close
eenadupratibha.net
about tariff Contact
Skip Navigation Links
Pratibha Engineering

ప్రధాన కథనాలు
845 సహాయ ఆచార్యుల పోస్టుల భర్తీ

* ఏపీపీఎస్‌సీ ద్వారా ప్రాథమిక పరీక్ష
* ఆబ్జెక్టివ్ విధానంలో ప్రశ్నపత్రం
* విధానాలను రూపొందించిన ఉన్నత విద్యామండలి
ఈనాడు, అమరావతి: ఆంధ్రప్రదేశ్‌లోని విశ్వవిద్యాలయాల్లో సహాయక ఆచార్య (అసిస్టెంట్ ప్రొఫెసర్ల) పోస్టుల భర్తీకి నిర్వహించనున్న ప్రాథమిక పరీక్ష పాఠ్యాంశాలు, ప్రశ్నపత్రం విధానాన్ని ఉన్నత విద్యామండలి రూపొందించింది. ఈ పరీక్షను ఆన్‌లైన్‌లో నిర్వహించనున్నారు. మొత్తం రెండు పేపర్లు ఉండనున్నాయి. ఆంగ్ల మాధ్యమంలోనే ప్రశ్నపత్రం ఉంటుంది. ప్రతి తప్పు సమాధానానికి 1/3 నెగెటివ్ మార్కులుంటాయి. పేపర్-1కు పరీక్షా సమయం రెండు గంటలు కాగా.. పేపర్-2కు మూడు గంటలు ఉంటుంది. రాష్ట్రంలో మొదటిసారిగా పరీక్ష నిర్వహణ బాధ్యతలను ఏపీపీఎస్‌సీకి అప్పగిస్తున్నారు. అభ్యర్థులు ఆన్‌లైన్‌లో చేసుకున్న దరఖాస్తులను పరిశీలించిన అనంతరం విశ్వవిద్యాలయాలు అర్హుల జాబితాలను ఏపీపీఎస్‌సీకి పంపిస్తాయి. ఈ జాబితా ఆధారంగా పరీక్ష నిర్వహించి, మార్కుల వివరాలను వర్సిటీలకు ఏపీపీఎస్‌సీ అందిస్తుంది. అనంతరం నియామకాలను వర్సిటీలు చేపడతాయి. రాష్ట్రంలోని 14 విశ్వవిద్యాలయాల్లో రెండు విడతలుగా పోస్టులను భర్తీ చేయనున్నారు. మొదటి విడతలో 845 పోస్టులు, రెండో విడతలో 264పోస్టులు భర్తీ చేస్తారు.
పరీక్షా విధానం ఇలా..
పరీక్ష మొత్తం ఆబ్జెక్టివ్ విధానంలో ఉంటుంది. పేపరు-1 జనరల్ పేపరు. ఆర్ట్స్, సైన్సు, ఇంజినీరింగ్, ఫార్మసీ తదితరులందరికీ ఒక్కటే (కామన్‌గా) ఉంటుంది. మొత్తం 120 మార్కులకు ఇవ్వనున్నారు. బోధన, పరిశోధన అప్టిట్యూడ్‌పై ప్రశ్నలు ఉంటాయి. ప్రతి ప్రశ్నకు ఒక మార్కు ఉంటుంది.
* పేపర్-2 మొత్తం 180 మార్కులకు ఇవ్వనున్నారు. అభ్యర్థి ఎంచుకున్న సబ్జెక్టు ఆధారంగా ఉంటుంది. ప్రతి ప్రశ్నకు ఒక మార్కు ఇవ్వనున్నారు.
సిలబస్ ఇలా..
* పేపర్-1 యూజీసీ నెట్ తాజా సిలబస్ (నవంబరు 2017)పై ఇస్తారు.
* పేపర్-2 పూర్తిగా సబ్జెక్టుపై ఉంటుంది. ఆర్ట్స్ సబ్జెక్టులకు యూజీసీ నెట్, సైన్సు సబ్జెక్టులకు సీఐఎస్ఆర్ నెట్, ఇంజినీరింగ్, అర్కిటెక్చర్ సబ్జెక్టులకు గేట్ సిలబస్ అనుసరించి ప్రశ్నపత్రాలు ఉంటాయి.
ఆన్‌లైన్ పోర్టల్ సిద్ధం..
పోస్టుల దరఖాస్తులకు సంబంధించి ఆన్‌లైన్ పోర్టల్‌ను ఉన్నత విద్యామండలి రూపొందించింది. వచ్చేవారం నుంచి పోస్టులకు సంబంధించి వర్సిటీలు ప్రకటనను జారీ చేసే అవకాశం ఉంది.

ఏప్రిల్‌ 8న ‘జేఈఈ మెయిన్‌-2018’
* 15, 16 తేదీల్లో ఆన్‌లైన్‌ పరీక్షలు
ఈనాడు, హైదరాబాద్‌: ఎన్‌ఐటీలు, ట్రిపుల్‌ఐటీల్లో ప్రవేశానికి, జేఈఈ అడ్వాన్సుడ్‌కు అర్హత పొందేందుకు నిర్వహించే జేఈఈ మెయిన్‌-2018ను వచ్చే ఏడాది ఏప్రిల్‌ 8న నిర్వహించనున్నారు. ఆ రోజు రాత పరీక్ష (కలం, కాగితం) జరుగుతుంది. ఆన్‌లైన్‌ పరీక్షలను మాత్రం అదే నెల 15, 16 తేదీల్లో నిర్వహిస్తారు. విద్యార్థులు ఆఫ్‌లైన్‌ లేదా ఆన్‌లైన్‌లలో ఏదో ఒకదాన్ని మాత్రమే ఎంపిక చేసుకోవాల్సి ఉంటుంది. ఈ పరీక్షలను సీబీఎస్‌ఈ నిర్వహిస్తున్న సంగతి తెలిసిందే. కేంద్ర మానవ వనరుల అభివృద్ధి శాఖతో సంప్రదించిన సీబీఎస్‌ఈ ఇటీవల పరీక్షల తేదీలను ఖరారు చేసింది. బీటెక్‌లో ప్రవేశానికి పేపర్‌-1 పరీక్ష ఉదయం 9.30 గంటల నుంచి మధ్యాహ్నం 12.30 గంటల వరకు, బీఆర్క్‌లో ప్రవేశానికి పేపర్‌-2ను అదే రోజు మధ్యాహ్నం 2 గంటల నుంచి సాయంతం 5 గంటల వరకు నిర్వహిస్తారు. దేశవ్యాప్తంగా ఈ పరీక్షలకు సుమారు 12 లక్షల మంది దరఖాస్తు చేస్తారు. తెలుగు రాష్ట్రాల నుంచి దాదాపు లక్షన్నర మంది హాజరవుతున్నారు. డిసెంబరు 1వ తేదీ నుంచి దరఖాస్తు ప్రక్రియ ప్రారంభమయ్యే అవకాశముందని కేంద్ర మానవ వనరుల అభివృద్ధి శాఖ వర్గాలు తెలిపాయి. నవంబరులో దరఖాస్తుల పూర్తి షెడ్యూల్‌ను వెల్లడించనున్నారు.
విద్యార్థులకు కొంత వెసులుబాటు.. ఈ ఏడాది (2017) ఏప్రిల్‌ 2న జేఈఈ మెయిన్‌ ఆఫ్‌లైన్‌, 8, 9 తేదీల్లో ఆన్‌లైన్‌ పరీక్షలు నిర్వహించారు. అదే నెల 27న ర్యాంకులు ప్రకటించారు. 2018కి సంబంధించి ఆరు రోజులు ఆలస్యంగా పరీక్ష జరగనున్నందున ఇంటర్‌ వార్షిక పరీక్షలు ముగిసిన తర్వాత జేఈఈ మెయిన్‌కు సన్నద్ధమయ్యేందుకు విద్యార్థులకు కొంత వెసులుబాటు దొరుకుతుందని విద్యావేత్తలు చెబుతున్నారు. అంతేకాకుండా మే 20న జరగనున్న జేఈఈ అడ్వాన్సుడ్‌ను పూర్తిగా ఆన్‌లైన్‌లో జరుపుతున్నందున ఈసారి జేఈఈ మెయిన్‌కు కూడా ఆన్‌లైన్‌లో రాసేందుకు ఎక్కువ మంది ఆసక్తి చూపొచ్చని అంచనా వేస్తున్నారు.
పదో తరగతిలో వెయిటేజీ తొలగింపు
* సమ్మెటివ్ పరీక్షలు ఇక రెండే
* మంత్రి గంటా ఆమోదమే తర్వాయి
ఈనాడు, అమరావతి: ఏపీలో పాఠశాల స్థాయిలో ఈ ఏడాది నుంచి సంగ్రహణాత్మక మూల్యంకనం (సమ్మెటివ్) పరీక్షలు రెండు మాత్రమే నిర్వహించనున్నారు. ప్రస్తుతం 8, 9 తరగతుల్లో వచ్చిన మార్కుల ఆధారంగా పదో తరగతిలో ఇస్తున్న 10 మార్కుల వెయిటేజీని తొలగించనున్నారు. పాఠశాల విద్యాశాఖ పంపిన ప్రతిపాదనలకు రెండు, మూడు రోజుల్లో మానవ వనరుల అభివృద్ధి శాఖ మంత్రి గంటా శ్రీనివాసరావు ఆమోదం తెలపనున్నారు. దస్త్రం ఇప్పటికే మంత్రి పేషీకి చేరింది. పదో తరగతి పరీక్షల్లో వచ్చే మార్కుల ఆధారంగానే 20 శాతం అంతర్గత మార్కులను కలపనున్నారు. డిసెంబరులో ఒకటి, మార్చిలో మరొక సమ్మెటివ్ పరీక్షను నిర్వహించనున్నారు. పదో తరగతిలో ఇచ్చే 8, 9 తరగతుల వెయిటేజీ తొలగించడం వల్ల ప్రశ్నపత్రాల లీకేజీలు వంటివి జరగవని పాఠశాల విద్యాశాఖ భావిస్తోంది. అన్ని తరగతుల్లోనూ 80 శాతం మార్కులకు పరీక్షలు, మిగతా 20 శాతం మార్కులు అంతర్గత మూల్యంకనం ద్వారా కేటాయిస్తారు.
విద్యార్థులకు తప్పిన పరీక్షల భారం..
దసరా సెలవులకు ముందు నిర్వహించాల్సిన సమ్మెటివ్-1 పరీక్షలు ప్రశ్నపత్రాల లికేజీ కారణంగా నిలిచిపోయాయి. 6, 7 తరగతులకు నిర్వహించాల్సిన పరీక్షలను వాయిదా వేయగా.. 8, 9, 10 తరగతుల పరీక్షలను రద్దు చేశారు. ప్రశ్నపత్రాలు యూట్యూబ్‌లో దర్శనమివ్వడంతో రద్దు చేశారు. ఈ పరీక్షలను నిర్వహించేందుకు సమయం లేకపోవడం, ఎప్పటి నుంచో సమ్మెటివ్ పరీక్షలు రెండే ఉండాలన్న డిమాండ్ ఉండడంతో పాఠశాల విద్యాశాఖ చివరికి సమ్మెటివ్ పరీక్షలను రెండుకు కుదించాలని ప్రతిపాదించింది. కర్ణాటక, కేరళ రాష్ట్రాల్లో ఎస్ఏ పరీక్షలు రెండు మాత్రమే ఉన్నందున రాష్ట్రంలోనూ ఇదే విధానాన్ని తీసుకురావాలని నిర్ణయించింది. 8, 9 తరగతుల ప్రశ్నా పత్రాల లీకేజీకి ప్రధాన కారణం 10వ తరగతిలో వెయిటేజీ ఇవ్వడమేనని భావించిన అధికారులు దాన్ని తొలగించాలని ప్రతిపాదించారు. ప్రైవేటు పాఠశాలలు పదిలో అధిక గ్రేడింగ్‌లు సాధించేందుకు ఈ అవకతవకలకు పాల్పడుతున్నట్లు గుర్తించారు. ఈ నేపథ్యంలో తాజా ప్రతిపాదన చేశారు. ఇక నుంచి పాఠశాలలకు ఫార్మెటివ్(ఎఫ్ఏ) పరీక్షలు నాలుగు, సమ్మెటివ్ పరీక్షలు రెండు మాత్రమే ఉంటాయి. వెయిటేజీ తొలగించినందున సమ్మెటివ్-1, 2 పరీక్షల జవాబు పత్రాలను 5 శాతం ప్రభుత్వ ఉపాధ్యాయులతో మూల్యంకనం చేయిస్తున్న విధానానికీ స్వస్తి పలకనున్నారు.
గురుకుల పోస్టుల కీ విడుదల
* అటవీ పోస్టులకు 22న రాతపరీక్ష
ఈనాడు, హైదరాబాద్: గురుకులాల్లో ఫిజికల్ డైరెక్టర్ (పాఠశాలలు), ఆర్ట్, క్రాఫ్ట్, మ్యూజిక్ టీచర్ల పోస్టులకు నిర్వహించిన రాతపరీక్షల తుది కీని టీఎస్‌పీఎస్సీ ప్రకటించింది. అక్టోబరు 17 నుంచి టీఎస్‌పీఎస్సీ వెబ్‌సైట్లో అందుబాటులో ఉంటుందని కమిషన్ కార్యదర్శి వాణిప్రసాద్ ఒక ప్రకటనలో తెలిపారు. దీనిపై ఎలాంటి అభ్యంతరాలు స్వీకరించబోమన్నారు. గురుకులాల్లో డిగ్రీ, జూనియర్ లెక్చరర్ల పోస్టులకు నిర్వహించిన ప్రాథమిక పరీక్ష తుది కీ ప్రకటించామన్నారు. అలాగే పీజీటీ సోషల్ స్టడీస్, ఫిజికల్ సైన్స్ రాత పరీక్ష పేపర్-1లో చేసిన మార్పులతో తుదికీని వెబ్‌సైట్లో పొందుపరిచామని పేర్కొన్నారు. అటవీశాఖలో ఫారెస్ట్ సెక్షన్ ఆఫీసర్ పోస్టులకు అక్టోబరు 22న రాతపరీక్ష నిర్వహించనున్నట్లు టీఎస్‌పీఎస్సీ కార్యదర్శి పేర్కొన్నారు. హాల్‌టికెట్లు అక్టోబరు 17 నుంచి వెబ్‌సైట్ నుంచి డౌన్‌లోడ్ చేసుకోవాలని సూచించారు.
ఇదే చివరి అవకాశం....
ఎక్సైజ్ కానిస్టేబుల్ పోస్టులకు అక్టోబరు 13 నుంచి 16 వరకు నిర్వహించిన ధ్రువీకరణ పత్రాల పరిశీలనకు హాజరు కాని అభ్యర్థులకు మరో అవకాశాన్ని ఇచ్చారు. అక్టోబరు 17న నిర్వహించే పరిశీలనకు వారు హాజరు కావాలి. మసాబ్‌ట్యాంక్ పాలిటెక్నిక్ కళాశాలలో ధ్రువీకరణ పత్రాల పరిశీలన నిర్వహిస్తామని, ఇదే చివరి అవకాశమని కమిషన్ కార్యదర్శి వాణిప్రసాద్ తెలిపారు.
https://tspsc.gov.in/
నీట్‌గా.. ప్రణాళిక
మనదేశంలోని అన్ని వైద్య, దంతవైద్య కళాశాలల్లో ప్రవేశానికి నిర్వహించే అర్హత పరీక్ష - ‘నీట్‌’ (నేషనల్‌ ఎలిజిబిలిటీ కం ఎంట్రన్స్‌ టెస్ట్‌). ఎయిమ్స్‌, జిప్‌మర్‌ మినహా ప్రభుత్వ, ప్రైవేటు, మైనారిటీ లేదా స్వయం ప్రతిపత్తిగల విశ్వవిద్యాలయాల్లో ఎక్కడైనా ప్రవేశం పొందాలంటే నీట్‌ అర్హత తప్పనిసరి. ఇంతటి ప్రాధాన్యమున్న పరీక్షకు పకడ్బందీ ప్రణాళికతో ఇప్పటినుంచే సిద్ధమవటం తప్పనిసరి! అందుకు ఉపకరించే విశ్లేషణ ఇదిగో!
ఏ రాష్ట్రంలోనైనా 85% సీట్లు ఆ రాష్ట్ర ప్రభుత్వాలు కౌన్సెలింగ్‌ ద్వారా నీట్‌ ర్యాంకు ఆధారంగా భర్తీ చేసుకోవచ్చు. వాటిలో రిజర్వేషన్‌ ప్రక్రియలు ఆ రాష్ట్ర విధానంపైనే ఆధారపడి ఉంటాయి. 15% సీట్లు ఇతర రాష్ట్ర విద్యార్థులతో సెంట్రల్‌ కౌన్సెలింగ్‌ ద్వారా భర్తీ చేస్తారు. అయితే ఈ విధానం ఆంధ్రప్రదేశ్‌, తెలంగాణ, జమ్మూ- కశ్మీర్‌ రాష్ట్రాలకు వర్తించదు. ఆ రాష్ట్రాలు నూరు శాతం సీట్లను నీట్‌ ర్యాంకు ఆధారంగానే భర్తీ చేస్తాయి. అంటే తెలుగు రాష్ట్ర విద్యార్థులు కౌన్సెలింగ్‌ కోటాలో ఇతర రాష్ట్రాలకు వెళ్లడానికి అవకాశం లేదు. అదేవిధంగా ఇతర రాష్ట్ర విద్యార్థులకు తెలుగు రాష్ట్రాల్లో కౌన్సెలింగ్‌ ద్వారా భర్తీచేసే సీట్లకు అర్హత లేదు. అయితే ప్రైవేటు కళాశాలల్లోని కేటగిరీ- బి, సి సీట్లకు మన రాష్ట్ర విద్యార్థులు ఇతర రాష్ట్రాలకు వెళ్లవచ్చు, అలాగే ఇతర రాష్ట్ర విద్యార్థులు మన రాష్ట్రాల్లోనూ చేరవచ్చు. డీమ్డ్‌ యూనివర్సిటీల్లోనూ ఈ నిబంధన లేదు. అంటే ఏ రాష్ట్ర విద్యార్థి ఏ రాష్ట్రంలోనైనా చేరవచ్చు. 371(డి)ను కన్వీనర్‌ కోటాలోని సీట్లకు మాత్రమే వర్తింపజేస్తున్నారు.
పరీక్షా విధానం
నీట్‌-2017 పేపర్‌లో మొత్తం 180 ప్రశ్నలు ఉన్నాయి. వాటిలో బయాలజీ నుంచి 90 (బోటనీ, జువాలజీ కలిపి), ఫిజిక్స్‌ నుంచి 45, కెమిస్ట్రీ నుంచి 45 ప్రశ్నలు ఉంటాయి. బోటనీ, జువాలజీ సమవిభజన ఉండటం లేదు. గత సంవత్సరాల్లోని పేపర్లను పరిశీలిస్తే బోటనీ ప్రశ్నల సంఖ్య జువాలజీ కంటే ఎక్కువగా ఉంటోంది. సుమారుగా 50 ప్రశ్నలు బోటనీ నుంచీ, 40 ప్రశ్నలు జువాలజీ నుంచీ ఉంటాయని భావించవచ్చు.
పరీక్ష వ్యవధి- మూడు గంటలు. ప్రతి సరైన సమాధానానికి +4 మార్కులు, ప్రతి తప్పు సమాధానానికి ఒక రుణాత్మక మార్కు. అంటే నీట్‌ మొత్తం 720 మార్కులకు జరుగుతుంది.
పరీక్షాపత్రం ఇంగ్లిష్‌, హిందీ భాషల్లో ఉంటుంది. తెలుగు మాధ్యమంలో రాసే అవకాశం కూడా ఉంది. గత సంవత్సరం నుంచి కొన్ని ప్రాంతీయ భాషల్లో కూడా పరీక్షను నిర్వహిస్తున్నారు. అయితే తర్జుమాలో ఏదైనా తప్పు దొర్లితే ఆంగ్లమాధ్యమంలో ఉన్న ప్రశ్ననే ప్రమాణంగా తీసుకుంటారు. తెలుగు విద్యార్థులు తెలుగు మాధ్యమంలో చదివితేనే తెలుగు ఎంచుకోవడం మేలు. ఇంగ్లిష్‌ మీడియం వారు ఆంగ్ల ప్రశ్నపత్రాన్నే తీసుకోవడం మంచిది.
అదనపు సిలబస్‌
నీట్‌-2018 మే మొదటి ఆదివారం- అంటే మే 6, 2018న జరుగుతుంది. సీబీఎస్‌ఈ వారి 11, 12 తరగతుల సిలబసే నీట్‌ సిలబస్‌. ఇదీ తెలుగు రాష్ట్రాల్లోని ఫిజిక్స్‌, కెమిస్ట్రీల సిలబస్సూ ఒకటే. బోటనీ, జువాలజీల్లో మన సిలబస్‌ జాతీయ సిలబస్‌ కంటే కొంత అధికం. ఈ అదనపు సిలబస్‌ నీట్‌లో మన విద్యార్థులు మంచి ర్యాంకు తెచ్చుకోవడానికి ఉపయోగపడుతోంది. అంటే వీరు సిలబస్‌పై అవగాహన పెంచుకుని ప్రాక్టికల్స్‌కు సంబంధించి ప్రయోగదీపికలను కూడా చూడగలిగితే సరిపోతుంది. సిలబస్‌ అవధులు తెలుసుకుని తయారైతే సులువుగా విజయం సాధించవచ్చు. సిలబస్‌పై అవగాహన లేక ఇబ్బందిపడటమే చాలామందిలో కనపడుతోంది.
స్టడీ మెటీరియల్‌
పోటీ పరీక్షల్లో నెగ్గాలంటే అతి ముఖ్యమైనది విద్యార్థి ఉపయోగించే స్టడీ మెటీరియల్‌. ఇంతవరకూ తెలుగు రాష్ట్రాల్లో ఎంసెట్‌కు పరిమితమయ్యేవారు. ఎంసెట్‌లో ప్రశ్నించే తీరుకీ, నీట్‌లో ప్రశ్నించే తీరుకీ తేడా ఉంది. అందుకని దానికి అనుగుణంగా తయారుచేసిన స్టడీ మెటీరియల్‌కు ప్రాధాన్యం ఇవ్వాలి.
తెలుగు రాష్ట్రాల్లో దాదాపు 95 శాతం మంది స్టేట్‌ సిలబస్‌కు పరిమితమవుతున్నారు. అందుకే ఆ ప్రశ్నించే విధానంపై పట్టు ఏర్పడటం లేదు. సీబీఎస్‌ఈ ఆధారిత స్కూల్స్‌ ఎక్కువగా ఉండే ఉత్తర భారతదేశం వారు తయారుచేసిన స్టడీ మెటీరియల్‌ అధిక లాభం చేకూర్చవచ్చు.
* ఫిజిక్స్‌, కెమిస్ట్రీలకు ఈ సంవత్సరం విడుదల చేసిన అరిహంత్‌ మాస్టర్‌ ఎన్‌సీఈఆర్‌టీ పుస్తకాలు చాలా బాగున్నాయి; సరిపోతాయి.
* బయాలజీ పుస్తకాలు కూడా ఫరవాలేదు.
సీబీఎస్‌ఈ బోధనలో, ప్రశ్నపత్రాల తయారీలో అనుభవం ఉన్న అధ్యాపకులు తయారుచేసిన స్టడీ మెటీరియల్‌ను ప్రామాణికంగా తీసుకుని అభ్యసించవచ్చు.
విద్యార్థి ఒక ప్రామాణిక పుస్తకాన్నే రెండు మూడుసార్లు పునశ్చరణ చేస్తే వేగం, కచ్చితత్వం పెరుగుతాయి. వీలైనన్ని ఎక్కువ పుస్తకాలు అభ్యసించాలనే అపోహ నుంచి బయటకు రావటం మేలు. దొరికే కాలవ్యవధి చాలా స్వల్పం. ఈ కొద్ది సమయంలో చాలా పుస్తకాలను చదవాలనుకోవడం పొరపాటు. ప్రాథమిక అంశాలకు ప్రాధాన్యం ఇచ్చి చదవాలి.
ఉదాహరణకు ఫిజిక్స్‌లో ప్రాబ్లమ్స్‌ చేసేటప్పుడు విధానానికి ప్రాముఖ్యం ఇవ్వాలి కానీ వాడవలసిన ఫార్ములాకు కాదు. అంశాన్ని విశ్లేషించి అవగాహనతో ముందుకు తీసుకుపోయే స్టడీ మెటీరియల్‌ ప్రయోజనకరం. ఒక పుస్తకానికి మాత్రమే పరిమితమై పునశ్చరణతో తయారైతే మెరుగైన ఫలితం ఉంటుంది.
ఇప్పటినుంచి మే వరకూ నిర్దిష్ట ప్రణాళిక తయారుచేసుకోవాలి. పరీక్ష మే మొదటివారంలో ఉన్నందున ఏప్రిల్‌లో గ్రాండ్‌ టెస్టులకు కేటాయించుకోవాలి. ఇంటర్‌ పరీక్షల తర్వాత గ్రాండ్‌ టెస్టులలోపు సిలబస్‌ని కొన్ని భాగాలు చేసుకుని పరీక్షలు రాసే ప్రణాళిక వేసుకోవాలి.
ఫిబ్రవరిలో ప్రాక్టికల్స్‌, మార్చిలో థియరీ పరీక్షలు! అందువల్ల తయారీ ప్రణాళిక జనవరి 30 లోపు మాత్రమే ఉండాలి. ప్రణాళిక వేసుకునేటప్పుడు ఇంటర్‌ బోర్డు పరీక్షల కంటే నీట్‌కే ప్రాధాన్యం ఇవ్వాలి. ఇప్పటి నుంచి నవంబరు లేదా డిసెంబరు వరకూ ఫిజిక్స్‌కు ప్రాధాన్యం ఇచ్చి చదవాలి. ఆ తర్వాత క్రమంగా ఆ సబ్జెక్టుకు సమయం తగ్గించి బయాలజీ, కెమిస్ట్రీలకు కేటాయించే కాలం పెంచాలి.
ఒక డైరీ తీసుకుని ప్రతిరోజూ ఫిజిక్స్‌, కెమిస్ట్రీ, బయాలజీల్లో ఏం చదవాలనుకున్నారో ఆ అంశాలను విభజించి నిర్దిష్ట కాలాన్ని కేటాయిస్తూ రాసుకోవాలి. రోజు పూర్తయి రాత్రి నిద్రకు ఉపక్రమించేటపుడు ఆ రోజు డైరీలో రాసుకున్న అంశాలు పూర్తయ్యాయా, మిగిలిపోయాయా చూసుకోవాలి. మిగిలివుంటే దానికి నిజమైన కారణాన్ని డైరీలో రాసుకోవాలి. ఇలా చేస్తే రెండు మూడు రోజుల్లోనే విద్యార్థికి తన బలహీనతలు అర్థమవుతాయి.
స్టడీప్లాన్‌లో పఠనానికి సుదీర్ఘ కాలవ్యవధి ఇవ్వకుండా మధ్యలో ఐదు నిమిషాల పాటు విరామం ఇవ్వాలి. అప్పుడే ఏకాగ్రత పెరుగుతుంది. రాత్రివేళల్లో ఎక్కువసేపు చదువుతూ కనీస నిద్రను నిర్లక్ష్యం చేయకూడదు. నవంబరు, డిసెంబరు వరకూ చదవడంలో తర్కం ఉండొచ్చు కానీ తర్వాత తర్కించడం తగ్గించాలి; అధ్యాపకులు చెప్పిన విధానం అవలంబించి మార్కులు పెంచుకోవడానికి ప్రాధాన్యం ఇవ్వాలి.
సొంతంగా నోట్సు
చదివే అంశాలపై జ్ఞాపకశక్తి పెంపొందించుకోవడానికి ప్రతి విద్యార్థీ సొంతంగా నోట్స్‌ తయారు చేసుకోవాలి. ‘మైండ్‌ మ్యాప్స్‌’ ఇందుకు ఉపయోగపడతాయి. ప్రత్యేకంగా భౌతిక, రసాయన శాస్త్రాల్లో ఒక అంశాన్ని తీసుకుని దానికి అనుబంధంగా ప్రశ్నలను ఎలా అడుగుతున్నారో చూసి, దానికి అనుగుణంగా నోట్స్‌ తయారు చేసుకోవాలి. ఉదా: కెమిస్ట్రీలో అకర్బన రసాయన శాస్త్రంలో ఎక్కువ ప్రశ్నలు గ్రూపుల నుంచి వస్తున్నాయి. వాటి ధర్మాలను ఒక క్రమంలో రాసుకుంటూ పోతే ఆ పుస్తకంలోని ఆ పేజీని చూడగానే అన్ని అంశాలూ గుర్తుకువస్తాయి. సరైన అవగాహనతో చేస్తే మొత్తం రెండు సంవత్సరాల ఫిజిక్స్‌ సిలబస్‌ 15 పేజీల్లోపు, కెమిస్ట్రీ 10 పేజీల్లోపు వస్తుంది. ఇది విద్యార్థి పునశ్చరణకు చాలా బాగా ఉపయోగం. అయితే వీటిలో వివాదాస్పదమైన అంశాలను జోడించవద్దు. అలాచేస్తే విద్యార్థి ఎక్కువ సమయం వాటికి కేటాయించి విలువైన కాలాన్ని కోల్పోయే ప్రమాదముంది.
బలహీనతల గుర్తింపు
ప్రతి విద్యార్థికీ కొన్ని అంశాలపై పట్టు ఉండి, మరికొన్నింటిపై తక్కువ అవగాహన ఉండటం సాధారణమే. మరేం చేయాలి? తనకు అనుగుణంగా ఉన్న అంశాలకు కొంత ఎక్కువ సమయాన్ని కేటాయించి దానిలో పూర్తి పట్టు ఏర్పరచుకోవాలి. దీంతోపాటే తాను బలహీనంగా ఉన్న చాప్టర్లను పూర్తిగా వదిలేయకుండా వాటిలో కనీసం ప్రాథమిక అంశాలపై అవగాహన పెంచుకోవటం ఆచరణీయం. అంటే పట్టు ఉన్న అంశాలపై ఇంకా శ్రద్ధవహించి పరిపూర్ణత సాధించడం; పట్టులేనివాటిపై సగటు పరిజ్ఞానం ఏర్పరచుకోవడం చేసినపుడే ఉత్తమ ర్యాంకుకు అవకాశం ఉంటుంది. గత సంవత్సరాల్లోని నీట్‌ ప్రశ్నపత్రాలను ఒకసారి సాధించడం ద్వారా విద్యార్థికి తన బలహీనతలు అర్థమవుతాయి. వాటిపై శ్రద్ధవహించాలి కానీ పూర్తి సమయాన్ని వాటికే కేటాయించవద్దు.అలా చేస్తే ఆత్మవిశ్వాసాన్ని కోల్పోయి బాగా వచ్చినవి కూడా పరీక్షలో సరిగా రాయలేని పరిస్థితి ఏర్పడుతుంది. బలహీనతలు కొంత అధిగమించి ఆత్మవిశ్వాసం ఏర్పరచుకోవడం చాలా ఆవశ్యకం.

- పి.వి.ఆర్‌.కె మూర్తి, చైర్మ‌న్‌, శ్రీ గాయ‌త్రి విద్యాసంస్థ‌లు
వచ్చే ఏడాది నుంచి తెలుగు తప్పనిసరి
* రూ.30 కోట్లతో వెయ్యి మందికి ఉన్నతచదువులు
* ప్రతిభా అవార్డుల ప్రదానంలో ముఖ్యమంత్రి చంద్రబాబు
ఈనాడు, అమరావతి: రాష్ట్రంలో వచ్చే ఏడాది నుంచి అమలయ్యేలా అన్ని పాఠశాలల్లో తెలుగు పాఠ్యాంశాన్ని తప్పనిసరి చేస్తూ ఓ జీఓ తీసుకురానున్నామని ముఖ్యమంత్రి చంద్రబాబునాయుడు వెల్లడించారు. ఇందుకు అందరూ సహకరిస్తారని ఆశిస్తున్నామన్నారు. విజయవాడలో ఆదివారం(అక్టోబర్ 15) నిర్వహించిన డాక్టర్ ఏపీజే అబ్దుల్ కలాం ప్రతిభా పురస్కార్ అవార్డుల ప్రదానోత్సవానికి ఆయన ముఖ్యఅతిథిగా హాజరయ్యారు. విద్యార్థులకు అవార్డులను ప్రదానం చేశారు. ''మనం ఎక్కడున్నా మన భాషను మర్చిపోవడానికి వీలులేదు. మన ఉనికిని కాపాడేది భాష. అలాంటి భాషను మర్చిపోవడానికి వీల్లేదు. పిల్లల్లో ఆ స్ఫూర్తి రావాలి. తప్పనిసరిగా తెలుగు చదవాల్సిన అవసరం ఉంది. తెలుగు చదవకపోయినా... మర్చిపోయినా రాబోయే రోజుల్లో మన ఉనికినే మనం కోల్పోయే ప్రమాదం ఉంది. ప్రతి ఒక్క తల్లీదండ్రి పిల్లలకు తెలుగు నేర్పించే బాధ్యత తీసుకోవాలి... అని సీఎం చంద్రబాబు పేర్కొన్నారు. అమ్మలను గౌరవించేందుకు వచ్చే ఏడాది ఫిబ్రవరి ఒకటిన వసంత పంచమినాడు 'అమ్మకు వందనం కార్యక్రమాన్ని నిర్వహిస్తామని చెప్పారు.
* చదివించే బాధ్యత ప్రభుత్వానిదే
ప్రతిభ ఆధారంగా పిల్లల్ని చదివించే బాధ్యతను ప్రభుత్వం తీసుకుంటుందని వెల్లడించారు. ప్రస్తుతం 6,500 మందికి ప్రతిభా అవార్డులను ఇస్తున్నామని, ఇందులో వెయ్యి మందిని ఎంపిక చేసి వారిని చదివిస్తామని, దీనికి రూ.30 కోట్లు కేటాయిస్తామని వివరించారు. పదోతరగతిలో ప్రతిభ చూపిన వారికి ఇంటర్, ఇంటర్‌లో వారిని ప్రతిష్ఠాత్మక జాతీయ విద్యాసంస్థల్లో చదివిస్తామని, డిగ్రీ, పీజీల్లో వారికి విదేశాల్లో ఎక్కడైనా చదివిస్తామని వెల్లడించారు. ప్రతిభ ఎక్కడున్నా ప్రోత్సహించాలనే ఉద్దేశంతో ప్రైవేటు, ప్రభుత్వ పాఠశాలలు అనే తేడా లేకుండా అవార్డులను ఇస్తున్నామని తెలిపారు. జీవితంలో ఆశయం ఉండాలని, దాన్ని సాధించేందుకు నిరంతరం పని చేసే మనస్తత్వం ఉండాలని సూచించారు. ప్రతిభా అవార్డుల ప్రదానం ఓ వినూత్నమైన కార్యక్రమం, అబ్దుల్ కలామ్ జయంతి రోజున దీనిని నిర్వహించడం సబబుగా ఉంటుందనే శ్రీకారం చుట్టామని తెలిపారు. పిల్లలకు ఎంత ఆస్తి ఇచ్చామన్నది ముఖ్యం కాదని.. ఎంత బాగా చదివించాం.. ఎంత మంచి సంస్కారం నేర్పేమన్నదే ముఖ్యమని తెలిపారు. పాఠశాల విద్యాశాఖ తరపున 3992 మందికి ప్రతిభా పురస్కారాలు ఇస్తే ఇందులో 2,531 మంది బాలికలే ఉన్నారని, ప్రతి ఒక్కరూ ఇది గుర్తు పెట్టుకోవాలని ముఖ్యమంత్రి చంద్రబాబు పేర్కొన్నారు. గతంలో ఆడపిల్లలంటే చిన్నచూపు చూసేవారని, ఇప్పుడు మగపిల్లలకంటే ఆడపిల్లలే బాగా చదువుతున్నారని వెల్లడించారు.
* ఇష్టపడి చదివేలా స్ఫూరిని కలిగించాలి
ఏ పనైనా మనస్సు పెట్టి చేస్తే విసుగు ఉండదని సీఎం చంద్రబాబు వెల్లడించారు. చదువు విషయంలో పిల్లలకు నచ్చచెప్పాలని, బలవంతం చేసి, వారిపై ఒత్తిడి తీసుకొస్తే వారి మానసిక పరిస్థితి దెబ్బతింటుందని సూచించారు. ఎక్కువ ఒత్తిడి పెట్టి చదివిస్తే మానసిక ఆందోళనకు దారిస్తుందని, ఒక్కోసారి ఇది ఎక్కువైతే ఆత్మహత్యలు చేసుకునే పరిస్థితి వస్తుందన్నారు. రాష్ట్రంలో ఆత్మహత్యలు అనేవి జరగకూడదన్నారు. డిజిటల్, వర్చువల్ తరగతుల విధానంలో భాగంగా ప్రపంచంలోని నాలెడ్జ్‌నంతా ఆన్‌లైన్‌లో అందుబాటులో ఉంచుతున్నామన్నారు. విద్యార్థులు ఎవరైనా పాఠశాలకు రాకపోయినా.. అర్థం కాకపోయినా ఇంటికి వెళ్లిన తర్వాత వీడియోలు, ఆడియోల ద్వారా నేర్చుకోవచ్చని సూచించారు. బయోమెట్రిక్ విధానం అమలు చేస్తున్నామని, పిల్లల హాజరుకు సంబంధించి తల్లిదండ్రులకు సమాచారం అందిస్తామని, తద్వారా చదువుకు భరోసా ఉంటుందని పేర్కొన్నారు. పాఠశాలలు క్రమశిక్షణగా ఉండాలన్నారు.
* 1.82 లక్షల సైకిళ్లను పంపిణీ చేస్తాం
ఆడ పిల్లలందరూ చదువుకోవాలని సైకిళ్లు ఇస్తున్నామని, ఈ ఏడాది 1.82లక్షల మంది తొమ్మిదో తరగతి ఆడపిల్లలకు సైకిళ్లు ఇవ్వనున్నామని సీఎం చంద్రబాబు తెలిపారు. మరుగుదొడ్లు కట్టించే బాధ్యతను విద్యార్థులు, ఉపాధ్యాయులకు ఇస్తున్నామన్నారు. డ్వాక్రా సంఘాలు, స్థానిక సంస్థలకు అప్పచెప్పి పూర్తి చేయిస్తామని వివరించారు. మరుగుదొడ్లు కట్టించడం, మొక్కలు నాటడం, ట్రాఫిక్ నిర్వహణలాంటి పనులు చేసే పిల్లలకు 5శాతం మార్కులు ఇస్తామని చెప్పారు. తల్లిదండ్రుల తర్వాత అందరూ గుర్తుపెట్టుకునేది గురువులనేనని, తనను ప్రభావితం చేసిన గురువులను గుర్తుపెట్టుకుంటానని చెప్పారు. రూ.10వేల కోట్లతో 10 ప్రభుత్వ, 10 ప్రైవేటు వర్సిటీలను ప్రపంచ స్థాయి ప్రమాణాలకు అనుగుణంగా తీర్చిదిద్దుతామని ప్రధాని చెప్పారని గుర్తు చేస్తూ రాష్ట్రంలో వర్సిటీలను ఆ స్థాయికి తీసుకొచ్చేందుకు అనేక నిర్ణయాలు తీసుకుంటున్నామని వివరించారు.
* 25శాతం సీట్లు రావాలి
రాష్ట్రవ్యాప్తంగా ఇంటర్మీడియట్ రెండో ఏడాది 3.75లక్షల మంది చదువుతుండగా.. వీరిలో 1.25 లక్షల మంది ఇంజినీరింగ్‌కు వెళ్తున్నారని సీఎం చంద్రబాబు వెల్లడించారు. 18శాతం మంది దేశంలో ప్రతిష్ఠాత్మకమైన విద్యా సంస్థల్లో సీట్లు సంపాదిస్తున్నారని, ఇది 25శాతానికి చేరాలని అభిలషించారు. తెలుగువారికి అధికంగా సీట్లు వస్తున్నాయనే బిట్స్‌పిలానీ పరీక్షలు, ప్రాసెస్‌లో మార్పులు చేశారని, అయినప్పటికీ తెలుగు విద్యార్థుల హవా తగ్గలేదని, ప్రతిభ ఉంటే ఎన్ని పరీక్షలు పెట్టినా మనమే ముందు ఉంటామని చెప్పారు. ఏదైనా సమస్య, అవినీతిపైనా పరిష్కారవేదిక 1100కు ఫోన్ చేసి చెబితే చర్యలు తీసుకుంటామని వివరించారు. ఈ సందర్భంగా మానవవనరుల అభివృద్ధి శాఖ మంత్రి గంటా శ్రీనివాసరావు మాట్లాడుతూ సమాజాన్ని మార్చగల శక్తి విద్యకే ఉందని, ప్రతిభ అవార్డులు అందుకున్న వారికి ఉన్నత చదువులకు ప్రోత్సహిస్తామన్నారు. జలవనరుల శాఖ మంత్రి దేవినేని ఉమ, ఇతర ఉన్నతాధికారులు పాల్గొన్నారు.
మానసిక దృఢత్వమే అసలైన నైపుణ్యం
* ఎదురుదెబ్బలు తగిలినా యువత నిలబడాలన్న కేటీఆర్‌
* వరంగల్‌లో ‘టాస్క్‌’ ప్రాంతీయ కేంద్రం ప్రారంభం
* నాలుగు కంపెనీలతో ఎంవోయూ
ఈనాడు - వరంగల్‌: ఇంటర్వ్యూలో ఎంపిక కాలేదనో, పరీక్షల్లో తప్పామనో చిన్నచిన్న కారణాలతోనే విద్యార్థులు ఆత్మహత్యలు చేసుకోవడం సరికాదని ఐటీ, జౌళి, పరిశ్రమల శాఖ మంత్రి కేటీఆర్‌ హితవుపలికారు. జీవితంలో ఎదురుదెబ్బలు కచ్చితంగా తగులుతాయని, వాటిని తట్టుకుని మానసికంగా దృఢంగా ఉండటమే అసలు నైపుణ్యమని అన్నారు. అక్టోబరు 14న వరంగల్‌ అర్బన్‌ జల్లా హన్మకొండలో తెలంగాణ అకాడమీ ఫర్‌ స్కిల్‌ అండ్‌ నాలెడ్జ్‌ (టాస్క్‌) ప్రాంతీయ కేంద్రాన్ని కేటీఆర్‌ ప్రారంభించారు. అనంతరం నిట్‌ ఆడిటోరియంలో జరిగిన కార్యక్రమంలో విద్యార్థులను ఉద్దేశించి ప్రసంగించారు. విద్యార్థులు కళాశాల నుంచి బయట అడుగుపెట్టే నాటికల్లా పూర్తి నైపుణ్యంతో ఉండాలనే లక్ష్యంతోనే తెలంగాణ ప్రభుత్వం టాస్క్‌ ఏర్పాటు చేసిందన్నారు. ఈ క్రమంలో తొలి ప్రాంతీయ కేంద్రాన్ని వరంగల్‌లో ప్రారంభించామని చెప్పారు. త్వరలో రూ.25 కోట్లతో నగర శివారులోని మడికొండలో శాశ్వత ప్రాతిపదికన నైపుణ్య కేంద్రాన్ని ప్రారంభిస్తామని కేటీఆర్‌ వెల్లడించారు.
హైదరాబాద్‌కు శాటిలైట్‌ నగరంగా వరంగల్‌
బెంగళూరు నగరానికి మైసూర్‌ శాటిలైట్‌ నగరంగా ఉంటోందని, అలాగే హైదరాబాద్‌కు వరంగల్‌ను చేయాలనేది లక్ష్యమని కేటీఆర్‌ చెప్పారు. వరంగల్‌లో ఇప్పటికే ఐటీ ఇంక్యుబేషన్‌ సెంటర్‌ను ప్రారంభించామన్నారు. త్వరలో వరంగల్‌, కరీంనగర్‌లకు చెందిన ప్రవాస భారతీయులతో సమావేశమై మరిన్ని ఐటీ కంపెనీలు వరంగల్‌లో స్థాపించేలా కృషి చేస్తామని కేటీఆర్‌ చెప్పారు. వరంగల్‌లో ఎన్‌ఐటీతోపాటు ప్రముఖ ఇంజినీరింగ్‌ కళాశాలలు ఉన్నాయని, అందుకే ఇక్కడ అన్ని రంగాల వారికి నైపుణ్యాలు పెంచాల్సిన ఆవశ్యకత ఉందని వివరించారు. ఇదే వేదికపై నాలుగు కంపెనీలతో ఎంఓయూ కుదుర్చుకొన్నారు. మేధా ఇంజినీరింగ్‌, మహీంద్రా ప్రైడ్‌, శ్రీకాంత్‌ ఎంటర్‌ప్రైజెస్‌, బీఎస్‌ఎన్‌ఎల్‌ సంస్థలతో ‘టాస్క్‌’ కోసం ఒప్పందం కుదుర్చుకున్నారు. మాజీ క్రికెటర్‌, శ్రీకాంత్‌ ఎంటర్‌ప్రైజెస్‌ అధినేత కృష్ణమాచారి శ్రీకాంత్‌ వేదికపై ప్రత్యేక ఆకర్షణగా నిలిచారు.
ప్రపంచ స్థాయికి భారతీయ వర్శిటీలు
* దానికోసం రూ.10వేల కోట్ల సాయం
* పట్నా వర్శిటీ శతాబ్ది వేడుకల్లో పాల్గొన్న ప్రధాని
పట్నా: భారతదేశంలోని ప్రభుత్వ, ప్రైవేటు విశ్వవిద్యాలయాలు ప్రపంచస్థాయికి ఎదగాలని ప్రధానమంత్రి నరేంద్రమోదీ ఆకాంక్షించారు. శనివారం (అక్టోబరు 14) పట్నా విశ్వవిద్యాలయం శతాబ్ది వేడుకల్లో మోదీ ప్రసంగించారు. కార్యక్రమంలో ముందుగా బిహార్ సీఎం నీతీశ్ మాట్లాడుతూ.. పట్నా విశ్వవిద్యాలయానికి కేంద్రీయ హోదా కల్పించాలని కోరారు. దానిపై మోదీ స్పందిస్తూ.. విశ్వవిద్యాలయాలకు కేంద్రీయ హోదా కల్పించడం వంటివి గతించిన విషయాలని చెప్పారు. తమ ప్రభుత్వం దీనిపై మరో అడుగు ముందుకు వేసి ప్రైవేటు రంగంలో, ప్రభుత్వ రంగంలో చెరో 10 విశ్వవిద్యాలయాలను అంతర్జాతీయ స్థాయికి తీసుకువెళ్లనున్నట్లు ప్రకటించారు. దీనికోసం వాటికి అయిదేళ్లలో వీటికి రూ.10 వేల కోట్ల సాయాన్ని అందించనున్నామని చెప్పారు. పట్నా విశ్వవిద్యాలయం కూడా దీనిని వినియోగించుకుని ప్రపంచస్థాయికి ఎదగాలని ఆకాంక్షించారు. ప్రపంచంలోని అగ్రశ్రేణి 500 విశ్వవిద్యాలయాల్లో మనదేశం నుంచి ఒక్కటీ లేదనీ, ఆ లోటు తీరాల్సిన అవసరం ఉందనీ చెప్పారు. ఈ ర్యాంకుల్ని ప్రధానమంత్రిగానీ, ముఖ్యమంత్రి గానీ, మరే ఇతర రాజకీయ నాయకుడు గానీ ఇవ్వబోరనీ, వీటిని ఒక వృత్తిపరమైన తృతీయ పక్షం ఖరారు చేస్తుందనీ వివరించారు. విద్యార్థుల మెదళ్లను సమాచారంతో నింపేయడం వంటి పాత బోధన పద్ధతుల్ని విడనాడి నేర్చుకునే దిశగా, నవకల్పనలకు వీలుగా వారిని నడిపించడంపై దృష్టి సారించాలని అధ్యాపక వర్గానికి పిలుపునిచ్చారు.
పాముల నుంచి ఎలుకలకు మారాం..!
యువ ఐటీ నిపుణులు భారత్‌పట్ల ప్రపంచ దృక్పథాన్ని మార్చారని ప్రధాని చెప్పారు. భారతదేశమంటే పాములు పట్టేవాళ్లు, మంత్రగాళ్లు, భూతవైద్యులు ఉండే ప్రదేశంగా ఒకప్పుడు భావించేవారనీ, అలాంటి పాముల నుంచి ఎలుక (మౌస్)లకు మారామనీ చమత్కరించారు. 65% మంది యువ జనాభాయే ఉన్న భారతదేశం సాధించలేనిదంటూ ఏమీ లేదన్నారు. ఈ విశ్వవిద్యాలయానికి వచ్చిన తొలి ప్రధానిని తానే కావడం గురించి చమత్కరిస్తూ... మాజీ ప్రధానులు తనకు చాలా పనుల్ని విడిచిపెట్టేసినట్లున్నారని చెప్పారు..
గవర్నర్‌ సాబ్‌.. ఇదీ మా ఆన
* విశ్వవిద్యాలయాల భవిష్యత్తు ప్రణాళికలను వివరించిన ఉపకులపతులు
* మహాత్మాగాంధీ వర్సిటీలో ‘ఫ్లోరైడ్‌ అధ్యయన కేంద్రం’
* కరీంనగర్‌ లేదా నల్గొండలో వాస్తుశిల్ప కళాశాల
ఈనాడు - హైదరాబాద్‌: సేవలన్నింటినీ ఆన్‌లైన్‌ చేయడం.. కొత్త కోర్సులను ప్రవేశపెట్టడం.. పరిశోధన ప్రయోగశాలలను మెరుగుపరచడం.. నూతన అధ్యయన కేంద్రాలను ప్రారంభించడం.. న్యాక్‌, ఎన్‌బీఏ, 12(బి) హోదా, గుర్తింపులను సాధించడం.. ప్రతిష్ఠాత్మక పరిశోధన, విశ్వవిద్యాలయాలతో ఒప్పందాలు కుదుర్చుకోవడం.. కొత్త ప్రాంగణ కళాశాలలను నెలకొల్పడం- స్థూలంగా ఇదీ తెలంగాణ రాష్ట్రంలోని విశ్వవిద్యాలయాల భవిష్యత్తు ప్రణాళిక! ఇటీవల గవర్నర్‌ నరసింహన్‌ నిర్వహించిన సమావేశంలో మొత్తం 15 విశ్వవిద్యాలయాల ఉపకులపతులు తమ వ్యూహాలను దృశ్యాత్మకంగా వివరించారు. స్వల్ప, దీర్ఘకాలిక లక్ష్యాలను వివరిస్తూ, వాటిని సాధిస్తామని హామీ ఇచ్చారు. ఆరు నెలల తర్వాత గవర్నర్‌ మరోసారి సమీక్షించేలోగా వీటి అమలులో ప్రగతి ఎలా ఉంటుందన్నది ఆసక్తిగా మారింది. వర్సిటీల ప్రణాళికలపై తెలంగాణ రాష్ట్ర ఉన్నత విద్యామండలి కూడా సమీక్షించాలని భావిస్తోంది.
నిధులు, ఆచార్యులే ప్రధాన సమస్య
విశ్వవిద్యాలయాల ప్రణాళికలకు నిధులతోపాటు శాశ్వత ఆచార్యులు తప్పనిసరి. కొత్త కళాశాలలను, అధ్యయన కేంద్రాలను నెలకొల్పలంటే పదుల సంఖ్యలో కోట్లాది రూపాయలు అవసరం. అంతమొత్తం తెలుగు, జేఎన్‌ఏఎఫ్‌ వర్సిటీలకు ఎలా సమకూరుతాయన్నది ప్రశ్నార్థకం. ఒకవేళ వాటిని ప్రారంభించినా పూర్తిస్థాయిలో సౌకర్యాల కల్పన అనుమానం. శాశ్వత ఆచార్యులను ఆరు నెలల్లో భర్తీ చేస్తామని ఉప ముఖ్యమంత్రి కడియం శ్రీహరి గవర్నర్‌కు హామీ ఇచ్చినా, ఎంతవరకూ సాధ్యమవుతుందో చూడాలి. ఆచార్యులు లేకుండా పరిశోధనకు సంబంధించిన హామీలు నెరవేరడం కష్టమని నిపుణులు చెబుతున్నారు.
