు చేసుకునేందుకు మే 31వ తేదీ వరకు గడువు ఉంది. ఇప్పటివరకు మొత్తం 36 వేల దరఖాస్తులు అందగా...అందులో 8 వేలు అగ్రికల్చర్‌ డిప్లొమా కోసం అందాయి.
ఇవీ ముఖ్యాంశాలు
* కోర్సులు : డిప్లొమా ఇన్‌ అగ్రికల్చర్, డిప్లొమా ఇన్‌ సీడ్‌ టెక్నాలజీ, డిప్లొమా ఇన్‌ ఆర్గానిక్‌ అగ్రికల్చర్‌. ఇవి రెండేళ్ల కోర్సులు. ఇక డిప్లొమా ఇన్‌ అగ్రికల్చర్‌ ఇంజినీరింగ్‌ మూడేళ్ల కోర్సు. మొత్తం 870 సీట్లు అందుబాటులో ఉన్నాయి.
* 120 మార్కులకు ప్రవేశ పరీక్ష ఉంటుంది. సమయం 2.30 గంటలు. ఇంజినీరింగ్, నాన్‌ ఇంజినీరింగ్‌ పాలిటెక్నిక్‌ కోర్సుల వారికి గణితం, భౌతిక, రసాయనశాస్త్రాలు, వ్యవసాయ డిప్లొమా వారికి వాటితోపాటు జీవశాస్త్రం ప్రశ్నలు ఉంటాయి. విద్యార్థులు రెండింటికీ దరఖాస్తు చేసుకోవచ్చు.
* పదో తరగతి పరీక్షల కాలపట్టిక వచ్చిన తర్వాత పాలిసెట్‌ జరిగే తేదీని ప్రకటిస్తారు.
పాత హాల్‌టికెట్లతోనే ‘పది’ పరీక్షలు
ఈనాడు, హైదరాబాద్‌: మార్చి నెలలో విద్యార్థులకు జారీ చేసిన హాల్‌టికెట్లతోనే మిగిలిపోయిన పదో తరగతి పరీక్షలు జరగనున్నాయి. పరీక్ష కేంద్రాలు పెరుగుతున్న నేపథ్యంలో కొత్తగా హాల్‌టికెట్లు జారీ చేస్తారా? పాతవాటినే కొనసాగిస్తారా? అనే అయోమయం విద్యార్థుల్లో నెలకొంది. ఈ నేపథ్యంలో పాత హాల్‌టికెట్లతోనే పరీక్షలను నిర్వహిస్తామని ప్రభుత్వ పరీక్షల విభాగం(ఎస్‌ఎస్‌సీ బోర్డు) స్పష్టం చేసింది. మొత్తం 5.34 లక్షల మంది విద్యార్థులు ఉండటంతో.. మార్చిలో జరిగిన పదో తరగతి పరీక్షల కోసం 2,530 కేంద్రాలను ఏర్పాటు చేశారు. కరోనా వ్యాప్తి కారణంగా పరీక్ష కేంద్రాల సంఖ్యను దాదాపు రెట్టింపు చేస్తామని ప్రభుత్వం సైతం ప్రకటించింది. అయితే, హాల్‌టికెట్ల పరిస్థితి ఎలా అనే ప్రశ్న ఉత్పన్నమైంది. ఈ విషయమై ప్రభుత్వ పరీక్షల విభాగం సంచాలకుడు సత్యనారాయణరెడ్డిని ‘ఈనాడు’ సంప్రదించగా.. గతంలో ఒకవైపు పదో తరగతి పరీక్షలు జరుగుతుంటే, మరోవైపు 1-9 తరగతులు కొనసాగేవన్నారు. ప్రస్తుతం వేసవి సెలవులు కావడంతో అదే పరీక్ష కేంద్రంలోని ఇతర గదులను, ప్రాథమిక పాఠశాలలనూ వినియోగించుకుంటామని చెప్పారు. దాంతో సగానికిపైగా కేంద్రాలు పాత పరీక్ష కేంద్రాల్లోనే ఉంటాయని, విద్యార్థులు అక్కడే పరీక్ష రాస్తారని తెలిపారు. గతంలో ఎంపిక చేసిన గదులను పరీక్ష కేంద్రం-ఏ అని, కొత్తగా ఎంపిక చేసిన వాటికి పరీక్ష కేంద్రం-బి అని విభజిస్తామన్నారు. పాత పరీక్ష కేంద్రం ప్రాంగణంలో గదులు అందుబాటులో లేనిపక్షంలో దానికి అత్యంత సమీపంలోని పాఠశాల/కళాశాలను ఎంపిక చేస్తామన్నారు. పరీక్షకు ముందు రోజు సంబంధిత కేంద్రం వద్దకు వెళ్లి చూసుకుంటే అదే ప్రాంగణమా? పక్కన పాఠశాలలోనా? అనే విషయం తెలుస్తుందని ఆయన చెప్పారు. విద్యార్థులకు ఎటువంటి ఇబ్బందులు లేకుండా ప్రభుత్వం అన్ని చర్యలు తీసుకుంటుందని ఆయన వెల్లడించారు.
అధ్యాపకుల ఇళ్లకే డిగ్రీ జవాబుపత్రాలు!
* మూల్యాంకనంలో విశ్రాంత అధ్యాపకులకూ అవకాశం
* కసరత్తు చేస్తున్న విశ్వవిద్యాలయాలు
ఈనాడు, హైదరాబాద్‌: కరోనా నేపథ్యంలో డిగ్రీ సెమిస్టర్‌ పరీక్షల నిర్వహణ జాప్యమయ్యే సూచనలుండటంతో కొత్త విద్యా సంవత్సరాన్ని యూజీసీ మార్గదర్శకాల ప్రకారం కాకుండా.. అసాధారణ నిర్ణయాలు తీసుకునే దిశగా విశ్వవిద్యాలయాలు అడుగులు వేస్తున్నాయి. అందులో భాగంగా డిగ్రీ మూల్యాంకనాన్ని త్వరగా పూర్తి చేసేందుకు జవాబుపత్రాలను అధ్యాపకుల ఇళ్లకూ పంపడానికి ఉన్న సాధ్యాసాధ్యాలపై కసరత్తు చేస్తున్నాయి. కొద్దిరోజులుగా ఆయా విశ్వవిద్యాలయాల అధికారులతో వీడియో కాన్ఫరెన్స్‌ నిర్వహిస్తున్న రాష్ట్ర ఉన్నత విద్యామండలి అధికారులు మూల్యాంకనాన్ని త్వరగా పూర్తిచేసేందుకు ప్రత్యామ్నాయ మార్గాలను అన్వేషించాలని సూచిస్తున్నారు. ఈ క్రమంలో పలు అంశాలను వర్సిటీ అధికారులు పరిశీలిస్తున్నారు. ‘వాస్తవానికి మే 10 నాటికి పరీక్షలు పూర్తయి మూల్యాంకనం మొదలవుతుంది. ఈ దఫా డిగ్రీ చివరి సెమిస్టర్‌ పరీక్షలనే జులై 1 నుంచి నిర్వహించాలని యూజీసీ సూచించింది. అయితే జూన్‌ మూడో వారం నుంచి ప్రారంభించాలని అనుకుంటున్నాం. ఈసారి అన్నీ అసాధారణ నిర్ణయాలే ఉంటాయి’ అని రాష్ట్ర ఉన్నత విద్యామండలి ఛైర్మన్‌ తుమ్మల పాపిరెడ్డి చెప్పారు. జూన్‌ మొదటి వారంలో పదో తరగతి పరీక్షలు పూర్తవుతాయని, ఎలాంటి జాగ్రత్తలు తీసుకున్నారో పరిశీలించి వాటిని డిగ్రీ పరీక్షలకు అమలు చేస్తామని వర్సిటీ అధికారులు చెబుతున్నారు. రాష్ట్రంలో సుమారు 6 లక్షల మంది డిగ్రీ విద్యార్థులు పరీక్షలు రాయాల్సి ఉంది.
ఇవీ కొత్త మార్గాలు...
* పదవీ విరమణ చేసి రెండేళ్ల లోపు అయిన వారికే మూల్యాంకనంలో పాల్గొనేందుకు ఇప్పటివరకు అవకాశం కల్పిస్తున్నారు. ఇకపై దాన్ని అయిదేళ్ల వరకు పొడిగించనున్నారు.
* విశ్వవిద్యాలయాల్లోని మూల్యాంకన కేంద్రమే కాకుండా వాటికి అనుబంధంగా ఉన్న వర్సిటీ పీజీ కళాశాలల్లోనూ మూల్యాంకనం జరపడంపై సాధ్యాసాధ్యాలను పరిశీలిస్తున్నారు. ఉదాహరణకు మహబూబ్‌నగర్‌లోని పాలమూరు వర్సిటీకి రాకుండా గద్వాల పీజీ కళాశాలలోనే ప్రశ్నపత్రాలు దిద్దవచ్చు.
* పరీక్ష సమయాన్ని 3 గంటల నుంచి 2 గంటలకు తగ్గిస్తున్నందున రోజుకు 3 విడతల్లో పరీక్షలు నిర్వహిస్తారు.
* ఒక సబ్జెక్టులో 4 లేదా 5 అధ్యాయాలు ఉంటాయి. అందువల్ల నాలుగు అధ్యాయాలుంటే ఎనిమిది, అయిదు ఉంటే 10 ప్రశ్నలు ఇస్తారు. వాటిల్లో 4 రాయాలి. ఒక్కో దానికి 20 మార్కులు ఉంటాయి.
‘పీఎంఆర్‌ఎఫ్‌’కు హెచ్‌సీయూ అర్హత
25 మంది పీహెచ్‌డీ విద్యార్థులకు ప్రవేశాలు ఇచ్చేందుకు అవకాశం
ఈనాడు, హైదరాబాద్‌: ప్రతిష్ఠాత్మకంగా భావించే ప్రధానమంత్రి పరిశోధన ఫెలోషిప్‌ (పీఎంఆర్‌ఎఫ్‌) కింద పీహెచ్‌డీ చేసే విద్యార్థులకు వచ్చే విద్యా సంవత్సరం ప్రవేశాలు కల్పించేందుకు హైదరాబాద్‌ కేంద్రీయ విశ్వవిద్యాలయం అర్హత సాధించింది. ఈ ఫెలోషిప్‌లకు ఎంపికైతే పీహెచ్‌డీ పూర్తి చేసేవరకు అయిదేళ్లపాటు నెలకు రూ.70 వేల నుంచి రూ.80 వేల వరకు ఉపకారవేతనం అందుకోవచ్చు. ఇప్పటివరకు కేవలం ఐఐటీలు, ఇండియన్‌ ఇన్‌స్టిట్యూట్‌ ఆఫ్‌ సైన్స్‌ (బెంగళూరు)తోపాటు దేశవ్యాప్తంగా ఉన్న ఏడు ఇండియన్‌ ఇన్‌స్టిట్యూట్‌ ఆఫ్‌ సైన్స్‌ అండ్‌ ఎడ్యుకేషన్‌ రీసెర్చ్‌(ఐసర్‌)లలో మాత్రమే పీఎంఆర్‌ఎఫ్‌ కింద విద్యార్థులు పరిశోధన చేయడానికి అవకాశం ఉంది. కేంద్రం ఇస్తున్న జాతీయ స్థాయి ర్యాంకు (ఎన్‌ఐఆర్‌ఎఫ్‌)ల్లో 25వ స్థానం లోపు పొందిన సంస్థల్లో పీఎంఆర్‌ఎఫ్‌ విద్యార్థులు పీహెచ్‌డీ చేసుకునే అవకాశం ఉంటుందని తాజాగా కేంద్ర మానవ వనరుల శాఖ ప్రకటించింది. ఆ ర్యాంకుల్లో హెచ్‌సీయూ 11వ స్థానంలో నిలిచింది. కేంద్రం విధించిన నిబంధనల ప్రకారం ఆ ర్యాంకు విద్యా సంస్థలకు ఒక్కో దానికి మొత్తం 1000 ఫెలోషిప్‌లలో 2.5 శాతం కేటాయిస్తారు. అంటే హెచ్‌సీయూలో 25 మంది ప్రవేశాలు పొందొచ్చు. దీనిపై ఉపకులపతి పొదిలె అప్పారావు మాట్లాడుతూ కేంద్రీయ విశ్వవిద్యాలయాలను సైతం ఆ పరిధిలోకి చేర్చాలని గత ఏడాది కోరినట్లు చెప్పారు. హెచ్‌సీయూను కూడా చేరుస్తామని అయిదారు నెలల క్రితం ప్రాథమికంగా నిర్ణయించారని చెప్పారు. తాజాగా అందుకు ఎన్‌ఐఆర్‌ఎఫ్‌ ర్యాంకుల నిబంధన విధించారన్నారు. తాము పది, ఆ లోపు స్థానంలోకి చేరితే మరింత మంది పీహెచ్‌డీ చేసేందుకు అవకాశం లభిస్తుందని తెలిపారు.
జులై 1-15వ తేదీల మధ్య సీబీఎస్‌ఈ పరీక్షలు
ఈనాడు, దిల్లీ: కరోనా(కొవిడ్‌-19) వైరస్‌ కారణంగా మధ్యలో ఆగిపోయిన సీబీఎస్‌ఈ 10, 12వ తరగతి పరీక్షలను జులై 1 నుంచి 15 తేదీల మధ్య నిర్వహించాలని నిర్ణయించినట్లు కేంద్ర మానవ వనరుల అభివృద్ధి శాఖ మంత్రి రమేష్‌ పోఖ్రియాల్‌ తెలిపారు. 12వ తరగతి పరీక్షలు దేశవ్యాప్తంగా, 10వ తరగతి పరీక్షలు ఈశాన్య దిల్లీ వరకే ఉంటాయన్నారు. కేవలం మిగిలిపోయిన పేపర్లకు మాత్రమే పరీక్షలు ఉంటాయని, ఇప్పటికే అయిపోయిన వాటికి ఉండవని ఆయన స్పష్టంచేశారు.
అక్టోబరు నుంచి ఐఐటీ, ఎన్‌ఐటీ తరగతులు!
* ఈసారి రెండు నెలలు ఆలస్యంగా విద్యా సంవత్సరం
ఈనాడు, హైదరాబాద్‌: వచ్చే విద్యా సంవత్సరం ఐఐటీలు, ఎన్‌ఐటీలు, ట్రిపుల్‌ఐటీల్లో తరగతులు ఆలస్యంగా ప్రారంభం కానున్నాయి. ప్రతిఏటా జులై నెలాఖరులో తరగతులు మొదలవుతాయి. వచ్చే ఏడాది మాత్రం రెండు నెలలు ఆలస్యంగా విద్యా సంవత్సరం ప్రారంభం కానుంది. ఆగస్టు 23న అడ్వాన్స్‌డ్‌ పరీక్ష నిర్వహించాలని కేంద్ర ప్రభుత్వం నిర్ణయించింది. సత్వరంగా ఫలితాలు వెల్లడించినా కనీసం 10 రోజుల సమయం పడుతుంది. ఆ తర్వాత జాయింట్‌ సీట్‌ అలకేషన్‌ అథారిటీ (జోసా) ఆధ్వర్యంలో ఏడు విడతల కౌన్సెలింగ్‌ నిర్వహించాలి. అది పూర్తయ్యేసరికి దాదాపు సెప్టెంబరు గడుస్తుంది. అంటే తరగతులు అక్టోబరు మొదటి వారంలో ప్రారంభమవుతాయి. దీనిపై ఈసారి జేఈఈ అడ్వాన్స్‌డ్‌ను నిర్వహిస్తున్న ఐఐటీ ఢిల్లీ సంచాలకుడు ఆచార్య రాంగోపాల్‌రావును సంప్రదించగా తక్కువ విడతల కౌన్సెలింగ్‌ నిర్వహిస్తే సీట్లు మిగిలిపోతాయని, అందువల్ల ఏడు విడతలు జరపాల్సి ఉంటుందన్నారు. అక్టోబరులో తరగతులు మొదలవుతాయని, ఈసారి సెలవులను బాగా కుదిస్తామన్నారు. తాము ఈసారి బీటెక్‌ మొదటి సంవత్సరం సెప్టెంబరు 7 నుంచి తరగతులు ప్రారంభించేందుకు నిర్ణయించినా.. దాన్ని మళ్లీ సవరించాల్సి ఉందని పేర్కొన్నారు.
రాష్ట్రంలో ముందుగానే ఎంసెట్‌ కౌన్సెలింగ్
అఖిల భారత సాంకేతిక విద్యామండలి (ఏఐసీటీఈ) మాత్రం సెప్టెంబరు 1 నుంచి కొత్త విద్యా సంవత్సరం ప్రారంభించాలని ఆదేశించింది. అంటే ఆగస్టులో కౌన్సెలింగ్‌ పూర్తి చేయాలి. దీనివల్ల ఐఐటీలు, ఎన్‌ఐటీల్లో సీట్లు పొందే విద్యార్థులు రాష్ట్రంలోని జేఎన్‌టీయూహెచ్‌, ఓయూ ఇంజినీరింగ్‌ కళాశాలలతో పాటు ఇతర ప్రముఖ ప్రైవేటు కళాశాలల్లో ఎంసెట్‌ కౌన్సెలింగ్‌ ద్వారా సీట్లు పొందుతారు. సెప్టెంబరులో జోసా కౌన్సెలింగ్‌ నిర్వహిస్తే.. ఇక్కడ సీట్లు ఖాళీ చేసి వెళ్లిపోతారు. ప్రైవేటు కళాశాలల్లో సీట్లు ఖాళీ అయినా స్పాట్‌ ప్రవేశాల్లో భర్తీ చేసుకుంటారు. ప్రభుత్వ కళాశాలల్లో మాత్రం అది సాధ్యం కాదు. స్పాట్‌ ద్వారా భర్తీ చేస్తే చివరి ర్యాంకు సాధించిన విద్యార్థులు చేరతారు. ఒక కోర్సు నుంచి మరో కోర్సులో చేరే స్లైడింగ్‌ అవకాశం ఇస్తే కొన్ని కోర్సుల్లో అధిక శాతం సీట్లు మిగిలిపోయే అవకాశం మెండుగా ఉంది. దీనిపై రాష్ట్ర ఉన్నత విద్యామండలి ఛైర్మన్‌ పాపిరెడ్డి మాట్లాడుతూ ఈ సమస్యకు ఈసారి పరిష్కారం ఆలోచించాల్సి ఉంటుందన్నారు. ఐఐటీలు, ఎన్‌ఐటీల్లో సుమారు 2,500-3000 మంది రాష్ట్ర విద్యార్థులకు సీట్లు దక్కుతాయన్నారు. వారి కోసం రాష్ట్రంలో ఎంసెట్‌ కౌన్సెలింగ్‌ను జోసా తర్వాత నిర్వహించడం వీలుకాదని స్పష్టం చేశారు.
రెండు రాష్ట్రాల్లో ఇంట‌ర్ ప‌రీక్ష‌ల మూల్యాంక‌నం
* వెల్లడించిన‌ ఏపీ, తెలంగాణ విద్యాశాఖ మంత్రులు
రెండు తెలుగు రాష్రాల్లో ఇంట‌ర్ మూల్యాంకన ప్ర‌క్రియ‌ను ప్రారంభిస్తున్న‌ట్లు ఆయా రాష్ట్రాల విద్యాశాఖ మంత్రులు తెలిపారు. తెలంగాణ‌లో మే 12 నుంచి, ఏపీలో మే 11 నుంచి ఈ ప్ర‌క్రియ‌ను ప్రారంభించ‌నున్న‌ట్లు వెల్లడించారు.
ఆరెంజ్‌, గ్రీన్ జోన్ల‌లో మూల్యాంక‌నం: ఏపీ విద్యాశాఖ మంత్రి
రాష్ట్రంలో ఇంటర్మీడియట్ పరీక్షల మూల్యాంకన ప్రక్రియను మే 11 నుంచి ప్రారంభించనున్నట్లు రాష్ట్ర విద్యాశాఖ మంత్రి ఆదిమూలపు సురేశ్ తెలిపారు. ముందుగా ఆరెంజ్, గ్రీన్ జోన్లలో మూల్యాంకనం చేప‌డ‌తామ‌ని వెల్ల‌డించారు. లాక్‌డౌన్ ముగిసిన అనంతరం రెడ్‌జోన్లలో మూల్యాంకన ప్రక్రియ ఉంటుంద‌న్నారు.
జూన్ రెండో వారంలో ఫలితాలు: సబిత
తెలంగాణలో ఇంటర్మీడియట్ పరీక్షా ఫలితాలను జూన్‌రెండో వారంలో ప్రకటిస్తామని రాష్ట్ర విద్యాశాఖ మంత్రి సబితా ఇంద్రారెడ్డి స్పష్టం చేశారు. జవాబు పత్రాల కోడింగ్ మే 7న మొదలైందని.. మే 12 నుంచి మూల్యాంకనం ప్రక్రియ చేపట్టనున్నట్లు ఆమె వెల్లడించారు. పదో తరగతి పరీక్షలు, ఇంటర్ మూల్యాంకనంపై అధికారులతో సమీక్షించారు. వాయిదా పడిన ఇంటర్ మోడ్రన్ ‌లాంగ్వేజెస్‌‌, జాగ్రఫీ పరీక్షలను మే 18న నిర్వహించాలని నిర్ణయించిన‌ట్లు తెలిపారు.