విశ్వవిద్యాలయాలు ఏం చెప్పాయి?
పొట్టి శ్రీరాములు తెలుగు విశ్వవిద్యాలయం
తెలంగాణ సంస్కృతి, సాహిత్యాన్ని ప్రతిబించించే ప్రచురణలు తీసుకొస్తాం. తెలుగు, లలిత కళల కోర్సులను ప్రవేశపెట్టేందుకు విదేశాలతో ఒప్పందాలు కుదుర్చుకుంటాం. నల్గొండ, కరీంనగర్‌లలో కొత్త ప్రాంగణాలు కొల్పుతాం. ఈ విద్యా సంవత్సరం బాలికలు, బాలుర వసతిగృహాలు, ఓపెన్‌ ఎయిర్‌ ఆడిటోరియం, ప్రత్యేక దూరవిద్య విభాగ భవనాల నిర్మాణం చేపడతాం.
మహాత్మాగాంధీ విశ్వవిద్యాలయం (నల్గొండ)
ఫ్లోరోసిస్‌ అధ్యయన కేంద్రాన్ని నెలకొల్పుతాం. నిర్వహణశాస్త్ర విద్యార్థులకు ఇంక్యుబేషన్‌ కేంద్రాన్ని నెలకొల్పుతాం. ఎంఈడీ, ఎమ్మెస్సీ సైకాలజీ, ఎమ్మెస్సీ సైబర్‌ సెక్యూరిటీ కోర్సులను ప్రారంభిస్తాం.
జవహర్‌లాల్‌ నెహ్రూ వాస్తుశిల్ప, లలిత కళల విశ్వవిద్యాలయం (జేఎన్‌ఏఎఫ్‌యూ)
కరీంనగర్‌ లేదా నల్గొండలో కొత్త కళాశాలల్ని ప్రారంభిస్తాం. హైదరాబాద్‌లో విశ్వవిద్యాలయానికి కొత్త ప్రాంగణాన్ని ఏర్పాటు చేసుకుంటాం. హడ్కో ద్వారా పరిశోధన పీఠాన్ని ఏర్పాటుచేస్తాం. గ్రామీణాభివృద్ధి, నిర్మాణ నిర్వహణ, ఉత్పత్తుల రూపకల్పన, సినీ-టీవీ ప్రసారాలు, కళలచరిత్రవంటి కోర్సులను ప్రవేశపెడతాం.
పాలమూరు విశ్వవిద్యాలయం
ఈ విద్యా సంవత్సరం న్యాక్‌ గుర్తింపు సాధిస్తాం. పరిశోధనలకు రూ.10 కోట్లతో కేంద్రీయ పరిశోధన కేంద్రం నెలకొల్పుతాం. ఆచార్యుల భర్తీ తర్వాత రాజకీయశాస్త్రం, సామాజిక కార్యకలాపాలు, గణితం, ఫార్మసీ తదితర సబ్జెక్టుల్లో పీహెచ్‌డీ కోర్సులను ప్రారంభిస్తాం. సీసీఎంబీ, ఐఐసీటీ, హెచ్‌సీయూలతో ఒప్పందాలు చేసుకుంటాం. జీవ సాంకేతికత (బయో టెక్నాలజీ)లో నైపుణ్య కేంద్రాన్ని నెలకొల్పుతాం.
ఉస్మానియా విశ్వవిద్యాలయం
స్వల్పకాలిక ప్రణాళిక: ప్రస్తుతమున్న వసతి గృహాలను, వారసత్వ భవనాలను, ప్రయోగశాలలను ఆధునికీకరిస్తాం. సేవలన్నింటినీ ఆన్‌లైన్‌ చేస్తాం. పరిశోధనల నిమిత్తం ‘హై పెర్‌ఫార్మన్స్‌ కంప్యూటింగ్‌ సెంటర్‌’ను నెలకొల్పుతాం. ఉద్యోగావకాలుండే, నైపుణ్య ఆధార కోర్సులను ప్రవేశపెడతాం.
దీర్ఘకాలిక ప్రణాళిక: ప్రపంచస్థాయి ర్యాంకింగే లక్ష్యంగా కేంద్ర ప్రభుత్వం ప్రవేశపెట్టిన ఇన్‌స్టిట్యూషన్‌ ఆఫ్‌ ఎమినెన్స్‌ హోదాను సాధిస్తాం. పర్యావరణపరంగా ఆదర్శ వర్సిటీగా తీర్చిదిద్దుతాం. వర్సిటీ అభివృద్ధిలో పూర్వవిద్యార్థులను భాగస్వాములనుచేస్తాం. రెండు విశ్వవిద్యాలయాలు సంయుక్తంగా డిగ్రీ పట్టా అందించేలా ప్రముఖ వర్సిటీలతో ఒప్పందాలు చేసుకుంటాం.
జేఎన్‌టీయూహెచ్‌
అంకుర కేంద్రాల సంస్కృతిని అభివృద్ధి చేస్తాం. సామాజిక అవసరాలను తీర్చేందుకు సాంకేతికతను బదిలీ చేస్తాం. నానో సైన్స్‌ అండ్‌ టెక్నాలజీ కేంద్రాన్ని సెంటర్‌ ఆఫ్‌ ఎక్స్‌లెన్స్‌గా తీర్చిదిద్దుతాం. పారిశ్రామిక అవసరాలకు అనుగుణంగా పరిశోధన-అభివృద్ధిని చేపడతాం. నైపుణ్యాభివృద్ధి కోర్సులను నిరంతరాయంగా అందించేందుకు కృషి చేస్తాం.
కాకతీయ విశ్వవిద్యాలయం
కేంద్రం నుంచి అటల్‌ ఇంక్యుబేషన్‌ కేంద్రాలను సాధిస్తాం. సేవలను ఆన్‌లైన్‌ చేస్తాం. కెరీర్‌ గైడెన్స్‌తో పాటు విశ్వవిద్యాలయం-పరిశ్రమల అనుసంధాన కేంద్రాన్ని బలోపేతం చేస్తాం. ప్రయోగశాలల్ని ఉన్నతీకరిస్తాం.
ఆర్‌జీయూకేటీ (బాసర)
యూజీసీ నుంచి అభివృద్ధి నిధులు పొందేందుకు 12(బి) హోదా సాధిస్తాం. అన్ని కోర్సులకు నేషనల్‌ బోర్డు ఆఫ్‌ అక్రిడేషన్‌ (ఎన్‌బీఏ) గుర్తింపు తెస్తాం. సైన్స్‌ విభాగాల కోసం భవనాల నిర్మాణం. ప్రతిష్ఠాత్మక పరిశోధన సంస్థలతో ఒప్పందాలు కుదుర్చుకుంటాం.
శాతవాహన విశ్వవిద్యాలయం (కరీంనగర్‌)
12(బి), న్యాక్‌ గుర్తింపు సాధిస్తాం. ఇంక్యుబేషన్‌ కేంద్రాన్ని నెలకొల్పుతాం. గ్రంథాలయాన్ని డిజిటలీకరణ చేస్తాం. విశ్వవిద్యాలయం-పరిశ్రమల అనుసంధాన విభాగాన్ని ఏర్పాటుచేస్తాం. రసాయన, ఆహార శాస్త్రాలు, ఔషధ విభాగాల్లో పరిశోధనకు ప్రయోగశాలల్ని నెలకొల్పుతాం.
ఇంటర్‌లో గ్రేడింగ్ విధానానికి యోచన
* విద్యార్థుల ఆత్మహత్యల నేపథ్యంలో చర్యలు
* ఎంసెట్ వెయిటేజీ తొలగింపుపైనా చర్చ
* మంత్రి గంటా శ్రీనివాసరావు వెల్లడి
ఈనాడు, అమరావతి: విద్యార్థుల ఆత్మహత్యల నేపథ్యంలో ఏపీలో ఇంటర్మీడియట్‌లో మార్కుల విధానాన్ని తొలగించి గ్రేడింగ్ విధానాన్ని ప్రవేశపెట్టాలని భావిస్తున్నామని, దీనిపై ముఖ్యమంత్రి చంద్రబాబునాయుడితో చర్చించాక నిర్ణయం తీసుకుంటామని మానవ వనరుల అభివృద్ధి శాఖ మంత్రి గంటా శ్రీనివాసరావు తెలిపారు. విద్యార్థుల ఆత్మహత్యలపై సచివాలయంలోని తన ఛాంబర్‌లో శుక్రవారం (అక్టోబరు 13) విలేకరుల సమావేశం నిర్వహించారు. ఈ సందర్భంగా ఆయన మాట్లాడుతూ.. ఎంసెట్‌లో ఇంటర్ మార్కులకు ఇస్తున్న 25 శాతం వెయిటేజీని ఉంచాలా? తొలగించాలా? అనే దానిపైనా ఆలోచిస్తున్నామని అన్నారు. నీట్ వచ్చాక ఎంసెట్‌కు ప్రాధాన్యం తగ్గిందని వెల్లడించారు. విద్యార్థుల సమస్యలను పరిష్కరించేందుకు కాల్‌సెంటర్ ఏర్పాటు చేస్తున్నామని వివరించారు. ఆత్మన్యూనతకు గురైన విద్యార్థులు ఈ నంబర్‌కు ఫోన్ చేస్తే కౌన్సెలింగ్ నిర్వహిస్తారని చెప్పారు. విద్యార్థుల ఆత్మహత్యలపై అధ్యయనానికి నియమించిన చక్రపాణి కమిటీ సిఫార్సులను సమర్థంగా అమలు చేసేందుకు చర్యలు తీసుకుంటామన్నారు. ఇంటర్ విద్యామండలి ఆదేశాలను పాటించని కళాశాలల పట్ల కఠినంగా వ్యవహరిస్తామన్నారు. నిబంధనలను ఉల్లంఘించే కళాశాలలపై అవసరమైతే క్రిమినల్ కేసులు నమోదుచేసి మూసేస్తామని హెచ్చరించారు. జూనియర్ కళాశాలల వసతి గృహాలు బందీఖానాలుగా ఉంటున్నాయని, 40 మంది విద్యార్థులు ఉండాల్సిన గదిలో 70 మందిని ఉంచుతున్నారని మంత్రి ఆవేదన వ్యక్తం చేశారు. కళాశాలల్లో క్రీడలు, విద్యార్థుల మానసిక ఉల్లాసానికి ఎలాంటి చర్యలు తీసుకోవడం లేదని వెల్లడించారు. ప్రతిరోజు పరీక్షలు నిర్వహిస్తూ విద్యార్థులను ఒత్తిడికి గురి చేస్తున్నారని పేర్కొన్నారు. రాష్ట్రంలో విద్యార్థుల వరుస ఆత్మహత్యలు తనను కలిచివేస్తున్నాయని, ఆత్మహత్యల నివారణకు సమగ్ర విధానాన్ని రూపొందించేందుకు అక్టోబరు 16న జూనియర్ కళాశాలల యాజమాన్యాలతో సమావేశం నిర్వహిస్తున్నామని తెలిపారు. రాష్ట్రవ్యాప్తంగా ఎలాంటి అనుమతి లేకుండా 190 కళాశాలల వసతిగృహాలను నిర్వహిస్తున్నారని, అనుమతి తీసుకునేందుకు వీరికి మూడు నెలల సమయం ఇచ్చామని వెల్లడించారు. ఈలోపు అనుమతి తీసుకోకపోతే వసతిగృహాలను రద్దు చేస్తామని చెప్పారు. అనుమతి లేని వాటిల్లో ఎక్కువగా నారాయణ, చైతన్యకు చెందినవే ఉన్నాయని ఓ ప్రశ్నకు బదులుగా వెల్లడించారు. ప్రైవేటు, కార్పొరేట్ కళాశాలల నిబంధనల ఉల్లంఘనలో ఇంటర్మీడియట్ బోర్డు, అధికారుల వైఫల్యం ఉందని మంత్రి అభిప్రాయపడ్డారు. 20వ తేదీ తర్వాత విద్యాశాఖ ప్రభుత్వ ప్రత్యేక ప్రధాన కార్యదర్శి, పాఠశాల విద్య కమిషనర్, సర్వశిక్షాఅభియాన్ ఎస్పీడీలతో కలిసి తాను జిల్లాలవారీగా తనిఖీలు నిర్వహించనున్నట్లు ప్రకటించారు.
తెలుగు అందరూ చదవాల్సిందే..
తెలుగు సబ్జెక్టు అమలుపై నిర్ణయం తీసుకున్నామని, త్వరలో ఉత్తర్వులు జారీ చేస్తామని మంత్రి గంటా శ్రీనివాసరావు తెలిపారు. సీబీఎస్ఈలో తెలుగు అమలుకు ఏమైనా న్యాయపరమైన ఇబ్బందులు వస్తాయా? అనే కోణంలోనూ సలహాలు తీసుకున్నామన్నారు. రాష్ట్రంలో తెలుగు, ఆంగ్ల మాధ్యమాలు, సీబీఎస్ఈ తదితర విద్యాలయాలన్నింటికీ తెలుగు సబ్జెక్టును తప్పనిసరి చేయనున్నామని చెప్పారు. వచ్చే విద్యాసంవత్సరం నుంచి దీన్ని అమలు చేయనున్నామని తెలిపారు. అక్టోబరు 15న 6,500 మంది విద్యార్థులకు ప్రతిభా అవార్డులు ప్రదానం చేయనున్నామని వెల్లడించారు. దేశవ్యాప్తంగా పది అంశాల్లో ఇచ్చిన గ్రేడింగ్‌లో రాష్ట్ర సర్వశిక్షా అభియాన్ మొదటి స్థానంలో నిలిచినందుకు ఎస్పీడీ జి.శ్రీనివాస్‌ను ఆయన అభినందించారు.
పాత పద్ధతిలోనే టీఆర్‌టీ
* ఒకే పేపరుగా టీఆర్‌టీ పరీక్ష
* టెట్‌కి వెయిటేజీ 20 శాతం మార్కులు
* పోస్టులపై విద్యాశాఖ కసరత్తు
ఈనాడు - హైదరాబాద్‌: తెలంగాణలో ఉపాధ్యాయ పోస్టుల భర్తీకి నిర్వహించే ఉపాధ్యాయ నియామక పరీక్ష (టీచర్స్‌ రిక్రూట్‌మెంట్‌ టెస్ట్‌- టీఆర్‌టీ)ని డీఎస్సీ తరహాలో నిర్వహించనున్నారు. ఒకే పేపరుగా పరీక్ష ఉండాలని, అందులో టెట్‌కు 20 శాతం మార్కులు వెయిటేజీగా ఇవ్వాలని నిర్ణయించారు. అక్టోబరు 12న ఉపాధ్యాయ నియామక పరీక్ష విధానంపై టీఎస్‌పీఎస్సీ సమావేశమై చర్చించింది. గత డీఎస్సీ మాదిరిగానే పరీక్ష విధానం ఉండాలని నిర్ణయించినట్లు సమాచారం. ప్రయోగాలకు వెళ్లి వివాదాలకు తావివ్వకూడదని భావించారు. పాఠశాల విద్యాశాఖ ఇప్పటికే సిద్ధం చేసిన జాబితాలో కొన్ని సవరణలున్నట్లు ఆ శాఖ గుర్తించింది. రోస్టర్‌ పాయింట్లు, రిజర్వేషన్‌ వివరాలను క్షుణ్ణంగా పరిశీలిస్తోంది. టీఎస్‌పీఎస్సీ నుంచి వచ్చిన అభ్యంతరాలను పరిగణనలోకి తీసుకుంటోంది. ఆ మేరకు జిల్లా విద్యాధికారులకు వివరాలు పంపించి అవసరమైన మార్పులు చేయిస్తోంది. మరోవైపు డీఎస్సీలో కొన్ని పోస్టులకు సంబంధించి విద్యార్హతల్లో మార్పులు చేయాల్సి ఉంది. పాఠశాల విద్యాశాఖ అవసరమైన మార్పులు చేసి, ప్రతి జిల్లాకు సంబంధించి పూర్తిస్థాయి సమాచారాన్ని టీఎస్‌పీఎస్సీకి పంపించాల్సి ఉంది. తుది ప్రతిపాదన జాబితా టీఎస్‌పీఎస్సీకి వచ్చేందుకు మరో నాలుగైదు రోజులు పట్టే అవకాశాలున్నట్లు తెలుస్తోంది. విద్యార్హతలపై స్పష్టత వచ్చిన తర్వాతే ప్రకటన వెలువడనున్నట్లు సమాచారం. అక్టోబరు 23న సుప్రీంకోర్టులో కేసు విచారణ ఉన్నందున ఆలోగా ప్రకటన వెలువడే అవకాశాలున్నట్లు విద్యాశాఖ అధికారులు చెబుతున్నారు.
పురుష అభ్యర్థులకు కొత్త రోస్టర్‌ గండం!
కొత్త జిల్లాల ప్రాతిపదికన ఉపాధ్యాయ నియామక పరీక్ష నిర్వహించనున్నందున రోస్టర్‌ పాయింట్ల విధానం మారనుంది. ఇది పురుష అభ్యర్థులకు ఆందోళన కలిగిస్తోంది. మూడు పాత జిల్లాల నుంచి చీలి ఒక కొత్త జిల్లా ఏర్పడినవి ఉన్నాయి. ఉదాహరణకు కరీంనగర్‌, మెదక్‌, వరంగల్‌ జిల్లాల నుంచి సిద్దిపేట ఏర్పడింది. అందువల్ల పాత రోస్టర్‌ విధానం అమలు సాధ్యం కాదు. కొత్త జిల్లాల నేపథ్యంలో మొదటి పాయింట్‌ నుంచి రోస్టర్‌ విధానం మొదలుకానుంది. అప్పుడు మొదటి ప్రాధాన్యం ఓసీ మహిళకు ఇస్తారు. అంటే ఒక ఉపాధ్యాయ ఖాళీ ఉంటే ఓసీ మహిళకు కేటాయిస్తారు. రెండు ఖాళీలు ఉంటే రెండోది ఎస్సీ మహిళకు ఇస్తారు. దీనివల్ల పురుష అభ్యర్థులకు ఉద్యోగం దక్కని పరిస్థితి. మొత్తం 8,792 ఉపాధ్యాయ ఖాళీల్లో 900 ఉర్దూ మాధ్యమానికి కేటాయించారు. మిగిలిన 7,892 ఖాళీల్లో స్కూల్‌ అసిస్టెంట్ల ఉద్యోగాలు 1,754 మాత్రమే. దానివల్ల కొన్ని జిల్లాల్లో ఆ ఖాళీలు పదుల్లోనే ఉన్నాయి. అంతేకాకుండా స్కూల్‌ అసిస్టెంట్లలో భౌతిక, జీవశాస్త్రం, గణితం, ఆంగ్లం తదితర సబ్జెక్టుల పోస్టులుంటాయి. ఒక్కో సబ్జెక్టుకు ఒకటి రెండు పోస్టులే ఉంటాయి. ముఖ్యంగా పాత కరీంనగర్‌ జిల్లా, వరంగల్‌ అర్బన్‌, గ్రామీణ, మేడ్చల్‌ తదితర పలు జిల్లాల్లో ఇదే పరిస్థితి. ఈ జిల్లాల్లో కొన్ని సబ్జెక్టుల ఖాళీలకు పురుష అభ్యర్థులు దరఖాస్తు చేసినా ప్రయోజనం లేనట్లే. కొత్త కరీంనగర్‌ జిల్లాలో స్కూల్‌ అసిస్టెంట్‌ భౌతికశాస్త్రం ఉపాధ్యాయ ఖాళీలు రెండు, జీవశాస్త్రం ఖాళీలు ఒకటి ఉన్నాయి. దీంతో వాటికి మహిళలే పోటీ పడాల్సి ఉంటుందని, ఐదేళ్లుగా డీఎస్సీ కోసం ఎదురుచూస్తున్న పురుష అభ్యర్థులకు ఇది శరాఘాతమేనని ఓ ఉపాధ్యాయుడు వ్యాఖ్యానించారు. అలాంటివారు స్థానికేత కోటా (20%) కింద ఇతర జిల్లాలకు వలసపోక తప్పదని అంచనా వేస్తున్నారు.
గిరిజన గురుకుల డిగ్రీ కళాశాలల్లో 1455 పోస్టులు
ఈనాడు, హైదరాబాద్: తెలంగాణ ప్రభుత్వం కొత్తగా మంజూరు చేసిన 22 గిరిజన డిగ్రీ కళాశాలల్లో 1455 టీచింగ్, నాన్‌టీచింగ్ పోస్టులు మంజూరయ్యాయి. ఈ మేరకు ఆర్థికశాఖ కార్యదర్శి శివశంకర్ ఉత్తర్వులు జారీ చేశారు. ఇందులో డిగ్రీ లెక్చరర్ పోస్టులు 880 ఉన్నాయి. నాన్‌టీచింగ్ పోస్టులకు శాశ్వత ప్రాతిపదికన నియామకాలు చేపట్టేందుకు అనుమతి మంజూరైంది.
పోస్టుల - వివరాలివీ...
ప్రిన్సిపల్ - 22
డిగ్రీ లెక్చరర్లు - 880
లైబ్రేరియన్లు - 22
ఫిజికల్ డైరెక్టర్లు - 22
పరిపాలన అధికారులు - 22
సూపరింటెండెంట్లు - 22
మెస్ మేనేజర్ /వార్డెన్ - 22
స్టాఫ్ నర్సు - 44
సీనియర్ అసిస్టెంట్ - 22
కేర్‌టేకర్ - 22
ల్యాబ్ అసిస్టెంట్ - 88
కంప్యూటర్ ల్యాబ్ అసిస్టెంట్ - 44
అసిస్టెంట్ లైబ్రేరియన్ - 22
జూనియర్ అసిస్టెంట్-డీఈవో - 22
స్టోర్ కీపర్ - 22
మ్యూజియం కీపర్ - 22
రికార్డు అసిస్టెంట్ - 22
ఆఫీసు సబార్డినేట్ - 88
రిజిస్ట్రార్ - 1
డిప్యూటీ సెక్రటరీ - 2
సహాయ కార్యదర్శి - 2
సూపరింటెండెంట్ - 3
సీనియర్ అసిస్టెంట్ - 3
జూనియర్ అసిస్టెంట్ - 3
ఆఫీసు సబార్డినేట్ - 3
రీజినల్ కోఆర్డినేటర్లు - 8
డీఎస్సీకి ‘కొత్త’ చిక్కులు
* ఉపాధ్యాయ పోస్టుల భర్తీకి నూతన జిల్లాలే ప్రాతిపదిక
* తెలంగాణ ప్రభుత్వ నిర్ణయంతో అభ్యర్థుల్లో ఆందోళన
* జిల్లాల విభజనతో సొంత జిల్లాలోనే స్థానికేతరులయ్యామని ఆవేదన
* పోస్టుల వారీ అర్హత నియమావళిపై ఇంకా రాని స్పష్టత
ఈనాడు - హైదరాబాద్‌: నూతన జిల్లాల వారీగా ఉపాధ్యాయ పోస్టులను భర్తీ చేయాలన్న తెలంగాణ ప్రభుత్వ నిర్ణయంతో సాంకేతిక సమస్యలు తెరపైకి వస్తున్నాయి. ఈ పోస్టులన్నీ జిల్లా స్థాయి పోస్టులు కావడంతో స్థానికత, స్థానికేతర ధ్రువీకరణలో ఇబ్బందులు ఎదురుకానున్నాయి. పూర్వజిల్లాలో స్థానికులైన వారంతా ఇప్పుడు కొత్త జిల్లాలో స్థానికేతరులు కానున్నారు. పూర్వ జిల్లాల ప్రాతిపదికన కాకుండా కొత్త జిల్లాలతో ఉపాధ్యాయ పోస్టులను భర్తీచేయాల్సి వస్తే నిరుద్యోగ అభ్యర్థులు నష్టపోయే ప్రమాదముందని విద్యార్థి, నిరుద్యోగ సంఘాలు ఆందోళన వ్యక్తం చేస్తున్నాయి. అవసరమైతే ఎక్కువగా పోస్టుల్లేని జిల్లాలకు అవసరమైన పోస్టులను సృష్టించాలంటున్నాయి. మరోవైపు కొత్త జిల్లాల వారీగా పోస్టులను గుర్తించడం, రోస్టర్‌, రిజర్వేషన్లు, స్థానిక, స్థానికేతర పోస్టుల వివరాలపై పాఠశాల విద్యాశాఖ కసరత్తు చేస్తోంది. మరో నాలుగైదు రోజుల్లో ఉద్యోగ ప్రకటనకు ప్రతిపాదనలు సిద్ధం చేయనున్నట్లు తెలిసింది.
కొత్త జిల్లాలు కొన్నింటిలో ఆశించిన సంఖ్యలో పోస్టులు ఉండటం లేదని తెలుస్తోంది. పట్టణ జిల్లాల్లో ఆశావహుల సంఖ్య అధికంగా ఉన్నప్పటికీ, అక్కడ పోస్టులు తక్కువగా ఉన్నట్లు సమాచారం. గ్రామీణ జిల్లాలో పుట్టినా చాలామంది గతంలో పట్టణ, జిల్లా కేంద్రాల్లో చదువుకున్నారు. జిల్లా విభజనతో వీరు ఇప్పుడు తమ సొంత జిల్లాలోనే స్థానికులవుతున్నారు. అందువల్ల గ్రామీణ జిల్లాలో పోస్టులున్నా వీరు స్థానికేతర కోటాలో పోటీపడాల్సిన పరిస్థితి తలెత్తనుంది. ప్రస్తుతం ఉపాధ్యాయ పోస్టుల కోసం ఎదురుచూస్తున్న నిరుద్యోగ అభ్యర్థుల కనీస వయసు 25 ఏళ్ల పైబడే ఉంటోంది. వీరు స్వగ్రామాల్లో ఉంటూ ప్రాథమిక విద్యను పూర్తి చేసి, మండల, జిల్లా కేంద్రాల్లో వసతిగృహాలు, సంక్షేమ పాఠశాలల్లో ఉంటూ హైస్కూల్‌ విద్య చదివారు. ఉద్యోగుల పిల్లలు పట్టణాల్లోనే విద్యను అభ్యసించారు. ప్రస్తుత నిబంధనల ప్రకారం నాలుగో తరగతి నుంచి 10వ తరగతి వరకు కనీసం నాలుగేళ్లు ఎక్కడైతే చదివారో ఆ జిల్లాను స్థానికతగా తీసుకుంటారు. ఇప్పుడు వీరికి సాంకేతిక సమస్యలు రానున్నాయి.
* ఉదాహరణకు పూర్వ వరంగల్‌ జిల్లాలో ఓ విద్యార్థి మహబూబాబాద్‌లో పుట్టి అక్కడే ప్రాథమిక విద్య చదివాడు. ఐదో తరగతి నుంచి జిల్లా కేంద్రానికి వచ్చాడు. గతంలో అతని స్థానికత పూర్వ వరంగల్‌ జిల్లాగా ఉండేది. ఇప్పుడు వరంగల్‌ అర్బన్‌గా మారింది. ఇప్పుడు అక్కడ పోస్టులు తక్కువగా ఉన్నట్లు తెలుస్తోంది. మరోవైపు మహబూబాబాద్‌లోపుట్టినప్పటికీ అక్కడి పోస్టులకు అతను దరఖాస్తు చేసే అవకాశం లేకుండా పోయింది. పూర్వజిల్లాలో స్థానికుడైనప్పటికీ అక్కడ స్థానికేతర కోటాలో 20 శాతం పోస్టులకు పోటీ పడాలి.
స్థానికత ధ్రువీకరణకూ ఇబ్బందులు
జిల్లాల పునర్విభజన నేపథ్యంలో అభ్యర్థుల స్థానికత ధ్రువీకరణకు ఇబ్బందులు పడే పరిస్థితి కనిపిస్తోంది. అభ్యర్థులు పదో తరగతి ఉత్తీర్ణులయినప్పుడు పాఠశాల నుంచి తీసుకున్న స్టడీ సర్టిఫికెట్‌ (బోనాఫైడ్‌)లో పూర్వ జిల్లా పేరు ఉంది. ఇప్పుడు తీసుకోవాలంటే కొత్త జిల్లా కింద తీసుకోవాలి. ఈ స్టడీ సర్టిఫికెట్ల ప్రకారం.. ఆ అభ్యర్థి స్థానికత ఎవరు ధ్రువీకరించాలన్న విషయంపైనా ఇంకా స్పష్టత రాలేదు. ఆయా జిల్లాల రెవెన్యూ యంత్రాంగానికి ఈ బాధ్యతను అప్పగించాలని కొందరు ఉన్నతాధికారులు సూచిస్తున్నారు.
ఈ మండలాల్లో మరీ ఇబ్బంది
కొన్ని మండలాలు పూర్వ జిల్లా నుంచి ఏర్పడిన కొత్త జిల్లాలకు కాకుండా మరో జిల్లాలోకి వెళ్లాయి. ఇలాంటి మండలాలు, గ్రామాల పరిధిలోని అభ్యర్థుల పరిస్థితి మరీ గందరగోళంగా మారింది. వీరికి స్థానికత నిర్ణయించడం ఎలా? అన్నది ఇప్పుడు పెద్ద ప్రశ్న. మరోవైపు నియామక పరీక్షకు సంబంధించిన విద్యార్హతల నియమావళిపై నిరుద్యోగుల నుంచి అభ్యంతరాలు వ్యక్తమవుతున్నాయి. ప్రభుత్వం స్పష్టత ఇవ్వకపోతే న్యాయపరమైన చిక్కులు వచ్చే అవకాశాలున్నట్లు తెలుస్తోంది.
ఉపాధ్యాయుల పోస్టులకు పదిరోజుల్లో ప్రకటన
* ఉప ముఖ్యమంత్రి కడియం వెల్లడి
బాలసముద్రం(వరంగల్), న్యూస్‌టుడే: తెలంగాణ పబ్లిక్ సర్వీస్ కమిషన్ పదిరోజుల్లో ఉపాధ్యాయుల పోస్టుల కోసం ప్రకటన(నోటిఫికేషన్) విడుదల చేయనుందని ఉపముఖ్యమంత్రి కడియం శ్రీహరి తెలిపారు. బుధవారం (అక్టోబరు 11) హన్మకొండలో ఏర్పాటు చేసిన విలేకరుల సమావేశంలో కడియం పాల్గొన్నారు. ఒక ప్రశ్నకు సమాధానమిస్తూ ఇప్పటికే 8792 ఉపాధ్యాయ పోస్టులకు సంబంధించిన వివరాలను ప్రభుత్వం టీఎస్‌పీఎస్‌సీకి అందజేసిందని చెప్పారు. పోస్టులకు సంబంధించి ఉత్తర్వులు జారీ అయ్యాయని, మరో పదిరోజుల్లో ప్రకటన విడుదల అవుతుందన్నారు. మారుమూల ప్రాంతాల అభ్యర్థులను దృష్టిలో పెట్టుకునే కొత్త జిల్లాల వారీగా ఉపాధ్యాయ పోస్టులను భర్తీ చేయడానికి ప్రభుత్వం రంగం సిద్ధం చేస్తోందన్నారు. రాష్ట్రం ఆవిర్భవించి 40 నెలలు అవుతోందని, కొత్త జిల్లాలు ఏర్పడి ఏడాది పూర్తయిందని ఈ క్రమంలో మెరుగైన పాలనతో ప్రజలకు దగ్గరయ్యామన్నారు. వరంగల్ గ్రామీణ జిల్లాలో ఏర్పాటు చేయనున్న టెక్స్‌టైల్ పార్కుకు అక్టోబరు 20న ముఖ్యమంత్రి కేసీఆర్ శంకుస్థాపన చేస్తారని కడియం చెప్పారు.
తెలంగాణ టీఆర్‌టీ ఎలా ఉంటుందో..?
* కొత్త పరీక్ష విధానంపై ఉత్కంఠ
* తక్కువ ఖాళీలున్న జిల్లాల అభ్యర్థుల్లో ఆందోళన
* డిగ్రీలో 50% ఉంటేనే స్కూల్‌ అసిస్టెంట్‌ ఉద్యోగాలకు అర్హులు
ఈనాడు, హైదరాబాద్‌: తెలంగాణలో ఉపాధ్యాయుల నియామక ప్రక్రియను 31 జిల్లాల ప్రకారమే జరుగుతాయని స్పష్టం కావడంతో ఇక పరీక్షా విధానం ఎలా ఉండొచ్చనే దానిపై నిరుద్యోగ అభ్యర్థుల్లో ఉత్కంఠ మొదలయింది. గురుకులాల్లో ఉపాధ్యాయుల భర్తీకి టీఎస్‌పీఎస్‌సీ ప్రాథమిక, ప్రధాన పరీక్షలను నిర్వహించిన సంగతి తెలిసిందే. వాటిల్లో ట్రైన్డ్‌ గ్రాడ్యుయేట్‌ టీచర్స్‌ (టీజీటీ) ఉద్యోగాలకు టెట్‌ అర్హత తప్పనిసరి. ఈ క్రమంలో టీఆర్‌టీకి కూడా రెండు పరీక్షలు ఉండొచ్చని భావిస్తున్నారు. టీఎస్‌పీఎస్‌సీ వర్గాలు మాత్రం పరీక్షా విధానంపై ఇంకా తుది నిర్ణయం తీసుకోలేదని చెబుతున్నాయి. టీఎస్‌పీఎస్‌సీ పలు పరీక్షల్లో జనరల్‌ స్టడీస్‌ భాగం ఉండేలా చూస్తోంది. టీఆర్‌టీలో కూడా అదే విధానం పాటిస్తారా అన్నది ఆసక్తికరంగా మారింది.
జిల్లాల వారీగా ఖాళీలు రహస్యమే
రాష్ట్రవ్యాప్తంగా 2016 సెప్టెంబరు నాటికి ఉన్న ఖాళీలు 8,792ను భర్తీ చేస్తున్నట్లు విద్యాశాఖ అధికారికంగా ప్రకటించినా, ఏ జిల్లాలో ఎన్ని ఖాళీలనే విషయాన్ని అత్యంత గోప్యంగా ఉంచుతోంది. కొన్ని జిల్లాల్లో చాలా తక్కువ ఖాళీలు ఉంటాయని అభ్యర్థులు ఆందోళన చెందుతుండటమే అందుకు కారణంగా భావిస్తున్నారు. కొన్ని జిల్లాల్లో 100-150 ఉద్యోగాలే ఉంటాయని సమాచారం. వరంగల్‌ అర్బన్‌, వరంగల్‌ గ్రామీణ, జనగామ, మేడ్చల్‌ లాంటి జిల్లాల్లో అదే పరిస్థితి ఉంటుందని విద్యా వాలంటీర్ల ఖాళీలను బట్టి అంచనాకు వస్తున్నారు. కొత్తగూడెం, ఖమ్మం జిల్లాల్లో గిరిజన ప్రాంతాల ఖాళీలను మినహాయిస్తే పదుల సంఖ్యలోనే ఉంటాయని చెబుతున్నారు. స్కూల్‌ అసిస్టెంట్లకు సంబంధించి డిగ్రీలో ఓసీలకు 50% మార్కులుండాలని, ఇతరులకు 45% తప్పనిసరని జీఓలో పేర్కొనడంతో అభ్యర్థుల్లో ఆందోళన వ్యక్తమవుతోంది. ఆ నిబంధనను మార్చాలని పీఆర్‌టీయూ టీఎస్‌ అధ్యక్షుడు సరోత్తంరెడ్డి ప్రభుత్వానికి సూచించారు.

సెంట్రల్‌ టెట్‌లో ఉత్తీర్ణులు కాకున్నా టీఆర్‌టీ రాయొచ్చా?
టెట్‌ అర్హత గురించి జీఓలో ప్రస్తావిస్తూ సెంట్రల్‌ టెట్‌ (సీటెట్‌)లో ఓసీలకు 90, బీసీలకు 75, ఎస్‌సీ, ఎస్‌టీ, దివ్యాంగులకు 60 మార్కులు వస్తేనే పరిగణనలోకి తీసుకుంటామని పేర్కొన్నారు. వాస్తవానికి సీటెట్‌లో ఓసీలకు 90 మార్కులు, ఇతరులకు 82 మార్కులు వస్తేనే ఉత్తీర్ణులైనట్లు లెక్క. అంటే సీటెట్‌లో ఉత్తీర్ణులు కాకున్నా.. పేర్కొన్న మార్కుల ప్రకారం అనుమతించాల్సి వస్తుంది.
ఇక జరగాల్సింది ఇదీ..
తాజాగా విద్యాశాఖ జారీ చేసిన జీఓ టీఎస్‌పీఎస్‌సీకి చేరింది. ఏమైనా మార్పు చేర్పులుంటే మరోసారి విద్యాశాఖ, కమిషన్‌ అధికారులు సమావేశమై ఖరారు చేస్తారు. ఈ ప్రక్రియ పూర్తయితే ఉద్యోగ ప్రకటన జారీ చేయడానికి 10-15 రోజుల వరకు సమయం పడుతుంది. సుప్రీంకోర్టులో కేసు విచారణకు రానున్నందున గురుకులాల కంటే టీఆర్‌టీ ప్రక్రియపై దృష్టి పెట్టే అవకాశం ఉందని భావిస్తున్నారు. మార్చిలో పదోతరగతి పరీక్షలు ఉన్నందున ఆలోపే పరీక్ష నిర్వహిస్తే విద్యావాలంటీర్లు ఉద్యోగాలు మానుకునే అవకాశం ఉంది. అందువల్ల ఇప్పటికిప్పుడు అత్యవసరం కానందున టీఆర్‌టీని వేసవి సెలవుల్లో నిర్వహిస్తారని నిపుణులు అంచనా వేస్తున్నారు.
నఉపాధ్యాయుల నియామకాలకు పచ్చజెండా
* డీఎస్సీ స్థానంలో ఇక టీఆర్‌టీ
* నిబంధనల ఉత్తర్వులు జారీ
* 31 జిల్లాల వారీగానే భర్తీ
* టెట్‌కు 20 శాతం వెయిటేజీ
ఈనాడు, హైదరాబాద్: ప్రభుత్వ పాఠశాలల్లో ఉపాధ్యాయ ఖాళీల భర్తీకి టీచర్స్ రిక్రూట్‌మెంట్ టెస్టు (టీఆర్‌టీ) నిర్వహించేందుకు తెలంగాణ రాష్ట్ర ప్రభుత్వం ఆమోదం తెలిపింది. నియామకాలకు పాటించాల్సిన నిబంధనలపై విద్యాశాఖ ప్రత్యేక ప్రధాన కార్యదర్శి రంజీవ్ ఆచార్య మంగళవారం (అక్టోబరు 10) జీఓ జారీ చేశారు. కొత్త జిల్లాల ప్రకారమే నియామకాలు జరగనున్నాయి. ఇప్పటివరకు జిల్లా ఎంపిక కమిటీ(డీఎస్సీ) అని పిలుస్తుండగా ఇక నుంచి టీఆర్‌టీగా పిలుస్తారు. కొద్ది రోజుల క్రితం 8,792 ఉపాధ్యాయ ఖాళీల భర్తీకి టీఎస్‌పీఎస్‌సీకి అనుమతినిస్తూ ఆర్థికశాఖ జీఓ జారీ చేయగా.. తాజాగా నిబంధనలపై విద్యాశాఖ జీఓ 25 ఇవ్వడంతో నియామకాలకు రాష్ట్ర ప్రభుత్వం సన్నద్ధమైనట్లేనని భావిస్తున్నారు. నియామకాలపై అక్టోబరు 23న సుప్రీంకోర్టులో కేసు విచారణకు రానుంది. న్యాయస్థానానికి చెప్పుకొనేందుకు ఈ జీఓను చూపి సరిపెడతారా? లేక ఉద్యోగ ప్రకటన జారీ చేస్తారా? అన్నది ప్రశ్నార్థకంగా ఉందని అభ్యర్థులు చెబుతున్నారు.
నిబంధనలు ఇవీ..
* టీఆర్‌టీ నియామకాల అధికారం జిల్లా విద్యాశాఖాధికారి(డీఈవో)కి ఉంటుంది.
* 31 జిల్లాల ప్రకారం ఖాళీల భర్తీ నిర్వహిస్తారు.
* ఉపాధ్యాయ అర్హత పరీక్ష (టెట్)లో వచ్చిన మార్కులకు 20 శాతం వెయిటేజీ ఇస్తారు. మిగిలిన 80 శాతం వెయిటేజీని టీఎస్‌పీఎస్‌సీ నిర్వహించే పరీక్షలో వచ్చిన మార్కులకు ఇస్తారు. తెలంగాణ రాష్ట్ర ఏర్పాటుకు ముందు జరిగిన ఏపీ టెట్ స్కోర్‌నే పరిగణనలోకి తీసుకుంటారు. రాష్ట్ర విభజన తరువాత జరిగిన ఏపీ టెట్ స్కోరును పరిగణనలోకి తీసుకోరు. పీఈటీ ఖాళీలకు టెట్ వర్తించదు.
* 1975 నాటి రాష్ట్రపతి ఉత్తర్వులను అనుసరించే అభ్యర్థుల స్థానికతను నిర్ణయిస్తారు. అంటే 4-10వ తరగతిలోపు ఏడేళ్లలో ఎక్కడ నాలుగేళ్లు చదివితే ఆ జిల్లాను స్థానిక జిల్లాగా పరిగణిస్తారు.
* ఎన్ని ఖాళీలుంటే అంత మందిని ఎంపిక చేస్తారు. వెయిటింగ్ జాబితా ఏమీ ఉండదు. ఏమైనా భర్తీ కాకుండా ఉంటే ఖాళీలను భవిష్యత్తులో వచ్చే ప్రకటనల ద్వారా భర్తీ చేస్తారు.
* షెడ్యూల్డ్ ఏరియాల్లో ఖాళీలకు కేవలం స్థానిక ఎస్‌టీ అభ్యర్థులకు మాత్రమే అవకాశం ఉంటుంది.
* ఎంపికైన అభ్యర్థుల జాబితాను టీఎస్‌పీఎస్‌సీ నియామక అధికారులకు (డీఈవోలకు) పంపుతుంది. పోస్టింగ్ కోసం కౌన్సెలింగ్ మార్గదర్శకాలను విద్యాశాఖ జారీ చేస్తుంది.
G.O.Ms.No. 25
నిరుద్యోగులకు టీఎస్‌పీఎస్సీ తీపికబురు
* వ్యవసాయ, సహకార శాఖలో 851 ఉద్యోగాల‌కు ప్ర‌క‌ట‌న విడుద‌ల‌
హైద‌రాబాద్: నిరుద్యోగులకు తెలంగాణ పబ్లిక్‌ సర్వీస్‌ కమిషన్‌ (టీఎస్‌పీఎస్సీ) తీపి కబురు అందించింది. వ్యవసాయ విస్తరణ అధికారి ఉద్యోగాల భర్తీ కోసం ప్రకటన జారీ చేసింది. వ్యవసాయ, సహకార శాఖలో 851 గ్రేడు- 2 ఏఈఓ పోస్టులకు దరఖాస్తులను ఆహ్వానిస్తూ టీఎస్‌పీఎస్సీ మంగ‌ళ‌వారం(అక్టోబ‌ర్ 10) నోటిఫికేషన్ విడుదల చేసింది. అక్టోబ‌ర్‌ 13 నుంచి 31వరకు ఆన్‌లైన్‌లో దరఖాస్తులు స్వీకరించనున్నట్లు కమిషన్ తెలిపింది. ఉద్యోగ ప్రకటన పూర్తి వివరాలు www.tspsc.gov.in వెబ్‌సైట్‌లో పొందుపరిచినట్లు పేర్కొంది. నవంబరు 21న రాత పరీక్ష నిర్వహించాలని నిర్ణయించారు.
శిశు తరగతులకు ఎన్‌సీఈఆర్‌టీ పాఠ్యప్రణాళిక
* దేశవ్యాప్తంగా అమలుకు నిర్ణయం
ఈనాడు, హైదరాబాద్: శిశు తరగతులకు దేశవ్యాప్తంగా ఒకే పాఠ్య ప్రణాళిక రానుంది. జాతీయ విద్యా పరిశోధన, శిక్షణ మండలి (ఎన్‌సీఈఆర్‌టీ) పాఠ్య ప్రణాళిక రూపొందించాలని నిర్ణయించింది. ప్రస్తుతం ప్రభుత్వ పాఠశాలల్లో ఒకటో తరగతి నుంచి పిల్లలకు జాతీయ విద్యావిధానం ప్రకారం విద్యనందిస్తున్నారు. ప్రైవేటు పాఠశాలలు మాత్రం నర్సరీ, ఎల్‌కేజీ, యూకేజీ పేరిట పూర్వ ప్రాథమిక తరగతులను అందిస్తున్నాయి. అందుకు మూడో సంవత్సరం నుంచే పిల్లలను చేర్చుకొని బోధిస్తున్నాయి. ప్రభుత్వ బడుల్లో శిశు తరగతులు లేనందున ప్రస్తుతం వారికి నిర్దేశిత పాఠ్య ప్రణాళిక లేదు. సర్కారు బడుల్లో శిశు తరగతులను కూడా ప్రవేశపెట్టాలని దేశవ్యాప్తంగా అభిప్రాయం వ్యక్తమైంది. జాతీయస్థాయి కమిటీలు సైతం అదే సిఫార్సు చేశాయి. పలు రాష్ట్రాలూ ఈ మేరకు కేంద్రంపై ఒత్తిడి తెస్తున్నాయి. ఈ నేపథ్యంలో శిశు తరగతులకు అనుగుణంగా సిలబస్‌ను రూపొందించాలని ఎన్‌సీఈఆర్‌టీ నిర్ణయించింది. ఎన్‌సీఈఆర్‌టీ కింద ఉపాధ్యాయ విద్య అయిన బీఈడీ, ఎంఈడీ తదితర కోర్సులను అందించేందుకు దేశవ్యాప్తంగా అయిదు ప్రాంతీయ విద్యాసంస్థలు (ఆర్ఐఈలు) ఉన్నాయి. అందులో ఒకటి మధ్యప్రదేశ్ రాష్ట్రంలోని భోపాల్‌లో ఉంది. శిశు తరగతులకు సిలబస్ రూపకల్పన బాధ్యతలను భోపాల్ ఆర్ఐఈకి అప్పగించారు. దాంట్లో ప్రత్యేక కేంద్రం నెలకొల్పుతున్నారు. ఆటలు ఆడించడం, చిన్న పాటలు, పద్యాలు నేర్పించడం లాంటివి ప్రణాళికలో చేరుస్తారు. మొత్తానికి పాఠశాల అంటే భయం పోగొట్టి, చదువుపై ఆసక్తి పెంచేలా సిలబస్ ఉంటుందని ఎన్‌సీసీఆర్‌టీ వర్గాలు చెబుతున్నాయి. 2018-19 (వచ్చే) విద్యాసంవత్సరం నుంచి సిలబస్‌ను అందుబాటులోకి తీసుకొచ్చి అమలు చేయాలని ఎన్‌సీఈఆర్‌టీ నిర్ణయించింది. అన్ని ఆర్ఐఈలలో శిశు తరగతులతో పాఠశాలలను కూడా ప్రయోగాత్మకంగా ప్రారంభిస్తున్నారు. తాము మొదలు పెట్టిన శిశు తరగతిలో 25 మంది విద్యార్థులు ఉన్నారని మైసూరు ఆర్ఐఈ ప్రిన్సిపాల్ డీజీ రావు చెప్పారు. కేంద్రం రూపొందించే సిలబస్ అందుబాటులోకి వస్తే ప్రైవేటు పాఠశాలలూ అదే బోధించాల్సి ఉంటుంది. తెలంగాణ రాష్ట్ర విద్యాపరిశోధన, శిక్షణ మండలి (ఎస్‌సీఈఆర్‌టీ) సైతం 2016 జనవరి నుంచి సిలబస్ రూపొందించాలని కసరత్తు చేసి ఒక కొలిక్కి తెచ్చింది. అయితే దాన్ని అమల్లోకి తీసుకురాలేదు. జిల్లా విద్య, శిక్షణ సంస్థల్లో (డైట్‌లలో) శిశు విద్యపై రెండేళ్ల డిప్లొమా కోర్సును ప్రవేశపెట్టేందుకు ప్రతిపాదనలు పంపిచారు. మెదక్ డైట్‌లో దీన్ని ప్రారంభించేందుకు ఎన్‌సీఈఆర్‌టీ అనుమతి ఇచ్చింది. అయితే ఇప్పటివరకు రాష్ట్ర విద్యాశాఖ మాత్రం కోర్సు ప్రారంభానికి పచ్చజెండా ఊపలేదు. తెలంగాణ రాష్ట్రంలో దాదాపు 10 వేల ప్రి ప్రైమరీ పాఠశాలలు, అంగన్‌వాడీల్లో దాదాపు 12 లక్షల మంది శిశు తరగతుల పిల్లలున్నారు.
బయోటెక్‌ పీజీ దారి
రానున్న కాలంలో బయోటెక్నాలజీ రంగం మనదేశంలో 10 లక్షల ఉద్యోగాలు, వాటికి సమానమైన ఉపాధి అవకాశాలను సృష్టించవచ్చని నిపుణులు చెబుతున్నారు. ఈ నేపథ్యంలో జవహర్‌లాల్‌ నెహ్రూ విశ్వవిద్యాలయం (జేఎన్‌యూ) బయోటెక్నాలజీ ప్రవేశపరీక్ష ప్రకటన వచ్చేసింది. ఆనవాయితీకి భిన్నంగా చాలా ముందుగా వెలువడిందిది. పరీక్ష కూడా డిసెంబర్లోనే!
జేఎన్‌యూ గత 30 సంవత్సరాలుగా.. (1985) ఎంఎస్‌సీ బయోటెక్నాలజీ సబ్జెక్టును అందిస్తోంది. ప్రస్తుతం భారత్‌లో మొత్తం 32 విశ్వవిద్యాలయాలు కలిసి ఈ కంబైన్డ్‌ బయోటెక్నాలజీ ప్రవేశపరీక్షను నిర్వహిస్తున్నాయి. దేశం మొత్తంలో సుమారుగా 550 సీట్లున్నాయి. ఈ ఏడాది తెలుగు రాష్ట్రాల్లోని పద్మావతి విశ్వవిద్యాలయం కూడా ఈ ప్రవేశపరీక్ష ఆధారంగా ఎంఎస్‌సీ బయోటెక్నాలజీ కోర్సులో ప్రవేశాన్ని కల్పిస్తోంది.
బయాలజీ, టెక్నాలజీ కలగలిసిన పరిశోధనాత్మక విజ్ఞానశాస్త్రం- బయో టెక్నాలజీ. బయో కెమిస్ట్రీ, కెమిస్ట్రీ, జెనెటిక్స్‌, ఇమ్యునాలజీ, మైక్రోబయాలజీ, వైరాలజీ, ఇంజినీరింగ్‌ వంటివి కూడా అందులో భాగం. సృష్టికి ప్రతిసృష్టి చేయగలిగిన క్లోనింగ్‌, మానవ జీనోమ్‌ ప్రాజెక్టు, స్టెమ్‌సెల్‌ రిసర్చ్‌, జన్యుపరివర్తిత పంటలు.. ఇవన్నీ బయోటెక్‌కి సంబంధించినవే.
వైవిధ్యమైన కోర్సులు
కొన్ని విశ్వవిద్యాలయాలు ఎంఎస్‌సీ జనరల్‌ బయోటెక్నాలజీ కోర్సును, మరికొన్ని ఇండస్ట్రియల్‌ బయోటెక్నాలజీ, మెడికల్‌ బయోటెక్నాలజీ, మెరైన్‌ బయోటెక్నాలజీ, న్యూరోసైన్స్‌, మాలిక్యులార్‌, హ్యూమన్‌ జెనెటిక్స్‌, ఎన్విరాన్‌మెంటల్‌ బయోటెక్నాలజీ మొదలైన వైవిధ్యమైన కోర్సులను అందిస్తున్నాయి.
ఎంఎస్‌సీ మెడికల్‌ బయోటెక్నాలజీ, న్యూరోసైన్స్‌, మాలిక్యులార్‌, హ్యూమన్‌ జెనెటిక్స్‌ పూర్తిచేసినవారు వైద్య కళాశాలలు, ఆస్పత్రులలోని ల్యాబ్‌లు, ఫార్మా సంస్థల్లో ఉపాధి అవకాశాలు పొందవచ్చు. ఎంఎస్‌సీ మెరైన్‌ బయోటెక్నాలజీ పూర్తిచేసినవారికి పెట్రో కెమికల్‌ ఇండస్ట్రీస్‌, జియోలాజికల్‌ సర్వే డిపార్ట్‌మెంట్‌లో ఉపాధి లభిస్తుంది.
10 + 2 + 3/ 4/ 5తో 55% మార్కులను కలిగివున్న విద్యార్థులు ఈ ప్రవేశపరీక్షకు అర్హులు.
జేఎన్‌యూ కంబైన్డ్‌ బయోటెక్నాలజీ పరీక్ష రాసేవారు ఏ సబ్జెక్టుకు అధిక ప్రాధాన్యముందో గుర్తించి, దానికి అనువర్తిత విధానంలో సన్నద్ధమవ్వాలి.
ఈ ఏడాది ఈ ప్రవేశపరీక్షను డిసెంబరులో నిర్వహిస్తున్నారు. కాబట్టి, తుది సంవత్సరం చదువుతున్నవారు సంబంధిత సిలబస్‌కు ప్రణాళికబద్ధంగా టైంటేబుల్‌ను రూపొందించుకోవాలి. రోజుకు కనీసం ఆరు గంటలు కష్టపడి అధ్యయనం చేయాలి. ముఖ్యమైన పాఠ్యాంశాలు, ఫార్ములాలు, జియోలాజికల్‌ నిర్మాణాలను చార్టుల రూపంలో రూపొందించుకోవాలి.
పరీక్ష విధానం
ఆబ్జెక్టివ్‌ విధానం. సమయం- మూడు గంటలు. పరీక్షలో రెండు పార్ట్‌లు (పార్ట్‌- ఎ, బి).
పార్ట్‌-ఎ: దీనిలో ప్రశ్నలన్నీ 10+2 స్థాయి సిలబస్‌ ఆధారంగా అనువర్తిత ధోరణిలో ఉంటాయి. మొత్తం ప్రశ్నలు 60. బయాలజీ, మేథ్స్‌, ఫిజిక్స్‌, కెమిస్ట్రీ సిలబస్‌ల ఆధారంగా ప్రశ్నలుంటాయి. అన్ని ప్రశ్నలకూ సమాధానాలు రాయాలి. ఒక్కో ప్రశ్నకు ఒక్కో మార్కు. రుణాత్మక మార్కులున్నాయి. కాబట్టి సమాధానం తెలియని ప్రశ్నలను వదిలేయడం మేలు.
పార్ట్‌-బి: బీఎస్‌సీ స్థాయి సిలబస్‌ ఆధారంగా ప్రశ్నలుంటాయి. అనువర్తిత ధోరణిలో 100 ప్రశ్నలను బయాలజీ (బయోటెక్నాలజీ, బయోకెమిస్ట్రీ, మైక్రోబయాలజీ, జెనెటిక్స్‌, బోటనీ, జువాలజీ, మాలిక్యులార్‌ బయాలజీ) మేథ్స్‌, ఫిజిక్స్‌, కెమిస్ట్రీల నుంచి రూపొందిస్తారు. ఈ విభాగంలో ఏవేని 60 ప్రశ్నలకు సరైన సమాధానాన్ని గుర్తిస్తే చాలు. అంతకుమించి ఎక్కువ ప్రశ్నలకు సమాధానం రాస్తే మొదటి 60 ప్రశ్నలను మాత్రమే పరిగణనలోకి తీసుకుంటారు. ఒక్కో ప్రశ్నకు మూడు మార్కులు. మొత్తం 180 మార్కులు. రుణాత్మక మార్కులున్నాయి. ప్రతి తప్పు సమాధానానికీ -1 మార్కు ఉంటుంది.
రెండు విభాగాలూ కలిపి ప్రశ్నపత్రం మొత్తంగా 240 మార్కులకు ఉంటుంది. సాధారణంగా కటాఫ్‌ మార్కు ప్రశ్నపత్రం ఆధారంగా 140 నుంచి 150 మధ్య ఉంటుంది. రెండు పార్టుల మార్కుల ఆధారంగా ర్యాంకును నిర్ణయిస్తారు.
దేన్ని ఎలా చదవాలి?
బీఎస్‌సీ బయాలజీ ఆప్షన్‌ ఉన్నవారు గత ప్రశ్నపత్రాలను గమనిస్తే.. బయాలజీ విభాగానికి 140 మార్కులు (సుమారుగా పార్ట్‌-ఎ 20, పార్ట్‌-బికి 120 మార్కులు), కెమిస్ట్రీ విభాగానికి 80 మార్కుల (పార్ట్‌-ఎ 20, పార్ట్‌-బి 60) వెయిటేజీతో ప్రశ్నలు ఉంటాయి. అంటే బయాలజీ, కెమిస్ట్రీ కలిపి మొత్తం 240 మార్కుల్లో సుమారుగా 220 మార్కుల వెయిటేజీ ఉండే అవకాశముంది. కాబట్టి, బయాలజీ విద్యార్థులు మొదట బయాలజీ, కెమిస్ట్రీ సిలబస్‌కు అధిక ప్రాముఖ్యమివ్వాలి. తర్వాత ఫిజిక్స్‌, మేథ్స్‌లను అధ్యయనం చేయాలి.
బీఎస్‌సీలో బీజెడ్‌సీ (బోటనీ, జువాలజీ, కెమిస్ట్రీ) గ్రూప్‌ చదివినవారు తమ ఆప్షనల్స్‌తోపాటు ఆధునిక బయాలజీ (బయోటెక్నాలజీ, బయోకెమిస్ట్రీ, మైక్రోబయాలజీ, జెనెటిక్స్‌, మాలిక్యులార్‌ బయాలజీ)పైనా ఎక్కువ దృష్టి పెట్టాలి.
బీఎస్‌సీలో ఆధునిక బయాలజీతోపాటు కెమిస్ట్రీనీ కలిగిన విద్యార్థులు తమ ఆప్షనల్స్‌తోపాటు బోటనీ, జువాలజీపైనా ఎక్కువ దృష్టిని కేంద్రీకరించాలి. మేథ్స్‌ ఆప్షన్‌ను కలిగినవారు మేథ్స్‌తోపాటు కెమిస్ట్రీపైనా ఎక్కువ శ్రద్ధ పెట్టాలి.
అనువర్తనం... అధిక వెయిటేజీ
పరీక్షలో పార్ట్‌-బి ప్రశ్నలకు ఎక్కువ వెయిటేజీ ఉంది. కాబట్టి, ఈ సిలబస్‌ను అనువర్తిత ధోరణిలో చదవాలి. పాతప్రశ్నపత్రాలను సేకరించి ఈ ప్రశ్నలను విశ్లేషించుకుని సబ్జెక్టుపై పట్టు పెంచుకోవాలి. ప్రశ్నపత్రం పూర్తిగా ఆబ్జెక్టివ్‌ విధానంలో ఉంటుంది. కాబట్టి ఆ తరహాలోనే ఎక్కువగా సాధన చేయాలి. ప్రశ్నపత్రం ఇంగ్లిష్‌లో ఉంటుంది. తెలుగు మీడియం వారు ఆంగ్ల ప్రశ్నపత్రాలను ఎక్కువగా సాధన చేయడం ద్వారా ర్యాంకు సాధించవచ్చు.
ఎంఎస్‌సీ బయోటెక్నాలజీ ఎంట్రన్స్‌లో ఎక్కువ సీట్లను ఎంబైపీసీ విద్యార్థులు కైవసం చేసుకుంటున్నారు. కాబట్టి బైపీసీ విద్యార్థులు బయాలజీ, కెమిస్ట్రీతోపాటు మేథమేటిక్స్‌, ఫిజిక్స్‌లపైనా దృష్టిసారించాలి. బీఎస్‌సీలో బీజెడ్‌సీ గ్రూపు వారు బోటనీ, జువాలజీలతోపాటు బయోకెమిస్ట్రీ, మైక్రోబయాలజీ, జెనెటిక్స్‌, మాలిక్యులార్‌ బయాలజీకి సంబంధించిన సిలబస్‌నూ క్షుణ్ణంగా చదవాలి బీఎస్‌సీలో మోడరన్‌ బయాలజీ గ్రూపువారు బోటనీ, జువాలజీ సిలబస్‌ను కూడా శ్రద్ధగా అధ్యయనం చేయాలి.
ఉపకార వేతనం
ఈ ప్రవేశపరీక్ష ద్వారా జేఎన్‌యూలో బయోటెక్నాలజీలో ప్రవేశం పొందినవారికి నెలకు రూ.3000 ఉపకారవేతనాన్ని (స్కాలర్‌షిప్‌) మొదటి సెమిస్టర్‌ వరకు పొందవచ్చు. మొదటి సెమిస్టర్‌లో సీజీపీఏ 6.00 పొందినవారు చివరి సెమిస్టర్‌ వరకు స్కాలర్‌షిప్‌ పొందడానికి అర్హులు. ఇతర విశ్వవిద్యాలయాలు కొన్ని కూడా ఉపకార వేతనాలను అందిస్తున్నాయి.
బీఎస్‌సీ ఫైనల్‌ ఇయర్‌ చదువుతున్నవారు కూడా ఈ పరీక్షకు అర్హులు. వీరికి సమయం తక్కువగా ఉంది కాబట్టి, ఏ సబ్జెక్టుకు ఎక్కువ వెయిటేజీ ఉందో గ్రహించి, దాన్నే క్షుణ్ణంగా అధ్యయనం చేయాలి. తుది సంవత్సర విద్యార్థులు మాదిరి పరీక్షలను అనువర్తిత ధోరణిలో సాధన చేయడం మంచిది. బీఎస్‌సీ మొదటి, రెండు సంవత్సరాల విద్యార్థులు ఇప్పటినుంచే సన్నద్ధతను ప్రారంభించడం మేలు.
జేఎన్‌యూలో మంచి ర్యాంకు రానప్పటికీ సన్నద్ధత వృథా కాదు. అదే సిలబస్‌తో ఇతర పోటీపరీక్షలు, ఇంటర్వ్యూల్లో మంచి ఫలితాలను సాధించవచ్చు. పరీక్ష స్థాయి, పోటీ తీవ్రత గురించి ఆలోచించకుండా సానుకూల దృక్పథంతో కృషి చేస్తే మంచి ఫలితాలు వస్తాయి.
గత నాలుగేళ్ల ప్రవేశపరీక్ష ప్రశ్నపత్రాల కోసం www.jnu.ac.in వెబ్‌సైట్‌ను పరిశీలించవచ్చు. జేఎన్‌యూ ఎంఎస్‌సీ కంబైన్డ్‌ బయోటెక్నాలజీతోపాటు ఎంఎస్‌సీ (అగ్రి) ఎంవీఎస్‌సీ బయోటెక్నాలజీ ప్రోగ్రామ్‌, ఎంటెక్‌ బయోటెక్నాలజీ పోగ్రామ్‌లను అందిస్తోంది. ఇతర వివరాలకు జేఎన్‌యూ అధికారిక వెబ్‌సైట్‌ను సందర్శించవచ్చు.
జేఎన్‌యూ విడిగా కూడా ఎంఎస్‌సీ లైఫ్‌ సైన్స్‌ ప్రోగ్రామ్‌ను, ఇతర పీజీ కోర్సులు, పీహెచ్‌డీ పోగ్రామ్‌లను అందిస్తోంది. దీని నోటిఫికేషన్‌ కూడా విడుదలైంది.
తెలుగు రాష్ట్రాల్లో ఉమ్మడి ప్రవేశపరీక్ష కేంద్రాలు- హైదరాబాద్‌, సికింద్రాబాద్‌, విశాఖపట్నం, విజయవాడ.
ముఖ్యమైన తేదీలు
ఆన్‌లైన్‌ దరఖాస్తు చివరి తేదీ: అక్టోబరు 13, 2017
పరీక్ష తేదీ: డిసెంబరు 30, 2017 (ఉదయం 9 గం. నుంచి మధ్యాహ్నం 12 గం. వరకు)
పరీక్ష ఫీజు: జనరల్‌, ఓబీసీ విద్యార్థులకు రూ.1000, ఎస్‌సీ, ఎస్‌టీ, పీడబ్ల్యూడీ అభ్యర్థులకు రూ.500. పరీక్ష ఫీజును జవహర్‌లాల్‌ నెహ్రూ యూనివర్సిటీ, దిల్లీ పేరిట డిమాండ్‌ డ్రాఫ్ట్‌ తీయాల్సి ఉంటుంది.
పార్ట్‌-ఎ తో ప్రారంభిద్దాం
పార్ట్‌-ఎ ను10+2 సిలబస్‌తో సన్నద్ధతను మొదలుపెట్టడం మేలు. మొదట తెలుగు అకాడమీ, సీబీఎస్‌సీ, ఐసీఎస్‌ఈ పుస్తకాలను రిఫర్‌చేసి ప్రాథమికాంశాలను అభివృద్ధి చేసుకోవాలి. తర్వాత బీఎస్‌సీ సిలబస్‌ను అంశాలవారీగా రిఫరెన్స్‌ పుస్తకాల ద్వారా సబ్జెక్టును సమగ్రంగా చదవాలి. సీబీఎస్‌సీ బయాలజీ, కెమిస్ట్రీ, ఫిజిక్స్‌ పుస్తకాలు, తెలుగు అకాడమీ 10+2 స్థాయి పుస్తకాలపై పట్టు సాధించాలి. .
పార్ట్‌-బి: సిలబస్‌ కోసం బీఎస్‌సీ సంబంధిత పుస్తకాలను అనువర్తిత ధోరణిలో చదవాలి.
జేఎన్‌యూ ఎంఎస్‌సీ బయోటెక్నాలజీ ప్రవేశపరీక్షలు రాసేవారు మైక్రోబయాలజీ సిలబస్‌లో బ్యాక్టీరియా, వైరస్‌, ఫంగై, ఇమ్యూన్‌ సిస్టం, సెల్‌ బయాలజీ మొదలైన అంశాలపై ఎక్కువ దృష్టిని కేంద్రీకరించాలి.
ఆర్గానిక్‌ కెమిస్ట్రీలో జనరల్‌ ఆర్గానిక్‌ కెమిస్ట్రీ, రియాక్షన్‌ మెకానిజం, స్పెక్ట్రోస్కోపీ, నేమ్‌డ్‌ రియాక్షన్స్‌, స్టీరియో కెమిస్ట్రీ మీద ఎక్కువ దృష్టికేంద్రీకరించాలి. ఫిజికల్‌ కెమిస్ట్రీలో మోల్‌ కాన్సెప్ట్స్‌, థర్మోడైనమిక్స్‌, కెమికల్‌ కైనెటిక్స్‌, ఎలక్ట్రోకెమిస్ట్రీ, క్వాంటమ్‌ కెమిస్ట్రీ సంబంధిత అంశాలను అధ్యయనం చేయాలి. ఇనార్గానిక్‌ కెమిస్ట్రీలో సంశ్లిష్ట సమ్మేళనాలు, అనలిటికల్‌ కెమిస్ట్రీ, కెమికల్‌ బాండింగ్‌ మొదలైనవి ముఖ్యం.
ఫిజిక్స్‌లో.. మోడరన్‌ ఫిజిక్స్‌, మెకానిక్స్‌, ఆప్టిక్స్‌, థర్మోడైనమిక్స్‌, హీట్‌, అటామిక్‌ ఫిజిక్స్‌ సబ్జెక్టులు ప్రధానం. మేథమేటిక్స్‌లో.. కోఆర్డినేట్‌ జామెట్రీ, ట్రిగొనామెట్రీ, వెక్టర్‌, డెరివేటివ్స్‌ కాల్‌క్యులేట్స్‌, మాట్రిక్స్‌లను బాగా సాధన చేయాలి.
సంప్రదించాల్సిన పుస్తకాలు
10+2 సిలబస్‌ కోసం ఎన్‌సీఈఆర్‌టీ బయాలజీ, కెమిస్ట్రీ, ఫిజిక్స్‌, మ్యాథమేటిక్స్‌ పుస్తకాలను సమగ్రంగా చదవాలి. బీఎస్‌సీ సిలబస్‌ కోసం పనికొచ్చే రిఫరెన్స్‌ పుస్తకాలు ఇవి-
బయాలజీ
Biochemistry : Voet & Voet; Albert Lehninger, Lubert Stryer
Microbiology : Prescott, Stanier, Anant Narayana
Cellbiololgy : Alberts, Ladish, M.Cooper
lmmueology : Kuby, Roitt
Molecular Biology: Molecular Biology - Weaver, Molecularbiology of the gene - Watson etal;
GenesIX- Lewin, Molecularbiology-David Frefelder; Advanced Molecular Biology - Twymann
Genetics: An introduction to genetic analysis-Griffith, Suzuki; Genetic - Tamarin, Genetics - Klug & Cummins, Genetics - Snustad
Plant Physiology: Teiz and Zeiger, Park S Nobel , Hess
Animal Physiology: Knut Schindt - Nielsen, Christopher D Moyes, P.S. Verma, B.S. Tyagi, V.K.
కెమిస్ట్రీ
Organic Chemistry by Bruice, Organic Chemistry by Solomons, Organic Chemistry I.L.Finar-1
Physical Chemistry by Puri & Sharma
lnorganic Chemistry by J.D. Lee
ఎస్‌. కిర‌ణ్‌కుమార్‌, డైరెక్ట‌ర్‌, కెంబ‌యోసిస్ కోచింగ్ సెంట‌ర్‌
రెండు విడతల్లో సహాయ ఆచార్యుల పోస్టుల భర్తీ
* రెండు రోజుల్లో ఆన్‌లైన్ పోర్టల్ ప్రారంభం
ఈనాడు, అమరావతి: విశ్వవిద్యాలయాల్లో ఖాళీగా ఉన్న సహాయ ఆచార్యుల పోస్టులను రెండు దశల్లో భర్తీ చేయనున్నారు. మొదటి విడతలో 845, రెండో విడతలో 264 పోస్టులను భర్తీ చేస్తారు. దరఖాస్తులను ఆన్‌లైన్‌లో స్వీకరించనున్నారు. ఇందుకోసం ఉన్నత విద్యామండలి సిద్ధం చేసిన పోర్టల్‌ను రెండు, మూడు రోజుల్లో ప్రారంభించనున్నారు. వర్సిటీల్లో ఖాళీల భర్తీకి మొదటిసారిగా ఏపీపీఎస్‌సీ ద్వారా ప్రాథమిక పరీక్ష (స్క్రీనింగ్ టెస్ట్) నిర్వహించబోతున్నారు. ఆన్‌లైన్‌లో వచ్చే దరఖాస్తులను ఆయా వర్సిటీలు పరిశీలించి అర్హత కలిగిన అభ్యర్థులను ఎంపిక చేసి, వారి వివరాలను ఏపీపీఎస్‌సీకి అందిస్తాయి. వీరికి ఏపీపీఎస్‌సీ ప్రాథమిక పరీక్ష నిర్వహించి, అర్హత సాధించిన వారి జాబితాను వర్సిటీలకు ఇస్తుంది.
కొత్త జిల్లాల ప్రాతిపదికనే డీఎస్సీ
* యుద్ధప్రాతిపదికన బ్యాక్‌లాగ్ పోస్టుల భర్తీ
* ఉన్నత స్థాయి సమీక్షలో ముఖ్యమంత్రి కేసీఆర్ వెల్లడి
ఈనాడు, హైదరాబాద్: తెలంగాణ ఏర్పాటు దృష్ట్యా ఉమ్మడి రాష్ట్రంలో ఉద్యోగ నియామకాల కోసం ఇచ్చిన రాష్ట్రపతి ఉత్తర్వుల (371డి)ని సవరించాలని ముఖ్యమంత్రి కేసీఆర్ అన్నారు. ఇందుకోసం కొత్తగా ఉత్తర్వులివ్వాలని, ఈ మేరకు రాష్ట్ర ప్రభుత్వం నుంచి కేంద్రానికి ప్రతిపాదనలు పంపుతామని తెలిపారు. రాష్ట్రంలో జిల్లా, జోన్, బహుళ జోన్, రాష్ట్రస్థాయి కేడర్లను కొనసాగిస్తామన్నారు. పరిపాలన సౌలభ్యం కోసం కొత్త జిల్లాలను ఏర్పాటు చేశామని, దీనికి అనుగుణంగా కొత్తజోన్ల ఏర్పాటు అనివార్యమని వివరించారు. జిల్లా, జోన్, బహుళజోన్, రాష్ట్రస్థాయి పోస్టులను నిర్ధరించాలని, ఏ పోస్టు ఏ కేడర్‌కు చెందుతుంది. జోన్లు ఎన్ని ఉండాలి. ఏ జోన్ పరిధిలో ఏయే జిల్లాలుండాలి, నాలుగు కేడర్ల పోస్టులను ఎలా విభజించాలనే అంశాలపై అధ్యయనం చేసి ప్రభుత్వానికి నివేదిక ఇవ్వడానికి మంత్రులు ఉన్నతాధికారులతో కూడిన ఉన్నతస్థాయి కమిటీని ఏర్పాటు చేస్తున్నట్లు తెలిపారు. రాష్ట్రంలో ఉద్యోగ నియామకాలు, జోనల్ వ్యవస్థ, రాష్ట్రపతి ఉత్తర్వులు తదితర అంశాలపై సీఎం కేసీఆర్ అక్టోబరు 7న ప్రగతిభవన్‌లో ఉన్నతస్థాయి సమీక్ష నిర్వహించారు. ఉపముఖ్యమంత్రులు కడియం శ్రీహరి, మహమూద్అలీ, మంత్రులు పోచారం శ్రీనివాస్‌రెడ్డి, నాయిని నర్సింహారెడ్డి, హరీశ్‌రావు, కేటీఆర్, ఈటల రాజేందర్, జగదీశ్‌రెడ్డి, తుమ్మగ నాగేశ్వర్‌రావు, జూపల్లి కృష్ణారావు, ఎంపీలు జితేందర్‌రెడ్డి, వినోద్‌కుమార్, పొంగులేటి శ్రీనివాస్‌రెడ్డి, అడ్వొకేట్ జనరల్ ప్రకాశ్‌రెడ్డి, ప్రభుత్వ విప్ పల్లా రాజేశ్వర్‌రెడ్డి, ప్రభుత్వ ప్రధాన కార్యదర్శి ఎస్పీసింగ్, సీనియర్ అధికారులు, ఎస్‌కేజోషి, బీఆర్‌మీనా, రాజీవ్‌రంజీవ్ అచార్య, ఎస్.నర్సింగ్‌రావు, వాణీప్రసాద్, అజయ్‌మిశ్రా, నిరంజన్‌రావు, సింంగరేణి జీఎండీ శ్రీధర్, డీజీపీ అనురాగ్‌శర్మ, హైదరాబాద్ సీపీ మహేందర్‌రెడ్డి పాల్గొన్నారు.
కొత్త ఉద్యోగ నియామకాలు ఏ ప్రాదిపదికన జరగాలి, జోనల్ వ్యవస్థ ఉండాలా?రద్దు చేయాలా? ఉమ్మడి రాష్ట్రంలో జారీచేసిన రాష్ట్రపతి ఉత్తర్వులను తెలంగాణకు ఎలా అన్వయించుకోవాలి? పదోన్నతుల విషయంలో ఏర్పడుతున్న వివాదాలను ఎలా పరిష్కరించుకోవాలి? డీఎస్సీని ఎలా నిర్వహించాలనే అంశాలను సీఎం చర్చించారు. మంత్రులు, అధికారులు మాట్లాడుతూ, తెలంగాణలోని ఉద్యోగార్థులు, పరిపాలనకు అనువుగా నాలుగు కేడర్ల విధానం ఉండాలన్నారు. అడ్వొకేట్ జనరల్, న్యాయశాఖ కార్యదర్శి సైతం ఇదే అభిప్రాయాన్ని వ్యక్తం చేశారు. కొత్త జోన్ల కోసం పాత రాష్ట్రపతి ఉత్తర్వుల స్థానంలో కొత్త రాష్ట్రపతి ఉత్తర్వుల జారీకి కేంద్ర ప్రభుత్వాన్ని కోరాలని ఏజీ సూచించారు. వీటన్నింటినీ సీఎం, మంత్రులు ఆమోదించారు. ఈ సందర్భంగా ముఖ్యమంత్రి మాట్లాడారు.
''ఉమ్మడి రాష్ట్రంలో స్థానికులకు అన్యాయం జరగొద్దనే ఉద్దేశంతో రాష్ట్రపతి ఉత్తర్వులు జారీ చేశారు. ఇప్పటిదాకా ఇదే పద్ధతిన నియామకాలు జరుగుతున్నాయి. కొత్త రాష్ట్రంగా తెలంగాణ ఏర్పడ్డాక పరిస్థితులు మారాయి. కొత్తగా 21 జిల్లాలు వచ్చాయి. రాష్ట్ర స్వరూపం మారింది. పాత జోనల్ విధానం అమలు ఇప్పుడు సాధ్యం కాదు. కొత్త జోన్లను ఏర్పాటు చేసుకోవాలి. ప్రస్తుతం రెండు జోన్లు మాత్రమే ఉన్నాయి. వాటిని పెంచాలి. ఏ జోన్‌లో ఏ జిల్లాలు వస్తాయో నిర్ధారించాలి. ఇందుకోసం కమిటీని వేస్తున్నారు. వారు పూర్తిస్థాయిలో అధ్యయనం చేసి, ప్రభుత్వానికి నివేదిక సమర్పిస్తారు. వారి సిఫార్సుల ఆధారంగా రాష్ట్ర మంత్రిమండలి సమావేశమై తీర్మానం చేస్తుంది. కొత్తగా రాష్ట్రపతి ఉత్తర్వులివ్వాలని ప్రతిపాదిస్తాం. నేను దిల్లీ వెళ్లి కేంద్ర హోంశాఖతో మాట్లాడి వీలైనంత త్వరగా కొత్త ఉత్తర్వులొచ్చేలా ప్రయత్నిస్తా''.
రాష్ట్రపతి ఉత్తర్వులకు లోబడే నియామకాలు
ఉమ్మడి రాష్ట్రంలో ఉద్యోగ నియామకాలు, పదోన్నతులు, పోస్టింగుల్లో తెలంగాణ వారికి తీవ్ర అన్యాయం జరిగింది. రాష్ట్రపతి ఉత్తర్వులున్నా వాటిని అమలు చేయకుండా దొడ్డిదారులు వెతికారు. కొత్త వ్యవస్థలను సృష్టించారు. వారికి అనుకూలంగా నియామకాలు, పదోన్నతులు, పోస్టింగులు ఇచ్చుకున్నారు. ప్రస్తుతం తెలంగాణలో ఇలా జరగడానికి వీల్లేదు. ప్రభుత్వం ద్వారా జరిగే ప్రతీ నియామకం కచ్చితంగా రాష్ట్రపతి ఉత్తర్వులకు లోబడి ఉండాలి. విద్యుత్, సింగరేణి, ఆర్టీసీలాంటి ప్రభుత్వ రంగ సంస్థల ఉద్యోగాలూ వాటి పరిధిలోకి రావాలి. ఏ కేడర్ కింద ఏ పోస్టు ఉందో కూడా ముందే స్పష్టంగా తెలియాలి. పదోన్నతుల విషయంలో స్పష్టత రావాలి. అన్నిశాఖల కార్యదర్శులతో, కలెక్టర్లతో సమావేశమై నిర్ణయం తీసుకోవాలి. ఉద్యోగ సంఘాలతో మాట్లాడాలి. కొత్త ఉత్తర్వుల కోసం ఉన్నతమైన విధానాన్ని ప్రతిపాదించాలి. రాష్ట్రపతి కొత్తగా ఉత్తర్వులిచ్చిన తర్వాత దానికి అనుగుణంగా పోస్టులను భర్తీ చేయాలి.
స్థానికతపై శాస్త్రీయ విధానం
స్థానికతను నిర్ధరించే విషయంలో కూడా శాస్త్రీయమైన పద్ధతి కావాలి. కేవలం ఎక్కడ చదువుకున్నారనే అంశమే స్థానికతకు ప్రామాణికం కావడం వల్ల సమస్యలు వస్తున్నాయి. కొందరు స్థానికులు నష్టపోవాల్సి వస్తుంది. ఈ విషయంలోనూ మార్పులు అవసరం. వీటన్నింటినీ లోతుగా అధ్యయనం చేసి కమిటీ ప్రతిపాదనలివ్వాలి. అధికారులు తమ అనుభవాన్ని రంగరించి కొత్త విధానం రూపొందించాలి. వివాదాలకు తావులేని విధంగా తెచ్చే కొత్త విధానం భవిష్యత్తు తెలంగాణకు బాట చూపాలి. అని కేసీఆర్ అన్నారు.
కమిటీ సభ్యులు వీరే
కొత్త రాష్ట్రపతి ఉత్తర్వులపై అధ్యయనం చేసి, ముసాయిదా రూపకల్పనకు ఉద్దేశించిన కమిటీలో ఉపముఖ్యమంత్రి కడియం శ్రీహరి, మంత్రులు హరీశ్‌రావు, పోచారం శ్రీనివాస్‌రెడ్డి, ఈటల రాజేందర్, ప్రభుత్వ ప్రధాన కార్యదర్శి ఎస్పీసింగ్, సీనియర్ అధికారులు ఎస్‌కే జోషి, సురేశ్‌చందా, అజయ్‌మిశ్ర, బీఆర్‌మీనా, రాజీవ్‌రంజన్ ఆచార్య, అథర్ సిన్హా, డీజీపీ అనురాగ్ శర్మ సభ్యులుగా ఉంటారు.
జిల్లా కేడర్ పోస్టులకు కొత్త జిల్లాలే ప్రతిపాదిక
జిల్లా కేడర్ పోస్టులను కొత్త జిల్లాల ప్రాతిపదికనే నియమించాలని నిర్ణయించారు. డీఎస్సీ నోటిఫికేషన్‌ను కూడా కొత్త జిల్లాల వారీగా జారీ చేయాలని సీఎం ఆదేశించారు. కొత్త జిల్లాలు ఏర్పాటు చేసిందే స్థానికులకు ఎక్కువ అవకాశాలు కల్పించాలనే ఉద్దేశంతో అని, కచ్చితంగా కొత్త జిల్లాల ప్రాతిపాదనే జిల్లా కేడర్ పోస్టులకు నోటిఫికేషన్ ఇవ్వాలని సూచించారు.
సత్వరమే బ్యాక్‌లాగ్ పోస్టుల భర్తీ
అన్ని శాఖల్లో ఉన్న ఎస్సీ, ఎస్టీ, బ్యాక్‌లాగ్ పోస్టులను వెంటనే భర్తీ చేయాలని సీఎం ఆదేశించారు. ఉద్యోగాలకు కావాల్సిన విద్యార్హతలున్న అభ్యర్థులు ఆయా వర్గాల్లో ఉన్నప్పటికీ బ్యాక్‌లాగ్ పోస్టులుండటం అన్యాయమన్నారు. ఎస్సీ అభివృద్ధిశాఖ మంత్రి జగదీశ్‌రెడ్డి, సీఎస్ ఎస్పీసింగ్ ఇకపై ప్రతి నెలా చివరి రోజున సమీక్ష నిర్వహించాలని, బ్యాక్‌లాగ్ పోస్టులను వెంటనే భర్తీ చేయాలని సీఎం సూచించారు.
ఉద్యోగాలొచ్చేలా కొత్త కోర్సులు
* ప్రతిభావంతులకే పీహెచ్‌డీ సీట్లు
* వీసీలకు గవర్నర్ దిశానిర్దేశం
* ఆరు నెలల్లో ఆచార్యుల భర్తీ: కడియం
ఈనాడు, హైదరాబాద్: విశ్వవిద్యాలయాల ఉపకులపతులకు స్పష్టమైన లక్ష్యాలను గవర్నర్ ఈఎస్ఎల్ నరసింహన్ నిర్దేశించారు. వర్సిటీలు అవినీతి, అక్రమాలకు తావు లేనివై ఉండాలని సూచించారు. అకడమిక్ క్యాలెండర్ గాడి తప్పరాదని, జులై నుంచి తరగతులు ప్రారంభం కావాలని ఆదేశించారు. పీహెచ్‌డీ ప్రవేశాల్లో పారదర్శకత పాటించాలని, సమాజంలోని సమస్యలను పరిష్కరించేలా పరిశోధనలుండాలని సూచించారు. తెలంగాణ రాష్ట్రంలోని మొత్తం 15 విశ్వవిద్యాలయాల ఉపకులపతులతో శుక్రవారం (అక్టోబరు 6) అంబేడ్కర్ సార్వత్రిక విశ్వవిద్యాలయంలో గవర్నర్ సమావేశమయ్యారు. ఉప ముఖ్యమంత్రి కడియం శ్రీహరి, తెలంగాణ రాష్ట్ర ఉన్నత విద్యామండలి ఛైర్మన్ తుమ్మల పాపిరెడ్డి, విద్యాశాఖ ప్రత్యేక ప్రధాన కార్యదర్శి రంజీవ్ ఆచార్య, విద్యామండలి ఉపాధ్యక్షులు లింబాద్రి, వెంకటరమణ పాల్గొన్నారు. గవర్నర్ మాట్లాడుతూ.. అన్ని విశ్వవిద్యాలయాలు విద్యామండళ్లు, పాలకమండళ్లు ఏర్పాటు చేసుకోవాలని కోరారు. మళ్లీ ఆర్నెల్ల తర్వాత సమీక్షిస్తానని గవర్నర్ చెప్పారు. సమావేశంలో చర్చకు వచ్చిన అంశాలను ఛైర్మన్ పాపిరెడ్డి, అంబేడ్కర్ వర్సిటీ ఉపకులపతి సీతారామారావులతో కలిసి ఉప ముఖ్యమంత్రి కడియం శ్రీహరి విలేకరుల సమావేశంలో వివరించారు. వచ్చే ఆర్నెల్లలో ఆచార్యుల ఖాళీలను భర్తీ చేస్తామన్నారు. వసతి గృహాల్లో సీట్లు వచ్చిన విద్యార్థులు తప్ప ఇతరులు ఉండటానికి వీల్లేదని గవర్నర్ ఆదేశించారని కడియం తెలిపారు. సమావేశంలో ప్రధానంగా 10 అంశాలపై చర్చ సాగింది.
1. విద్యా కాలపట్టిక(అకడమిక్ క్యాలెండర్)ను నియంత్రించాలి. సకాలంలో తరగతులు ప్రారంభమవ్వాలి. అందుకు అనుబంధ గుర్తింపు ప్రక్రియ త్వరగా పూర్తిచేయాలి. జాతీయ పరీక్షలను దృష్టిలో పెట్టుకొని క్యాలెండర్ రూపొందించుకోవాలి.
2. విశ్వవిద్యాలయాల ప్రాంగణాలతోపాటు, అనుబంధ కళాశాలల్లోనూ బయోమెట్రిక్, సీసీ కెమెరాలను అమర్చాలి.
3. ఈ ఆర్థిక సంవత్సరానికి రాష్ట్ర బడ్జెట్ నుంచి వర్సిటీల్లో అభివృద్ధికి ప్రత్యేకంగా రూ.420 కోట్లు కేటాయించినందున అంచనాలు రూపొందించి పనులకు టెండర్లు పిలవాలి.
4. వర్సిటీల్లో 1061 ఖాళీలను భర్తీ చేయాలి. వాటి భర్తీకి మార్గదర్శకాల రూపకల్పనకు ముగ్గురు ఉపకులపతులతో కమిటీ ఏర్పాటైంది.
5. పీహెచ్‌డీ సీట్ల కేటాయింపులో పారదర్శకత పాటించాలి. ఆసక్తిఉన్న వారికి, ప్రతిభావంతులకే సీట్లివ్వాలి. నాణ్యమైన పరిశోధన జరగాలి. ప్రవేశాలకు ఏకరూప విధానం అమలు చేయాలి.
6. వర్సిటీల్లో సేవలను ఆన్‌లైన్‌లో అందించాలి. అందుకు ఐటీని వినియోగించుకోవాలి.
7. ఉపకులపతులు ప్రాంగణ నియామకాలపై దృష్టిపెట్టాలి. చదువు పూర్తిచేసిన వారిలో ఎందరికి ఉద్యోగాలు, ఉపాధి దొరికిందో అన్నదే ఉపకులపతుల పనితీరుకు నిదర్శనం.
8. విశ్వవిద్యాలయాల్లో నిపుణులున్నందున వారి రంగాల్లో నైపుణ్యాన్ని ఉపయోగించి వర్సిటీకి ఆర్థిక వనరులు పెంచాలి.
9. కళాశాలల్లో కోర్సులు, సీట్లు అధికంగా ఉన్నాయి. కొత్త కోర్సులు ప్రవేశపెట్టేముందు వాటికి మార్కెట్‌లో డిమాండ్ ఎలా ఉంది? ఉద్యోగాలు వస్తాయా అధ్యయనం చేయాలి.
10. ప్రస్తుతం పనిచేస్తున్న బోధన సిబ్బందికి ఎప్పటికప్పుడు పరిజ్ఞానం, నైపుణ్యం పెంచుకునేందుకు శిక్షణివ్వాలి.
మేలుకో.. కొలువు ఏలుకో!
* కేంద్ర ప్రభుత్వ ఉద్యోగాల్లో మహిళలు నామమత్రమే
* రుసుం లేకున్నా ఇదే పరిస్థితి
* తగిన శిక్షణతో అతివలకు ఉద్యోగ భరోసా
ఈనాడు - హైదరాబాద్‌: సర్కారు కొలువుల్లో మహిళలకు తగిన స్థానం కల్పించాలని కేంద్ర ప్రభుత్వం ప్రోత్సహిస్తున్నా... చాలామంది కనీసం దరఖాస్తు కూడా చేయట్లేదు. వడపోత దశలన్నీ దాటుకుని చివరికి ఉద్యోగాలు దక్కించుకుంటున్న అతివలు చాలా స్వల్ప సంఖ్యలోనే ఉంటున్నారు. ఇందుకు ప్రత్యేక కారణాలు లేకపోలేదంటున్నారు నిపుణులు. మరోవైపు- రాష్ట్రస్థాయిలో టీఎస్‌పీఎస్‌జీ జారీచేసే ప్రకటనలకు మాత్రం పురుషులకు దీటుగా మహిళలు స్పందిస్తుండటం విశేషం. ఎక్కువశాతం కేంద్ర ప్రభుత్వ ఉద్యోగాలను సిబ్బంది ఎంపిక సంఘం (ఎస్సెస్సీ) భర్తీ చేస్తుంది. ఆదాయ పన్ను, హోం, కస్టమ్స్‌, ఎన్‌ఫోర్స్‌మెంట్‌, ఆర్మీ తదితర విభాగాల్లో... ఏటా 8-10 ప్రకటనల ద్వారా సగటున 50 వేల గ్రూపు-బి, సి, డి స్థాయి సిబ్బందిని నియమిస్తుంది. ఇంటర్‌, డిగ్రీ విద్యార్హతలతో ఈ పరీక్షలకు పోటీ పడొచ్చు. ఏడాదిన్నరలో ఎంపికైందీ, లేనిది తేలిపోతుంది. కోర్టు కేసులు, ఇతర వివాదాల వల్ల జాప్యం జరిగే పరిస్థితి తక్కువ. పరీక్షలకు గట్టిగా సన్నద్ధమైతే ఈ కొలువులను పొందటం పెద్ద కష్టమేమీ కాదు. తెలుగు రాష్ట్రాల్లో ఏటా సుమారు లక్షన్నర మంది బీటెక్‌ పూర్తిచేస్తున్నారు. కేంద్ర కొలువులకు పోటీపడుతున్న వారిలో పురుషుల సంఖ్య గణనీయంగా ఉన్నా, మహిళలు మాత్రం తక్కువేనని తాజా నివేదికలో ఎస్సెస్సీ వెల్లడించింది. మహిళలను ప్రోత్సహించేందుకు దరఖాస్తు రుసుములను రద్దుచేసినా, ఆశించినంతగా వారి నుంచి దరఖాస్తులు రావడంలేదని పేర్కొంది. కొన్ని ప్రకటనల్లో మహిళలకు తక్కువ ఉద్యోగాలు ఉండటం కారణం కావొచ్చని కమిషన్‌ విశ్లేషిస్తున్నా... నిపుణులు మాత్రం ఇతర కారణాలు కూడా ఉన్నాయంటున్నారు.
ఇతర రాష్ట్రాలకు వెళ్లాల్సి వస్తుందనే..: కేంద్ర ప్రభుత్వ ఉద్యోగమంటే... ఇతర రాష్ట్రాలకు వెళ్లి పనిచేయాల్సి వస్తుందన్న భావనతో చాలామంది మహిళలు వెనకబడుగు వేస్తున్నట్లు చెబుతున్నారు. ఆర్మీ, సీబీఐ తదితర విభాగాల్లో సహాయ సబ్‌-ఇన్‌స్పెక్టర్‌, సబ్‌-ఇన్‌స్పెక్టర్‌, కానిస్టేబుల్‌ తదితర పోస్టులకు అసలు దరఖాస్తు చేయట్లేదు. శిక్షణ సంస్థల నిపుణుడు గిరిధర్‌ మాట్లాడుతూ... కేంద్ర ప్రభుత్వ ఉద్యోగాలపై అవగాహన తక్కువగా ఉండటం వల్ల మహిళా అభ్యర్థుల సంఖ్య తక్కువగా ఉంటోందన్నారు. తమ వద్ద శిక్షణ పొందుతున్నవారిలో 32-40% మహిళలు ఉంటున్నట్లు చెప్పారు. మరో నిపుణుడు శ్రీధర్‌ మాట్లాడుతూ... తెలుగు రాష్ట్రాల్లో మహిళా అభ్యర్థుల సంఖ్య ఇటీవల పెరుగుతోందనీ, దాదాపు సగంమంది కనిపిస్తున్నారని చెప్పారు. వారు నగరాలకు వచ్చి, శిక్షణ పొందడానికి కుటుంబ సభ్యుల నుంచి తగిన ప్రోత్సాహం లభించడంలేదని చెబుతున్నారు.
కొన్నింటికి ఫర్వాలేదు: గతేడాది ఎస్సెస్సీకి మహిళల నుంచి 35.87% దరఖాస్తులు వచ్చాయి. ఇంటర్మీడియట్‌ విద్యార్హతతో రాసే కంబైన్డ్‌ హయ్యర్‌ సెకండరీ లెవెల్‌-2015కు పోటీపడిన వారిలో 43.33% మంది మహిళలు ఉండటం విశేషం. కొన్ని ఉద్యోగాల్లో చెప్పుకోదగ్గ సంఖ్యలో వారు విజయం సాధిస్తున్నారు. జూనియర్‌ హిందీ ట్రాన్స్‌లేటర్‌-2014కు 48.10% మంది మహిళలే ఎంపికయ్యారు.

రైల్వేలో 10 లక్షల ఉద్యోగాల సృష్టి
* రైల్వేమంత్రి పీయూష్‌గోయల్ వెల్లడి
దిల్లీ: రైల్వే ఆధునికీకరణలో భాగంగా ట్రాక్‌ల కోసం ప్రభుత్వం త్వరలోనే గ్లోబల్ టెండర్ ప్రక్రియను చేపట్టనుందని రైల్వేమంత్రి పీయూష్ గోయల్ తెలిపారు. దీంతో ఏడాది కాలంలో 10 లక్షల ఉద్యోగాల సృష్టి జరుగుతుందని వెల్లడించారు. రైల్వేకు భద్రతే ప్రథమ ప్రాధాన్యమనీ, ఇందుకు నిధుల కేటాయింపులో పరిమితులు లేవన్నారు. అందుబాటులో ఉన్న ట్రాకులన్నింటినీ మార్గాల నవీకరణకే మళ్లిస్తున్నామనీ, దీనివల్ల ప్రస్తుతమున్న మార్గాలు సురక్షితంగా మారతాయన్నారు. ట్రాకుల సేకరణకు గ్లోబల్ టెండర్లను చేపట్టడంపై దృష్టిసారించామనీ, దీనివల్ల డబ్లింగ్, కొత్త ప్రాజెక్టులు వేగవంతంగా పూర్తవుతాయని పేర్కొన్నారు. ప్రపంచ ఆర్థిక వేదిక(డబ్లూఈఎఫ్) సమావేశాల సందర్భంగా ఆయన విలేకరులతో మాట్లాడారు. పాదచారుల వంతెనలు, ఫ్లాట్‌ఫారాలు, ప్రవేశ, నిష్క్రమణ మార్గాల్లో భద్రతపై దృష్టిపెట్టామన్నారు. తాము చేపట్టే చర్యలతో రైల్వేల్లో నేరుగా ఉద్యోగాలు దొరక్కపోయినా తమ శాఖ పరిధిలోనే వివిధ రంగాల్లో 12 నెలల్లోపే పది లక్షల ఉద్యోగాల కల్పన జరుగుతుందన్నారు. రైలు ట్రాకులు, భద్రత నిర్వహణ కార్యక్రమాలతోనే 2 లక్షల ఉద్యోగాలు వస్తాయన్నారు. బొగ్గు, విద్యుత్తు రంగాలు మారాయనీ, ఇప్పుడు రైల్వేల వంతొచ్చిందని వ్యాఖ్యానించారు.
భారతీయ రైల్వేలో 23,801 కొలువులు
* త్వరలోనే ఉద్యోగ ప్రకటన!
గుంటూరు రైల్వే, న్యూస్‌టుడే: భారతీయ రైల్వేలో 23,801 సహాయ లోకోపైలెట్లు, టెక్నీషియన్‌ పోస్టుల భర్తీకి త్వరలోనే ఉద్యోగ ప్రకటన విడుదల కానుంది. ఈ మేరకు రైల్వే శాఖ అధికారులు సమాయత్తమవుతున్నారు. రైల్వే భద్రతా విభాగంలోని ఖాళీలనూ భర్తీ చేయాలని వివిధ కార్మిక సంఘాలు డిమాండ్‌ చేస్తున్న నేపథ్యంలో భారీగా ఉద్యోగాల నియామకానికి రైల్వేబోర్డు సిద్ధమవుతోంది. సంబంధిత పోస్టులను దేశవ్యాప్తంగా ఉన్న 21 రైల్వే రిక్రూట్‌మెంట్‌ బోర్డు(ఆర్‌ఆర్‌బీ)ల ద్వారా భర్తీ చేయనున్నారు. ఇందులో అత్యధికంగా సికింద్రాబాద్‌ ఆర్‌ఆర్‌బీకి 3,210, ముంబయి ఆర్‌ఆర్‌బీకి 3,624 పోస్టులు కేటాయించారు. నవంబరు 15 నుంచి దరఖాస్తులు స్వీకరణ ప్రారంభించి డిసెంబరు మొదటి వారంలోపు ముగించేలా.. 2018 మార్చి లోపు నియామక ప్రక్రియ పూర్తి చేసే విధంగా ప్రణాళిక రూపొందించారు. ఎంపికైన అభ్యర్థులకు ఏప్రిల్‌లో శిక్షణ ప్రారంభమయ్యే అవకాశం ఉందని సమాచారం.
ఉపాధికి ధీమా!
2017-18 విద్యాసంవత్సరానికి తెలుగు రాష్ట్రాల్లో బీఎస్‌సీ నర్సింగ్‌లో ప్రవేశానికి ప్రకటన వెలువడింది. డా॥ ఎన్‌టీఆర్‌ హెల్త్‌ యూనివర్సిటీ, కాళొజి నారాయణరావు యూనివర్సిటీ ఆఫ్‌ హెల్త్‌ సైన్సెస్‌ల ద్వారా ఆన్‌లైన్‌లో దరఖాస్తు స్వీకరణ, కౌన్సెలింగ్‌ పద్ధతిన ప్రవేశాలు కల్పిస్తారు. ఈ సందర్భంగా నర్సింగ్‌ కోర్సులూ, వాటి ఉపాధి అవకాశాల గురించీ తెలుసుకుందాం!
ప్రపంచవ్యాప్తంగా వైద్యరంగం వేగంగా విస్తరిస్తుండటంతో వాటిలో కీలకమైన నర్సింగ్‌కు ప్రాధాన్యం లభిస్తోంది. సేవాగుణం ఉండి సహనం, మానవతా దృక్పథంతో కూడిన వ్యక్తిత్వం ఉన్నవారికి నర్సింగ్‌ కోర్సులు గౌరవ ప్రదమైన వృత్తిని అందిస్తున్నాయి.
నర్సింగ్‌ కోర్సుల శిక్షణ కోసం ఎంపీహెచ్‌డబ్ల్యూ, డిప్లొమా నర్సింగ్‌ (జీఎన్‌ఎం), బీఎస్‌సీ నర్సింగ్‌ (బ్యాచిలర్స్‌ డిగ్రీ) ఎంఎస్‌సీ నర్సింగ్‌ (పీజీ నర్సింగ్‌), ఎంఫిల్‌ నర్సింగ్‌, పీహెచ్‌డీ నర్సింగ్‌ తదితర కోర్సులున్నాయి.
శిక్షణ తర్వాత మనదేశంలోనే కాకుండా విదేశాల్లోనూ తక్షణ ఉపాధిని నర్సింగ్‌ కోర్సులు అందించగలవు. నేటి తరం యువతరం విద్య, ఉపాధిని పొందడానికి విదేశాలకు వెళ్లేందుకు ఆసక్తి చూపిస్తోంది. విదేశాల్లోనే నాణ్యమైన, ప్రామాణిక విద్య, అధునాతన సాంకేతికతతో కోర్సుల బోధనను పొందగలమనీ, తరువాత చదువు పూర్తయ్యాక అక్కడే ఉపాధిని పొందగలమనీ యువతీ యువకులు నమ్ముతున్నారు. ఇలా ఏటా చదువుతోపాటు ఉపాధిని కూడా పొందాలనే ఆకాంక్షతో విదేశాలలో లక్షల రూపాయల ఖర్చుకూ వెనకాడటం లేదు.
అయితే మనదేశంలోని ఏ ప్రాంతంనుంచైనా నర్సింగ్‌ కోర్సులో శిక్షణ పూర్తి చేసుకొని సర్టిఫికెట్‌ను పొందినవారికి మనదేశంలోనే కాక, విదేశాల్లో సైతం మంచి జీతంతో కూడిన ఉపాధి అందుతుందనేది వాస్తవం.
గతంలో ఈ వృత్తిపట్ల ఉన్న అపోహల కారణంగా నర్సింగ్‌ శిక్షణ కోర్సులను ఎంచుకునే వారి సంఖ్య తక్కువగా ఉండేది. ప్రస్తుత పరిస్థితులు అందుకు భిన్నం. ఆసుపత్రుల్లో డాక్టర్ల తరువాత వైద్యసేవలందించడంలో నర్సులదే కీలకపాత్ర. గ్రామీణ ప్రాంతాల్లోని ప్రాథమిక వైద్య ఆరోగ్యకేంద్రం నుంచి సూపర్‌ స్పెషాలిటీ స్టార్‌ హాస్పిటళ్ల వరకూ వీరే ప్రధాన భూమికను పోషిస్తున్నారు.
అసలు నర్సులు లేకుండా నర్సింగ్‌ హోంలూ, వైద్య ఆరోగ్య కేంద్రాలను వూహించుకోలేం. వీరి ప్రాముఖ్యాన్ని గుర్తించి, చాలా సూపర్‌స్పెషాలిటీ హాస్పిటళ్లు నర్సింగ్‌ కళాశాలలను స్థాపించి, శిక్షణ కోర్సులను అందిస్తున్నాయి.
ఇంటర్‌ తరువాత చదివే వృత్తి విద్యాకోర్సుల్లో తక్షణ ఉపాధిని అందిస్తున్నవాటిలో నర్సింగ్‌ శిక్షణ కోర్సులు ప్రధానమైనవి. పెరుగుతున్న జనాభాకు తగ్గట్టు ప్రభుత్వ, ప్రైవేటు రంగాల్లో వైద్య, ఆరోగ్యసేవలను అందించే ఆసుపత్రుల్లో నర్సింగ్‌ సేవలను అందించే సిబ్బంది కొరత సమస్యగా మారింది. ఆ నేపథ్యంలో వివిధ విద్యాసంస్థల్లో నర్సింగ్‌ కోర్సులు అభ్యసిస్తున్న విద్యార్థులు తమ కోర్సుల చివరి సంవత్సరంలోనే వివిధ కార్పొరేట్‌ ఆస్పత్రుల్లో అవకాశాలను ఎంచుకుంటున్నారు.