జూన్‌ ఆఖరులో ఇంజినీరింగ్‌ పరీక్షలు
* పరీక్ష సమయం రెండు గంటలకు కుదింపు
ఈనాడు, హైదరాబాద్‌ : జూన్‌ చివరి వారంలో ఇంజినీరింగ్‌ చివరి సంవత్సరం విద్యార్థులకు సెమిస్టర్‌ పరీక్షలు నిర్వహించాలని జేఎన్‌టీయూహెచ్‌ నిర్ణయించింది. జేఎన్‌టీయూ ఇన్‌ఛార్జి ఉపకులపతి జయేశ్‌రంజన్‌ అధ్యక్షతన వర్సిటీ పాలకమండలి (ఈసీ) సమావేశం మే 6 సాయంత్రం వీడియో కాన్ఫరెన్సు ద్వారా నిర్వహించారు. ఇన్‌ఛార్జి రిజిస్ట్రార్‌ ఎ.గోవర్ధన్‌, ఇతర పాలకమండలి సభ్యులు హాజరై యూజీసీ మార్గదర్శకాల అమలుపై చర్చించారు. చివరి ఏడాది చదువుతున్న ఇంజినీరింగ్‌ విద్యార్థులకు తొలుతగా సెమిస్టర్‌ పరీక్షలు నిర్వహించనున్నారు. అనంతరం జులై ద్వితీయార్థంలో మొదటి, రెండు, మూడు సంవత్సరాల విద్యార్థులకు సెమిస్టర్‌ పరీక్షలుంటాయి. ఇంకా పలు అంశాలపై చర్చించారు.
* సెమిస్టర్‌ ప్రశ్నపత్రంలో మార్పులు తీసుకురానున్నారు. గతంలో కచ్చితంగా రాయాల్సిన సెక్షన్‌ ప్రశ్నలకు బదులుగా పూర్తిగా చాయిస్‌ ప్రాతిపదికన ప్రశ్నలివ్వాలని నిర్ణయించారు.
* పరీక్ష సమయం 3 గంటల నుంచి 2 గంటలకు కుదించనున్నారు.
* చివరి సెమిస్టర్‌ విద్యార్థులు ప్రాజెక్టులను ఆన్‌లైన్‌ (వైవా) ద్వారా పూర్తి చేయనున్నారు. మిగిలిన సంవత్సరాల విద్యార్థులకు జులైలో కళాశాలలకు వచ్చాక ల్యాబ్‌ ఉంటుంది.
* లాక్‌డౌన్‌ అమల్లో ఉన్న కాలానికి సంబంధించి విద్యార్థులకు పూర్తి హాజరును కలపాలని పాలకమండలి నిర్ణయించింది. అంతకుముందు పనిదినాల్లో విద్యార్థులు ఎన్ని రోజులు కళాశాలకు వస్తే అంతే హాజరును పరిగణిస్తారు.
* క్రెడిట్స్‌ విషయంలో సడలింపులివ్వాలని భావిస్తున్నారు. ప్రస్తుతం మొదటి, రెండో, మూడో ఏడాది విద్యార్థులకు సబ్జెక్టులపరంగా ఎలాంటి డిటెన్షన్‌ లేకుండా మరుసటి ఏడాదికి ప్రమోట్‌ చేస్తారు. బ్యాక్‌లాగ్స్‌ ఉంటే మరుసటి ఏడాదికల్లా పూర్తి చేసుకోవాలి.
* ఇంజినీరింగ్‌ 2, 3 సంవత్సరాల తరగతులు ఆగస్టులో ప్రారంభమవుతాయి. మొదటి ఏడాదివి సెప్టెంబరులో మొదలవుతాయి.
* విద్యార్థులు చదివే కళాశాలలోనే పరీక్షలు రాసుకునేలా వెసులుబాటు కల్పించింది.
ఇంజినీరింగ్‌ కళాశాల ప్రిన్సిపల్‌గా భండారీ!
వర్సిటీలోని పలు పదవులకు నియామకాలపై పాలకమండలి చర్చించింది. జేఎన్‌టీయూ-హెచ్‌ ఇంజినీరింగ్‌ కళాశాల ప్రిన్సిపల్‌గా ఈసీఈ విభాగం ఆచార్యుడు బీఎన్‌ భండారీ నియమితులైనట్లు తెలిసింది. అకడమిక్‌ ప్ల్లానింగ్‌ డైరెక్టర్‌గా మాధవీలత (ఈసీఈ విభాగం), ఆర్‌ అండ్‌ డీ విభాగం డైరెక్టర్‌గా విజయ్‌కుమార్‌రెడ్డి (మెకానికల్‌), విదేశీ విద్యార్థుల వ్యవహారాల విభాగం డైరెక్టర్‌గా సుల్తాన్‌పూర్‌ కళాశాల ప్రిన్సిపల్‌ బాలూనాయక్‌, దూరవిద్యా విభాగం డైరెక్టర్‌గా ప్రభుకుమార్‌ నియామకాలకు పాలకమండలి అనుమతిచ్చినట్లు తెలిసింది.
ఏపీ ఎంసెట్‌ జులై 27 నుంచి
* ఈసెట్‌ 24న
* ప్రవేశ పరీక్షల తేదీలు ఖరారు
ఈనాడు, అమరావతి: రాష్ట్రంలో ప్రవేశ పరీక్షల తేదీలు ఖరారయ్యాయి. ఏపీ ఎంసెట్‌ను జులై 27 నుంచి 31 వరకు నిర్వహించనున్నట్లు ఉన్నత విద్యా మండలి కార్యదర్శి సుధీర్‌ ప్రేమ్‌కుమార్‌ తెలిపారు. ఇంజినీరింగ్‌ రెండో ఏడాదిలోకి ప్రవేశానికి నిర్వహించే ఈసెట్‌ను జులై 24న నిర్వహించనున్నారు. అన్ని ఉమ్మడి ప్రవేశ పరీక్షలకు దరఖాస్తు గడువు మే 20వరకు ఉంది. ఇప్పటి వరకు ఎంసెట్‌కు 2,48,614 దరఖాస్తులు వచ్చాయి. ఇందులో ఇంజినీరింగ్‌కు 1,69,137 మంది, వ్యవసాయ, వైద్య విద్యకు 78,959 మంది, రెండింటికీ 518 మంది దరఖాస్తు చేశారు. 3 వేల మంది రుసుము చెల్లించినా దరఖాస్తులు సమర్పించలేదు. ఇంజినీరింగ్‌ను ఎనిమిది విడతలుగా, వ్యవసాయ, వైద్య విద్య పరీక్షలను నాలుగు విడతలుగా నిర్వహించనున్నారు. ఉదయం, సాయంత్రం పరీక్షలు ఉంటాయి.
పరీక్షలు.. తేదీలు
ప్రవేశ పరీక్ష    తేదీ
ఈసెట్‌    జులై 24
ఐసెట్‌    జులై 25
ఎంసెట్‌    జులై 27-31
పీజీ ఈసెట్‌    ఆగస్టు 2-4
ఎడ్‌సెట్‌    ఆగస్టు 5
లాసెట్‌    ఆగస్టు 6
పీఈసెట్‌    ఆగస్టు 7-9
మెయిన్‌, నీట్‌ కంటే ముందుగా ఎంసెట్‌
* జూన్‌ చివర్లో లేదా జులై మొదటి వారంలో
* బయోమెట్రిక్‌కు బదులుగా వీడియో రికార్డింగ్‌పై యోచన
ఈనాడు, హైదరాబాద్‌: జేఈఈ మెయిన్‌ జులై మూడో వారంలో జరుగుతుండటంతో రాష్ట్రంలో ఎంసెట్‌ను అంతకంటే ముందుగా పూర్తి చేయాలని ఉన్నత విద్యామండలి భావిస్తోంది. జాతీయ పరీక్షల తర్వాత నిర్వహిస్తే అప్పటివరకు విద్యార్థులు సన్నద్ధమవుతూనే ఉండాల్సి ఉంటుందని.. అందుకే జూన్‌ చివర్లో లేదా జులై మొదటి వారంలో పూర్తయ్యేలా చూడాలని యోచిస్తోంది. జేఈఈ మెయిన్‌తో పాటు తెలుగు రాష్ట్రాల్లో ఆన్‌లైన్‌ ప్రవేశ పరీక్షలను నిర్వహించే టీసీఎస్‌ అయాన్‌ సంస్థ ప్రతినిధులతో త్వరలో అధికారులు చర్చించనున్నారు. కరోనా ప్రబలిన పరిస్థితుల్లో ఎంసెట్‌ లాంటి పరీక్షల నిర్వహణకు ఇబ్బంది లేదని విద్యామండలి ఛైర్మన్‌ పాపిరెడ్డి తెలిపారు. గతేడాది వరకు పరీక్ష కేంద్రాల వద్ద బయోమెట్రిక్‌ హాజరు తీసుకునేవారు. దాన్ని ఈసారి రద్దు చేస్తున్నామని అభ్యర్థుల వీడియో రికార్డింగ్‌ లేదా మరో విధానాన్ని అమలు చేస్తామన్నారు. జేఈఈ మెయిన్‌ కంటే ముందే ఎంసెట్‌ను జరపాలని భావిస్తున్నట్లు చెప్పారు.
ప్రవేశాలు ఎలా?
జేఈఈ మెయిన్‌ పరీక్షలు జులై 23వ తేదీతో ముగుస్తాయి. వాటి ఫలితాలు రావడానికి 10 రోజులు పడుతుంది. అందులో ఉత్తీర్ణులైన 2.50 లక్షల మంది మళ్లీ జేఈఈ అడ్వాన్స్‌డ్‌కు దరఖాస్తు చేసుకోవాలి. ఆ ప్రకారం ఆగస్టు 15 తర్వాతే అడ్వాన్స్‌డ్‌ జరుగుతుంది. వాటి ఫలితాలు విడుదలవ్వడానికి వారం పడుతుంది. ఆగస్టు నెలాఖరు వరకు పరీక్షలు ముగిసినా ఐఐటీ, ఎన్‌ఐటీ, ట్రిపుల్‌ ఐటీల్లో సంయుక్త కౌన్సెలింగ్‌(జోసా) జరిగేది సెప్టెంబరులోనే. మరోవైపు యూజీసీ/ఏఐసీటీఈ మార్గదర్శకాల ప్రకారం ఆయా వర్సిటీల పరిధిలో బీటెక్‌ తొలి ఏడాది తరగతులు సెప్టెంబరు 1 నుంచి మొదలు కావాల్సి ఉంది. అది జరగాలంటే జోసా కౌన్సెలింగ్‌ కంటే ముందుగా రాష్ట్రంలో ఎంసెట్‌ ఇంజినీరింగ్‌ కౌన్సెలింగ్‌ జరగాలి. అదే జరిగితే ఐఐటీ, ఎన్‌ఐటీల్లో సీట్లు దక్కే విద్యార్థులు ఎంసెట్‌ కౌన్సెలింగ్‌కు హాజరై సీట్లు పొంది రుసుములు చెల్లించాలి. తర్వాత ఐఐటీలు, ఎన్‌ఐటీల్లో సీట్లు వస్తే వెళ్లిపోవాలి. దీంతో ప్రముఖ కళాశాలల్లో సీట్లు ఖాళీగా ఉండిపోతాయి. ఇలాంటి సందిగ్ధ పరిస్థితి నెలకొంటుందని నిపుణులు చెబుతున్నారు.
సీబీఎస్‌ఈ ‘పది’ పరీక్షలు రద్దు: కేంద్ర మంత్రి ట్వీట్‌
దిల్లీ: సీబీఎస్‌ఈ విద్యార్దులకు కేంద్ర మానవ వనరుల మంత్రిత్వ శాఖ శుభవార్త తెలిపింది. దేశవ్యాప్తంగా పదో తరగతి విద్యార్ధులకు పరీక్షలు రద్దు చేస్తున్నట్లు ప్రకటించింది. ఈ మేరకు కేంద్ర మానవ వనరుల శాఖ మంత్రి రమేష్‌ పోఖ్రియాల్‌ ట్వీట్‌ చేశారు. ఈ రోజు విద్యార్ధులతో వీడియో మాధ్యమం ద్వారా మాట్లాడిన కేంద్ర మంత్రి.. పరీక్షల రద్దు విషయాన్ని తెలియజేశారు. అయితే నార్త్‌ - ఈస్ట్ దిల్లీ విద్యార్ధులకు మాత్రం ఈ మినహాయింపు వర్తించదు. వీరికి పరీక్ష నిర్వహించే ముందు పది రోజుల గడువు ఇస్తామని కేంద్రమంత్రి ట్వీట్‌ చేశారు.
తెలంగాణలో పరీక్షలు లేకుండానే పైతరగతులకు
హైదరాబాద్‌: కరోనా వైరస్‌ కట్టడిలో భాగంగా లాక్‌డౌన్‌ అమల్లోకి రావడంతో విద్యా సంవత్సరం ముగియకుండానే రాష్ట్రంలోని పాఠశాలలు మూతపడిన విషయం తెలిసిందే. తాజాగా తెలంగాణలోని ప్రభుత్వ, ప్రైవేట్‌ పాఠశాలల్లో 1 నుంచి 9వ తరగతి వరకు చదువుతున్న విద్యార్థులను ప్రభుత్వం తదుపరి తరగతులకు ప్రమోట్‌ చేసింది. పరీక్షలు లేకుండానే విద్యార్థులను పై తరగతులకు ప్రమోట్‌ చేస్తూ రాష్ట్ర విద్యాశాఖ ఉత్తర్వుల జారీ చేసింది. గత మంత్రివర్గ సమావేశంలో మంత్రిమండలి తీసుకున్న నిర్ణయం మేరకు విద్యార్థులను ప్రమోట్‌ చేస్తూ ఉత్తర్వుల జారీ చేసినట్లు విద్యా శాఖ ప్రకటనలో పేర్కొంది.
జేఈఈ, నీట్ ‌పరీక్షల తేదీలు ఖరారు
దిల్లీ: ఇంజినీరింగ్‌, మెడికల్ కళాశాల్లో ప్రవేశాల కోసం జాతీయ స్థాయిలో నిర్వహించే జేఈఈ, నీట్ పరీక్షలకు సంబంధించిన తేదీలు ఖరారయ్యాయి. జులై 18-23 మధ్య జేఈఈ(మెయిన్స్‌)‌, జులై 26న నీట్‌, ఆగస్టులో జేఈఈ అడ్వాన్స్‌డ్ ‌పరీక్షలు నిర్వహించనున్నట్లు కేంద్ర మానవ వనరుల శాఖ మంత్రి రమేశ్ పోఖ్రియాల్ తెలిపారు. ఇక వాయిదా పడిన సీబీఎస్‌ఈ 10, 12వ తరగతి బోర్డు పరీక్షల తేదీలపై త్వరలో నిర్ణయం తీసుకుంటామ‌న్నారు.
కరోనా వైరస్‌వ్యాప్తి నేపథ్యంలో విధించిన లాక్‌డౌన్‌కారణంగా వివిధ పరీక్షలు వాయిదా పడ్డ విషయం తెలిసిందే. దీంతో పరీక్షల తేదీల విషయంలో విద్యార్థుల్లో ఆందోళన నెలకొంది. వాస్తవానికి ఏప్రిల్‌లో జేఈఈ మెయిన్స్‌, మే నెలలో నీట్‌జరగాల్సి ఉండగా.. లాక్‌డౌన్‌నేపథ్యంలో వాయిదా పడ్డాయి.
సివిల్స్‌ ప్రాథమిక పరీక్ష వాయిదా
* 20న కొత్త తేదీలను ప్రకటిస్తామన్న యూపీఎస్‌సీ
ఈనాడు, హైదరాబాద్‌: సివిల్స్‌ ప్రాథమిక పరీక్ష మే 31వ తేదీన జరుగుతుందా? అన్న దానిపై ఉత్కంఠ వీడింది. పరీక్షను వాయిదా వేస్తున్నట్లు యూపీఎస్‌సీ మే 4న‌ ప్రకటించింది. లాక్‌డౌన్‌ కొనసాగుతున్నందున దానిపై మే 3వ తేదీ తర్వాత పరిస్థితిని సమీక్షించి స్పష్టత ఇస్తామని ఏప్రిల్‌ 15న యూపీఎస్‌సీ ప్రకటించింది. దీనిపై మే 4న‌ సమీక్షించిన అధికారులు పరీక్షను వాయిదా వేశారు. కేంద్ర ప్రభుత్వం మళ్లీ లాక్‌డౌన్‌ను ఏప్రిల్‌ 17 వరకు పొడిగించిన నేపథ్యంలో 20న పరిస్థితిని సమీక్షించి కొత్త తేదీలను వెబ్‌సైట్లో ఉంచుతామని వెల్లడించింది. సివిల్స్‌ ప్రాథమిక పరీక్షలో ఉత్తీర్ణులైన వారే ఇండియన్‌ ఫారెస్టు సర్వీస్‌ ప్రధాన పరీక్షకు అర్హత సాధిస్తారు. దాంతో ఆ పరీక్షను కూడా వాయిదా వేసింది. పరీక్ష జరిగే తేదీకి కనీసం 30 రోజులు ముందుగా కొత్త తేదీలు ప్రకటించి విద్యార్థులకు తెలియజేస్తామని యూపీఎస్‌సీ పేర్కొంది. కరోనా కారణంగా ఇప్పటికే సివిల్స్‌ ముఖాముఖీలతో పాటు ఇండియన్‌ ఎకనామిక్‌ సర్వీస్‌/ ఇండియన్‌ స్టాటిస్టికల్‌ సర్వీస్, కంబైన్డ్‌ మెడికల్‌ సర్వీసెస్, సెంట్రల్‌ ఆర్ముడ్‌ పోలీస్‌ ఫోర్సెస్‌ నోటిఫికేషన్ల విడుదలను వాయిదా వేశారు.
PRESS RELEASE
రోజుకు 2-3 విడతల్లో పరీక్షలు
* పరీక్ష సమయం 2 గంటలకు కుదించనున్న జేఎన్‌టీయూహెచ్‌
* 6న పాలకమండలి సమావేశంలో తుది నిర్ణయం
ఈనాడు, హైదరాబాద్‌: కరోనా నేపథ్యంలో పరీక్షల నిర్వహణ సందర్భంగా వ్యక్తిగత దూరం కచ్చితంగా పాటించాల్సి ఉండటంతో పరీక్ష సమయాన్ని మూడు గంటల నుంచి 2 గంటలకు కుదించాలని జేఎన్‌టీయూహెచ్‌ భావిస్తోంది. ఇలా పరీక్ష సమయాన్ని తగ్గించడం వల్ల రోజుకు 2 లేదా 3 విడతల్లో పరీక్షలు జరపవచ్చని యోచిస్తోంది. పరీక్షల నిర్వహణపై యూజీసీ మార్గదర్శకాలు జారీ చేసిన నేపథ్యంలో దీనిపై అకడమిక్‌ సెనేట్‌లో వర్సిటీ ఇన్‌ఛార్జి ఉపకులపతి జయేశ్‌రంజన్‌, ఇతర అధికారులు చర్చించారు. ఈ సారి విద్యార్థులకు ఇబ్బందుల్లేకుండా పరీక్షలు నిర్వహించాలని, యూజీసీ సూచనల ప్రకారమే సడలింపులు ఇవ్వాలనే అంశాలు ప్రస్తావనకు వచ్చాయి. ప్రశ్నపత్రంలోనూ ఛాయిస్‌ పెంచాలని భావిస్తున్నారు. ఇక ఒక ఏడాది నుంచి మరో ఏడాదికి పదోన్నతి విషయంలో కనీస క్రెడిట్ల నిబంధన అమలు చేయరాదన్న దానిపై దాదాపు నిర్ణయం తీసుకున్నారు. అంటే ఈ దఫా డిటెన్షన్‌ విధానం ఉండదు. పరీక్షల్లో తప్పినా విద్యార్థులు పైతరగతిలోకి ప్రవేశించవచ్చు. మొత్తానికి జూన్‌ చివరి వారం నుంచి పరీక్షలు ప్రారంభించాలని అంచనాకు వచ్చారు. మే 6వ తేదీన పాలకమండలి సమావేశంలో చర్చించి తుది నిర్ణయం తీసుకుంటారు.
జేఈఈ, నీట్‌ ప్రవేశ పరీక్షల తేదీలపై 5న ప్రకటన
దిల్లీ: ఇంజినీరింగ్‌, మెడికల్‌ కళాశాల్లో ప్రవేశాలకు కోసం జాతీయ స్థాయిలో నిర్వహించే జేఈఈ, నీట్‌ పరీక్షలకు సంబంధించిన తేదీలు త్వరలోనే వెలువడనున్నాయి. మే 5న పరీక్షల తేదీలను కేంద్ర మానవ వనరుల శాఖ మంత్రి రమేష్‌ పోఖ్రియాల్‌ వెల్లడించనున్నారు. అదే రోజున విద్యార్థులతో మంత్రి ఆన్‌లైన్‌లో మాట్లాడనున్నారని ఓ సీనియర్‌ అధికారి వెల్లడించారు. కరోనా కారణంగా విధించిన లాక్‌డౌన్‌ కారణంగా ఈ రెండు పరీక్షలూ వాయిదా పడ్డాయి. దీంతో పరీక్షల తేదీల విషయంలో విద్యార్థుల్లో ఆందోళన నెలకొంది. వాస్తవానికి ఏప్రిల్‌లో జేఈఈ మెయిన్స్‌, మే నెలలో నీట్‌ జరగాల్సి ఉంది.
జూన్‌ 20 నుంచే డిగ్రీ చివరి సెమిస్టర్‌ పరీక్షలు!