1917లో దేశం మొత్తంలో రెండు కళాశాలల్లో మాత్రమే నర్సింగ్‌ శిక్షణను అందించేవారు. ప్రస్తుతం రెండు తెలుగు రాష్ట్రాల్లో కళాశాలల సంఖ్య 300 పైనే. మొత్తం సీట్లు పదివేల వరకూ ఉన్నాయి. నర్సింగ్‌ కళాశాలల్లో సరైన మౌలిక వసతులు, నాణ్యమైన బోధన ఉండేలా హెల్త్‌ యూనివర్సిటీలు, ఇండియన్‌ నర్సింగ్‌ కౌన్సిల్‌లు పర్యవేక్షిస్తూ ఉంటాయి.
శాస్త్రీయ పాఠ్యప్రణాళిక
1854లో ఓ యుద్ధంలో గాయపడిన సైనికులకు పరిచర్యలను అందించడానికి బ్రిటిష్‌ ప్రభుత్వం ఫ్లోరెన్స్‌ నైటింగేల్‌ను సిస్టర్‌గా నియమించింది. ఆమె సహాయకులుగా కొంతమందిని నియమించుకొని వైద్యసేవలు అందించడానికి చేసిన ప్రయత్నంలోనే నర్సింగ్‌ సేవలకు అంకురార్పణ జరిగింది.
1986లో అప్పటి ఆంధ్రప్రదేశ్‌ రాష్ట్ర ముఖ్యమంత్రి వివిధ వైద్య విద్యాకోర్సులతోపాటు నర్సింగ్‌ శిక్షణ కోర్సుకు నాణ్యమైన, శాస్త్రీయ పాఠ్యప్రణాళికను రూపొందించేలా దృష్టి సారించారు. అదే ఏడాది డా॥ ఎన్‌.టి.ఆర్‌.
యూనవర్సిటీ ఆఫ్‌ హెల్త్‌ సైన్సెస్‌ పేరిట హెల్త్‌ యూనివర్సిటీ దేశంలోనే మొదటిసారిగా ఏర్పాటయింది. ఇది ఇతర రాష్ట్రాలకూ ఒక నమూనాగా ఉంటూ వైద్యవిద్యకు గుర్తింపు పొందింది.
రాష్ట్ర విభజన అనంతరం తెలంగాణా రాష్ట్రంలో కాళొజీ నారాయణ రావు యూనివర్సిటీ ఆఫ్‌ హెల్త్‌ సైన్సెస్‌ ఏర్పాటు చేశారు. వైద్య విద్యతో పాటు నర్సింగ్‌ శిక్షణ కోర్సుకు పాఠ్యప్రణాళికను రూపొందించుకుంది.
మేల్‌ నర్సింగ్‌...
ఈ మధ్యకాలంలో మహిళలతోపాటు, మగవారు కూడా నర్సింగ్‌ రంగంలోకి అడుగిడుతున్నారు. సేవలందించడంలో మహిళలతో పోటీ పడుతున్నారు. మంచి ఉపాధి అవకాశాలూ పొందుతున్నారు. మహిళలు వెళ్లి చేయలేని కొన్ని ప్రతికూల పరిస్థితులను సైతం ఎదుర్కొని మేల్‌ నర్స్‌లు తమ సేవలనందిస్తున్నారు. అయితే వీరి సంఖ్య చాలా తక్కువగా ఉంది. 2004-05 విద్యా సం॥ నుంచి నర్సింగ్‌ కాలేజీలలో పురుష అభ్యర్థులకు ప్రవేశాల అవకాశం కల్పించారు.
జాతీయస్థాయిలో ఒకే సిలబస్‌ను అనుసరించటం వల్ల దేశవ్యాప్తంగా మెరుగైన ఉపాధి అవకాశాలు ఏర్పడ్డాయి.
మంచి మౌలిక వసతులు, బోధన సిబ్బంది, అనుబంధ ఆస్పత్రి ఉన్న నర్సింగ్‌ కళాశాలను ఎంచుకొని కోర్సును అభ్యసిస్తే భవిష్యత్తు మెరుగ్గా ఉంటుంది.
ఆసక్తి ఉన్నవారు తెలుగు రాష్ట్రాల్లో ప్రవేశాల కోసం డా॥ ఎన్టీఆర్‌ ఆరోగ్య విశ్వవిద్యాలయం, విజయవాడ; కాళొజీ నారాయణరావు ఆరోగ్య విశ్వవిద్యాలయం, వరంగల్‌ వెబ్‌సైట్‌లు చూసి దరఖాస్తు చేసుకోవచ్చు.
జాతీయ స్థాయిలో...
జాతీయస్థాయిలో ప్రఖ్యాతి చెందిన నర్సింగ్‌ విద్యాసంస్థల్లో బీఎస్సీ, ఎంఎస్సీ నర్సింగ్‌ కోర్సులు అందుబాటులో ఉన్నాయి. వాటిలో...
* ఎయిమ్స్‌ - ఆల్‌ ఇండియా ఇన్‌స్టిట్యూట్‌ ఆఫ్‌ మెడికల్‌ సైన్సెస్‌. దేశవ్యాప్తంగా ఇన్‌స్టిట్యూట్లు ఉన్నాయి.
* జిప్‌మర్‌ - జవహర్‌లాల్‌ ఇన్‌స్టిట్యూట్‌ ఆఫ్‌ మెడికల్‌ ఎడ్యుకేషన్‌ అండ్‌ రీసెర్చ్‌, పుదుచ్చేరి.
* సి.ఎం.సీ. - వెల్లూర్‌, క్రిస్టియన్‌ మెడికల్‌ కాలేజ్‌ అండ్‌ హాస్పిటల్‌
* రాజ్‌కుమారి అమృత్‌ కౌర్‌ కాలేజ్‌ ఆఫ్‌ నర్సింగ్‌ - న్యూదిల్లీ
* రిమ్స్‌- రాజీవ్‌గాంధీ ఇన్‌స్టిట్యూట్‌ ఆఫ్‌ మెడికల్‌ సైన్సెస్‌, బెంగళూరు
* నిమ్‌హాన్స్‌- నేషనల్‌ ఇన్‌స్టిట్యూట్‌ ఆఫ్‌ మెంటల్‌ హెల్త్‌ అండ్‌ న్యూరో సైన్సెస్‌, బెంగళూరు.
పైవాటిలో నిమ్‌హాన్స్‌, రాజ్‌కుమారి అమృత్‌ కౌర్‌ కాలేజీ ఆఫ్‌ నర్సింగ్‌లు పి.హెచ్‌.డి. రీసెర్చ్‌ ఇన్‌ నర్సింగ్‌ కోర్సులు అందిస్తున్నాయి. దేశంలో ఆర్మీ నర్సింగ్‌ కాలేజీల్లో బీఎస్సీ నర్సింగ్‌, జనరల్‌ నర్సింగ్‌ అండ్‌ మిడ్‌ వైఫరీ కోర్సులకు ఏటా ఇండియన్‌ ఆర్మీ నోటిఫికేషన్‌ విడుదల చేస్తుంది. మిలటరీలోనే నర్సింగ్‌ సర్వీసెస్‌ విభాగంలో మంచి జీతం, హోదాతో ఉపాధి లభిస్తుంది.
నర్సింగ్‌ కోర్సులు ఇవీ...
మనదేశంలో అందిస్తున్న నర్సింగ్‌ కోర్సుల వివరాలు చూద్దాం!
మల్టీ పర్పస్‌ హెల్త్‌ వర్కర్‌ (MPHW) యాగ్జిలరీ నర్స్‌ & మిడ్‌ వైఫరీ:
కోర్సు కాల వ్యవధి- రెండు సంవత్సరాలు. ఇంటర్‌లో ఏదైనా గ్రూపుతో 40 శాతం మార్కులు సాధించి ఉండాలి. 17 సంవత్సరాలు నిండి, 35 సం॥రాలు దాటనివారు అర్హులు. నర్సింగ్‌ కోర్సులలో ఇది ప్రాథమిక కోర్సు. జిల్లా స్థాయిలో- జిల్లా వైద్య- ఆరోగ్య అధికారి కార్యాలయం ద్వారా వెలువడే ప్రవేశ ప్రకటన ద్వారా ప్రవేశాలుంటాయి. గ్రామీణ ప్రాంతాలలో ఆరోగ్య సేవలకు ఎ.ఎన్‌.ఎం.లు ప్రధాన పాత్ర వహిస్తున్నారు. ప్రాథమిక ఆరోగ్య కేంద్రాల పరిధిలో పది నుంచి పదిహేను మంది వరకు వీరి అవసరం ఉంటుంది. ఎన్‌.జి.ఒ. (నాన్‌ గవర్నమెంట్‌ ఆర్గనైజేషన్స్‌)లు ఏర్పాటు చేసే రూరల్‌ అండ్‌ అర్బన్‌ హెల్త్‌ సెంటర్లలోనూ వీరి నియామకం ఉంటుంది.
డిప్లొమా ఇన్‌ జనరల్‌ నర్సింగ్‌ - మిడ్‌ వైఫరీ (GNM) :
ఈ కోర్సు వ్యవధి 3 1/2 సంవత్సరాలు. ఇంటర్న్‌షిప్‌ కూడా ఉంటుంది. ఇంటర్‌లో సైన్స్‌ గ్రూప్‌లలో కనీసం 45 శాతం మార్కులు పొందివున్నవారు అర్హులు. 17 సం॥రాల నుంచి 35 సం॥ మధ్య వయస్కులు అర్హులు.
తెలుగు రాష్ట్రాల్లో ప్రభుత్వరంగంలోని నర్సింగ్‌ స్కూళ్ళలో గుంటూరు, కాకినాడ, విశాఖపట్నం, కర్నూలు, తిరుపతి, అనంతపురం, కడపలతోపాటు, తెలంగాణ రాష్ట్రంలో వరంగల్‌, హైదరాబాద్‌, కరీంనగర్‌ లాంటి ముఖ్య పట్టణాల్లోని నర్సింగ్‌ స్కూళ్ళు పేరు పొందినవి. ప్రైవేటు రంగంలో ప్రతీ రెవెన్యూ డివిజన్‌లోనూ నర్సింగ్‌ స్కూళ్ళను ఏర్పాటు చేశారు. జిల్లాస్థాయి కౌన్సెలింగ్‌ ద్వారానే ప్రవేశాలుంటాయి.
బీఎస్సీ నర్సింగ్‌ డిగ్రీ కోర్సు:
ఇది నాలుగేళ్ల డిగ్రీ (బ్యాచిలర్స్‌ డిగ్రీ ఇన్‌ నర్సింగ్‌). నిర్దిష్టమైన పాఠ్యప్రణాళికతో రూపొందించిన ఈ కోర్సుకు ఆదరణ ఎక్కువ. ఇంటర్‌లో బై.పి.సి. గ్రూప్‌లో సాధించిన మార్కుల ఆధారంగా ప్రవేశం కౌన్సెలింగ్‌ ద్వారా ఉంటుంది. ఆన్‌లైన్‌లో దరఖాస్తు చేసుకోవాలి.
‘ఇండియన్‌ నర్సింగ్‌ కౌన్సిల్‌’, ఇంకా ఆయా రాష్ట్రాల హెల్త్‌ యూనివర్సిటీల అనుమతులు తప్పనిసరిగా పొంది, నియమ నిబంధనలననుసరించి కళాశాలలు ఈ కోర్సుల నిర్వహణ చేయాలి.
పోస్ట్‌ బేసిక్‌ బీఎస్సీ నర్సింగ్‌ డిగ్రీ- (పి.బి. బీఎస్సీ నర్సింగ్‌):
ఈ రెండు సం॥రాల నర్సింగ్‌ డిగ్రీ కోర్సుకు జి.ఎన్‌.ఎం (జనరల్‌ నర్సింగ్‌ అండ్‌ మిడ్‌ వైఫరీ) 50 శాతం మార్కులతో ఉత్తీర్ణులైనవారు అర్హులు. కనీసం రెండు సం॥రాలు నర్సింగ్‌ (క్లినికల్‌) వృత్తిలో అనుభవం ఉండాలి. ఇంకా స్టేట్‌ నర్సింగ్‌ కౌన్సిల్లో రిజిస్టర్‌ అయి ఉండాలి. ఈ కోర్సు పూర్తిచేసినవారికి బీఎస్సీ నర్సింగ్‌ డిగ్రీని అందజేస్తారు. బీఎస్సీ నర్సింగ్‌ కోర్సులో మాదిరి థియరీ పార్ట్‌లో జనరల్‌ నర్సింగ్‌- జనరల్‌ మెడిసిన్‌తో పాటు వైద్యవిద్యతో సమాన బోధన ఉంటుంది.
ఈ కోర్సులు పూర్తిచేసినవారు సమాజంలోని అన్ని స్థాయుల్లో ఆరోగ్యసేవలను అందించవలసి ఉంటుంది. గ్రామీణ స్థాయి, పట్టణ స్థాయి ఆసుపత్రులతో పాటు కార్పొరేట్‌ ఆసుపత్రుల్లో ఉద్యోగ అవకాశాలున్నాయి.
ఎంఎస్సీ నర్సింగ్‌ (మాస్టర్స్‌ డిగ్రీ ఇన్‌ నర్సింగ్‌):
ఇది రెండు సంవత్సరాల కోర్సు. బీఎస్సీ నర్సింగ్‌ లేదా పోస్ట్‌ బేసిక్‌ నర్సింగ్‌ డిగ్రీలో కనీసం 50 శాతం మార్కులతో ఉత్తీర్ణులై ఉండాలి. పి.బి. బీఎస్సీ నర్సింగ్‌ కోర్సు చేసినవారు నేరుగా ఎంఎస్సీ నర్సింగ్‌లో ప్రవేశం పొందవచ్చు. బోధన రంగంలో రాణించాలనే ఆసక్తి కల్గినవారికి ఈ కోర్సు చాలా ఉపాధి అవకాశాలు కల్పిస్తుంది.
ఎంఎస్సీ నర్సింగ్‌లోని ముఖ్య స్పెషాలిటీలు:
* చైల్డ్‌ నర్సింగ్‌
* కమ్యూనిటీ హెల్త్‌ నర్సింగ్‌
* సైకియాట్రిక్‌ నర్సింగ్‌
* మెడికల్‌ సర్జికల్‌ నర్సింగ్‌
* గైనకాలజీ అండ్‌ అబ్‌స్టిట్రిక్స్‌ నర్సింగ్‌.
ఎం.ఫిల్‌ ఇన్‌ నర్సింగ్‌:
వ్యవధి రెండు సం॥రాలు. ఎంఎస్సీ నర్సింగ్‌ కోర్సు పూర్తిచేసినవారు అర్హులు. కనీసం 55 శాతం మార్కులు సాధించి ఉండాలి. దేశవ్యాప్తంగా ఉన్న విశ్వవిద్యాలయాల్లో బెంగళూరు, మణిపాల్‌ మొదలైనవి ప్రధానమైనవి. ప్రవేశ పరీక్ష ద్వారా ప్రవేశం కల్పిస్తారు. నర్సింగ్‌ బోధనకు ప్రాముఖ్యం కలిగిన కోర్సు M.Phill (N).
పి.హెచ్‌.డి. ఇన్‌ నర్సింగ్‌:
కాల వ్యవధి మూడు నుంచి అయిదు సంవత్సరాలు. ఎంఎస్సీ నర్సింగ్‌లో 55 శాతం మార్కులు పొంది ఉండాలి. రాజీవ్‌గాంధీ ఇన్‌స్టిట్యూట్‌ ఆఫ్‌ మెడికల్‌ సైన్సెస్‌ అండ్‌ నిమ్‌హాన్స్‌, బెంగళూరులో నర్సింగ్‌ డాక్టరేట్‌ పట్టాను అందిస్తారు.
- కె. ర‌జ‌నీ ఖాద‌ర్, ప్రిన్సిప‌ల్‌, కాటూరి కాలేజీ ఆఫ్ న‌ర్సింగ్
పాఠశాలల్లో తెలుగు బోధన తప్పనిసరి చేయాలి
* తెలుగు వస్తేనే ఉద్యోగం అన్న నిబంధన పెట్టండి
* ఉపరాష్ట్రపతి వెంకయ్యనాయుడు వ్యాఖ్యలు
ఈనాడు అమరావతి: ఆంధ్రప్రదేశ్ రాష్ట్రంలో వచ్చే విద్యా సంవత్సరం నుంచే ప్రతి పాఠశాలలోను తెలుగు భాష బోధన తప్పనిసరి చేయాలని, తెలుగుభాష చదవితేనే పరీక్షల్లో ఉత్తీర్ణులయ్యేలా నిబంధన తేవాలని భారత ఉపరాష్ట్రపతి ఎం.వెంకయ్యనాయుడు పేర్కొన్నారు. ఆంధ్రప్రదేశ్‌లో ఉద్యోగం రావాలంటే తప్పనిసరిగా తెలుగు వచ్చి ఉండాలన్న నిబంధన పెట్టాలని సూచించారు. ఏపీలో వివిధ జాతీయ రహదారుల ప్రాజెక్టులు, జాతీయ జలరవాణా మార్గం-4 తొలిదశ ప్రాజెక్టు పనులకు శంకుస్థాపన కార్యక్రమాలు మంగళవారం (అక్టోబరు 3) వెంకయ్యనాయుడు చేతుల మీదుగా జరిగాయి. విజయవాడలోని ఇందిరాగాంధీ మున్సిపల్ స్టేడియంలో జరిగిన ఈ కార్యక్రమంలో ఆయన మాట్లాడారు. రాబోయే రోజుల్లో రాష్ట్రంలో తెలుగుభాషను తప్పనిసరి చేస్తానని ముఖ్యమంత్రి చంద్రబాబు చెప్పడంపై హర్షం వెలిబుచ్చారు. దేశాభివృద్ధికి నదుల అనుసంధానం చాలా ముఖ్యమని, గోదావరి జలాలను కృష్ణా నదికి తీసుకురావడం ద్వారా చంద్రబాబు ఆదర్శంగా నిలిచారని ఆయన కొనియాడారు.
నేను వీధి బడిలోనే చదివాను
ఇక ఏ మాత్రం ఆలస్యం చేయకుండా రాష్ట్రంలోని అన్ని పాఠశాలల్లో తెలుగుని ఒక భాషగా నేర్పించాలి. దానిలో తప్పనిసరిగా ఉత్తీర్ణులవ్వాలన్న నిబంధన పెట్టాలి. బ్యాంకులు సహా అన్ని చోట్లా దరఖాస్తులన్నీ తెలుగులోనే ఉండాలి. ప్రతి దుకాణం, సినిమాహాళ్లు, షాపింగ్ మాల్స్, హోటళ్ల నామఫలకాలు తప్పనిసరిగా తెలుగులోనే ఉండాలి. తెలుగులో రాసిన తర్వాత, ఇక ఏ భాషలో రాసుకున్నా ఫర్వాలేదు. చైనా భాషలో రాసినా అభ్యంతరం లేదు. బయటి నుంచి రాష్ట్రానికి వచ్చిన ప్రతి అధికారి ఆరు నెలల్లో తెలుగు నేర్చుకోవాలన్న నిబంధన పెట్టాలి. అవసరం వస్తే ప్రతి ఒక్కరూ తెలుగు నేర్చుకుంటారు. కన్నతల్లిని, జన్మభూమిని, మాతృభాషను, మాతృదేశాన్ని మర్చిపోయినవాడు మనిషే కాదు. మనం చెప్పాలనుకున్న విషయాన్ని మాతృభాషలోనే ప్రభావవంతంగా, ఎదుటి వారికి అర్ధమయ్యేలా చెప్పగలం. తెలుగు రాష్ట్రాల్లో పుట్టిన ప్రతి ఒక్కరూ తెలుగు నేర్చుకోవాలి. మాతృభాష సొంత కళ్లు వంటిది. పరాయి భాష కళ్లద్దాల వంటిది. కళ్లుంటేనే కళ్లద్దాల వల్ల ప్రయోజనం. మాతృభాషలో ప్రావీణ్యం ఉన్నప్పుడే మిగతా భాషల్లోను రాణించగలం. ఇతర భాషలూ నేర్చుకోవడం మంచిదే. పరభాషా వ్యామోహం పనికిరాదు. పిల్లలు ఆంగ్ల మాధ్యమంలో చదవకపోతే ఏమైపోతారోనన్న భయం చాలా మందిలో ఉంది. ఆంగ్లంలో చదివితేనే గొప్పవారవుతారన్నది భ్రమ మాత్రమే. నేను వీధి బడిలోనే చదివాను. చంద్రబాబు ఆంగ్ల మాధ్యమంలో చదవలేదు. ప్రధాని నరేంద్ర మోదీ కాన్వెంట్‌కి వెళ్లలేదు. నేను కేంద్ర మంత్రిగా, ఒక జాతీయ పార్టీకి అధ్యక్షుడిగా పని చేశాను. ఇప్పుడు ఉపరాష్ట్రపతిని అయ్యాను. చంద్రబాబు ముఖ్యమంత్రి అయ్యారు. నరేంద్ర మోదీ ప్రపంచంలోనే శక్తివంతమైన దేశాల్లో ఒకటైన భారత దేశానికి ప్రధానిగా ఉన్నారు. ఆంగ్లం, హిందీ కూడా నేర్చుకోండి. దానికి ముందు తల్లిపాల వంటి తెలుగు భాషను ప్రతి ఒక్కరూ నేర్చుకోవాలి... అని వెంకయ్యనాయుడు పేర్కొన్నారు. తెలుగుభాషను తప్పనిసరి చేయడానికి తెలంగాణ ముఖ్యమంత్రి కేసీఆర్ కూడా చొరవ తీసుకుంటున్నారని చెప్పారు. ఆంధ్రప్రదేశ్, తెలంగాణల్లో తెలుగు భాష వెలగాలని, తెలుగుభాష మాధుర్యాన్ని పిల్లలు చవిచూడాలని ఆయన ఆకాంక్షించారు.
ఏయే రంగాల్లో అవకాశాలెన్ని?
* నివేదిక రూపొందించనున్న సాంకేతిక విద్యాశాఖ
* సీఐఐతో త్వరలో ఒప్పందం
* ఏఐసీటీఈకి అందజేయనున్న ప్రభుత్వం
ఈనాడు, హైదరాబాద్: తెలంగాణలో ఏయే రంగాల్లో మానవ వనరులకు డిమాండ్ ఉందో.. ఎలాంటి కోర్సులను ప్రవేశపెడితే ప్రయోజనం ఉంటుందో వచ్చే దశాబ్దం వరకు పరిస్థితిని అంచనా వేసేందుకు ఆ రాష్ట్ర సాంకేతిక విద్య సమాయత్తమైంది. దీనిపై సమగ్ర నివేదిక రూపొందించేందుకు భారత పరిశ్రమల సమాఖ్య (సీఐఐ)తో అధ్యయనం చేయించనుంది. మీరు కొత్తగా ఇంజినీరింగ్ కళాశాలలు ఎందుకు వద్దంటున్నారు? దేని ప్రకారం మీరు ఈ అంచనాకు వచ్చారు.. ప్రస్తుత పరిస్థితి, వచ్చే పదేళ్లలో అంచనాపై సమగ్ర నివేదిక ఇస్తే మీ సూచనను పరిశీలిస్తాం... అంటూ కొద్ది రోజుల క్రితం అఖిల భారత సాంకేతిక విద్యా మండలి (ఏఐసీటీఈ) రాష్ట్ర విద్యాశాఖ అధికారులు సమావేశమైనప్పుడు కేంద్ర అధికారులు చెప్పారు. సమగ్ర నివేదికను సెప్టెంబరు 15లోపు పంపాలని కూడా సూచించారు. దీనిపై రాష్ట్ర విద్యాశాఖ మాత్రం రాష్ట్రంలో ఏయే రంగాల్లో మానవ వనరులకు ఎంత డిమాండ్ ఉంది? ఎంత మంది నిపుణులు అవసరం? కోర్సు పరిస్థితి ఏమిటి? తదితర అంశాలపై గతంలో ఉమ్మడి రాష్ట్రంలో అధ్యయనం చేసి రూపొందించిన నివేదిక ఉందని, తెలంగాణ రాష్ట్ర ఆవిర్భావం నేపథ్యంలో కొత్తగా అధ్యయనం చేసి, నివేదిక సమర్పణకు కొద్ది నెలల సమయం కావాలని ఏఐసీటీఈకి లేఖ ద్వారా విన్నవించింది. ఏఐసీటీఈ అధికారులు అంగీకారం తెలపడంతో నివేదిక రూపకల్పనకు కొద్ది రోజుల్లో విద్యాశాఖ సీఐఐతో ఒప్పందం కుదుర్చుకోనుంది. ఒప్పందం తర్వాత మూడు నెలల్లో సీఐఐ నివేదిక అందజేయాల్సి ఉంటుంది. తెలంగాణలోని 31 జిల్లాల వారీగా పలు రంగాల్లో అవకాశాలపై సమగ్ర నివేదిక తయారు చేస్తారు.
ఉమ్మడి నివేదిక ఆధారంగా తెలంగాణలో పరిస్థితి...
గతంలో ఉమ్మడి రాష్ట్రంలో పదేళ్ల సమగ్ర నివేదికను యాక్సెంచర్ సంస్థ రూపొందించింది. 2012-17, 2017-22 వరకు.. నైపుణ్య మానవ వనరుల కొరత ఎలా ఉంటుందో, ఏయే జిల్లాల్లో ఏ రంగాలకు డిమాండ్ ఉంటుందో వివరించింది. దాని ప్రకారం అభివృద్ధికి అవకాశమున్న జిల్లాలు ఇవీ..
* పర్యాటకం: రంగారెడ్డి, నల్గొండ, కరీంనగర్
* బ్యాంకింగ్, ఫైనాన్స్: హైదరాబాద్, రంగారెడ్డి
* ఐటీ: హైదరాబాద్
* రవాణా: రంగారెడ్డి, ఆదిలాబాద్
* రసాయనాలు, ఫార్మా: రంగారెడ్డి, మెదక్, నల్గొండ
* ఆటో మొబైల్: రంగారెడ్డి
* ఆహార శుద్ధి: నిజామాబాద్
ఓటమిని గెలిచేదెలా?
పోటీపరీక్షల ప్రయాణంలో ఎల్లప్పుడూ విజయాలే వరించవు. వైఫల్యాలు కూడా పలకరిస్తుంటాయి. అది సహజం. సీఏ, సివిల్స్‌, గ్రూప్స్‌, బ్యాంకు.. పరీక్ష ఏదైనా ఓటమి ఎదురైౖనపుడు అది రేపటి గెలుపునకు పునాదిగా భావించాలి! కరీంనగర్‌ జిల్లాకు చెందిన కావ్య తల్లిదండ్రుల కోరిక మేరకు సీఏ కావాలని ప్రయత్నిస్తోంది. కానీ తొలి దశలోనే వైఫల్యం ఎదురై నిరాశకు గురైంది. శ్రీకాకుళం జిల్లాకు చెందిన శ్రీనివాస్‌ బ్యాంకు ఆఫీసర్‌ కావాలని కలలు కన్నాడు. రెండేళ్ల నుంచి అతను రాయని బ్యాంకు పరీక్ష లేదు. కానీ రాతపరీక్ష పాసైతే, ఇంటర్వ్యూ పోతోంది. కొన్ని సందర్భాల్లో ప్రిలిమినరీ దశనే దాటలేకపోవడం అతడిని మనోవ్యధలోకి నెట్టేసింది. అనంతపురం జిల్లాకు చెందిన అరుణ్‌ డిగ్రీ నుంచి సివిల్స్‌ మీద దృష్టిపెట్టి తొలి ప్రయత్నంలోనే ఐఏఎస్‌ కొట్టాలనుకున్నాడు. కానీ ప్రిలిమినరీ దగ్గరే ఎదురుదెబ్బ తగలడంతో వైరాగ్యంలో పడిపోయాడు. హైదరాబాద్‌కు చెందిన మహేష్‌ది మరో రకమైన అనుభవం. ఆరు నూరైనా గ్రూప్స్‌ కొట్టాలని ఆరేళ్ల నుంచి పోరాడుతున్నాడు. డబ్బు మంచినీళ్లలా ఖర్చయ్యి అంతంతమాత్రంగా వూళ్లొ వ్యవసాయం చేస్తున్న తండ్రికి భారం కావడం తప్ప తాను సాధించింది శూన్యమని మౌనంగా రోదిస్తున్నాడు.
నాలుగు ప్రాంతాలకు చెందిన వీరి నేపథ్యాలు వేరు, లక్ష్యాలు భిన్నం. అయితే అందరూ ఆశపడుతున్నది పోటీపరీక్షల్లో విజయం కోసమే. కానీ అపజయాలు ఎదురుకావడంతో కుంగిపోతున్నారు. ఇది ఈ నలుగురి సమస్యే కాదు. పోటీపరీక్షల సమర క్షేత్రంలో ప్రవేశించిన లక్షలమంది ఆవేదన. పోటీపరీక్షల్లో అవకాశాలు స్వల్పం. పోటీపడేవారు అధికం. కానీ అంతిమ ఫలితం దక్కేది కొందరికే. మిగతా అందరూ అంతులేని ఆవేదనను ఏదో ఒక దశలో ఎదుర్కొంటారు. దీని నుంచి బయటపడేదెలా? అసలు పోటీ నుంచి నిష్క్రమించడమే శరణమా? ఈ సంక్లిష్ట దశలో ఎలా స్పందించాలి? ఎలా స్వీయ విశ్లేషణ చేసుకోవాలి? నడిచిన దారి సరైనదేనా? కాదా అన్న మీమాంసను ఎలా పరిశీలించాలి? విజయం అంటే ఒక వైఫల్యం నుంచి మరో వైఫల్యానికి ఉత్సాహాన్ని కోల్పోకుండా చేసే ప్రయాణం అంటారు. జీవిత పర్యంతం వ్యక్తిగతంగా, వృత్తిపరంగా ఎన్నో పరాజయాలను ఎదుర్కొని, ఎదురొడ్డి చివరికి అమెరికా అధ్యక్ష పదవిని అధిష్ఠించారు అబ్రహాం లింకన్‌. ఏ పరాజయమూ శాశ్వతం కాదు. అపజయం అనేది ఒక స్థితి, ఒక దశ. దాని నుంచి బయటపడి విజయ ప్రస్థానం చేరడానికి మూడు మార్గాలున్నాయి. స్వీయ సాంత్వన కోసం మానసిక నిపుణులు సూచిస్తున్న సాధనాలున్నాయి.
1. తక్షణ స్పందన
2. వ్యక్తిగత అంతర్వీక్షణం
3. విద్యాపరమైన విశ్లేషణ
తక్షణ స్పందన
కొన్ని నెలలు లేదా సంవత్సరాల కృషి అనంతరం రాసిన పోటీపరీక్షల ఫలితాలు ప్రతికూలంగా రావడం నిరాశను కలిగించడం సహజం. అప్పటివరకూ వేసిన అంచనాలు, కన్న కలలు తలకిందులయ్యాయన్న వ్యధ కలగడమూ మామూలే. అయితే దీనిని సుదీర్ఘ ప్రయాణంలో భాగంగానే చూడాలి. జీవనయానంలో ఒక అడుగుగానే భావించాలి.
అపజయాన్ని అంగీకరించడం: ఫలితం ప్రతికూలమైనప్పుడు మనసు పరిపరివిధాల పోతుంది. ఈ సొంత పరాజయాన్ని మరెవరి మీదైనా నెట్టెయ్యాలని మనసు ఉవ్విళ్లూరుతుంది. అందుకు ఎవరిని నిందించాలన్న అంతర్మధనం మొదలవుతుంది. కానీ అసలు వాస్తవం- వైఫల్యానికి కారణమైన ప్రతి నిర్ణయం అభ్యర్థిదే. సరైన వ్యూహం ఎంచుకోకపోయినా, తగిన ప్రణాళిక వేసుకోలేకపోయినా, తీసుకున్న శిక్షణలో తగిన ప్రమాణాలు లేకపోయినా, ఇలా కారణం ఏదైనా ఆ నిర్ణయం సొంతదారు అభ్యర్థే. కాబట్టి, యథాతథంగా దాన్ని స్వీకరించడం మేలు. ఓటమిని అంగీకరించడం తరువాత సాధించబోయే విజయంలో తొలిమెట్టు.
సన్నద్ధతకు స్వల్ప విరామం: పోటీపరీక్షల ఫలితాలు రావడంతోనే అపజయం చవిచూసిన అనంతరం చాలామంది తక్షణం మళ్లీ సన్నద్ధతలో పడిపోతారు. అయితే వైఫల్యం తాలూకు వేదన మాత్రం మనసును కుదిపేస్తుంటుంది. అలాంటి కల్లోల స్థితిలోనే సన్నద్ధత కొనసాగించడం వల్ల సంపూర్ణ ఏకాగ్రత కుదరదు. అందుకే కనీసం పక్షం రోజులు సన్నద్ధతకు దూరంగా ఉండి, కల్లోలిత మనసును కుదుటపడనివ్వాలి. ఇది సమయాన్ని వృథా చేయడం కాదు. పరుగు పందెంలో మోకాలుపై వంగి ఒక కాలు వెనక్కి వేసి, తగిన శక్తి పుంజుకునే ప్రయత్నం చేసినట్టు, ఈ స్వల్ప విరామం రాబోయే పెద్ద ప్రయత్నానికి పునాది అవుతుంది.
అంతఃశోధన: ఇలా విరామం తీసుకోవడం వల్ల మనసు కాస్త స్థిమితపడి అంతః విశ్లేషణ మొదలవుతుంది. చేసిన ప్రయత్నంలో అంతర్గతంగా తప్పొప్పుల సమీక్ష జరుగుతుంది. అప్పటికే విజయ సారథుల మనోగతాలు వెల్లడవుతాయి. కాబట్టి, వారితో తన ప్రయత్నాన్ని సరిపోల్చుకోవడానికి వీలవుతుంది. ముఖ్యంగా ఓటమి పరాభవాన్ని వెనక్కి నెట్టి అసలు కారణాల అన్వేషణకు మనసు సిద్ధపడుతుంది.
వ్యక్తిగత అంతర్వీక్షణం
పోటీ పరీక్షల్లో ఎదురైన చేదు అనుభవ పరాభవం ఫలితంగా ఉత్పన్నమయ్యే తక్షణ స్పందన దశ నుంచి బయటపడ్డాక నిజమైన స్వీయ పరిశీలన మొదలవ్వాలి. సాధారణంగా పోటీపరీక్షల్లో పరాజయానికి రెండు కారణాలుంటాయి. వ్యక్తిగత కారణాలు మొదటి కోవకు చెందితే, సదరు పోటీపరీక్ష సన్నద్ధతలో విషయపరమైన లోపాలు రెండో కోవకు చెందుతాయి. ముందు తనకు మాత్రమే తెలిసిన వ్యక్తిగత కారణాలను పరిశీలిస్తే..
క్రమశిక్షణ లోపించడం: ఒక్కో తరహా పోటీపరీక్షకు ఒక్కో ప్రత్యేక పంథాలో సన్నద్ధత అనివార్యమవుతుంది. సివిల్‌ సర్వీసెస్‌లో విజయానికి ఒక విధమైన సన్నద్ధత అవసరం అయితే, ఐఐటీ జేఈఈ పరీక్షకు మరో విధమైన సన్నద్ధత అవసరం. దీన్ని బట్టి అందుకు తగ్గట్టుగా దినచర్య అలవాటు చేసుకోవాలి, క్రమశిక్షణ అలవరచుకోవాలి. ఇది పోటీ పరీక్షార్థికి స్పష్టంగా అర్థమవుతూ ఉంటుంది. కానీ వ్యక్తిగత బలహీనతల కారణంగా క్రమశిక్షణ తప్పడం వల్ల విజయానికి దూరమవుతారు.
ఏక లక్ష్యం లోపించడం: పోటీ పరీక్షలకు ఏక లక్ష్య సన్నద్ధత (సింగిల్‌ మైండెడ్‌ ప్రిపరేషన్‌) చాలా సందర్భాల్లో విజయం చేకూరుస్తుంది. కానీ పోటీపరీక్షల్లో చాలామంది ఒకేసారి నాలుగు పడవలపై కాళ్లు వేయాలని చూస్తుంటారు. దీనివల్ల ఏ పరీక్షపైనా ఏకాగ్రత కుదరదు. నిరాశాపూరితంగానే ఉంటుంది.
బాహ్య ఒత్తిళ్లు: పోటీ పరీక్షల్లో విజయానికి సొంత బలాబలాల అంచనా అవసరం. అన్ని పోటీపరీక్షల్లోనూ వేర్వేరు విద్యా నేపథ్యాలు ఉన్నవారు విజయం సాధించడం లేదు. దీన్ని దృష్టిలో ఉంచుకుని పోటీపరీక్ష ఎంపిక జరగాలి. కానీ కొన్ని సందర్భాల్లో తల్లిదండ్రుల ఆకాంక్ష నెరవేళేర్చడానికో, స్నేహితుల ప్రభావం కారణంగానో ఎంపిక చేసుకుంటే సొంత బలాలు వాటితో అనుసంధానం కాక ఆశించిన ఫలితం రాదు.
మార్గదర్శకత్వ కొరత: పోటీపరీక్షల్లో సరైన మార్గదర్శకత్వం విజయానికి చేరువ చేస్తుంది. ముఖ్యంగా గ్రామీణ ప్రాంతాల్లో చదువుకుని మొదటిసారి పోటీపరీక్షలకు హాజరవుతున్నవారికి సరైన మార్గదర్శకత్వం లేక వారి తొలి ప్రయత్నం వృథా అవుతుంటుంది. మంచి అధ్యాపకులో, పోటీపరీక్షల్లో సీనియరో, మంచి శిక్షణ సంస్థ మార్గదర్శకత్వం ఇస్తేనో ప్రతిభగల అభ్యర్థులు త్వరగా గ్రహిస్తారు. పోటీపరీక్షల్లో సత్వర ఫలితాలు వస్తాయి.
సివిల్‌ సర్వీసెస్‌కు ఒక విధమైన సన్నద్ధత, ఐఐటీ జేఈఈకి మరో రకం సన్నద్ధత అవసరం. అందుకు తగ్గట్టుగా దినచర్య, క్రమశిక్షణ అలవరచుకోవాలి.
విద్యాపరమైన విశ్లేషణ
కొంతమంది అభ్యర్థులు వ్యక్తిగతంగా మంచి క్రమశిక్షణ చూపుతూ ఎటువంటి చంచలభావం లేకుండా ఒకే ఒక పోటీపరీక్షకు అంకితమై ఏళ్లతరబడి ప్రయత్నిస్తున్నా సత్ఫలితం రాదు. రాష్ట్ర సర్వీస్‌ కమిషన్‌ గ్రూప్స్‌లో ఇటువంటి అభ్యర్థులు తారసపడుతుంటారు. ఇలాంటివారి విషయంలో వ్యక్తిగత కారణాల కంటే సన్నద్ధత పర్వంలో చేసిన పొరపాట్లే విజయాన్ని ప్రభావితం చేస్తాయి.
సరైన వ్యూహం కొరవడం: ప్రతి పోటీపరీక్షకు దాని స్వభావాన్నిబట్టి పటిష్టమైన వ్యూహం అవసరం. మొత్తం సన్నద్ధతకు వినియోగించే కాలం, సబ్జెక్టువారీ సమయ విభజన, నిపుణుల మార్గదర్శకత్వం, ఏ సబ్జెక్టు ముందు, ఏది తర్వాత, పునశ్చరణకు కేటాయించే సమయం తదితర అంశాలు ఈ వ్యూహంలో అంతర్భాగాలు. వీటిపై అవగాహన లేకపోవడం కూడా పరాజయానికి కారణం అవుతుంది.
తగిన సాధన లేకపోవడం: పోటీపరీక్షల్లో అధ్యయనానికి ఎంత ప్రాముఖ్యముందో సాధనకూ అంతే ప్రాధాన్యం ఉంటుంది. ఉదాహరణకు సివిల్స్‌, గ్రూప్‌-1 స్థాయి పరీక్షల్లో మెయిన్స్‌ దశకు చేరేసరికి సంప్రదాయ విధానంలో వ్యాసరూపంలో జవాబులు రాయాల్సి ఉంటుంది. దీనికి ఎంతో సాధన అవసరం. చాలామంది అభ్యర్థులు మెయిన్స్‌కు సన్నద్ధమవుతారు కానీ, వాటిని రాయడంలో మెలకువలను మెరుగుపరచుకోలేరు. దీనివల్ల అనుకోని అపజయం పలకరిస్తుంది.
మెటీరియల్‌: పోటీపరీక్షల్లో అంతిమంగా ఏం చదివారు? ఏం రాశారు? అన్నదానిపై జయాపజయాలు ఆధారపడి ఉంటాయి. పుస్తకాల ఎంపిక, స్టడీ మెటీరియల్‌ అనుసరణ విషయంలో ఆచితూచి వ్యవహరించాలి. సిలబస్‌లకు సరిగా సరిపడేలా రూపొందించిన పుస్తకాల ఎంపిక అవసరం. కొన్ని సందర్భాల్లో ఈ విషయంలో జరిగే పొరపాటు అపజయానికి దారితీస్తుంది. కారణం ఏదైనా ఏ పోటీపరీక్ష అయినా గెలిచేవారు తక్కువగా, ఓడేవారు ఎక్కువగా ఉంటారు. అయితే ఆ ఓటమి శాశ్వతం కాదు. దాన్ని తట్టుకుని నిలబడితే మరో ప్రయత్నంలో గెలుపు బృందంలో ఉండవచ్చు. దీనికి ప్రస్తుతం ప్రపంచవ్యాప్తంగా మానసిక శిక్షణ నిపుణులు సూచిస్తున్న ఉపశమన ప్రక్రియ- స్వీయ ఓదార్పు (సెల్ఫ్‌ కంపాషన్‌)..
అనుకూల ఫలితానికి ‘స్వీయ ఓదార్పు’
జీవితంలో జయాపజయాలు, కష్టసుఖాలు సర్వసాధారణం. అయితే చాలామంది అపజయాలు ఎదురైనప్పుడు కుంగిపోతారు. తమను తాము నిందించుకుంటారు. తాము దురదృష్ట¾్టవంతులమనీ, నష్ట జాతకులమనీ, తమది ఐరన్‌లెగ్‌ అనీ, తాము విజయానికి తగమనీ నిస్పృహ చెందుతారు. దీనివల్ల శక్తిసామర్థ్యాలు క్షీణించి మరిన్ని పరాజయాలను తెచ్చుకుంటారు. అందుకే అపజయాలు ఎదురైనప్పుడు ఏం చేయాలన్నదానిపై ప్రపంచవ్యాప్తంగా, విస్తృతంగా పరిశోధనలు జరుగుతున్నాయి. నిజానికి ఎంతటి ప్రతికూల పరిస్థితుల్లోనైనా ఆత్మస్థైర్యాన్ని కోల్పోవద్దని మానసిక శాస్త్ర నిపుణులు సూచిస్తుంటారు. కానీ ప్రతికూల దృక్పథం కారణంగా మరింత నిస్తేజమవుతారు. క్రిస్టన్‌ నీఫ్‌ అనే అమెరికన్‌ మానసిక శాస్త్రవేత్త దీనిపై కృషి చేసి, ఒక నూతన ప్రక్రియను పరిచయం చేశారు. స్వీయ ఓదార్పు అనే ఈ ప్రక్రియ పరాజయ స్థితినీ, కష్ట సమయ ప్రతికూల మానసిక దుస్థితినీ అధిగమించడానికి చేయూతనిస్తుంది. తీవ్రమెనౖ సంక్షోభ సమయంలోనూ ఈ ప్రక్రియ ఒడ్డుకు చేరుస్తుంది. స్వీయ ఓదార్పు అంటే.. ఎదురైన పరాజయానికి కల్లోల మానసిక స్థితిలో తనను తాను బయటి వ్యక్తిలా ఓదార్చుకోవడం.
ఉదాహరణకు- స్నేహితుడికి ప్రమాదం అయింది. ఆసుపత్రిలో ఉన్నాడు. మీరు అతడిని ఎలా ఓదారుస్తారో అలాగే మిమ్మల్ని మీరు ఓదార్చుకోవాలి. స్నేహితులు పరీక్షలో విఫలమై మానసిక వ్యధలో ఉన్నపుడు అతడిని/ఆమెను వూరడించడానికి చెప్పే మాటలను మిమ్మల్ని మీరు సాంత్వన పరచుకోవడానికి ఉపయోగించుకోవాలి. ఈ విధమైన స్వీయ ఓదార్పు ద్వారా మానసిక ఉపశమనం కలిగి భవిష్యత్తుపై ఆశ చిగురుస్తుందని, ఆత్మ విశ్వాసం మళ్లీ పాదుకుంటుందని నిరూపణ అయ్యింది. దీనివల్ల బలహీన మానసిక స్థితిని అధిగమించి మళ్లీ విజయం సాధించే దిశగా పయనం సాగిస్తారు.
స్వీయ వూరడింపులో దశలు
స్వీయ ఆర్ధ్రత: ఎదురైన అపజయాలు, కష్టాలు, చేదు అనుభవాలతో మనసు గాయపడినప్పుడు ఎవరి పట్ల వారు కఠినంగా ఉండకూడదు. ప్రేమతో వ్యవహరించాలి, గౌరవించుకోవాలి, స్వీయ నింద నుంచి దూరంగా ఉండాలి.
మీరొక్కరే కాదు: ఓటమి ఎదురైనప్పుడు ఆ పరాభవం మీకు మాత్రమే దాపురించిందన్న భావన నుంచి బయటపడాలి. జయాపజయాలు సర్వసాధారణం. ఇదే రకమైన అపజయం ఇంతకుపూర్వం.. ఇప్పుడూ నాతోపాటు అనేకమంది చవిచూశారు. ఓటమికి ఎవరూ అతీతులు కాదు అన్న భావనతో ఆలోచించినప్పుడు మనసు తేలికపడుతుంది.
ఎటూ తూగకుండా: స్వీయ ఓదార్పు ప్రక్రియలో ఎటూ తూగకుండా నిష్పాక్షికంగా వ్యవహరించాలి. స్వీయ విమర్శా కూడదు. అతి స్వీయ ప్రశంసా తగదు. ఈ సమయంలో వచ్చే ప్రతికూల భావాలను అధిగమిస్తూ ఎవరిని వారు ఓదార్చుకోవడానికి మాత్రమే పరిమితం కావాలి.
పోటీ పరీక్షలు కఠినమై కావొచ్చు. కానీ ఓడిన ప్రతివారికీ గెలిచే అవకాశం కూడా ఇస్తాయి. ప్రయత్నించి ఓటమిపై గెలుపు సాధించడం మన వంతు!
సివిల్‌ సర్వీసెస్‌కు ఒక విధమైన సన్నద్ధత, ఐఐటీ జేఈఈకి మరో రకం సన్నద్ధత అవసరం. అందుకు తగ్గట్టుగా దినచర్య, క్రమశిక్షణ అలవరచుకోవాలి.
4 నుంచి ఆయుష్ సీట్లకు ధ్రువపత్రాల పరిశీలన
ఈనాడు, హైదరాబాద్: తెలంగాణలోని ప్రభుత్వ, ప్రైవేట్ ఆయుష్ కళాశాలల్లో సీట్ల భర్తీ కోసం అక్టోబర్ 4 నుంచి 6 వరకు ధ్రువపత్రాల పరిశీలన కార్యక్రమం నిర్వహిస్తున్నట్లు కాళోజీ ఆరోగ్య విశ్వవిద్యాలయం ఉపకులపతి డాక్టర్ కరుణాకరరెడ్డి తెలిపారు. ఆయుర్వేద, హోమియో, యునానీ సీట్లకు వెబ్ఆధారిత ప్రవేశాల కోసం ఉస్మానియా విశ్వవిద్యాలయంలోని ఆచార్య రాంరెడ్డి దూరవిద్య కేంద్రంలో జరిగే ఈ పరిశీలన ఒక దఫా మాత్రమే నిర్వహిస్తున్నట్లు ఆయన పేర్కొన్నారు. మరిన్ని వివరాలకు కాళోజీ ఆరోగ్యవర్సిటీ వెబ్‌సైట్‌ను చూడాలని తెలిపారు.
knruhs.in/
రానున్నది ఉద్యోగాల కాలం!
* 2018లో 20 లక్షల ఖాళీల భర్తీకి కేంద్రం సన్నాహాలు
ఈనాడు, దిల్లీ: రాష్ట్రాల సహకారంతో దేశవ్యాప్తంగా ఖాళీగా ఉన్న దాదాపు 20 లక్షల ఉద్యోగాలను భర్తీ చేసేందుకు కేంద్ర ప్రభుత్వం సన్నద్ధమవుతోంది. ఈమేరకు 2018 ప్రారంభంలో కేంద్ర స్థాయిలో 6 లక్షలు, రాష్ట్రాల స్థాయిలో 14 లక్షల ఖాళీల భర్తీకి మోదీ ప్రభుత్వం లక్ష్యంగా పెట్టుకుంది. ప్రధానమంత్రి కార్యాలయం ఆదేశాలకు అనుగుణంగా కార్మిక శాఖ కేంద్ర ప్రభుత్వ విభాగాలు, సంస్థల్లోని ఖాళీలను మదింపు చేయనున్నట్లు సంబంధిత వర్గాలు తెలిపాయి. ఖాళీల వివరాలతో జాబితాలను అందజేయాల్సిందిగా అన్ని మంత్రిత్వ శాఖలు, 244 కేంద్ర ప్రభుత్వ రంగ సంస్థలకు త్వరలోనే కేంద్ర కార్మిక శాఖ మంత్రి సంతోష్‌ గాంగ్వార్‌ లేఖలు రాయనున్నారు. అనంతరం తేలిన గణాంకాల ఆధారంగా నిర్ణీత సమయంలో వాటిని భర్తీ చేసేందుకు కార్మిక శాఖ ప్రణాళిక రూపొందించనుంది. సాధారణంగా ఆ శాఖ - ఉద్యోగార్థులు, ఉద్యోగాలిచ్చే విభాగాలకు మధ్య వారధిగా మాత్రమే వ్యవహరిస్తుంది. తొలిసారిగా ఉద్యోగాల కల్పన ప్రక్రియలో నేరుగా జోక్యం చేసుకుంటోంది. పరిపాలనపరమైన ఖర్చులను నియంత్రించే దిశగా గత ప్రభుత్వాలు నియామకాలను తగ్గించడం లేదా ఆపడం చేశాయి. దీనికి భిన్నంగా మోదీ ప్రభుత్వం ఉద్యోగాలను భర్తీ చేసేందుకు చర్యలు చేపడుతోంది. కార్మికశాఖ తాత్కాలిక అంచనాల ప్రకారం దేశవ్యాప్తంగా పోలీసు దళాల్లో 5 లక్షలు, ప్రాథమిక పాఠశాలల్లో 5 లక్షలు, భారతీయ రైల్వేల్లో 2.4 లక్షలు, అంగన్వాడీల్లో (కార్యకర్తలు) 2 లక్షలు, ఆదాయపు పన్ను శాఖలో 32,000 ఖాళీలున్నాయి.
'జామ్‌'కు 4 నగరాల్లో పరీక్ష కేంద్రాలు
ఈనాడు, హైదరాబాద్: ఐఐటీల్లో ఎమ్మెస్సీ, ఇంటిగ్రేటెడ్ పీహెచ్‌డీ కోర్సుల్లో ప్రవేశానికి ఉద్దేశించిన జాయింట్ అడ్మిషన్ టెస్ట్ ఫర్ ఎమ్మెస్సీ (జామ్)ను తెలుగు రాష్ట్రాల్లోని నాలుగు నగరాల్లో నిర్వహించనున్నారు. ఫిబ్రవరి 11న జరగనున్న ఈ పరీక్షకు తెలంగాణలోని హైదరాబాద్, వరంగల్‌లలో, ఆంధ్రప్రదేశ్‌లోని విజయవాడ, విశాఖపట్నం నగరాల్లో పరీక్ష కేంద్రాలను ఏర్పాటు చేస్తారు. పరీక్ష నిర్వహించే నగరాల సంఖ్యను ఇంకా పెంచాలని విద్యార్థులు కోరుతున్నారు. రాయలసీమలో విద్యాసంస్థల సంఖ్య దృష్ట్యా తిరుపతిలో పరీక్ష నిర్వహించాలని కోరుతున్నారు. పరీక్షకు దరఖాస్తు చేయడానికి తుది గడువు అక్టోబరు 10.
జేఈఈ అడ్వాన్సుడ్ వెబ్‌సైట్ ప్రారంభం
ఈనాడు, హైదరాబాద్: వచ్చే ఏడాది జేఈఈ అడ్వాన్సుడ్ నిర్వహణ బాధ్యతను తీసుకున్న ఐఐటీ కాన్పూర్ గురువారం(సెప్టెంబర్ 28) వెబ్‌సైట్‌ను ప్రారంభించింది. పరీక్షను ఆన్‌లైన్‌లో నిర్వహించనున్నట్లు పేర్కొంది. ఉదయం 9-12 గంటల మధ్య పేపర్-1, మధ్యాహ్నం 2 నుంచి సాయంత్రం 5 వరకు పేపర్-2 పరీక్షలు ఉంటాయని ఐఐటీ కాన్పూర్ అధికారులు పేర్కొన్నారు. ఇందులో వచ్చిన ర్యాంకు ఆధారంగా 23 ఐఐటీలతోపాటు మరికొన్ని సంస్థలు ప్రవేశాలు కల్పిస్తాయి. త్వరలో పూర్తిస్థాయి షెడ్యూల్‌ను ప్రకటిస్తామని వెబ్‌సైట్‌లో పేర్కొన్నారు.
www.jeeadv.ac.in/
వైద్య పోస్టుల పరీక్షలకు కొత్త తేదీలు
ఈనాడు, హైదరాబాద్: తెలంగాణ వైద్యశాఖలో సివిల్‌ అసిస్టెంట్‌ సర్జన్‌, డెంటల్‌ అసిస్టెంట్‌ సర్జన్‌, ట్యూటర్లు, లెక్చరర్లు (రేడియాలజీ), ఫిజియోథెరపిస్టుల నియామకానికి సంబంధించిన రాతపరీక్షల తేదీల్లో టీఎస్‌పీఎస్సీ మార్పులు చేసింది. అక్టోబరు 23, 24 తేదీల్లో పరీక్షలు నిర్వహించేలా నూతన షెడ్యూల్‌ను ప్రకటించింది. ఈ పరీక్షలన్నీ కంప్యూటర్‌ ఆధారితంగా నిర్వహిస్తామని తెలిపింది. పేపర్‌-1 కింద జనరల్‌ స్టడీస్‌, జనరల్‌ ఎబిలిటీస్‌, పేపర్‌-2 కింద సంబంధిత సబ్జెక్టు పరీక్ష నిర్వహిస్తారు.
ఇదీ షెడ్యూల్‌..
అక్టోబరు 23 : పేపర్‌-1 (జనరల్‌ స్టడీస్‌, జనరల్‌ ఎబిలిటీస్‌) సహాయ ఫిజియోథెరపిస్టు పోస్టులకు మినహా మిగతా పోస్టులకు ఈ పరీక్ష కామన్‌గా ఉంటుంది.
అక్టోబరు 23 : పేపర్‌ -2 (సంబంధిత సబ్జెక్టు) సివిల్‌ అసిస్టెంట్‌ సర్జన్‌ (40/2017)
అక్టోబరు 24 : పేపర్‌ -2 (సంబంధిత సబ్జెక్టు) సివిల్‌ అసిస్టెంట్‌ సర్జన్‌ (44/2017), డెంటల్‌ అసిస్టెంట్‌ సర్జన్‌, లెక్చరర్లు, ట్యూటర్లు
అక్టోబరు 24 : సహాయ ఫిజియోథెరపిస్టులు పేపర్‌ -1, పేపర్‌-2
పోలీసుశాఖలో 26 వేల ఖాళీల భర్తీకి ఏర్పాట్లు
* డీజీపీ అనురాగ్‌శర్మ వెల్లడి
గోదావరిఖని, న్యూస్‌టుడే: పోలీసుశాఖలో 26 వేల ఖాళీల భర్తీకి ఏర్పాట్లు చేస్తున్నట్లు తెలంగాణ రాష్ట్ర డీజీపీ అనురాగ్‌శర్మ తెలిపారు. పెద్దపల్లి జిల్లా గోదావరిఖనిలో ఒకటో పట్టణ పోలీసు స్టేషన్ అధునాతన భవన నిర్మాణానికి బుధవారం (సెప్టెంబరు 27) ఆయన భూమిపూజ చేసి, శిలాఫకాన్ని ఆవిష్కరించారు. ఈ సందర్భంగా మాట్లాడుతూ.. తమ శాఖ పరిధిలో 26 వేల ఖాళీలుండగా అందులో సుమారు 8 వేల ఖాళీలను మహిళలతో భర్తీ చేయనున్నామని చెప్పారు. మహిళలకు సంబంధించిన కేసుల విషయమై మహిళా పోలీసు అధికారులు, సిబ్బంది అవసరాలు పెరుగుతున్న దృష్ట్యా 33 శాతం రిజర్వేషన్ ప్రకారం వారిని ఉద్యోగాల్లోకి తీసుకోనున్నామని తెలిపారు. తెలంగాణ రాష్ట్రంలో ప్రస్తుతం 9 వేల మంది కానిస్టేబుళ్లు శిక్షణలో ఉన్నారన్నారు. రాష్ట్ర వ్యాప్తంగా శిథిలావస్థకు చేరిన పోలీస్టేషన్ భవనాల స్థానంలో కొత్తగా నిర్మించేందుకు ప్రణాళికలు సిద్ధం చేస్తున్నామని చెప్పారు. రామగుండం పోలీసు కమిషనరేట్ భవనానికి త్వరలోనే భూమిపూజ నిర్వహించనున్నట్లు డీజీపీ తెలిపారు.
క్యాట్‌కు 2.31 లక్షల దరఖాస్తులు
ఈనాడు, హైదరాబాద్: దేశవ్యాప్తంగా ఉన్న ఇండియన్ ఇన్‌స్టిట్యూట్ ఆఫ్ మేనేజ్‌మెంట్ల(ఐఐఎం)లో సీట్ల భర్తీకి నవంబరు 26న నిర్వహించనున్న కామన్ అడ్మిషన్ టెస్టు(క్యాట్)కు ఈసారి సుమారు 2.31 లక్షల మంది దరఖాస్తు చేశారు. అక్టోబరు 18వ తేదీ నుంచి అడ్మిట్ కార్డులను డౌన్‌లోడ్ చేసుకోవచ్చు. దేశంలోని 140 నగరాలు, పట్టణాల్లో పరీక్ష జరగనుంది. తెలంగాణలో హైదరాబాద్, వరంగల్, కరీంనగర్, ఆంధ్రప్రదేశ్‌లో విశాఖపట్నం, కాకినాడ, రాజమండ్రి, విజయవాడ, గుంటూరు, నెల్లూరు, తిరుపతి నగరాల్లో పరీక్షా కేంద్రాలను ఏర్పాటు చేస్తున్నారు. గత ఏడాది పరీక్షకు 2,32,434 మంది దరఖాస్తు చేశారు.
సీఏ పరీక్షలకు.. పక్కా వ్యూహం
సీఏ కోర్సుకు సంబంధించి కీలక పరీక్షల తరుణం దగ్గరపడుతోంది. నవంబరు నెలలో సీఏ-ఐపీసీసీ, సీఏ ఫైనల్‌ పరీక్షలు జరగబోతున్నాయి. వాటికి విద్యార్థులు ఎలా సన్నద్ధం కావాలి, సబ్జెక్టుల్లో తీసుకోవాల్సిన జాగ్రత్తలు, పునశ్చరణ విధానం, పాటించాల్సిన మెలకువలు తెలుసుకుందామా?
సీఏ కోర్సులోని అన్ని దశల్లోనూ ఐపీసీసీ కీలకమని చెప్పాలి. ఐపీసీసీ వరకూ పూర్తిచేసినా (లేదా) దానిలోని మొదటి గ్రూపు పూర్తిచేసినా మంచి ఉద్యోగాలు లభించే అవకాశముంది. సీఏ ఫైనల్‌ గురించి చెప్పాలంటే.. ఐపీసీసీ పూర్తిచేశాక ఆర్టికల్‌షిప్‌ సమయంలో సమయాన్ని సరిగా వినియోగించుకుని ప్రాక్టికల్‌గా నేర్చుకుంటున్న అంశాలను ఆకళింపు చేసుకోగలిగితే సీఏ ఫైనల్‌లో సగం విజయం సాధించినట్లే.
ఐపీసీసీ సబ్జెక్టులు- జాగ్రత్తలు
అకౌంటింగ్
* అకౌంటింగ్‌ స్టాండర్డ్స్‌ తప్పనిసరిగా చదవాలి.
* ప్రతి చాప్టర్‌లో ఒక ప్రాథమిక సమస్యను ఎంచుకుని సాధన చేయాలి. మిగతా సమస్యల్లోని ప్రముఖ అంశాలను (కీ అడ్జస్ట్‌మెంట్లు) హైలైట్‌ చేసుకోవాలి. ఇది పునశ్చరణకు బాగా ఉపయోగం.
* ప్రతి అంశాన్ని చదువుతున్నప్పుడు కాన్సెప్టుకే ప్రాధాన్యమివ్వాలి.
* వీలైనంతవరకూ ప్రతిరోజూ ఒక అకౌంటింగ్‌ స్టాండర్డ్‌ను చదవాలి, నేర్చుకోవాలి.
* చిన్న చిన్న అధ్యాయాల మీద (సెల్ఫ్‌ బాలెన్సింగ్‌ లెడ్జర్‌, ఇన్వెస్ట్‌మెంట్‌ అకౌంట్స్‌ మొదలైనవి) ఎక్కువ దృష్టి కేంద్రీకరించాలి.
* సమయం ఉంటే అమాల్గమేషన్‌ చాప్టర్‌కి కూడా ప్రాధాన్యమివ్వాలి.
* పరీక్ష రాసే సమయంలో అన్ని ప్రశ్నలకూ సమాధానాలు రాయడానికి సమయం సరిపోకపోవచ్చు. కాబట్టి వీలైనంత వేగంగా పరీక్ష రాస్తే మంచిది.
బిజినెస్‌ లాస్‌, ఎథిక్స్‌, కమ్యూనికేషన్‌
* ముందుగా కమ్యూనికేషన్‌, ఎథిక్స్‌ కాన్సెప్టులను పూర్తిచేయాలి.
* కంపెనీ లాలో ప్రాధాన్యం ఎక్కువగా ఉండే అంశాలైన షేర్‌ కాపిటల్‌, జనరల్‌ మీటింగ్‌, ప్రాస్పెక్టస్‌ వంటివి బాగా చదవాలి.
* పరీక్ష రాసేటప్పుడు సరిగా తెలిస్తే సెక్షన్‌ నంబర్లను మిళితం చేసి రాయాలి.
* కమ్యూనికేషన్‌, ఎథిక్స్‌లకు సంబంధించి పాత ప్రశ్నపత్రాల్లో తరచూ ఇస్తున్న ప్రశ్నలను చదవాలి.
* కంపెనీ లాలో కూడా చిన్న చిన్న అధ్యాయాలను బాగా చదవాలి.
* ఇతర లా (పీఎఫ్‌, గ్రాట్యుటీ, బోనస్‌ యాక్ట్‌) ప్రొసీజర్‌పై శ్రద్ధవహించాలి.
* ఎన్‌ఐ యాక్ట్‌కు సమయం లేకపోతే ఫీచర్స్‌, డాక్యుమెంట్స్‌ గురించి చదివితే చాలు.
కాస్ట్‌ అకౌంటింగ్‌, ఫైనాన్షియల్‌ మేనేజ్‌మెంట్‌
* ప్రాక్టీస్‌ మాన్యువల్‌లోని థియరీని చదవాలి.
* సమస్యలను బాగా సాధన చేయాలి.
* ఈ సబ్జెక్టుల్లో సమయపాలన ప్రముఖ పాత్ర వహిస్తుంది. కాబట్టి సమయాన్ని సరిగా వినియోగించుకోవాలి.
* ఫార్ములాలను గుర్తుపెట్టుకోవాలి.
* ఫైనాన్షియల్‌ మేనేజ్‌మెంట్‌లో కాపిటల్‌ బడ్జెటింగ్‌, వర్కింగ్‌ కాపిటల్‌ మేనేజ్‌మెంట్‌, రేషియో అనాలిసిస్‌లకూ, కాస్ట్‌ అకౌంటింగ్‌లో మార్జినల్‌ కాస్టింగ్‌, స్టాండర్డ్‌ కాస్టింగ్‌, ప్రాసెస్‌ కాస్టింగ్‌లకూ ప్రాధాన్యమివ్వాలి.
* పరీక్ష రాసేటప్పుడు థియరీని సరళమైన భాషలో రాయాలి. ప్రాబ్లమ్స్‌ చేసేటప్పుడు ప్రొసీజర్‌ను అర్థవంతంగా రాస్తూ, వర్కింగ్‌ నోట్స్‌ను తప్పనిసరిగా రాయాలి.
ఐపీసీసీకి సన్నద్ధమవండిలా!
* సీఏలో ఇది ముఖ్య దశ కాబట్టి ప్రణాళికాబద్ధంగా చదివితే ఈ కోర్సును మొదటి ప్రయత్నంలోనే సులువుగా పూర్తిచేయవచ్చు.
* శిక్షణలో వివరించే ఉదాహరణలు, చార్టులను తప్పక రాసుకోవాలి.
* పునశ్చరణ సమయంలో రన్నింగ్‌ నోట్స్‌, ప్రాక్టికల్‌ మాన్యువల్‌లను తప్పక చూసుకోవాలి.
* అన్ని సబ్జెక్టులకూ సంబంధించిన పుస్తకాలను ముందుగానే సమకూర్చుకోవాలి (ఉదా: ప్రాక్టీస్‌ మాన్యువల్స్‌, పాత ప్రశ్నపత్రాలు, రివిజన్‌ టెస్ట్‌ పేపర్లు, ఎంటీపీఎస్‌ మొదలైనవి).
* రోజుకు కనీసంగా రెండు సబ్జెక్టులను చదివేలా ప్రణాళిక సిద్ధం చేసుకోవాలి. వీలైనంతవరకూ ఆ రెండు సబ్జెక్టుల్లో ఒక థియరీ, మరోటి ప్రాక్టికల్‌ పేపర్‌ ఉండేలా చూసుకుంటే మేలు.
* కీలక పదాలను రాసుకోవడం, మెటీరియల్‌లో అండర్‌లైన్‌ గీసుకోవడం వంటివి చేసుకుంటే పునశ్చరణ సులువవుతుంది.
* మొదటి నుంచీ చదువుతున్న మెటీరియల్‌నే చివరి వరకూ కొనసాగించాలి. ఏడు సబ్జెక్టుల్లో ఏవైనా నాలుగింటిపై ఎక్కువ దృష్టి కేంద్రీకరిస్తే వాటిల్లో మంచి మార్కులను పొందవచ్చు.
సీఏ ఫైనల్‌- మెలకువలు
ఫైనాన్షియల్‌ రిపోర్టింగ్‌
* ఏదైనా ఒక ఆథర్‌ పుస్తకం, ప్రాక్టీస్‌ మాన్యువల్‌లను సమకూర్చుకోవాలి.
* ప్రతి చాప్టర్‌లో ఏదో ఒక ప్రాథమిక సమస్య పరిష్కార విధానాన్ని తెలుసుకుని, మిగతా వాటిల్లోని ముఖ్యమైన అంశాలు (అడ్జస్ట్‌మెంట్స్‌) వరకు సాధన చేస్తే సరిపోతుంది.
* ప్రతి చాప్టర్‌లో కాన్సెప్టులమీద అవగాహన ఏర్పరచుకోవాలి. ఉదా: వాల్యుయేషన్‌ ఆఫ్‌ గుడ్‌విల్‌
* అకౌంటింగ్‌ స్టాండర్డ్స్‌ మీద మంచి అవగాహన అవసరం. చిన్నచిన్న అధ్యాయాలనూ చదవాలి. ఉదా: వాల్యూ యాడెడ్‌ స్టేట్‌మెంట్స్‌, ఫైనాన్షియల్‌ రిపోర్టింగ్‌ మొ॥.
* సమయం అందుబాటులో ఉంటే కన్సాలిడేషన్‌ను కూడా చదవాలి లేదా తక్కువ ప్రాముఖ్యమిచ్చినా సరిపోతుంది.
స్ట్రాటజిక్‌ ఫైనాన్షియల్‌ మేనేజ్‌మెంట్‌
* డెరివేటివ్స్‌లో చాలా అంశాలున్నాయి. కాబట్టి వీలైనంతవరకూ దీనికి తుది ప్రాధాన్యమివ్వాలి.
* డివిడెండ్‌ పాలసీ, మెర్జర్స్‌ అండ్‌ అక్విజిషన్‌, బాండ్‌ వాల్యుయేషన్‌ వంటి చిన్న చిన్న అంశాలతో సన్నద్ధత ప్రారంభిస్తే మేలు.
* పోర్ట్‌ఫోలియో మేనేజ్‌మెంట్‌ అనే అంశం కేవలం ఫార్ములాల మీదే ఆధారపడి ఉంటుంది. కాబట్టి దీన్ని త్వరగా పూర్తి చేయవచ్చు.
* ఆ తరువాత ఇంటర్నేషనల్‌ ఫైనాన్స్‌, చివరగా డెరివేటివ్స్‌ను ఎంచుకోవాలి. థియరీకి మాత్రం ప్రాక్టీస్‌ మాన్యువల్‌ సరిపోతుంది.
అడ్వాన్స్‌డ్‌ ఆడిటింగ్‌ అండ్‌ ప్రొఫెషనల్‌ ఎథిక్స్‌
* ప్రాక్టీస్‌ మాన్యువల్‌ తప్పనిసరి. ముందుగా ప్రొఫెషనల్‌ ఎథిక్స్‌ను పూర్తిచేయాలి.
* రోజుకో ఆడిటింగ్‌ స్టాండర్డ్స్‌ చొప్పున చదవాలి. వీలైతే ఫ్లో చార్టులు వేసుకోవాలి.
* పరీక్షలో ప్రాక్టికల్‌ ప్రశ్నలనే ఎక్కువగా అడుగుతారు. కాబట్టి వాటిపైనే దృష్టి కేంద్రీకరించాలి.
సీఏ ఫైనల్‌ సన్నద్ధత ఇలా!
* సమస్యలను సాధన చేస్తున్నప్పుడే అనవసరమనుకున్న లెక్కలను తీసేస్తూ వెళ్లడం వల్ల పునశ్చరణ సులువవుతుంది.
* ఫార్ములాలను ఒకచోట రాసి ఉంచుకోవాలి. వీలునుబట్టి ఫ్లో చార్టులను వేసుకోవడమూ మంచిదే.
* గత 5 సంవత్సరాల పాత ప్రశ్నపత్రాలను సాధన చేస్తే మంచిది.
* ప్రాక్టీస్‌ మాన్యువల్‌లోకి సమస్యలన్నింటినీ అభ్యాసం చేయాలి. ఇటీవల చేసిన సవరణలను తప్పనిసరిగా చదవాలి.
* ఉన్న ఎనిమిదింటిలో నాలుగు సబ్జెక్టులపై ఎక్కువ దృష్టి కేంద్రీకరిస్తే వాటిల్లో ఎక్కువ మార్కులు సాధించే వీలుంటుంది.
* ప్రాక్టీస్‌ మాన్యువల్‌లోని ప్రశ్నలకు జవాబులను ఎలా సూచించారో నిశితంగా పరిశీలించాలి.
* మొదటి నుంచీ చదువుతున్న మెటీరియల్‌ను చివరివరకూ కొనసాగించాలి.
ఏమి రాశారన్నదే ముఖ్యం!
సీఏ పరీక్షల్లో అఖిల భారత ర్యాంకులు సాధించినవారు చెపుతున్న సూచనలు ఇవిగో...
* సీఏ కోర్సులో సమయస్ఫూర్తి, తార్కిక ఆలోచనావిధానం చాలా అవసరం. అలా ఆలోచిస్తేనే పరీక్షల్లో అడిగిన ఎటువంటి ప్రశ్నకైనా సరైన సమాధానం రాసే వీలుంటుంది. సబ్జెక్టుపై పూర్తి అవగాహనతో చదవాలి తప్ప, బట్టీపట్టి చదవకూడదు. పరీక్షలో ప్రశ్నలు ఒకటికి రెండుసార్లు చదివి సమాధానాలను డొంకతిరుగుడు లేకుండా సూటిగా రాయాలి.
* ఎంత రాశారన్న దానికంటే ఏం రాశారు, సమాధాన విధానం ఎలా ఉందన్నదానికే ప్రాధాన్యం!
* చదివేటప్పుడు విశ్లేషణాత్మక, సమయస్ఫూర్తి అనేవి చాలా అవసరం. ఇలాంటి గుణాలను అలవర్చుకుంటే పరీక్షల్లో సునాయాసంగా విజయం సాధించవచ్చు.
* రోజుకు ఎంతసేపు చదివామని కాదు, అందులో నాణ్యత సమయం ఎంతన్నదే లెక్క. తెల్లవారుజామున చదవడం బాగా ఉపయోగపడుతుంది.
* ప్రతి సబ్జెక్టులో కనీస మార్కులతోపాటు మొత్తంగా చూసినపుడు అగ్రిగేట్‌ పొంది ఉండాలి. అప్పుడే పాస్‌ అయినట్లు. అందువల్ల కనీసం ఒకటి రెండు సబ్జెక్టుల్లో అయినా ప్రదర్శన బాగుండేలా చూసుకోవాలి. అప్పుడే విజయం సులువవుతుంది.
* తేలికగా భావించే సబ్జెక్టుల్లో మంచి మార్కులను సాధించే ప్రయత్నం చేయాలి. అప్పుడు కష్టంగా ఉన్నవాటిల్లో కనీస మార్కులు తెచ్చుకున్నా అగ్రిగేట్‌ దెబ్బతినదు. అంతిమంగా మంచి ఫలితాన్ని పొందవచ్చు.
* సీఏ లాంటి వృత్తివిద్యాకోర్సులో ప్రశ్నల కఠినతా శాతం ఎక్కువ. కాబట్టి చదివిన అంశాలనే కనీసం మూడుసార్లు పునశ్చరణ చేసుకునేలా ప్రణాళికలు సిద్ధం చేసుకోవాలి.
* ఈ కోర్సు పూర్తిచేసినవారికి భావవ్యక్తీకరణ నైపుణ్యాలు కూడా తప్పనిసరి. కాబట్టి కోర్సు చదువుతున్న సమయంలో సెమినార్లు, వక్తృత్వ పోటీలు వంటి వాటిల్లో పాల్గొనగలిగితే ఈ నైపుణ్యాలు పెంచుకోవచ్చు.
* ఆర్టికల్‌షిప్‌లో లభించే ప్రాక్టికల్‌ విజ్ఞానం సీఏ ఫైనల్‌ కోర్సుకూ, కోర్సు పూర్తయ్యాక చేయబోయే ప్రాక్టీసు, ఉద్యోగాలకూ చాలా అవసరం. కాబట్టి ఆర్టికల్‌షిప్‌ను శ్రద్ధగా, ఆసక్తిగా చేయాలి.
* లా పేపర్‌కు బేర్‌ యాక్ట్‌ చదివితే లాలోని ప్రొవిజన్స్‌ను బాగా అర్థం చేసుకోవచ్చు.
* ఫైనాన్షియల్‌ రిపోర్టింగ్‌, ఫైనాన్షియల్‌ మేనేజ్‌మెంట్‌, కాస్టింగ్‌ వంటి పేపర్లకు సన్నద్ధమయ్యేప్పుడు చదవడంకన్నా పెన్‌, పేపర్‌ విధానంలో సాధన తప్పనిసరి.
- MSN మోహ‌న్, మాస్ట‌ర్ మైండ్‌
జేఏఓ పోస్టుల ఆహ్వానం
* మంత్రి గంటా శ్రీనివాసరావు
భారత సంచార నిగమ్‌ లిమిటెడ్‌ (బీఎస్‌ఎన్‌ఎల్‌) 996 జూనియర్‌ అకౌంట్స్‌ ఆఫీసర్స్‌ (జేఏఓ) పోస్టుల ప్రకటన ఇటీవల విడుదలయింది. ఇది కామర్స్‌ పోస్టుగ్రాడ్యుయేట్‌లకూ; సీఏ, ఐసీడబ్ల్యూఏఐ, సీఎస్‌లను పూర్తిచేసినవారికీ సువర్ణావకాశమని చెప్పవచ్చు. దీనికి సంబంధించిన పరీక్షలను ఆంగ్ల మాధ్యమంలో ఆన్‌లైన్‌లో నిర్వహిస్తారు. ఈ పరీక్ష తీరుతెన్నులూ, విజయానికి వేసుకునే ప్రణాళికల గురించి తెలుసుకుందాం!
ఆకర్షణీయమైన వేతనం, జాతీయస్థాయిలో పనిచేసే అవకాశం, ప్రభుత్వరంగ కంపెనీని మంచిస్థాయికి తీసుకువెళ్ళడంలో తమవంతు పాత్ర పోషించే అవకాశం మొదలైనవి జేఏఓ ఉద్యోగం సాధించడానికి ప్రోత్సాహకాలు. ఈ ఉద్యోగ స్వభావం సంస్థ లావాదేవీలనూ, సరైన లెక్కలనూ రాయటం. అందుకని దీనికి పోటీపడే అభ్యర్థులకు అకౌంటింగ్‌కు సంబంధించిన అన్ని భావనలూ, సూత్రాలపై అవగాహన అవసరమవుతుంది. br> ఆన్‌లైన్‌లో రిజిస్ట్రేషన్‌, దరఖాస్తు సమర్పించే ప్రక్రియ మొదలైంది. అక్టోబరు 15 వరకూ కొనసాగుతుంది. జేఏఓ పరీక్షను ఆన్‌లైన్‌లో నవంబరు 5 నుంచి నిర్వహిస్తారు. ఈ సందర్భంగా సిలబస్‌, సన్నద్ధతలో పాటించవలసిన మెలకువలను పరిశీలిద్దాం!
అర్హతలు:
బీఎస్‌ఎన్‌ఎల్‌ జేఏఓ పరీక్ష రాయాలనుకునే అభ్యర్థులు ఎంకాం/సీఏ /ఐసీడబ్ల్యూఏఐ/ సీఎస్‌లలో ఏదో ఒకటి దేశంలో గుర్తింపు పొందిన యూనివర్శిటీలు/ సంస్థల నుంచి 1 జనవరి 2017 నాటికి అర్హత సాధించి ఉండాలి. అభ్యర్థుల వయసు 1 జనవరి 2017 నాటికి ఓసీ అభ్యర్థులకు 30 సంవత్సరాలకు మించకుండా ఉండాలి. గరిష్ఠ వయః పరిమితి ఓబీసీ వారికి 33 సం॥; ఎస్‌సీ, ఎస్‌టీ అభ్యర్థులకు 35 సం॥. బీఎస్‌ఎన్‌ఎల్‌ ఉద్యోగులకు 5 సం॥ సడలింపు ఇచ్చారు. అంటే వారికి 35 సం॥ లోపు ఉండాలి. వికలాంగులకు 10 సం॥ పైబడి సడలింపు ఇచ్చారు.
ఆన్‌లైన్‌ రిజిస్ట్రేషన్‌:
జేఏఓ పరీక్ష రాయాలనుకునే అభ్యర్థులు బీఎస్‌ఎన్‌ఎల్‌ పోర్టల్‌ అయిన www.externalexam.bsnl.co.in కు లాగిన్‌ అయి ముందుగా రిజిస్ట్రేషన్‌ చేసుకోవాలి. ఈ రిజిస్ట్రేషన్‌ ప్రక్రియ 11 సెప్టెంబర్‌ 2017 న మొదలైంది. ఇది 15 అక్టోబర్‌ 2017 వరకూ కొనసాగుతుంది. రిజిస్ట్రేషన్‌ చేసుకునేటపుడు అభ్యర్థులు జాగ్రత్తగా వ్యవహరించాలి.
* ముందుగా వారు ఏ సర్కిల్‌ నుంచి పరీక్ష రాయదలచుకున్నారో నిర్ణయించుకోవాలి.
* సర్కిల్‌ను ఎంపిక చేసుకునేముందు ఆ సర్కిల్‌లో కేటగిరీల వారీగా మొత్తం ఎన్ని పోస్టులు ఉన్నాయనేది నిర్ధారించుకోవాలి.
* అభ్యర్థి ఎంపిక చేసుకున్న సర్కిల్‌లోని పోస్టుల సంఖ్య, కటాఫ్‌ ఆధారంగా ఉద్యోగం అభించే అవకాశం ఉంటుంది.
* అభ్యర్థి ఒక సర్కిల్‌ను ఎంపిక చేసుకొని రిజిస్ట్రేషన్‌ చేసుకున్నాక మార్చుకోవడానికి అవకాశం ఉండదు.
బీఎస్‌ఎన్‌ఎల్‌కు దేశవ్యాప్తంగా మొత్తం 28 సర్కిళ్ళు ఉన్నాయి. వీటన్నింటిలో కలిపి మొత్తం 996 జేఏఓ పోస్టులు. వీటిలో అత్యధికంగా 135 పోస్టులు మహారాష్ట్ర సర్కిల్‌లో ఉండగా, 72 పోస్టులు ఆంధ్రప్రదేశ్‌ సర్కిల్‌లో, 71 పోస్టులు గుజరాత్‌ సర్కిల్‌లో ఉన్నాయి. అయితే తెలంగాణా సర్కిల్‌లో కేవలం 19 పోస్టులే ఉన్నాయి. కాబట్టి అభ్యర్థులు తాము పనిచేయడానికి సంసిద్ధంగా ఉండేదీ, ఎక్కువ సంఖ్యలో పోస్టులు ఉండేదీ అయిన సర్కిల్‌ను ఎంపిక చేసుకోవడం శ్రేయస్కరం. (వివిధ సర్కిల్‌లో పోస్టుల సంఖ్య కోసం నోటిఫికేషన్‌ చూడండి.)
*ఫీజు:
అభ్యర్థులు ఆన్‌లైన్‌లో రిజిస్ట్రేషన్‌ చేసుకునేటప్పుడు నిర్ణీత ఫీజును చెల్లించాలి. ఇది ఓసీ, ఓబీసీ అభ్యర్థులకు రూ॥ 1000 కాగా, ఎస్‌సీ, ఎస్‌టీ అభ్యర్థులకు రూ॥ 500గా ఉంది. ఈ ఫీజును నెట్‌ బ్యాంకింగ్‌, క్రెడిట్‌ కార్డు, డెబిట్‌ కార్డుల ద్వారా చెల్లించవచ్చు.
ఆన్‌లైన్‌ రిజిస్ట్రేషన్‌కు సమయం ఉన్నప్పటికీ చివరలో తలెత్తే సాంకేతిక సమస్యలను అదిగమించడానికి అభ్యర్థులు ముందుగా రిజిస్ట్రేషన్‌ చేసుకోవడం చాలా మంచిది.
సిలబస్‌ ఏ తీరు?
బీఎస్‌ఎన్‌ఎల్‌ జేఏఓ ఎంపికకు సంబంధించిన పరీక్షకు రెండు పేపర్లను నిర్దేశించారు. అభ్యర్థులు పరీక్షలను ఆంగ్ల మాధ్యమంలో నిర్ణీత పరీక్ష కేంద్రాల నుంచి రాయవలసి ఉంటుంది. మొదటి పేపరుకు జనరల్‌ ఇంగ్లిష్‌, జనరల్‌ ఆప్టిట్యూడ్‌/అవేర్‌నెస్‌నూ, రెండో పేపరుకు కామర్స్‌ నుంచి ఫైనాన్షియల్‌ అండ్‌ కమర్షియల్‌ అకౌంట్స్‌ను నిర్దేశించారు. వీటి సిలబస్‌, సన్నద్ధమయ్యే విధానం ఎలా ఉండాలో చూద్దాం.
1) జనరల్‌ ఇంగ్లిష్‌, జనరల్‌ ఆప్టిట్యూడ్‌/ అవేర్‌నెస్‌:
ఈ పేపర్‌ను 150 మార్కులకు నిర్వహిస్తారు. రెండు విభాగాలుగా ఉంటుంది. మొదటి విభాగంలో జనరల్‌ ఇంగ్లిషు నుంచి 100 మార్కులకు ప్రశ్నలు ఆబ్జెక్టివ్‌ తరహాలో కానీ, షార్ట్‌ ఆన్సర్‌ రూపంలో కానీ ఉండవచ్చు. అభ్యర్థి ఆంగ్ల ప్రావీణ్యాన్ని పరీక్షించడానికి వివిధ అంశాల నుంచి ప్రశ్నలను ఇస్తారు. ముఖ్యంగా కాంప్రహెన్షన్‌ ఆఫ్‌ ప్యాసేజ్‌, గ్రామర్‌లోని వివిధ అంశాలు, ఇంగ్లిష్‌ యూసేజ్‌, ఒకాబులరీ మొదలైనవాటిని నిర్దేశించారు. ప్రామాణిక ఇంగ్లిష్‌ పుస్తకాలను తీసుకొని గ్రామర్‌, ఒకాబులరీలపై పట్టు సాధించాలి. వివిధ అంశాలను డిగ్రీ, పీజీ స్థాయిలో చదవాలి. మోడల్‌ పేపర్‌లను సాధన చేయాలి.
రెండో విభాగంలో జనరల్‌ ఆప్టిట్యూడ్‌/అవేర్‌నెస్‌ ప్రశ్నలను 50 మార్కులకు ఇస్తారు. దీనిలో జాతీయ, అంతర్జాతీయ స్థాయిలో కరెంట్‌ అఫైర్స్‌ ఇస్తారు. అభ్యర్థులు పరీక్షకు ముందు 6- 8 నెలల ముందు నుంచీ కరెంట్‌ అఫైర్స్‌ చదవాలి. ప్రతిరోజూ దినపత్రిక చదువుతూ ముఖ్యమైన అంశాలను నోట్‌ చేసుకుని చదవాలి. వీటితో పాటు ఇండియన్‌ పాలిటీ, ఇండియన్‌ ఎకానమీ, జనరల్‌ మెంటల్‌ ఎబిలిటీ, రీజనింగ్‌, క్వాంటిటేటివ్‌ టెక్నిక్‌ మొదలైనవాటిని నిర్దేశించారు. వీటికి సంబంధించిన మార్కెట్‌లో అందుబాటులో ఉండే ప్రామాణిక పుస్తకాలను చదవాలి. ప్రస్తుతం ఇండియన్‌ ఎకానమీలో ప్రధానంగా పెద్దనోట్ల రద్దు, జీఎస్టీ మొదలైన సంస్కరణలను లోతుగా చదవాలి. ఉద్యోగ విజయంలో మొదటి పేపర్‌ కూడా ప్రముఖ పాత్ర వహిస్తుందని అభ్యర్థులు గుర్తించాలి.
2) ఫైనాన్షియల్‌ అండ్‌ కమర్షియల్‌ అకౌంట్స్‌:
దీనిలో కామర్స్‌ నుంచి దాదాపు 6 అంశాలను చేర్చారు. మొత్తం 150 ప్రశ్నలు. ఒక్కొక్కటి 2 మార్కుల చొప్పున 300 మార్కులకు నిర్వహిస్తారు. అంటే ఒక్కొక్క సబ్జెక్టు నుంచి దాదాపు 25 ప్రశ్నలు అడిగే అవకాశం ఉంటుంది. దీన్ని దృష్టిలో పెట్టుకొని ప్రతి సబ్జెక్టునూ ప్ర¾ణాళికాబద్ధంగా, పూర్తి స్థాయిలో చదవాలి. సంబంధిత సిలబస్‌ను చూద్దాం..
అడ్వాన్స్‌డ్‌ అకౌంటింగ్‌: దీనిలో ముఖ్యంగా కంపెనీ అకౌంట్స్‌ పరిచయం- వాటాలు, డిబెంచర్స్‌, కంపెనీ ఫైనల్‌ అకౌంట్స్‌, ఫండ్స్‌ ఫ్లో అండ్‌ క్యాష్‌ ఫ్లో స్టేట్‌మెంట్స్‌ చేర్చారు. అభ్యర్థులు దీనిలో కంపెనీ ముగింపు లెక్కలకు సంబంధించిన ముఖ్యమైన అంశాలు, ఇటీవల వచ్చిన ప్రధాన మార్పులు, 2013 కంపెనీల చట్టంలోని ముఖ్యమైన అంశాలను లోతుగా చదవాలి. ప్రాబ్లమ్స్‌ను సాధన చేస్తూ చదవాలి.
ఆడిటింగ్‌: ఉద్యోగం సాధించడంలో కీలక పాత్ర వహించే సబ్జెక్టుల్లో ఆడిటింగ్‌ ఒకటి. దీనిలో ఆడిటింగ్‌ నేచర్‌, ఆబ్జెక్టివ్స్‌, బేసిక్‌ ప్రిన్సిపుల్స్‌, ఆడిటింగ్‌ టెక్నిక్స్‌, ఫిజికల్‌ వెరిఫికేష¯, ఎగ్జామినేషన్‌ ఆఫ్‌ డాక్యుమెంట్స్‌, వోచింగ్‌, డైరెక్ట్‌ కన్ఫర్మేషన్‌, అనలిటికల్‌ రివ్యూ, ఆడిట్‌ ప్లానింగ్‌, ఆడిట్‌ ప్రోగ్రామ్స్‌, వర్కింగ్‌ పేపర్స్‌, ఆడిట్‌ ప్రాసెస్‌, వాల్యుయేషన్‌ ఆఫ్‌ ఇంటర్నల్‌ కంట్రోల్‌, ఆడిట్‌ టైప్స్‌ తదితరాలను నిర్దేశించారు. అభ్యర్థులు ఈ సబ్జెక్టులో ముఖ్యమైన భావనలూ, వివిధ సెక్షన్లూ, సం॥రాలను, కనిష్ఠ-గరిష్ఠ సంఖ్య, ఆడిటింగ్‌ స్టాండర్డ్స్‌ను విశ్లేషిస్తూ చదవాలి. ఈ మధ్యకాలంలో సంభవించిన మార్పులను గమనించాలి.
ఫైనాన్షియల్‌ మేనేజ్‌మెంట్‌- యాన్‌ ఓవర్‌వ్యూ: దీనిలో ముఖ్యంగా నిర్దేశించిన అంశాలు- గోల్స్‌ ఆఫ్‌ ఫైనాన్షియల్‌ మేనేజ్‌మెంట్‌, కీ ఆక్టివిటీస్‌ ఆఫ్‌ ఫైనాన్షియల్‌ మేనేజ్‌మెంట్‌, రిలేషన్‌షిప్‌ ఆఫ్‌ ఫైనాన్స్‌ టు అకౌంటింగ్‌ అండ్‌ ఆడిట్‌, ఫైనాన్స్‌ ఫంక్షన్స్‌ మొదలైనవి. దీనిలో అభ్యర్థులు వివిధ ఫైనాన్షియల్‌ మేనేజ్‌మెంట్‌ భావనలు, లక్షణాలు, ప్రయోజనాలు, పరిమితులను విశ్లేషిస్తూ చదవాలి. కీలక పాయింట్లను నోట్‌ చేసుకోవాలి.
ఫైనాన్షియల్‌ స్టేట్‌మెంట్స్‌: జేఏఓ సాధించడంలో అత్యంత కీలకపాత్ర వహించే సబ్జెక్టు ఇది. దీనిలో అకౌంటింగ్‌కు సంబంధించిన ప్రాథమిక భావనలు, బ్యాలన్స్‌షీట్‌, ప్రాఫిట్‌ - లాస్‌ అకౌంట్‌, సోర్సెస్‌ అండ్‌ యూజెస్‌ ఆఫ్‌ ఫైనాన్షియల్‌ స్టేట్‌మెంట్స్‌, అనాలిసిస్‌ ఆఫ్‌ ఫైనాన్షియల్‌ పెర్‌ఫార్మెన్స్‌, ఫైనాన్షియల్‌ రేషియోస్‌ (నిష్పత్తులు), అప్లికేషన్‌ ఆఫ్‌ ఫైనాన్షియల్‌ అనాలిసిస్‌, ప్రాబ్లమ్స్‌ ఇన్‌ ఫైనాన్షియల్‌ స్టేట్‌మెంట్స్‌ అండ్‌ అనాలిసిస్‌; బ్రేక్‌ ఈవెన్‌ అనాలిసిస్‌, లివరేజేస్‌ మొదలైనవి చేర్చారు. అభ్యర్థులు ఫైనాన్షియల్‌ స్టేట్‌మెంట్స్‌ తయారుచేయడంలో ముఖ్యమైన అంశాలూ, సర్దుబాటు అంశాలు, నిష్పత్తులు, బ్రేక్‌ ఈవెన్‌ అనాలిసిస్‌, లివరేజెస్‌కు సంబంధించిన వివిధ సూత్రాలను చదవాలి. దాంతో పాటు ప్రతి పద్ధతిలో ప్రాబ్లమ్స్‌ను సాధన చేయాలి. పరీక్షలో దీని నుంచి ఎక్కువగా ప్రాబ్లమ్స్‌ అడిగే అవకాశం ఉంది.
ఫైనాన్షియల్‌ మేనేజ్‌మెంట్‌ ఇన్‌ పబ్లిక్‌ సెక్టార్‌ ఎంటర్‌ప్రైజెస్‌: ఈ సబ్జెక్టులో క్యాపిటల్‌ బడ్జెటింగ్‌, లాంగ్‌ టర్మ్‌ ఫైనాన్షియల్‌, వర్కింగ్‌ క్యాపిటల్‌ మేనేజ్‌మెంట్‌, మెమొరాండమ్‌ ఆఫ్‌ అండర్‌స్టాండింగ్‌, ఫైనాన్షియల్‌ మేనేజ్‌మెంట్‌, అండ్‌ కంట్రోల్‌లను నిర్దేశించారు. అభ్యర్థులు దీనిలో ప్రతి పద్ధతికి సంబంధించిన సూత్రాలను చదువుతూ ఒకటి లేదా రెండు ప్రాబ్లమ్స్‌ను సాధన చేయాలి.
బేర్‌ యాక్ట్స్‌: జేఏఓకు సంబంధించిన సిలబస్‌లో ఇది కూడా ముఖ్యమైనది. దీనిలో ముఖ్యంగా కంపెనీల చట్టం 1956 (సవరణలతో), కాంట్రాక్టు చట్టం, భాగస్వామ్య చట్టం, గ్రాట్యుటీ పేమెంట్‌ చట్టం, కన్‌స్యూమర్‌ ప్రొటెక్షన్‌చట్టాలను చేర్చారు. అభ్యర్థులు వివిధ చట్టాలపై ఎంత పట్టు సాధిస్తే అన్ని మార్కులు స్కోరు చేయవచ్చు. గమనించవలసిన ముఖ్యమైన అంశం- కంపెనీల చట్టం 1956 తోపాటు ఇటీవల రూపొందించిన కంపెనీల చట్టం 2013నూ, వివిధ సవరణలనూ లోతుగా చదవాలి. ముఖ్యమైన ఇతర చట్టాలు, వాటిని రూపొందించిన సం॥రాలు, ముఖ్యమైన సెక్షన్లు, వివిధ భావనలు, వాటిలో సవరణలను విశ్లేషిస్తూ చదివితే మంచి మార్కులు పొందవచ్చు.
వీటితోపాటు అభ్యర్థులకు కామర్స్‌ సంబంధిత ఇతర సబ్జెక్టులు కాస్ట్‌ అకౌంటింగ్‌, టాక్సేషన్‌, ఇతర సబ్జెక్టులపై కొంత అవగాహన ఉండాలి. ఇంకా ముగింపు లెక్కలకు సంబంధించిన అంశాలపై లోతుగా చదువుతూ పూర్తి అవగాహన పొందాలి. వివిధ చట్టాలు, సం॥, సెక్షన్లు, కనిష్ఠ-గరిష్ఠ సంఖ్య, స్టాండర్డ్స్‌, ఇటీవల వచ్చిన మార్పులను చదువుతూ ముఖ్యమైనవి నోట్‌ చేసుకోవాలి. అభ్యర్థులు ముఖ్యంగా ప్రాబ్లమ్స్‌ బాగా అభ్యాసం చేయాలి. గతంలోని జేఏఓ పేపర్లను, వీలైనన్ని మోడ¿ల్‌ పేపర్లనూ సాధన చేయడంలోనే విజయం దాగివుంటుందని అభ్యర్థులు గమనించాలి. ప్రతిరోజూ 10- 12 గంటల వరకు ప్రణాళికాబద్ధంగా చదువుతుండాలి. మొత్తం సిలబస్‌ను కనీసం మూడు పర్యాయాలు సమగ్రంగా పునశ్చరణ (రివిజన్‌) చేసినట్లయితే కచ్చితంగా విజయం వర్తిస్తుంది. స్వామి వివేకానంద చెప్పినట్లు ‘నిరŒంతరం వెలిగే సూర్యుణ్ని చూసి చీకటి భయపడుతుంది, అలాగే నిరంతరం శ్రమించేవారిని చూసి ఓటమి భయపడుతుంది’. కాబట్టి అభ్యర్థులు నిరంతరం శ్రమించి విజయాన్ని పొందాలి.
చదవాల్సిన పుస్తకాలు
1. For English Grammer & Vocabulary -Wren & Martin (Revised Edition) Raymond Murphy
2. Advanced Accounting- Jain & Narang & S.N. Maheswari
3. Auditing- R.G.Saxena & Kamal Gupta
4. Financial Management- An overview- I.M. Pondey & Prasanna Chandra
5. Financial Statements- Jain & Narang, R.L Guptha
6. Financial Management in Public sector Enterprises- Sarma & Shashi.k .Gupta & Prasanna Chandra
7. Bare Acts (Business laws)- Kapoor ND, S.N. Maheshwari
- డాక్ట‌ర్ ఎం.మల్లారెడ్డి
వచ్చే ఏడాదిలోగా మరో డీఎస్సీ
* మంత్రి గంటా శ్రీనివాసరావు
విశాఖప‌ట్నం: రాష్ట్రంలోని 45 వేల పాఠశాలల్లో రూ.5 వేల కోట్లతో మౌలిక వసతులు మెరుగుపరుస్తున్నామని ఆంధ్రప్రదేశ్‌ విద్యాశాఖమంత్రి గంటా శ్రీనివాసరావు అన్నారు. సెప్టెంబర్ 24న 2015-16 విద్యా సంవత్సరంలో ప్రతిభ కనబరిచిన విద్యార్థులకు విశాఖ జిల్లా పరిషత్‌ కార్యాలయంలో జరిగిన ఓ కార్యక్రమంలో ట్యాబ్‌లు పంపిణీ చేశారు. ఈ సందర్భంగా మంత్రి మాట్లాడుతూ.. వచ్చే ఏడాది మరో డీఎస్సీ నిర్వహించి ఖాళీగా ఉన్న ఉపాధ్యాయుల పోస్టులను భర్తీ చేస్తామన్నారు.
ప్రాంగణ ప్రభ మనదే!
* జేన్‌టీయూ, సీఐఐల మధ్య కుదిరిన ఒప్పందం
* దేశంలో 20 శాతం ప్రాంగణ ఉద్యోగాలు ఏపీ, తెలంగాణ విద్యార్థులవే
* ఇంజినీరింగ్‌లోనే అత్యధికం
* 2016-17లో నియామకాలపై ఏఐసీటీఈ నివేదిక
ఈనాడు - హైదరాబాద్‌: దేశవ్యాప్తంగా ప్రాంగణ నియామకాల్లో ఎంపికవుతున్న వారిలో 16-18 శాతం మంది తెలుగు రాష్ట్రాల విద్యార్థులే ఉంటున్నారు. ఇతర రాష్ట్రాల్లో చదువుకొని ఎంపికైన వారినీ కలుపుకుంటే ఆ సంఖ్య 20 శాతానికి తగ్గదని అంచనా. అఖిల భారత సాంకేతిక విద్యా మండలి (ఏఐసీటీఈ) తాజాగా దేశవ్యాప్తంగా ప్రాంగణ నియామకాలపై నివేదిక విడుదల చేసింది. ఆ గణాంకాలను పరిశీలిస్తే.. ప్రాంగణ ఉద్యోగాల్లో ఐదో వంతు తెలంగాణ, ఏపీ విద్యార్థులు దక్కించుకుంటున్నారని స్పష్టమవుతోంది.
* దేశవ్యాప్తంగా ఐదేళ్ల క్రితం.. అంటే 2012-13 విద్యా సంవత్సరంలో అన్ని కోర్సుల్లో కలిపి 5,58,946 మంది ప్రాంగణ నియామకాల్లో ఉద్యోగాలు పొందగా.. 2015-16 వరకు ఆ సంఖ్య పెరుగుతూ వచ్చింది. 2015-16లో అత్యధికంగా 6,97,153 మంది ఉద్యోగాలకు ఎంపికయ్యారు. అయితే గత ఏడాది మాత్రం దాదాపు 60 వేల మంది తగ్గి ఆ సంఖ్య 6,38,128కి పడిపోయింది. అంటే 2015-16 కంటే 2016-17లో 8.5 శాతం ఉద్యోగాలు తగ్గాయి. తెలంగాణలో 2014-15 నుంచే తగ్గుకుంటూ రాగా... ఆంధ్రప్రదేశలో మాత్రం 2016-17లో స్వల్పంగా ప్రాంగణ నియామకాలు తగ్గాయని ఏఐసీటీఈ నివేదిక వెల్లడించింది.
* మొత్తం ప్రాంగణ నియామకాల్లో తెలంగాణ 7.4 శాతం, ఏపీ 8.5 శాతం వాటా దక్కించుకుంటున్నాయి. బీటెక్‌లో చూస్తే అది వరుసగా 8 శాతం, 10.4 శాతంగా ఉంది. అంటే దేశంలోని మొత్తం ఉద్యోగాల్లో తెలుగు విద్యార్థులు 16 శాతం మంది ఉండగా.. బీటెక్‌లో అది 18.4 శాతంగా ఉండటం విశేషం. అయితే తెలుగు విద్యార్థులు ఐఐటీ, ఎన్‌ఐటీ, ట్రిపుల్‌ఐటీలతోపాటు డీమ్డ్‌ విశ్వవిద్యాలయాల్లో అధిక సంఖ్యలో చదువుతున్నారు. వారినీ కలుపుకుంటే దేశంలోని ప్రాంగణ ఉద్యోగాల్లో 20 శాతం తెలుగు యువతే కైవసం చేసుకుంటోందని నిపుణులు విశ్లేషిస్తున్నారు.
బీటెక్‌లోనూ అదే పరిస్థితి.. ఇక కేవలం బీటెక్‌ కోర్సుల్లో చూసినా దేశంలో గత సంవత్సరం నియామకాలు తగ్గాయి. తెలంగాణ కంటే ఏపీలో 2013-14 వరకు ప్రాంగణ నియామకాలు కొద్దిగా తక్కువగా ఉండగా 2014-15 నుంచి తెలంగాణ కంటే ఏపీలో ఎక్కువ నియామకాలు జరిగినట్లు ఏఐసీటీఈ గణాంకాలు చెబుతున్నాయి. అంతేకాకుండా తెలంగాణలో 2015-16 కంటే గత ఏడాది ప్రాంగణ ఉద్యోగాలు తగ్గగా ఏపీలో మాత్రం స్వల్పంగా పెరిగాయి.
గత ఏడాది ప్రాంగణ నియామకాలు తగ్గాయి.. గత ఐదు సంవత్సరాలుగా పెరుగుతూ వస్తున్న ప్రాంగణ నియామకాలకు గత ఏడాది బ్రేక్‌ పడింది. అంతకుముందు ఏడాదితో పోల్చుకుంటే గత సంవత్సరం (2016-17) 8.5 శాతం తగ్గాయి. ఇంజినీరింగ్‌ కళాశాలల్లోనూ ఇదే పరిస్థితి. దేశవ్యాప్తంగా 2012-13 విద్యా సంవత్సరం నుంచి 2016-17 వరకు వివరాలను సేకరించి నివేదికలో ఆయా అంశాలను ఏఐసీటీఈ పొందుపరిచింది. తెలంగాణ 2014లో ఏర్పడినప్పటికీ 2012-13 నుంచే ఏపీ, తెలంగాణలవారీగా వేర్వేరుగా నివేదికలో వివరాలిచ్చారు.