ఈనాడు, హైదరాబాద్‌: డిగ్రీ చివరి సంవత్సరం చివరి సెమిస్టర్‌ పరీక్షలు జూన్‌ 20 లేదా 22 నుంచి నిర్వహించాలని రాష్ట్ర ఉన్నత విద్యామండలి, విశ్వవిద్యాలయాలు ప్రాథమికంగా ఓ నిర్ణయానికి వచ్చాయి. పరీక్షల నిర్వహణపై యూజీసీ మార్గదర్శకాలు జారీ చేసిన నేపథ్యంలో రాష్ట్ర ఉన్నత విద్యామండలి ఛైర్మన్‌ పాపిరెడ్డి, ఉపాధ్యక్షులు లింబాద్రి, వెంకటరమణ మే 2న ఓయూ, కాకతీయ, తెలంగాణ, పాలమూరు, మహాత్మాగాంధీ, శాతవాహన విశ్వవిద్యాలయాల రిజిస్ట్రార్లతో వీడియో కాన్ఫరెన్స్‌ నిర్వహించారు. డిగ్రీ చివరి సెమిస్టర్‌ పరీక్షలను జులై 1 నుంచి 15 వరకు జరుపుకోవాలని యూజీసీ ఇటీవల సూచించింది. 15 రోజుల్లో పూర్తి కావడం కష్టమని, ఐచ్ఛిక సబ్జెక్టులు ఎక్కువగా ఉంటాయని, మూల్యాంకనమూ సమస్య అవుతుందని భావించి.. సుమారు 10 రోజులు ముందుగా పరీక్షలు ప్రారంభించాలన్న అంశంపై ఏకాభిప్రాయం వ్యక్తమైంది. యూజీసీ సూచించిన పరీక్ష సమయం 2 గంటలకు కుదింపు, ప్రశ్నపత్రం విధానంలో మార్పులు, ఛాయిస్‌ పెంచడం, వ్యక్తిగత దూరం పాటించడంపై రిజిస్ట్రార్ల అభిప్రాయాలను తెలుసుకున్నారు. వారంలోగా నివేదిక ఇవ్వాలని వారికి పాపిరెడ్డి సూచించారు.
ఆన్‌లైన్‌లో ఇంటర్‌ పాఠాలు
* జూన్‌ నుంచి అందుబాటులోకి
ఈనాడు, అమరావతి: కరోనా వైరస్‌ వ్యాప్తి కారణంగా వచ్చే విద్యా సంవత్సరం ప్రారంభం ఆలస్యమైతే ఆన్‌లైన్‌ తరగతులు నిర్వహించేందుకు ఇంటర్మీడియట్‌ విద్యాశాఖ సన్నద్ధమవుతోంది. ఇంటర్‌ మొదటి, రెండో ఏడాది మొత్తం పాఠాలను నిపుణులైన లెక్చరర్లతో వీడియో రికార్డు చేయించనున్నారు. రికార్డు చేసిన వీడియోలను వెబ్‌సైట్‌లో అందుబాటులో ఉంచుతారు. వీటిని ప్రైవేటు, ప్రభుత్వ జూనియర్‌ కళాశాలల్లో చదువుతున్న విద్యార్థులంతా వినియోగించుకోవచ్చు. జూన్‌ నుంచి ఆన్‌లైన్‌ వీడియోలు అందుబాటులోకి రానున్నాయి. విద్యార్థులకు ఏదైనా పాఠం అర్థం కాకపోయినా, రెడ్‌జోన్‌లో ఉండి తరగతులకు హాజరుకాలేని వారు సైతం వాటిని వినియోగించుకోవచ్చు.
రూపకల్పన ఇలా..
* ఒక పాఠంపై ముగ్గురు, నలుగురు లెక్చరర్ల నుంచి పాఠ్యాంశాలు(కంటెంట్‌)ను స్వీకరిస్తారు. ఎంపికైన వారి నుంచి ఆ పాఠం వీడియో రికార్డు చేస్తారు.
* తరగతిలో చెప్పే దానికి భిన్నంగా విద్యార్థులకు తేలికగా అర్థమయ్యేందుకు పాఠ్యాంశానికి అవసరమైన వీడియోలను జత చేస్తారు.
* ఇంటర్‌ అకడమిక్‌ జూన్‌ నుంచి ప్రారంభమవుతుంది. ఆ నెలకు సంబంధించి ఒక్కో సబ్జెక్టు నుంచి మూడు పాఠాలు అవసరం కానున్నాయి. ముందుగా వాటిని పూర్తి చేస్తారు.
* ఇంటర్‌ మొదటి ఏడాది ప్రవేశాలు జాప్యం కానున్నందున ముందుగా రెండో ఏడాది పాఠ్యాంశాలకు ప్రాధాన్యం ఇవ్వనున్నారు.
ఇంజినీరింగ్‌ కళాశాలలకు జూన్‌ 15 నాటికి అనుమతులు: ఏఐసీటీఈ
ఈనాడు, హైదరాబాద్‌: లాక్‌డౌన్‌ నేపథ్యంలో వచ్చే విద్యా సంవత్సరానికి సంబంధించి ఇంజినీరింగ్‌ కళాశాలలకు అనుమతుల జారీ ఆలస్యం కానుంది. ఈసారి జూన్‌ 15వ తేదీ నాటికి ఇంజినీరింగ్‌, ఇతర వృత్తి విద్యా కళాశాలలకు అనుమతులు ఇస్తామని అఖిల భారత సాంకేతిక విద్యామండలి(ఏఐసీటీఈ) తెలిపింది. ఈ మేరకు అన్ని వర్సిటీలు, కళాశాలలకు సమాచారం ఇచ్చింది. సుప్రీంకోర్టు తీర్పు ప్రకారం ఏప్రిల్‌ 30వ తేదీలోపు అనుమతులు ఇవ్వాలి. కానీ ప్రస్తుతం నెలకొన్న పరిస్థితుల నేపథ్యంలో సుప్రీంకోర్టు అనుమతి తీసుకుంటామని మండలి తెలిపింది. గత విద్యా సంవత్సరం మాదిరిగానే ఎలాంటి మార్పులు లేకుండా అనుమతి కావాలని దరఖాస్తు చేసుకున్న వాటికి మాత్రం వెంటనే అనుమతులు జారీ చేస్తామని పేర్కొంది. వాస్తవానికి ఏఐసీటీఈ అనుమతులు వచ్చిన తర్వాతే విశ్వవిద్యాలయాలు ఆయా కళాశాలలను తనిఖీ చేయాల్సి ఉంటుంది. దాంతో ఆ తనిఖీలు కూడా ఆలస్యం కానున్నాయి.
ఉచిత ఆన్‌లైన్‌ గేట్‌ కోచింగ్‌ 11 నుంచి
* మే 7వరకు రిజిస్ట్రేషన్‌కు అవకాశం
* మంత్రి ఆదిమూలపు సురేష్‌
ఈనాడు, అమరావతి: లాక్‌డౌన్‌తో ఇంటికే పరిమితమైన విద్యార్థులకు మే 11 నుంచి ఉచితంగా ఆన్‌లైన్‌ గేట్‌ కోచింగ్‌ ఇవ్వనున్నట్లు విద్యాశాఖ మంత్రి ఆదిమూలపు సురేష్‌ తెలిపారు. జవహర్‌లాల్‌ నెహ్రూ విశ్వవిద్యాలయం అనంతపురం, కాకినాడ, యోగి వేమన వర్సిటీ సంయుక్తంగా కోచింగ్‌ నిర్వహిస్తున్నాయని, విద్యార్థులు ఏడో తేదీలోపు ఆన్‌లైన్‌లో రిజిస్ట్రేషన్‌ చేసుకోవాలని సూచించారు.
* రోజూ రెండు సబ్జెక్టులపై ఆన్‌లైన్‌లో బోధిస్తారు.
* 12రోజులపాటు ఆన్‌లైన్‌ బోధన నిర్వహిస్తారు. ప్రతి సెషన్‌ రెండు గంటలపాటు ఉంటుంది.
* విద్యార్థుల హాజరును ఆన్‌లైన్‌లోనే నమోదు చేస్తారు.
* ఆసక్తి ఉన్న విద్యార్థులు వెబ్‌సైట్‌లో రిజిస్ట్రేషన్‌ చేసుకోవాలి.
* సబ్జెక్టులు, సబ్జెక్టులవారీగా అధ్యాపకుల వివరాలను వెబ్‌సైట్‌ నుంచి డౌన్‌లోడ్‌ చేసుకోవచ్చు.
* రిజిస్ట్రేషన్‌ చేసుకున్న వారికి తరగతుల నిర్వహణపై ఈ-మెయిల్‌ ద్వారా సమాచారం అందిస్తారు.
Website
తెలంగాణలో ప్రవేశ పరీక్షల దరఖాస్తు గడువు పెంపు
హైదరాబాద్‌: తెలంగాణలో ప్రవేశ పరీక్షల దరఖాస్తుల స్వీకరణ గడువును రాష్ట్ర ఉన్నత విద్యామండలి పొడిగించింది. ఆలస్య రుసుం లేకుండా మే 15 వరకు దరఖాస్తులు చేసుకోవచ్చని తెలిపింది. ఎంసెట్‌, ఐసెట్‌, ఈసెట్‌, ఎడ్‌సెట్‌లతో పాటు పీజీఈసెట్‌, పీఈసెట్‌, లాసెట్‌, పీజీఎల్‌ సెట్‌ దరఖాస్తుల గడువును పెంచుతున్నట్టు వెల్లడించింది.
జాతీయ ప్రవేశ పరీక్షల దరఖాస్తు గడువు పెంపు
జాతీయ స్థాయిలో జరిగే అయిదు ప్రవేశ పరీక్షలకు హాజరయ్యే విద్యార్థులు దరఖాస్తు చేసుకునే గడువును పొడిగిస్తూ జాతీయ పరీక్షల మండలి(ఎన్‌టీఏ) ఏప్రిల్ 30న‌ నిర్ణయం తీసుకుంది. కరోనా నేపథ్యంలో ఆన్‌లైన్‌లో దరఖాస్తు గడువును మరోసారి పెంచినట్లు తెలిపింది. నేషనల్‌ కౌన్సిల్‌ ఫర్‌ హోటల్‌ మేనేజ్‌మెంట్‌(ఎన్‌సీహెచ్‌ఎం) జేఈఈ, ఇందిరాగాంధీ జాతీయ సార్వత్రిక విశ్వవిద్యాలయం(ఇగ్నో) ప్రవేశ పరీక్ష(పీహెచ్‌డీ, ఎంబీఏ కోసం), భారత వ్యవసాయ పరిశోధన మండలి(ఐసీఏఆర్‌), జవహర్‌లాల్‌ నెహ్రూ విశ్వవిద్యాలయం ప్రవేశ పరీక్ష(జేఎన్‌యూఈఈ)లకు దరఖాస్తు గడువు ఏప్రిల్‌ 30తో ముగిసిన నేపథ్యంలో మే 15 వరకు పెంచారు. అఖిల భారత ఆయుష్‌ పీజీ ప్రవేశ పరీక్ష(ఏఐఏపీజీఈటీ) గడువు మే 31వ తేదీతో ముగుస్తుంది. దానికి కూడా జూన్‌ 5 వరకు పొడిగించారు.
ఉపాధ్యాయ అర్హత పరీక్షకు దస్త్రం సిద్ధం!
* టెట్, డీఎస్సీ విడివిడిగానే నిర్వహణ
* డీఎస్సీ-18 పోస్టుల భర్తీ తర్వాతే కొత్త నియామకాల ప్రకటన
ఈనాడు, అమరావతి: డీఎస్సీకి ముందు ఉపాధ్యాయ అర్హత పరీక్ష(టెట్‌) నిర్వహించేందుకు పాఠశాల విద్యాశాఖ దస్త్రం సిద్ధం చేసింది. ఉపాధ్యాయ నియామక పరీక్ష(టీఆర్‌టీ), టెట్‌ను విడివిడిగా నిర్వహించాలని నిర్ణయించింది. డీఎస్సీ-2018 పోస్టుల భర్తీ పెండింగ్‌లో ఉన్నందున ఆ నియామక ప్రక్రియ అయ్యేలోపు టెట్‌ పూర్తిచేయాలని భావిస్తున్నారు. ఏటా రెండు పర్యాయాలు టెట్‌ నిర్వహించాల్సి ఉండగా గత డీఎస్సీతోపాటే నిర్వహించారు. ప్రస్తుతం లాక్‌డౌన్‌ కొనసాగుతుండడంతో నిర్ణీత తేదీలను ప్రకటించకుండానే నిర్వహణకు దస్త్రాన్ని సిద్ధం చేశారు. ప్రభుత్వం నుంచి అనుమతి వచ్చిన తర్వాత షెడ్యూల్‌ను నిర్ణయిస్తారు. ఈ ఏడాదీ పరీక్షను ఆన్‌లైన్‌లోనే నిర్వహించాలని భావిస్తున్నారు. గతంలోనే టెట్‌ను ఆన్‌లైన్‌ చేస్తూ ప్రభుత్వం ఉత్తర్వులు జారీ చేసిన విషయం గమనార్హం.
లెక్కతేలని ఖాళీలు..
రాష్ట్ర ప్రభుత్వం జనవరిలో ఉద్యోగ నియామకాల కేలండర్‌ను సిద్ధం చేయాలని చెప్పడంతో పాఠశాల విద్యాశాఖ ఖాళీలను సేకరించింది. ఈ జాబితాను ప్రభుత్వానికి సమర్పించింది. ఆర్థిక శాఖ అనుమతి లభించినప్పటికీ ఖాళీలపై ప్రభుత్వం నుంచి ఇంకా ఆమోదం లభించలేదు. అధికారుల లెక్కల ప్రకారం సుమారు 8వేల పోస్టులకు డీఎస్సీ ప్రకటన వచ్చే అవకాశం ఉంది. ఇందులో స్కూల్‌ అసిస్టెంట్లు 3వేలు, టీజీటీ, పీజీటీలు 300, మిగతావి ఎస్జీటీ పోస్టులు ఉండనున్నాయి.
పెండింగ్‌ పోస్టులు ఇచ్చాకే..
డీఎస్సీ-2018 పెండింగ్‌ పోస్టులను భర్తీ చేసిన తర్వాతనే కొత్త డీఎస్సీ నిర్వహించాలని అధికారులు భావిస్తున్నారు. న్యాయ వివాదాలతో ఎస్జీటీ-2,278, పీఈటీ-340, భాషాపండితులు-248, ఆదర్శపాఠశాలల ప్రిన్సిపాళ్లు-77, బీసీ రెసిడెన్షియల్‌ సంక్షేమ పాఠశాలల ప్రిన్సిపాళ్లు-12 పోస్టులు భర్తీ కాలేదు. ఎలాంటి వివాదాలు లేని మ్యూజిక్‌ టీచర్‌ పోస్టులు-59 పెండింగ్‌లో ఉన్నాయి.
లాక్‌డౌన్‌ ముగిసిన రెండు వారాలకు పది పరీక్షలు
* త్వరలో షెడ్యూల్‌ విడుదల
* వ్యక్తిగత దూరం, మాస్కులతో నిర్వహణ
* కేంద్రమంత్రితో వీడియో కాన్ఫరెన్సులో మంత్రి సురేష్‌
ఈనాడు, అమరావతి: లాక్‌డౌన్‌ ముగిసిన రెండు వారాల తర్వాత పదో తరగతి పరీక్షలు నిర్వహించనున్నట్లు విద్యాశాఖ మంత్రి ఆదిమూలపు సురేష్‌ తెలిపారు. త్వరలో పరీక్షల షెడ్యూల్‌ విడుదల చేయనున్నట్లు వెల్లడించారు. వ్యక్తిగత దూరం పాటిస్తూ, మాస్కులు ధరించి పరీక్షలు నిర్వహించే అంశంపై దృష్టి సారించినట్లు తెలిపారు. విద్యాశాఖ మంత్రులతో కేంద్ర మానవ వనరుల అభివృద్ధి శాఖ మంత్రి రమేష్‌ పోఖ్రియాల్‌ నిశాంక్‌ నిర్వహించిన వీడియో కాన్ఫరెన్సులో ఆయన పాల్గొన్నారు. వేసవిలోనూ మధ్యాహ్న భోజన పథకం అమలు చేయాలని నిర్ణయించినట్లు తెలిపారు. రాష్ట్రానికి మరిన్ని కస్తూర్బాగాంధీ బాలికల విద్యాలయాలు, ఆదర్శ పాఠశాలలు మంజూరు చేయాలని విన్నవించారు. రాష్ట్రంలో రేడియో, దూరదర్శన్‌ ద్వారా తరగతులు నిర్వహిస్తున్నామని తెలిపారు. సమగ్ర శిక్ష అభియాన్‌ కింద విడుదల చేయాల్సిన రూ.606 కోట్లు మంజూరు చేయాలని కోరారు. కేంద్ర ప్రభుత్వ యాప్‌లతో డిజిటల్, ఆన్‌లైన్‌ తరగతులు వినియోగించాలని కేంద్రమంత్రి సూచించారు.
జూన్‌లో జేఈఈ మెయిన్‌.. జులైలో అడ్వాన్స్‌డ్‌
* సెప్టెంబర్‌లో తరగతుల ప్రారంభం
ఈనాడు, హైదరాబాద్‌: ఎన్‌ఐటీల్లో ప్రవేశాలకు నిర్వహించే జేఈఈ మెయిన్‌ను జూన్‌ 3వ వారంలో, ఐఐటీల్లో ప్రవేశాల కోసం నిర్వహించే జేఈఈ అడ్వాన్స్‌డ్‌ను జులై రెండో వారంలో నిర్వహించాలని కేంద్ర ప్రభుత్వ వర్గాలు భావిస్తున్నాయి. జేఈఈ మెయిన్‌ను జూన్‌ 20- 22వ తేదీకి పూర్తి చేయాలని ప్రణాళిక రూపొందిస్తున్నారు. అందులో కటాఫ్‌ మార్కుల ఆధారంగా రెండున్నర లక్షల మందికి జేఈఈ అడ్వాన్స్‌డ్‌ పరీక్ష రాసేందుకు అవకాశం కల్పిస్తారు. ఆ పరీక్షను జులై 12న(ఆదివారం) నిర్వహించాలని ప్రాథమికంగా నిర్ణయించినట్లు సమాచారం.
ఆన్‌లైన్‌లోనే ధ్రువపత్రాల పరిశీలన
విద్యార్థులు తమ ధ్రువపత్రాల పరిశీలనకు ఆయా కేంద్రాలకు రాకుండా ఆన్‌లైన్‌లోనే జరిపేలా అధికారులు సన్నాహాలు చేస్తున్నారు. దాంతో విద్యార్థులు గుమికూడకుండా నిరోధించవచ్చు. ప్రస్తుతం జాయింట్‌ సీట్‌ అలకేషన్‌ అథారిటీ(జోసా) అధికారులు అయిదారు రౌండ్లు కౌన్సెలింగ్‌ చేస్తున్నారు. వాటిని తగ్గించే అవకాశం ఉన్నట్లు తెలుస్తోంది. ఐఐటీల్లో బీటెక్‌ మొదటి సంవత్సరం తరగతులు సెప్టెంబరులో ప్రారంభం కానున్నాయి. ఎక్కువగా మొదటి, రెండు వారాల్లో ప్రారంభమవుతాయి. ఐఐటీ ఢిల్లీలో సెప్టెంబరు 7 నుంచి తరగతులను ప్రారంభించాలని నిర్ణయించినట్లు జేఈఈ అడ్వాన్స్‌డ్‌ కార్య నిర్వాహక ఛైర్మన్‌ ఆచార్య సిద్ధార్థ పాండే తెలిపారు. జేఈఈ మెయిన్, అడ్వాన్స్‌డ్‌ పరీక్షల తేదీలను ఇంకా నిర్ణయించలేదని ఆయన చెప్పారు. విదేశీ విద్యార్థులకు బీటెక్‌లో 10 శాతం సీట్లను సూపర్‌న్యూమరీ కింద కేటాయిస్తారు. ఇతర దేశాల్లోనూ కరోనా వైరస్‌ ప్రభావం ఉన్నందున దాన్ని దృష్టిలో పెట్టుకొని తరగతుల ప్రారంభం తేదీలను నిర్ణయించనున్నారు.
విద్యార్థుల తల్లిదండ్రులతో 27న కేంద్ర మంత్రి వెబినార్‌
ఈనాడు, దిల్లీ: విద్యార్థుల తల్లిదండ్రుల కోసం కేంద్ర మానవ వనరుల అభివృద్ధిశాఖ (హెచ్‌ఆర్‌డీ) మంత్రి రమేశ్‌ నిశాంక్‌ పోఖ్రియాల్ ఏప్రిల్ 27న‌ వెబినార్‌ (ఇంటర్‌నెట్‌ ద్వారా నిర్వహించే సదస్సు) నిర్వహించనున్నట్లు ఆ శాఖ ఏప్రిల్ 26న‌ తెలిపింది. ప్రస్తుత పరిస్థితుల నేపథ్యంలో విద్యార్థుల తల్లిదండ్రులకు అనేక సందేహాలు ఉన్నందున, నివృత్తి కోసం 27 మధ్యాహ్నం 1 గంటకు వెబినార్‌ నిర్వహిస్తున్నట్లు కేంద్రమంత్రి పోఖ్రియాల్‌ కూడా ట్వీట్‌ చేశారు. తల్లిదండ్రులు educationministergoesliveలో లేదా మంత్రిత్వశాఖ ట్విటర్‌లోగానీ సూచనలు చేయాలని కేంద్రమంత్రి కోరారు.