ఈ ఏడాదీ ఇంకా తగ్గొచ్చు.. ఈ ఏడాది ఐటీ కంపెనీలు చేపట్టే ప్రాంగణ నియామకాలు తగ్గొచ్చని ఇప్పటికే నాస్కామ్‌ అంచనా వేసింది. ఇంజినీరింగ్‌ కళాశాలల్లో పరిస్థితిని పరిశీలించినా అదే విషయం అవగతమవుతుంది. ‘‘తెలంగాణ రాష్ట్రం నుంచి ఆయా కంపెనీలు ఏటా 18 వేల నుంచి 20 వేల మంది బీటెక్‌ విద్యార్థులను ఎంపిక చేసుకుంటున్నాయి. ఈ సారి పరిస్థితి చూస్తే అది 7 వేలకు మించకపోవచ్చు. ప్రముఖ కళాశాలల్లోనే ఈ ఏడాది 70 శాతం మందికి మించి ఉద్యోగాలు దక్కవని అంచనా. ఇక మిగిలిన కళాశాలల పరిస్థితి ఎలా ఉంటుందో వూహించుకోవచ్చు’’ అని వాసవి ఇంజినీరింగ్‌ కళాశాల ప్రాంగణ నియామకాల అధికారి కిశోర్‌ తెలిపారు.
పరిశోధనలో శిక్షణతో ఉపాధికి మార్గం: కడియం
ఈనాడు, హైదరాబాద్: ఇంజినీరింగ్ విద్యార్థులు కోర్సు చదువుతున్న సమయంలోనే పరిశోధనలో శిక్షణ పూర్తిచేస్తే ఉపాధి అవకాశాలు మెరుగుపడతాయని విద్యాశాఖామంత్రి కడియం శ్రీహరి అన్నారు. జేఎన్‌టీయూ, భారత పరిశ్రమల సమాఖ్య(సీఐఐ) మధ్య శనివారం (సెప్టెంబరు 23) ఒప్పందం కుదిరింది. మంత్రి మాట్లాడుతూ విద్యాసంస్థలకు, పరిశ్రమలకు మధ్య దూరం తగ్గించాలనే ఉద్దేశంతో ప్రభుత్వం పనిచేస్తోందన్నారు. దేశవిదేశాల్లోని ప్రఖ్యాత సంస్థలు, పరిశ్రమలతో తెలంగాణ విశ్వవిద్యాలయాలు ఒప్పందాలు చేసుకుంటున్నాయని చెప్పారు. దీనివల్ల రాష్ట్ర విద్యార్థులకు అంతర్జాతీయ సంస్థల్లో అవకాశాలు లభించే అవకాశాలు ఏర్పడతాయని చెప్పారు. కోర్సులు అభ్యసిస్తుండగానే శిక్షణ పూర్తిచేసుకుంటే ఆయా కంపెనీలకు సంబంధించిన నైపుణ్యం పొందడానికి వీలవుతుందన్నారు. ప్రస్తుతం ఒప్పందం జేఎన్‌టీయూ విద్యార్థులకు ఎంతో మేలు చేస్తుందన్నారు. కార్యక్రమంలో జేఎన్‌టీయూ ఉపకులపతి ఆచార్య వేణుగోపాల్‌రెడ్డి, రిజిస్ట్రార్ ఎస్.యాదయ్య, జె-హబ్ కన్వీనర్ విజయకుమారి, సీఐఐ తెలంగాణ అధ్యక్షుడు వి.రాజన్న, డైరెక్టర్ ఎస్వీ రాజీవ్‌నాగ్ పాల్గొన్నారు.
సింగరేణిలో కొలువుల జాతర
* 643 నాన్ ఎగ్జిక్యూటివ్ పోస్టులకు ప్రకటన జారీ
* 107 ఎగ్జిక్యూటివ్ పోస్టులకు త్వరలో ప్రకటన
ఈనాడు, హైదరాబాద్‌: సింగరేణి సంస్థలో కొత్తగా 643 నాన్ ఎగ్జిక్యూటివ్ పోస్టులకు ప్రకటన విడుదలైంది. మరో 107 ఎగ్జిక్యూటివ్ పోస్టులను త్వరలో ప్రకటించనున్నారు. మొత్తంగా 750 ఉద్యోగాల భర్తీకి ప్రకటన జారీ చేయనున్నట్లు సింగరేణి సంస్థ సెప్టెంబరు 22వ తేదీన ఓ ప్రకటనలో తెలిపింది. వీటిలో కార్మికుల కేడర్‌వి (నాన్ ఎగ్జిక్యూటివ్) 643, అధికారుల కేడర్‌వి (ఎగ్జిక్యూటివ్) 107 పోస్టులున్నాయి. ఆయా ఉద్యోగాల అర్హతల వివరాలు సంస్థ వెబ్‌సైట్‌లో ఉన్నాయని.. ఆన్‌లైన్‌లో సెప్టెంబరు 25 నుంచి అక్టోబరు 10లోగా దరఖాస్తు చేయాలని పేర్కొంది. ఈ ఉద్యోగాలను గతంలో మంజూరు చేయగా.. ఇప్పుడు ప్రకటన జారీ చేస్తున్నారు. కొత్తగా భర్తీ చేసే 750 పోస్టులతో కలిపి తెలంగాణ రాష్ట్రం ఏర్పడిన తర్వాత ఈ సంస్థలో నియమించిన ఉద్యోగాల సంఖ్య 7,198కు చేరనుందని సంస్థ సీఎండీ శ్రీధర్‌ తెలిపారు. ఇంటర్వ్యూలుంటే పైరవీలకు ఆస్కారం ఉంటుందనే భావన నేపథ్యంలో కేవలం రాతపరీక్ష ద్వారానే నియామకాలు చేపట్టినట్లు వివరించారు. సింగరేణి గనులున్న ప్రాంతం వారికే అధిక ఉద్యోగాలు దక్కినట్లు తెలిపారు. ఇటీవల ప్రకటన ఇచ్చిన ఎస్సీ బ్యాక్‌లాగ్‌ ఉద్యోగాల భర్తీ కూడా త్వరలో పూర్తికానుందని చెప్పారు.

Website
టీఎస్‌సెట్ ఫలితాల విడుదలకు తొలగిన అడ్డంకి
* గతంలో ఇచ్చిన 'స్టే' ఎత్తివేసిన హైకోర్టు
ఈనాడు, హైదరాబాద్: టీఎస్-సెట్ ఫలితాల విడుదలకు అడ్డంకి తొలగింది. ఫలితాల విడుదలపై గతంలో ఇచ్చిన యథాతథ స్థితి(స్టే) ఉత్తర్వులను హైకోర్టు శుక్రవారం (సెప్టెంబరు 22) ఎత్తివేసింది. ఇదే తరహా వివాదంపై కేరళ హైకోర్టు ఇచ్చిన తీర్పును పరిగణనలోకి తీసుకున్న ఉమ్మడి హైకోర్టు న్యాయమూర్తి జస్టిస్ ఎస్వీ భట్ ఈ మేరకు ఆదేశాలు జారీచేశారు. వేల మంది నిరుద్యోగులు ఈ ఫలితాల కోసం ఎదురు చూస్తున్నారని.. ఈ నేపథ్యంలో ఒక్కరి కోసం ఫలితాల విడుదలను నిలువరించడం తగదన్నారు.
విశ్వవిద్యాలయాలు, డిగ్రీ కళాశాలల్లో అధ్యాపకులు, అసిస్టెంట్ ప్రొఫెసర్ల నియామకం, పదోన్నతులకు అర్హత కల్పించేందుకు గాను ఉస్మానియా వర్సిటీ, టీఎస్‌సెట్- 2017(రాష్ట్ర అర్హత పరీక్ష) నిర్వహించింది. సెట్ నిర్వహణకు ముందు నిర్ణయించిన నిబంధనల ప్రకారం కాకుండా..పరీక్ష అనంతరం యూజీసీ నిబంధనల మేరకు ఫలితాలు ప్రకటిస్తామని అధికారులు పేర్కొనడాన్ని సవాలు చేస్తూ ఆదిలాబాద్ జిల్లా తలమడుగు మండలం రుయ్యాడి గ్రామానికి చెందిన పరిశోధక విద్యార్థి దత్తాత్రి హైకోర్టును ఆశ్రయించారు. పిటిషనర్ తరఫున న్యాయవాది బూర రమేశ్ వాదనలు వినిపించారు. ఈ ఏడాది జూన్ 7వ తేదీన ఈ వ్యాజ్యంపై విచారణ జరిపిన న్యాయమూర్తి..పరీక్ష నిర్వహణ అనంతరం సవరించిన నియమావళి ప్రకారం ఫలితాలు విడుదల చేస్తామని అధికారులు పేర్కొనడం సరికాదన్నారు. ఇది ఆట మొదలయ్యాక ఆటలో నిబంధనలు మార్చడం లాంటిదేనన్నారు. ఫలితాల వెల్లడిని నిలుపుదల (స్టే) చేశారు. ఆ స్టేను ఎత్తివేయాలని వర్సిటీ, టీఎస్‌సెట్ సభ్య కార్యదర్శి హైకోర్టులో అనుబంధ పిటిషన్ దాఖలు చేశారు. దాన్ని తాజాగా విచారణ జరిపిన న్యాయమూర్తి..గతంలో ఇచ్చిన స్టేను ఎత్తివేశారు. ప్రధాన వ్యాజ్యంలో ప్రమాణపత్రాలు దాఖలు చేయాలని ఆదేశాలు జారీచేశారు.
సింగరేణిలో 750 ఉద్యోగాల భర్తీకి 23న ప్రకటన
హైదరాబాద్‌: సింగరేణిలో 750 ఉద్యోగాల భర్తీకి ప్రకటన సెప్టెంబరు 23న వెలువడనుంది. ఈ మేరకు సింగరేణి యాజమాన్యం కసరత్తు చేస్తోంది. గత రెండేళ్లలో 5,793 ఉద్యోగాలను భర్తీ చేసిన సింగరేణి సంస్థ.. తాజాగా 750 ఖాళీల భర్తీకి ఏర్పాట్లు చేస్తోంది. ఇందులో కార్మిక శ్రేణి ఉద్యోగాలు 643 ఉండగా.. అధికారుల శ్రేణి ఉద్యోగాలు 107 ఉన్నాయి. ఆయా పోస్టులు, వాటికి సంబంధించిన విద్యార్హతలు, వయోపరిమితి, ఇతర వివరాలు వెబ్‌సైట్‌లో పొందుపరిచినట్లు సింగరేణి యాజమాన్యం పేర్కొంది. అర్హులైన అభ్యర్థులు ఆన్‌లైన్లో మాత్రమే ఉద్యోగాల కోసం దరఖాస్తు చేయాల్సి ఉంటుంది.
వెబ్‌సైట్‌: www.scclmines.com
బోధన ఫీజుల కోసం ఎదురుచూపులు
* రెండేళ్లుగా అందని బకాయిలు
* చెల్లిస్తేనే ధ్రువపత్రాలిస్తామని కళాశాలలు మెలిక
ఈనాడు, హైదరాబాద్: బోధన రుసుములు, ఉపకార వేతనాల మంజూరులో తీవ్ర జాప్యం జరుగుతోంది. విద్యా సంవత్సరం పూర్తయి రెండేళ్లవుతున్నా... చాలామంది ఎస్సీ, ఎస్టీ, బీసీ, మైనార్టీ, ఈబీసీ, వికలాంగ విద్యార్థులకు సాయం అందలేదు. కోర్సులు పూర్తయినవారికి ప్రాధాన్యమిస్తున్నట్లు అధికారులు చెబుతున్నా... ఆచరణలో పరిస్థితులు ఇందుకు భిన్నంగా ఉన్నాయి. తెలంగాణ రాష్ట్ర వ్యాప్తంగా కొన్ని జూనియర్, డిగ్రీ, పీజీ, ఇంజినీరింగ్ కళాశాలలకు 2015-16 బకాయిలు విడుదల కాలేదు. ఫీజులు చెల్లిస్తేనే ధ్రువపత్రాలిస్తామని ఆయా యాజమాన్యాలు తెగేసి చెబుతుండటంతో... విద్యార్థులు, వారి తల్లిదండ్రులు తీవ్ర ఆందోళన చెందుతున్నారు.
బోధన ఫీజులు, ఉపకార వేతనాలకు 2016-17లో 13.67 లక్షల మంది విద్యార్థులు దరఖాస్తులు చేసుకున్నారు. ఇందులో 11.48 లక్షల దరఖాస్తులను ప్రభుత్వం పరిశీలించి, డిమాండ్‌ను రూ.1736.05 కోట్లుగా ఖరారు చేసింది. వీరందరికీ ప్రస్తుత విద్యా సంవత్సరంలో సాయం మంజూరు చేయనున్నట్లు తెలిపింది. కానీ, 2015-16కి సంబంధించి ఇంకా రూ.400 కోట్ల బకాయిలు చెల్లించాల్సి ఉంది. దీంతో కోర్సులు పూర్తిచేసుకున్న వారికి సమస్యలు తలెత్తుతున్నాయి. ప్రాంగణ నియామకాల్లో ఎంపికైనవారు, ఉన్నత విద్యకు వెళ్తున్నవారు... తమ ధ్రువపత్రాల కోసం అప్పులుచేసి రుసుములు చెల్లిస్తున్నారు. స్థోమత లేనివారు మాత్రం బకాయిలు ఎప్పుడొస్తాయంటూ జిల్లా, రాష్ట్ర సంక్షేమ కార్యాలయాల చుట్టూ తిరుగుతున్నారు. ఉపకార వేతనాలు ఇప్పించండని ప్రాధేయపడుతుంటే... అధికారులు వారికి సర్దిచెప్పి పంపించేస్తున్నారు. మరోవైపు... విద్యార్థుల నుంచి ఫీజులు వసూలు చేసుకోనివ్వకుండా, అలాగని బకాయిల్ని విడుదల చేయకుండా సర్కారు తమతో చెలగాటం ఆడుతోందని ప్రైవేటు కళాశాలలు ఆరోపిస్తున్నాయి. దసరా సందర్భంగానైనా పాత బకాయిల్ని విడుదల చేసేలా చర్యలు తీసుకోవాలని కోరుతున్నాయి.
2013-14 విద్యార్థులకు తిప్పలు
ఉమ్మడి రాష్ట్రంలో 2013-14లో చదివిన కొందరికి నేటికీ బోధన ఫీజులు, ఉపకార వేతనాలు మంజూరవ్వలేదు. రాష్ట్ర పునర్విభజన సమయంలో వివిధ కారణాలతో వీరికి చెల్లింపులు నిలిచిపోయాయి. ఫీజులొస్తే.. ఉపకార వేతనాలు అందలేదు. ఉపకార వేతనాలొస్తే.. బోధన రుసుములు రాలేదు. దీంతో విద్యార్థులకు ధ్రువపత్రాలను ఇచ్చేందుకు యాజమాన్యాలు నిరాకరిస్తున్నాయి. ఆ విద్యా సంవత్సరంలో మొత్తం రూ.358 కోట్ల బకాయిలు చెల్లించాల్సి ఉండగా.. ఇందులో ఆంధ్రప్రదేశ్ వాటా రూ.208 కోట్లు. తెలంగాణది రూ.150 కోట్లు. ఇటీవల హైదరాబాద్‌లో ఉభయ రాష్ట్రాల సంక్షేమశాఖ అధికారులు ఈ నిధులపై చర్చించినా, సమస్యయితే పరిష్కారం కాలేదు. విద్యార్థుల అవస్థలను దృష్టిలో పెట్టుకుని బకాయిల చెల్లింపుపై నిర్ణయం తీసుకోవాలంటూ ఎస్సీ సంక్షేమశాఖ అధికారులు ప్రభుత్వానికి లేఖ రాశారు.
సిబ్బందికి వేతనాలు చెల్లించలేకపోతున్నాం
- గౌరి సతీష్, ప్రైవేటు కళాశాలల యాజమాన్యాల అధ్యక్షుడు
బోధన, ఉపకార వేతన బకాయిలు విడుదల కాకపోవడంతో ప్రైవేటు జూనియర్, డిగ్రీ, పీజీ కళాశాలల నిర్వహణ కష్టంగా మారింది. విద్యార్థుల నుంచి రుసుములు వసూలు చేయొద్దంటున్నారు. అలాగని బకాయిలను సకారంలో విడుదల చేయట్లేదు. తీవ్ర ఆర్థిక ఇబ్బందుల నేపథ్యంలో చాలా యాజమాన్యాలు సిబ్బందికి వేతనాలు చెల్లించలేకపోతున్నాయి. పర్యవసానంగా 1.03 లక్షల మంది కళాశాలల సిబ్బంది అగచాట్లు పడుతున్నారు.
2016-17 ఏడాది బకాయిలిలా..
విద్యార్థుల సంఖ్య: 13.67 లక్షలు
పరిశీలించిన దరఖాస్తులు: 11.48 లక్షలు
పరిశీనలతో ఉన్నవి: 3.16 లక్షలు
బోధన ఫీజుల డిమాండ్: 1,344 కోట్లు
ఉపకార వేతనాల మొత్తం: 392 కోట్లు
పెండింగ్ దరఖాస్తుల డిమాండ్: సుమారు రూ.500 కోట్లు
విడుదలైన బడ్జెట్: రూ.1,050 కోట్లు
విద్యార్థులు, యాజమాన్యాల ఖాతాల్లో జమైనవి: రూ.410 కోట్లు
తీరు మారింది... సాధనే దారి!
2018లో జరగనున్న ఐబీపీఎస్‌ క్లర్క్స్‌ మెయిన్స్‌ పరీక్షలో ప్రశ్నల సంఖ్య, నిర్ణీత సమయం, సబ్జెక్టు విభాగాల్లో మార్పులు చోటుచేసుకున్నాయి. వాటిని గమనించాలి. కొత్త పరిస్థితికి తగినవిధంగా అభ్యర్థులు ప్రణాళిక వేసుకోవాలి. తడబడకుండా విజయపథంలో సాగాలి!
ఉత్తీర్ణతా శాతంతో సంబంధం లేకుండా డిగ్రీ అర్హత ఉంటే ఐబీపీఎస్‌ పరీక్షకు దరఖాస్తు చేసుకోవచ్చు. ఈ రాతపరీక్ష విధానంలో మార్పులను అభ్యర్థులు శ్రద్ధగా పరిశీలించాలి. గతంలో జరిగిన ఐబీపీఎస్‌ క్లర్క్స్‌- VI మెయిన్స్‌ పరీక్షలో 200 ప్రశ్నలను అయిదు విభాగాల్లో ఒక్కోదానికి 40 ప్రశ్నల చొప్పున ఇచ్చేవారు. 2018లో జరగనున్న ఐబీపీఎస్‌ క్లర్క్స్‌- VII మెయిన్స్‌ పరీక్షలో 200 మార్కులకు 190 ప్రశ్నలను మాత్రమే ఇవ్వనున్నారు. గత పరీక్షతో పోలిస్తే 25 నిమిషాల అదనపు సమయం కూడా లభించనుంది. 160 నిమిషాల వ్యవధిలో 190 ప్రశ్నలను పూర్తిచేయాలి.
గతంలో కంప్యూటర్‌ అవేర్‌నెస్‌ నుంచి 40 ప్రశ్నలు వచ్చేవి. ప్రస్తుత పరీక్షలో రీజనింగ్‌, కంప్యూటర్‌ అవేర్‌నెస్‌ రెండు విభాగాలకూ కలిపి 50 ప్రశ్నలకుగానూ 60 మార్కులను కేటాయించారు. రీజనింగ్‌, కంప్యూటర్‌ అవేర్‌నెస్‌ ప్రశ్నలను 45 నిమిషాల్లో పూర్తిచేయాలి.
క్వాంటిటేటివ్‌ ఆప్టిట్యూడ్‌లోని 50 ప్రశ్నలను 45 నిమిషాల్లో పూర్తిచేయాలి. ఈ విభాగానికి 50 మార్కులున్నాయి. జనరల్‌ అండ్‌ ఫైనాన్షియల్‌ అవేర్‌నెస్‌ విభాగం నుంచి 50 ప్రశ్నలకు 50 మార్కులను కేటాయించారు. వీటిని 35 నిమిషాల వ్యవధిలో పూర్తిచేయాలి. జనరల్‌ ఇంగ్లిష్‌ నుంచి 40 ప్రశ్నలకు 40 మార్కులను కేటాయించారు. వీటిని 35 నిమిషాల్లో పూర్తిచేయాలి.
క్లుప్తంగా.. పరీక్షలో ప్రశ్నల సంఖ్యలో 10 తగ్గించి, 25 నిమిషాల ఎక్కువ సమయాన్ని కేటాయించారు. దీనినిబట్టి రాబోయే పరీక్షలో ప్రశ్నలస్థాయి కష్టంగా ఉండబోతోందని అర్థం చేసుకోవచ్చు. సమాధానాన్ని పూర్తిచేయడానికి ఎక్కువ సమయం పడుతుందనే విషయాన్నీ గ్రహించవచ్చు.
జనరల్‌ & ఫైనాన్షియల్‌ అవేర్‌నెస్‌ విభాగంలో FOREX, డిజిటల్‌ బ్యాంకింగ్‌ల నుంచి ప్రశ్నలు ఎక్కువగా రావడాన్ని ఇటీవలి బ్యాంకు పరీక్షల ద్వారా గమనించవచ్చు. ఈ విషయాన్ని దృష్టిలో ఉంచుకుని సన్నద్ధమవడం మంచిది.
జనరల్‌ ఇంగ్లిష్‌లోని ప్రతి ప్రశ్ననూ చదవడానికి కూడా ఎక్కువ సమయం పట్టేలా 6-7 లైన్లలో ప్రశ్నను ఇస్తున్నారు. రీడింగ్‌ కాంప్రహెన్షన్‌ను 1500 పదాలకు తగ్గకుండా ఇస్తున్నారు. ఫిల్‌ ఇన్‌ ద బ్లాంక్స్‌లో పదాలకు బదులుగా వాక్యాలను పూర్తిచేసేలా ప్రశ్నలు ఇస్తున్నారు. సెంటెన్స్‌ అరేంజ్‌మెంట్‌లో 7 వాక్యాలను ఇచ్చి అందులో ఆరు మాత్రమే ఒకే సమాచారం గురించి ఉంటాయి. మిగిలిన ఆడ్‌మాన్‌ సెంటెన్స్‌లను కనుక్కునేలా ప్రశ్నలు వస్తున్నాయి. ఈ మార్పులకు తగ్గట్టుగా సన్నద్ధమవ్వాలి.
రీజనింగ్‌లో కంప్యూటర్‌ ప్రశ్నలే కాకుండా డేటా ఫ్లో బొమ్మలో దీనికి సంబంధించిన సమాచారాన్ని ఇచ్చి ప్రశ్నలు అడుగుతున్నారు. కంప్యూటర్స్‌ సబ్జెక్టులో ఉండే కాన్సెప్ట్‌లో రీజనింగ్‌కు సంబంధించిన సమాచారాన్ని ఇచ్చి అభ్యర్థిని తికమకకు గురిచేసేలాప్రశ్నలు వస్తున్నాయి. ఆయా కారణాల వల్ల ఈ విభాగంలోని 50 ప్రశ్నలకు 60 మార్కులను కేటాయించారు.

క్వాంటిటేటివ్‌ ఆప్టిట్యూడ్‌ విభాగంలోని ప్రశ్నలు ఎక్కువ సమయం తీసుకునేవిగా ఉంటున్నాయి. ముఖ్యంగా డేటా అనాలిసిస్‌ విభాగంలో గతంలో వచ్చిన ప్రశ్నలు చేయడానికి శాతాలు, నిష్పత్తి, సరాసరి వంటి ఆప్టిట్యూడ్‌ అంశాలపై పట్టు ఉంటే సరిపోయేది. కానీ ఇప్పుడు కాలం-పని, కాలం-దూరం, వడ్డీలు, లాభనష్టాలు వంటి అంశాలకు సంబంధించిన సమాచారాన్ని డేటా అనాలిసిస్‌లో ఇస్తున్నారు. దీనివల్ల ప్రశ్నలస్థాయి కఠినం అవ్వడంతోపాటు ఎక్కువ సమయం తీసుకునేలా ఉంటున్నాయి. వీటిని దృష్టిలో ఉంచుకుని పరీక్షకు సన్నద్ధమవ్వాలి.
ప్రశ్నల సంఖ్యలో 10 తగ్గించి, 25 నిమిషాల ఎక్కువ సమయాన్ని కేటాయించారు. దీనినిబట్టి రాబోయే పరీక్షలో ప్రశ్నలస్థాయి కష్టంగా ఉండబోతోందని అర్థం చేసుకోవచ్చు. సమాధానాన్ని పూర్తిచేయడానికి ఎక్కువ సమయం పడుతుందనే విషయాన్నీ గ్రహించవచ్చు.
- శ్రీధ‌ర్ కొమ్మూరు, శ్రీధ‌ర్స్ సీసీఈ
అంగన్‌వాడీల్లో 5,491 ఉద్యోగాల భర్తీ!
ఈనాడు, హైదరాబాద్: అంగన్‌వాడీ కేంద్రాల్లో ఉపాధ్యాయులు, సహాయకుల ఉద్యోగాల భర్తీకి తెలంగాణ ప్రభుత్వం కసరత్తు చేస్తోంది. ఇప్పటికే అర్హత నిబంధనలు ఖరారు చేసింది. పదో తరగతిలో ఉత్తీర్ణులైన వారే అర్హులని పేర్కొంది. జిల్లాల వారీగా ఖాళీల వివరాలను సేకరించే క్రతువు ప్రారంభించింది. ఇప్పటికే మహబూబ్‌నగర్ జిల్లాలో పోస్టుల భర్తీకి ప్రకటన వెలువడింది. అక్కడ దరఖాస్తుల స్వీకరణ ప్రక్రియా ప్రారంభమైంది. మిగతా జిల్లాల్లో కలిపి మొత్తం 5,491 ఖాళీలు భర్తీ చేసే అవకాశమున్నట్లు సమాచారం. ఇందులో 1,483 టీచర్లు, 2961 సహాయకులు, 1047 మినీ అంగన్‌వాడీ టీచర్ల ఉద్యోగాలు ఉన్నట్టు తెలిసింది. మరోవైపు పదవీ విరమణ పథకం అందుబాటులోకి వచ్చినందున కొత్తగా 5,398 ఖాళీలు ఏర్పడే అవకాశాలున్నట్లు ప్రభుత్వ వర్గాలు భావిస్తున్నాయి.
ఉన్నత విద్యలో నాణ్యతకు పునాది
* వర్సిటీల్లో రెండు విడతల్లో 1,385 పోస్టుల భర్తీ
* ఈ నెలాఖరులో నోటిఫికేషన్లు, తీర్మానాలు
* తొలిసారి ఏపీపీఎస్‌సీ ద్వారా ప్రాథమిక పరీక్ష
ఈనాడు, అమరావతి: విశ్వవిద్యాలయాల్లో నాణ్యత ప్రమాణాలు పెంచేందుకు ఆంధ్రప్రదేశ్ రాష్ట్ర ఉన్నత విద్యామండలి నడుంబిగించింది. వర్సిటీల్లోని ఖాళీల భర్తీకి మొదటిసారిగా ఏపీపీఎస్‌సీ ద్వారా ప్రాథమిక పరీక్ష (స్క్రీనింగ్ టెస్ట్)ను నిర్వహించబోతున్నారు. గతంలో నిర్వహించిన విశ్వవిద్యాలయాల ఉపకులపతుల సమావేశంలో చేసిన సిఫార్సు మేరకు ఈ విధానాన్ని చేపడుతున్నారు. ఏపీపీఎస్‌సీ ప్రాథమిక పరీక్ష పూర్తయిన అనంతరం అర్హత సాధించిన అభ్యర్థులతో పోస్టుల భర్తీని అయా వర్సిటీలు చేపడతాయి. ఏపీ రాష్ట్ర వ్యాప్తంగా 14 విశ్వవిద్యాలయాల్లో 3,259 పోస్టులు ఉండగా.. మొత్తం 1,711 ఖాళీలున్నాయి. వీటిల్లో రెండు విడతలుగా 1,385 పోస్టులను భర్తీ చేయనున్నారు. వర్సిటీల్లో పోస్టుల హేతుబద్దీకరణ కోసం వేసిన కమిటీ సిఫార్సు మేరకు మొదటి విడతలో 65 శాతం, రెండో విడతలో 16 శాతం భర్తీ చేయనున్నారు.
ఇదీ విధానం..
విశ్వవిద్యాలయాలు మొదట పోస్టుల ఖాళీల నోటిఫికేషన్‌ను జారీ చేస్తూ.. ప్రాథమిక పరీక్ష నిర్వహణ బాధ్యతలను ఏపీపీఎస్‌సీకి అప్పగిస్తూ తీర్మానం చేయనున్నాయి. సెప్టెంబరు ఈ ప్రక్రియ పూర్తి చేయాలని రాష్ట్ర ఉన్నత విద్యామండలి సూచించింది. అనంతరం ఏపీపీఎస్‌సీ సబ్జెక్టుల వారీగా పరీక్షలు నిర్వహించి, ఫలితాలను వర్సిటీలకు అందిస్తుంది. అర్హత మార్కులు సాధించిన అభ్యర్థుల జాబితాను స్వీకరించిన అనంతరం విశ్వవిద్యాలయాల ఎంపిక కమిటీ నియామకాల ప్రక్రియ చేపడుతుంది. విశ్వవిద్యాలయానికి దరఖాస్తు చేసుకున్న అభ్యర్థికి వచ్చిన మార్కుల ఆధారంగా ఆ వర్సిటీ తన మెరిట్ జాబితాను రూపొందిస్తుంది. అనంతరం వర్సిటీ ఎంపిక కమిటీ మౌఖిక పరీక్ష నిర్వహిస్తుంది. ఉదాహరణకు ఒక అభ్యర్థి రెండు వర్సిటీల్లో ఒకే సబ్జెక్టుకు సంబంధించి దరఖాస్తు చేసి, ఏపీపీఎస్‌సీ ప్రాథమిక పరీక్షలో అర్హత సాధిస్తే ఆ అభ్యర్థి మెరిట్ అయా వర్సిటీల వారీగా ఉంటుంది. యూజీసీ నిబంధనల ప్రకారం వర్సిటీ ఎంపిక కమిటీని ఏర్పాటు చేస్తారు. మౌఖిక పరీక్షలు పూర్తయిన అనంతరం అభ్యర్థులు ఉద్యోగాల్లో చేరేందుకు కొంత సమయం ఇస్తారు. ఒకే అభ్యర్థి రెండు విశ్వవిద్యాలకు ఎంపికైతే ఇచ్చిన సమయంలోపు ఏదో ఒకచోట చేరాల్సి ఉంటుంది. అనంతరం ఏర్పడే ఖాళీని ఆ తర్వాత మెరిట్ జాబితాలోని అభ్యర్థితో భర్తీ చేస్తారు. వర్సిటీల్లో విద్యా ప్రమాణాలను పెంచేందుకు, ప్రతిభ కలిగిన అధ్యాపకులను నియమించేందుకు ఉన్నత విద్యామండలి ఈ నూతన విధానాన్ని తీసుకొచ్చింది.
ఎడ్‌సెట్ సీట్ల కేటాయింపు పూర్తి
* 254 కళాశాలల్లో 14,250 సీట్లు మిగులు
ఈనాడు, అమరావతి: ఆంధ్రప్రదేశ్‌లో బీఎడ్ మొదటి సంవత్సరంలో ప్రవేశాలకు సంబంధించి ఎడ్‌సెట్-2017 సీట్ల కేటాయింపు సోమవారం (సెప్టెంబరు 18) పూర్తయింది. రాష్ట్రవ్యాప్తంగా మొత్తం 7010 మంది ఎడ్‌సెట్‌లో అర్హత సాధించగా.. ఇందులో 2,700 మంది మాత్రమే ధ్రువీకరణ పత్రాల పరిశీలనకు హాజరయ్యారు. వీరిలో 2,351 మంది ఆప్షన్లు నమోదు చేసుకున్నారు. కన్వీనర్ కోటా కింద 254 కళాశాలల్లో 16,587 సీట్లు ఉండగా.. 2,337 మంది అభ్యర్థులకు సీట్లు కేటాయించారు. గత ఏడాది 541 కళాశాలలు ఉండగా వీటిల్లో ఈసారి 254 కాలేజీలు మాత్రమే కౌన్సెలింగ్‌కు వచ్చాయి. అధ్యాపకులకు ఆధార్ అనుసంధానం, ఎన్‌సీఆర్‌టీ అనుమతులు సకాలంలో రాకపోవడంతో చాలా కళాశాలలకు కౌన్సెలింగ్‌లో పాల్గొనే అవకాశం లభించలేదు. అభ్యర్థుల నుంచి కూడా స్పందన తక్కువగానే ఉంది.
సబ్జెక్టు   కన్వీనర్‌కోటాలో సీట్లు   ప్రవేశాలు
గణితం   4163   587
భౌతికశాస్త్రం   1764   220
జీవశాస్త్రం   3281   495
సాంఘికశాస్త్రం   5775   926
ఆంగ్లం   1604   109
‘నీట్‌’గా మరో ఏడాది!
* సీటు సాధనే లక్ష్యంగా అదనంగా ప్రత్యేక శిక్షణ
* విద్యార్థుల పట్టుదల
* వైద్య విద్యలో నీట్‌ అర్హత తప్పనిసరితో తల్లిదండ్రుల ప్రోత్సాహం
ఈనాడు, అమరావతి: వైద్య విద్యలో సీటు సాధించడమే వారి ఏకైక లక్ష్యం. చదువుల్లో ఏడాది ఆలస్యమైనా వారికి ఆందోళన లేదు. ఎందుకంటే వారి ముందు వైద్యం చదవాలనే లక్ష్యమే కనిపిస్తోంది. అందుకోసం పట్టుదలతో అదనంగా ఏడాది ప్రత్యేక శిక్షణ తీసుకుంటున్నారు. వీరిలో అమ్మాయిలే ఎక్కువగా ఉంటున్నారు. వారి ఆసక్తికి తల్లిదండ్రులూ సహకరిస్తున్నారు.
ఒకప్పుడు ఇంజినీరింగ్‌ విద్యలో ఈ ధోరణి ఎక్కువగా ఉండేది. ఇప్పుడు వైద్య విద్యలో పెరిగిపోతోంది. ఇంజినీరింగ్‌ చదివేందుకు ప్రస్తుతం అవకాశాలు ఎక్కువగా ఉండటంతో ‘లాంగ్‌ టర్మ్‌’ ఒరవడి గతంలో ఉన్నంత లేదు. వైద్య విద్యను అందించే కళాశాలలు పరిమితంగా ఉండటం.. ఫీజులు భారీగా ఉన్నందున తొలి ప్రయత్నంలో సీటు సాధించలేనివారు మరోసారి తమ అదృష్టాన్ని పరీక్షించుకునేందుకు వెనుకాడటం లేదు. ఇంటర్‌ బైపీసీతో పూర్తిచేసిన వారికి వైద్య విద్యలో సీటు రాకుండా ఉంటే.. దంత, హోమియో, ఆయుర్వేద, యునానీ, బీ ఫార్మసీ, ఫార్మా డి, వ్యవసాయ, పశువైద్య విద్యలో సీటు సాధించే అవకాశముంది. అయితే వీరు ఎంబీబీఎస్‌లో సీటు సాధించడానికే ప్రాధాన్యమిస్తున్నారు. అందువల్లే ఏడాదిపాటు ప్రత్యేకంగా నీట్‌లో ఉత్తమ ర్యాంకు సాధించేందుకు సన్నద్ధం అవుతున్నారు. కొద్దిమంది రెండో ఏడాదీ ప్రత్యేకంగా సన్నద్ధమవుతున్నారు. వీరు ఇప్పటి నుంచే 2018 నీట్‌లో ఉత్తమ ర్యాంకు సాధన కోసం కృషి చేస్తున్నారు. ఓ అంచనా ప్రకారం...100 మంది ఎంబీబీఎస్‌ సీటు కోసం పోటీపడితే తొలి ప్రయత్నంలో విజయాన్ని సాధించే వారు 10%లోపు ఉంటారని, మలివిడత ప్రయత్నంలో సీట్లు పొందిన వారు 25% మంది వరకు ఉన్నారని విద్యావేత్త పీవీఆర్కే మూర్తి తెలిపారు.
తెలుగు రాష్ట్రాల నుంచి నీట్‌ను లక్ష మందికిపైగా రాస్తుంటే వీరిలో ఏడాదిపాటు ప్రత్యేకంగా శిక్షణ పొందిన విద్యార్థులు 25వేల మంది వరకు ఉంటారని అంచనా. వీరిలో 30% మంది విద్యార్థులు ఎంబీబీఎస్‌ సీటును సాధించేందుకు అవసరమైన ఉత్తమ ర్యాంకులు సాధిస్తున్నారని నిపుణులు పేర్కొంటున్నారు. వీరి విషయంలో కార్పొరేట్‌ విద్యా సంస్థలు తగిన జాగ్రత్తలు తీసుకుంటున్నాయి. నీట్‌లో 720కి 450 ఆపై మార్కుల్ని సాధించినవారి నుంచి ఏడాదికి రూ.35వేల వరకు రుసుము తీసుకుంటున్నాయి. బస, భోజన సౌకర్యాల్ని కల్పించి మరీ శిక్షణ ఇస్తున్నాయి. ఈ మార్కుల్ని సాధించిన వారు మలి ప్రయత్నంలో 600కుపైగా మార్కుల్ని సాధిస్తారన్నది ఆ సంస్థల ఆలోచన. 450 మార్కులు వచ్చాయంటే పరీక్షల్లో ఉండే నాలుగు సబ్జెక్టుల్లో రెండింట్లో పట్టు ఉందని, మరో రెండింట్లో పట్టు సాధించేందుకు ప్రత్యేక శిక్షణ ఇస్తే సరిపోతుందన్న ఉద్దేశంతో యాజమాన్యాలు వ్యవహరిస్తున్నాయి. నీట్‌లో మంచి మార్కుల్ని సాధించిన వారికి శిక్షణకు వస్తే వచ్చే ఉత్తమ ర్యాంకులు సంస్థలకు పేరు ప్రఖ్యాతలు, ప్రవేశాలను పెంచుతాయని యాజమాన్యాలు భావిస్తున్నాయి. అందువల్ల ఫీజును తగ్గించేందుకు వెనుకాడటంలేదు. మరోవైపు నీట్‌లో తక్కువ మార్కుల్ని సాధించిన విద్యార్థులు కూడా ఏడాదిపాటు ప్రత్యేకంగా శిక్షణ తీసుకునేందుకు ముందుకొస్తున్నారు. వీరి విషయంలో ఫీజుపరంగా పెద్దగా వెసులుబాటు ఉండటంలేదు.
నీట్‌లో అర్హత సాధించిన వారితోనే కన్వీనర్‌తోపాటు యాజమాన్య కోటా సీట్లను ప్రస్తుతం భర్తీ చేయాల్సి ఉంది. నీట్‌ రాకతో ఈ కొత్త షరతులు అమల్లోకి వచ్చాయి. నీట్‌ లేనప్పుడు ఇంటరుమార్కుల ప్రతిపాదికన భారీగా డొనేషన్లు తీసుకుని కొన్ని వైద్య కళాశాలల యాజమాన్యాలు సీట్లను అమ్ముకున్నాయి. ఇప్పుడా పరిస్థితి లేకపోవడంతో డబ్బుతోనైనా ఎంబీబీఎస్‌లో సీటు సాధించాలని లక్ష్యంగా పెట్టుకున్నవారు తప్పనిసరైన నీట్‌లో అర్హత కోసం శిక్షణ పొందాల్సిన పరిస్థితులు తలెత్తాయి. ఇలా శిక్షణ పొందే వారిలో అబ్బాయిల కంటే అమ్మాయిలదే పైచేయిగా ఉంది. ఎంబీబీఎస్‌ తర్వాత పీజీ చేయాలనుకుంటున్న వారు కూడా ఏడాది సమయం వృథా గురించి ఆలోచించడంలేదు. 2017-18 విద్యా సంవత్సరంలో ఆంధ్రప్రదేశ్‌లో 2428 సీట్లను అమ్మాయిలు, 1818 మంది సీట్లను అబ్బాయిలు పొందారు. దంత వైద్య విద్యలో 824 మంది అమ్మాయిలు, 228 అబ్బాయిలు ప్రవేశాల్ని పొందారు.
జాతీయ ఆరోగ్య మిషన్‌లో కొలువులు
* 1248 కొత్త పోస్టులు మంజూరు
* అన్నింటి భర్తీ ఒప్పంద ప్రాతిపదికనే
* రాష్ట్ర ఆరోగ్య సంస్థ ఈసీ నిర్ణయం
ఈనాడు, హైదరాబాద్: జాతీయ ఆరోగ్య మిషన్(ఎన్‌హెచ్ఎం) కింద తెలంగాణలో అమలవుతున్న వివిధ ఆరోగ్య పథకాల కోసం కొత్తగా 1248 పోస్టులు మంజూరయ్యాయి. ఇందులో నర్సుల పోస్టులు 708కాగా, ఏఎన్ఎంలు 120, వైద్యుల పోస్టులు 82, మిగిలినవి ఇతర పోస్టులున్నాయి. ఇటీవల జరిగిన రాష్ట్ర ఆరోగ్య సంస్థ కార్యనిర్వాహక కమిటీ(ఈసీ) భేటీలో ఈమేరకు ఆమోదం తెలిపారు. రాష్ట్ర ప్రభుత్వం 'కేసీఆర్ కిట్ పథకం కింద మాతాశిశు సంరక్షణకు పెద్దపీట వేసింది. ఈ పథకం ప్రవేశపెట్టిన అనంతరం ప్రభుత్వ ఆసుపత్రులకొచ్చే గర్భిణుల సంఖ్య గణనీయంగా పెరిగింది. పెరుగుతున్న ప్రసవాల సంఖ్యకు అనుగుణంగా మానవ వనరులను సమకూర్చుకోవడంపై ప్రభుత్వం దృష్టిపెట్టింది. రాష్ట్రంలో కొత్తగా ఐదు మాతాశిశు ఆసుపత్రులను నిర్మించడానికీ ఈసీ ఆమోదముద్ర వేసింది. కామారెడ్డి, ఏటూరునాగారం, సూర్యాపేట, మంథని, అచ్చంపేటల్లో ఒక్కోఆసుపత్రికి రూ.7కోట్ల చొప్పున ఒక్కోచోట 50పడకలతో మాతాశిశు ఆసుపత్రులు నిర్మించనున్నారు. వీటికి తోడుగా అసిఫాబాద్, గద్వాల, సూర్యాపేట, వనపర్తి, సిరిసిల్ల, జనగాం, మెదక్ మొత్తం 7ఆసుపత్రుల్లో నవజాత శిశు సంరక్షణ కేంద్రాలను కొత్తగా ప్రారంభించడానికి పచ్చజెండా ఊపింది. దీంతో ఈ రెండింటికి కలుపుకొని అవసరమైన నర్సులు, వైద్యుల నియామకాలకు ఈసీ సంసిద్ధత వ్యక్తంచేసింది. మధుమేహం, అధిక రక్తపోటు, గుండెపోటు, పక్షవాతం, క్యాన్సర్ తదితర అసాంక్రమిక వ్యాధుల నియంత్రణకూ రాష్ట్ర ప్రభుత్వం ప్రాధాన్యమిస్తోంది. ఈ వ్యాధుల నియంత్రణ కోసం ఎన్‌హెచ్ఎం కింద స్టాఫ్‌నర్సుల నియామకాలు జరపనున్నారు. మంజూరైన వాటిలో పట్టణ ఆరోగ్య మిషన్ కింద నియమించనున్న ఏఎన్ఎంల పోస్టులూ ఉన్నాయి. రాష్ట్ర ఆరోగ్య సంస్థ నుంచి ఈ పోస్టులకు ఆమోదం లభించడంతో నియామక ప్రతిపాదనలను ప్రభుత్వ అనుమతి కోసం పంపిస్తున్నట్లు వైద్యవర్గాలు తెలిపాయి. ప్రభుత్వం అనుమతి రాగానే అన్ని పోస్టులనూ ఒప్పంద, పొరుగు సేవల ప్రాతిపదికన నియమించడానికి జాతీయ ఆరోగ్య మిషన్ రాష్ట్ర అధికారులు ఏర్పాట్లు చేస్తున్నారు.
నగర సిగలో శిక్షణ సంస్థ.. నిరుద్యోగులకు వరం
ఈనాడు-హైదరాబాద్‌, న్యూస్‌టుడే-కాచిగూడ: పదో తరగతి చదివిన విద్యార్థికి.... ప్లంబింగ్‌లో శిక్షణ ఇస్తే అతను నెలకు రూ.15 వేల వరకు సంపాదించుకుంటాడు. సాధారణ డ్రైవర్‌గా ఉన్న వ్యక్తికి జేసీబీ నడిపేలా శిక్షణ ఇస్తే అతని జీవితమే మారిపోతుంది. ఇలాంటి వారికి ఇక్కడ ఆదాయం పెరగడమే కాదు..విదేశాల్లో కూడా అవకాశాలు వస్తాయి. పెరూలో మాకు ఇలాంటి వారు కావాలని కోరుతూ అక్కడి ప్రభుత్వం మాకు లేఖలు రాసింది. ఇది గతంలో ఒక కేంద్ర మంత్రి హైదరాబాద్‌కు వచ్చిన సందర్భంగా వ్యక్తం చేసిన అభిప్రాయం.
పదో తరగతో లేదా ఇంటర్మీడియట్‌ వరకు చదువుకొని ఆ తరవాత ఆర్థిక పరిస్థితి కారణంగా ఉన్నత చదువులు చదువుకోలేని పరిస్థితి అనేక మందికి ఉంటుంది. కుటుంబ భారాన్ని కూడా మోయాల్సిన అవసరం అనేక మందిపై పడుతుంది. అబ్బిన కొద్దిపాటి చదువుతో ఏ పని చేయలేరు. ఏ పని చేయాలన్నా శిక్షణ అవసరం. ఇలాంటి శిక్షణలు తీసుకునేందుకు అవకాశాలు కూడా తక్కుగానే ఉంటాయి. యువతులకు శిక్షణ అవకాశాలు మరీ తక్కువగా ఉంటాయి. ఇలాంటి వారికి శిక్షణ ఇచ్చేందుకు ఇప్పుడు నగరంలో మరో సంస్థ ఏర్పాటుకు శ్రీకారం చుట్టారు. ప్రాంతీయ వృత్తివిద్యా శిక్షణ సంస్థ( ఆర్‌వీటీఐ) పేరుతో నగరంలో వచ్చే విద్యా సంవత్సరం నుంచి ఏటా దాదాపు 1000 మంది యువతకు శిక్షణ ఇచ్చేలా సంస్థను నిర్మిస్తున్నారు.
విద్యానగర్‌లో ఇలా..
నగరంలోని విద్యానగర్‌ కాలనీ.... శివం రోడ్డులో ఉన్న అడ్వాన్స్‌డ్‌ ట్రైనింగ్‌ ఇన్‌స్టిట్యూట్‌(ఏటీఐ) ప్రాంగణంలో నాలుగు ఎకరాల స్థలంలో ప్రాంతీయ వృత్తివిద్యా శిక్షణ సంస్థ(ఆర్‌వీటీఐ)ను నిర్మిస్తారు. ఈ భనవ నిర్మాణానికి ఉప రాష్ట్రపతి వెంకయ్యనాయుడు సెప్టెంబరు 16న శంకుస్థాపన చేశారు. ఇందు కోసం కేంద్ర ప్రభుత్వం నుంచి రూ.19.95 లక్షలు మంజూరయ్యాయి. ఈ నిధులతో మూడేళ్లలోగా పూర్తి స్థాయిలో అన్ని హంగులతో కూడిన శిక్షణ భవనాన్ని నిర్మిస్తారు. ఈ భవనం పూర్తయ్యే వరకూ ఆగకుండా ఉన్న ఏటీఐ భవనాన్నే వినియోగించుకొని వచ్చే విద్యా సంవత్సరం నాటికి భవనాన్ని నిర్మించి పూర్తి స్థాయిలో శిక్షణ తరగతులు ప్రారంభించాలని భావిస్తున్నారు. ఇక్కడ ఏటా సుమారు 1000 మందికిపైగా యువతకు శిక్షణ ఇచ్చే అవకాశం ఉంటుంది. ఇందులో 480 మంది యువతులకు శిక్షణ ఇవ్వడం గమనార్హం.
ఆర్‌వీఐటీలో శిక్షణ ఇచ్చే కోర్సులు..
ఆహారం, పానియాలు, సేవల విభాగం, సెక్రటేరియల్‌ ప్రాక్టీస్‌, ఫ్రంట్‌ ఆఫీస్‌ అసిస్టెంట్‌, అర్కిటెక్చర్‌ సహాయక శిక్షణ, కాస్మోటాలజీ, ఫ్యాషన్‌ డిజైన్‌, టెక్నాలజీ.
ఇప్పటికే శిక్షణలు..
నగరంలో ఇప్పటికే ప్రభుత్వ సంస్థల ఆధ్వర్యంలో వివిధ కోర్సుల్లో శిక్షణ ఇస్తున్నారు. సుమారు మూడు నెలల పాటు శిక్షణ ఇవ్వడంతో నిరుద్యోగులకు అదనపు సామర్థ్యం పెరుగుతోంది. పదో తరగతి మాత్రమే చదువుకొని తప్పని సరిగా ఉద్యోగం చేయాలనుకునే వారికి స్వల్పకాల శిక్షణలు ఇస్తుండటం వల్ల వారికి వెంటనే ఉద్యోగాలు లభిస్తున్నాయి. దీన్‌దయాళ్‌ ఉపాధ్యాయ్‌ గ్రామీణ్‌ కౌశల్య యోజన (డీడీయూజీకెవై) కింద కూడా శిక్షణ ఇస్తున్నారు. ఈ పథకం కింద నగర శివార్లలో ఈ ఏడాది దాదాపు 285 మందికి శిక్షణ ఇచ్చి ఉపాధి చూపించారు. డీడీయూజీకెవై కింద నిర్వహించే శిక్షణ సంస్థలపై డీఆర్‌డీఏ అధికారుల పర్యవేక్షణ ఉంటుంది. ప్రధానమంత్రి కౌశల్‌ యోజన కింద అనేక సంస్థలు శిక్షణ ఇస్తున్నాయి. ఈ శిక్షణల ద్వారా అనేక మంది చిన్నచిన్న ఉద్యోగాలు పొందుతున్నారు పదో తరగతి, ఇంటర్‌, డిగ్రీ, పీజీ, వృత్తివిద్యా కోర్సులు పూర్తి చేసిన కొందరు శిక్షణను విజయవంతంగా పూర్తి చేసుకున్నారు. వారికి బహుళ జాతి సంస్థల్లో ఉద్యోగాలు కల్పించారు. శనివారం అంబర్‌పేట శివం రోడ్డులోని ఏటీఐ జరిగిన కార్యక్రమంలో ఉప రాష్ట్రపతి వెంకయ్యనాయుడు ఉద్యోగ నియామక పత్రాలను అందజేసి అభినందించారు. నియామక పత్రాలు అందుకున్న పలువురు‘న్యూస్‌టుడే’తో తమ అభిప్రాయాలను పంచుకున్నారు.
ఇంగ్లిష్‌లో నైపుణ్యం సాధించా - సందీప్‌కుమార్‌ (23), బీటెక్‌, ఉప్పర్‌పల్లి
రెండున్నర నెలల పాటు సిస్టమ్‌ నెట్‌వర్కింగ్‌లో శిక్షణ ఇచ్చారు. కమ్యూనికేషన్‌ స్కిల్స్‌ పెంపొందించుకున్నా. ఇంగ్లిష్‌ భాషలో నైపుణ్యం సాధించా. శిక్షణ ఉద్యోగ సాధనకు ఎంతో దోహదపడింది. విజయవంతంగా శిక్షణ పూర్తిచేసుకున్న నాకు బహుళజాతి సంస్థలో ఉద్యోగ అవకాశం కల్పించడం చాలా సంతోషం.
కంప్యూటర్‌ నెట్‌వర్కంగ్‌లో ప్రావీణ్యం - వీణ (21), బీటెక్‌, నాగోల్‌
ఇన్‌ఫర్మేషన్‌ టెక్నాలజీ హెల్త్‌ డెస్క్‌ (ఐటీహెచ్‌డీ)లో మూడు నెలల శిక్షణ పొందాను. కంప్యూటర్‌ నెట్‌వర్కింగ్‌లో ప్రావీణ్యం సాధించా. శిక్షణను సద్వినియోగం చేసుకుంటే విదేశాల్లో కూడా ఉద్యోగాలు సాధించవచ్చు. శిక్షణ పూర్తి చేసుకున్న వెంటనే మంచి సంస్థలో ఉద్యోగం లభించడం చాలా ఆనందంగా ఉంది.
భవిష్యత్తుకు బంగారు బాటలు - వి.శ్రీలక్ష్మి (27), ఎంసీఏ, జగద్గిరిగుట్ట
ఐటీహెచ్‌డీ శిక్షణ వల్ల ఎంతో ప్రయోజనం కలిగింది. శిక్షణ నా భవిష్యత్తుకు బంగారు బాటలు వేసినట్లైంది. శిక్షకులు చెప్పిన ప్రకారం... నేర్చుకుంటే ఉద్యోగం సాధించడంతోపాటు ఉన్నత స్థానానికి ఎదగవచ్చు. శిక్షణ వల్ల కమ్యూనికేషన్స్‌ స్కిల్స్‌ మరింతగా పెరిగాయి. దీంతో ఉద్యోగం సాధించా.
బహుళ జాతి సంస్థలో ఉద్యోగం - కె.నిఖిల్‌ (24), బీకాం కంప్యూటర్స్‌, ఏఎస్‌రావు నగర్‌
సోషల్‌ మీడియా ద్వారా ఉపాధి శిక్షణ ఎంచుకున్నా. కార్యాలయ పని వాతావరణాన్ని సృష్టించి శిక్షణ ఇచ్చారు. షిఫ్టులవారీగా పని సంస్కృతి ఎలా ఉంటుందో నేర్పించారు. ఉద్యోగం వస్తుందనే నమ్మకం కలిగింది. వూహించినట్లుగానే నాకు బహుళజాతి సంస్థలో ఉద్యోగం వచ్చింది.
21 నుంచి గ్రూప్-2 ధ్రువపత్రాల పరిశీలన
ఈనాడు, హైదరాబాద్: హైకోర్టు ఆదేశాల మేరకు సెప్టెంబరు 21 నుంచి గ్రూప్-2 పోస్టులకు సంబంధించి ధ్రువీకరణ పత్రాల పరిశీలన నిర్వహించనున్నట్లు టీఎస్‌పీఎస్సీ కార్యదర్శి వాణిప్రసాద్ తెలిపారు. పూర్తిస్థాయి షెడ్యూలు, ఇతర వివరాలు త్వరలో ప్రకటిస్తామని పేర్కొన్నారు. అభ్యర్థులు అసలు ధ్రువపత్రాలను అందుబాటులో పెట్టుకోవాలని సూచించారు. విద్యార్హతపత్రాలు, పదోతరగతి సర్టిఫికెట్, స్కూల్ స్టడీ సర్టిఫికెట్, కుల ధ్రువీకరణపత్రం, బీసీ అభ్యర్థులు నాన్ క్రీమిలేయర్ సర్టిఫికెట్, స్థానికత ధ్రువీకరణ, దివ్యాంగులు సదరం ధ్రువీకరణ పత్రం వెంటనే సమకూర్చుకోవాలని తెలిపారు. ఈ ధ్రువపత్రాలు లేకుంటే అదనంగా సమయం ఇవ్వడం, అభ్యంతరాలు పరిశీలించడం జరగదని వివరించారు.
గురుకుల పరీక్షలకు ఏర్పాట్లు పూర్తి
గురుకులాల్లో స్టాఫ్‌నర్సులు, లైబ్రేరియన్లు, పీఈటీ పోస్టులకు సెప్టెంబరు 17న నిర్వహించనున్న రాతపరీక్షకు ఏర్పాట్లు పూర్తిచేశామని తెలిపారు. స్టాఫ్‌నర్సు పోస్టులకు హైదరాబాద్ జిల్లాలో 46 పరీక్ష కేంద్రాలు ఏర్పాటు చేయగా, 21826 మంది హాజరవుతున్నారని పేర్కొన్నారు. ఇక లైబ్రేరియన్ పోస్టులకు 10454 మంది, పీఈటీ పోస్టులకు 15582 మంది హాజరుకానున్నట్లు వెల్లడించారు.
వ్యవసాయ బీఎస్సీ 20 లక్షలు?
* నిర్ణయించిన రుసుములకు మించి వసూళ్లు
* భారీగా దోచుకుంటున్న యాజమాన్యాలు
* విద్యార్థుల ఆసక్తిని గమనించి ఎత్తుగడ
* ఖర్చు భరించలేక తప్పని వలసలు
ఈనాడు - అమరావతి: వ్యవసాయ విద్యలోనూ డొనేషన్ల పర్వం మొదలైంది. ఇప్పటిదాకా ఇంజినీరింగ్‌, వైద్యవిద్యలో కనిపించిన ఈ సంస్కృతి ఇప్పుడు వ్యవసాయ విద్యకు పాకింది. ఇంజినీరింగ్‌లో 300కుపైగా కళాశాలలు ఉంటే పరిమిత కళాశాలల్లో కోర్సును బట్టి గరిష్ఠంగా రూ.ఐదు లక్షల వరకు తీసుకుంటున్నారు. వైద్యవిద్యలో నీట్‌ ప్రాతిపదికన ప్రభుత్వం ఖరారు చేసిన రుసుమునే తీసుకుంటున్నారు. ప్రస్తుతం వ్యవసాయ, ఉద్యాన బీఎస్సీకి మాత్రం ప్రైవేటు కళాశాలలు యాజమాన్య కోటా కింద సీటుకు రూ.20లక్షల వరకు దండుకుంటున్నాయి. ప్రభుత్వం అనుమతించిన రుసుమును మించి అదనంగా రూ.12లక్షల వరకు వసూలు చేస్తున్నాయి. ఇక్కడ అవకాశాల్లేక మన విద్యార్థులు పొరుగు రాష్ట్రాలకు వలసపోతున్నారంటూ ప్రేమ ఒలకబోసి అనుమతులు తెచ్చుకున్న యాజమాన్యాలు ఇప్పుడు వారి నుంచి ఎంత దండుకోవచ్చనే ఆలోచిస్తున్నాయి.
నాలుగేళ్ల బీఎస్సీకి...
ప్రభుత్వ వ్యవసాయ కళాశాలల్లో చదివే వారికి నాలుగేళ్లకు రూ.2.40లక్షలు ఖర్చవుతుంటే ప్రైవేటు కళాశాలల్లో మాత్రం రూ.20లక్షలకు మించుతున్నాయి. ఇతర రాష్ట్రాల్లో ఇది నాలుగేళ్లకు ఒకేసారి చెల్లించే మొత్తంగా రూ.10లక్షల నుంచి రూ.12లక్షల వరకు ఉంది.
* ఒక్కో ప్రైవేటు కళాశాలకు 60సీట్లు కేటాయించారు. ఇందులో 39 కన్వీనర్‌ కోటాలో భర్తీ చేస్తారు. మొదటి సెమిస్టర్‌కు రూ.1.14,640 చొప్పున తీసుకుంటున్నారు. రెండో సెమిస్టర్‌ నుంచి రూ.86,800 చొప్పున చెల్లించాలి. అంటే నాలుగేళ్లకు కలిపి సగటున రుసుములే రూ.8లక్షలవుతున్నాయి. యాజమాన్య కోటా సీటు అయితే రూ.12లక్షలు కలిపితే మొత్తం రూ.20లక్షల వరకు ఖర్చవుతోంది.

కొరవడిన నియంత్రణ
అయిదో డీన్స్‌ కమిటీ సిఫార్సుల ప్రకారం వ్యవసాయ కళాశాలల ఏర్పాటుకు ప్రమాణాలను నిర్దేశించారు. కళాశాలకు 110 ఎకరాల భూమి, 37 మంది ఆచార్యులు, సహాయ ఆచార్యులు, బోధనేతర సిబ్బంది తగిన సంఖ్యలో ఉండాలి. 18 రకాల పరిశోధనశాలలు ఏర్పాటుచేయాలి. ఇందుకయ్యే ఖర్చులను పరిగణనలోకి తీసుకున్నాకే ఫీజులను నిర్ణయించారు. దీనికి భిన్నంగా వసూళ్లు కొనసాగుతున్నాయి.
తప్పని వలసలు
రాష్ట్రం నుంచి ఏటా రెండు వేల మంది వివిధ రాష్ట్రాల్లో వ్యవసాయ, అనుబంధ రంగాల్లో చదువుకునేందుకు వెళ్తున్నారు. వారికి విద్యావకాశాలు కల్పించేందుకంటూ వ్యవసాయంలో ఆరు, ఉద్యానంలో నాలుగు ప్రైవేటు కళాశాలలు రాష్ట్రంలో ఏర్పాటయ్యాయి. ఇక్కడి వసూళ్ల నేపథ్యంలో పొరుగు రాష్ట్రాలే నయమనే భావనతోవలసలు ఆగడం లేదు.
పెరుగుతున్న ఆదరణ
వ్యవసాయ, అనుబంధ రంగాల్లో విద్యకు ఆదరణ పెరుగుతోంది. కొందరు వైద్యవిద్య రుసుములు భరించలేక వస్తుంటే, మరికొందరు ఆసక్తితో చేరుతున్నారు. పశువైద్య విద్య, దంతవైద్య విద్యలో సీట్లు వచ్చే అవకాశం ఉన్నా బీఎస్సీ వ్యవసాయం, ఉద్యాన కోర్సులు తీసుకుంటున్నారు. గతేడాది 13,800 మంది దరఖాస్తు చేస్తే ఈ ఏడాది 20,627 మంది ముందుకొచ్చారు.
* సుప్రీంకోర్టు ఆదేశానుసారం ఇంజినీరింగ్‌, వృత్తి విద్య కళాశాలల్లో రుసుములను.. ప్రవేశాలు, రుసుముల నియంత్రణ సంఘం నియంత్రిస్తుంది. ప్రతి మూడేళ్లకోసారి ఆదాయవ్యయాల పట్టికను ఏఎఫ్‌ఆర్‌సీ అధికారులు పరిశీలించి కళాశాలల ఫీజును ఖరారు చేస్తారు. బీఎస్సీ వ్యవసాయ, ఉద్యాన విద్యలో ఇది కొరవడింది.
అన్నీ కలిపే రుసుము నిర్ణయం
ప్రైవేటు వ్యవసాయ కళాశాలల్లో బీ కేటగిరీ సీట్లకు సెమిస్టర్ల వారీగా ఫీజులు నిర్ణయించామని ఆచార్య ఎన్జీ రంగా వ్యవసాయ విశ్వవిద్యాలయం రిజిస్ట్రార్‌ ఆచార్య టి.వి.సత్యనారాయణ తెలిపారు. దేనికెంత చెల్లించాలనేది నోటిఫికేషన్‌లోనే ఉంటుందని, ఆ మేరకే రుసుము తీసుకోవాలని, పైసా కూడా అదనంగా తీసుకోకూడదని పేర్కొన్నారు. కేపిటేషన్‌ రుసుము వసూలు చేయకూడదన్నారు.
17, 18 తేదీల్లో గురుకుల పోస్టులకు రాతపరీక్షలు
ఈనాడు, హైదరాబాద్: గురుకులాల్లో లైబ్రేరియన్, స్టాఫ్‌నర్సు, పీఈటీ పోస్టులకు రాతపరీక్షల్ని సెప్టెంబరు 17, 18 తేదీల్లో నిర్వహించనున్నట్లు టీఎస్‌పీఎస్సీ కార్యదర్శి వాణిప్రసాద్ ఒక ప్రకటనలో తెలిపారు. ఆయా పరీక్షలకు సంబంధించిన ప్రవేశపత్రాలు టీఎస్‌పీఎస్సీ వెబ్‌సైట్ నుంచి పొందవచ్చని పేర్కొన్నారు.
* స్టాఫ్‌నర్సు పరీక్ష 17వ తేదీ ఉదయం, మధ్యాహ్నం వేళల్లో జరుగుతుంది.
* లైబ్రేరియన్ పోస్టుకు 17 ఉదయం, 18 ఉదయం పరీక్ష ఉంటుంది.
* పీఈటీ పోస్టుకు 17 ఉదయం, 18 మధ్యాహ్నం పరీక్ష నిర్వహిస్తారు.
తెలుగు, ఉర్దూపోస్టుల తుది 'కీ' విడుదల
గురుకులాల్లో తెలుగు, ఉర్దూ పోస్టులకు సంబంధించి ప్రధాన పరీక్ష తుది 'కీని విడుదల చేసినట్లు టీఎస్‌పీఎస్సీ కార్యదర్శి తెలిపారు. 16వ తేదీ నుంచి కమిషన్ వెబ్‌సైట్లో అందుబాటులో ఉంటుందని, ఈ 'కీ' పై అభ్యంతరాలను పరిగణనలోకి తీసుకోబోమని వెల్లడించారు.
25న గురుకుల అధ్యాపకుల పోస్టుల ప్రాథమిక పరీక్ష
గురుకులాల్లో జూనియర్, డిగ్రీ అధ్యాపకుల(తెలుగుభాష) పోస్టులకు సంబంధించి ఆన్‌లైన్ ప్రాథమిక పరీక్షను సెప్టెంబరు 25న నిర్వహించనున్నట్లు టీఎస్‌పీఎస్సీ తెలిపింది.పూర్తి వివరాల కోసం టీఎస్‌పీఎస్సీ వెబ్‌సైట్ చూడొచ్చు.
క్రీడల కోటాలో సముచిత వాటా
* ఎంబీబీఎస్‌, దంత వైద్య విద్య సీట్ల భర్తీ తీరిది
* ఎంబీబీఎస్‌లో అమ్మాయిలకు 2428 సీట్లు.. అబ్బాయిలకు 1818
* దంత వైద్య విద్యలో 824.. 228
* డబ్బు కట్టయినా కుమార్తెలను వైద్యులను చేస్తాం: తల్లిదండ్రుల మనోగతం
ఈనాడు - అమరావతి: ఎన్‌సీసీ, క్రీడల్లో రాణించేవారికి వైద్య విద్య సీట్లు మరింత చేరువవుతున్నాయి. ఎంబీబీఎస్‌, దంత వైద్య విద్య ప్రథమ సంవత్సరం(2017-18) సీట్ల భర్తీ సరళిని పరిశీలిస్తే ఈ విషయం స్పష్టమవుతోంది. విద్యార్థులకు చదువుతోపాటు ఆటలపట్ల ఆసక్తి ఉన్నా తగిన సౌకర్యాలు, సమయం లేదన్న ఉద్దేశంతో అటు వైపు దృష్టి పెట్టడం లేదు. దీనివల్ల స్వల్ప తేడాతో వెనకబడుతున్నారు. కన్వీనర్‌ కోటాలో సీటు పొందలేక ఎక్కువ ఫీజు కట్టి బీ లేదా సీ కేటగిరి సీట్లు పొందాల్సి వస్తోంది. లేదంటే వ్యయప్రయాసలకోర్చి పొరుగు రాష్ట్రాలు, విదేశాలకు వెళ్లాల్సి వస్తోంది. ఇదే క్రీడలు లేదా ఎన్‌సీసీలో ప్రతిభ కనబరిచిన వారికి నీట్‌లో పెద్ద ర్యాంకు వచ్చినప్పటికీ సామాజికవర్గాలవారీగా సీట్లు లభిస్తున్నాయి. వైద్య విద్య కన్వీనర్‌ కోటాలో చివరి సీటు నీట్‌ ర్యాంకర్‌ 1,57,161కు వచ్చింది. ఇదే ఎన్‌సీసీలోనైతే 5,37,181, క్రీడల కోటాలో 4,44,935 ర్యాంకర్‌కు సీటు లభించింది. ఎంబీబీఎస్‌లో కన్వీనర్‌ కోటా కింద 3152, బి కేటగిరిలో 886, సి కేటగిరిలో 412 సీట్లున్నాయి.
ముందుజాగ్రత్త..
కన్వీనర్‌ కోటాలో ఎంబీబీఎస్‌ సీటు పొందినవారు కేవలం రూ.10,500 మాత్రమే చెల్లించాలి. ఎంబీబీఎస్‌ లక్ష్యంగా కష్టపడుతున్న విద్యార్థులు కొందరు ముందుచూపుతో, ఆసక్తితో ఎన్‌సీసీ, క్రీడల్లోనూ ప్రావీణ్యాన్ని పొందుతున్నారు. ఎన్‌సీసీ శిక్షణ, క్రీడలు పరిమిత కళాశాలల్లోనే కొనసాగుతున్నాయి. కార్పొరేట్‌ కళాశాలలు అటువైపే చూడడంలేదు. ఈసారి ఎంబీబీఎస్‌లో ఈ కోటాలో క్రీడలు 13, ఎన్‌సీసీ 32, మాజీ సైనికోద్యోగుల కోటాలో 29, అంగవైకల్యం కింద 17, పోలీసుమ్యాట్రిక్‌ సర్టిఫికేట్‌ కింద-2, ఆంగ్లోఇండియన్‌ కోటాలో ఒక సీటు భర్తీ చేశారు. విధి నిర్వహణలో ధైర్యసాహసాలనుప్రదర్శించి ప్రాణాలు కోల్పోయిన పోలీసుల పిల్లలకు పోలీసుశాఖ పోలీసు మ్యాట్రిక్‌ సర్టిఫికేట్‌(పీఎంసీ) ఇస్తుంది. ఆ కోటాలోని వారు లేకుంటే రెండు సీట్లను జనరల్‌ విభాగానికి బదిలీ చేస్తారు.
అన్నింటా అమ్మాయిలే!: ఎంబీబీఎస్‌, దంత వైద్య విద్యలో సీట్లు పొందిన వారిలో అమ్మాయిలే ఎక్కువ. బీ కేటగిరి (ఏడాదికి రూ.12 లక్షలు), సీ (ఏడాదికి రూ.36 లక్షలలోపు) ఫీజు ఎక్కువగా ఉన్నప్పటికీ తల్లిదండ్రులు సాహసిస్తున్నారు. డబ్బు కట్టయినా కుమార్తెలను వైద్యులను చేస్తామంటున్నారు. ఎంబీబీఎస్‌లో 2428 మంది అమ్మాయిలు, 1818 మంది అబ్బాయిలు చేరారు. ఎంబీబీఎస్‌తో పోలిస్తే దంత వైద్య విద్య వార్షిక ఫీజు తక్కువ. దంత వైద్య విద్యలో 824 మంది అమ్మాయిలు, 228 మంది అబ్బాయిలు ప్రవేశాలు పొందారు.
నెలాఖరులోగా వర్సిటీల నియామక ప్రకటనలు
* ఏపీపీఎస్సీ ద్వారా డిసెంబరులోగా రాత పరీక్ష
* మంత్రి గంటా వెల్లడి
ఈనాడు, అమరావతి: ఎట్టకేలకు విశ్వవిద్యాలయాల అధ్యాపకుల పోస్టుల భర్తీకి మోక్షం లభించనుంది. ప్రతి విశ్వవిద్యాలయం సెప్టెంబరు నెలాఖరునాటికి సహాయ ఆచార్యుల, అధ్యాపకుల పోస్టుల భర్తీకి నోటిఫికేషన్లను జారీ చేయాలని ఆంధ్రప్రదేశ్ రాష్ట్ర ప్రభుత్వం ఆదేశించింది. దీని ప్రకారం విశ్వవిద్యాలయాలు దరఖాస్తులను సబ్జెక్టులవారీగా ఆహ్వానించి పరిశీలించాక ఏపీపీఎస్సీకి అర్హుల జాబితాను పంపుతాయి. ఈ జాబితాను అనుసరించి ఏపీపీఎస్సీ రాత పరీక్షను నిర్వహిస్తుంది. అభ్యర్థులకు వచ్చిన మార్కుల వివరాలను సంబంధిత విశ్వవిద్యాలయాలకు పంపుతుంది. ఈ వివరాలతో విశ్వవిద్యాలయాలు యూజీసీ నిబంధనలను అనుసరించి మౌఖిక పరీక్షను నిర్వహిస్తాయి. గతంలో ఒక్కోచోట నియామక రాత పరీక్ష ఉండేది కాదు. ఇప్పుడు తప్పనిసరి చేశారు. విశ్వవిద్యాలయాల పాలకమండళ్ల సమావేశంలో నిర్ణయించిన ప్రకారం ఏపీపీఎస్సీ ద్వారా డిసెంబరులోగా రాత పరీక్ష జరగనుంది. వివాదాలకు దూరంగా నియామకాల్లో రిజర్వేషన్ల నిబంధనలను తప్పనిసరిగా పాటించాలని మంత్రి గంటా శ్రీనివాసరావు స్పష్టంచేశారు. సచివాలయంలో తన ఛాంబరు నుంచి గురువారం (సెప్టెంబరు 14) విశ్వవిద్యాలయాల ఉపకులపతులతో మంత్రి వీడియో సమావేశం ద్వారా నాక్ గ్రేడ్‌ను సాధించేందుకు విశ్వవిద్యాలయాలు చేపడుతున్న చర్యలను ఆరా తీశారు. ఈ సందర్భంగా ఆయన మాట్లాడుతూ ముఖ్యమంత్రి నిర్ణయం మేరకు అన్ని రకాల విద్యాసంస్థల్లో పీజీ వరకు చదివే విద్యార్థుల హాజరు వివరాలను బయోమెట్రిక్ ద్వారా సీఎం డ్యాష్‌బోర్డుకు అనుసంధానించాలన్నారు. బయోమెట్రిక్ విధానంలో హాజరు నమోదుకు కొన్ని విశ్వవిద్యాలయాలు జాప్యం చేస్తుండటంపై అసహనం వ్యక్తంచేశారు. సమావేశంలో ఉన్నత విద్యాశాఖ ముఖ్య కార్యదర్శి ఆదిత్యనాథ్‌దాస్, కళాశాల సాంకేతిక విద్యాశాఖ కమిషనర్ ఫండాదాస్, ఉన్నత విద్యామండలి ఛైర్మన్ విజయ్‌రాజ్ తదితరులు పాల్గొన్నారు.
గ్రూప్‌-2కు నియామకాలకు తొలగిన అడ్డంకి
హైదరాబాద్‌: తెలంగాణ రాష్ట్రంలో గ్రూప్‌-2 ఉద్యోగాల నియామక ప్రక్రియకు ప్రధాన అడ్డంకి తొలగిపోయింది. అభ్యర్థుల ధ్రువ పత్రాల పరిశీలన కొనసాగించేందుకు హైకోర్టు పచ్చజెండా వూపింది. సుమారు 1000 ఉద్యోగాల భర్తీ కోసం టీఎస్‌పీఎస్సీ రాత పరీక్ష నిర్వహించి ఒక్కో పోస్టుకు ముగ్గురు చొప్పున దరఖాస్తుల పరిశీలనకు ఎంపికచేసిన విషయం తెలిసిందే. దరఖాస్తుల పరిశీలన ప్రక్రియ ప్రారంభమయ్యాక జవాబు పత్రాల మూల్యాంకనం, అభ్యర్థుల ఎంపికపై పలువురు హైకోర్టును ఆశ్రయించారు. ఆ పిటిషన్‌పై విచారించిన న్యాయస్థానం నియామక ప్రక్రియపై స్టే విధిస్తూ గతంలో ఉత్తర్వులు ఇచ్చింది. స్టే గడువు ముగియడంతో సెప్టెంబరు 14న హైకోర్టులో మరోసారి దీనిపై విచారణ జరిగింది. నియామక ప్రక్రియను కొనసాగించేందుకు అనుమతి ఇవ్వాలని టీఎస్‌పీఎస్సీ కోరగా.. స్టే పొడిగించాలని పిటిషనర్లు కోరారు. దీంతో స్టే పొడిగించేందుకు నిరాకరించిన ఉన్నత న్యాయస్థానం ధ్రువపత్రాల పరిశీలన చేపట్టేందుకు టీఎస్పీఎస్సీకి అనుమతి ఇచ్చింది. ఏవైనా అభ్యంతరాలు ఉంటే తదుపరి విచారణలో చెప్పాలని పిటిషనర్లకు సూచించింది. అనంతరం ఈ విచారణను అక్టోబర్‌ 9నాటికి వాయిదా వేసింది. హైకోర్టు అనుమతి లభించడంతో ధ్రువీకరణ పత్రాల పరిశీలనకు ఒకట్రెండు రోజుల్లో షెడ్యూల్‌ ప్రకటించేందుకు టీఎస్‌పీఎస్సీ సన్నాహాలు చేస్తోంది.
ఉపాధికి హిందీ
‘హిందీ దివస్‌’ నేపథ్యంలో ఈ భాషా సాహిత్యాల విద్యావకాశాలు, దీనిద్వారా లభించే ఉపాధి మార్గాల గురించి తెలుసుకుందాం!
ప్రభుత్వపాలనలో శాసనాలు, చట్టాలు రూపొందించే భాషనే రాజభాషగా చెపుతారు. 1949లో సెప్టెంబరు 14న భారత రిపబ్లిక్‌కు హిందీని రాజభాషగా ఆమోదించారు. అన్ని రాష్ట్రాల్లో హిందీ భాషను అభివృద్ధి చేసేందుకు కేంద్రప్రభుత్వం కృషి చేస్తోంది. హిందీ అధ్యయనం కోసం విద్యాసంస్థల స్థాపన, పథకాలు ప్రవేశపెట్టడం, అనువాదాలనూ, భాషా సాహిత్యాలనూ ప్రోత్సహించడం వంటివి నిర్వహిస్తోంది.
ఆంధ్రప్రదేశ్‌, తెలంగాణ రాష్ట్రాల్లో హిందీ అధ్యయనం కోసం భాషా ప్రచారసంస్థలు వివిధ కోర్సులు అందిస్తున్నాయి ఇవి ఎంతోమంది విద్యార్థులను హిందీ భాషా పండితులుగా తీర్చిదిద్దుతున్నాయి. ఉద్యోగ, ఉపాధి అవకాశాలను కల్పిస్తున్నాయి.
దక్షిణభారత హిందీ ప్రచార సభ నిర్వహించే పండిట్‌ ట్రెయినింగ్‌ కోర్సుల శిక్షణ కేంద్రాలు విజయవాడ, తెనాలి, అవనిగడ్డ, రాజమండ్రి, గుంతకల్‌, విశాఖపట్నం ప్రాంతాల్లో ఉన్నాయి.
రెగ్యులర్‌ బి.ఇడి కోర్సులు
దక్షిణ భారత హిందీ ప్రచారసభ (మద్రాసు) ఆధ్వర్యంలో ఉభయ రాష్ట్రాల్లో నడుస్తున్న మూడు కళాశాలల్లో రెండు సంవత్సరాల వ్యవధిగల హిందీ బి.ఇడి కోర్సును నిర్వహిస్తున్నారు.
హైదరాబాద్‌- ఖైరతాబాద్‌, విజయవాడ మాచవరం, విశాఖపట్నాల్లో వంద చొప్పున మొత్తం 300 సీట్లు అందుబాటులో ఉంటాయి. బీఏ/బీఎస్సీ/బీకాం డిగ్రీలో హిందీ ద్వితీయ భాషగా చదివివుండాలి. కనీసం 50 శాతం మార్కులు వచ్చి ఉండాలి. ఎస్సీ, ఎస్‌టీ, బీసీవారు 45% మార్కులతో ఉత్తీర్ణులై ఉండాలి.
రెగ్యులర్‌ హిందీ బి.ఇడి కోర్సుల్లో ప్రవేశానికి ఏటా జూన్‌/జులైలలో దక్షిణ భారత హిందీ ప్రచారసభ నుంచి ప్రకటన వెలువడుతుంది.
దూరవిద్యా కోర్సులు
బిఏ (హిందీ): అర్హత- 10+2తో హిందీ ద్వితీయ భాష/విశారద, ప్రవీణ, తత్సమాన కోర్సులు చదివి ఉండాలి. (10+2+ విశారద+ ప్రవీణ).
ఎంఏ (హిందీ): అర్హత- 10+2+3తో ప్రవీణ లేదా బిఏ (హిందీ) డిగ్రీ
ఎంఫిల్‌ (హిందీ): అర్హత- ఎంఏ హిందీ సెకండ్‌ క్లాస్‌లో ఉత్తీర్ణత (10+2+3) కలిగివుండాలి.
పీహెచ్‌డీ (హిందీ): అర్హత- ఎంఫిల్‌ (హిందీ/గ్రాడ్యుయేషన్‌ స్థాయిలో 5 సం॥ బోధన అనుభవం/ఎంఏ. హిందీ-ప్రవేశపరీక్షతో పాటు మౌఖిక పరీక్ష ఉంటుంది.
వివరాలకు డైరెక్టర్‌, డిస్టె్టన్స్‌ ఎడ్యుకేషన్‌, దక్షిణభారత హిందీ ప్రచారసభ, త్యాగరాయనగర్‌, మద్రాసు 600017ను సంప్రదించవచ్చు.
హిందీ ప్రచారసభ హైదరాబాద్
హిందీ భాషాభివృద్ధి కోసం 1935 సంవత్సరంలో దుర్గాబాయ్‌ దేశ్‌ముఖ్‌ చొరవతో హైదరాబాద్‌ ఆంధ్రమహిళాసభ ప్రాంగణంలో హిందీ ప్రచారసభను ఏర్పాటు చేశారు. ఉమ్మడి ఆంధ్రప్రదేశ్‌లో ఏర్పాటయిన సంస్థ ఇది. ఈ సంస్థలోని కోర్సులకు ప్రభుత్వ గుర్తింపు ఉంది.

విద్వాన్‌ కోర్సు పూర్తి చేసుకున్నవారు హిందీ పండిట్‌ శిక్షణ కోర్సు చేయడానికి అర్హత పొందుతారు. ఈ అర్హత పరీక్షలు మార్చి/సెప్టెంబర్‌ నెలల్లో జరుగుతాయి. హైదరాబాద్‌ హిందీ ప్రచారసభ ఏడాది కాలపరిమితి ఉన్న హిందీ పండిట్‌ ట్రెయినింగ్‌ (హిందీ శిక్షక్‌, ప్రశిక్షణ్‌) కోర్సులను కూడా రాష్ట్రవ్యాప్తంగా గుర్తింపు పొందిన పండిట్‌ ట్రైనింగ్‌ కళాశాల్లో నిర్వహిస్తుంది.
చిరునామా: హిందీ ప్రచారసభ, హిందీ భవన్‌¯ లక్ష్మీనారాయణ గుప్తా మార్గ్‌, నాంపల్లి స్టేషన్‌ రోడ్‌, హైదరాబాద్‌-500001. ఈ సభ ద్వారానే తెలుగు రాష్ట్రాల్లో ప్రతి ఏడాదీ ఎల్‌పీ సెట్‌ (లాంగ్వేజ్‌ పండిట్‌ కామన్‌ ఎంట్రన్స్‌ టెస్ట్‌) ద్వారా ప్రవేశాలుంటాయి. 100 ప్రశ్నలకు 100 మార్కులతో బహుళైచ్ఛిక జవాబులిచ్చే ప్రశ్నపత్రం ఉంటుంది. మార్కుల ఆధారంగా ర్యాంకులు కేటాయించి కౌన్సెలింగ్‌ ద్వారా వివిధ శిక్షణ కేంద్రాల్లో ప్రవేశం కల్పిస్తారు. పండిట్‌కోర్సు పూర్తి చేసిన తరువాత రాష్ట్ర ప్రభుత్వం నిర్వహించే ఉపాధ్యాయ నియామక పరీక్షకు (టెట్‌)కు అర్హులవుతారు.
హిందీ సాహిత్య సమ్మేళన్‌ అలహాబాద్
హిందీ భాషేతర ప్రాంతాల్లో హిందీ భాష ప్రచారంకోసం 1910 సంవత్సరంలో పురుషోత్తమ్‌దాస్‌ టాండన్‌ సారథ్యంలో ఏర్పడింది.

విద్వాన్‌/ప్రవీణ/మధ్యమ (విశారద)లో ఏదైన కోర్సు చేసిన అభ్యర్థులు లేదా బీఏ/బీకామ్‌/బీఎస్‌సీ కోర్సులలో హిందీ సబ్జెక్టులో చదివినవారు బీఎడ్‌ చేయడానికి అర్హులు.
బి.ఎ., బి.కాం., బీఎస్‌సీ కోర్సుల్లో హిందీ సబ్జెక్టుతో చదివినవారు బీఎడ్‌ చేయడానికి అర్హులు. ప్రవేశ పరీక్ష ద్వారా అభ్యర్థుల ఎంపిక జరుగుతుంది. సెకండరీ గ్రేడ్‌ టీచర్లుగా నియమితులై అనంతరం తమ విద్యార్హతలను పెంచుకునే ప్రయత్నంలో ఉన్న అభ్యర్థుల ప్రయోజన నిమిత్తం వివిధ సంస్థలు దూరవిద్యావిధానంలో సైతం హిందీ కోర్సులను అందిస్తున్నాయి. ఇంటర్మీడియట్‌ పూర్తి చేసి విద్వాన్‌/ప్రవీణ/మధ్యమ (విశారద) కోర్సు చేసి వుండాలి. అయితే 3 సంవత్సరాలు గుర్తింపు ఉన్న పాఠశాలలో బోధ¿న అనుభవం వుండాలి. ఆసక్తి ఉన్నవారు ఈ హిందీ విద్యా కేంద్రాలలో సంప్రదించవచ్చు.
1)కేంద్రీయ హిందీ సంస్థాన్‌, హిందీ సంస్థాన్‌ మార్గ్‌, ఆగ్రా.
2) కేంద్రీయ హిందీ సంస్థాన్‌, 2-2-12/5, దుర్గాబాయ్‌ దేశ్‌ముఖ్‌ రోడు, హైదరాబాద్‌- 500007 3) కేంద్రీయ హిందీ సంస్థాన్‌, సూర్యముఖ్‌ భవన్‌, శ్రీ అరవిందమార్గ్‌ న్యూదిల్లీ.
జాతీయ స్థాయిలో డిగ్రీ సమాన అర్హత ఉన్న విద్వాన్‌/ప్రవీణ/మధ్యమ (విశారద) పరీక్షల్లో ఉత్తీర్ణత సాదించినవారు ఏపీపీఎస్‌సీ, టీఎస్‌పీఎస్‌సీ నిర్వహించే పోటీ పరీక్షలకు అర్హులు ఈ కోర్సులను ప్రాథమికోన్నత దశ విద్యార్థుల నుంచి వ్యాపారులు, గృహిణులు, పదవీవిరమణ చేసినవారు సైతం చేయడానికి అవకాశం కల్పించారు. హిందీ ప్రచార సభలు, స్వయంప్రతిపత్తి గల విశ్వవిద్యాలయాలు, ఇతర హిందీ విద్యాసంస్థలు ఈ కోర్సులను అందిస్తుంటాయి. ఆసక్తిగల అభ్యర్థులు హిందీ ప్రచారకులను గానీ, హిందీ అధ్యాపకుల వద్ద గానీ పూర్తి వివరాలు పొందవచ్చు.
కేంద్ర ప్రభుత్వరంగ ఉద్యోగాల్లో....
సివిల్‌ సర్వీసెస్‌ పరీక్షలో.. జనరల్‌ స్టడీస్‌లో వచ్చే ప్రశ్నలు ఆంగ్లంతోపాటు హిందీ భాషలో వుంటాయి. ఆంగ్లంలో అవగాహనలోపం ఏర్పడితే హిందీని బట్టి అర్థం చేసుకునే వీలు ఈ భాష తెలిసినవారికే ఉంటుంది.
పైన తెలిపిన హిందీ కోర్సులను అధ్యయనం చేయడం ద్వారా బోధన రంగంలోనే కాకుండా, ఇతర వృత్తిపరమైన రంగాలలో ఉపాధి అవకాశాలు పొందవచ్చు. తపాలా, భారత్‌ సంచార్‌ నిగమ్‌, జాతీయ బ్యాంకులు, న్యాయస్థానాలు, జీవిత బీమా, మీడియా, చట్టసభల్లో ట్రాన్స్‌లేటర్లు, జర్నలిస్ట్‌ ఉద్యోగాలకు హిందీ భాషా పరిజ్ఞానం ఉపయోగపడుతుంది.
హిందీ భాషలో ప్రావీణ్యం వుంటే ఈ క్రింది వెబ్‌సైట్ల ద్వారా ఉపాధి అవకాశాలు పొందవచ్చు.
www.rajbhasha.nic.in
www.ildc.in
www.bhashaindia.com
మౌలానా ఆజాద్‌ విశ్వవిద్యాలయం ద్వారా హిందీలో ప్రావీణ్యం సాధించినవారికి ఉపకారవేతనాలు అందిస్తూ భాషాభ్యుదయానికి కృషి చేస్తోంది.
ఇదీ ప్రత్యేకత
భారతప్రభుత్వ పాలనలో హిందీ భాష నాలుగు రూపాల్లో కీలక పాత్ర పోషిస్తూ తన ప్రత్యేకత నిలబెట్టుకుంటోంది. విధానసభలు: రాజ్యసభ, లోక్‌సభల్లో ఉపయోగించే భాష హిందీ. ఈ సభల ద్వారా ఏ చట్టం చేయాలన్నా ముందుగా హిందీ భాషలోనే రూపొందించి ఆమోదించాలి.
కేంద్ర కార్యాలయాలు: కేంద్రప్రభుత్వ అధీనంలో నడిచే ఏ కార్యాలయంలోనైనా కార్యకలాపాలన్నీ హిందీ భాషలోనే కొనసాగుతాయి.
న్యాయపాలన: ఉన్నత న్యాయస్థానంలో ఇచ్చే తీర్పులు, ఉత్తర్వులన్నీ రాజభాషలోనే రూపొందిస్తారు.
శిక్షణ మాధ్యమభాష: దేశవ్యాప్తంగా పదో తరగతి వరకు ఉండే విద్యలో హిందీ సబ్జెక్టు తప్పనిసరి. ఇంటరు, డిగ్రీలలో ద్వితీయ భాషగా హిందీని అభ్యసించవచ్చు.
- బొల్లు రామ్మోహ‌న్‌
ఫారెస్ట్ రేంజ్ అధికారి ఉద్యోగ వయోపరిమితి
* 28 నుంచి 31 ఏళ్లకు పెంపు
* దస్త్రంపై సంతకం చేసిన సీఎం కేసీఆర్
ఈనాడు-హైదరాబాద్: అటవీశాఖలో ఫారెస్ట్ రేంజ్ ఆఫీసర్ ఉద్యోగం కోసం దరఖాస్తు చేసే అభ్యర్థుల వయో పరిమితిని మూడు సంవత్సరాలు పెంచుతూ తెలంగాణ ప్రభుత్వం నిర్ణయం తీసుకుంది. సంబంధిత దస్త్రంపై ముఖ్యమంత్రి కేసీఆర్ సంతకం చేశారు. అటవీశాఖ అధికారులు ఈ మేరకు టీఎస్‌పీఎస్సీకి బుధవారం (సెప్టెంబరు 13) లేఖ రాశారు.
2014లో ఫారెస్ట్ రేంజ్ అధికారి పోస్టుల భర్తీకి ప్రకటన విడుదలైంది. వయోపరిమితి 28 సంవత్సరాలుగా నిర్ధారించారు. రాష్ట్ర విభజన నేపథ్యంలో నియామక ప్రక్రియ మధ్యలో నిలిచిపోయింది. తాము మూడేళ్లు నష్టపోయాయని, ఈ మేరకు వయోపరిమితి పెంచాలన్న నిరుద్యోగ అభ్యర్థుల విజ్ఞప్తి మేరకు 31 ఏళ్లకు పెంచుతూ నిర్ణయం తీసుకున్నారు. ఉద్యోగాల కోసం ఆన్‌లైన్‌లో దరఖాస్తు చేసుకునే గడువును కూడా పెంచాలని టీఎస్‌పీఎస్సీకి లేఖ రాసినట్లు అటవీశాఖ తెలిపింది.
దేశభక్తి.. కొలువులతో భుక్తి
* సైనిక, నౌక, వైమానిక దళాల్లో ఉద్యోగాల వైపు గ్రామీణ యువత ఆసక్తి
* రాష్ట్రం నుంచి ఏటా 1.50 లక్షల నుంచి 2 లక్షల మంది పోటీ
* మూడు వేల నుంచి నాలుగు వేల మందికి అవకాశం
ఈనాడు - అమరావతి: ఆంధ్రప్రదేశ్‌ గ్రామీణ యువత దేశ రక్షణ రంగ ఉద్యోగాల వైపు ఆసక్తి కనబరుస్తోంది. సైనిక, నౌక, వైమానిక దళాల్లో కొలువుల కోసం రాష్ట్రం నుంచి ఏటా దాదాపు 1.50 లక్షల నుంచి 2 లక్షల మంది పోటీ పడుతున్నారు. వారిలో మూడు వేల మంది నుంచి నాలుగు వేల మంది వరకూ ఎంపికవుతున్నారు. పదో తరగతి, ఇంటర్మీడియెట్‌ విద్యార్హతతోనే ఈ పోస్టుల కోసం తలపడే వీలుండటం, చిన్న వయసులోనే కేంద్ర ప్రభుత్వ ఉద్యోగిగా మారేందుకు అవకాశం ఉండటంతో రక్షణ రంగ కొలువులు గ్రామీణ ప్రాంత యువతను అమితంగా ఆకర్షిస్తున్నాయి. ఆర్మీ, ఎయిర్‌ఫోర్స్‌ ఉద్యోగాలకు సంబంధించి ఏటా క్రమం తప్పకుండా ఓపెన్‌ ర్యాలీలు నిర్వహిస్తుండటం వాటిలో పాల్గొనడం సులువుగా ఉండటంతో బరిలో నిలుస్తున్న వారి సంఖ్య గణనీయంగా పెరుగుతోంది. రాష్ట్రంలో ఎక్కడ ఆర్మీ నియామక ర్యాలీ జరిగినా 40 వేల మంది వరకూ పాల్గొంటున్నారు. ఎయిర్‌ఫోర్స్‌ ర్యాలీలకు సంబంధించి కూడా ఒక్కో దాంట్లో కనీసం 15 వేల నుంచి 20 వేల మంది వరకు తలపడుతున్నారు. నేవీ ఉద్యోగాలకు ఓపెన్‌ర్యాలీలు లేకపోయినప్పటికీ క్రమం తప్పకుండా నోటిఫికేషన్లు ఇస్తుండటంతో వాటి కోసం పోటీపడుతున్న వారూ వేలల్లోనే ఉంటున్నారు.
దారుఢ్యం... సైన్య మార్గం
రక్షణ రంగ ఉద్యోగాల కోసం సన్నద్ధమయ్యే వారికి అవకాశాలు మెండుగా ఉంటాయి. ఏటా కనీసం ఎనిమిది నుంచి పది వరకూ అవకాశాలు లభిస్తున్నాయి. సైనిక ఉద్యోగాలకు సంబంధించి రాష్ట్రంలో ఏటా రెండు నియామక ర్యాలీలు జరుగుతున్నాయి. వైమానిక, నౌకా విభాగాల్లో సాంకేతిక, సాంకేతికేతర ఉద్యోగాలకు సంబంధించి రెండేసి సార్లు చొప్పున ఏడాదిలో ఎనిమిది సార్లు నియామక ప్రక్రియలు నిర్వహిస్తున్నారు. నోటిఫికేషన్ల కోసం సంవత్సరాల తరబడి ఎదురుచూడటం కాకుండా ఎప్పటికప్పుడు పోటీలో పాల్గొనేందుకు అవకాశం ఉండటం, ఒక దాంట్లో ఉద్యోగం దక్కించుకోలేకపోయినా మరో దాంట్లో సాధించే అవకాశం ఉండటంతో పట్టు వదలని విక్రమార్కుల్లా ప్రయత్నిస్తున్నారు. రెండు, మూడేళ్ల కఠోర సాధనతో ఉద్యోగాలు సాధిస్తున్నారు. రాష్ట్రం నుంచి ఎక్కువ మంది ఆర్మీకి ఎంపికవుతున్నారు. తర్వాత స్థానం ఎయిర్‌ఫోర్స్‌ది కాగా, నేవీకితక్కువ మంది ఎంపికవుతున్నారు.
ఉత్తరాంధ్ర జిల్లా నుంచే అధికంగా పోటీ
ఆర్మీ ఉద్యోగాలకు సంబంధించి ప్రధానంగా శ్రీకాకుళం, విజయనగరం జిల్లాల నుంచి ఎక్కువ మంది అభ్యర్థులు పోటీ పడుతున్నారు. నెల్లూరు, కృష్ణా జిల్లాల నుంచి ఈ ఉద్యోగాల కోసం పోటీ అభ్యర్థుల సంఖ్య చాలా తక్కువగా ఉంటోంది. ఉత్తరాంధ్ర జిల్లాల తర్వాత గుంటూరు, ప్రకాశం, రాయలసీమ జిల్లాల నుంచి ఎక్కువ మంది తలపడుతున్నారు. 80 శాతం మంది గ్రామీణ నేపథ్యం కలిగిన వారు. రైతులు, రైతు కూలీలు, ఆర్థికంగా వెనుకబడిన కుటుంబాల నుంచి వచ్చిన అభ్యర్థులే అధికంగా ఉంటున్నారు. విజయవాడలో తాజాగా జరిగిన ఎయిర్‌ఫోర్స్‌ నియామక ర్యాలీలో పాల్గొని బృంద చర్చలకు ఎంపికైన 20 మంది అభ్యర్థులతో ‘ఈనాడు’ ప్రతినిధి మాట్లాడగా వారిలో 16 మంది గ్రామీణ నేపథ్యం కలిగిన వారే. వారంతా రైతులు, రైతు కూలీలు, దినసరి కూలీల కుటుంబాల నుంచి వచ్చిన వారే కావడం గమనార్హం.
పదో తరగతి నుంచే లక్ష్యం దిశగా అడుగులు
రక్షణ రంగంలో స్థిరపడాలనే వారు పదో తరగతి నుంచే ఆ దిశగా స్పష్టమైన లక్ష్యం ఏర్పాటు చేసుకుని సాధన ప్రారంభిస్తున్నారు. ఇంటర్‌ పూర్తయ్యేసరికి ఈ ఉద్యోగాల కోసం దరఖాస్తు చేసుకునేందుకు, పోటీ పడేందుకు అవసరమైన వయో అర్హత లభిస్తుండటంతో అప్పటి నుంచి అవకాశమున్న నియామక ర్యాలీల్లో పాల్గొనడం, వాటిలో ఎంపిక కాకపోతే లోపాలను సరిదిద్దుకుని మరో దానికి సన్నద్ధం కావడం చేస్తున్నారు. సాధారణంగా రక్షణ రంగంలో ఎక్కువశాతం ఉద్యోగాలకు 17-21 ఏళ్ల మధ్య వయోవర్గానికి చెందిన అభ్యర్థులే అర్హులు. ఈ లెక్కన ఏ అభ్యర్థైనా గరిష్ఠంగా నాలుగేళ్లలోపే ఉద్యోగం సాధించాల్సి ఉంటుంది. అందుకే వీటి సాధన లక్ష్యంగా పెట్టుకున్న వారు కనీసం రెండు, మూడేళ్ల పాటు కఠోరశ్రమ చేస్తున్నారు. రాష్ట్రం నుంచి ఈ ఉద్యోగాలు సాధిస్తున్న యువత సగటు వయసు 18 ఏళ్లుగా ఉంటోంది. పాఠశాల స్థాయి నుంచి క్రీడలు, వ్యాయామం పట్ల ఆసక్తి చూపిస్తూ వాటిల్లో చురుగ్గా పాల్గొనే వారికి ఆర్మీ ఉద్యోగాలకు సంబంధించిన పోటీల్లో విజయం సాధించడం కొంత సులభతరమవుతుండగా, శారీరక దారుఢ్యంతో పాటు రాతపరీక్షల్లోనూ రాణించగలిగే తెలివితేటలు ఉన్నవారు, వాటిని సాధన చేస్తున్న వారు ఎక్కువగా ఎయిర్‌ఫోర్స్‌, నేవీ ఉద్యోగాలకు ఎంపికవుతున్నారు.
వేకువజామునే లేచింది మొదలు...
సైనిక, వైమానిక ఉద్యోగాలకు సంబంధించి తొలుత పరుగుపందెం, శారీరక దారుఢ్య పరీక్షలనే ఎదుర్కోవల్సి ఉండటంతో వీటి కోసం సన్నద్ధమవుతున్న వారి దిన చర్య ప్రతి రోజూ వేకువజామునే మొదలవుతుంది. ఉదయాన్నే దాదాపు 5 కి.మీ. పరుగు పెట్టడం, ఆ తర్వాత శారీరక దారుఢ్య పరీక్షల సందర్భంగా ఎదుర్కొనే అంశాలకు సంబంధించిన సాధనకు అవసరమైన వ్యాయామాలు చేయడాన్ని తమ దినచర్యలో భాగంగా మార్చుకుంటున్నారు. రోజు రెండు నుంచి మూడు గంటల పాటు సాధన చేస్తానని గుంటూరు జిల్లాకు కర్లపాలెం మండలం యరకవారిపాలెం గ్రామానికి చెందిన ఎం.సాంబశివరావు ‘‘ఈనాడు’’కు తెలిపారు. సాధారణంగా ఓపెన్‌ ర్యాలీల్లో 1.6 కి.మీ. పరుగు పందెంను 5 నిమిషాల 30 సెకన్ల లోపు పూర్తి చేయాల్సి ఉంటుంది. మరికొందరైతే పదోతరగతి పూర్తయిన వెంటనే ఇంటర్మీడియెట్‌లో ప్రైవేట్‌ డిఫెన్స్‌ అకాడమీల్లో చేరుతున్నారు. ఇటీవల కాలంలో యువజన సర్వీసుల శాఖ, ఐటీడీఏల ఆధ్వర్యంలో నియామక ర్యాలీలు ప్రారంభానికి ముందు ప్రత్యేక శిక్షణ కార్యక్రమాలు నిర్వహిస్తుండటం కూడా గ్రామీణ యువతకు కొంత కలిసొస్తొంది.
ఆకర్షణీయ వేతనాలు... సదుపాయాలు
* ఆర్మీ ఉద్యోగాలకు సంబంధించి సిపాయి స్థాయిలో ప్రారంభవేతనం రూ.30 వేల వరకూ ఉంది.
* ఎయిర్‌ఫోర్స్‌లో సాంకేతిక, సాంకేతికేతర విభాగాలకు సంబంధించి శిక్షణ కాలంలో స్టైపెండ్‌ రూ.14,600 ఇస్తారు.
* ఎయిర్‌ఫోర్స్‌లో సాంకేతిక విభాగాలకు సంబంధించి ప్రారంభవేతనం రూ.33,100, సాంకేతికేతర విభాగాలకు సంబంధించి రూ.26,900 వరకూ ఉంటుంది.
* నేవీలో అప్రెంటీస్‌ ఉద్యోగాలకు రూ.26 వేల వరకూ ప్రారంభ వేతనం ఉంటుంది.
* వేతనంతో పాటు ఉచిత భోజనం, దుస్తులు, కుటుంబానికి ఉచిత వైద్య సదుపాయం కల్పిస్తారు.
* సంవత్సరానికి వేతనంతో కూడిన 60 సెలవులు, 30 క్యాజువల్‌ సెలవులు ఇస్తారు.
* సర్వీసు మొత్తం మీద 300 రోజుల అర్జిత సెలవులు పొందొచ్చు. పదోన్నతులు, చేసిన సర్వీసును బట్టి పింఛను ఇస్తారు.