డిగ్రీ ప్రశ్నపత్రాల్లో మరింత చాయిస్‌
* వర్సిటీలకే స్వేచ్ఛ ఇవ్వాలని విద్యామండలి యోచన
ఈనాడు, హైదరాబాద్‌: కరోనా కారణంగా విద్యార్థులు తరగతులను నష్టపోయినందున డిగ్రీ పరీక్షల్లో మరింత చాయిస్‌ ఇవ్వాలని తెలంగాణ రాష్ట్ర ఉన్నత విద్యామండలి భావిస్తోంది. ప్రస్తుత పరిస్థితుల దృష్ట్యా విద్యార్థులు పరీక్షలంటే భయపడకుండా ఏం చేయాలన్న దానిపై కసరత్తు జరిపింది. ప్రత్యామ్నాయాలను సూచిస్తున్న మండలి తుది నిర్ణయాన్ని విశ్వవిద్యాలయాలకే వదిలివేయనుంది. డిగ్రీ ప్రథమ, ద్వితీయ సంవత్సరాల విద్యార్థులు పైసెమిస్టర్లలోకి వెళ్లేందుకు కనీస క్రెడిట్లు సాధించాలన్న నిబంధన ఇప్పటికే ఉంది. దాన్ని ఎత్తివేసి ‘నో డిటెన్షన్‌’ విధానం అమలు చేయాలని భావిస్తున్న అధికారులు.. పరీక్షలు జూన్‌ లేదా జులైలోనే జరిగే అవకాశాలు ఉన్నందున యూజీసీ కమిటీ సిఫారసులను కూడా పరిగణనలోకి తీసుకొని తుది నిర్ణయానికి రావాలని భావిస్తున్నారు.
* రెండు విధానాలపై ప్రాథమికంగా ఓ నిర్ణయానికి వచ్చారు. అందులో ఇప్పటి ప్రశ్నపత్రాల్లో ఉన్నవాటి కంటే ప్రశ్నల చాయిస్‌ పెంచాలన్నది ఒకటి. డిగ్రీలో 20 మార్కులు ఇంటర్నల్‌ పరీక్షలకు కేటాయిస్తారు. మిగిలిన 80 మార్కులకు సెమిస్టర్‌ పరీక్షలు జరుపుతారు. ఉదాహరణకు బీఏ, బీకాంలో ప్రశ్నపత్రంలో సెక్షన్‌-1, 2 ఉంటాయి. సెక్షన్‌-1లో మొత్తం 8 ప్రశ్నలు ఇస్తే అయిదు రాయాలి. ఒక్కో దానికి 4 మార్కులు. ఇక సెక్షన్‌-2లో అయిదు ప్రశ్నలు ఉంటాయి. ఒక్కో ప్రశ్నలో ఏ, బి ప్రశ్నలు ఉంటాయి. అందులో ఏదో ఒకటి రాయాలి. అంటే 10 ప్రశ్నల్లో అయిదింటికి జవాబులు రాయాలి. ఒక్కో దానికి 12 చొప్పున 60 మార్కులు. ఇప్పుడు చాయిస్‌ పెంచితే మొత్తం ఏ, బి అని లేకుండా మొత్తం 10 ప్రశ్నలూ చాయిస్‌గా ఇవ్వొచ్చు.
* ఇక రెండోది లాక్‌డౌన్‌ కంటే ముందు పూర్తయిన సిలబస్‌ నుంచే మొత్తం ప్రశ్నపత్రాన్ని రూపొందించడం. దీనివల్ల చదువులో సాధారణ విద్యార్థులు సైతం ఇబ్బంది పడకుండా పరీక్షలు రాస్తారు. గత కొన్ని రోజుల నుంచి ఆన్‌లైన్‌ తరగతులు జరుగుతున్నాయి. దాదాపు 70 శాతం విద్యార్థులు వాటిని అనుసరిస్తున్నారని, 30 శాతం మందికి అంతర్జాలం, స్మార్ట్‌ఫోన్‌/కంప్యూటర్లు సమస్య ఉందని అధికారులు చెబుతున్నా.. హాజరు 40 శాతం మించడం లేదని డిగ్రీ అధ్యాపకులు అంటున్నారు. కళాశాలలు తెరిచాక 10-15 రోజులపాటు తరగతులు నడిపి ఆపై పరీక్షలు నిర్వహించాలని చాలామంది విద్యార్థులు అడుగుతున్నట్లు గజ్వేల్‌కు చెందిన ఓ అధ్యాపకుడు చెప్పారు.
జేఎన్‌టీయూహెచ్‌ పరీక్షలు ఆగస్టులో!
బీటెక్‌ చివరి సంవత్సర పరీక్షలు జూన్‌ నెలాఖరు లేదా జులైలో జరపాలని, మిగిలిన సంవత్సరాలవి వచ్చే ఆగస్టులో జరపాలని జేఎన్‌టీయూహెచ్‌ ఆలోచిస్తోంది. కళాశాలలలు తెరిచి కొద్ది రోజులు తరగతులు నిర్వహించాకే పరీక్షలు పెట్టాలని భావిస్తోంది. ఏఐసీటీఈ సిఫారసులు వచ్చాక తుది నిర్ణయం తీసుకుంటుంది.
నిట్‌లో ఆన్‌లైన్‌ పాఠాలు
* 20 రోజుల్లో 1200 మందికి తరగతులు
* ఎంటెక్‌ పరీక్షల నిర్వహణపైనా సాధ్యాసాధ్యాల పరిశీలన
ఈనాడు, వరంగల్‌: వరంగల్‌ జాతీయ సాంకేతిక విద్యాసంస్థ (నిట్‌)లో లాక్‌డౌన్‌ కారణంగా తరగతులు నిలిచిపోవడంతో అధ్యాపకులు పూర్తి స్థాయిలో ఆన్‌లైన్‌లో బోధన బాట పట్టారు. 20 రోజుల్లో 1200 మంది విద్యార్థులకు ఆన్‌లైన్‌ తరగతులు పూర్తి చేశారు. నిట్‌లో 320 మంది బోధన సిబ్బంది ఉన్నారు. వీరిలో 70 మంది ఆన్‌లైన్‌లో తరగతుల నిర్వహణపై శిక్షణ పొందారు. నిట్‌ డీన్‌లతో సంచాలకుడు ఎన్‌.వి.రమణారావు నిత్యం వీడియో కాల్‌లో సమావేశమవుతున్నారు. ఆన్‌లైన్‌ తరగతులు నిర్వహిస్తున్న క్రమంలో ఈశాన్య రాష్ట్రాలు, మారుమూల ప్రాంతాల విద్యార్థులకు వీడియో కాల్స్‌ కలవడం లేదు. అక్కడ 2జీ నెట్వర్క్‌ మాత్రమే ఉండటంతో వీడియోల్లో వారు తరగతులను వినలేకపోతున్నారు. నెట్వర్క్‌ ఇబ్బందులున్న ప్రాంతాల వారి కోసం 10 నిమిషాల నిడివితో తరగతుల వీడియోలను రూపొందించి వారికి వాట్సప్‌ ద్వారా పంపిస్తున్నారు. ఎంటెక్‌ పరీక్షలను కూడా ఆన్‌లైన్‌లో నిర్వహించేందుకు సాధ్యాసాధ్యాలను పరిశీలిస్తున్నారు. లాక్‌డౌన్‌ ఎత్తేసినా విద్యాసంస్థలకు సెలవులు పొడిగిస్తే వచ్చే విద్యాసంవత్సరం తరగతులను కూడా ఆన్‌లైన్‌లో ప్రారంభించేందుకు ప్రణాళిక సిద్ధం చేసుకుంటున్నారు.
యువైకా-2020 వాయిదా
శ్రీహరికోట, న్యూస్‌టుడే: భారత అంతరిక్ష పరిశోధన సంస్థ (ఇస్రో) ఆధ్వర్యాన ఈ ఏడాది నిర్వహించ తలపెట్టిన యువ శాస్త్రవేత్తల కార్యక్రమం- 2020 (యువైకా) వాయిదా వేశారు. ఈ కార్యక్రమంలో మే 11 నుంచి 22 వరకు ఇస్రో కేంద్రాలైన విక్రమ్‌ సారాభాయ్‌ స్పేస్‌ సెంటర్‌ తిరువనంతపురం, బెంగళూరులోని యూఆర్‌రావు ఉపగ్రహ కేంద్రం, అహ్మదాబాద్‌లోని స్పేస్‌ అప్లికేషన్‌ సెంటర్, షిల్లాంగ్‌లోని నార్త్‌ ఈస్ట్రన్‌ స్పేస్‌ అప్లికేషన్‌ కేంద్రాల్లో 112 మంది విద్యార్థులకు శిక్షణ కార్యక్రమాలు జరగాల్సి ఉంది. కొవిడ్‌-19 తీవ్రత దృష్ట్యా ఈ కార్యక్రమాన్ని వాయిదా వేస్తున్నట్లు ఇస్రో ఓ ప్రకటన విడుదల చేసింది.
వైద్యాధికారుల పోస్టుల భర్తీకి 23 వరకు గడువు
ఈనాడు, అమ‌రావ‌తి: రాష్ట్రంలో కొవిడ్‌ ఆసుపత్రులలో పనిచేసేందుకు 1170 మంది వైద్యాధికారుల పోస్టుల భర్తీకి దరఖాస్తు గడువును రాష్ట్రప్రభుత్వం ఏప్రిల్ 23 సాయంత్రం 5 గంటల వరకు పొడిగించింది. కొత్తగా నోటిఫికేషన్‌ ఇచ్చిన 578 పోస్టులతో కలిపి మొత్తం పోస్టుల సంఖ్య 1170కి చేరినట్టు పేర్కొంది. ఇదివరకే దరఖాస్తు చేసినవారు, మళ్లీ చేయాల్సిన అవసరం లేదని తెలిపింది.
తొలుత ఇంటర్‌ ద్వితీయ సంవత్సరం మూల్యాంకనం
ఈనాడు, హైదరాబాద్‌: ఎంసెట్‌ ర్యాంకుల కేటాయింపు, ఎన్‌ఐటీ, ఐఐటీల్లో ప్రవేశాలకు సమస్యలు తలెత్తకుండా లాక్‌డౌన్‌ ఎత్తివేసిన తర్వాత మొదట ఇంటర్‌మీడియట్‌ ద్వితీయ సంవత్సరం జవాబుపత్రాల మూల్యాంకనాన్ని ఇంటర్‌బోర్డు ప్రారంభించనుంది. ఈ మూల్యాంకనాన్ని 10 రోజుల్లో పూర్తి చేస్తారు. ఆ తర్వాత ప్రథమ సంవత్సరం మూల్యాంకనం మొదలుపెడతారు. ఇది పూర్తయ్యేలోపు వివిధ సాంకేతిక ప్రక్రియలను పూర్తి చేసి రెండో సంవత్సరం ఫలితాలు వెల్లడిస్తారు. లాక్‌డౌన్‌ ఎత్తివేత తర్వాత ఇంటర్‌ మూల్యాంకనం సన్నద్ధతపై విద్యాశాఖ ప్రత్యేక ప్రధాన కార్యదర్శి చిత్రా రామచంద్రన్‌ ఇంటర్‌బోర్డు కార్యాలయం నుంచి జిల్లా ఇంటర్‌ విద్యాశాఖ అధికారులు (డీఐఈఓ)తో ఏప్రిల్ 21న‌ వీడియో కాన్ఫరెన్స్‌ నిర్వహించారు. మూల్యాంకనం సందర్భంగా వ్యక్తిగత దూరం పాటించడం, శానిటైజర్ల ఏర్పాటు తదితర అంశాలపై అధికారులకు ఆమె సూచనలు చేశారు. ఇతర జిల్లాల నుంచి వచ్చే అధ్యాపకులకు ప్రైవేటు కళాశాలల్లో భోజనం, బస ఏర్పాటు చేయాలని ప్రాథమికంగా నిర్ణయించినట్లు తెలిసింది.
ప్రభుత్వ ఆదేశాలను ఉల్లంఘిస్తే.. ప్రైవేట్‌ పాఠశాలల గుర్తింపు రద్దు: సబిత
ఈనాడు, హైదరాబాద్‌: వచ్చే విద్యా సంవత్సరం(2020-21)లో ఫీజులు పెంచరాదన్న ప్రభుత్వ నిర్ణయాన్ని ఉల్లంఘిస్తే ప్రైవేట్‌ పాఠశాలల గుర్తింపును రద్దు చేయాలని పాఠశాల విద్యాశాఖ అధికారులను విద్యాశాఖ మంత్రి సబితా ఇంద్రారెడ్డి ఆదేశించారు. సర్కారు తీసుకున్న నిర్ణయం క్షేత్రస్థాయిలో పక్కాగా అమలయ్యేలా చూడాలన్నారు. హైదరాబాద్‌లో ఏప్రిల్ 20న‌ నిర్వహించిన సమావేశంలో అధికారులతో ఈ విషయమై చర్చించారు. పాఠశాలల యాజమాన్యాలు కచ్చితంగా ప్రభుత్వ నిర్ణయాన్ని పాటించాలని, ట్యూషన్‌ రుసుం కాకుండా ఇతర ఫీజులు వసూలు చేసినా అనుమతులు రద్దు చేస్తామన్నారు.
ఏప్రిల్ 21 నుంచి డిజిటల్‌ తరగతులు ప్రారంభం
ఆరు నుంచి పదో తరగతి విద్యార్థులకు ఏప్రిల్‌ 21 నుంచి నిత్యం ఒక్కో సబ్జెక్టుకు సంబంధించి డిజిటల్‌ పాఠాలను టీ-శాట్‌ ద్వారా ప్రసారం చేస్తామని మంత్రి తెలిపారు. టీ-శాట్‌ యాప్‌(ఈ-లెర్నింగ్‌)లో 6-10 తరగతుల విద్యార్థుల కోసం 513 పాఠాలను పొందుపరిచామన్నారు. ఒకటి నుంచి పదో తరగతి వరకు పాఠ్యపుస్తకాలనూ ఈ-టెక్ట్స్‌ బుక్స్‌ రూపంలో ‌www.scert.telangana.gov.in వెబ్‌సైట్‌లో ఉంచామన్నారు.
పాలిసెట్‌ దరఖాస్తు గడువు పొడిగింపు
ఈనాడు, అమరావతి: పాలిటెక్నిక్‌ కళాశాలల్లో ప్రవేశాలకు నిర్వహించే పాలిసెట్‌ దరఖాస్తుల గడువును మే 15వరకు పొడిగించినట్లు సాంకేతిక విద్య, శిక్షణ మండలి కార్యదర్శి దత్తు తెలిపారు. మొదట ప్రకటించిన షెడ్యూల్‌ ప్రకారం ఏప్రిల్ 28న పాలిసెట్‌ నిర్వహించాల్సి ఉండగా లాక్‌డౌన్‌ కారణంగా వాయిదా వేశారు. దీంతో దరఖాస్తుల గడువును పొడిగించారు.
వాలంటీర్ల ఖాళీల భర్తీకి ఉత్తర్వులు
* ఏప్రిల్ 20వ తేదీన నోటిఫికేషన్‌ జారీ
* మే 1 నాటికి నియామక ప్రక్రియ పూర్తి
ఈనాడు, అమరావతి: గ్రామ, వార్డు వాలంటీర్ల ఖాళీల భర్తీకి అనుమతిస్తూ ప్రభుత్వం ఉత్తర్వులు జారీ చేసింది. గతంలో వాలంటీర్ల నియామకాల సందర్భంగా నిర్దేశించిన మార్గదర్శకాల ప్రకారం వీటిని భర్తీ చేయనున్నారు. ఈ మేరకు కలెక్టర్లు తదుపరి చర్యలు తీసుకోవాలని గ్రామ, వార్డు వాలంటీర్ల, సచివాలయ విభాగ ప్రత్యేక కార్యదర్శి కె.కన్నబాబు ఏప్రిల్ 18న‌ సూచించారు. కొవిడ్‌-19 నియంత్రణ కార్యక్రమాలకు గైర్హాజరైన వారితోపాటు రాజీనామాలతో ఏర్పడిన ఖాళీలను భర్తీ చేయాలని ప్రభుత్వం నిర్ణయించింది. జిల్లాల వారీగా ఖాళీలను గుర్తించి ఏప్రిల్ 20న నోటిఫికేషన్‌ జారీ చేస్తారు. ఏప్రిల్ 24లోగా అర్హుల నుంచి దరఖాస్తులు స్వీకరిస్తారు. ఏప్రిల్ 25న పరిశీలన ప్రక్రియ పూర్తి చేసి.. ఏప్రిల్ 27-29 తేదీల మధ్య ఇంటర్వ్యూలు నిర్వహిస్తారు. మే 1న నియామక ఉత్తర్వులు అందజేస్తారు.
దరఖాస్తు ప్రక్రియ ఇలా..
* 2020 జనవరి 1 నాటికి 18 ఏళ్ల వయసు పూర్తయి 35 ఏళ్ల నిండని వారంతా ఆన్‌లైన్‌లో https://gswsvolunteer,apcfss.in/ దరఖాస్తు చేసుకోవాలి.
* ఖాళీల భర్తీలో మహిళలకు యాభై శాతం రిజర్వేషన్‌ అమలు చేస్తారు. మిగతా యాభై శాతం పోస్టుల్లో స్థానికులకు ప్రాధాన్యమిస్తూ రూల్‌ ఆఫ్‌ రిజర్వేషన్‌ (ఆర్‌వోఆర్‌) అమలు చేయనున్నారు.
* ఇంటర్వ్యూ వంద మార్కులకు ఉంటుంది. ప్రభుత్వ పథకాలు, కార్యక్రమాలపై పరిజ్ఞానం, అవగాహనకు సంబంధించి 25 మార్కులు, ప్రభుత్వ సంక్షేమ కార్యక్రమాల అమలులో భాగస్వామ్యం, సేవా సంస్థల్లో పనిచేసిన అనుభవం, సామాజిక కార్యక్రమాల్లో పాల్గొంటున్నట్లయితే 25, నాయకత్వ లక్షణాలు, భావ వ్యక్తీకరణకు 25, ఇతర నైపుణ్యాలకు 25 మార్కులు చొప్పున కేటాయిస్తారు.
మే నెలాఖరు కల్లా ఇంటర్‌ ఫలితాల వెల్లడికి సిద్ధం
* 68 ప్రైవేట్‌ కళాశాలల గుర్తింపు రద్దు చేశాం
* అడ్వాన్సుడ్‌ సప్లిమెంటరీ పరీక్షలనూ నిర్వహిస్తాం
* ‘ఈనాడు- ఈటీవీ’తో ఇంటర్‌ బోర్డు కార్యదర్శి జలీల్‌
ఈనాడు, హైదరాబాద్‌: రాష్ట్రంలో లాక్‌డౌన్‌ ఎత్తివేయగానే ప్రభుత్వం అనుమతి ఇస్తే జవాబుపత్రాల మూల్యాంకనం చేపట్టి మే నెలాఖరు కల్లా ఫలితాలను వెల్లడించేందుకు సిద్ధంగా ఉన్నామని ఇంటర్మీడియట్‌ బోర్డు కార్యదర్శి సయ్యద్‌ ఉమర్‌ జలీల్‌ తెలిపారు. కరోనా మహమ్మారి నేపథ్యంలో.. ప్రస్తుతం ఉన్న 12 మూల్యాంకన కేంద్రాలను 36కు పెంచుతామని, వ్యక్తిగత దూరం పాటించేందుకు వీలుగా ఒక్కో గదిలో 8-10 మంది మాత్రమే అధ్యాపకులు ఉంటారని ఆయన చెప్పారు. ఇంటర్‌బోర్డు కార్యాలయంలో ఏప్రిల్ 17న‌ ఆయన ‘ఈనాడు-ఈటీవీ’తో ప్రత్యేకంగా మాట్లాడారు. మూల్యాంకనం, సాంకేతిక ప్రక్రియ పూర్తి చేసేందుకు సుమారు 25 రోజులు పడుతుందన్నారు. వాయిదా పడిన పరీక్షలను 862 మంది విద్యార్థులు రాయాల్సి ఉందని.. లాక్‌డౌన్‌ ముగిశాక వాటిని నిర్వహిస్తామని చెప్పారు.
జవాబు పత్రాలను భద్రపరచడంలో ప్రత్యేక జాగ్రత్తలు తీసుకుంటున్నామని, వాటిని ఉంచిన గదులను నిత్యం తనిఖీ చేయడంతో పాటు ఎలుకలు, బొద్దింకలు సంచరించకుండా మందులు చల్లుతున్నామని, అగ్నిప్రమాద నివారణ చర్యలూ తీసుకుంటున్నామని చెప్పారు. అడ్వాన్సుడ్‌ సప్లిమెంటరీ పరీక్షలు యథాతథంగా ఉంటాయని, వాటిని ఈసారి నిర్వహించరంటూ సామాజిక మాధ్యమాల్లో జరుగుతున్న ప్రచారం అవాస్తమని ఆయన స్పష్టం చేశారు. వచ్చే విద్యాసంవత్సరం కొంతమేరకు ఆలస్యం కావచ్చని, పనిదినాలు మాత్రం 220 రోజులకు తగ్గకుండా చర్యలు తీసుకుంటామన్నారు. రెండో శనివారం, ఇతర సెలవులను కుదించే యోచనలో ఉన్నట్లు తెలిపారు. అవసరమైతే అదనపు తరగతులను సైతం నిర్వహిస్తామన్నారు.
ఆ కళాశాలలను మూసివేశాం
రాష్ట్రంలో నిబంధనలు పాటించని 68 కళాశాలలను హైకోర్టు ఆదేశాల మేరకు మూసివేశామని, మార్చి 24వ తేదీనే వాటికి ఈ-మెయిల్‌ ద్వారా నోటీసులు పంపించామని వెల్లడించారు. వాటిల్లో 28 నారాయణ, 18 శ్రీచైతన్య కళాశాలలు ఉన్నాయని తెలిపారు. లాక్‌డౌన్‌ ఎత్తివేసిన తర్వాతే వచ్చే విద్యాసంవత్సరానికి సంబంధించి ప్రైవేట్‌ కళాశాలల అనుబంధ గుర్తింపు ప్రక్రియను కొనసాగిస్తామని ఆయన వివరించారు.
విద్యార్థులు, అధ్యాపకులకు ఆన్‌లైన్‌ వివరాలు
ఈనాడు, అమరావతి: విద్యార్థులు, అధ్యాపకుల కోసం అఖిల భారతీయ సాంకేతిక విద్యామండలి(ఏఐసీటీఈ) ఆన్‌లైన్‌ సమాచారాన్ని అందుబాటులోకి తీసుకొచ్చింది. స్వీయ‌ ఆన్‌లైన్‌ కోర్సులు, జాతీయ డిజిటల్‌ గ్రంథాలయం, వర్చువల్‌ ల్యాబ్స్, టీసీఎస్‌ ఐయాన్‌ డిజిటల్‌ తరగతి గది, నైపుణ్యాలు పెంచుకునేందుకు ఉన్న వెబ్‌సైట్ల వివరాలను ఇందులో పొందుపర్చింది. జాతీయస్థాయిలో అందుబాటులో ఉన్న దాదాపు అన్ని వెబ్‌సైట్లను ఒక చోటకు చేర్చి వెబ్‌సైట్‌లో విద్యార్థులు, అధ్యాపకులకు అందుబాటులో ఉంచింది.
పదో తరగతి విద్యార్థులకు ఈ-పాఠ్యాంశాలు
పదో తరగతి విద్యార్థుల కోసం పాఠశాల విద్యాశాఖ ఈ-పాఠ్యాంశాలను సిద్ధం చేసింది. పీడీఎఫ్‌ రూపంలో పాఠాలవారీగా దీన్ని సిద్ధం చేశారు. వీటిని పిల్లల తల్లిదండ్రుల వాట్సాప్‌/మెయిల్‌కు పంపుతారు. విద్యార్థులు ఏదైనా సబ్జెక్టుకు సంబంధించిన పాఠంపై క్లిక్‌ చేస్తే దానికి సంబంధించిన వీడియోలు ప్రత్యక్షమవుతాయి. బోధనతోపాటు ఆయా పాఠాలకు సంబంధించిన ప్రశ్నలు ఉంటాయి. ఒక్కో ప్రశ్నకు సమాధానాలు వీడియో రూపంలో వస్తాయి. క్యూఆర్‌ కోడ్‌ పుస్తకాల కోసం రూపొందించిన వీడియోలను పాఠ్యాంశాలతో జతచేసి వీటిని రూపొందించారు. పదో తరగతి పరీక్షలు వాయిదా పడినందున విద్యార్థులు స్వతహాగా చదువుకునేందుకు ఈ-కంటెంట్‌ను తీసుకొచ్చారు.
ఉన్నత విద్యలో ఆన్‌లైన్‌ ప్రవేశాలు
ఈనాడు, అమరావతి: విశ్వవిద్యాలయాలు, డిగ్రీ కళాశాలల్లో వచ్చే విద్యా సంవత్సరం నుంచి ఆన్‌లైన్‌లోనే ప్రవేశాలు నిర్వహించనున్నారు. ఉన్నత విద్యలో సాంకేతిక సంస్కరణల్లో భాగంగా ఆ శాఖ ఏప్రిల్ 16న‌ ఈ మేరకు ఉత్తర్వులు జారీ చేసింది. విద్యార్థి రిజిస్ట్రేషన్‌, కౌన్సెలింగ్‌, సీట్ల కేటాయింపు, ప్రవేశాలను ఆన్‌లైన్‌ చేయనుంది. వర్సిటీలు, అనుబంధ కళాశాలల్లో అకడమిక్‌, పరిపాలన కార్యకలాపాలను సైతం ఆటోమేషన్‌ చేయనున్నారు. ఏపీ సమగ్ర ఆర్థిక సేవల విధానం(ఏపీసీఎఫ్‌ఎస్‌ఎస్‌) సాంకేతిక సహాయం అందిస్తుంది.
* యూజీ, పీజీ, పీహెచ్‌డీ, పోస్ట్‌ డాక్టోరల్‌ సహా సెమిస్టర్‌ పరీక్ష దరఖాస్తు విధానం, రుసుముల చెల్లింపు, హాల్‌టికెట్ల జారీ, పరీక్ష హాజరు పర్యవేక్షణ, జవాబు పత్రాల కోడింగ్‌, డీకోడింగ్‌, ఫలితాల నమోదును ఆన్‌లైన్‌ చేయనున్నారు.
* కళాశాలలు, కోర్సుల అనుబంధ గుర్తింపును ఆన్‌లైన్‌ చేస్తారు. బోగస్‌ ప్రవేశాలను నివారించేందుకు దీన్ని తీసుకొస్తున్నారు.
* విద్యార్థులు, సిబ్బంది, ప్రవేశాలు, అకడమిక్‌ వివరాలతో రియల్‌టైం డ్యాష్‌బోర్డును ఏర్పాటు చేస్తారు.
* వర్సిటీలు, కళాశాలల్లో నిర్వహించే పనులను ఇక నుంచి ఈ-ఎంబుక్‌లో నమోదు చేయాలి.
* మానవవనరుల నిర్వహణ వ్యవస్థను ఆన్‌లైన్‌ చేస్తారు. సిబ్బంది హాజరు, ఉద్యోగుల రికార్డులను కంప్యూటరీకరిస్తారు.
* ఉన్నత విద్య ప్రత్యేక ప్రధాన కార్యదర్శి సతీష్‌చంద్ర పరిపాలన, అకడమిక్‌ సంస్కరణల అమలును పర్యవేక్షిస్తారు.
* విశ్వవిద్యాలయాలతో ఉన్నత విద్యామండలి ఛైర్మన్‌ సమన్వయం చేస్తారు. డిగ్రీ కళాశాలల్లో సాంకేతికత అమలు ప్రక్రియలో కళాశాల విద్య ప్రత్యేక కమిషనర్‌ సమన్వయకర్తగా వ్యవహరిస్తారు.
సివిల్స్‌ ప్రాథమిక పరీక్షపై ఉత్కంఠ
* మే 3 తర్వాత నిర్ణయం తీసుకుంటామన్న యూపీఎస్‌సీ
ఈనాడు, హైదరాబాద్‌: సివిల్స్‌ ప్రాథమిక పరీక్ష మే 31న జరుగుతుందా? లేదా? అన్న అంశంపై మే 3వ తేదీ వరకు ఉత్కంఠ కొనసాగనుంది. కరోనా నేపథ్యంలో పరీక్ష నిర్వహిస్తారా.. వాయిదా వేస్తారా అన్న సందేహం దేశవ్యాప్తంగా అభ్యర్థుల్లో నెలకొంది. ఏప్రిల్ 15న‌ సమావేశమైన యూపీఎస్‌సీ బోర్డు.. మే 3వ తేదీ వరకు లాక్‌డౌన్‌ ఉన్నందున ఆ తర్వాత పరిస్థితిని సమీక్షించి ప్రిలిమినరీ పరీక్ష నిర్వహించాలా? లేదా? అని నిర్ణయం తీసుకుంటామని వెల్లడించింది. అప్పటివరకు సందిగ్ధం తప్పదు. దేశవ్యాప్తంగా సుమారు 9 లక్షల మంది దరఖాస్తు చేసుకోగా.. వారిలో 4.5 లక్షల నుంచి 5 లక్షల మంది పరీక్షకు హాజరవుతారు. తెలుగు రాష్ట్రాల నుంచి దాదాపు 80 వేల మంది దరఖాస్తు చేశారు. లాక్‌డౌన్‌ వల్ల అభ్యర్థులు పరీక్ష సన్నద్ధతపై పూర్తి విశ్వాసంతో లేరని, మానసిక ఒత్తిడిలో ఉన్నారని సివిల్స్‌ శిక్షణ నిపుణుడు గోపాలకృష్ణ పేర్కొన్నారు. ఒక నెలపాటు వాయిదా వేయడం వల్ల వచ్చే ఏడాది పరీక్షల కాలపట్టికపై ఎటువంటి ప్రభావం పడదని అభిప్రాయపడ్డారు. ఇక అర్ధంతరంగా ఆగిపోయిన సివిల్స్‌ మౌఖిక పరీక్షలను ఎప్పటి నుంచి కొనసాగిస్తామన్నది కూడా మే 3వ తేదీ తర్వాతే నిర్ణయిస్తామని యూపీఎస్‌సీ తెలిపింది. మరో 600 మందిని ఇంటర్వ్యూ చేయాల్సి ఉంది.
సివిల్స్‌ ప్రాథమిక పరీక్షపై ఉత్కంఠ
* మే 3 తర్వాత నిర్ణయం తీసుకుంటామన్న యూపీఎస్‌సీ
ఈనాడు, హైదరాబాద్‌: సివిల్స్‌ ప్రాథమిక పరీక్ష మే 31న జరుగుతుందా? లేదా? అన్న అంశంపై మే 3వ తేదీ వరకు ఉత్కంఠ కొనసాగనుంది. కరోనా నేపథ్యంలో పరీక్ష నిర్వహిస్తారా.. వాయిదా వేస్తారా అన్న సందేహం దేశవ్యాప్తంగా అభ్యర్థుల్లో నెలకొంది. ఏప్రిల్ 15న‌ సమావేశమైన యూపీఎస్‌సీ బోర్డు.. మే 3వ తేదీ వరకు లాక్‌డౌన్‌ ఉన్నందున ఆ తర్వాత పరిస్థితిని సమీక్షించి ప్రిలిమినరీ పరీక్ష నిర్వహించాలా? లేదా? అని నిర్ణయం తీసుకుంటామని వెల్లడించింది. అప్పటివరకు సందిగ్ధం తప్పదు. దేశవ్యాప్తంగా సుమారు 9 లక్షల మంది దరఖాస్తు చేసుకోగా.. వారిలో 4.5 లక్షల నుంచి 5 లక్షల మంది పరీక్షకు హాజరవుతారు. తెలుగు రాష్ట్రాల నుంచి దాదాపు 80 వేల మంది దరఖాస్తు చేశారు. లాక్‌డౌన్‌ వల్ల అభ్యర్థులు పరీక్ష సన్నద్ధతపై పూర్తి విశ్వాసంతో లేరని, మానసిక ఒత్తిడిలో ఉన్నారని సివిల్స్‌ శిక్షణ నిపుణుడు గోపాలకృష్ణ పేర్కొన్నారు. ఒక నెలపాటు వాయిదా వేయడం వల్ల వచ్చే ఏడాది పరీక్షల కాలపట్టికపై ఎటువంటి ప్రభావం పడదని అభిప్రాయపడ్డారు. ఇక అర్ధంతరంగా ఆగిపోయిన సివిల్స్‌ మౌఖిక పరీక్షలను ఎప్పటి నుంచి కొనసాగిస్తామన్నది కూడా మే 3వ తేదీ తర్వాతే నిర్ణయిస్తామని యూపీఎస్‌సీ తెలిపింది. మరో 600 మందిని ఇంటర్వ్యూ చేయాల్సి ఉంది.
మే చివరి వారంలోనే పరీక్షలు
* షెడ్యూల్‌లో మార్పులు
* దరఖాస్తు గడువు పొడిగింపు
ఈనాడు, అమరావతి: కేంద్ర ప్రభుత్వం లాక్‌డౌన్‌ను పొడిగించిన నేపథ్యంలో పదోతరగతి, ఎంసెట్‌, ఇతర ఉమ్మడి ప్రవేశ పరీక్షలు మేనెల చివరిలో నిర్వహించే అవకాశం ఉంది. లాక్‌డౌన్‌ సడలించిన తర్వాత పదో తరగతి పరీక్షల నిర్వహణకు రెండు వారాల సమయం పట్టనుంది. పరీక్ష కేంద్రాల ఏర్పాట్లు, ప్రశ్నపత్రాల తరలింపునకు ఈ సమయం అవసరం. దీంతో మే నెల చివరి వారంలోనే పదోతరగతి పరీక్షలు నిర్వహించే అవకాశం ఉంది.
* ఎంసెట్‌తో పాటు ఇతర ఉమ్మడి ప్రవేశ పరీక్షల దరఖాస్తుల సమయాన్ని పొడిగించనున్నారు. ఎడ్‌సెట్‌ మినహా మిగతా వాటికి గతంలో ఇచ్చిన గడువు ఏప్రిల్ 17తో ముగియనుంది. దీన్ని మే నెల మొదటి వారం వరకు పెంచే అవకాశం ఉంది. ఎంసెట్‌ పరీక్ష కేంద్రాల సామర్థ్యం, ఏర్పాట్లకు లాక్‌డౌన్‌ తర్వాత రెండు వారాల సమయం పడుతుందని ఇప్పటికే టీసీఎస్‌ సంస్థ ఉన్నత విద్యామండలికి తెలిపింది. హాల్‌టిక్కెట్ల జారీకి మరో వారం కావాలి. దీంతో లాక్‌డౌన్‌ తర్వాత మూడు వారాల అనంతరమే ఎంసెట్‌ నిర్వహించే పరిస్థితి నెలకొంది. కేంద్రం సడలింపులు ఇస్తే ఇంటర్మీడియట్‌ ప్రశ్నపత్రాల మూల్యాంకనం చేపట్టనున్నారు.
ఆన్‌లైన్‌ పాఠాలు
ప్రస్తుత పరిస్థితుల్లో విశ్వవిద్యాలయాలు ఆన్‌లైన్‌ తరగతులు నిర్వహించనున్నాయి. కొన్ని విశ్వవిద్యాలయాల్లో 20-30 శాతం పాఠ్యాంశాలు పూర్తి చేయాల్సి ఉండగా.. వీటిని ఆన్‌లైన్‌లో బోధించనున్నారు. మరికొన్నింటిలో దాదాపుగా అకడమిక్‌ సిలబస్‌పూర్తయింది. పరీక్షలు నిర్వహించాల్సి ఉంది. ఏప్రిల్ 20 తర్వాత లాక్‌డౌన్‌లో సడలింపులు ఇస్తే కొవిడ్‌-19 కేసులు లేని శ్రీకాకుళం, విజయనగరం జిల్లాల్లో వర్సిటీల పరీక్షలు నిర్వహించాలని అధికారులు భావిస్తున్నారు.
* రాష్ట్రంలో 14 విశ్వవిద్యాలయాల ఉపకులపతులతో ఏప్రిల్ 14 మంత్రి సురేష్‌, ప్రత్యేక ప్రధాన కార్యదర్శి సతీష్‌ చంద్ర, ఉన్నత విద్యామండలి ఛైర్మన్‌ హేమచంద్రారెడ్డి సమీక్ష నిర్వహించారు. పరీక్షల నిర్వహణ, వచ్చే విద్యా సంవత్సరం సన్నద్ధతపై ఏప్రిల్ 21న మరోమారు సమీక్ష నిర్వహించనున్నట్లు మంత్రి వెల్లడించారు.
లాక్‌డౌన్‌ తర్వాతే పదో తరగతి పరీక్షలు
* మంత్రి ఆదిమూలపు సురేష్‌
ఈనాడు, అమరావతి: లాక్‌డౌన్‌ తర్వాతే పదో తరగతి పరీక్షలను నిర్వహిస్తామని ఆంధ్ర‌ప్ర‌దేశ్ విద్యాశాఖ మంత్రి ఆదిమూలపు సురేష్‌ తెలిపారు. తాడేపల్లిలోని సీఎం క్యాంపు కార్యాలయం వద్ద ఏప్రిల్ 14న మంత్రి మీడియాతో మాట్లాడారు. పరీక్షలు జరిగేంత వరకు విద్యార్థులకు సప్తగిరి ఛానల్‌ ద్వారా పాఠాలు బోధించనున్న‌ట్లు తెలిపారు. రోజూ ఉదయం 10 నుంచి 11గంటల వరకు, సాయంత్రం 4 నుంచి 5గంటల వరకు పాఠ్యాంశాల బోధన ప్రసారం అవుతుందని వెల్లడించారు. ఈ వీడియోలను యూట్యూబ్‌లోనూ ఉంచుతామన్నారు. ఆన్‌లైన్‌లో పాఠాలు చెప్పేందుకు ఆసక్తి ఉన్న ఉపాధ్యాయులు నిమిషం, రెండు నిమిషాల వీడియోలను సంబంధిత శాఖ‌కు పంపిస్తే పరిశీలిస్తామని వెల్లడించారు. లాక్‌డౌన్‌ సమయంలో ఆన్‌లైన్‌ తరగతులపై విశ్వవిద్యాలయాల ఉపకులపతులకు ఆదేశాలు ఇచ్చామని తెలిపారు.
ఏపీలో సప్తగిరి ఛానల్‌ ద్వారా ‘పది’పాఠాలు
అమరావతి: దేశవ్యాప్తంగా లాక్‌డౌన్‌ను మే 3వ తేదీ వరకు పొడిగించిన నేపథ్యంలో పదో తరగతి పరీక్షలు నిర్వహించడం సాధ్యం కాదని రాష్ట్ర విద్యాశాఖ మంత్రి ఆదిమూలపు సురేశ్‌ స్పష్టం చేశారు.మళ్లీ పరీక్షల తేదీలు ప్రకటించే వరకు విద్యార్థులకు సప్తగిరి ఛానల్ ద్వారా పాఠాలు చెప్పించనున్నట్లు వెల్లడించారు. ‘విద్యామృతం’ పేరుతో ప్రతిరోజూ ఉదయం 10 గంటల నుంచి 11 వరకు, తిరిగి సాయంత్రం 4 గంటల నుంచి 5 గంటల వరకు పాఠ్యాంశాలకు సంబంధించిన తరగతులు ప్రసారం అవుతాయని మంత్రి వివరించారు. అవే తరగతులు సప్తగిరి యూట్యూబ్ ఛానల్‌లో కూడా అందుబాటులో ఉంటాయని చెప్పారు. విద్యార్థులు సమయాన్ని వృథా చేయకుండా ఛానల్‌ ద్వారా ప్రసారమయ్యే తరగతులను తప్పకుండా వినియోగించుకోవాలని మంత్రి సూచించారు. ఆన్‌లైన్‌లో బోధించేందుకు ఆసక్తి ఉన్న ఉపాధ్యాయులు విద్యాశాఖ అధికారులను సంప్రదించవచ్చని ఈ సందర్భంగా మంత్రి సూచించారు.
ఎంసెట్‌ సహా అన్ని ప్రవేశ పరీక్షలు వాయిదా
ఈనాడు, హైదరాబాద్‌: కరోనా నేపథ్యంలో రాష్ట్ర ప్రభుత్వం ఆదేశాల మేరకు ఎంసెట్‌ సహా ప్రవేశ పరీక్షలన్నింటిని వాయిదా వేసినట్లు తెలంగాణ రాష్ట్ర ఉన్నత విద్యామండలి ఛైర్మన్‌ తుమ్మల పాపిరెడ్డి ఏప్రిల్ 12న‌ వెల్లడించారు. ప్రవేశ పరీక్షలకు దరఖాస్తు గడువును ఆలస్య రుసుం లేకుండా మే 5వ తేదీ వరకు పొడిగించినట్లు తెలిపారు. పరీక్షలు నిర్వహించే తేదీలను రాష్ట్ర ప్రభుత్వంతో చర్చించిన అనంతరం తెలియ‌జేస్తామ‌ని ఆయన పేర్కొన్నారు. అంతకుముందు ప్రకటించిన కాలపట్టిక ప్రకారం మే 2 నుంచి పరీక్షలు ప్రారంభం కావాల్సి ఉంది.
దూరదర్శన్‌లో ‘పది’ పునశ్చరణ పాఠాలు
ఈనాడు, హైదరాబాద్‌: కరోనా నేపథ్యంలో పదో తరగతి పరీక్షలు వాయిదా పడినందున విద్యార్థులకు పునశ్చరణ కోసం దూరదర్శన్‌ యాదగిరి ఛానెల్‌ ద్వారా పాఠాలు ప్రసారం చేస్తామని విద్యాశాఖ మంత్రి సబితా ఇంద్రారెడ్డి పేర్కొన్నారు. ఈ మేరకు ఆమె ఏప్రిల్ 11న‌ ఒక ప్రకటన విడుదల చేశారు. పాఠాలు ఏప్రిల్ 12వ తేదీ నుంచి 23వ తేదీ వరకు ఉదయం 10 నుంచి 11 గంటల వరకు, సాయంత్రం 4 నుంచి 5 గంటల వరకు ప్రసారమవుతాయన్నారు. ఆంగ్లం, గణితం, భౌతిక, జీవ, సాంఘిక శాస్త్రాలపై పాఠాలు ఉంటాయని వివరించారు. విద్యార్థులకు ఉపాధ్యాయులు, తల్లిదండ్రులు అవగాహన కల్పించాలని కోరారు.