పదోతరగతి, ఇంటర్మీడియెట్‌ విద్యార్హతతో రక్షణ రంగంలో ఉద్యోగాలు
* ఆర్మీలో: సోల్జర్‌ ట్రేడ్స్‌మెన్‌, సోల్జర్‌ నర్సింగ్‌ అసిస్టెంట్‌, సోల్జర్‌ క్లర్క్‌/స్టోర్‌ కీపర్‌ టెక్నికల్‌, సోల్జర్‌ జనరల్‌ డ్యూటీ తదితరాలు
* ఎయిర్‌ఫోర్స్‌లో: గ్రూపు ఎక్స్‌ (సాంకేతిక విభాగం పోస్టులు), గ్రూపు వై (సాంకేతికేతర విభాగం పోస్టులు) తదితరాలు
* నేవీ: ఆర్టిఫిషెర్‌ అప్రెంటీస్‌ (ఏఏ), ఎస్‌ఎస్‌ఆర్‌, మాట్రిక్‌ రిక్రూట్‌ (ఎంఆర్‌) తదితరాలు
ఉద్యోగ సాధన లక్ష్యంగా... డిగ్రీలో కూడా చేరలేదు --ఎం.సంతోష్‌కుమార్‌, పెద్దాపురం, తూర్పుగోదావరి జిల్లా
ఈ ఏడాది వ్యవధిలో రక్షణ రంగంలో ఏదో ఒక ఉద్యోగం సాధించాలని లక్ష్యంగా పెట్టుకున్నా. అందుకే ఇంటర్మీడియెట్‌ పూర్తయినా డిగ్రీలో చేరలేదు. ఏడో తరగతి నుంచే ఖోఖో బాగా ఆడటం వల్ల బాగా పరుగు పెట్టడం అలవాటైంది. త్రోబాల్‌, వాలీబాల్‌ తదితర క్రీడల వల్ల దారుఢ్యం పెంచుకోవడంపైన ఆసక్తి పెరిగింది. రోజూ రెండు, మూడు గంటల పాటు సాధన చేస్తున్నా. నియామక ర్యాలీలు ఎక్కడైనా ఉన్నాయంటే రెండు, మూడు నెలల ముందు నుంచి ఈ సమయాన్ని మరింత పెంచుతున్నా. కచ్చితంగా సాధిస్తానన్న నమ్మకం ఉంది.
పచ్చబొట్టుతో పోయింది -ఆర్‌.వంశీకృష్ణ, లేళ్ల గరవు, గూడురు మండలం, కృష్ణా జిల్లా
రక్షణ రంగంలో ఉద్యోగం సాధించాలని పదో తరగతిలోనే నిర్ణయించుకున్నా. విశాఖపట్నంలో ఓ ప్రైవేటు డిఫెన్స్‌ అకాడమీలో చేరి అందుకు అవసరమైన తర్ఫీదు పొందాను. కాకినాడలో ఆర్మీ ర్యాలీలో పాల్గొని అన్ని పరీక్షల్లోనూ విజయం సాధించా. చివరకు శరీరంపై పచ్చబొట్టు ఉండటంతో ఉద్యోగం దక్కించుకోలేకపోయా. పట్టువదలకుండా లేజర్‌ ట్రీట్‌మెంట్‌తో పచ్చబొట్టు తొలగించుకుని మళ్లీ ఈ పోటీల్లో పాల్గొనడం ప్రారంభించా. రోజూ రెండు, మూడు గంటలు సాధన చేస్తున్నా. ఈ ఏడాదిలో ఏదో ఒక ఉద్యోగం సాధిస్తా.
'గిరిజన సంక్షేమం'లో 91 పోస్టుల భర్తీకి ఉత్తర్వులు
ఈనాడు, హైదరాబాద్: తెలంగాణ రాష్ట్రంలో గిరిజన సంక్షేమ శాఖలో 91 వసతిగృహ సంక్షేమ అధికారుల పోస్టుల భర్తీకి ఆర్థిక శాఖ అనుమతించింది. గ్రేడ్-2లో 87, గ్రేడ్-1లో నాలుగు ఉద్యోగాలను తెలంగాణ రాష్ట్ర పబ్లిక్ సర్వీస్ కమిషన్ (టీఎస్‌పీఎస్సీ) ద్వారా భర్తీ చేయనున్నారు. ఈ మేరకు ఆర్థిక శాఖ కార్యదర్శి ఎన్.శివశంకర్ మంగళవారం (సెప్టెంబరు 12) ఉత్తర్వులు జారీ చేశారు. దీంతోపాటు గిరిజన సంక్షేమశాలోనే మరో ఏడు పోస్టుల భర్తీకీ అనుమతించారు. ఇందులో సహాయ గిరిజన సంక్షేమాధికారి, సహాయ గిరిజనాభివృద్ధి అధికారుల పోస్టులు ఉన్నాయి. వీటినీ టీఎస్‌పీఎస్సీ ద్వారానే భర్తీ చేయనున్నారు.
తొలి యత్నంలో గెలుపు సాధ్యమే!
గత ఏడేళ్లుగా ఐబీపీఎస్‌ నిర్వహిస్తున్న ఉమ్మడి రాతపరీక్ష ద్వారా ప్రభుత్వరంగ బ్యాంకుల్లో వేలాది ఉద్యోగాలు భర్తీ అవుతున్నాయి. పోటీ తీవ్రమవుతోంది. పరీక్ష విధానంలో, ప్రశ్నల స్థాయిలో కూడా ఎంతో మార్పు వచ్చింది. ఈ మార్పులకు అనుగుణంగా సిద్ధమైతేనే విజయం సాధ్యం! ఐబీపీఎస్‌ క్లరికల్‌ ప్రకటన వెలువడిన నేపథ్యంలో అభ్యర్థులు తరచూ లేవనెత్తే సందేహాలూ...వాటిని నివృత్తి చేసే జవాబులూ...
పీఓతో పోలిస్తే క్లరికల్‌ పరీక్ష ఏ మేరకు సులభం?
జ: పీఓతో పోలిస్తే క్లరికల్‌ పరీక్ష తప్పకుండా తక్కువ స్థాయిలోనే ఉంటుంది. అయితే సిలబస్‌పరంగా పెద్దగా మార్పు లేకుండా ఒకేలా ఉంటుంది. ప్రశ్నలస్థాయి మాత్రం పీఓతో పోల్చినపుడు కొంచెం తక్కువ స్థాయి. అందుకని పీఓకు సిద్ధమైనవారికి క్లరికల్‌ పరీక్ష రాయాలంటే ప్రత్యేక సన్నద్ధత అవసరం ఉండదు.
ప్రిలిమ్స్‌లో అర్హత పొందాక మెయిన్స్‌ పరీక్షకు సిద్ధమవాలా? రెండింటికీ ఒకేసారి సన్నద్ధమవాలా?
జ: మెయిన్స్‌ పరీక్షలో ఉన్న అయిదు సబ్జెక్టుల్లో మూడు ప్రిలిమ్స్‌లోనూ ఉన్నాయి. కాబట్టి రెండింటికీ కలిపి సన్నద్ధమైతే ఉపయోగకరం. ప్రిలిమ్స్‌ సమయానికి మెయిన్స్‌కు కూడా సన్నద్ధత పూర్తి చేసుకోవాలి. ఆ తర్వాతి 40-50 రోజుల సమయాన్ని మెయిన్స్‌ పరీక్ష విధానంలో వివిధ మోడల్‌ పేపర్లను సాధన చేయడం మంచిది.
ప్రిలిమ్స్‌లో అన్ని విభాగాలకూ కలిపి ఉమ్మడిగా 60 నిమిషాల సమయం కేటాయించారు. అయితే ఏ విభాగానికి ఎంత సమయాన్ని కేటాయించాలి?
జ: ప్రిలిమ్స్‌లో అభ్యర్థులు మూడు విభాగాల్లోనూ కనీస మార్కులు సాధించి ఉత్తీర్ణులు అవ్వాల్సి ఉంటుంది. కాబట్టి సబ్జెక్టుల కఠినత్వస్థాయి ఆధారంగా ప్రతి విభాగానికీ కనీస సమయాన్ని కేటాయించుకోవాలి. ఇంగ్లిష్‌కు 15, రీజనింగ్‌కు 20, న్యూమరికల్‌ ఎబిలిటీకి 25 నిమిషాల చొప్పున సమయం కేటాయించుకుంటే ఉపయోగకరం. అభ్యర్థులు సాధారణ ప్రశ్నల సంఖ్యతో సంబంధం లేకుండా తమకు కేటాయించిన సమయం పూర్తవ్వగానే ఆ విభాగాన్ని ఆపేయాలి. అప్పుడే ప్రతి విభాగంలోనూ కనీస సంఖ్యలో ప్రశ్నలను సాధించగలిగి ఉత్తీర్ణులయ్యే అవకాశం ఉంటుంది.
మొదటిసారి ఆన్‌లైన్‌ పద్ధతిలో పరీక్షరాసే అభ్యర్థులకు ఏదైనా ఇబ్బంది ఉంటుందా?
జ: ఎటువంటి ఇబ్బందీ ఉండదు. పరీక్ష హాలులో వారి కోసం సహాయకులు ఉంటారు. అయితే అభ్యర్థులు ఐబీపీఎస్‌ తరహాలో వివిధ రకాల ఆన్‌లైన్‌ పరీక్షలను బాగా సాధన చేయాలి.
ప్రిలిమ్స్‌, మెయిన్స్‌ పరీక్షల్లో ఎన్ని మార్కులు వస్తే అర్హత పొందుతారు?
జ: ప్రిలిమ్స్‌, మెయిన్స్‌ రెండింటిలోనూ అభ్యర్థులు అన్ని విభాగాల్లో కనీస మార్కులు సాధిస్తూ మొత్తంగా నిర్ణయించిన కటాఫ్‌ మార్కులకంటే ఎక్కువ సాధించాల్సి ఉంటుంది. గత సంవత్సరం నిర్వహించిన పరీక్షలోని కటాఫ్‌ మార్కులను పరిశీలిస్తే ఈ ఏడాది కటాఫ్‌ మార్కులపై ఒక అంచనాకు రావచ్చు. గత సంవత్సరం ప్రిలిమ్స్‌ పరీక్షలో జనరల్‌ అభ్యర్థులకు ఆంధ్రప్రదేశ్‌లో 73, తెలంగాణలో 65 కటాఫ్‌ మార్కులుగా ఉన్నాయి. అదే మెయిన్స్‌లో 200 మార్కులను 100కు కుదిస్తే.. ఆంధ్రప్రదేశ్‌లో 39.16, తెలంగాణలో 38.13 మార్కులు కటాఫ్‌గా ఉన్నాయి. ఈ ఏడాది కటాఫ్‌ మార్కులు వాటికంటే కొంచెం ఎక్కువ ఉండే అవకాశం ఉంది.
పరీక్షలో తెలియని ప్రశ్నలకు వూహించి జవాబులను గుర్తిస్తే ఉపయోగం ఉంటుందా?
జ: ప్రతి ప్రశ్నకూ రుణాత్మక మార్కులు ఉంటాయి. ప్రతి తప్పు సమాధానానికీ 0.25 మార్కులు కోల్పోవాల్సి వస్తుంది. వూహించి గుర్తిస్తే, సరైన సమాధానం అవడానికి 20% మాత్రమే అవకాశం ఉంటుంది (5 ఆప్షన్లు కాబట్టి..). ఏవైనా రెండు ఆప్షన్ల మధ్య సందేహం ఉంటే జవాబును వూహించవచ్చు.
అరిథ్‌మెటిక్‌ అంశాలన్నింటినీ నేర్చుకోవాలా? కొన్నింటిని వదిలేయవచ్చా?
జ: క్వాంటిటేటివ్‌ ఆప్టిట్యూడ్‌ లేదా న్యూమరికల్‌ ఎబిలిటీ విభాగంలో ప్రశ్నలన్నీ అరిథ్‌మెటిక్‌ నుంచి మాత్రమే ఉండవు. 50 ప్రశ్నలుంటే వాటిలో 8-10 ప్రశ్నలు అరిథ్‌మెటిక్‌ నుంచి ఉంటాయి. సాధారణంగా నంబర్‌ సిరీస్‌ నుంచి 5, సింప్లిఫికేషన్స్‌ నుంచి 5-10, డేటా సఫిషియన్సీ 5, అప్రాక్సిమేట్‌ వాల్యూస్‌ 5, క్వాడ్రాటిక్‌ ఈక్వేషన్స్‌ 5, డేటా ఇంటర్‌ప్రిటేషన్‌ 10-15 ప్రశ్నలు ఉంటాయి. ఒక్కో అరిథ్‌మెటిక్‌ అంశం నుంచి 1 లేదా 2 ప్రశ్నలు వచ్చే అవకాశం ఉంటుంది. కాబట్టి ఏదైనా టాపిక్‌ కఠినంగా భావించి వదిలేస్తే పెద్దగా నష్టం ఉండదు. అయితే అన్ని టాపిక్‌లను నేర్చుకోవడం వల్ల డేటా సఫిషియన్సీ, డేటా ఇంటర్‌ప్రిటేషన్‌ ప్రశ్నలను తేలికగా సాధించవచ్చు.
మొదటిసారి పరీక్ష రాస్తున్నవారికి దీనిలో విజయం సాధించడానికి ఏమేరకు అవకాశం ఉంటుంది?
జ: బ్యాంకు పరీక్షలోని సబ్జెక్టులన్నీ జనరల్‌ సబ్జెక్టులు లేదా స్కూలు స్థాయిలో చదివినవే. వాటన్నింటినీ పునశ్చరణ/ అవగాహన చేసుకోవడానికి 30-45 రోజుల సమయం సరిపోతుంది. కానీ ఈ పరీక్షలో సమయం తక్కువ. వీలైనంత వేగంగా ప్రశ్నలను సాధించాలి. దానికోసం వీలైనంత సాధన అవసరం. ప్రిలిమ్స్‌ పరీక్షకు దాదాపు 3 నెలలు, మెయిన్స్‌కు దాదాపుగా నాలుగున్నర నెలల సమయం ఉంది. తగినవిధంగా సన్నద్ధమవడానికి సరిపోయే సమయమే. మొదటిసారి రాస్తున్న అభ్యర్థులు కూడా ఎలాంటి సందేహం లేకుండా సమగ్రంగా తయారైతే నెగ్గవచ్చు.
- డాక్ట‌ర్ జీఎస్‌.గిరిధ‌ర్‌, ఇన్‌స్టిట్యూట్‌
తెలంగాణ విద్యాశాఖ కార్యదర్శి విచారణకు హాజరు కావాలి
* ఉపాధ్యాయ ఉద్యోగాల నియామకాలపై సుప్రీంకోర్టు ఆదేశం
* విచారణ అక్టోబరు 28కి వాయిదా
ఈనాడు, దిల్లీ: తెలంగాణలో ఉపాధ్యాయ నియామకాలకు సంబంధించి జరుగుతున్న కేసు విచారణలో భాగంగా విద్యాశాఖ కార్యదర్శి స్వయంగా హాజరుకావాలని సుప్రీంకోర్టు ఆదేశించింది. తెలంగాణ, ఆంధ్రప్రదేశ్ రాష్ట్రాల్లోని పాఠశాలల్లో మౌలికవసతులు, ఉపాధ్యాయుల ఖాళీలపై తెలంగాణ తల్లిదండ్రుల సంఘం, నిరుద్యోగులు దాఖలు చేసిన పిటిషన్‌పై సోమవారం (సెప్టెంబరు 11) ప్రధాన న్యాయమూర్తి జస్టిస్ దీపక్‌మిశ్ర, జస్టిస్ ఖన్విల్కర్, జస్టిస్ చంద్రచూడ్‌లతో కూడిన ధర్మాసనం విచారణ చేపట్టింది. తెలంగాణ తరఫు న్యాయవాది రెండు నెలల పాటు విచారణ వాయిదా వేయాలని కోరారు. దీనిపై జస్టిస్ దీపక్‌మిశ్ర స్పందిస్తూ.. వాయిదా ఎందుకు కోరుతున్నారో చెప్పాలన్నారు. పిటిషనర్ల తరఫు న్యాయవాది శ్రావణ్‌కుమార్ వాదనలు వినిపిస్తూ.. ఏపీ, తెలంగాణ ప్రభుత్వాలు న్యాయస్థానాన్ని తప్పుదోవ పట్టిస్తున్నాయని ఆరోపించారు. నియామకాలు లేక తెలంగాణలో విద్యావ్యవస్థ నిర్వీర్యం అవుతోందన్నారు. తెలుగు రాష్ట్రాల్లో విద్యాభివృద్ధికి రెండు ప్రభుత్వాలు రూ.9 వేల కోట్లు బడ్జెట్‌లో కేటాయించగా.. ఆయా రాష్ట్రాల్లోని ప్రైవేటు పాఠశాలలకు రుసుముల రూపంలో రూ.13 వేల కోట్లు వస్తున్నాయని, ప్రభుత్వాల వైఫల్యమే దీనికి కారణమన్నారు. తెలంగాణలో 14 వేలు, ఆంధ్రప్రదేశ్‌లో 25 వేల ఉపాధ్యాయ ఉద్యోగాలు ఖాళీగా ఉన్నాయని గుర్తుచేశారు. సెప్టెంబరు మొదటి వారంలోగా తెలంగాణలో నియామకాలు చేపడతామని న్యాయస్థానానికి హామీ ఇచ్చిన ప్రభుత్వం..ఆ ఆదేశాలు అమలు చేయలేదన్నారు. దీన్ని కోర్టు ధిక్కరణ కింద పరిగణించాలని కోరారు. స్పందించిన ధర్మాసనం నియామకాలు ఎందుకు చేపట్టలేదో కారణాలు చెప్పాలని కోరుతూ.. తదుపరి విచారణకు తెలంగాణ విద్యాశాఖ కార్యదర్శి స్వయంగా హాజరుకావాలని ఆదేశిస్తూ విచారణను అక్టోబరు 28కి వాయిదా వేసింది.
బ్యాంకుల్లో భలే అవకాశం
జాతీయ బ్యాంకుల్లోని 7883 క్లరికల్‌ పోస్టుల భర్తీ కోసం క్లర్క్‌- VII ప్రకటనను ఐబీపీఎస్‌ విడుదల చేసింది. బ్యాంకు ఉద్యోగార్థులకు ఇదో మంచి అవకాశం. ఈ క్లర్కు పోస్టుల ముఖ్యాంశాలు, రాతపరీక్ష విధానం, సన్నద్ధతలో పాటించాల్సిన మెలకువలు తెలుసుకుందామా?
ఎస్‌బీఐ మినహా మిగిలిన జాతీయ బ్యాంకుల్లో రోజువారీ బ్యాంకింగ్‌ సేవలను అందించడానికి క్లరికల్‌ ఉద్యోగుల అవసరం ఉంది. బ్యాంకు ఖాతా తెరవడం, డబ్బు జమచేయడం, తీసుకోవడం, ఫిక్స్‌డ్‌ డిపాజిట్‌, రుణాల ప్రక్రియ, మనీ ఎక్స్ఛేంజి, డిమాండ్‌ డ్రాఫ్ట్స్‌, ఆర్‌టీజీఎస్‌, నెఫ్ట్‌, చెక్‌ ఇష్యూ తదితర రోజువారీ సేవలను అందించడానికి క్లరికల్‌ సిబ్బంది అవసరం. ఖాతాదారులు బ్యాంకుల్లో మొదటగా వచ్చి కలిసేది వీరినే కాబట్టి ఈ ఉద్యోగులకు తప్పనిసరిగా సంబంధిత రాష్ట్రభాషలో మాట్లాడటం, చదవడం, రాయడం వంటివి వచ్చుండాలి. పరీక్ష నిమిత్తం తెలుగు రాష్ట్రాల్లో దేన్నుంచైనా లేదా దేశంలోని ఏదైనా ఒక రాష్ట్రానికి మాత్రమే దరఖాస్తు చేయవచ్చు.
ముఖ్యమైన తేదీలు
* ఆన్‌లైన్‌ రిజిస్ట్రేషన్‌: 12.09.2017 నుంచి 03.10.2017
* ప్రిలిమినరీ ఆన్‌లైన్‌ పరీక్ష: 2017 డిసెంబరు 2, 3, 9, 10 తేదీలు
* మెయిన్స్‌ రాతపరీక్ష: 21.01.2018
వయ: పరిమితి: 20 నుంచి 28 సంవత్సరాల వయసువారై ఉండాలి. అభ్యర్థులు తమ వయసును 1.09.2017తో పోల్చి చూసుకోవాలి.
ఎస్‌సీ/ ఎస్‌టీ కేటగిరీ అభ్యర్థులకు 5 సం., ఓబీసీ కేటగిరీవారికి 3 సం., అంగవైకల్యం ఉన్నవారికి 10 సంవత్సరాల మినహాయింపు ఉంది.
విద్యార్హతలు: గుర్తింపు పొందిన విశ్వవిద్యాలయం నుంచి గ్రాడ్యుయేషన్‌ 60% మార్కులతో పూర్తిచేసి ఉండాలి. దరఖాస్తు: అభ్యర్థులు తమ వివరాలను ఆన్‌లైన్‌లో పూర్తిచేసి, రూ.600 పరీక్ష ఫీజును ఆన్‌లైన్‌లో చెల్లించాలి. ఎస్‌సీ/ ఎస్‌టీ/ పీడబ్ల్యూడీ/ న్లిళీ వారు రూ.100 చెల్లించాలి.
పరీక్ష కేంద్రాలు:
ఆంధ్రప్రదేశ్‌: ప్రిలిమినరీ: చీరాల, చిత్తూరు, గుంటూరు, కాకినాడ, కర్నూలు, నెల్లూరు, ఒంగోలు, పుత్తూరు, రాజమండ్రి, శ్రీకాకుళం, తిరుపతి, విజయవాడ, విశాఖపట్నం, విజయనగరం.
మెయిన్స్‌: గుంటూరు, కర్నూలు, విజయవాడ, విశాఖపట్నం.
తెలంగాణ:ప్రిలిమినరీ: హైదరాబాద్‌, కరీంనగర్‌, ఖమ్మం, వరంగల్‌
మెయిన్స్‌: హైదరాబాద్‌
పోస్టుల వివరాలు: ఆంధ్రప్రదేశ్‌: 485, తెలంగాణ: 344, కర్ణాటక: 554, తమిళనాడు: 1277.
అత్యధికంగా పోస్టులు తమిళనాడులో ఉన్నాయి.

ఎంపిక ప్రక్రియ
రెండంచెలుగా జరిగే రాతపరీక్షలో అభ్యర్థులు మొదటగా ప్రిలిమినరీ ఆన్‌లైన్‌ పరీక్ష రాయాలి. ప్రతి విభాగంలో కనీస అర్హత మార్కులతోపాటు మొత్తంగా కటాఫ్‌ మార్కులు వచ్చినవారికి మాత్రమే మెయిన్స్‌ ఆన్‌లైన్‌ పరీక్షను నిర్వహిస్తారు.
మెయిన్స్‌ పరీక్షలో అభ్యర్థులకు వచ్చే మార్కులను బట్టి మెరిట్‌ లిస్ట్‌ ఆధారంగా పోస్టులను కేటాయిస్తారు. ఇప్పటివరకూ జరిగిన వాటికన్నా ప్రస్తుతం జరగబోయే మెయిన్స్‌ పరీక్ష భిన్నంగా జరగనుంది. నాలుగు విభాగాలు ఉండే ఈ మెయిన్స్‌ పరీక్షలో 190 ప్రశ్నలుంటాయి. 200 మార్కులు. 2.40 గంటల వ్యవధిలో పూర్తిచేయాల్సి ఉంటుంది. ప్రతి విభాగంలో కనీసార్హత మార్కులతోపాటు ఓవరాల్‌ కటాఫ్‌ మార్కులను కూడా పొందాలి. ప్రిలిమినరీ పరీక్షలో వచ్చే మార్కులు క్వాలిఫయింగ్‌ మార్కులు మాత్రమే.
ఓబీసీ కేటగిరీ ఎంచుకునేవారు వారి కుల ధ్రువీకరణ సెంట్రల్‌ ఓబీసీ జాబితాలో ఉండి, నాన్‌క్రీమీలేయర్‌, క్రీమీలేయర్‌ మధ్య వ్యత్యాసాలను తెలుసుకుని, అర్హత ఉంటేనే ఓబీసీ కేటగిరీకి దరఖాస్తు చేయాలి. లేనివారు యూఆర్‌ (జనరల్‌) కేటగిరీని ఎంచుకోవాలి.
- శ్రీధ‌ర్ కొమ్మూరు, శ్రీధ‌ర్స్ సీసీఈ
అధ్యాపక పోస్టుల ప్రాథమిక పరీక్షలో 53.94శాతం హాజరు నమోదు
ఈనాడు, హైదరాబాద్: డిగ్రీ, జూనియర్ కళాశాలల్లో అధ్యాపకులు, ఇతర పోస్టులకు టీఎస్‌పీఎస్సీ ఆదివారం(సెప్టెంబర్ 10) నిర్వహించిన ప్రాథమిక పరీక్షకు 13,903 మంది హాజరయ్యారని టీఎస్‌పీఎస్సీ కార్యదర్శి ఒక ప్రకటనలో తెలిపారు. హైదరాబాద్ పరిధిలో 33 పరీక్ష కేంద్రాల్లో ఉదయం 10నుంచి మధ్యాహ్నం 12.30 గంటల వరకు ఈ పరీక్ష జరిగిందన్నారు. దీన్ని రాసేందుకు 25,774 మంది అభ్యర్థులు అర్హత సాధించగా హాజరు శాతం 53.94గా నమోదైందని పేర్కొన్నారు.
రాతపరీక్షకు 70.. వెయిటేజీ 30%
* బహుళ సమాధాన ప్రశ్నలతో పరీక్ష
* 150 మార్కులకు ప్రశ్నపత్రం
* వైద్యశాఖలో 1,775 నియామకాలకు పరీక్షల విధానం ఖరారు
ఈనాడు - హైదరాబాద్‌: తెలంగాణ వైద్య, ఆరోగ్య శాఖ పరిధిలోని నర్సింగ్‌, పారామెడికల్‌, ఇతర పోస్టుల భర్తీకి రంగం సిద్ధమయింది. ఈ నియామకాల కోసం తెలంగాణ పబ్లిక్‌ సర్వీసు కమిషన్‌ అనుసరించనున్న పరీక్ష విధానంపై సెప్టెంబరు 9న రాష్ట్ర ప్రభుత్వం ఉత్తర్వులు జారీ చేసింది. రాతపరీక్షతో పాటు అనుభవాన్ని ప్రాతిపదికగా తీసుకొని పోస్టులను భర్తీ చేయాలని ఆదేశించింది. రాతపరీక్షకు 70 శాతం మార్కులు, ఇప్పటికే ప్రభుత్వ సర్వీసుల్లో పనిచేస్తున్న వారికి 30 శాతం వరకు వెయిటేజీని పరిగణనలోకి తీసుకోవాలని సూచించింది. తెలంగాణలో 1,775 మంది నర్సులు, పారామెడికల్‌ సిబ్బంది, ఇతర పోస్టులను టీఎస్‌పీఎస్సీ ద్వారా భర్తీ చేయాలని ప్రభుత్వం నిర్ణయించింది. చాలా ఏళ్ల తర్వాత పబ్లిక్‌ సర్వీస్‌ కమిషన్‌ ద్వారా ప్రత్యక్ష నియామక పద్థతిలో వైద్యశాఖలో పోస్టులు భర్తీ అవుతున్నాయి. ఇందులో నర్సింగ్‌, పారామెడికల్‌ పోస్టులు భర్తీ కావడం ఇదే ప్రథమం. ఈ నేపథ్యంలో ఎంపికకు సంబంధించి పరీక్ష విధానంపై టీఎస్‌పీఎస్సీ.. ప్రభుత్వానికి ప్రతిపాదనలు సమర్పించింది. వీటిని పరిశీలించి ప్రభుత్వం ఆమోదం తెలిపింది. అమలుకు ఆదేశాలు ఇచ్చింది. మరోవైపు పోస్టుల భర్తీపై వైద్య, ఆరోగ్య శాఖ ప్రత్యేక ప్రధాన కార్యదర్శి రాజేశ్వర్‌ తివారి విడిగా ఉత్తర్వులు (జీవో నెం.166) జారీ చేశారు. పోస్టుల వివరాలు, విద్యార్హతలు, జీతభత్యాలు, వయోపరిమితి తదితర అంశాలను ఇందులో పేర్కొన్నారు.
వెయిటేజీ ఇలా...
ప్రభుత్వ సంస్థల్లో ఒప్పంద విధానంలో పనిచేస్తున్న వారికి వెయిటేజీ ఇలా ఉంటుంది.
* గిరిజన ప్రాంతాల్లో ప్రతి ఆరు నెలల సర్వీసుకు 4 మార్కులు
* గ్రామీణ ప్రాంతాల్లో ప్రతి ఆరు నెలలకు 2 మార్కులు
* గ్రేడ్‌-1 పురపాలక సంఘాలు, నగరపాలక సంస్థల్లో ప్రతి ఆరు నెలల సర్వీసుకు 1 మార్కు
ఎంపిక సరళి
రాత పరీక్షకు 70 పాయింట్లు, అనుభవానికి 30 పాయింట్లు చొప్పున మొత్తం 100 పాయింట్ల ప్రాతిపదికన ఎంపిక
పరీక్ష విధానం: రాత పరీక్ష ఆబ్జెక్టివ్‌ టైప్‌ పద్ధతిలో నిర్వహిస్తారు.
రాత పరీక్ష: మొత్తం 150 మార్కులకు..
పేపర్‌ -1లో సాధారణ పరిజ్ఞానంపై 50 ప్రశ్నలుంటాయి. ఒక్కో ప్రశ్నకు ఒక్కో మార్కు చొప్పున మొత్తం 50 మార్కులు. సమయం 50 నిముషాలు
పేపర్‌- 2లో సబ్జెక్టు అంశాలపై 100 ప్రశ్నలుంటాయి. ఒక్కో ప్రశ్నకు ఒక్కో మార్కు చొప్పున మొత్తం 100 మార్కులు. సమయం 100 నిముషాలు
ప్రశ్నపత్రాల రూపకల్పన ఇలానా!
* సబ్జెక్టు నిపుణుల తీరుతో గ్రూప్-2 మెయిన్ అభ్యర్థుల అవస్థలు
* అభ్యంతరాలు పట్టించుకోవాలని వినతి
* న్యాయస్థానాన్ని ఆశ్రయించే యత్నం
ఈనాడు అమరావతి: ఏపీపీఎస్సీ గత జులైలో నిర్వహించిన గ్రూపు-2 ప్రధాన పరీక్షల పరంగా ప్రశ్నపత్రాల రూపకల్పనలో సబ్జెక్టు నిపుణులు వ్యవహరించిన తీరుతో అభ్యర్థులు ఆందోళన చెందుతున్నారు. పేపరు-1లో మూడు, పేపరు-2లో 15, పేపరు-3లో 27.. మొత్తంగా 45 ప్రశ్నలకు జవాబుల విషయంలో మార్పులు జరగడం గమనార్హం. దీనివల్ల జవాబుల గుర్తింపులో పరీక్షా కేంద్రాల్లో శ్రమ, సమయం వృథా అయిందని కొందరు అభ్యర్థులు ఆవేదన వ్యక్తం చేస్తున్నారు. ప్రాథమిక 'కీ' అనుసరించి వచ్చిన అభ్యంతరాలను పరిశీలించాక తుది 'కీ'ని ప్రకటించారు. దీనిపైనా అభ్యంతరాలు రావడంతో జవాబుల్లో సవరణలు జరిగాయి. ఈ పరిణామాలతో ప్రశ్నపత్రాల రూపకర్తలు తగిన జాగ్రత్తలు తీసుకోనట్లు అర్థమవుతోందని అభ్యర్థులు ఆవేదన చెందుతున్నారు. 'కీ'లో తరచూ ఇలా తప్పులు దొర్లడం తగదని నిపుణులు పేర్కొంటున్నారు. ప్రశ్నపత్రాల తయారీకి ఇచ్చే పారితోషికం తక్కువగా ఉండడం, సమయాభావం, తప్పులుచేస్తే కఠిన చర్యలు తీసుకునే అవకాశం లేనందున రూపకర్తలు తగిన దృష్టి పెట్టలేకపోతున్నారని సంబంధిత వర్గాలు పేర్కొంటున్నాయి. దీనివల్ల ఎపీపీఎస్సీ కూడా ఇబ్బందుల్లో పడుతోంది.
జవాబులో ఒకటి మినహా మూడింటిలో ఏది గుర్తించినా మార్కే!
పేపరు-1లో రెండు ప్రశ్నలకు రెండు వంతున జవాబులు, పేపరు-2లో 4 ప్రశ్నలకు మూడు చొప్పున జవాబులు ఇచ్చారు. ఒక ప్రశ్నకు రెండు వాబుల్లో దేనిని గుర్తించినా మార్కులు వేయనున్నారు. పేపరు-3లో మూడు ప్రశ్నలకు ఏకంగా మూడు వంతున జవాబుల్లో దేనిని గుర్తించినా మార్కులను ఇస్తామని ప్రకటించడం గమనార్హం. మరో మూడు ప్రశ్నలకు రెండు వంతున జవాబులను గుర్తించారు. మరో ఐదు ప్రశ్నలను ఏకంగా తొలగించారు. ఇలా.. మొత్తమ్మీద ఏడు ప్రశ్నలకు మూడు వంతున జవాబులు, ఏకంగా ఎనిమిది ప్రశ్నలను తొలగించడం గమనార్హం.
అభ్యంతరాలు పరిగణించరా?
ప్రశ్నలు భారతదేశ ఆర్థిక వ్యవస్థకు చెందిన పోటీ పరీక్ష (తెలుగు అకాడమీ) ప్రత్యేకంలోనివే అయినా జవాబుల గుర్తింపులో తమ అభ్యంతరాలు పరిగణనలోనికి తీసుకోలేదని అభ్యర్థులు ఆందోళన వ్యక్తంచేస్తున్నారు. పంచవర్ష ప్రణాళికల దీర్ఘకాలిక లక్ష్యాలు, భారత ప్రణాళికల ప్రధాన లక్ష్యం, రాష్ట్ర స్థూల దేశీయ ఉత్పత్తి, భారత్‌లో ధరలు పెరగడానికి ప్రధాన కారణం ఇది కాదు, తదితర ప్రశ్నలు, జవాబుల ఖరారులో పునఃపరిశీలన జరపాలని ఎపీపీఎస్సీ అధికారులను అభ్యర్థులు కోరుతున్నారు. ఇప్పటికే అభ్యంతరాలన్నీ పరిశీలించాకే తుది 'కీ'ని రెండోసారి ఖరారు చేశామని, అభ్యంతరాల తోసివేతకు సమాధానం కూడా ఇచ్చామని ఎపీపీఎస్సీ వర్గాలు వెల్లడించాయి. ఈ నేపథ్యంలో పలువురు అభ్యర్థులు న్యాయస్థానాన్ని ఆశ్రయించేందుకు సిద్ధమవుతున్నారు.
నవంబరులో ఆర్మీ ఎంపిక ర్యాలీ
* తెలంగాణ జిల్లాల అభ్యర్థుల కోసం కరీంనగర్‌లో నిర్వహణ
కంటోన్మెంట్, న్యూస్‌టుడే: సైన్యంలో వివిధ పోస్టులకు తెలంగాణలోని అన్ని జిల్లాల అభ్యర్థుల ఎంపిక కోసం కరీంనగర్‌లోని అంబేడ్కర్ స్టేడియంలో నియామక ర్యాలీ నిర్వహిస్తున్నట్లు రక్షణ శాఖ పౌర సంబంధాల అధికారులు ఓ ప్రకటనలో పేర్కొన్నారు. సికింద్రాబాద్ ఆర్మీ నియామక కార్యాలయం ఆధ్వర్యంలో నవంబరు ఒకటి నుంచి 10వ తేదీ వరకు ఇది జరుగుతుందని తెలిపారు. సోల్జర్ టెక్నికల్, సోల్జర్ టెక్నికల్(ఏవియేషన్ అండ్ కమ్యునికేషన్ ఎగ్జామినర్), సోల్జర్ నర్సింగ్ అసిస్టెంట్, సోల్జర్ జనరల్ డ్యూటీ, సోల్జర్ క్లర్క్/స్టోర్ కీపర్ టెక్నికల్, సోల్జర్ ట్రేడ్స్‌మెన్ పోస్టుల భర్తీకి ఈ ర్యాలీ నిర్వహించనున్నారు. సోల్జర్ జనరల్ డ్యూటీకి దరఖాస్తు చేసుకునేవారు 17 సంవత్సరాల 6 నెలల నుంచి 21 ఏళ్లలోపు వయసు ఉండాలి. మిగతా పోస్టులకు 17 ఏళ్ల ఆరు నెలల నుంచి 23 ఏళ్లలోపు వయసు ఉండాలి. సెప్టెంబరు 17 నుంచి అక్టోబరు 16 వరకు ఆన్‌లైన్‌లో దరఖాస్తు ఫారాలు అందుబాటులో ఉంటాయని అధికారులు పేర్కొన్నారు. అక్టోబరు 16వ తేదీ అనంతరం ఆన్‌లైన్‌లో అడ్మిట్ కార్డులను జారీ చేయనున్నట్లు వివరించారు. ర్యాలీలో పాల్గొనే అభ్యర్థులు అడ్మిట్ కార్డు హార్డ్ కాపీ, విద్యార్హతల నిజ (ఒర్జినల్స్) ధ్రువీకరణ పత్రాలతోపాటు జిరాక్స్‌లను తీసుకురావాల్సి ఉంటుందన్నారు. ఇతర వివరాలకోసం 040-27740059 నంబర్‌లో సంప్రదించవచ్చని అధికారులు సూచించారు.
త్వరలో డీఎస్‌సీ తేదీని ప్రకటిస్తాం
* డిగ్రీ, పాలిటెక్నిక్ కళాశాలల్లోనూ నియామకాలు
* గురుపూజోత్సవంలో ఉప ముఖ్యమంత్రి కడియం శ్రీహరి
ఈనాడు, హైదరాబాద్: 'ఉపాధ్యాయ నిరుద్యోగులు త్వరలోనే శుభవార్త వింటారు. డీఎస్‌సీ ఎప్పుడు నిర్వహిస్తామో ఆ తేదీని ప్రకటిస్తాం. అది అమలయ్యేలా చూస్తాం అని ఉప ముఖ్యమంత్రి కడియం శ్రీహరి చెప్పారు. రవీంద్రభారతిలో శుక్రవారం(సెప్టెంబరు 8) జరిగిన గురుపూజోత్సవంలో ఆయన ఉత్తమ ఉపాధ్యాయులకు పురస్కారాలు ప్రదానం చేశారు. శాలువాలు కప్పి సత్కరించారు. ఈ సందర్భంగా మాట్లాడుతూ.. డీఎస్‌సీపై ఏది మాట్లాడినా సామాజిక మాధ్యమంలో వ్యతిరేక ప్రచారం చేస్తున్నారని అన్నారు. అందుకే ఇక డీఎస్‌సీ నిర్వహించే తేదీనే ప్రకటిస్తామన్నారు. ఇప్పటికే జూనియర్ కళాశాలల్లో 1,133 ఖాళీల భర్తీకి అనుమతి ఇచ్చామని, త్వరలోనే డిగ్రీ, పాలిటెక్నిక్ కళాశాలల్లోనూ నియామకాలకు అనుమతిస్తామని ప్రకటించారు. ఉపాధ్యాయులు చాలామంది దరఖాస్తు చేసుకోవడం లేదని తెలిసి ఈసారి తామే గుర్తించి, ప్రత్యేక పురస్కారాలకు ఎంపిక చేశామన్నారు. ఉద్యోగంలో చేరిన 11 సంవత్సరాల్లో ఒకసారి కూడా సెలవు పెట్టని రాజన్న సిరిసిల్ల జిల్లాకు చెందిన వేణుగోపాల్, 'బడి చందా.. ఇంటికి వంద కార్యక్రమం ద్వారా నిధులు సేకరించి బళ్లో వసతులు కల్పించిన మహబూబ్‌నగర్ జిల్లా నర్వా మండల కేంద్రంలో పనిచేసే విజయ్‌భాస్కర్‌రెడ్డి తదితరులను దరఖాస్తు చేయకపోయినా ఎంపిక చేశామన్నారు. మహబూబ్‌నగర్ జిల్లాలో భౌతికశాస్త్రం ఉపాధ్యాయుడు శ్రీహరి ప్రతిభావంతులైన విద్యార్థులకు దిల్లీలోని రాష్ట్రపతి భవనాన్ని చూపిస్తున్నారని చెప్పారు. పిల్లలు సర్కారు బడికి రాకుండా ప్రైవేటు స్కూలుకు ఎందుకు వెళ్తున్నారో అధ్యయనం చేసి ఖమ్మం జిల్లా వైరా మండలంలో ఓ ప్రధానోపాధ్యాయుడు ప్రభుత్వ బడిలోనూ అవే సదుపాయాలు కల్పించి విద్యార్థుల సంఖ్యను పెంచారని చెప్పారు. ఇలా ఎంతో మంది ఆదర్శంగా పనిచేస్తున్నారని చెప్పారు. 5 శాతం ఉపాధ్యాయులు చేసే తప్పులను విద్యాశాఖ మొత్తానికి అంటగట్టడం సరైంది కాదన్నారు. ఉపాధ్యాయులు సంఘాల పేరుతో సమయం వృథా చేయకుండా సర్కారు బడులపై తల్లిదండ్రులకు నమ్మకం కలిగేలా కృషి చేయాలని కోరారు. పౌర సరఫరాల శాఖ మంత్రి ఈటల రాజేందర్ మాట్లాడుతూ.. ఒక వ్యక్తి అంకితభావంతో పనిచేస్తే ఎంత మార్పు తీసుకురావొచ్చో విజయ్‌భాస్కర్‌రెడ్డి లాంటి ఉపాధ్యాయులను చూస్తే తెలుస్తుందన్నారు. విద్యావ్యవస్థను సమూలంగా మార్చగలమన్న నమ్మకం ప్రభుత్వానికి ఉందన్నారు. పశుసంవర్ధక శాఖ మంత్రి తలసాని శ్రీనివాసయాదవ్, కేంద్ర మాజీ మంత్రి బండారు దత్తాత్రేయ, శాసనమండలిలో చీఫ్ విప్ పాతూరి సుధాకర్‌రెడ్డి, ఎమ్మెల్సీ పూల రవీందర్, ఉన్నత విద్యామండలి ఛైర్మన్ తుమ్మల పాపిరెడ్డి, విద్యాశాఖ ప్రత్యేక ప్రధాన కార్యదర్శి రంజీవ్ ఆచార్య, పాఠశాల విద్యాశాఖ కమిషనర్ కిషన్, తదితరులు పాల్గొన్నారు. ఈ సందర్భంగా స్వచ్ఛ విద్యాలయ పురస్కారాలకు ఎంపికైన 37 పాఠశాలల ప్రధానోపాధ్యాయులకు కూడా ఉప ముఖ్యమంత్రి కడియం శ్రీహరి పురస్కారాలను ప్రదానం చేశారు.
పోటీ పరీక్షలపై పుస్తకం, వెబ్‌సైట్‌
* విజయవాడలో లాంఛనంగా ప్రారంభం
విజయవాడ, న్యూస్‌టుడే: అఖిల భారత సివిల్‌ సర్వీసు వంటి పోటీ పరీక్షల్లో యువత 21 ఏళ్లకే విజయం సాధించాలంటే ‘హౌ టు క్రాక్‌ సివిల్‌ సర్వీస్‌@21’ పుస్తకం ఎంతగానో ఉపయోగపడుతుందని ఆంధ్రప్రదేశ్ రాష్ట్ర పబ్లిక్‌ సర్వీస్‌ కమిషన్‌ ఛైర్మన్‌ ఉదయ్‌భాస్కర్‌ అన్నారు. సెప్టెంబరు 7న విజయవాడ కొత్తపేట కేబీఎన్‌ కళాశాలలో పే అండ్‌ అకౌంట్స్‌ అధికారి బీఎల్‌ హనుమంతురావు రచించిన ఈ పుస్తకాన్ని, ‘అమరావతి అకాడమీ ఆఫ్‌ కెరియర్‌ కౌన్సెలింగ్‌ అండ్‌ కాంపిటేటివ్‌ ఎగ్జామ్స్’ వెబ్‌సైట్‌ను లాంఛనంగా ప్రారంభించారు. ఉదయ్‌భాస్కర్‌ మాట్లాడుతూ.. సమాచార విప్లవం ముంగిటలోకి వచ్చినప్పటికీ ఏ సమాచారం ఎంతమేర అవసరమో తెలియని సందిగ్ధతకు ఈ పుస్తకం సమాధానమని వివరించారు. రచయిత హనుమంతురావు స్వయంకృషితో ప్రతి ఒక్క విద్యార్థికి సివిల్‌ సర్వీస్‌లోనే కాకుండా ఇతర అన్ని పోటీ పరీక్షల్లో విజ్ఞానాన్ని అందించేందుకు అమరావతి అకాడమీ ఆఫ్‌ కెరియర్‌ కౌన్సెలింగ్‌ అండ్‌ కాంపిటేటివ్‌ ఎగ్జామ్స్ వెబ్‌సైట్‌ను రూపొందించడం అభినందనీయమన్నారు. ఆసక్తి ఉన్న సంస్థలు, వ్యక్తులు వారి పేరున వెబ్‌సైట్‌లో లాగిన్‌ కావడం ద్వారా భవితకు ఉపయోగపడే వివిధ అంశాలను అందిపుచ్చుకునే సదవకాశాన్ని సద్వినియోగం చేసుకోవాలని సూచించారు. పుస్తక రచయిత బీఎల్‌ హనుమంతురావు మాట్లాడుతూ.. పోటీ పరీక్షల్లో ఎందరికో సూచనలు, సలహాలు ఇచ్చి వారి విజయంలో భాగస్వామ్యమైన అనుభవాన్ని ప్రతి ఒక్క విద్యార్థికి అందించాలనే లక్ష్యంతో ఈ పుస్తకాన్ని రచించానని పేర్కొన్నారు. యువత సివిల్‌ సర్వీసులకు ఎలా సమాయత్తం కావాలి? అనుసరించాల్సిన వ్యూహాలేంటి? తదితర అంశాలపై దృశ్యాత్మక ప్రదర్శన ద్వారా వివరించారు.
Website
వైద్య కళాశాలల హబ్‌గా అమరావతి
ఈనాడు, అమరావతి: చరవాణులతో 24 గంటలు గడపడం మంచి పద్ధతి కాదని ఆంధ్రప్రదేశ్ ముఖ్యమంత్రి చంద్రబాబునాయుడు వ్యాఖ్యానించారు. విజయవాడలో గురువారం (సెప్టెంబరు 7) అమరావతి అమెరికన్ ఇన్‌స్టిట్యూట్ ఆఫ్ మెడికల్ సైన్సెస్ నిర్మాణ పనులకు శంకుస్థాపన చేసిన అనంతరం మాట్లాడారు. 'చరవాణులను అవసరాలకు తగ్గట్లు మాత్రమే వాడాలి. బ్లూవేల్ ఆత్మహత్యల తీరు నన్నెంతో కలచివేస్తోంది. రాష్ట్ర వైద్య రంగంలో విప్లవాత్మక మార్పుల్ని తీసుకువస్తున్నాం. అమరావతి పరిధిలో ఇప్పటికే ఉన్న.. రానున్న కొత్త వాటితో కలిపి 13 వైద్య కళాశాలలు ఉండబోతున్నాయి. స్వస్థలాల నుంచి అమెరికా వంటి విదేశాలకు వెళ్లిన వైద్యులు జన్మస్థలంలో వైద్య కళాశాల ద్వారా సేవలను అందించేందుకు ముందుకు రావడం హర్షణీయం. ఈ స్ఫూర్తితో విదేశాల్లోని మిగిలిన వైద్యులు, ఇతర రంగాలకు చెందిన వారు జన్మభూమికి సేవలు అందించాలి. అమెరికన్లు ఇక్కడికి వచ్చి శస్త్రచికిత్సలు చేయించుకునే పరిస్థితులను తీసుకురావాలి. వస్తాయన్న నమ్మకం నాకుంది. వైద్య ఆరోగ్య శాఖ తరఫున ప్రజలకు అన్ని రకాల వైద్య సేవలను దగ్గర చేసేందుకు అనేక కార్యక్రమాలను చేపడుతున్నాం. వైద్య విద్యార్థులను గ్రామాలకు పంపి వారికి క్షేత్రస్థాయిలో పరిస్థితులపై అవగాహన కల్పిస్తున్నాం. ప్రమాదాలు జరిగిన సమయంలో అత్యవసర చికిత్స కోసం అడ్వాన్స్ మెడికల్ సపోర్టు వాహనాలను అందుబాటులోకి తెచ్చాం అని చంద్రబాబు వివరించారు. మంత్రి కామినేని శ్రీనివాస్ మాట్లాడుతూ కృష్ణా జిల్లా ఇబ్రహీంపట్నం వైపు వైద్య కళాశాల వస్తోందని అమరావతి పరిధిలోని వారికి వైద్య సేవలు మరింత అందుబాటులోకి వస్తున్నాయన్నారు. మంత్రులు దేవినేని ఉమమాహేశ్వరరావు, అఖిలప్రియ మాట్లాడిన వారిలో ఉన్నారు. అమరావతి అమెరికన్ ఇన్‌స్టిట్యూట్ ఆఫ్ మెడికల్ సైన్సెస్ ఛైర్మన్ గొర్రెపాటి నవనీత కృష్ణ మాట్లాడుతూ.. రాష్ట్ర విభజనతో నష్టపోయిన ఆంధ్రప్రదేశ్‌కు తమ వంతు సహకారం అందించేందుకు ముందుకొచ్చామన్నారు. రాష్ట్ర ఆర్థికాభివృద్ధి మండలి సీఈఓ కృష్ణకిషోర్ మాట్లాడుతూ 2019 నాటికి 300 పడకలు అందుబాటులోకి వస్తాయని తెలిపారు. 2020 నాటికి పూర్తిస్థాయిలో నిర్మాణాలు పూర్తవుతాయని తెలిపారు. కార్యక్రమంలో భాగంగా వైద్య సంస్థకు స్థల విషయంలో సహకరించిన ఇబ్రహీంపట్నం మాజీ సర్పంచి మల్లెల పద్మానాభరావును ముఖ్యమంత్రి సత్కరించారు.
ఉపాధ్యాయ ఉద్యోగాల భర్తీకి మార్గం సుగమం
* 8432 పోస్టులకు ఆర్థిక శాఖ అనుమతి
ఈనాడు, హైదరాబాద్‌: తెలంగాణ రాష్ట్రంలో ఉపాధ్యాయ ఉద్యోగాల భర్తీకి ఎట్టకేలకు మార్గం సుగమమైంది. 8432 పోస్టుల భర్తీకి అనుమతిస్తూ ఆర్థికశాఖ సెప్టెంబరు 6న ఉత్తర్వులు జారీ చేసింది. అధికారికంగా ఉత్తర్వులు ఇస్తే తప్ప భర్తీ ప్రక్రియపై ముందుకువెళ్లే పరిస్థితి ఉండదని విద్యాశాఖ కోరిన నేపథ్యంలో ఆర్థికశాఖ ఈ ఉత్తర్వులిచ్చింది. అలాగే రాష్ట్రంలో వివిధ శాఖల్లోని సుమారు 84 వేల ఉద్యోగాలు భర్తీ చేయనున్నట్లు ప్రభుత్వం ప్రకటించిన నేపథ్యంలో..వివిధ శాఖల్లోని ఖాళీల వివరాలను తాజాగా పంపాలని ఆర్థికశాఖ అన్ని శాఖలను ఆదేశించింది. తాజా వివరాలు అందిన తర్వాత భర్తీకి సంబంధించి తదుపరి ప్రక్రియ కొనసాగించేందుకు అవకాశం ఏర్పడుతుందని ఆ శాఖ వర్గాలు తెలిపాయి. ‘గతంలో వివరాలందించిన తర్వాత ఖాళీలు ఏర్పడి ఉంటాయని, తాజా సమాచారం తీసుకుంటే వాటిని కూడా ఉద్యోగ ప్రకటనల్లో చేర్చవచ్చని' అధికారులు చెబుతున్నారు.