ఏపీలో విశ్వవిద్యాలయాలకు రూ.303 కోట్ల నిధులు
ఈనాడు, అమరావతి: రాష్ట్రంలోని విశ్వవిద్యాలయాలకు రూ.303 కోట్ల నిధుల విడుదలకు ఉన్నత విద్యాశాఖ పరిపాలన అనుమతులు మంజూరు చేసింది. వర్సిటీ అధ్యాపకుల జీతాలు, అభివృద్ధి పనులు, విద్య, క్రీడలు, సాంస్కృతిక కార్యక్రమాలు తదితరాలకు వీటిని కేటాయించింది.
27 కళాశాలలకు నిలిచిన బోధన రుసుముల చెల్లింపులు
ఆంధ్రప్రదేశ్లోని 27 ఇంజినీరింగ్ కళాశాలలకు ప్రభుత్వం బోధన రుసుముల బకాయిలను నిలిపివేసింది. 2018-19 బకాయిలనూ చెల్లించలేదు. రాష్ట్రంలో 282 ఇంజినీరింగ్ కళాశాలలకు ఉన్నత విద్యా నియంత్రణ, పర్యవేక్షణ కమిషన్ బోధన రుసుములను నిర్ణయించింది. వీటికి ఆమోదం తెలుపుతూ ఇటీవల ప్రభుత్వం ఉత్తర్వులు జారీ చేసింది. రుసుములు చెల్లించాలంటే కళాశాలలు కొన్ని షరతులతో కూడిన నిబంధనల(ఎంప్యానల్)ను పాటించాలని ఆదేశాలిచ్చింది. 27 కళాశాలలు ఈ షరతులను ఆమోదిస్తూ ప్రభుత్వానికి లేఖలు ఇవ్వలేదు. దీంతో చెల్లింపులను నిలిపివేసింది. బోధన రుసుముల చెల్లింపునకు ఈ షరతులతో సంబంధం లేదని, తమకు రావాల్సిన బకాయిలు విడుదల చేయాలని ఆ కళాశాలల యాజమాన్యాలు కోరుతున్నాయి. కళాశాలలకు బోధన రుసుముల చెల్లింపులపై ఏప్రిల్ 13న సీఎం జగన్ సమీక్ష సమావేశం నిర్వహించే అవకాశం ఉంది.
10 నుంచి పీజీ వైద్యవిద్య ప్రవేశాలు
ఈనాడు, హైదరాబాద్‌: అఖిల భారత కోటాలో పీజీ వైద్యవిద్య ప్రవేశ ప్రక్రియ ఏప్రిల్ 10 నుంచి ప్రారంభం కానుంది. ఇప్పటికే దరఖాస్తు స్వీకరణ పూర్తికాగా, కళాశాలల్లో సీట్ల కేటాయింపు సమాచారాన్ని ఆన్‌లైన్‌లో ఏప్రిల్ 10న విడుదల చేయనున్నట్లు ‘డైరెక్టరేట్‌ జనరల్‌ ఆఫ్‌ హెల్త్‌ సర్వీసెస్‌’ పేర్కొంది. దేశవ్యాప్తంగా అన్ని రాష్ట్రాల్లోని ప్రభుత్వ వైద్యకళాశాలల్లో ఉన్న పీజీ సీట్లలో 50 శాతాన్ని అఖిల భారత కోటా పరిధిలోకి స్వీకరించి, ఇందులో అన్ని రాష్ట్రాల విద్యార్థులకూ నీట్‌ ర్యాంకుల ప్రాతిపదికన సీట్లను కేటాయిస్తోంది. సాధారణంగా మార్చి చివరి వారంలో ఈ ప్రక్రియను ప్రారంభించి, రెండు విడతల కౌన్సెలింగ్‌ అనంతరం మిగిలిన సీట్లను ఆయా రాష్ట్రాలకు కేంద్ర ప్రభుత్వం అందజేస్తుంది. కరోనా నేపథ్యంలో ఇప్పట్లో కౌన్సెలింగ్‌ నిర్వహించే అవకాశాల్లేవని భావించారు. తాజాగా వెలువడిన మార్గదర్శకాల ప్రకటనతో ఒక్కసారిగా విద్యార్థుల్లో అప్రమత్తత నెలకొంది.
రాష్ట్రంలో ప్రవేశాలపై సందిగ్ధం
ఒకపక్క కరోనా దెబ్బకు దేశవ్యాప్తంగా లాక్‌డౌన్‌ అమలవుతుండడం.. ఏప్రిల్ నెలాఖరు వరకూ పొడిగించే అవకాశాలుండడంతో.. పీజీ వైద్యవిద్య ప్రవేశాలు నిర్వహించడం వల్ల విద్యార్థులు ఇబ్బందులు పడతారని అభిప్రాయం వ్యక్తమవుతోంది. అఖిల భారత కోటా తొలివిడత ప్రవేశాలు పూర్తయ్యాక రాష్ట్రంలో ప్రవేశ ప్రక్రియ ప్రారంభమవుతుంది. అయితే రాష్ట్రంలో ప్రవేశ ప్రకటనే వెలువడలేదు. దరఖాస్తుల స్వీకరణ, ధ్రువపత్రాల పరిశీలన జరగాలి. తర్వాత తొలివిడత కేటాయింపు జాబితాను విడుదల చేయాలి. ఇందుకు నాలుగు వారాలైనా పడుతుంది. వైరస్‌ వ్యాప్తిని అడ్డుకోవడంపై కఠిన నిర్ణయాలు అమలవుతున్న నేపథ్యంలో.. ఇక్కడ పీజీ వైద్యవిద్య ప్రవేశాలను ఎప్పుడు నిర్ణయించాలనేది రాష్ట్ర ప్రభుత్వమే నిర్ణయించాలి.
మార్గదర్శకాలు
* తొలివిడత కేటాయింపు జాబితాను ఏప్రిల్‌ 10న విడుదల చేస్తారు.
* కేటాయించిన కోర్సు, కళాశాలల్లో అభ్యర్థులు చేరడానికి ఏప్రిల్‌ 20 వరకూ తుది గడువు.
* విద్యార్థులు సంబంధిత కళాశాలకు నేరుగా వెళ్లి, అవసరమైన ధ్రువపత్రాలు ఇచ్చి, రుసుమును చెల్లించి చేరిపోవచ్చు.
* నేరుగా కళాశాలకు వెళ్లడానికి వీలుపడని అభ్యర్థులు ఆన్‌లైన్‌ ద్వారా ప్రవేశ ప్రక్రియను కొనసాగించవచ్చు.
* కేటాయించిన కళాశాల అధికారిక వెబ్‌సైట్‌కు ఆన్‌లైన్‌లో తమ చేరిక ఆమోదాన్ని తెలుపుతూ మెయిల్‌ చేయాలి.
* అవసరమైన ధ్రువపత్రాల నకళ్లను అప్‌లోడ్‌ చేయాలి.
* నిర్దేశిత రుసుమును కళాశాల అకౌంట్‌లో ఆన్‌లైన్‌లో జమ చేయాలి.
* రుసుమును జమ చేయడానికి ముందు.. ఆ కళాశాలకు ఫోన్‌ చేసి, అవసరమైన సమాచారాన్ని తెలుసుకొని, వారి అకౌంట్‌ నంబరు అధికారికమైనదే అని ధ్రువీకరించుకున్న తర్వాతే రుసుమును చెల్లించాలి.
* తాము సమర్పించే సమాచారంలో ఎలాంటి తప్పులున్నా.. సీటు రద్దు చేయడానికి అన్ని అధికారాలూ నిర్వహణ సంస్థకు ఉన్నాయనే నిబంధనకు అంగీకరిస్తూ ముందస్తు హామీ పత్రాన్ని జత పరచాలి.
వచ్చే ఏడాది ఆన్‌లైన్‌లో 5 డిగ్రీ సబ్జెక్టుల బోధన
ఈనాడు, హైదరాబాద్‌: వచ్చే విద్యా సంవత్సరం (2020-21)లో రాష్ట్రంలో అయిదు డిగ్రీ సబ్జెక్టులను ఆన్‌లైన్‌లో అందిస్తామని రాష్ట్ర సాంకేతిక, కళాశాల విద్యాశాఖ కమిషనర్‌ నవీన్‌ మిత్తల్‌ వెల్లడించారు. కరోనా నేపథ్యంలో ఆన్‌లైన్‌ విద్యపై ఓ డిజిటల్‌ లెర్నింగ్‌ మేగజైన్ ఏప్రిల్ 8న‌ ఏర్పాటు చేసిన కార్యక్రమంలో ఆయన తన ఇంటి నుంచి వెబినార్‌ ద్వారా మాట్లాడారు. రాష్ట్రంలో విద్యార్థుల కోసం ఆన్‌లైన్‌ బోధనను అభివృద్ధి చేస్తున్నామని పేర్కొన్నారు. పాలిటెక్నిక్‌ కోర్సుల్లో ఇప్పటికే ఆన్‌లైన్‌ మూల్యాంకనం అమలు చేస్తున్నామని, ఓయూలో సైతం అమలవుతోందని చెప్పారు. కార్యక్రమంలో దాదాపు 200 మంది అధ్యాపకులు, నిపుణులు వెబినార్‌ ద్వారా పాల్గొన్నారు.
కొత్త కోర్సులపై ఏఐసీటీఈ ఆన్‌లైన్‌ శిక్షణ
ఈనాడు, అమరావతి: వృత్తి విద్యా సంస్థల అధ్యాపకులు, పరిశోధకులు, పీజీ చేసేవారికి కొత్త కోర్సులపై అఖిల భారత సాంకేతిక విద్యా మండలి(ఏఐసీటీఈ) ఆన్‌లైన్‌ శిక్షణ అందిస్తోంది. ఇంటర్నెట్‌ ఆఫ్‌ థింగ్స్, కృత్రిమ మేధస్సు, బ్లాక్‌చైన్, సైబర్‌ సెక్యూరిటీ, డాటా సైన్సు, అగ్‌మెంటెడ్‌ రియాల్టీ(ఏఆర్‌)/ వర్చువల్‌ రియాల్టీ(వీఆర్‌), రొబోటిక్స్‌ క్వాంటం కంప్యూటింగ్, త్రిడీ ప్రింటింగ్, డిజైన్‌ కోర్సులపై ఈ శిక్షణ అందించనుంది. ఆన్‌లైన్‌ శిక్షణ అందించే బాధ్యతలను జాతీయ, రాష్ట్ర సాంకేతిక విద్యా సంస్థలకు అప్పగించింది. బ్లాక్‌చైన్‌ కోర్సుపై శిక్షణ ఇచ్చేందుకు జేఎన్‌టీయూ పులివెందుల కళాశాల ఎంపికైంది. ఆన్‌లైన్‌ రిజిస్ట్రేషన్లు ప్రస్తుతం ప్రారంభమయ్యాయి. రిజిస్ట్రేషన్‌ చేసుకున్న అధ్యాపకులకు వీడియో లింకును పంపిస్తారు.
విద్యార్థులకు ఆన్‌లైన్‌ విద్య అందించండి
* విశ్వవిద్యాలయాల రిజిస్ట్రార్లకు గవర్నర్‌ ఆదేశం
ఈనాడు, హైదరాబాద్‌: కరోనా కారణంగా విద్యాసంస్థలు మూసివేసినందువల్ల విద్యార్థులు విద్యా సంవత్సరం నష్టపోకుండా ఆన్‌లైన్‌ విద్య అందించాలని గవర్నర్‌ తమిళిసై సౌందరరాజన్‌ ఆదేశించారు. రాష్ట్రంలోని 15 విశ్వవిద్యాలయాల రిజిస్ట్రార్లతో ఏప్రిల్ 6న‌ ఆమె వీడియో సమావేశం నిర్వహించారు. ఆన్‌లైన్‌ ద్వారా, అందుబాటులో ఉండే యాప్‌లు, లేదా వాట్సప్‌ గ్రూపులు.. ఇలా సాంకేతికతను వినియోగించుకొని పాఠాలు బోధించాలని సూచించారు. కరోనాపై పరిశోధనలు ఏమైనా చేస్తున్నారా అని ఆరా తీశారు. సమావేశంలో ఉన్నత విద్యామండలి ఛైర్మన్‌ తుమ్మల పాపిరెడ్డి, ఉపాధ్యక్షులు లింబాద్రి, వెంకటరమణ, వ్యవసాయ వర్సిటీ ఉపకులపతి ప్రవీణ్‌రావు తదితరులు పాల్గొన్నారు.
ఫైనల్‌ ఎంబీబీఎస్‌ పార్ట్‌-1 ఫలితాల విడుదల
ఎన్టీఆర్‌ ఆరోగ్య విశ్వవిద్యాలయం, న్యూస్‌టుడే: ఫైనల్‌ ఎంబీబీఎస్‌ (పార్ట్‌-1) ఫలితాలను ఎన్టీఆర్‌ ఆరోగ్య విశ్వవిద్యాలయం విడుదల చేసింది. భారతీయ వైద్య మండలి, విశ్వవిద్యాలయ మార్గనిర్దేశకాల మేరకు గ్రేస్‌ మార్కులు కలిపిన తర్వాతే ఫలితాలను వెల్లడించామని పరీక్షల నియంత్రణాధికారి డాక్టర్‌ ఎం.వి.భీమేశ్వర్‌ తెలిపారు.
ఫలితాలు: http://ntruhs.ap.nic.in/ntruhsresult/finalmbbspart1 లో చూడొచ్చు.
ఒకటే పరీక్ష..18 సంస్థల్లోకి ప్రవేశం!
* సీయూ సెట్‌ - 2020
కేంద్రీయ విశ్వవిద్యాలయాల్లో యూజీ, పీజీ, రిసెర్స్‌ కోర్సుల్లో ప్రవేశానికి నిర్వహించే సీయూ సెట్‌ ప్రకటన వెలువడింది. ఈ పరీక్షలో చూపిన ప్రతిభతో 14 కేంద్రీయ విశ్వవిద్యాలయాలతోపాటు 4 రాష్ట్రస్థాయి సంస్థలు అందిస్తున్న కోర్సుల్లో చేరడానికి వీలవుతుంది. ఇంటర్‌, డిగ్రీ, పీజీ ఉత్తీర్ణులు, ఆఖరు సంవత్సరం కోర్సులు చదువుతున్నవారు దరఖాస్తు చేసుకోవచ్చు. వివిధ సంస్థల్లో విస్తృతంగా ఉన్న రకరకాల కోర్సుల్లో చేరటానికి సీయూ సెట్‌ స్కోరు ఉపయోగపడుతుంది.
మ్యాథ్స్‌, మేనేజ్‌మెంట్‌ స్టడీస్‌, జువాలజీ, జర్నలిజం, ఎకనామిక్స్‌, ఎన్విరాన్‌మెంటల్‌ స్టడీస్‌.. కోర్సు ఏదైనప్పటికీ సెంట్రల్‌ యూనివర్సిటీలు ఉమ్మడిగా నిర్వహించే ప్రవేశపరీక్ష ద్వారా అన్ని సంస్థల్లోని సీట్లకూ పోటీ పడవచ్చు. ఈ కేంద్రీయ సంస్థలన్నీ ప్రమాణాలకు పేరుపొందినవే. ఇంటర్‌ అర్హతతో యూజీ, ఇంటిగ్రేటెడ్‌ పీజీ కోర్సులకు దరఖాస్తు చేసుకోవచ్చు. సెంట్రల్‌ యూనివర్సిటీల్లో ప్రవేశానికి దేశవ్యాప్తంగా అందరూ పోటీ పడవచ్చు. మిగిలిన 4 రాష్ట్రస్థాయి సంస్థలకు స్థానిక రిజర్వేషన్లు వర్తిస్తాయి.
యూజీ కోర్సులు
బీఏ బీఎడ్‌, బీఎస్సీ బీఎడ్‌: ఈ కోర్సులను కొన్ని సంస్థలు అందిస్తున్నాయి. వ్యవధి నాలుగేళ్లు. ఈ విధానంలో చదువుకున్నవారికి ఏడాది సమయం ఆదా అవుతుంది. బీఏ బీఎడ్‌ కోర్సుకు ఇంటర్‌ అన్ని గ్రూపుల వారు, బీఎస్సీ బీఎడ్‌కు మ్యాథ్స్‌, సైన్స్‌ గ్రూపులవారు దరఖాస్తు చేసుకోవచ్చు.
వొకేషనల్‌ స్టడీస్‌: బ్యాంకింగ్‌ అండ్‌ ఫైనాన్షియల్‌ సర్వీసెస్‌, బయో మెడికల్‌ సైన్సెస్‌, ఇండస్ట్రియల్‌ వేస్ట్‌ మేనేజ్‌మెంట్‌, రిటైల్‌ అండ్‌ లాజిస్టిక్స్‌ మేనేజ్‌మెంట్‌, రిటైల్‌ మేనేజ్‌మెంట్‌, రిటైల్‌ మేనేజ్‌మెంట్‌ అండ్‌ ఐటీ, టూరిజం అండ్‌ హాస్పిటాలిటీ మేనేజ్‌మెంట్‌, టూరిజం అండ్‌ ట్రావెల్‌ మేనేజ్‌మెంట్‌ కోర్సులను వొకేషనల్‌ స్టడీస్‌లో భాగంగా అందిస్తున్నారు. వీటి వ్యవధి మూడేళ్లు. వీటిలో చేరడానికి ఇంటర్‌ అన్ని గ్రూపులవారికీ అవకాశం ఉంటుంది.
బీఏ: చైనీస్‌, జర్మన్‌ స్టడీస్‌, కొరియన్‌, ఎకనామిక్స్‌, పొలిటికల్‌ సైన్స్‌, ఇంటర్నేషనల్‌ రిలేషన్స్‌, సెక్యూరిటీ మేనేజ్‌మెంట్‌, సోషల్‌ సైన్స్‌ కోర్సులు. వీటికి ఇంటర్‌ అన్ని గ్రూపుల వారూ పోటీ పడవచ్చు. బీఏఎల్‌ఎల్‌బీ, బీబీఏ, బీసీఏ, బీపీఏ మ్యూజిక్‌ కోర్సులూ ఉన్నాయి.
బీఎస్సీ: ఎకనామిక్స్‌, జాగ్రఫీ, మ్యాథ్స్‌, ఫిజిక్స్‌, కెమిస్ట్రీ, సైకాలజీ, టెక్స్‌టైల్‌ కోర్సులు. వీటిలో కొన్నింటికి అన్ని గ్రూపుల విద్యార్థులూ పోటీ పడవచ్చు. మిగిలినవాటికి ఇంటర్‌లో ఆ సబ్జెక్టు చదివి ఉండాలి.
బీటెక్‌: సివిల్‌ ఇంజినీరింగ్‌, కంప్యూటర్‌ సైన్స్‌ అండ్‌ ఇంజినీరింగ్‌, ఎల‌్రక్టికల్‌ ఇంజినీరింగ్‌, ఎలక్ట్రానిక్స్‌ అండ్‌ కమ్యూనికేషన్‌ ఇంజినీరింగ్‌, ప్రింటింగ్‌ అండ్‌ ప్యాకేజింగ్‌ టెక్నాలజీ కోర్సులు ఉన్నాయి. వీటిలో ప్రవేశం పరీక్షలో చూపిన ప్రతిభతో లభిస్తుంది.
డిప్లొమా, సర్టిఫికెట్‌: బ్యూటీ అండ్‌ వెల్‌నెస్‌, రిటైల్‌ మేనేజ్‌మెంట్‌ కోర్సులు అందిస్తున్నారు. వీటికి ఇంటర్‌ అన్ని గ్రూపుల విద్యార్థులూ పోటీ పడవచ్చు.
పీజీలు
ఎంబీఏ: ఇందులో జనరల్‌ కోర్సుతోపాటు వివిధ స్పెషలైజేషన్లను సంస్థలు అందిస్తున్నాయి. అగ్రి బిజినెస్‌, అపారెల్‌ మేనేజ్‌మెంట్‌, రిటైల్‌ మేనేజ్‌మెంట్‌, టెక్స్‌టైల్‌ మేనేజ్‌మెంట్‌, బిజినెస్‌ ఎకనామిక్స్‌, హ్యూమన్‌ రిసోర్స్‌ మేనేజ్‌మెంట్‌, టూరిజం అండ్‌ హాస్పిటాలిటీ మేనేజ్‌మెంట్‌, టూరిజం అండ్‌ ట్రావెల్‌ మేనేజ్‌మెంట్‌, టూరిజం అండ్‌ హోటల్‌ మేనేజ్‌మెంట్‌..మొదలైనవి ఉన్నాయి. ఏదైనా డిగ్రీ విద్యార్హతతో వీటికి పోటీ పడవచ్చు.
ఎమ్మెస్సీ: ఆంత్రోపాలజీ, అప్లయిడ్‌ జియోగ్రఫీ అండ్‌ జియోఇన్ఫర్మాటిక్స్‌, అప్లయిడ్‌ జియాలజీ, అప్లయిడ్‌ సైకాలజీ, అట్మాస్ఫిరిక్‌ సైన్స్‌, బయో కెమిస్ట్రీ, బయో డైవర్సిటీ అండ్‌ కన్జర్వేషన్‌ ఆఫ్‌ నేచురల్‌ రిసోర్సెస్‌, బయో సైన్స్‌ అండ్‌ బయో ఇన్ఫర్మాటిక్స్‌, బయోటెక్నాలజీ, బోటనీ, కెమికల్‌ సైన్సెస్‌, కెమిస్ట్రీ, మెడిసినల్‌ కెమిస్ట్రీ, అప్లయిడ్‌ కెమిస్ట్రీ, కంప్యుటేషనల్‌ కెమిస్ట్రీ, కంప్యూటర్‌ సైన్స్‌, డిజిటల్‌ సెక్యూరిటీ, ఎన్విరాన్‌మెంటల్‌ సైన్స్‌, ఎపిడమాలజీ అండ్‌ పబ్లిక్‌ హెల్త్‌, ఫుడ్‌ సైన్స్‌ అండ్‌ టెక్నాలజీ, జీనోమిక్‌ సైన్స్‌, జాగ్రఫీ, జియోఇన్ఫర్మాటిక్స్‌, జియాలజీ, హార్టికల్చర్‌, హ్యూమన్‌ జెనెటిక్స్‌, ఇండస్ట్రియల్ కెమిస్ట్రీ, ఇన్ఫర్మేషన్‌ టెక్నాలజీ, లైఫ్‌ సైన్స్‌, మెటీరియల్‌ సైన్సెస్‌ అండ్‌ టెక్నాలజీ, మ్యాథ్స్‌, మైక్రోబయాలజీ, మాలిక్యులర్‌ మెడిసిన్‌, నానో టెక్నాలజీ, న్యూట్రిషన్‌ బయాలజీ, ఫిజిక్స్‌, స్పోర్ట్స్‌ బయోకెమిస్ట్రీ, స్పోర్ట్స్‌ ఫిజియాలజీ, స్పోర్ట్స్‌ న్యూట్రిషన్‌, స్పోర్ట్స్‌ సైకాలజీ, స్టాటిస్టిక్స్‌, యోగ, యోగ థెరపీ, జువాలజీ .. తదితర కోర్సులున్నాయి. వీటిలో ప్రవేశానికి సంబంధిత లేదా అనుబంధ సబ్జెక్టును యూజీ స్థాయిలో చదవడం తప్పనిసరి.
ఎంఏ: ఆంత్రపాలజీ, అప్లైడ్‌ క్రిమినాలజీ అండ్‌ పోలీస్‌ స్టడీస్‌, చైనీస్‌, క్లాసికల్‌ తమిళ్‌ స్టడీస్‌, కంపారిటివ్‌ రెలిజియన్‌, కన్వర్జెంట్‌ జర్నలిజం, క్రిమినల్‌ లా, కల్చరల్‌ ఇన్ఫర్మాటిక్స్‌, కల్చర్‌ అండ్‌ మీడియా స్టడీస్‌, డిఫెన్స్‌ అండ్‌ స్ట్రాటజిక్‌ స్టడీస్‌, డెవలప్‌మెంట్‌ స్టడీస్‌, ఎకనామిక్స్‌, ఎడ్యుకేషన్‌, ఇంగ్లిష్‌, ఫైన్‌ ఆర్ట్స్‌, ట్రైబల్‌ స్టడీస్‌, జర్మన్‌ స్టడీస్‌, గుజరాతీ, హిందీ, హిస్టరీ, ఇస్లామిక్‌ స్టడీస్‌, జర్నలిజం అండ్‌ మాస్‌ కమ్యూనికేషన్‌, కన్నడ, లింగ్విస్టిక్స్‌, మలయాళం, నేషనల్‌ సెక్యూరిటీ స్టడీస్‌, ఒడియా, పొలిటికల్‌ సైన్స్‌, పబ్లిక్‌ అడ్మినిస్ట్రేషన్‌, పంజాబీ, సోషల్‌ వర్క్‌, సోషియాలజీ, సంస్కృతం, తెలుగు, ఉర్దూ. వీటిలో చాలా కోర్సులకు సాధారణ డిగ్రీ అర్హతతో దరఖాస్తు చేసుకోవచ్చు. మిగిలినవాటికి యూజీలో సంబంధిత లేదా అనుబంధ సబ్జెక్టు చదివుండాలి. ఎంకాం, ఎల్‌ఎల్‌ఎం, లైబ్రరీ అండ్‌ ఇన్ఫర్మేషన్‌ సైన్స్‌, ఎంపీఈడీ, ఎంపీఏ, ఎంఫార్మ్‌, ఎంసీఏ కోర్సులు పలు సంస్థల్లో అందిస్తున్నారు.
ఎంటెక్‌: ఆక్వాకల్చరల్‌ ఇంజినీరింగ్‌, కంప్యూటర్‌ సైన్స్‌, సైబర్‌ సెక్యూరిటీ, ఎనర్జీ ఇంజినీరింగ్‌, పవర్‌ ఇంజినీరింగ్‌, ఫుడ్‌ ప్రాసెసింగ్‌, మెటీరియల్‌ సైన్సెస్‌ అండ్‌ టెక్నాలజీ, వీఎల్‌ఎస్‌ఐ, నానో సైన్స్‌ అండ్‌ టెక్నాలజీ, పవర్‌ అండ్‌ ఎనర్జీ ఇంజినీరింగ్‌, ట్రాన్స్‌పోర్టేషన్‌ ఇంజినీరింగ్‌, వాటర్‌ ఇంజినీరింగ్‌ అండ్‌ మేనేజ్‌మెంట్‌, వాటర్‌ రిసోర్స్‌ డెవలప్‌మెంట్‌ అండ్‌ మేనేజ్‌మెంట్‌.. బీటెక్‌లో సంబంధిత లేదా అనుబంధ కోర్సులు చదివినవారు వీటికి అర్హులు. పరీక్షలో చూపిన ప్రతిభతో ప్రవేశాలు కల్పిస్తారు.
పీజీ డిప్లొమా: ఆల్టర్నేట్‌ బ్యాంకింగ్‌, కెమికల్‌ లేబొరేటరీ టెక్నీషియన్‌, గైడెన్స్‌ అండ్‌ కౌన్సెలింగ్‌, మీడియా రైటింగ్‌ అండ్‌ డిజిటల్‌ కమ్యూనికేషన్‌, ఎన్‌ఆర్‌ఐ లాస్‌, పీస్‌ అండ్‌ కాన్‌ఫ్లిక్‌ స్టడీస్‌..తదితర కోర్సులు ఉన్నాయి. డిగ్రీ ఉత్తీర్ణులు వీటికి దరఖాస్తు చేసుకోవచ్చు.
ఎలా సిద్ధం కావాలి?
యూజీ, ఇంటిగ్రేటెడ్‌ పీజీ, పీజీ కోర్సుల్లో ప్రవేశానికి నిర్వహించే పరీక్షకు సమాధానాలు ఓఎంఆర్‌ పత్రంపై గుర్తించాలి. ప్రశ్నలన్నీ ఆబ్జెక్టివ్‌ (మల్టిపుల్‌ ఆప్షన్స్‌) తరహాలో వస్తాయి. మొత్తం వంద ప్రశ్నలు రెండు విభాగాల్లో అడుగుతారు. పార్ట్‌- ఎలో 25 ప్రశ్నలు లాంగ్వేజ్‌, జనరల్‌ అవేర్‌నెస్‌, మ్యాథమేటికల్‌ ఆప్టిట్యూడ్‌, ఎనలిటికల్‌ స్కిల్స్‌ నుంచి వస్తాయి. పార్ట్‌- బిలో సంబంధిత విభాగానికి చెందిన 75 ప్రశ్నలు ఉంటాయి. వీటిని 3 లేదా 4 లేదా 5 సెక్షన్లుగా విభజించి అడుగుతారు. ప్రతి సెక్షన్‌లోనూ 25 ప్రశ్నల చొప్పున వస్తాయి. ఇందులో కనీసం 3 సెక్షన్ల నుంచి ప్రశ్నలకు సమాధానాలు రాయాలి. కొన్ని సబ్జెక్టులు, జనరల్‌ కోర్సుల్లో నిర్వహించే పరీక్షలకు మొత్తం వంద ప్రశ్నలు ఒకే సెక్షన్‌ కింద అడగవచ్చు. ఈ తరహా ప్రశ్నపత్రాల్లో ఇంగ్లిష్‌ లాంగ్వేజ్‌, రీజనింగ్‌, డేటా ఇంటర్‌ ప్రిటేషన్స్‌ లేదా న్యూమరికల్‌ ఎబిలిటీ, జనరల్‌ అవేర్‌నెస్‌, ఎనలిటికల్‌ స్కిల్స్‌ నుంచి ప్రశ్నలు వస్తాయి. రుణాత్మక మార్కులు ఉన్నాయి. ప్రతి తప్పు సమాధానానికీ పావు మార్కు చొప్పున తగ్గిస్తారు. పరీక్ష వ్యవధి రెండు గంటలు.
మన తెలుగు రాష్ట్రాల్లో ఇంటర్‌ విద్యార్థులు ఎంసెట్‌, జేఈఈకి సంసిద్ధులైవుంటారు కాబట్టి పార్ట్‌-బి విభాగం సిలబస్‌ వారికి సుపరిచితమే. (ప్రశ్నలు జేఈఈ మెయిన్‌ స్థాయిలో ఉండవచ్చు). కాబట్టి విద్యార్థుల పార్ట్‌-ఎ ప్రశ్నలపై ఎక్కువ దృష్టి పెట్టాలి. డిగ్రీ విద్యార్థులు తమ సబ్జెక్టుల్లో డిగ్రీ స్థాయి సిలబస్‌ను క్షుణ్ణంగా చదవాలి. డిగ్రీ సిలబస్‌తో సీయూ సెట్‌ను పోల్చి చూసుకుని అదనపు అంశాలను రిఫరెన్స్‌ పుస్తకాలు, ఆన్‌లైన్‌ సమాచారం ఆధారంగా అధ్యయనం చేయాలి.
రిసెర్చ్‌ కోర్సులకు దరఖాస్తు చేసుకున్నవారికి పరీక్షను ఆన్‌లైన్‌లో నిర్వహిస్తారు. ఇందులోనూ రెండు పార్ట్‌లు ఉంటాయి. పార్ట్‌-ఎలో 50 మల్టిపుల్‌ ఛాయిస్‌ ప్రశ్నలను లాంగ్వేజ్‌, జనరల్‌ అవేర్‌నెస్‌, మ్యాథమెటికల్‌ ఆప్టిట్యూడ్‌, ఎనలిటికల్‌ స్కిల్స్‌, రిసెర్చ్‌ మెథడాలజీల నుంచి అడుగుతారు. పార్ట్‌-బిలో 50 ప్రశ్నలు సంబంధిత సబ్జెక్టు నుంచి వస్తాయి. ఈ విభాగంలోని ప్రశ్నలకు రుణాత్మక మార్కులు లేవు.
ముఖ్యమైన తేదీలు
ఆన్‌లైన్‌ దరఖాస్తులకు చివరి తేదీ: ఏప్రిల్‌ 11, 2020.
పరీక్షలు: దరఖాస్తు చేసుకున్న కోర్సు ప్రకారం మే 30, 31; జూన్‌ 6, 7 తేదీల్లో.
పరీక్ష కేంద్రాలు: తెలంగాణలో హైదరాబాద్‌, కరీంనగర్‌, నిజామాబాద్‌, వరంగల్‌. ఏపీలో విజయవాడ, విశాఖపట్నం, గుంటూరు, తిరుపతి, రాజమండ్రి, కర్నూలు, అనంతపురం, శ్రీకాకుళం, పలాస.
వెబ్‌సైట్‌: https:// cucetexam.in/
ఇంటిగ్రేటెడ్‌/ డ్యూయల్‌ డిగ్రీ పీజీ
ఎమ్మెస్సీ, ఎంఏ, ఎంసీఏ: ఈ కోర్సుల వ్యవధి అయిదేళ్లు. ఇంటర్‌ విద్యార్హతతో వీటిని అందిస్తున్నారు. బయోకెమిస్ట్రీ, బయోటెక్నాలజీ, బోటనీ, కెమిస్ట్రీ, కంప్యూటర్‌ సైన్స్‌, ఎకనామిక్స్‌, ఎన్విరాన్‌మెంటల్‌ సైన్స్‌, లింగ్విస్టిక్స్‌, మైక్రో బయాలజీ, ఫిజిక్స్‌, సోషల్‌ మేనేజ్‌మెంట్‌, స్టాటిస్టిక్స్‌, జువాలజీ, ఎంసీఏ కోర్సులు ఇంటిగ్రేటెడ్‌ లేదా డ్యూయల్‌ డిగ్రీ విధానంలో ఉన్నాయి. కొన్నింటికి అన్ని గ్రూపుల వారు, మిగిలినవాటికి ఇంటర్‌లో సంబంధిత సబ్జెక్టు చదువుకున్నవాళ్లు దరఖాస్తు చేసుకోవచ్చు.
ఎంఫిల్‌, పీహెచ్‌డీ
దాదాపు అన్ని కోర్సులు, విభాగాల్లోనూ ఎంఫిల్‌, పీహెచ్‌డీ అందిస్తున్నారు. సంబంధిత సబ్జెక్టుల్లో పీజీ చదివినవారు అర్హులు. పరీక్షలో చూపిన ప్రతిభతో ప్రవేశాలు లభిస్తాయి.
వెలుగుతున్న స్వయం ప్రతిభ
* విద్యాసంస్థల మూసివేతతో ఆన్‌లైన్‌ కోర్సులకు భారీ తాకిడి
* 5 రోజుల్లో 50 వేల మంది నమోదు
హైదరాబాద్‌: కరోనా కల్లోలం నేపథ్యంలో కేంద్ర మానవ వనరుల శాఖ ఆధ్వర్యంలోని స్వయం ఆన్‌లైన్‌ కోర్సులకు భారీగా డిమాండ్‌ పెరుగుతోంది. జాతీయస్థాయిలో ఆన్‌లైన్‌ విద్యను ప్రోత్సహించాలని మాసివ్‌ ఓపెన్‌ ఆన్‌లైన్‌ కోర్సు (మూక్స్‌) తరహాలో కేంద్ర ప్రభుత్వం ‘స్వయం’ పేరిట ఒక వేదికను కొన్ని సంవత్సరాల క్రితం అందుబాటులోకి తెచ్చింది. అందులో దాదాపు 1900 కోర్సులు ఉన్నాయి. వాటిని ఐఐటీలు, ఐఐఎంలు, కేంద్రీయ విశ్వవిద్యాలయాలు రూపొందించాయి. గత జనవరి సెమిస్టర్‌కు 571 కోర్సుల్లో భారత్‌తోపాటు సుమారు 60 దేశాల నుంచి 25 లక్షల మంది నమోదు చేసుకున్నారు. కరోనా వైరస్‌ వ్యాప్తి నేపథ్యంలో దేశవ్యాప్తంగా విద్యాసంస్థలను మూసివేయడంతో విద్యార్థుల నుంచి ఈ కోర్సులకు భారీ డిమాండ్‌ పెరిగింది. ఈ ఏడాది మార్చి 23 నుంచి 27వ తేదీ వరకు కేవలం అయిదు రోజుల్లో 50 వేల మంది అదనంగా కోర్సుల్లో ప్రవేశాలు పొందారు. ఈ కోర్సులన్నీ ఉచితమే.
* స్వయం ప్రభ పేరిట డీటీహెచ్‌ టీవీ ఛానెళ్లను ప్రతిరోజూ 50 వేల మంది వీక్షిస్తున్నారు.
* నేషనల్‌ డిజిటల్‌ లైబ్రరీలో ప్రతిరోజూ కొత్తగా 43 వేల మంది నమోదవుతున్నారు. ఇది సాధారణ రోజుల కంటే రెట్టింపునకుపైగా ఉందని కేంద్ర ప్రభుత్వం వెల్లడించింది.
* ఎన్‌సీఈఆర్‌టీ ఆధ్వర్యంలోని దీక్ష, ఈ-పాఠశాలతోపాటు రోబోటిక్స్‌ ఎడ్యుకేషన్‌కు ప్రత్యేకంగా తీసుకొచ్చిన ఇ-తంత్ర, వర్చువల్‌ ల్యాబ్స్, స్పోకెన్‌ ట్యుటోరియల్‌ లాంటి వాటిని పెద్ద మొత్తంలో విద్యార్థులు వినియోగించుకుంటున్నారని కేంద్ర మానవ వనరుల శాఖ ప్రకటించింది.
10,12 తరగతుల్లో ముఖ్యమైన సబ్జెక్టుల్లోనే పరీక్షలు
* సీబీఎస్‌ఈకి కేంద్రమంత్రి ఆదేశం
దిల్లీ: సెంట్రల్‌ బోర్డ్‌ ఆఫ్‌ సెకండరీ ఎడ్యుకేషన్‌ (సీబీఎస్‌ఈ) ఈ ఏడాది 10, 12వ తరగతుల విద్యార్థులకు కేవలం ముఖ్యమైన 29 సబ్జెక్టుల్లోనే పరీక్షలు నిర్వహించనుంది. ఉన్నత విద్యా సంస్థల్లో ప్రవేశాలకు, పై తరగతుల్లోకి వెళ్లేందుకు అవసరమైన ముఖ్యమైన సబ్జెక్టులకు మాత్రమే పరీక్షలు నిర్వహించాలని సీబీఎస్‌ఈకి సలహా ఇచ్చినట్లు కేంద్ర మానవ వనరుల అభివృద్ధి శాఖ మంత్రి రమేశ్‌ పొక్రియాల్ ఏప్రిల్ 1న‌ తెలిపారు. ఈ పరీక్షలు నిర్వహించడానికి అనుకూల వాతావరణం ఉన్నప్పుడు సీబీఎస్‌ఈ విద్యార్థులకు ముందుగా సమాచారం ఇస్తూ ప్రకటన విడుదల చేస్తుందన్నారు. మిగిలిన సబ్జెక్టులకు పరీక్షలు నిర్వహించరని, వాటికి మార్కులు ఎలా ఇవ్వాలన్నదానిపై త్వరలో మార్గదర్శకాలు జారీ అవుతాయని చెప్పారు. కరోనా వైరస్‌ వ్యాప్తి నేపథ్యంలో 1నుంచి 8వ తరగతి వరకూ చదివే విద్యార్థులకు పరీక్షలు నిర్వహించకుండానే తరవాత తరగతికి ప్రమోట్‌ చేయమని కూడా ఆదేశించినట్లు తెలిపారు.
ఉమ్మడి ప్రవేశ పరీక్షల దరఖాస్తు గడువు పొడిగింపు
ఈనాడు, అమరావతి: రాష్ట్రంలో నిర్వహించనున్న ఉమ్మడి ప్రవేశ పరీక్షల దరఖాస్తు గడువును పొడిగిస్తున్నట్లు ఉన్నత విద్యామండలి ప్రకటించింది. ఎంసెట్, ఈసెట్, ఐసెట్, పీజీఈసెట్, లాసెట్, పీఈసెట్‌ దరఖాస్తు సమయాన్ని ఏప్రిల్‌ 17వరకు పొడిగించింది. ఎడ్‌సెట్‌కు దరఖాస్తు గడువును ఏప్రిల్‌ 24 వరకు పొడిగించింది. దరఖాస్తుల తప్పుల సవరణ, హాల్‌టికెట్ల డౌన్‌లోడ్‌ తదితర వివరాలను తర్వాత ప్రకటిస్తామని వెల్లడించింది.
ప్రవేశ పరీక్షల గడువు పెంపు
ఈనాడు, దిల్లీ: దేశంలో ప్రస్తుతం నెలకొన్న పరిస్థితుల దృష్ట్యా ఐకార్‌, జేఎన్‌యూ, యూజీసీ, నెట్‌, సీఎస్‌ఐఆర్‌, ఎన్‌సీహెచ్‌ఎం జేఈఈ, ఇగ్నో పీహెచ్‌డీ, మేనేజ్‌మెంట్‌ ప్రవేశ పరీక్షల దరఖాస్తు గడువును నెల రోజులు పెంచుతున్నట్టు కేంద్ర మానవ వనరుల అభివృద్ధి శాఖ మంత్రి రమేశ్‌ పోఖ్రియాల్‌ తెలిపారు.
తెలంగాణ ‘పది’ పరీక్షలు మ‌ళ్లీ వాయిదా
హైదరాబాద్‌: మార్చి 31 నుంచి ఏప్రిల్‌ 6 వరకు జరగాల్సిన పదో తరగతి పరీక్షలను మరోసారి వాయిదా వేస్తున్నట్టు తెలంగాణ ఎస్‌ఎస్‌సీ బోర్డు వెల్లడించింది. కరోనా వైరస్ ప్రభావం నేపథ్యంలో హైకోర్టు ఆదేశాల మేరకు మార్చి 30 వరకు పరీక్షలను వాయిదా వేసిన విషయం తెలిసిందే. లాక్‌డౌన్ దృష్ట్యా అన్ని పరక్షలను వాయిదా వేస్తున్నట్టు ఎస్‌ఎస్‌సీ డైరెక్టర్ సత్యనారాయణ రెడ్డి వెల్లడించారు. పరీక్షల తేదీలను తర్వాత వెల్లడిస్తామన్నారు.
యువైకా - 2020 ధ్రువపత్రాల స్వీకరణకు 2 వరకు గడువు
శ్రీహరికోట, న్యూస్‌టుడే: ఇస్రో 2020లో నిర్వహించే యువ వైజ్ఞానిక కార్యక్రమానికి (యువైకా-2020) ప్రొబేషన్‌ అర్హత సాధించిన విద్యార్థులు ధ్రువీకరణ పత్రాలను పంపేందుకు ఏప్రిల్‌ రెండో తేదీ వరకు గడువు పొడిగించారు. ఇంతకు ముందు మార్చి 26 వరకు గడువు ఉండేది. యువ శాస్త్రవేత్తల కార్యక్రమానికి దేశవ్యాప్తంగా 318 మంది విద్యార్థులను ఎంపిక చేశారు. వీరి ధ్రువపత్రాలను పరిశీలించి.. 113 మందిని ఎంపిక చేస్తారు.
విదేశీ వర్సిటీల వేసవి ప్రవేశాలు రద్దు
* కరోనా ప్రభావంతో ఈ నిర్ణయం
* తదుపరి సీజన్‌పైనే విద్యార్థుల ఆశలు
ఈనాడు, హైదరాబాద్‌: కరోనా ముప్పు కారణంగా ప్రపంచవ్యాప్తంగా పలు విశ్వవిద్యాలయాలు వేసవి కాలం ప్రవేశాలను రద్దు చేశాయి. ఈ మేరకు అమెరికా, బ్రిటన్, ఐర్లాండ్‌ తదితర దేశాలకు చెందిన పలు వర్సిటీలు విద్యార్థులకు సమాచారం ఇచ్చాయి. దీంతో ప్రవేశాలకు అన్నీ సిద్ధం చేస్తున్న భారతీయ విద్యార్థులు విమాన టికెట్లను రద్దు చేసుకున్నారు. వారిలో వందలాది మంది తెలుగు రాష్ట్రాల విద్యార్థులూ ఉన్నారు. జులై నుంచి ప్రారంభమయ్యే ఫాల్‌ సీజన్‌పైనే వీరంతా ఆశలు పెట్టుకున్నారు. విదేశీ విశ్వవిద్యాలయాలు ఫాల్, స్ప్రింగ్‌ సీజన్‌ పేరిట విద్యార్థులకు ప్రవేశాలు కల్పిస్తాయి. పలు వర్సిటీలు సమ్మిట్‌ ఇన్‌టేక్‌ పేరిట ఏప్రిల్‌/మే నెలల్లో కూడా ప్రవేశాలు కల్పిస్తాయి. ఈ సీజన్‌లో సుమారు 5 శాతం వరకు విద్యార్థులు ప్రవేశాలు పొందుతారు. బ్రిటన్‌ కేవలం ఒక నెలకు మాత్రమే వీసాలు ఇస్తుంది. అక్కడ ఫాల్‌ సీజన్‌ ప్రారంభం కావాలంటే ఆగస్టు వరకు ఆగాలి. అంటే అప్పటికి వీసా గడువు తీరుతుంది. మళ్లీ వీసా తిరిగి పొందాల్సి ఉంటుందని వరల్డ్‌ వైడ్‌ ఎడ్యు కన్సల్టెన్సీ ఎండీ ఉడుముల వెంకటేశ్వర్‌రెడ్డి తెలిపారు.
ఐర్లాండ్‌లో విద్యార్థులకు పరిహారం
కరోనాతో లాక్‌డౌన్‌ కావడంతో ఐర్లాండ్‌లో చదువుతూ తాత్కాలిక ఉద్యోగాలు చేస్తున్న విద్యార్థులకు వారానికి 203 యూరోల వంతున నెలకు 812 యూరోలు ఆర్థిక సహాయం అందజేస్తామని అక్కడి ప్రభుత్వం తెలిపింది. కొన్ని ఆస్ట్రేలియా విశ్వవిద్యాలయాలు ట్యూషన్‌ రుసుములను తగ్గించాలని భావిస్తున్నట్లు సమాచారం.
సెప్టెంబరు వరకు వేచిచూడాల్సిందే
బ్రిటన్‌లోని యూనివర్సిటీ ఆఫ్‌ ఈస్ట్‌ లండన్‌లో ఎంఎస్‌ కంప్యూటర్‌ సైన్స్‌ ప్రవేశానికి వీసా కూడా లభించింది. ఏప్రిల్‌ 11వ తేదీన ఇక్కడి నుంచి వెళ్లాల్సి ఉంది. తాజాగా వేసవి ప్రవేశాలను రద్దు చేస్తున్నట్లు సమాచారం ఇవ్వడంతో విమాన టికెట్‌ను రద్దు చేసుకున్నాను. వారిచ్చిన ఒక నెల వీసా గడువు కూడా తీరిపోతుంది. మళ్లీ దరఖాస్తు చేసుకోవాల్సి వస్తుంది. ముందుగానే రూ.3 లక్షలు చెల్లించాను. మళ్లీ సెప్టెంబరు వరకు వేచి చూడక తప్పదు.
తెలంగాణలో ఎంసెట్‌ దరఖాస్తుల గడువు పొడిగింపు
హైదరాబాద్‌: కరోనా వైరస్‌ ప్రభావం నేపథ్యంలో తెలంగాణలో ఎంసెట్‌, ఈసెట్‌ దరఖాస్తు గడువును రాష్ట్ర ఉన్నత విద్యామండలి పొడిగించింది. ఏప్రిల్‌ 7 వరకు ఎంసెట్‌, ఈసెట్‌ దరఖాస్తుల గడువును ఏప్రిల్‌ 5 వరకు పొడిగిస్తున్నట్టు వెల్లడించింది.
ఏపీలో పది పరీక్షలు వాయిదా
అమరావతి: కరోనా వైరస్‌ వ్యాప్తి దృష్ట్యా ఏపీ ప్రభుత్వం మరో కీలక నిర్ణయం తీసుకుంది. మార్చి 31 నుంచి నిర్వహించాల్సి పదో తరగతి పరీక్షలు వాయిదా వేస్తున్నట్టు విద్యాశాఖ ప్రకటించింది. రాష్ట్రంలో ఇప్పటి వరకూ ఏడుగురు కరోనా వైరస్‌ బారిన పడిన విషయం తెలిసిందే. కరోనా మహమ్మారి మరింత విజృంభిస్తున్న నేపథ్యంలో ప్రభుత్వం ఈ నిర్ణయం తీసుకుంది. పది పరీక్షలు మళ్లీ ఎప్పడు నిర్వహించేది మార్చి 31 తర్వాత ప్రకటించనున్నట్టు సమాచారం.
ప్రవేశ పరీక్షల దరఖాస్తు గడువు పొడిగింపు
ఈనాడు, అమరావతి: ఎంసెట్, ఈసెట్, ఐసెట్‌ ప్రవేశ పరీక్షల దరఖాస్తుల గడువు పొడిగించారు. కరోనా వైరస్‌ వ్యాప్తి నివారణ ముందస్తు చర్యల్లో భాగంగా ఇంటర్నెట్‌ కేంద్రాలను మూసివేయడంతో దరఖాస్తులకు ఇబ్బందులు ఎదురవుతున్నట్లు విద్యార్థుల నుంచి వినతులు రావడంతో ఈ నిర్ణయం తీసుకున్నారు. ఎంసెట్‌ దరఖాస్తు గడువును ఏప్రిల్‌ 5వ తేదీ వరకు పొడిగించినట్లు ఉమ్మడి ప్రవేశ పరీక్షల ప్రత్యేక అధికారి సుధీర్‌రెడ్డి తెలిపారు.
ఎంసెట్‌
* దరఖాస్తు చివరి గడువు: ఏప్రిల్‌ 5
* రూ.500 అపరాధ రుసుముతో దరఖాస్తు: ఏప్రిల్‌ 10
* రూ.వెయ్యితో దరఖాస్తు: ఏప్రిల్‌ 15
* రూ.ఐదు వేలతో దరఖాస్తు: ఏప్రిల్‌ 17
* రూ.10వేలతో దరఖాస్తు: ఏప్రిల్‌ 19
ఈసెట్‌..
* దరఖాస్తు చివరి గడువు: ఏప్రిల్‌ 9
* రూ.వెయ్యి అపరాధ రుసుముతో దరఖాస్తు: ఏప్రిల్‌ 16
ఐసెట్‌..
* దరఖాస్తుకు చివరి గడువు: ఏప్రిల్‌ 9
* రూ.2వేలతో దరఖాస్తు: ఏప్రిల్‌ 16
* రూ.5వేలతో దరఖాస్తు: ఏప్రిల్‌ 22
* రూ.10వేలతో దరఖాస్తు: ఏప్రిల్‌ 25
ఏపీపీఎస్సీ పరీక్షలు వాయిదా
అమరావతి: మార్చి, ఏప్రిల్‌లో జరగాల్సిన ఏపీపీఎస్సీ పరీక్షలు వాయిదా వేశామని ఏపీపీఎస్సీ కార్యదర్శి తెలిపారు. ఏప్రిల్ 7 నుంచి 9 వరకు జరగాల్సిన గ్రూప్-1 పరీక్షలు, ఆచార్య ఎన్జీ రంగా విశ్వవిద్యాలయంలో డిగ్రీ కళాశాల లెక్చరర్లు, కంప్యూటర్ ప్రొఫెషియన్సీ పరీక్షలను సైతం వాయిదా వేశారు. కరోనా వైరస్ వ్యాప్తి నివారణకు పరీక్షలు వాయిదా వేస్తూ నిర్ణయం తీసుకున్నట్లు ఏపీపీఎస్సీ కార్యదర్శి స్పష్టంచేశారు.
తెలంగాణలో ప‌దోత‌ర‌గ‌తి పరీక్షలు వాయిదా
హైదరాబాద్‌: కరోనా వైరస్‌ వ్యాప్తి దృష్ట్యా తెలంగాణలో పదో తరగతి పరీక్షలు వాయిదా వేయాలని హైకోర్టు ఆదేశించింది. మార్చి21(శ‌నివారం) జరగాల్సిన పరీక్ష మాత్రం యథావిధిగా నిర్వహించాలని సూచించింది. మార్చి 23 నుంచి 30 వరకు జరగాల్సిన అన్ని పరీక్షలు రీ షెడ్యూల్‌ చేయాలని న్యాయస్థానం ఆదేశించింది. మార్చి 30 నుంచి ఏప్రిల్‌ 6వరకు జరగాల్సిన పరీక్షలపై పరిస్థితిని బట్టి తదుపరి నిర్ణయం తీసుకోవాలని సూచించింది.
సైనిక స్కూల్‌ తుది ఫలితాల విడుదల
విజయనగరం గ్రామీణం, న్యూస్టుడే: సైనిక స్కూల్ సొసైటీ నిర్వహించిన 2020 - 21 విద్యా సంవత్సరం ప్రవేశ పరీక్ష తుది (ఫైనల్) ఫలితాలు విడుదల అయ్యాయి. కోరుకొండ సైనిక్ పాఠశాలఫలితాలను వెబ్‌సైట్ల‌లో అందుబాటులో ఉంచినట్లు ప్రిన్సిపల్ కల్నల్ అరుణ్ కులకర్ణి ఒక ప్రకటనలో తెలిపారు. ఆంధ్రప్రదేశ్ పరిధిలోని కోరుకొండ, కలికరి సైనిక్ పాఠశాలల ఫలితాలను సంబంధిత వెబ్‌సైట్ల‌లో చూసుకోవచ్చు. ఇతర వివరాలకు 08922-246119, 246168 ఫోన్ నంబర్లను సంప్రదించాలని సూచించారు.
Notification:
Website: http://www.kalikirisainikschool.com/prospects
జేఈఈ - మెయిన్‌ పరీక్షలు వాయిదా
* సీబీఎస్‌ఈ పరీక్షలు కూడా...
దిల్లీ: ఐఐటీ, ఎన్‌ఐటీలలో ప్రవేశాలకు ఉద్దేశించిన జేఈఈ-మెయిన్‌ పరీక్షలు వాయిదా పడ్డాయి. కరోనా నేపథ్యంలో ఈ పరీక్షలు వాయిదా పడినట్లు మానవ వనరుల అభివృద్ధి మంత్రిత్వ శాఖ పరిధిలోని ‘నేషనల్‌ టెస్టింగ్‌ ఏజెన్సీ’(ఎన్‌టీఏ) మార్చి 18న‌ వెల్లడించింది. వాస్తవానికి ఈ పరీక్షలు ఏప్రిల్‌ 5 - 11 తేదీల్లో జరగాల్సి ఉంది. తిరిగి ఈ పరీక్షలను ఎప్పుడు నిర్వహిస్తారన్న విషయాన్ని తదుపరి నిర్ణయిస్తారు.
* సీబీఎస్‌ఈ పరీక్షలు కూడా మార్చి 18న‌ వాయిదాపడ్డాయి. ప్రస్తుతం జరుగుతున్న 10, 12వ తరగతి పరీక్షలను కరోనా దృష్ట్యా మార్చి 31వ తేదీ వరకూ వాయిదా వేస్తున్నట్లు సీబీఎస్‌ఈ కార్యదర్శి అనురాగ్‌ త్రిపాఠి వెల్లడించారు.
ఏపీపీఎస్సీ ప్రాథమిక జాబితా వెల్లడి
ఈనాడు, అమరావతి: అగ్రికల్చర్‌ ఆఫీసర్, అసిస్టెంట్‌ మోటార్‌ వెహికల్‌ ఇన్‌స్పెక్టర్‌ ఉద్యోగాలకు ప్రాథమికంగా ఎంపికైన వారి జాబితాలను ఏపీపీఏస్సీ వెల్లడించింది. వివరాలను వెబ్‌సైట్‌లో ఉంచినట్లు ఓ ప్రకటనలో తెలిపింది.
Agriculture Officers
Assistant Motor Vechicle Inspectors
మూడేళ్ల డిగ్రీలోనే అప్రెంటిస్‌షిప్‌
* వేసవిలో 4 నెలలు, చివరి ఏడాది 6 నెలలతో పూర్తి
* డిగ్రీ కోర్సును రూపొందించిన ఉన్నత విద్యామండలి
* వచ్చే విద్యా సంవత్సరం నుంచి కొత్త పాఠ్య ప్రణాళిక
ఈనాడు, అమరావతి: మూడేళ్ల డిగ్రీలోనే 10 నెలలు అప్రెంటిస్‌షిప్‌ ఉండేలా కోర్సును ఉన్నత విద్యామండలి రూపొందించింది. వచ్చే విద్యా సంవత్సరం నుంచి దీన్ని అమలు చేయనుంది. ఆంధ్ర‌ప్ర‌దేశ్‌ ఉన్నత విద్యామండలి మార్చి 17న‌ డిగ్రీ పాఠ్యాంశాలపై నిర్వహించిన సమావేశంలో నిర్ణయం తీసుకుంది. పాఠ్యాంశాల రూపకల్పన దాదాపుగా పూర్తయింది.
కోర్సు స్వరూపం ఇలా..
* మూడేళ్ల డిగ్రీలో 6 సెమిస్టర్లు ఉంటాయి. ఇందులో ఆరో సెమిస్టర్‌లో 6 నెలల పాటు విద్యార్థులకు అప్రెంటిస్‌షిప్‌ ఉంటుంది. ఇందుకు 15 క్రెడిట్లు ఇస్తారు.
* డిగ్రీ మొదటి, రెండో ఏడాదిలోని వేసవి సెలవుల్లో రెండేసి నెలలు చొప్పున అప్రెంటిస్‌షిప్‌ నిర్వహిస్తారు. ఈ నాలుగు నెలలకు కలిపి 8 క్రెడిట్లు ఉంటాయి. మొత్తం 10 నెలలకు 23 క్రెడిట్లు ఇస్తారు.
* జీవన నైపుణ్యాల్లో 15 సబ్జెక్టులు, నైపుణ్యాల పెంపులో 30 సబ్జెక్టులు, నైపుణ్యాభివృద్ధిలో 25 సబ్జెక్టులు ఉంటాయి. వీటిల్లో నుంచి ఆసక్తి ఉన్న సబ్జెక్టులను విద్యార్థులు ఎంచుకోవచ్చు.
* పోస్టు గ్రాడ్యుయేషన్‌లో ఏదైనా రెండు సబ్జెక్టులను ఎంచుకునే అవకాశం లభించేలా ఈ కోర్సులను రూపొందించారు. * వర్సిటీలు, కళాశాలలు తమ స్థానికతకు అనుగుణంగా సబ్జెక్టులను ప్రవేశపెట్టుకోవచ్చు.
డిగ్రీలో మార్కెట్‌ ఆధారిత కోర్సులు
ప్రభుత్వ, ఎయిడెడ్‌, స్వయంప్రతిపత్తి డిగ్రీ కళాశాలల్లో వచ్చే విద్యా సంవత్సరం నుంచి మార్కెట్‌ అవసరాలకు అనుగుణమైన 25 కోర్సులను ప్రవేశపెట్టేందుకు ఉన్నత విద్యాశాఖ ఉత్తర్వులు జారీచేసింది. కొత్త పోస్టుల మంజూరు, ఎలాంటి నిధుల కేటాయింపు లేకుండానే ఈ కోర్సులను నిర్వహించేందుకు అనుమతించింది. ప్రస్తుతం స్వయం ప్రతిపత్తి డిగ్రీ కళాశాలల్లో ఉన్న ఈ కోర్సులను అన్ని కళాశాలల్లోనూ అందుబాటులోకి తీసుకురానున్నారు. మూడేళ్ల డిగ్రీలో నాలుగు, ఆరు సెమిస్టర్లలో వారు ఎంచుకున్న కోర్సులకు అనుగుణమైన కంపెనీలు, సంస్థల్లో విద్యార్థులకు అప్రెంటిస్‌షిప్‌ ఉంటుంది. ఒక్కో కోర్సులో 30 మంది విద్యార్థులుండేలా ప్రణాళిక రూపొందించారు.
అదనంగా 4,800 పీజీ మెడికల్‌ సీట్లు
దిల్లీ: వచ్చే విద్యాసంవత్సరంలో మరిన్ని పీజీ మెడికల్‌ సీట్లు అందుబాటులోకి రానున్నాయి. ఇందుకు భారత వైద్య మండలి బోర్డ్‌ ఆఫ్‌ గవర్నర్స్‌(బీవోజీ) ఆమోద ముద్రవేసింది. 2020 - 21లో అదనంగా 4,807 ఎండీ, ఎంఎస్‌ సీట్లు అందుబాటులోకి వస్తాయని బీవోజీ సారథి వీకే పాల్‌ మార్చి 16న‌ వెల్లడించారు. దీంతో మొత్తంమీద దాదాపు 44 వేల పీజీ మెడికల్‌ సీట్లు అందుబాటులో ఉంటాయి. వీటిలో ఎండీ/ఎంస్‌ సీట్లు 36,192. మిగిలిన 8 వేల సీట్లూ డిప్లొమేట్‌ ఆఫ్‌ నేషనల్‌ బోర్డ్‌(డీఎన్‌బీ), ఫెలోషిప్‌ ఆఫ్‌ నేషనల్‌ బోర్డ్‌(ఎఫ్‌ఎన్‌బీ) కోర్సులు చేసే వారికి కేటాయించినవి.
ఫైనల్‌ ఎంబీబీఎస్‌ (పార్ట్‌-2) ఫలితాల విడుదల
ఎన్టీఆర్‌ ఆరోగ్య విశ్వవిద్యాలయం, న్యూస్‌టుడే: ఈ ఏడాది జనవరి, ఫిబ్రవరిలో జరిగిన ఫైనల్‌ ఎంబీబీఎస్‌(పార్ట్‌-2) ఫలితాలు విడుదలయ్యాయి. భారతీయ వైద్య మండలి, విశ్వవిద్యాలయ మార్గనిర్దేశకాల మేరకు గ్రేస్‌ మార్కులు కలిపిన తర్వాతే ఫలితాలను వెల్లడించామని పరీక్షల నియంత్రణాధికారి డాక్టర్‌ భీమేశ్వర్‌ తెలిపారు. ఉత్తీర్ణులైన వారికి మార్చి 23 నుంచి ఇంటర్న్‌షిప్‌ తరగతులు ప్రారంభమవుతాయన్నారు. రీటోటలింగ్‌ కోరే అభ్యర్థులు సబ్జెక్టుకు రూ.2000 రిజిస్ట్రార్‌ పేరిట డీడీ తీసుకొని మార్చి 30వ తేదీలోగా యూనివర్సిటీకి పంపాలని సూచించారు. ఫలితాలు విశ్వవిద్యాలయ వెబ్‌సైట్‌లో పొందుపర్చారు.
Results
పాలిటెక్నిక్‌ అధ్యాపక పోస్టులకు ముగిసిన పరీక్షలు
ఈనాడు, అమరావతి: ప్రభుత్వ పాలిటెక్నిక్‌ కళాశాలల అధ్యాపకుల నియామక ప్రధాన రాత పరీక్షలు మార్చి 15తో ముగిశాయి. మార్చి 12 నుంచి సబ్జెక్టుల వారీగా పరీక్షలు జరిగాయి. 58,118కి 44,909 మంది మాత్రమే వెబ్‌సైట్‌ నుంచి హాల్‌ టికెట్లు డౌన్‌లోడు చేసుకున్నారు. వీరిలో 29,138(64.88%) మంది పరీక్షలు రాసినట్లు ఏపీపీఎస్సీ తెలిపింది.
వృత్తి అనుభవముంటే ఎంఫార్మసీ ప్రవేశ మార్కుల తగ్గింపు
ఈనాడు, దిల్లీ: బీఫార్మసీ తర్వాత కనీసం ఐదేళ్ల వృత్తిపరమైన అనుభవం ఉన్న వారికి ఎంఫార్మసీ ప్రవేశ అర్హత మార్కులను 55% నుంచి 50 శాతానికి తగ్గించారు. ఈ మేరకు కేంద్ర వైద్య ఆరోగ్య శాఖ మార్చి 13న‌ ఉత్తర్వులు జారీ చేసింది. ఇది వరకు నాలుగేళ్ల బీఫార్మసీ 55% మార్కులతో పాస్‌ అయిన వారికే ఎంఫార్మాలో ప్రవేశం ఉండేది. ఇప్పుడు ఐదేళ్ల అనుభవం ఉన్న వారికి అందులో 5% మార్కులను తగ్గిస్తూ వెసులుబాటు కల్పించారు.